2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
LARRAGETA
Hilerriaren erabilera arautzen duen ordenantza.
Behin betiko onespena
Larragetako Kontzejuak, 2021eko apirilaren 9an egin osoko bilkuran, hasiera batez onetsi zuen Hilerria arautzen duen kontzejuaren ordenantza.
Hasierako onespenaren iragarkia 2021eko 94. Nafarroako Aldizkari Ofizialean argitaratu zen, apirilaren 26an, eta legeak ezarritako jendaurreko epea iragan da inork alegaziorik aurkeztu gabe; hortaz, behin betiko onetsirik gelditu da, eta testu osoa ematen da jarraian.
Larragetan, 2021eko ekainaren 9an.–Kontzejuko burua, María Manso Montes.
KONTZEJUAREN ORDENANTZA, LARRAGETAKO HILERRIAREN ERABILERA ARAUTZEN DUENA
I. KAPITULUA
Xedapen orokorrak
1. artikulua.
Toki Araubidearen Oinarriak arautzen dituen 7/1985 Legearen 4., 25. eta 26. artikuluetan, Nafarroako Toki Administrazioari buruzko 6/1990 Foru Legearen 4. eta 39. artikuluetan, eta Nafarroako Toki Ogasunei buruzko 2/1995 Foru Legearen 12. eta 100. artikuluetan ezarritakoaren arabera, Larragetako Kontzejuari dagokio hilerria administratzea, zuzentzea eta zaintzea, batere ukatu gabe beste administrazio batzuek alor berean dauzkaten legezko eskumena, edo Berriobeitiko Udalarekin dituen hitzarmen partikularrak.
2. artikulua.
Administrazioak, zuzendaritzak eta zaintzak honako ahalmen hauek dakartzate berekin:
a) Hilerriaren higiene eta osasungarritasunarekin ikusteko duen guztia, Berriobeitiko Udalarekin izenpetutako hitzarmenak estaltzen duena alde batera utzita.
b) Barne araubideari dagokion guztia.
c) Lurren eta hilobien antolaketa, banaketa, erabilera eta aprobetxamendua.
d) Eskubideak eta tasak kobratzea.
3. artikulua.
Kontzejuaren ardurapekoak izanen dira hilerriaren antolaketa eta funtzionamendua. Ordenantza honetan arautzen diren hilerriko zerbitzuak erabili nahi dituztenek Larragetako Kontzejuko Burutzari eginen diote eskaera.
4. artikulua.
Hilerrian hilobi hutsak izanen dira Kontzejuko biztanleria zentsuaren araberako kopuruan, edo horietarako lur aski bederen bai.
5. artikulua.
Behar bezalako gizalegea eta errespetua agertzen ez dituzten edo edozein modutan lekuaren berezko baitaratzea hausten duten pertsonei han egotea galaraziko zaie. Debeku da edozein motatako animaliak sartzea, itsu-txakurrak izan ezik.
6. artikulua.
Hilerrian, lur ematen ahalko zaio ehorzteko ekartzen den edozein hilotzi, kasu hauetakoren bat bada:
6.a. Heriotza egunean Larragetan erroldatutako herritarren hilotzak.
6.b. Larragetan gutxienez ere 5 urte (frogaturik) bizi izan direnen hilotzak.
6.c. Goiko baldintza ez bete arren, aurrekoak, ondorengoak, ezkontidea edo izatezko bikotekidea Larragetako hilerrian lurperatuta dituztenen hilotzak. Kasu honetan, ehorzketa eginen da hildakoaren ahaidea dagoen lekuan.
Halaber, legezko izapideak bete behar dira eta, ehorzteko eskubideak lortzeko, ordenantza honetan ezarritako kostuak eta/edo tasak ordaindu behar dira zerbitzuagatik.
7. artikulua.
Ezin izanen da zementuzko itxiturarik edo lauzarik jarri. Ordenantza hau onesteak ez dakar berekin hilobien gainean jada jarrita daudenak kendu behar izatea, beharrezko kasuetan izan ezik.
8. artikulua.
Kontzejuak ez du bere gain inolako erantzukizunik hartuko, hilerriaren esparruan gertatzen diren lapurretengatik edo kalteengatik, halakorik gertatuz gero.
9. artikulua.
Ordenantza honek arautzen dituen zerbitzuak egiteagatik tasak ordaindutakoan erabiltzen ahalko dira hilerriko lurrak, lurreko hilobietarako, nitxoetarako edo kolunbarioetarako, 10 urterako gutxienez.
10. artikulua.
Titularren ardura da hilobiak segurtasun, higiene eta apaindura egoera egokian mantentzea. Kontserbazio egoera egokia ez denean, Kontzejuak interesdunei eskatuko die 30 egun naturaleko epean beharrezko lanak egin ditzaten. Epe hori iraganik, Kontzejuak berak eginen ditu lan horiek, eta sortzen den kargua titularrei ordainaraziko die.
11. artikulua.
