Iragarkia

129. ALDIZKARIA - 2021eko ekainaren 3a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

40E/2021 EBAZPENA, maiatzaren 10ekoa, Turismo, Merkataritza eta Kontsumoko zuzendari nagusiak emana, zeinaren bidez onesten baita toki entitateei turismoko bizikleta-bideak sortzeko eta bide berde, eremu turistiko eta establezimendu turistiko publikoak atontzeko emanen zaizkien dirulaguntzen deialdia. DDBN identifikazioa: 563005.

Nafarroako Turismoaren Plan Estrategikoko (2018-2025) “Eremu turistikoa egokitzea eta harrera-ahala hobetzea” izeneko programaren helburu nagusia da turismo-jarduerak eginen diren eremuak hobetzea eta jarduera horiek erabiltzeko eta bultzatzeko baliabideak eta azpiegiturak sustatzea, turismo jasangarria ardatz hartuta.

Horrez gainera, programa horren bidez eremu turistiko berriak sortzeko gaitasuna duten zonak sustatu nahi dira. Horretarako, baliabide naturalak, kultur baliabideak eta antzekoak kudeatzen dituzten toki entitateei dirulaguntzak emanen zaizkie baliabideok turisten bisitetarako egokitu ditzaten eta baliabide turistikoetako orientazioko, identifikazioko eta interpretazioko seinale turistikoak hobetu ditzaten, kontuan harturik ezen oinarrizko segmentu turistikoetako bat “landa-natura” deritzona dela eta horren barruan oso garrantzitsua dela bizikleta-turismoaren segmentua, 2020-2022 Zikloturismo Planean ezartzen den bezala.

Deialdi honetan ezartzen diren dirulaguntzek norgehiagokako araubidea betetzen dute; hortaz, kasuan kasuko baremoaren aplikazioak zehaztuko du dirulaguntzak emateko hurrenkera.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Onestea toki entitateei turismoko bizikleta-bideak sortzeko eta bide berde, eremu turistiko eta establezimendu turistiko publikoak atontzeko emanen zaizkien dirulaguntzen deialdia.

2. Deialdiaren oinarri arautzaileak onestea. Ebazpen honen eranskinean jaso dira.

3. Baimentzea 300.000 euroko gastua, bete daitezen dirulaguntzen deialdi honen ondoriozko konpromisoak; finantzatuko da 2021erako Nafarroako Aurrekontu Orokorretako honako partida honen kargura: 830001-83130-7609-432103: Turismorako dirulaguntzak. Toki entitateen eta partzuergoen inbertsioak. Jasangarritasun planak.

4. Ebazpen hau eta beronen eranskina Nafarroako Aldizkari Ofizialean argitaratzea.

5. Adieraztea administrazio publikoek administrazioarekiko auzi-errekurtsoa jartzen ahal dutela deialdi honen eta bere oinarri arautzaileen aurka, eskumena duen ordena jurisdikzionalari zuzendua, honako hau argitaratu eta biharamunetik hasita bi hilabeteko epean, Nafarroako Gobernuan aldez aurreko errekerimendua egin ahal izatea galarazi gabe, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.

Iruñean, 2021eko maiatzaren 10ean.–Turismo, Merkataritza eta Kontsumoko zuzendari nagusia, Maitena Ezkutari Artieda.

ERANSKINA

Toki entitateei turismoko bizikleta-bideak sortzeko eta bide berde, eremu turistiko eta establezimendu turistiko publikoak atontzeko emanen zaizkien dirulaguntzen deialdia arautzen duten oinarriak

1. oinarria.–Xedea.

Oinarri hauek arautzen dute nola emanen zaizkien dirulaguntzak toki entitateei turismoko bizikleta-bideak sortzeko eta beren jabetzako bide berde, eremu turistiko eta establezimendu turistiko publikoak atontzeko.

Laguntzen helburua da turismoko azpiegiturak, baliabideak eta eremu turistikoak hobetzea eta horien balioa agerraraztea, zerbitzuen sektorean jarduera ekonomikoa sortzeko; halaber, laguntza hauen bidez gure lurraldeko garapen turistikorako aukerak optimizatu nahi ditugu.

2. oinarria.–Aurrekontuko zuzkidura.

Deialdi honen ondoriozko konpromisoei erantzuteko baimendutako kreditua 300.000 eurokoa da, honela zehaztuta, jarduketa diruz lagungarri moten arabera:

A motako eskaeretako dirulaguntza guztiak esleitu ondoren dirurik gelditzen bada erabilgarri, B eta C motetako eskaerei erantzuteko erabiliko da, ondoz ondo.

B motako eskaeretako dirulaguntza guztiak esleitu ondoren dirurik gelditzen bada erabilgarri, A eta C motetako eskaerei erantzuteko erabiliko da, ondoz ondo.

C motako eskaeretako dirulaguntza guztiak esleitu ondoren dirurik gelditzen bada erabilgarri, B eta C motetako eskaerei erantzuteko erabiliko da, ondoz ondo.

3. oinarria.–Inbertsioak gauzatzeko epea.

Diruz lagungarriak dira 2021eko urtarrilaren 1etik azaroaren 8ra arte (biak barne) egin, fakturatu eta ordaindutako inbertsio guztiak. Horretarako, inbertsioak egintzat joko dira aldi horretan fakturatu eta ordaindu badira.

4. oinarria.–Entitate onuradunak eta betebeharrak.

1. Entitate onuradunak.

15.000 biztanle baino gutxiagoko udalek eta gainerako toki entitateek eskatzen ahal dituzte dirulaguntza hauek, baldin eta Nafarroako Toki Administrazioari buruzko uztailaren 2ko 6/1990 Foru Legearen 3. artikuluan aipatzen badira.

Horri dagokionez, Nafarroako kontzejuetako populazio zifra ofizialak deklaratzen dituen Ekonomia eta Ogasuneko kontseilariaren foru aginduan, deialdia Nafarroako Aldizkari Ofizialean argitaratzen den egunean indarrean dagoenean, ezartzen dena hartuko da kontuan.

2. Beharkizun orokorrak.

Betebehar orokor hauek betetzen dituzten toki entitateek jasotzen ahalko dituzte dirulaguntzak:

2.1. Ez egotea entitate onuraduna izateko ezarritako debeku egoera batean, jarraikiz Dirulaguntzei buruzko azaroaren 9ko 11/2005 Foru Legearen 13. artikuluari.

Dirulaguntza eskatzeak berekin dakar baimena ematea organo emaileak zuzenean eskura ditzan behar diren ziurtagiri telematikoak, frogatzen dutenak eskatzaileak egunean dituela tributu betebeharrak eta Gizarte Segurantzarekiko betebeharrak. Eskabidean interesdunak horri berariaz uko egiten badio, berak aurkeztu beharko ditu aipatutako betebeharretan egunean dagoela adierazten duten ziurtagiriak.

2.2. Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta ez egotea arrazoi horiek direla-eta ezarritako epai edo zehapen bat betetzeko zain.

