Iragarkia

84. ALDIZKARIA - 2021eko apirilaren 15a

1. NAFARROAKO FORU KOMUNITATEA

1.7. BESTELAKOAK

598/2021 EBAZPENA, 2021eko martxoaren 10ekoa, Nafarroako Unibertsitate Publikoko errektoreak emana. Haren bidez agintzen da Nafarroako Aldizkari Ofizialean argitaratzeko Gizarte Kontseiluaren 2020ko uztailaren 3ko 7/2020 Erabakia, “Nafarroako Unibertsitate Publikoko Graduko eta Unibertsitate Masterreko Ikasketetan Jarraitzeko Arauak” onesten dituena.

Dagokion prozedura formalizatuta, bidezkoa da Gizarte Kontseiluaren 2020ko uztailaren 3ko 7/2020 Erabakia argitaratzeko agintzea; horren bidez onesten dira, Unibertsitate Kontseiluko Batzorde Iraunkorraren nahitaezko txostenarekin batera, “Nafarroako Unibertsitate Publikoko Graduko eta Unibertsitate Masterreko Ikasketetan Jarraitzeko Arauak”.

Azaldutako guztiarengatik, 2003ko maiatzaren 12ko 110/2003 Foru Dekretuak onetsitako Unibertsitatearen Estatutuetako 40. artikuluak ematen dizkidan ahalmenak erabiliz,

EBATZI DUT:

Lehenengoa.–Agintzea Nafarroako Aldizkari Ofizialean eta Nafarroako Unibertsitate Publikoko iragarki oholean argitaratzeko Gizarte Kontseiluaren 2020ko uztailaren 3ko 7/2020 Erabakia, “Nafarroako Unibertsitate Publikoko Graduko eta Unibertsitate Masterreko Ikasketetan Jarraitzeko Arauak” onesten dituena, ebazpen honen eranskinean ezarritakoaren arabera.

Bigarrena.–Erabaki honen aurka, zilegi da administrazioarekiko auzi-errekurtsoa jartzea Nafarroako Administrazioarekiko Auzietako Epaitegietan, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat.

Iruñean, 2021eko martxoaren 10ean.–Errektorea, Ramón Gonzalo García.

ERANSKINA

Nafarroako Unibertsitate Publikoko graduko eta unibertsitate masterreko ikasketetan jarraitzeko arauak

Unibertsitateei buruzko 6/2001 Lege Organikoak –4/2007 Legearen bidez aldatua– 46. artikuluan ezartzen duenez, Gizarte Kontseilua arduratuko da, Unibertsitate Kontseiluaren txostena jaso ondoren, ikasleek Unibertsitatean jarraitzeko eta aurrera egiteko arauak onartzeaz, beren ikasketen ezaugarrien arabera.

Bestalde, Nafarroako Unibertsitate Publikoko Gizarte Kontseiluari buruzko Foru Legearen 7 d) artikuluak adierazten duenez, Gizarte Kontseiluaren eskumena da “onartzea, Unibertsitate Kontseiluaren txostena jaso ondoren, eta kasuan kasuko ikasketen ezaugarrien arabera, ikasleek Nafarroako Unibertsitate Publikoan jarraitzeko eta aurrera egiteko arauak”.

Nafarroako Unibertsitate Publikoko Gizarte Kontseiluak, bere ikasketa ofizialak Europako Unibertsitate Eremura egokitzeko prozesuaren esparruan, graduko ikasketetan jarraitzeari buruzko araudia ezarri zuen 2009ko urriaren 22ko erabaki baten bidez, eta masterreko ikasketetan jarraitzeari buruzkoak, berriz, 2011ko azaroaren 8ko erabaki baten bidez –gero, alderdi ez-funtsezkoetan aldatu zen, 2013ko maiatzaren 22ko erabaki baten bidez–.

Iraupen Batzordea, 2009ko urriaren 22ko erabakiaren azken xedapenetatik lehenbizikoan ezarri zen bezala, Gizarte Kontseiluaren eskutik sortu zen 2011ko maiatzaren 20an egindako bileran, eta, ordutik hona, Nafarroako Unibertsitate Publikoko ikasleek graduko ikasketetan jarraitzeko arauen aplikazioari dagokionez egin dituzten eskaerak aztertzeaz eta ebazteaz arduratu da.

Arau horiek indarrean egon diren urteetan izan duten eraginkortasuna baloratu du Gizarte Kontseiluak, eta Unibertsitateko graduko eta masterreko ikasketen arau jakin batzuetan izan diren aldaketak ere aztertu ditu, baita titulu ofizialak lortzera bideratutako unibertsitate ikasketen prezio publikoek izan dituzten aldaketak ere. Campus Iberusen ezarritako gidalerroak ere hartu ditu aintzat, hura osatzen duten unibertsitateetan jarraitzeko arauetan homogeneotasun handiagoa lortze aldera. Inguruabar horiei guztiei buruzko gogoetaren helburua arauketa bat ezartzea izan da, hain zuzen ere erantzuna emateko ikasteko eskubidea eta unibertsitateko prestakuntzarako funts publikoen aprobetxamendu egokia bateragarri egiteko premiari.

