4. PROZEDURA JUDIZIALAK
NAFARROAKO JUSTIZIA AUZITEGI NAGUSIA
ADMINISTRAZIOAREKIKO AUZIEN SALA
Oinarrizko Eskubideen gaineko 198/2021 Prozedura
Virginia Arias López de Lacalle, Nafarroako Justizia Auzitegi Nagusiko Administrazioarekiko Auzien Salako Justizia Administrazioaren letradua.
Aditzera ematen dut: sala honetan bideratu den Oinarrizko Eskubideen gaineko 198/2021 Prozeduran, 65/2021 Autoa eman da 2021eko maiatzaren 11n, eta irmo geratu da. Hona hemen haren aurrekariak eta xedapen zatia, hitzez hitz:
“000065/2021 AUTOA.
Lehendakaria: Francisco Javier Pueyo Calleja jauna. Magistratuak: María Jesús Azcona Labiano andrea.–Raquel H. Reyes Martínez andrea.–Antonio Sánchez Ibáñez jauna.–Ana Irurita Díez de Ulzurrun andrea.
Iruñean, 2021eko maiatzaren 11n.
AURREKARIAK
Lehena.–Nafarroako Foru Komunitateko aholkulari juridikoak eta letraduak eskatu du, 2021eko maiatzaren 9ko 00:31n erregistratutako idazki baten bidez, judizialki berrestea Osasuneko kontseilariaren maiatzaren 9ko 13/2021 Foru Aginduaren bidez hartutako neurriak. Foru agindu horren bidez berariazko prebentzio neurri apartekoak hartu ziren Nafarroako Foru Komunitaterako, COVID-19ak eragindako egoera epidemiologikoak izandako bilakaeraren ondorioz.
Bigarrena.–Sala honek, 2021-05-09ko Autoaren bidez, hilaren 9a gaitu zuen jarduketa prozesalak egiteko, igandea baitzen, eta eskaera-idazkia Fiskaltzari bidali zion berehala, txostena egin zezan. Txosten hori 2021-05-09an berean egin zuen, neurri guztien berrespena eskatuz, salbu eta 23:00etatik 06:00ak arte etxean konfinatu beharra, hots, etxeratzeko agindua, uste baitzuen Nafarroako Foru Komunitateak ez duela horretarako eskumenik, neurri hori hartzeko legezko estaldurarik ez dagoelako.
Emaitza horrekin, prozesua ebazpenaren zain gelditu zen.
Sala honen iritzia azalduko duen txostengilea Francisco Javier Pueyo Calleja salako lehendakari jauna da, administrazioarekiko auzietan magistratu espezialista baita.
XEDAPEN ZATIA
Salak erabakitzen du:
1. Berrestea Osasuneko kontseilariaren maiatzaren 9ko 13/2021 Foru Aginduan jasotako osasun neurriak, salbu eta auto honen zuzenbideko oinarrietan zazpigarrenean adierazitakoak. Foru agindu horren bidez berariazko prebentzio neurri apartekoak hartu ziren Nafarroako Foru Komunitaterako, COVID-19ak eragindako egoera epidemiologikoak izan duen bilakaeraren ondorioz.
2. Administrazioak Administrazioarekiko Auzien Sala honi jakinarazi beharko dio berretsitako neurrien betearazpenean eragina duen edozein gorabehera, edo, kasua bada, neurri horiek kentzea eragiten duen beste edozein. Halaber, neurrien luzapena berresteko eskaera egin beharko du, osasun arloko administrazioak halakorik erabakitzen badu.
3. Administrazioak txosten bat igorri beharko dio auzitegi honi, zazpi egun naturaleko epean, bilakaera epidemiologikoari eta hartutako neurrien eraginkortasunari buruzkoa.
4. Eragindako prozesuko kostuak ez zaizkio inori ezartzen berariaz.
Jakinaraz bekie ebazpen hau alderdiei, aditzera emanez ez dela irmoa eta haren aurka kasazio errekurtsoa aurkezten ahal dela, Auzitegi Gorenari zuzendua, hiru egun balioduneko epean, bat etorriz Administrazioarekiko Auzien Jurisdikzioaren Legearen 87. eta 87 ter artikuluarekin (8/2021 Errege Lege Dekretuaren bidez ezarria; 2021eko maiatzaren 5eko Estatuko Aldizkari Ofiziala) eta bertan berariaz aurreikusten diren izapideekin. Horretarako, ez da nahitaezko baldintza aurretik berraztertzeko errekurtsoa aurkeztea.
Halaxe erabaki, agindu eta sinatu dute idazpuruan adierazitako magistratu jaun-andreek.”
Eta Nafarroako Aldizkari Ofizialean argitara dadin, honako hau egin eta sinatzen dut.
Iruñean, 2021eko uztailaren 1ean.–Justizia Administrazioaren letradua, Virginia Arias López de Lacalle.
Iragarkiaren kodea: J2110735