2.3. Baldintza orokorrak betetzen direla eskabide orriko “erantzukizunpeko adierazpen” baten bidez frogatuko da.

3. Eskaera aurkeztean bete beharreko beharkizun bereziak.

3.1. Baliabide, eremu edo establezimendu turistikoen titulartasun publikoa.

Jarduketak dirulaguntza eskatzen duen toki entitatearen ondasunetan egin behar dira.

Toki entitatea titularra ez bada:

–Jarduketa eginen den lursail, baliabide, eremu edo establezimendu turistikoa eskaera aurkezten denetik gutxienez 7 urtez baliagarri egonen dela egiaztatzen duen kontratua, lagapen-agiria edo bestelako agiriren bat eduki behar du.

–Jarduketa toki entitatearen udalerrian egin behar da.

Ez dira diruz lagungarriak izanen Nafarroako Gobernuaren titulartasuneko eremuetan, ondasunetan, lurretan edo higiezinetan egiten diren jarduketak.

3.2. Bide berdeak edo baliabide, eremu edo establezimendu turistikoak Interneten agertu behar du berariazko webgune baten bidez edo udalerriaren, kontzejuaren, partzuergo turistikoaren, garapen agentziaren edo antzeko baten webgunearen bidez. Webgunea erabiltzeko moduan eta eguneratuta egon beharko da eskaera aurkezten den egunean.

Ez da aski izanen Nafarroako Gobernuaren webgune ofizialetan agertzea.

3.3. Toki entitateen jabetzako establezimendu turistikoen kasuan, honako baldintza hauek bete behar dira:

–Nafarroako Turismo Erregistroan inskribatuta egon behar da 2020ko urriaren 1a baino lehen.

–Establezimenduaren enpresa edo kudeatzailea alta emanda egon behar da jarduera ekonomikoen gaineko zergaren 681 - 687 bitarteko taldeetako (671. taldea barne) epigrafeetako batean.

3.4. 3.1 apartatuko beharkizun berezia betetzen denez egiaztatzeko horretarako berariaz aurkezten den dokumentazioa aztertuko da. Gainerako beharkizunak betetzen direnez organo kudeatzaileak aztertuko du; eskatzaileek ez dute dokumentaziorik aurkeztu beharko. Hain zuzen ere, jarduera ekonomikoen gaineko zerga baieztatzeko, Nafarroako Jarduera Ekonomikoen Erregistroko informazioa hartuko da kontuan, web orri honetan: https://hacienda.navarra.es/RegistroIAE.Web/Registro.aspx.

5. oinarria.–Jarduketa diruz lagungarrien motak eta beharkizun bereziak.

1. Diruz lagungarriak diren jarduketa eta inbertsio motak.

Honako jarduketa hauek izanen dira diruz lagungarriak:

1.1. Bide berdeak atontzea eta turismoko bizikleta-bideak sortzea.

1.1.1. Diruz lagungarriak izanen dira bide berdeak sendotzeko, hobetzeko eta egokitzeko, 20 kilometrotik gorako turismoko bizikleta-bideak sortzeko eta bide berdeekiko edo euro veloekiko lotuneak sortzeko egiten diren jarduketak.

1.1.2. Hona zein diren inbertsio diruz lagungarriak:

a) Honako obra hauek:

–Zoladura sendotzea; urak bideratzea; hormatxoak, zubiak, zubibideak eta pasabideak atontzea; arekak egitea.

–Eraikinak atontzea eta hornitzea bisitariak hartzeko zerbitzu-zentro modura edota bisitarientzako jarduera-gune modura erabiltzeko.

–Iturriak paratzea.

–Turistak hartzen dituzten hiriguneetatik kanpoko eremuetako altzari iraunkorrak.

–Laguntzeko egiturak paratzea tarte zailetan edo egiturazko sendotze elementuak paratzea luiziak gertatzen diren tarteetan.

–Argi-sistemak egokitzea eta kontsumo urriko argiak jartzea tuneletan eta bandalismoaren eta lapurreten kontrako neurriak ezartzea.

–Balizamendua eta seinalizazioa.

b) Interpretazio fisikoko sistemak: informazio panelak, mahai panoramikoak, seinale bertikalak eta interpretazio fisikorako bestelako sistemak paratzea, edo IKTak erabiltzea: App, QR, AR, etab.

c) Bisitariak zenbatzeko, aforoak kontrolatzeko eta bisitarien etorreraren inguruko datuak lortzeko sistemak.

d) Bizikleta-bideak atontzeko eta sortzeko obrak, jarduten den tartea guztira 20 kilometrotik gorakoa izanez gero.

e) Ingurumen eta energia jasangarritasunerako proiektuak.

Ingurumenari laguntzen dioten inbertsioak onartuko dira, baita eraginkortasun energetikoa, energia berriztagarriak aplikatzea eta mugikortasun elektrikoa bultzatzea sustatzen dutenak ere, honako hauetan oinarritzen direnak:

–Isolamendu termikoko irtenbideak, leihoak, eguzkitiko babesa.

–Irtenbide bioklimatikoak.

–Energia berriztagarrien instalazioa, eguzki plakak eta abar.

–Klimatizazio eta argiztapen sistemen hobekuntza.

–Ibilgailu elektrikoak kargatzeko azpiegiturak.

–Antzeko beste jarduketa batzuk.

Proiektu bat klase horretakotzat joko da, jarraian zerrendatzen diren baldintzak betetzen baditu. Hala bada, baremoko balorazio-irizpide zehatzari dagokion puntuazioa lortuko du.

–Eraginkortasun energetikoa sustatzeko, energia berriztagarriak aplikatzeko eta mugikortasun elektrikoa bultzatzeko aurreikusitako jarduketen zenbatekoak gainditu behar du dirulaguntzaren xede den proiektu orokorraren zenbatekoaren % 60.

–Proiektuak eskumena duen enpresa edo profesional baten bermea izan behar du nahitaez; gainera, laguntza eskatzen den jarduketak eginen diren turismo establezimenduaren, lekuaren edo azpiegituraren energia-auditoretza aurkeztu behar da (UNE-EN16247 arauaren arabera).

Auditoretza horretan leku, eraikin, eremu, sistema edo azpiegitura batean energiaren erabilera eta kontsumoa sistematikoki ikuskatu eta aztertuko dira, energia fluxuak eta energia eraginkortasuna hobetzeko potentziala identifikatzeko. Aurreikusitako inbertsioak auditoretza horretan aurreikusita egon beharko dira, eta aurrekontua bertan eginik izan behar dute.

–Auditoretza energetikoa eskaerarekin batera aurkeztuko da, eta eginiko jarduketen justifikazioa aurkeztean egiaztagiri bat aurkeztu beharko da, enpresa edo profesional eskudun batek igorritakoa, adierazten duena eginiko inbertsioak auditoretza horretan jasota zeudela eta horren arabera egikaritu direla.

–Proiektuarekin batera, eskaera aurkeztean, ez bada eskatutako auditoretza energetikoa aurkezten, proiektuak ez du jasoko proiektu mota horretarako ezarritako puntuazioa.

f) Irisgarrritasunerako proiektuak.

