Iragarkia

32. ALDIZKARIA - 2021eko otsailaren 11

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

163/2021 EBAZPENA, urtarrilaren 18koa, Funtzio Publikoko zuzendari nagusiak emana, zeinaren bidez bukaera ematen baitzaio Nafarroako Foru Komunitateko Administrazioaren eta haren erakunde autonomoen zerbitzuko liburutegiko arduradunen lanpostu hutsak lekualdatze lehiaketa bidez betetzeko prozedurari.

Funtzio Publikoko zuzendari nagusiak otsailaren 3an emandako 306/2020 Ebazpenaren bitartez, deialdi bat onetsi zen Nafarroako Foru Komunitateko Administrazioaren eta haren erakunde autonomoen zerbitzuko liburutegiko arduradunen lanpostu hutsak lekualdatze-lehiaketa bidez betetzeko. Ebazpena 2020ko 41. Nafarroako Aldizkari Ofizialean argitaratu zen, otsailaren 28koan.

Funtzio Publikoko zuzendari nagusiak ekainaren 8an emandako 1406/2020 Ebazpenaren bidez, izangai onartuen behin betiko zerrenda onetsi zen. Ebazpen hori 2020ko 143. Nafarroako Aldizkari Ofizialean argitaratu zen, ekainaren 30ekoan.

Gero, Funtzio Publikoko zuzendari nagusiaren urriaren 19ko 2390/2020 Ebazpenaren bidez, lekualdatze-lehiaketan eskaini beharreko lanpostu hutsak zehaztu ziren, deialdiaren 2. oinarrian aurreikusitakoari jarraikiz.

Azkenik, Funtzio Publikoko zuzendari nagusiak urriaren 19an emandako 2414/2020 Ebazpenaren bidez, lanpostu hutsak aukeratzeko ekitaldirako deia egin zen, eta 10 egun balioduneko epea ireki zen lanpostuak aukeratzeko.

Deialdian ezarritakoari jarraikiz lanpostu hutsak aukeratzeko ekitaldia eginik, bidezkoa da orain lehiatzaileei lanpostuak esleitzea.

Horrenbestez, eta otsailaren 21eko 30/2005 Foru Dekretuaren bidez esleiturik ditudan eskudantziak erabiliz,

EBAZTEN DUT:

1. Bukaera ematea Nafarroako Foru Komunitateko Administrazioaren eta haren erakunde autonomoen zerbitzuko liburutegiko arduradunen lanpostu hutsak lekualdatze lehiaketa bidez betetzeko prozedurari, lanpostuak I. eranskinean ezarri bezala esleituta.

2. Lehiatzaileei adieraztea ezen beren destino berrien jabetza-hartzea egintzat joko dela, beste tramiterik gabe, 2021eko otsailaren 18an.

3. Indarreko araudian eta deialdiaren oinarrietan xedatutakoarekin bat, honako hau adieraztea:

a) Nafarroako Administrazio Publikoen zerbitzuko Langileen Estatutua onesten duen abuztuaren 30eko 251/1993 Legegintzako Foru Dekretuaren hamargarren xedapen gehigarriaren 1. puntuaren bigarren paragrafoan xedatutakoarekin bat, lanaldi partzialeko lan-kontratua izanik jabetza hartzeko egunean lanaldi osoko zerbitzuak egitera pasatzen diren lehiatzaileak Nafarroako Foru Komunitateko Administrazioaren eta haren erakunde autonomoen funtzionario bihurtuko dira, lanpostuaren jabetza hartzen duten egunetik beretik, baina lehendik zuten aurreikuspen sozialeko araubideari atxikita segituko dute.

b) Jabetza hartzeko egunean zerbitzu berezietako egoera administratiboan dauden lehiatzaileen kasuan, edo eszedentzia bereziko egoera administratiboan, edo zerbitzu eginkizunetan Nafarroako Foru Komunitateko Administrazioa edo haren erakunde autonomoak ez diren beste Administrazio Publiko batean, lanpostuaren jabetza egintzat joko da, beste tramiterik gabe, egun horretan, eta ordura arteko egoeran segituko dute, apirilaren 14ko 96/1997 Foru Dekretuan xedatutakoari jarraikiz, salbu adierazten badute egoera horri bukaera eman nahi diotela; kasu horretan, egun hori baino lehen jakinarazi beharko diote Funtzio Publikoko Zuzendaritza Nagusiko Langileriaren Kudeaketako Zerbitzuari.

c) Era berean, lanpostuaz jabetzeko egunean amatasun edo aitatasun lizentzia hartua duten edo aldi baterako ezintasun egoeran nahiz oporretan dauden lehiatzaileen kasuan, ulertuko da jabetza-hartzearen egun horretan berean jabetzen direla lanpostu berriaz. Hala ere, kasu horietan destinoko zentroko langileria unitatean aurreabisua egin beharko dute, bai eta egoera hori frogatu ere.

4. Lekualdatze lehiaketaren hasierako esleipenaren ondorioz hutsik gelditu diren 33 lanpostuak II. eranskinean jaso dira.

5. Ebazpen hau igortzea, behar diren ondorioak izan ditzan, Kultura eta Kirol Departamentuko eta Landa Garapeneko eta Ingurumeneko Departamentuko idazkaritza tekniko nagusiei, Osasunbidea-Nafarroako Osasun Zerbitzuko Langileriaren eta Lan Harremanen Zuzendariordetzari eta Funtzio Publikoko Zuzendaritza Nagusiko Langileriaren Gastuaren Kontrolaren eta Nominen Zerbitzuari, Egituraren, Lanpostuen Antolaketaren eta Langileen Plantillaren Zerbitzuari eta Langileriaren Kudeaketako Zerbitzuari.

6. Ebazpen hau Nafarroako Aldizkari Ofizialean argitara dadila agintzea. Argitalpen horrek jakinarazpenaren ondorio guztiak edukiko ditu, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan ezarritakoari jarraikiz, eta gora jotzeko errekurtsoa aurkezten ahalko da haren kontra, Lehendakaritzako, Berdintasuneko, Funtzio Publikoko eta Barneko kontseilariari zuzendua, hilabeteko epean, jakinarazi eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan ezarritakoarekin bat.

Iruñean, 2021eko urtarrilaren 18an.–Funtzio Publikoko zuzendari nagusia, Amaia Goñi Lacabe.

Iragarkiaren kodea: F2101154