Emakidak eta aprobetxamendua honako arrazoi hauengatik ere buka daitezke:
11.a. Hilerria desagertzeagatik.
11.b. Interes publikoagatik.
11.c. Hobiak behar izateagatik, beste ehorzketa batzuk egiteko.
II. KAPITULUA
Ehorzketak, hobitik ateratzeak eta lekualdatzeak
12. artikulua.
12.a. Hilotzak edo gorpuzkiak ehortzi, hobitik atera eta lekuz aldatzeko, Hileta-Osasunari buruzko Erregelamenduaren arauei eta kapitulu honetan xedatutakoari jarraituko zaie.
12.b. Lekua aurreztu beharrez, familia batek baldin badauka ehorzketa bat gutxienez 10 urte lehenago egindakoa, beharturik dago leku horretan egitera ehorzketa berria. Ezin izanen da erabili beste leku bat. Azken ehorzketatik ez badira iragan 10 urte, ehorzketa beste leku batean egiten utziko da. Kasu horietan, 10 urte iragan ondoren, nahitaezkoa izanen da gorpuzkiak familia hilobira eramatea.
12.c. Gorpuzkiak dauzkaten hilobietan ehorzteko, aldez aurretik gorpuzki horiek bildu beharko dira, eskubidearen titularrari edo berak eskuordetzea emaniko pertsonari abisua eman eta gero; gorpuzkiok berriz ehorzten ahalko dira, beste hilotz bat utzi behar denean.
12.d. Osasun baimena beharrezkoa izanen da hilotzak edo gorpu-hondakinak atera edo ehorzteko, hilerri honetara edo beste hilerri batera eraman nahi direnean, Hileta Osasunari buruzko Erregelamenduan ezarritako kasuetan (urriaren 15eko 297/2001 Foru Dekretua).
Nolanahi ere, osasunari buruz indarrean dauden xedapenetan ezarritakoari jarraikiz eginen dira jarduketa horiek guztiak, osasunaren aldetik behar diren neurri guztiak hartuta.
13. artikulua.
Hilotzak edo gorpuzkiak hilerrian bertan lekuz aldatzeko atera daitezke hobitik, baita beste hilerri batera eramateko ere, eta bi kasuetan hilobiaren gaineko eskubidearen titularraren eskabidea beharko da.
Hilotzak edo gorpuzkiak hobitik ateratzen badira hilerriaren barreneko beste hilobi batera eramateko, zein hilobitan berrehortzi nahi den, haren gaineko eskubidea duen titularraren baimena beharko da.
14. artikulua.
Hilobitik ateratzea, ehorzketa berriak egiteko.
Hilerriko zein aldetan dauden hilobi zaharrenak, handik hasiko da, eta ezarritako errotazioari jarraikiko zaio; hurrenkera hori ezin izanen da aldatu, jada badiren panteoien kasuan izan ezik, panteoiaren jabe den familiak argi adierazten badu bertan ehortzi nahi dituela hildako senitartekoak.
Epea iraungitzeagatik ateratzean hilobitik, ez da inolako abisurik eman beharko, nahiz eta senitartekoei garaiz jakinarazten saiatuko den. Panteoien kasuan, epea iraungitzen bada edo ezarritako errotazio txanda aplikatzen bada, jabe den familiak lehen aipaturiko adierazpen argia egin beharko du.
15. artikulua.
Beste hilerri batetik ekarritako hilotz edo gorpuzkiak ehorzteko ezin izanen da lur berria okupatu; hildako senitarteko baten beste hilobi batean jarri beharko dira.
16. artikulua.
Kontzejuak eremu bat finkatzen ahalko du hilerriaren barrenean nitxoak edo kolunbarioak egiteko, horietan hilkutxak edo hilotz erraustuen ontziak jar daitezen (errauts kutxatilak, ontziak, etab.). Errauts horiek ehorzteko nahiz hobitik ateratzeko, ordenantza honetako arauak aplikatuko dira.
17. artikulua.
Hilotz erraustuen kutxatilak edo ontziak beste hilobi batek okupatutako lur eremuan ehorzten ahalko dira, baldin eta hildako senitarteko batena bada, eta okupatutako hilobiaren titularraren hurbileneko familiak eskatzen badu.
III. KAPITULUA
Hilerriko hilobien erregistroa
18. artikulua.
Hilerrian egiten diren hilobi eta zerbitzuen erregistroa sortzen da, eta honako hauek jasoko ditu:
18.a. Hilobien identifikazioa.
18.b. Ehorzketa eguna.
18.c. Hildakoaren izen-deiturak.
18.d. Eskualdaketak, honako hauek adierazita: eskualdatze data, titular berriaren datuak, eta eskualdaketaren zioa.
18.e. Ehorzketak, hobitik ateratzeak eta tokiz aldatzeak, honako hauek adierazita: hilotza den pertsonaren izen-deiturak, eta jarduketaren eguna.
18.f. Gorabeherak eta erreklamazioak: hilobia edo haren ingurua ukitzen duen beste gertaera oro.