Establezimendu edo eremu turistikoan, mugikortasuna murriztua dutenen edo bestelako muga fisiko, psikiko edo zentzumeneko bat dutenen irisgarritasuna hobetzeko instalazioak eraberritzeko, egokitzeko edo hobetzeko obrak eta jarduketak onartuko dira, baita oztopo arkitektonikoak eta zentzumenekoak kentzekoak ere.

Proiektu bat klase horretakotzat joko da, jarraian zerrendatzen diren baldintzak betetzen baditu. Hala bada, baremoko balorazio-irizpide zehatzari dagokion puntuazioa lortuko du.

–Irisgarritasunaren arloan aurreikusitako jarduketen zenbatekoak gainditu behar du dirulaguntzaren xede den proiektu orokorraren zenbatekoaren % 60.

–Jarduketek Irisgarritasun Unibertsalari buruzko ekainaren 14ko 12/2018 Foru Legea bete beharko dute, eragiten dien heinean.

–Aurretik adierazitako inguruabarrak nahitaez enpresa edo profesional eskudun batek egiaztatu beharko ditu, bai eskaera aurkezteko unean bai eginiko jarduketen justifikazioa aurkezteko unean.

–Proiektuarekin batera, eskaera aurkeztean, ez bada aurreko apartatuan eskatutako egiaztagiria aurkezten, proiektuak ez du jasoko proiektu mota horretarako ezarritako puntuazioa.

1.2. Baliabide eta eremu turistikoak atontzea.

1.2.1. Diruz lagungarriak izanen dira baliabide eta eremu turistikoak eta horien azpiegiturak hobetzeko eta bultzatzeko egiten diren jarduketak.

1.2.2. Hona zein diren inbertsio diruz lagungarriak:

a) Ibilgailuak, motorrak eta bizikletak aparkatzeko eremuak atontzea, honako toki hauetan egonez gero:

–1.500 biztanletik beherako herriguneak, ostatu eta jatetxe azpiegiturak eta interes turistikoko erakarguneak dituztenak.

–Hiriguneetatik kanpo dauden baliabide eta eremu turistikoak, baldin eta bisitariak hartzeko eta/edo haiei harrera egiteko zerbitzuren bat badute.

b) Ibilgailuentzako sarbideetan inbertsioak eta hobekuntzak egitea, bisitariak hartzeko eta/edo haiei harrera egiteko zerbitzuren bat hiriguneetatik kanpo duten titulartasun publikoko eremu eta azpiegituretara iristeko.

c) Komun publiko iraunkorrak jartzea herri edo eremu turistikoetan, baldin eta konpromisoa hartzen bada urte osoan garbi eta txukun mantentzeko.

d) Eremu turistikoetako harrera guneetan ekipamendua eta altzari finkoak paratzea.

e) Hirigunetik kanpoko pasabideak eta iturriak.

f) Bisitariak zenbatzeko, aforoak kontrolatzeko eta bisitarien etorreraren inguruko datuak lortzeko sistemak.

g) Interpretazio-sistemak: informazio-panelak, mahai panoramikoak eta interpretazio fisikorako bestelako sistemak paratzea, edo IKTak erabiltzea: App, QR, AR, etab.

h) Erreserbak egiteko sistemak, pagamendu-pasagunearekin edo halakorik gabe.

i) Bisitariak hartzeko ondasun higiezin finkoak eta harreraguneak egokitzea. Ez da onartuko instalazio mugikorrik.

j) Argi, irudi eta soinu proiektuak.

k) Ingurumen eta energia jasangarritasunerako proiektuak.

Honelako proiektuei oinarri arautzaile honen 1.1.2.e) apartatuan ezartzen dena aplikatuko zaie.

l) Irisgarrritasunerako proiektuak.

Honelako proiektuei oinarri arautzaile honen 1.1.2.f) apartatuan ezartzen dena aplikatuko zaie.

1.3. Jabetza publikoko establezimendu turistikoak atontzea.

1.3.1. Diruz lagungarriak izanen dira establezimendu turistikoak eraberritzeko, berritzeko eta atontzeko jarduketak eta horien ekipamenduak eta instalazioak hobetzeko jarduketak.

Honako jarduketa hauek baino ez dira onartuko: establezimendu turistikoa kudeatzeko eta ustiatzeko zerbitzu publikoaren emakidaren indarreko kontratuaren arabera toki entitatearen ardurapean daudenak. Enpresa adjudikaziodunari dagozkion jarduketak ez dira onartuko.

1.3.2. Hona zein diren inbertsio diruz lagungarriak:

a) Eraberritzeko eta hobekuntzako obrak: isolamenduak, saneamenduak, elektrizitatea, segurtasun-sistemak jartzea, berokuntza-sistemak, klimatizazioa, iturgintza, arotz-lanak eta indarreko arautegira moldatzeko egin beharreko gainerako guztiak.

b) Turismo-kanpalekuetan, kanpinlarientzako komunak eta dutxak berritzea; aterpetxeetan, dutxa komunitarioak berritzea (tabernetako eta jatetxeetako komunak ez dira horrelakotzat joko).

c) Jarduketa diruz lagungarriekin zuzenean lotutako zerbitzu tekniko profesional ezinbestekoen ordainsariak (horiek baino ez) eta proiektua prestatzeko gastuak, obra zuzendaritzarenak eta instalazio-proiektuenak. Kontzeptu horiengatik diruz lagungarritzat onartuko da aurreikusitako inbertsio diruz lagungarrien aurrekontuaren % 10 gehienez, baina gastu horiek ez dira kontuan hartuko eskatutako inbertsioen gutxieneko zenbatekoetan.

Dirulaguntza ordaintzeko unean, kontzeptu horiekin justifikatutako gastutzat joko da justifikatutako egikaritze materialaren zenbatekoaren % 10. Ondorioz, gastu mota hori bakarrik justifikatzen bada, ezin izanen da emandako dirulaguntzaren inolako ordainketarik egin.

d) Eskaintzen diren jarduerak egiteko beharrezkoak diren ekipamenduak eta aktibo finkoak erostea, baita instalazio eta lokaletako altzariak erostea ere, inbertsioak badira, eta ez birjarpen, mantentze-lan edo kontserbazioa, eta jarduera turistikoarekin zuzenean lotutako erabilera baldin badute.

e) Irisgarritasuneko plan batean ezarritako inbertsioak.

Baldin eta establezimendu turistiko batek irisgarritasunaren arloko diagnostikoa egina badu eta horretan jarduteko plana prestatu bada, inbertsioak onartuko dira.

f) Ingurumen eta energia jasangarritasunerako proiektuak.

Honelako proiektuei oinarri arautzaile honen 1.1.2.e) apartatuan ezartzen dena aplikatuko zaie.

g) Irisgarrritasunerako proiektuak.

Honelako proiektuei oinarri arautzaile honen 1.1.2.f) apartatuan ezartzen dena aplikatuko zaie.

2. Diruz lagungarriak ez diren jarduketak eta gastuak.

Gastu hauek ez dira diruz lagungarriak:

–Mantentze-lanak, hala nola sasi-garbiketak, bide-zuloetako betelana, garbiketak edo gisakoak.

