1. NAFARROAKO FORU KOMUNITATEA
1.7. BESTELAKOAK
GARAPEN EKONOMIKO ETA ENPRESARIALEKO DEPARTAMENTUA. IRAGARKIA, Düsseldorfen azaroaren 16tik 19ra eginen den MEDICA 2020 azokan parte hartzeko eskaera egiteko epea irekitzeari buruzkoa.
Nafarroako Gobernuak Nafarroako hirugarren Nazioarteko Plana prestatu du, Foru Komunitateak nazioartean duen posizionamendua hobetzeko asmoz.
Nafarroaren nazioartekotze-prozesuaren diagnostikoan, zeina oinarri hartu baita aipatu plana egiteko, Alemania lehentasunezko herrialdeetako bat da, eta ahalegin berezia eskaini behar zaio Nafarroa nazioartekotzeko orduan. Osasunaren arloa da herrialde horretako sektore estrategikoetako bat.
Düsseldorfeko MEDICA azoka urtero egiten da eta munduko garrantzitsuena da osasunaren arloko teknologiaren sektorean. Aurten azaroaren 16tik 19ra izanen da. Iaz, MEDICAk 5.500 erakusketari bildu zituen eta COMPAMEDek, berriz, ia 800. Osotara 121.369 bisitari izan zituzten, haietako bi heren 170 herrialdetatik joanak.
Azokaren barrutian antolatzen dira bai konferentziak bai forum espezializatuak bai jarduerak, hala nola “Healthcare Brokerage Event” delakoa; hots, bilera plataforma bat, Enterprise Europe Network (EEN) sareak martxan jarria helburu honekin: enpresei, unibertsitateei eta ikerketa zentroei laguntzea entitate bazkideak identifikatzen, teknologia trukatzeko eta produktuak elkarrekin garatu eta fabrikatzeko, lizentzietarako, banaketa-akordioetarako, joint ventures motako kontratuetarako edo beste zeinahi lankidetza motatarako.
Nafarroako Gobernuaren ustez, azoka honek aukera handiak eskaini ditzake medikuntzaren sektoreko Nafarroako enpresentzat, eta batez ere, teknologia diseinatzen eta ekoizten duten enpresentzat, bai eta osasunaren arloko eta laborategietako ekipamendua diseinatzen eta ekoizten dutenentzat ere. Gogorarazi behar da gaur egun Nafarroan osasunaren arloko 68 enpresa industrial daudela, eta urtean 659 milioi euro fakturatzen dituztela. Hazten ari den arlo bat da, eta Nafarroako Espezializazio Adimentsuaren Estrategiaren barruan sartuta dago.
–Ekintzaren helburuak:
- Azokaren prospekzioa egitea.
- Ezagutzea zein den medikuntzako gailuen eta osasun teknologiaren sektorearen egoera nazioartean.
- Negozio aukerak identifikatzea.
–Sektorea:
–Ekintzaren edukia:
- MEDICA 2020 azokan “Navarra Health” standa jarriko da Nafarroako enpresentzat, baterako pabilioian, 15. hall-ean, Fenin federazioak antolatua. Nafarroako enpresek topagune gisa erabil dezakete.
- Enpresen eta balizko bezeroen arteko topaketak antolatuko dira “Healthcare Brokerage Event” delakoaren baitan, Nafarroako Unibertsitateko Enterprise Europe Network sarearekin lankidetzan. Topaketa horien helburua da enpresei, unibertsitateei eta ikerketa zentroei laguntzea entitate bazkideak identifikatzen, teknologia trukatzeko eta produktuak elkarrekin garatu eta fabrikatzeko, lizentzietarako, banaketa-akordioetarako, joint ventures motako kontratuetarako edo beste zeinahi lankidetza motatarako.
- Nafarroako entitateen sustapen katalogo bat prestatuko da, azokan banatzeko.
- Entitate parte-hartzaileen sustapena eta zabalkundea eginen da, MEDICA azokan jarriko den “Navarra Health” standaren baitan.
- Baimenak emanen dira MEDICA 2020 azokan sartzeko (baimen bat enpresa bakoitzeko).
Nafarroako Gobernuak ez ditu ordainduko bidaietako, hoteletako, otorduetako, barneko joan-etorrietako edo enpresa bakoitzaren bestelako gastuak, horiek entitate parte-hartzaileen kontura izanen baitira.
–Entitate parte-hartzaileek bete beharreko baldintzak:
- Osasun teknologiaren sektoreko entitatea izatea (zentro teknologikoak, osasun teknologiako produktuak fabrikatzen dituzten enpresak eta abar).
- Helbide fiskala Nafarroan izatea eta Nafarroan egitea garapen eta/edo ekoizpen lanak.
–Eskaera aurkezteko epea:
Eskaerak telematika bidez aurkeztuko dira nahitaez, beranduenez 2020ko maiatzaren 20ko 24:00ak arte, Nafarroako Gobernuak Interneten duen atariaren izapideen katalogoko fitxa erabiliz: https://www.navarra.es/home_eu/Servicios/ficha/8490/Convocatoria-para-participar-en-la-feria-MEDICA-2020-en-Dusseldorf-(Alemania) Dagokion eskaera-orria bete behar da. Fitxa horretan, Nafarroako Foru Komunitateko Administrazioaren Erregistro Orokor Elektronikoan sartzeko esteka bat izanen da. Identifikatzeko, ziurtagiri digitala eduki behar da.
Nafarroako Gobernuak erabiltzaileentzako arreta gune batzuk jarriko ditu, izapideen katalogoaren fitxan behar bezala iragarriko direnak. Gune horietan, eskaera aurkezteko moduaz aholku emanen zaie, baina, aurreko paragrafoan ezarri bezala, eskaera aurkezteko beharrezkoa izanen da ziurtagiri digitala edukitzea.
–Gehienez parte har dezaketen enpresen kopurua:
- MEDICA azokako ekintza honetan gehienez ere 25 enpresak parte hartzen ahalko dute. Eskaerak aurkezten diren ordenaren arabera hautatuko dira parte-hartzaileak, ezarritako gehieneko kopurura heldu arte.
Eskaera onartuz gero, Nazioarteko Proiekzioaren Zerbitzuak mezu bat bidaliko du inskripzio-fitxan adierazitako helbide elektronikora, eta parte-hartzaileei dei eginen zaie azokan izanen duten baterako presentzia prestatzeko.
–Enpresa parte-hartzaileen betebeharrak:
- Enpresaren datuak jakinaraztea, ekintzan parte hartzeko eskaeran zehazten direnak.
- Ekintza egiten denetik hasita 15 eguneko epean, Nazioarteko Proiekzioaren Zerbitzuak igorriko dien balorazio inkesta betetzea.
Iruñean, 2020ko martxoaren 2an.–Nazioarteko Proiekzioaren Zerbitzuko zuzendaria, Miren Ausín Lecuna.
Iragarkiaren kodea: F2003224
