Iragarkia

65. ALDIZKARIA - 2021eko martxoaren 23a

1. NAFARROAKO FORU KOMUNITATEA

1.7. BESTELAKOAK

9/2021 FORU AGINDUA, otsailaren 23koa, Lurralde Kohesiorako kontseilariak emana, proiektu hau behin betiko onesten duena: “Getze Galar-Espartza Galar (Nafarroa) NA-6008 errepidea zabaldu eta hobetzea”.

Lurralde Kohesiorako kontseilariaren azaroaren 4ko 75/2020 Foru Aginduaren bidez, “Getze Galar-Espartza Galar (Nafarroa) NA-6008 errepidea zabaldu eta hobetzea” proiektua behin-behinekoz onetsi zen.

Jendaurreko aldia bukaturik, alegazio batzuk jaso dira. Hona hemen haien edukia eta emandako erantzuna:

1.–2020/1127880 alegazioa, Jose María Montes Ros jaunak Potasas de Subiza SA enpresa ordezkatuz aurkeztua.

1. Eskatzen du aintzat hartzea eta berariaz biltzea Potasas de Subiza SAk bi hoditeriei lotuta daukan bide-zortasuna, bai Potasas de Subiza SArenak diren lurzatietan, bai hirugarrenenak diren eta desjabetuko diren lurzatietan ere: 10. poligonoko 772 A lurzatia, 10. poligonoko 788. lurzatia, 4. poligonoko 304. lurzatia, 4. poligonoko 312. lurzatia, 4. poligonoko 311. lurzatia, 4. poligonoko 286. lurzatia, eta 50. poligonoko 50. lurzatia. (Eransten da hoditeriaren trazatuaren plantako planoa).

2. Eskatzen du Galarko udal-mugarteko 10. poligonoko 772 A lurzatian Potasas de Subiza SArenak diren lurrak desjabetu beharrekoetatik kentzea, galarazteko bertan sartzea egun egon badauden azpiegiturak (hesiak, sarrerako atea, hodiak, erregulazio-kutxatilak...), aldatu ezin direnak. (Eransten da 772 A lurzatiaren instalazioen eta desjabetzeen planoa).

Erantzuna:

1. Eskatutakoa ezesten da. Proiektuak aurreikusten du ukitutako zerbitzuak leheneratuko direla eta titulartasunari eutsiko zaiola.

2. Eskaera hein batean baiesten da. Ondoko jabari publikoaren desjabetzea mugatzen da, Arrubias-Getze eroanbidea erregulatzen duen kutxatila ez ukitzeko.

2.–2020/1128960 alegazioa, Electra Valdizarbe Distribución SLUk aurkeztuta.

1. Electra Valdizarbe Distribución SLUk adierazten du proiektuan biltzen diren bi errepide-gurutzaketa (NA-6008 errepidean) egiten dituen 13,2 kV-eko linea elektrikoaren titularra/jabea dela; eta titulartasuna, oker baten ondorioz, Iberdrola Distribución Eléctrica SArena dela esaten dela.

2. Electra Valdizarbe Distribución SLUk eskatzen du linea elektrikoaren bide-zortasunei euts dakien.

Erantzuna:

1. Eskatutakoa baiesten da.

2. Eskatutakoa ezesten da. Ukitutako lurren desjabetza erabatekoa planteatzen da, eta kargak edukiz gero hori egiaztatzen duen dokumentazioa aurkeztu beharko da. Halaber, proiektuak aurreikusten du ukitutako zerbitzuak leheneratuko direla eta titulartasunari eutsiko zaiola.

Jendaurrean jarri eta gero, eta proiektuaren idazketa amaitu eta gero, Galarko Udalak adierazi zion Herri-lanen eta Azpiegituren Zuzendaritza Nagusiari beharrezkoa zela inguruko udalerriak zuntz optikoaren bidez konektatzea, eta eskatu zuen proiektuan sartzeko azpiegitura bat eraiki behar dela zuntz optikozko kablearen linea eramateko.