–Hiriguneetako hirigintza jarduketak edo irisgarritasunari lotutakoak, oro har interes turistikokoak izan arren baliabide turistiko zehatz baterako (museoa, gaztelua, jauregi-etxea, dorrea, eliza) sarbidea hobetzea ez dakartenak.

–Erremintak, tresnak edo elementuak, haien erabilerak lotura zuzenik ez badu establezimenduaren jarduera turistikoarekin eta erabilitako aktibo finkoak.

–Leasing bidez finantzatutako jarduketetako inbertsioak.

–Ekipo informatikoak, ordenagailuak, eramangarriak, tabletak, inprimagailuak.

–Web orriak mantentzea, domeinua berritzea, hostinga eta programa edo aplikazio informatikoak mantentzea.

–Establezimendu turistikoaren perimetrotik kanpo eginiko inbertsioak.

–Higiezinak eta lurrak erostea.

–Denetariko zergak, lizentziak, baimenak edo antzeko gastuak.

–Establezimendu turistikoa mantentzeko obrak, inbertsiotzat hartzen ez direnak. Horrelakotzat joko dira aldizka egiten direnak eraikina eta haren instalazioak erabiltzeko egoera ezin hobean mantentzeko (zorrotenak garbitzea, margotzea, zurgintzako konponketak, berokuntza sistemak doitzea, ur beroa, klimatizazioa eta abar), nahiz eta toki entitatearen ardurapekoak izan.

3. Jarduketa diruz lagungarriek bete beharrekoak.

3.1. Jarduketa guztiek bete behar dute Irisgarritasun Unibertsalari buruzko ekainaren 14ko 12/2018 Foru Legeak ezartzen duena.

3.2. Interpretazio fisikoko sistemek (mahai panoramikoak, informazio-panelak, seinaleak eta abar) Nafarroako seinalizazio turistikoaren eskuliburuan ezarritako diseinua bete behar dute. Laguntzaren web fitxan eskuratzen ahalko da.

Turismoaren Plangintza eta Berrikuntza Zerbitzuak aholkuak eta behar duten informazio guztia emanen dizkie entitate eskatzaileei, egiten dituzten jarduketek lehen aipatutako eskuliburuan ezartzen dena bete dezaten.

3.3. Interpretazio-euskarriak gaztelaniaz, euskaraz, ingelesez eta frantsesez idatzi behar dira gutxienez, eta kontu bereziarekin jokatuko da hizkera inklusiboa eta sexismorik gabea erabiltzeko.

6. oinarria.–Dirulaguntzaren zenbatekoa, gehienezko dirulaguntza eta gutxieneko inbertsioa.

Dirulaguntzaren zenbatekoa kalkulatzeko, diruz lagungarria den inbertsioaren zenbatekoari honako ehuneko hauek aplikatuko zaizkio (BEZ barne).

Balio erantsiaren gaineko zerga diruz lagungarria da, honako kasu honetan izan ezik: toki entitateak gastu hori berreskuratu edo konpentsatu ahal duenean.

Jarduketa diruz lagungarria zer motatakoa den, halakoa izanen da gutxieneko inbertsio diruz lagungarria, halakoa dirulaguntzaren ehunekoa eta halakoa gehieneko dirulaguntza; hori guztia taula honetan ageri da xehatuta:

Baldin eta proiektua zenbait udalerritan egiteko bada eta bakoitzean eginen den inbertsioa ez bada iristen eskatzen den gutxieneko inbertsioaren zenbatekora eta eskaera bakar batean biltzen badira toki entitate guztiak, eskaera proiektu bakarrekotzat joko da gutxieneko inbertsioa eta gehieneko dirulaguntza aplikatzeko.

7. oinarria.–Eskaerak eta eskatzen den dokumentazioa aurkezteko epealdia eta modua.

1. Eskaerak aurkezteko epealdia.

Eskaerak aurkezteko epealdia 21 egun baliodunekoa izanen da deialdi hau Nafarroako Aldizkari Ofizialean argitaratu eta hurrengo egunetik aurrera.

2. Eskaerak aurkezteko modua.

a) Eskaerak bide telematikotik aurkeztu beharko dira nahitaez, Nafarroako Gobernuaren Atarian jasotako zerbitzuen katalogoko fitxa erabiliz (http://www.navarra.es/home_es/Temas/Empleo+y+Economia/Sector+turistico/Subvenciones.htm) (hemendik aurrera, laguntza fitxa). Fitxa horretan Nafarroako Foru Komunitateko Administrazioko Erregistro Orokor Elektronikoan sartzeko esteka bat izanen da.

b) Laguntza hauekin loturik, Turismoa eta Merkataritza Antolatu eta Sustatzeko Zerbitzuaren jakinarazpen eta komunikazio guztiak telematikoki eginen dira, eta, horretarako, beharrezkoa da ziurtagiri digitala eta gaitutako helbide elektroniko (GHE-DEH) bat izatea.

c) Eskaera aurkezteko erabiltzen den bidea arestian aipatu ez bezalakoa bada, ez aurkeztutzat joko da, baina horrek ez du esan nahi gero ezin izanen denik bide telematikotik aurkeztu. Azken kasu horretan, sarrera data baliodun bakarra aurkezpen telematikoarena izanen da, hori guztia Administrazio Publikoen Administrazio Prozedura Erkideari buruzko urriaren 1eko 39/2015 Legearen (hemendik aitzina, APAPEL) 68.4 artikuluan xedatutakoarekin bat.

d) Izapide telematikoak egiten diren unean eskuragarri egonen den eskabide espezifikoa erabiliz eginen dira eskaerak, laguntzaren fitxaren bidez, eta Turismo, Merkataritza eta Kontsumo Zuzendaritza Nagusiari bidali beharko zaizkio. APAPEL legearen 66.6 artikuluan xedatutakoari jarraikiz, ez dira aurkeztutzat hartuko laguntzaren fitxan jasota dagoen eredura egokitzen ez diren eskaerak.

e) Eskaera bat aurkeztu behar da jarduketa mota bakoitzeko.

f) Jarduketa zenbait udalerritan egiteko bada, banakako eskaera edo multzo-eskaera aurkezten ahalko da, Dirulaguntzei buruzko azaroaren 9ko 11/2005 Foru Legeak 8.3 artikuluan ezartzen duenarekin bat etorriz; honelako kasuetan bi aukera egonen dira:

–Proiektu guztiaren exekuzioa bere gain hartzen duen toki entitateak aurkeztea eskaera; halakoetan, sortzen diren gastuak eta ordainketak eginen ditu exekuzioa bere gain hartzen duen entitateak. Hitzarmena erantsiko da, edo antzeko agiri bat, adierazten duena zer baldintzatan eratu den alderdien arteko elkarlana; horien legezko ordezkariek sinatu beharko dute.

–Eskaera aurkeztea proiektua gauzatuko duten entitate guztien taldearen ordezkari rola hartzen duen toki entitateak. Hitzarmena erantsiko da, edo antzeko agiri bat, adierazten duena zer baldintzatan eratu den alderdien arteko elkarlana eta gastuen zer zenbateko hartzen duen bere gain entitate bakoitzak; horien legezko ordezkariek sinatu beharko dute. Kasu horretan, taldeko entitate bakoitzari onartuko zaio dirulaguntza, eta ordainketak ere horietako bakoitzari eginen zaizkio, horietako bakoitzak bere gain hartutako gastuen arabera.