Aurrekoa ikusirik, Nafarroako Unibertsitate Publikoko Iraupen Batzordeak egin dituen lanak oinarritzat hartuta eta Gizarte Kontseiluko Batzorde Akademikoak proposatuta, Kontseilu honek, 2020ko uztailaren 3an egindako bileran, Nafarroako Unibertsitate Publikoko graduko eta unibertsitate masterreko ikasketetan jarraitzeko arauak onartu ditu.

1. artikulua. Xedea.

Arau hauen xedea ikasleek Nafarroako Unibertsitate Publikoko graduko eta unibertsitate masterreko ikasketa ofizialetan jarraitzeko baldintzak arautzea da.

2. artikulua. Aplikazio eremua.

1. Ikasketetan jarraitzeko arau hauetan ezartzen den araubidea aplikatuko zaie Espainia osoan baliodunak diren unibertsitate titulu ofizialak lortzera bideratutako graduko eta unibertsitate masterreko ikasketetan matrikulatutako Nafarroako Unibertsitate Publikoko ikasleei.

2. Beste unibertsitate batzuekin batera egiten diren titulazioen kasuan, dagokion hitzarmenean edo egiaztapen txostenean ezarritakoari jarraituko zaio.

3. artikulua. Iraupen Batzordea.

Ikasleek ikasketetan jarraitzeko arau horien aplikazioarekin lotuta egiten ahal dituzten eskaerak Unibertsitateko Iraupen Batzordeak ebatziko ditu, Gizarte Kontseiluak 2011ko maiatzaren 20an emandako 6/2011 Erabakian ezarritakoarekin bat etorriz –haren bidez sortu ziren bai Iraupen Batzordea, bai ikasketetan jarraitzeko arauen aplikazioarekin lotutako eskaerak ebazteko prozedura–.

Graduko ikasketetan jarraitzeko arauak

4. artikulua. Deialdi kopurua.

4.1. Ikasleak sei deialditarako eskubidea du irakasgai bakoitza gainditzeko.

4.2. Edozein irakasgaitan matrikulatzeagatik deialdi bat izanen du ikasleak ebaluaziorako, ikasleak matrikula zein ikasturtetan gauzatzen duen, ikasturte horretan.

4.3. Irakasgai baten lehen eta bigarren matrikuletan, deialdia ez da kontuan hartuko irakasgaiaren ebaluazio aktan “Ez aurkeztua” kalifikazioa azaltzen denean.

4.4. Irakasgai baten hirugarren eta hurrengo matrikuletan, ulertuko da deialdia erabili dela ikaslearen aktan “Ez aurkeztua” kalifikazioa azaltzen denean.

5. artikulua. Ikaslearen errendimendu akademikoa.

5.1. Ikasturte bakoitzaren bukaeran, Nafarroako Unibertsitate Publikoko graduko edozein titulaziotan matrikulatutako ikasleei gutxieneko errendimendu bat eskatuko zaie beren titulazioko ikasketetan jarraitzeko. Errendimendu hori kreditu kopuruaren arabera neurtuko da, formula hau aplikatuz:

Errendimendua = (n-1) x (ECTS/2) + 6

n = ikasleak lehen ikasturtetik titulazioan egindako matrikulazio kopurua. ECTS = n matrikulan matrikulatutako kreditu kopurua.

5.2. Baldin eta formularen emaitza ez bada 6ren multiploa, edo emaitzak dezimalik badu, beherantz biribilduko da 6ren multiplo osoa izateko.

5.3. Ikasle bati titulua eskuratzeko beharrezkoak diren kredituen %15 edo gutxiago falta zaizkionean, ez zaio aplikatuko 5. artikulu honetan aipatutako araua.

5.4. Nafarroako Unibertsitate Publikoko graduko edozein titulaziotan arduraldi murriztuan matrikulatutako ikasleei ez zaie aplikatuko 5. artikulu honen 1. apartatutik 3.era ezarritakoa. Horri begira, arduraldi murriztuko ikasleei izaera hori aitortuko zaie Nafarroako Unibertsitate Publikoko graduko ikasketen arauetan ezarritakoaren arabera.

6. artikulua. Graduko ikasketetan jarraitzeko arauak ez betetzea.

6.1. Ikasle batek agortzen baditu 4. artikuluan aurreikusitako sei deialdiak, zilegi izanen du Nafarroako Unibertsitate Publikoko beste ikasketa ofizial batzuk hastea, behin baino ez, horietan onartua izateko ezarritako prozedura orokorra betez.

6.2. Ikasle batek ez badu betetzen 5. artikuluan ezarritako gutxieneko errendimendua, dagozkion ikasketak utzi beharko ditu, eta aukera hauek izanen ditu:

a) Beste ikasketa ofizial batzuk hastea Nafarroako Unibertsitate Publikoan, horietan onartua izateko ezarritako prozedura orokorra betez.

b) Ikasleak ikasketak utzi dituenetik bi ikasturte igarota, aukera izanen du hasitako ikasketekin segitzeko, betiere titulazio hori Unibertsitateak egiten duen eskaintza akademikoaren barnean baldin badago.