Kontzejuko Idazkaritza arduratuko da erregistroaz. Beharrezko neurriak hartuko ditu datuen segurtasuna bermatzeko, eta horiek aldatzea, galtzea edo inor baimenik gabe haietara iristea eragozteko. Inskripzioetan akats materialik bada, ofizioz zuzenduko da, akatsa argi eta garbi adierazi eta zuzentzeko idatzizko ohar berria eginez.
IV. KAPITULUA
Tasak hilerrian zerbitzuak emateagatik
19. artikulua.
Berdinak dira tributu tasa edo kuota eta zerga-oinarria; azken hori ordenantza honen 20. artikuluan zehazten da.
20. artikulua.
Zerga-egitatea sortzen da zerbitzu hauek gauzatzean:
20.1 Hilotzak ehorzteko tasak.
Larragetako Kontzejua ez da ehorzketaz arduratuko ordenantza honen 6. artikuluan aipatzen diren kasuetan. Ehorzketaren kostua eskatzailearen gain geldituko da beti. Partikularra harremanetan jarri beharko da hilotzak lekualdatzeko eta hobiratzeko Udalarekin hitzarmena egin duen enpresarekin, eta enpresa horrek kobratzen dituen tasak ordaindu beharko ditu. Ez badago hitzarmenik, eskatzaileak harremanetan jarri beharko du horretarako aukeratu duen hileta-enpresarekin, eta kostua ordaindu beharko du.
Eskatzaile titularrak, gainera, Larragetako Kontzejuari ordaindu beharko dio kopuru bat, ordenantza honen artikulu bakoitzean biltzen diren egoeren arabera:
6.a. Kosturik gabe.
6.b. Kosturik gabe.
6.c. Titular eskatzaileak 200,00 euro ordaindu beharko ditu.
Hori, lur eremua 10 urtez erabiltzeko eskubideengatik. Tasa hori urtero eguneratuko da kontsumoko prezioen indizearen arabera, Estatistikako Institutu Nazionalak Nafarroarako zehaztutakoaren arabera. Hilotz erraustuen ontziak ehorzteko tasak.
Ordenantza honetako 6. artikuluan jasotako egoera guztietan, titular eskatzaileak jarraian aipatzen den zenbatekoa ordaindu beharko dio Larragetako Kontzejuari, ehorzlekua 10 urtez erabiltzeko eskubideengatik. Tasa urtero eguneratuko da, Estatistikako Institutu Nazionalak Nafarroarako ezarritako Kontsumoko Prezioen Indizearen arabera.
Hilobietan hobiratzen badira, 20.1. artikuluan jasotakoak izanen dira. Hala ez bada, eskatzaile titularrak Larragetako Kontzejuari ordaindu beharko dio kopuru bat, ordenantza honen artikulu bakoitzean biltzen diren egoeren arabera:
6.d. Kosturik gabe.
6.e. Kosturik gabe.
6.f. Titular eskatzaileak 100,00 euro ordaindu beharko ditu.
20.2 Hilotzak hobitik ateratzea.
Hilerriko hilobi guztietarako, eskatzaileak ordaindu beharko du hileta-enpresaren zerbitzuaren kostua. Kontzejuari ez zaio tasa gehigarririk ordainduko.
20.3 Hilobiei lotutako beste lan batzuk.
Horien kostua eskatzailearen gain geldituko da.
21. artikulua.
Ordenantza honetan araututako zerbitzuetako bat eskatzen dutenak dira tasa hauen subjektu pasiboak, izan pertsona fisikoak, izan pertsona juridikoak edo izan, nortasun juridikorik gabe, batasun ekonomikoa edo ondare bereizia eratzen duten entitateak.
22. artikulua.
Lizentziak ematen ahalko dira hobi berean bi hilotz edo gorpuzki nahiz gehiago batera lurperatzeko, baldin eta ehorzketa lekuak behar bezain zedarriturik badaude, baina hilotz bakarra lurperatzetik gorako lanak partikularrak berak egin beharko ditu, bere kontura.
23. artikulua.
Hilerri honetako hilobi batetik gorpuzkiak atera eta bertako beste batean ehortziz gero, dagozkion tasak ordaindu beharko dira. Gorpuzkiak beste hilerriren batetik ekarriz gero, ehorzketari dagozkion tasak ere ordainduko dira.
24. artikulua.
Zerbitzuak egin aurretik ordainduko dira 20. artikuluan ezarritako tasak, premia larria dagoenean izan ezik.
Nafarroako Toki Ogasunei buruzko Foru Legearen 108. artikuluan xedatuari jarraikiz, tasak autolikidazio bidez eskatuko dira.
Xedapen gehigarria.
Ordenantza honetan jasotzen ez den orotan, Hileta Osasunari buruzko urriaren 15eko 297/2001 Foru Dekretuan eta indarrean diren gainerako arauetan ezarritakoari jarraikiko zaio.
Iragarkiaren kodea: L2110342