3. Laguntza eskatzeko aurkeztu beharreko agiriak.

Eskaerari erantsi behar zaion dokumentazioak berariazko eskabidearen araberakoa izan beharko du, eta agiri bereizietan eta behar bezala identifikatuetan aurkeztua. Hona hemen:

3.1. Entitate eskatzailearen gaineko dokumentazioa.

Eskaera ereduan honako adierazpen hauek daude:

a) 4. oinarrian eskatutako baldintza orokorrak betetzen direla dioen erantzukizunpeko adierazpena.

b) Jarduketa bererako jasotako beste dirulaguntza batzuei buruzko erantzukizunpeko adierazpena.

c) Balio erantsiaren gaineko zergari buruzko erantzukizunpeko adierazpena, Dirulaguntzei buruzko azaroaren 9ko 11/2005 Foru Legeak 28.8 artikuluan ezartzen duenaren ondorioetarako. Adierazpen honetan zehaztu behar da kontzeptuak berreskuragarriak edo konpentsagarriak diren edo zati bat berreskuratzen ahal den; hala bada, hainbanaketa-ehunekoa zehaztu behar da (ez da diruz lagungarria izanen).

3.2. Jarduketei buruzko dokumentazioa.

a) Toki entitatearen idazkaritzaren ziurtagiria, egiaztatzen duena toki entitatea dela jarduketak eginen diren eremu, lur edo higiezinen titularra eta haiek ukituko dituzten lursail-zedulak zehazten dituena.

b) Toki entitatea ez bada titularra, eremu, lur edo higiezinak gutxienez 7 urtez baliagarri egonen direla egiaztatzen duen kontratua edo agiria.

c) Eskaera batean zenbait toki entitate biltzen badira, honako hauek aurkeztu behar dira:

–Hitzarmena, parte hartzen duten toki entitateek sinatua, bakoitzak beren gain hartzen dituzten konpromisoak eta betebeharrak zehazten dituena.

–Erantzukizunpeko adierazpena, adierazten duena zer toki entitate den solaskide bakarra laguntza-eskaera aurkezteko, egindako jarduketen justifikazioa aurkezteko, edo beste edozein izapide administratibotarako edo komunikaziotarako, dirulaguntzaren espedientearen kudeaketarekin loturik baldin badago.

d) Dirulaguntzaren xede den jarduketa azaltzen duen memoria teknikoa eta ekonomikoa, gutxienez honako alderdi hauen gaineko informazio zehatza eta xehakatua bilduko duena:

–Inbertsioak egitera bultzatzen duten arrazoiak eta jarduketak eginez lortu nahi diren helburuak.

–Diruz laguntzen ahal den jarduketa denboran egin diren edo egiteko diren jarduketan deskribapena.

–Jarduketa gauzatzeko faseak, gauzatze egoera diru-laguntzaren eskaera aurkezten denean eta gauzatzeko aurreikusitako egutegia.

–Inbertsioa aplikatuko den eremua, azpiegitura edo establezimendua kudeatzeko aurreikusitako eredua.

e) Egin diren edo egiteko diren inbertsioen aurrekontua eta zenbatekoa, xehatuta.

f) Dokumentazio grafikoa eta kokapen-planoak.

g) Behar denean, obra-proiektu ikus-onetsia.

h) Behar denean, establezimendu turistikoa kudeatzeko eta ustiatzeko zerbitzu publikoaren emakidaren kontratua.

i) Behar denean, enpresa edo profesional eskudun baten ziurtapena edo frogagiria, proiektua “irisgarritasunerakotzat” jotzea ahalbidetzen duena.

j) Behar denean, establezimendu edo leku turistikoaren auditoretza energetikoa, proiektua “ingurumen eta energia jasangarritasunekotzat” jotzea ahalbidetzen duena.

k) Behar denean, irisgarritasunaren arloko diagnostikoa eta horretan jarduteko plana.

3.3. Balorazio-irizpide batzuk aplikatzeko agiriak.

Baremoetako balorazio-irizpide batzuk aplikatzeko behar den dokumentazioa 8. oinarrian ezartzen da. Eskaerak aurkezteko epealdiaren barruan aurkeztu behar da; epealdi horretatik kanpo ez da onartuko eta zuzenketak ere ezin izanen dira egin.

3.4. Eskaerak ez baditu finkatutako betebeharrak betetzen, edo osorik ez badago, eskatzaileari eskatuko zaio zuzendu dezala gehienez ere hamar egun balioduneko epean, zuzentzeko errekerimendua jakinarazten den egunaren biharamunetik hasita, eta adieraziko zaio ezen, eskaera zuzentzen ez badu, ondorioztatuko dela eskaerari uko egiten diola eta espedientea artxibatzeko ebazpena emanen dela.

8. oinarria.–Dirulaguntzak emateko irizpideak.

1. Laguntza hauek norgehiagokako prozeduraren bidez emanen dira. Hartara, aurkeztutako eskaerak konparatuko dira, haien artean lehentasuna ezartzearren jarduketa mota bakoitzeko, oinarri honetan ezarritako balorazio irizpideekin bat.

Laguntzen zenbatekoa kalkulatzeko, balorazio handiena eskuratzen duten eskaerei 6. oinarrian ezarritako laguntza intentsitatea aplikatuko zaie, jarduketa bakoitzerako aurrekontuan erabilgarri dagoen kreditua agortu arte. Kreditu erabilgarria gelditzen bada jarduketa bateko eskaera guztiei erantzun ondoan, gainerako jarduketen eskaerei erantzuteko erabiliko da, 2. oinarrian ezarritakoarekin bat.

Baimentzen den kreditua aski bada dirulaguntza lortzeko ezarritako baldintzak betetzen dituzten eskaera guztiei erantzuteko, ez da beharrezkoa izanen eskaeren lehentasun zerrenda prestatzea.

Aurrekontuetan behar adina diru ez egoteagatik kontuan hartzen ez diren eskaerak ezetsitzat joko dira.

Eskatzaileren bati ezin bazaio eman legokiokeen laguntza osoa, kreditu aski ez dagoelako, laguntzak emateko ebazpena baino lehen, 3 egun balioduneko epea emanen zaio adierazteko ea ados dagoen berarentzat aurreikusitako dirulaguntzarekin. Proposatutako dirulaguntzarekin ados daudela adierazten duten onuradunek dirulaguntza osagarri bat jasotzen ahalko dute, legokiekeen laguntza osatu arte, baldin eta aurrekontu-baliabide gehiago sortzen badira azkenean ordaintzen diren dirulaguntza guztien zenbatekoa txikiagoa izateagatik hasieran onartutakoena baino, edo onuradunen batek uko egiteagatik dirulaguntzari.

Hauxe izanen litzateke dirulaguntza osagarri horiek emateko ordena: B, A eta C jarduketa-motak, mozte-espedientetik abiatuta.

2. Bide berdeak atontzeko eta turismoko bizikleta-bideak sortzeko dirulaguntzen eskaerak baloratzeko irizpideak honako hauek dira:

1. irizpidea.–Jarduketaren xede den baliabidearen mota.