Galarko Udalaren eskaera horri kasu egiteko, “Getze Galar-Espartza Galar (Nafarroa) NA-6008 errepidea zabaldu eta hobetzea” proiektuari adenda bat gehitu zaio, non ezaugarri hauek dituen azpiegitura berri bat sartu baita: 1,10 m-ko batez besteko sakonera duen kanalizazio bat, eta bi hodi hirukoitz, 50 mm-ko diametro dutenak, aski direnak obren jarduketa-eremuan etorkizunean paratuko den zuntz optikoa eramateko.

Adendan jasotako obrak dagokion proiektuan egindako behin betiko okupazioan kokatzen dira; beraz, ez da beharrezkoa okupazio gehigarririk egitea.

Nafarroako Errepideei buruzko martxoaren 23ko 5/2007 Foru Legearen 20.4 artikuluan ezarritakoarekin bat, bidezkoa da proiektua behin betiko onestea.

Hori horrela, Nahitaezko Desjabetzeari buruzko Legearen 52.2 artikuluari jarraikiz, eta Lurralde Kohesiorako Departamentuaren egitura organikoa ezartzen duen urriaren 30eko 263/2019 Foru Dekretuaren 26. artikuluaren g) letraren bidez eskuratu ditudan ahalmenak erabiliz,

AGINTZEN DUT:

1. “Getze Galar-Espartza Galar (Nafarroa) NA-6008 errepidea zabaldu eta hobetzea” proiektuaren jendaurreko epea ebaztea, ukitutako ondasun eta eskubideen ondorioetarako, azalpen zatian azaldu bezala.

2. “Getze Galar-Espartza Galar (Nafarroa) NA-6008 errepidea zabaldu eta hobetzea” proiektua behin betiko onestea, baita bere adenda ere. Aurrekontuak 1.183.998,17 euro eta 139.419,97 euro izanen dira, hurrenez hurren, BEZa kanpo.

3. Behin betiko onestea ukitutako ondasun eta eskubideen zerrenda. Eranskinean ageri da.

4. “Getze Galar-Espartza Galar (Nafarroa) NA-6008 errepidea zabaldu eta hobetzea” izeneko proiektuak ukitutako ondasun eta eskubideen titularrei dei egitea, 2021eko apirilaren 27an, 28an eta 29an Galarko Udaletxean ager daitezen, okupatu aurreko aktak egiteko, eta hala badagokio, okupazio aktak egiteko.

5. Ebazpen hau ukitutako titularrei jakinaraztea, banakako zitazio zedularen bidez.

6. Ekitaldi horretara titularrek beraiek joan beharko dute, edo haien izenean aritzeko behar bezala baimendutako pertsona bat bidali, titulartasuna frogatzen duten agiriak aldean dituztela (eskritura publikoa, jabetza erregistroko ziurtagiria, etab.); egoki baderitzote, perituak eta/edo notarioa eraman ditzakete, baina, betiere, norberak ordainduta.

7. Foru agindu hau Nafarroako Aldizkari Ofizialean eta departamentuaren web-orrian argitaratzea, eta dagokion iragarkia bidaltzea Foru Komunitatean hedapen handiena duten egunkarietako bitara.

8. Foru agindu hau jakinaraztea Azterlan eta Proiektuen Zerbitzuari eta Galarko Udalari, eta azken hori premiatzea iragarki-taulan argitara dezan.

9. Adieraztea foru agindu honek ez duela administrazio bidea amaitzen, eta partikularrek gora jotzeko errekurtsoa aurkezten ahal dutela horren aurka, Nafarroako Gobernuari zuzenduta, hilabeteko epean, foru agindua jakinarazi edo Nafarroako Aldizkari Ofizialean argitaratu eta biharamunetik aitzina.

Aurreko paragrafoan xedatutakoa ezertan galarazi gabe, foru agindu honek amaitzen du administrazio publikoentzako administrazio bidea. Dena dela, administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, hura jakinarazi edo Nafarroako Aldizkari Ofizialean argitaratu eta biharamunetik aitzina. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2021eko otsailaren 23an.–Lurralde Kohesiorako kontseilaria, Bernardo Ciriza Pérez.

Iragarkiaren kodea: F2103370