6.3. Aukera horietakoren bat hautatu eta gero, ikasle batek berriz ere ez baditu betetzen ikasketetan jarraitzeko arauak, behin betiko utzi beharko dio Nafarroako Unibertsitate Publikoan ikasteari.

Unibertsitate masterreko ikasketetan jarraitzeko arauak

7. artikulua. Deialdi kopurua.

7.1. Ikasleak hiru deialditarako eskubidea du irakasgai bakoitza gainditzeko.

7.2. Edozein irakasgaitan matrikulatzeagatik deialdi bat izanen du ikasleak ebaluaziorako, ikasleak matrikula zein ikasturtetan gauzatzen duen, ikasturte horretan.

7.3. Irakasgai baten lehen matrikulan, deialdia ez da kontuan hartuko irakasgaiaren ebaluazio aktan “Ez aurkeztua” kalifikazioa azaltzen denean.

7.4. Irakasgai baten bigarren eta hurrengo matrikuletan, ulertuko da deialdia erabili dela ikaslearen aktan “Ez aurkeztua” kalifikazioa azaltzen denean.

8. artikulua. Ikaslearen errendimendu akademikoa.

8.1. Ikasturte bakoitzaren bukaeran, Nafarroako Unibertsitate Publikoko unibertsitate masterreko edozein titulaziotan matrikulatutako ikasleei gutxienez 6 ECTS gainditzeko eskatuko zaie beren titulazioko ikasketetan jarraitzeko.

8.2. Unibertsitate masterreko ikasketa ofizialetan jarraitzeko gehieneko epea honako taula honetan ezarritakoa izanen da:

8.3. Ikasle bati titulua eskuratzeko beharrezkoak diren kredituen %15 edo gutxiago falta zaizkionean, ez zaio 8. artikulu honetan aipatutako araua aplikatuko.

9. artikulua. Unibertsitate masterreko ikasketetan jarraitzeko arauak ez betetzea.

9.1. Ikasle batek ez badu betetzen 8. artikuluan ezarritako gutxieneko errendimendua, ezin izanen du titulazio horretako ikasketekin jarraitu, eta aukera hauek izanen ditu:

a) Unibertsitate masterreko beste ikasketa ofizial batzuk hastea Nafarroako Unibertsitate Publikoan, onartua izateko ezarritako prozedura orokorra betez.

b) Ikasleak ikasketak utzi dituenetik bi ikasturte igarota, aukera izanen du hasitako unibertsitate masterreko ikasketekin segitzeko, betiere titulazio hori Unibertsitateak egiten duen eskaintza akademikoaren barnean baldin badago.

9.2. Aukera horietakoren bat hautatu eta gero, ikasle batek berriz ere ez baditu betetzen ikasketetan jarraitzeko arauak, behin betiko utzi beharko dio Nafarroako Unibertsitate Publikoan ikasteari.

Graduko eta masterreko ikasketetan aplikatzekoak diren arau komunak

10. artikulua. Hezkuntza-premia bereziren bat duten ikasleen errendimendu akademikoa.

Unibertsitateak sustatuko du ikasketetan jarraitzeari eta errendimendu akademikoari buruzko araudia desgaitasunen bat duten ikasleen beharretara benetan egokitzea, kasu jakin bakoitza baloratuz eta neurri espezifikoak hartuz.

11. artikulua. Aitortutako kredituak eta baliozkotutako eta egokitutako irakasgaiak.

Aitortutako kredituak eta baliozkotutako eta egokitutako irakasgaiei dagozkienak ez dira kontuan hartuko 5. eta 8. artikuluetan ezarritako errendimendu akademikoa betetzeko.

12. artikulua. Gizarte Kontseiluarentzako txostena.

Iraupen Batzordeko buruak, ikasturte bakoitza bukatutakoan, Nafarroako Unibertsitate Publikoko graduko eta masterreko ikasketetako ikasleek horietan jarraitzeari buruzko txosten bat igorriko dio Gizarte Kontseiluari, arau hauen aplikazioari eta Iraupen Batzordearen jarduerari buruzko datuekin.

AZKEN XEDAPENA

Araudi honek 2020-2021 ikasturtean hartuko du indarra Nafarroako Unibertsitate Publikoko graduko eta unibertsitate masterreko ikasleentzat.

XEDAPEN IRAGANKORRA

Ikasketak 2019-2020 ikasturtean edo aurrekoetan hasi eta, araudi hau aplikatzeagatik, ikasketetan jarraitzeko arauen betebeharrak betetzen ez dituzten ikasleek aukera izanen dute beren ikasketetan jarraitzeko, baldin eta lehenagoko arauetan ezarritakoa betetzen badute. Iraupen Batzordeak aurreikuspen hori aplikatzeko eskumena izanen du, ikasleak eskatu ondoren.

Iragarkiaren kodea: F2104744