2. irizpidea.–Baliabide turistikoaren azpiegiturak edo ekipamendua.

3. irizpidea.–Diruz lagungarria den inbertsioaren zenbatekoa.

Gutxienez eskatzen den inbertsioaren zenbatekotik gorako 5.000 euroko tarte bakoitzeko puntu bat emanen da, 8 puntu gehienez.

4. irizpidea.–Irisgarritasunerako proiektuak.

Proiektuak betetzen badu 5.1.1 oinarrian mota honetakoa izateko eskatzen dena eta hori egiaztatzen duen enpresa edo profesional gaikuntzadun baten dokumentazioa aurkezten bada, 10 puntu emanen dira.

5. irizpidea.–Ingurumen eta energia jasangarritasunerako proiektuak.

Proiektuak betetzen badu 5.1.1 oinarrian mota honetakoa izateko eskatzen dena eta horri dagokion auditoretza energetikoa aurkezten bada, 10 puntu emanen dira.

6. irizpidea.–Baliabide turistikoaren azpiegituren edo ekipamenduaren balorazioa gehitzea eginen diren inbertsioen ondorioz.

Dirulaguntzaren xede diren inbertsioen ondorioz baremo honetako 2. irizpidearen aplikazioaren ondoren baliabide turistikoak daukan balorazioari egiten zaion 2 puntuko gehikuntza bakoitzeko 2 puntu emanen dira, gehienez 8.

7. irizpidea.–Aurreko urteetan lortutako dirulaguntzak.

Turismo eta Merkataritzako Zuzendaritza Nagusiak 2019. urtean toki entitateei baliabide turistikoak egokitzeko eman zizkien dirulaguntzen deialdian erakunde eskatzaileak lortutako laguntzen arabera honako puntuazio hau emanen da:

Irizpide hau aplikatzeko ez da aurkeztu behar dokumentaziorik.

2.1. 1., 2., 3. eta 6. irizpideak aplikatzeko, eskaerarekin batera aurkeztutako dokumentazioa aztertuko da.

2.2. Puntu berdinketa izanez gero, irizpide hauek aplikatuko dira bata bestearen atzetik:

a) 1. balorazio-irizpidearen araberako puntuazioa, puntuazio handieneko proiektuak lehenetsita.

b) Diruz lagungarria den inbertsioaren zenbatekoa, zenbateko handienekoak lehenetsita.

3. Honako hauek dira baliabide eta eremu turistikoak atontzeko dirulaguntzen eskaerak baloratzeko irizpideak:

1. irizpidea.–Diruz lagungarria den jarduketa eginen den baliabide edo eremu turistikoaren balorazioa:

Irizpide honen puntuazioa a) eta i) arteko apartatu guztietako balorazioen batura izanen da. Laguntzaren web fitxaren eranskin batean Nafarroako udalerrien kokapena agertuko da, 1.a) apartatua aplikatzeko.

a) eta b) apartatuak aplikatzeko ez da aurkeztu behar dokumentaziorik.

c), d), e), f) eta h) apartatuak baloratzeko, argazkiak edo bestelako agiri batzuk aurkeztu behar dira.

g) irizpidea aplikatzeko, memorian web esteka bat ezarri behar da.

i) irizpidea aplikatzeko, memorian horri buruzko informazioa eman behar da.

2. irizpidea.–Diruz lagungarria den inbertsioaren zenbatekoa.

Gutxienez eskatzen den inbertsioaren zenbatekotik gorako 3.000 euroko tarte bakoitzeko puntu bat emanen da, 8 puntu gehienez.

Irizpide hau aplikatzeko, eskaerarekin batera aurkeztutako dokumentazioa aztertuko da.

3. irizpidea.–Irisgarrritasunerako proiektuak.

Proiektuak betetzen badu 5.1.1 oinarrian mota honetakoa izateko eskatzen dena eta hori egiaztatzen duen enpresa edo profesional gaikuntzadun baten dokumentazioa aurkezten bada, 10 puntu emanen dira.

4. irizpidea.–Ingurumen eta energia jasangarritasunerako proiektuak.

Proiektuak betetzen badu 5.1.1 oinarrian mota honetakoa izateko eskatzen dena eta horri dagokion auditoretza energetikoa aurkezten bada, 10 puntu emanen dira.

5. irizpidea.–Baliabide edo eremu turistikoaren balorazioa gehitzea eginen diren inbertsioen ondorioz.

Dirulaguntzaren xede diren inbertsioen ondorioz baremo honetako 1. irizpidearen aplikazioaren ondoren baliabide turistikoak daukan balorazioari egiten zaion 2 puntuko gehikuntza bakoitzeko 2 puntu emanen dira, gehienez 8.

Irizpide hau aplikatzeko, eskaerarekin batera aurkeztutako dokumentazioa aztertuko da.

6. irizpidea.–Aurreko urteetan lortutako dirulaguntzak.

Turismo eta Merkataritzako Zuzendaritza Nagusiak 2019. urtean toki entitateei baliabide turistikoak egokitzeko eman zizkien dirulaguntzen deialdian erakunde eskatzaileak lortutako laguntzen arabera honako puntuazio hau emanen da:

Irizpide hau aplikatzeko ez da aurkeztu behar dokumentaziorik.

3.1. Puntu berdinketa izanez gero, irizpide hauek aplikatuko dira bata bestearen atzetik:

a) 1. balorazio-irizpidearen araberako puntuazioa, puntuazio handieneko proiektuak lehenetsita.

b) Diruz lagungarria den inbertsioaren zenbatekoa, zenbateko handienekoak lehenetsita.

4. Honako hauek dira jabetza publikoko establezimendu turistikoak atontzeko dirulaguntzen eskaerak baloratzeko irizpideak:

1. irizpidea.–Aurreko urteetan lortutako dirulaguntzak.

Turismo eta Merkataritzako Zuzendaritza Nagusiak 2019. urtean toki entitateei baliabide turistikoak egokitzeko eman zizkien dirulaguntzen deialdian erakunde eskatzaileak lortutako laguntzen arabera honako puntuazio hau emanen da:

Irizpide hau aplikatzeko ez da aurkeztu behar dokumentaziorik.

2. oinarria.–Inbertsio proiektuaren mota.

Eskaera bakoitzak puntuazio bat baino ez du edukiko irizpide honetan.

Puntuazio hori aplikatzeko, eskaeraren inprimakian agertzen den proiektuaren sailkapena eta 5.1.3 oinarrian proiektu mota bakoitzerako ezarritakoa beteko dira.

3. irizpidea.–Diruz lagungarria den inbertsioaren zenbatekoa.

Gutxienez eskatzen den inbertsioaren zenbatekotik gorako 5.000 euroko tarte bakoitzeko puntu bat emanen da, 12 puntu gehienez.

Irizpide hau aplikatzeko, eskaerarekin batera aurkeztutako dokumentazioa aztertuko da.

4. irizpidea.–Irisgarritasunaren arloko diagnostikoa eta horretan jarduteko plana.

