1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.1. Kargu-uzteak, izendapenak eta bestelako egoerak
63/2021 FORU DEKRETUA, ekainaren 30ekoa, zeinaren bidez María Concepción de Río Solano andrea, Euskarabidea-Euskararen Nafar Institutuko Aholkularitza Ataleko burua, izendatzen baita erakunde autonomo horretan Euskara Administrazio Publikoetan Garatzeko Zerbitzuko zuzendari kargua bete dezan bitarte baterako.
Bat etorriz Euskarabidea-Euskararen Nafar Institutuko zuzendari kudeatzailearen ekainaren 23ko 33E/2021 Ebazpenean xedatutakoarekin, horren bidez izendatu baitziren erakunde autonomo horretako zerbitzuko zuzendarien eta atalburuen ordezkoak, ekainaren 7tik aurrera, María Concepción de Río Solano, Aholkularitza Ataleko burua, Hasier Morrás Aranoa Euskara Administrazio Publikoetan Garatzeko Zerbitzuko zuzendaria ordezten ari da, azken horrek baimen ordaindua baitu seme-alaba baten jaiotzagatik, ama biologikoa ez den gurasoari dagokiona.
Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuaren 32. artikuluaren 1. apartatuan ezartzen denez, funtzionarioek betetzen ahalko dute, bitarte baterako, beren maila bereko edozein lanpostu eta titular gisa duten lanpostuaren kategoria bereko edo goragoko edozein lanpostu, horretarako behar den titulazioa edo prestakuntza baldin badute.
Aurrekoa kontuan harturik, bidezkoa da María Concepción del Río Solano andrea izendatzea.
Horrenbestez, Herritarrekiko Harremanetako kontseilariak proposaturik, eta Nafarroako Gobernuak bi mila eta hogeita bateko ekainaren hogeita hamarrean egindako bilkuran harturiko Erabakiarekin bat,
DEKRETATZEN DUT:
1. María Concepción de Río Solano andrea, Euskarabidea-Euskararen Nafar Institutuko Aholkularitza Ataleko burua, izendatzea erakunde autonomo horretan Euskara Administrazio Publikoetan Garatzeko Zerbitzuko zuzendari kargua bete dezan bitarte baterako.
Izendapen honek ondorioak izanen ditu 2021ko ekainaren 7tik hasi eta Hasier Morrás Aranoa jauna zerbitzura itzultzen den arte, organo eskudunak ez badu lehenago errebokatzen.
Bitarteko gisa hiru hilabete jarraian eman eta gero, izendatuak eskubidea izanen du ordainsariak parekatzeko behar diren zenbatekoak atzeraeraginez kobratzeko, izendapenaren hasieratik, hau da, Aholkularitza Ataleko buru gisa aritzeagatik jasotzen duen ordainsaria eta zerbitzuko zuzendari gisa aritzeagatik jaso beharko lukeena parekatzeko behar diren zenbatekoak.
2. Foru dekretu hau interesdunari jakinaraztea, eta Funtzio Publikoko Zuzendaritza Nagusira, Nominen eta Gizarte Segurantzaren Atalera, Euskarabidea-Euskararen Nafar Institutura eta Herritarrekiko Harremanetako Departamentuko Idazkaritza Tekniko Nagusira igortzea, behar diren ondorioak izan ditzan.
3. Foru dekretu hau Nafarroako Aldizkari Ofizialean argitaratzea, orok jakin dezan.
Iruñean, 2021eko ekainaren 30ean.–Nafarroako Gobernuko lehendakaria, María Chivite Navascués.–Herritarrekiko Harremanetako kontseilaria, Ana Ollo Hualde.
Iragarkiaren kodea: F2110535
