2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ALTSASU
Alkatetzak aldi baterako bereganatzea Tokiko Gobernu Batzarrari eskuordeturiko eskumenak
Altsasuko alkateak ebazpena eman zuen 2020ko martxoaren 30ean. Hona hemen testua:
Alkatetzaren martxoaren 30eko 386/2019 Ebazpena, zeinaren bidez Alkatetzak bereganatzen baititu ekainaren 28an eman zuen 386/2019 Ebazpenaren bidez eskuordeturiko eskumenak, alarma egoera deklaratzen duen martxoaren 14ko 463/2020 Errege Dekretuak indarra duen bitartean.
Ikusirik Alkatetzaren uztailaren 18ko 1055/2019 Ebazpena, haren bitartez Tokiko Gobernu Batzarrari eskuordetu baitzitzaizkion Alkatetza honen zenbait eskumen, Toki Araubidearen Oinarriak arautzen dituen apirilaren 2ko 7/1985 Legearen 21.3 artikuluaren eta Toki Entitateen Antolaketaren, Funtzionamenduaren eta Araubide Juridikoaren gaineko Erregelamenduaren 43.2 artikuluaren arabera.
Ikusirik COVID19 koronabirusaren bilakaerak sortutako ezohiko egoera, zeinaren ondorioz onetsi baita COVID-19ak eragindako osasun krisia kudeatzeko alarma egoera deklaratzen duen martxoaren 14ko 463/2020 Errege Dekretua.
Kontuan hartuta osasun alorreko agintarien aholkua dela jendearen arteko bilerarik ez egitea eta prebentzioa, berriz, gomendatutako irizpide nagusia.
Kontuan hartuta, orobat, Toki Entitateen Antolaketaren, Funtzionamenduaren eta Araubide Juridikoaren gaineko Erregelamendua onesten duen azaroaren 28ko 2568/1986 Errege Dekretuaren 116. artikulua eta Sektore Publikoko Araubide Juridikoari buruzko urriaren 1eko 40/2015 Legearen 10. artikulua,
EBAZTEN DUT:
1. Alkatetzak bereganatzea uztailaren 18ko 1055/2019 Ebazpenaren bidez Tokiko Gobernu Batzarrari eskuordetu zizkion eskumenak. Bereganatze honek indarra izanen du martxoaren 14ko 463/2020 Errege Dekretuak deklaratu zuen alarma egoerak dirauen bitartean. Dekretu hori deklaratu zen COVID-19ak eragindako osasun krisia kudeatzeko.
2. Ebazpen honen iragarkia Nafarroako Aldizkari Ofizialera igortzea, AFEren 44.2 artikuluan xedatuari jarraikiz. Horrek ez du galarazten bereganatzeak eraginkortasuna izatea ebazpen hau sinatzen denetik aurrera.
3. Udalbatzari bereganatze horren berri ematea, egiten duen hurrengo bilkuran.
Administrazio-egintza honen kontra, errekurtso hauek jar daitezke:
–Berraztertzeko errekurtsoa, ebazpen hau eman duen organoari zuzendua, hilabeteko epean, ebazpena jakinarazi eta biharamunetik hasita.
–Gora jotzeko errekurtsoa, Nafarroako Administrazio Auzitegiari zuzendua, hilabeteko epean, ebazpen hau jakinarazten denetik hasita.
–Administrazioarekiko auzi-errekurtsoa, Administrazioarekiko Auzien Epaitegiari zuzendua, bi hilabeteko epean, ebazpena jakinarazi eta biharamunetik hasita.
Altsasun, 2020ko martxoaren 30ean.–Alkatea, Javier Ollo Martínez.
Iragarkiaren kodea: L2004358