Laguntza aplikatuko den jarduketen % 60 gutxienez irisgarritasunaren arloko diagnostikoan eta jarduteko planean agertzen badira, 6 puntu emanen dira.

Puntuazio hau aplikatzeko, diagnostikoa eta jarduteko plana aurkeztu behar dira.

4.1. Puntu berdinketa izanez gero, irizpide hauek aplikatuko dira bata bestearen atzetik:

a) Establezimendu turistikoa Nafarroako Turismo Erregistroko inskripzioaren antzinatasunaren data, turismo establezimendu zaharrenei lehentasuna emanda.

b) 2. balorazio-irizpidearen araberako puntuazioa, puntuazio handienekoak lehenetsita.

c) Diruz lagungarria den inbertsioaren zenbatekoa; zenbateko handiena dutenak lehenetsiko dira.

9. oinarria.–Laguntza emateko prozedura.

1. Turismoa eta Merkataritza Antolatu eta Sustatzeko Zerbitzuak, laguntzen organo kudeatzailea baita, aurreko oinarrian ezarritako irizpideei jarraituz ebaluatuko ditu eskaerak, kontuan izanik zer proiektu mota den, eta organo eskudunari ebazpen proposamena igorriko dio, non adieraziko baita onuradunek dirulaguntza lortzeko betebehar guztiak betetzen dituztela.

2. Dirulaguntzak emateari buruz ebazteko eskumena Turismo, Merkataritza eta Kontsumoko zuzendari nagusiari dagokio.

Ebazpenak honako hau jasoko du, gutxienez:

a) Onuradunen zerrenda jarduketa bakoitzeko, 8. oinarriaren arabera lortutako puntuazioaren hurrenkeran, behar denean, eta laguntzaren zenbatekoa.

b) Ezetsi beharreko eskaeren zerrenda, arrazoiak emanik. Haien artean, aurrekontuko baliabideen mugengatik baztertu direnak ere jasoko dira.

Ebazpena gehienez ere hiru hilabeteko epean eman eta jakinaraziko da, eskaerak aurkezteko epea bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsi direla ulertzen ahalko da. Hala ere, organo eskuduna behartua dago laguntzak eman edo ukatzeko berariazko ebazpena eman eta jakinaraztera, oinarri hauetan xedatutakoari jarraikiz.

Dirulaguntzak emateko edo ukatzeko ebazpenen aurka, berariazkoak izan edo presuntziozkoak, enpresa eskatzaileek zilegi izanen dute gora jotzeko errekurtsoa jartzea, Garapen Ekonomiko eta Enpresarialeko kontseilariari zuzendua, administrazio prozedura erkideari buruzko legerian xedatutakoari jarraikiz.

10. oinarria.–Egindako jarduketak frogatzeko epeak, modua eta dokumentazioa.

1. Justifikazioa aurkezteko epea.

Edozein unetan aurkeztuko da egindako jarduketen justifikazioa, dirulaguntza ematen duen ebazpena jakinarazi ondoren, eta, beranduenez, 2021eko azaroaren 15ean, egun hori barne.

2. Justifikazioa aurkezteko modua.

Justifikazioa telematikoki aurkeztuko da laguntzaren fitxa erabiliz. Fitxa horretan Nafarroako Foru Komunitateko Administrazioaren dirulaguntzak justifikatzeko erregistrorako esteka bat egonen da, eta Turismo, Merkataritza eta Kontsumo Zuzendaritza Nagusira bideratuko da.

3. Egindako jarduketak frogatzeko dokumentazioa.

Hona agiri hauek aurkeztu behar dira, eskaneatuta, bereizita eta behar bezala identifikatuta:

a) Azken memoria zehatza, egindako jarduketa guztiak eta proiektuaren exekuzioaren azken kostua xehetasunez deskribatzen dituena, bai eta hasieran aurreikusitako proiektuan izandako desbideratzeak ere, halakorik bada.

b) Aurkezten diren fakturen zerrenda zehatza eta sailkatua, haiek diruz lagundutako kontzeptuen arabera elkartuta eta dataren arabera ordenatu eta zenbakituta, hornitzailea identifikatuta eta IFK zenbakia, fakturaren zenbakia, igorpen eguna, BEZik gabeko zenbatekoa, guztira ordaindutakoa eta noiz eta nola ordaindu den adierazita, laguntza fitxan eskuragarri dagoen ereduarekin bat.

c) Egindako inbertsioei dagozkien fakturen kopia; fakturazio betebeharrak arautzen dituen Erregelamenduan ezarritakoaren araberakoak izanen dira fakturak, eta, betiere, dirulaguntzaren onuradunaren izenean jaulki beharko dira. Ez da beharrezkoa eskaerarekin batera erantsitako fakturak aurkeztea.

d) Bankuko egiaztagiriak, fakturak ordaindu direla frogatzen dutenak.

e) Dirulaguntzaren xede diren jarduketen argazkiak, jarduketak egin aurreko egoera eta ondorengoa egiaztatu ahal izateko.

f) Toki entitatearen idazkaritzaren ziurtagiria, honako hauek egiaztatzen dituena:

–Kontratu Publikoei buruzko apirilaren 13ko 2/2018 Foru Legean ezartzen diren aginduak bete direla, Dirulaguntzei buruzko azaroaren 9ko 11/2005 Foru Legearen 14.1 ñ) eta 28.3 artikuluetan aurreikusten diren ondorioetarako.

–Dirulaguntzaren xede diren jarduketak gauzatzeko jarduketen kontratazioan Kontratu Publikoei buruzko apirilaren 13ko 2/2018 Foru Legean ezartzen diren legezko aginduak bete direla.

–Dirulaguntzaren xedeko jardueren finantzaketa: adierazi behar dira, dirulaguntza honetaz gain, dirulaguntzaren xedeko jarduketak finantzatu dituzten beste funts batzuen zenbatekoa, jatorria eta aplikazioa (funts berekiak, bestelako baliabideak edo bestelako dirulaguntzak).

–Dirulaguntzaren xede diren jarduketak amaitu direla; bestela, obren jasoketaren akta edo obra amaierako ziurtapena.

g) Ingurumen eta energia jasangarritasunerako proiektuetan, enpresa edo profesional gaikuntzadun baten ziurtagiria edo egiaztagiria, adierazten duena egin diren inbertsioak auditoretzan agertzen direla eta horren arabera egin direla.

h) Irisgarrritasunerako proiektuetan, enpresa edo profesional gaikuntzadun baten ziurtagiria edo egiaztagiria, adierazten duena egin diren inbertsioak auditoretzan agertzen direla eta horren arabera egin direla.

i) Jarritako kartelaren web orriaren esteka edota argazkiak, egiaztatzeko dirulaguntzaren xede den jarduketaren berri eman dela ezarrita dagoen bezala.

11. oinarria.–Dirulaguntza ordaintzea.

Frogagiriak aztertuta, Turismoa eta Merkataritza Antolatu eta Sustatzeko Zerbitzuak ordainketa egiteko ebazpenaren proposamena igorriko dio Turismo, Merkataritza eta Kontsumo Zuzendaritza Nagusiari, eta txosten bat gehituko zaio, frogatzen duena erakunde onuradunak betetzen dituela dirulaguntza kobratzeko eskubidea ematen duten betebehar guztiak.

Laguntza ordaintzeko ebazpena 2021eko abenduaren 31 baino lehenago emanen da.

12. oinarria.–Erakunde onuradunen betebeharrak.

1. Dirulaguntza jasotzen duten erakunde onuradunek betebehar hauek izanen dituzte:

a) Dirulaguntzaren xedeko jarduketak egin, justifikatu eta ordaintzea deialdian ezarritako epeetan.

b) Turismoa eta Merkataritza Antolatu eta Sustatzeko Zerbitzuari jakinaraztea, 10 egun balioduneko epean kontzesioaren ebazpena jakinarazten denetik aitzina, emandako dirulaguntzari uko egiten zaiola, diruz lagunduriko ekintzak ez badira eginen deialdian ezarritako epeetan.

c) Diruz lagunduriko inbertsio proiektuan egin nahi diren funtsezko aldaketen berri ematea Turismoa eta Merkataritza Antolatu eta Sustatzeko Zerbitzuari, haiek gauzatu baino lehen. Zerbitzu horrek baimendu beharko du proiektuaren edozein aldaketa garrantzitsu, eta eskatzen zaizkion aldaketak baimenduko ditu, baldin eta behar bezala justifikatuta badaude eta bermatzen bada betetzen direla bai dirulaguntzaren xedea, bai diruz laguntzen den proiektuaren helburuak.

d) Dirulaguntzaren xede diren inbertsioak abian jartzea 2022ko martxoaren 1a baino lehen, eta Merkataritza Antolatu eta Sustatzeko Zerbitzuari jakinaraztea zer egunetan ireki den.

e) Dirulaguntzaren xede diren jarduketen gaineko informazio eta publizitate guztietan (irratiko iragarkiak, aurkezpenak edo webguneak) Nafarroako Gobernuaren dirulaguntza duela adierazi beharko da. Jarduketa horretan sortzen diren euskarri guztietan agertu beharko dira Nafarroako marka turistikoa eta Nafarroako turismoko web orri ofiziala, laguntzaren web fitxako informazioarekin bat.

f) Zazpi urtez mantentze-lanak eta garbiketa-lanak egitea inbertsioaren xede den azpiegituran edo establezimenduan.

g) Dirulaguntzaren xede diren ondasunak gutxienez 10 urtez edukitzea dirulaguntzaren xede den xedeari atxikita, dirulaguntza ordaintzeko ebazpena ematen denetik hasita. Aldi horretan toki entitateek behar diren mantentze-lanak egin beharko dituzte bide berdeak, bizikleta-bideak edo eremu turistikoak ibiltzeko moduan, irekita eta erabiltzeko moduan egoteko.

h) Dirulaguntzaren publizitate egokia ematea, ondotik zehazten den moduan eta aldietan, dirulaguntza ematen duen ebazpena jakinarazten den egunetik edo, bestela, inbertsioak abian jartzen direnetik aurrera:

–Bi urte, onuradunaren web orrian txertatuta laguntza fitxan adierazten den testua.

–Gainera, establezimendu turistikoetan eta turistak hartzen diren tokiak dauden azpiegituretan, bi urte, ageriko tokian jarrita laguntza fitxako ereduaren araberako kartela.

i) Dirulaguntzei buruzko Foru Legearen 9. artikuluan ezarritako betebehar orokorrak betetzea.

2. Oinarri arautzaile hauetan edo Dirulaguntzei buruzko Foru Legean ezarritako betebeharren bat bete ezean, onartutako dirulaguntza jasotzeko eskubidea galtzen ahalko da edo, kasua bada, diru hori itzuli egin beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa berriro ere zehazten ahalko da, proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

Zehazki:

a) Baldin eta justifikazio agiriak ezarritako epealdia iraganda aurkezten badira, baina 2021eko abenduaren 30a baino lehen, ordaindu beharreko dirulaguntzaren zenbatekoa % 10 murriztuko da. Egun horren ondotik aurkezten badira, dirulaguntza kobratzeko eskubidea galdu dela deklaratuko da.

b) Diruz lagundutako jarduketak prezio merkeagoan egiten badira (ezarritako epean gauzatu, fakturatu eta ordainduta), murrizketa hauek aplikatuko dira:

–Diruz lagundutako jarduketaren % 50etik % 75era bitarteko prezioan egiten bada, azken dirulaguntzaren ordainketa murriztuko da: justifikatutako inbertsioaren ondoriozko dirulaguntzaren % 50.

–Diruz lagundutako jarduketaren % 50etik beherako prezioan egiten bada, dirulaguntza kobratzeko eskubidea galdu dela deklaratuko da.

Dirulaguntzaren xedeko jarduketaren bat ez dela eginen jakinarazteko komunikazioa aurkezten bada epearen barnean, oinarri arautzaile honen 1.b) apartatuan adierazi bezala, jarduketa hori ez da kontuan hartuko exekuzio maila zehaztearen ondorioetarako.

Era berean, justifikatzen den inbertsio diruz lagungarria ezin da izan ezarritako gutxieneko inbertsioa baino gutxiago. Izan ere, gutxiago bada, dirulaguntza kobratzeko eskubidea galdutzat joko da.

c) Baldin eta oinarri honen 1. zenbakiko f), g) eta h) letretan ezarritako epeak betetzen ez badira, zenbat denbora falta den betetzeko, horren araberako zuzeneko proportzioan zehaztuko da itzuli beharreko zenbatekoa.

d) Inbertsioak ez badira abian jartzen 2022ko martxoaren 1erako, jasotako diru kopuru guztiak itzuli beharko dira, behar diren berandutze interesekin batera.

13. oinarria.–Dirulaguntzen bateragarritasuna.

Dirulaguntza hauek bateraezinak dira Nafarroako Foru Komunitateko Administrazioak, beste administrazio publiko batzuek, beste erakunde publiko nahiz pribatu batzuek edo partikularrek, Espainiakoek nahiz atzerrikoek, jarduketa beretarako emandako beste laguntza batzuekin.

14. oinarria.–Emandako dirulaguntzen publikotasuna.

Turismoa eta Merkataritza Antolatu eta Sustatzeko Zerbitzuak ikusgai paratuko ditu, Ogasuneko Ministerioaren Dirulaguntzen Datu Base Nazionalean (http://www.pap.minhap.gob.es/bdnstrans/GE/eu/index), emandako dirulaguntzak, honako datu hauek adierazita: deialdia, laguntza zein aurrekontu kredituri egozten zaion, onuraduna eta emandako diru kopurua.

Halaber, laguntza fitxan argitaratuko dira deialdi honen emaitzak.

15. oinarria.–Oinarri arautzaile hauen aurkako errekurtsoa.

Administrazioarekiko auzi-errekurtsoa jartzen ahal da oinarri arautzaileen aurka, eskumena duen ordena jurisdikzionalari zuzendua, honako hau argitaratu eta hurrengo egunetik bi hilabete igaro baino lehen, Nafarroako Gobernuan aldez aurreko errekerimendua egin ahal izatea galarazi gabe, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.

Iragarkiaren kodea: F2107752