Iragarkia

51. ALDIZKARIA - 2020ko martxoaren 13a

1. NAFARROAKO FORU KOMUNITATEA

1.7. BESTELAKOAK

40/2020 EBAZPENA, otsailaren 17koa, Hezkuntzako zuzendari nagusiak emana, funts publikoak jasotzen dituzten Nafarroako Foru Komunitateko Haur Hezkuntzako lehen zikloko ikastetxeetan 2020-2021 ikasturtean haurrak onartzeko prozedura arautzen duena.

Martxoaren 26ko 28/2007 Foru Dekretuak, Nafarroako Foru Komunitatean Haur Hezkuntzako lehen zikloa arautzen duenak, 12. artikuluko 1. apartatuan ezartzen du Hezkuntza Departamentuak arautuko duela ikasleak nola onartu funts publikoak jasotzen dituzten ikastetxeetan, baldintza beretan sartzeko aukera izan dezaten.

Araudi indarduna aplikatzeko, eta Hezkuntzari buruzko maiatzaren 3ko 2/2006 Lege Organikoak eskolatzearen arloan ezarritako esparruaren barnean, komenigarritzat jo da funts publikoak jasotzen dituzten ikastetxe guztietan ikasleak onartzeko prozedura arautzea.

Antolamendu, Prestakuntza eta Kalitate Zerbitzuko zuzendariak aldeko txostena aurkeztu du funts publikoak jasotzen dituzten Haur Hezkuntzako lehen zikloko ikastetxeetan 2020-2021 ikasturtean haurrak onartzeko prozedura ezartzeko.

Hezkuntza Departamentuaren egitura organikoa ezartzen duen urriaren 30eko 267/2019 Foru Dekretuak ematen dizkidan ahalmenak erabiliz,

EBAZTEN DUT:

1. Arautzea funts publikoak jasotzen dituzten Nafarroako Foru Komunitateko Haur Hezkuntzako lehen zikloko ikastetxeetan 2020-2021 ikasturtean haurrak onartzeko prozedura, zehaztapen hauekin bat:

1.–Ikaspostuen hartzaileak.

2018an edo 2019an jaiotako haurren aitek, amek edo tutoreek eska dezakete ikaspostua, baita 2020an jaiotako haurrenek ere, baldin eta 2020-2021 ikasturtea hasi baino 16 aste lehenago jaiotzen badira. Urtebetetik beherakoendako instalaziorik ez duten haur eskoletan, ikasturte hasieran urtea egina duten haurrendako bakarrik eskatzen ahalko da tokia.

Ikastetxeetan hasteko, haurrak 16 aste beteak izan beharko ditu, edo urtebete, ikasturtea hasi baino lehen egina, baldin eta ikastetxeak urte batetik beherako haurrendako instalaziorik ez badu.

Ebazpen honetan aurreikusitako prozedura 2019-2020 ikasturtean ikastetxean matrikulatuta ez dauden haurrei aplikatuko zaie, salbu 4.1 oinarrian ordainketa egiteko konpromisoari buruz xedatutakoa, hori beren gain hartu beharko baitute ikaspostua erreserbatzen duten eta haurren ikastetxeko udalerrian ez beste batean bizi direnek, ikastetxean matrikulatuak egon edo ez 2019-2020 ikasturtean.

2.–Haurrak onartzeko prozeduran eskumena duten organoak.

Entitate titular bakoitzak hautapen batzorde bat izendatuko du, gutxienez ere entitate titularraren ordezkari batek eta ikastetxearen ordezkari batek osatua. Entitate titularraren ordezkaria izanen da batzordeburua.

Batzordeak eginkizun hauek izanen ditu:

a) Ikaspostuak erreserbatzeko prozedura aurrera eramatea.

b) Tramitaziorako baremoa eta epeak argitaratzea.

c) Eskatzaile bakoitzari dagokion puntuazioa esleitzea, ebazpen honen eranskinean haurrak onartzeko ezarritako baremoarekin bat.

d) Haurrak onartzeko prozesua ebaztea, eta onartu eta baztertuen behin-behineko eta behin betiko zerrendak argitaratzea, lortutako puntuazioa adierazita.

e) Erreklamazioak ebaztea.

f) Plangintza egitea, haurrak unitateka banatuta, ikasturteko lehen egunean duten adina erreferentzia gisa hartuta.

g) Behin-behineko plangintzaren lehenbiziko plantilla Hezkuntza Departamentura igortzea 2020ko apirilaren 24a baino lehen, aurreinsripzioari buruzko datuekin; behin-behineko plangintzaren bigarren plantilla, matrikulako datuekin, 2020ko ekainaren 19a baino lehen; eta behin betiko plantilla, ikasturteko lehen astean beteta dauden ikaspostuen kopuruari buruzko datuekin, Hezkuntzako Ikuskapen Zerbitzuak eskola horretarako onetsitako egutegiaren arabera.

Ebazpen honen 6. puntuan ezarritakoaren arabera haurrak onartzeko epeak egokitu dituzten entitateen kasuan, onartuen behin-behineko zerrendak argitaratu baino lehen igorri beharko dute behin-behineko plangintza, aurreinskripzioari buruzko datuekin.

3. Haurrak onartzeko prozeduraren barruko jarduketak.

Funts publikoak jasotzen dituzten Haur Hezkuntzako lehen zikloko ikastetxeetan haurrak onartzeko prozeduraren barruan jarduketa hauek eginen dira:

a) Ikaspostuak erreserbatzea, ikastetxe horietan 2019-2020 ikasturtean matrikulatu diren haurrendako.

b) Eskaerak aurkeztu eta jasotzea, baremazioa egitea eta behin-behineko zerrendak argitaratzea.

c) Erreklamazioak ebaztea eta behin betiko zerrendak argitaratzea.

d) Matrikula egitea.

Iruñearen kasuan, aldi berean eginen dira Eskubide Sozialetako Departamentuaren ikastetxeetako aurreinskripzioa eta Iruñeko Udalaren ikastetxeetakoa.

4.–Onartzeko prozedura.

4.1. Ikaspostuen erreserba.

Hautapen batzordeak jarraibide batzuk ezarriko ditu 2019-2020 ikasturtean ikastetxean ibili diren haurrei ikaspostua erreserbatzeko. Erreserba 2020ko otsailaren 17tik 21era bitarte eginen da.

Ikastetxe bakoitzeko elkartzeko modalitatea desberdina izan daiteke Hezkuntza Departamentuak berrikusitako plangintzaren arabera.

Haur Hezkuntzako ikastetxeko udalerrian ez beste batean bizi diren haurren familiek, ikaspostuaren erreserba egitean, idatzita aurkeztu beharko dute udal titularrari dagokion moduluaren portzentajea bizilekuko udalak edo familiak berak ordaintzeko konpromisoa.

Erreserba formalizatzeko unean aurreko paragrafoan adierazitako baldintza betetzen ez duten edo kuotaren bat ordaindu gabe duten familiek ezin izanen dute erreserba eskatu.

Haur batek ikaspostua uzten badu hurrengo ikasturterako ikaspostua erreserbatu ondoan, hari loturiko eskubideak galduko ditu; hau da, ikaspostuaren erreserbak ez du ondoriorik izanen.

4.2. Eskabideak.

Eskabideak ikastetxean edo entitate titularrean jaso eta aurkezten ahalko dira, 2020ko martxoaren 16tik 27ra arte, biak barne. Entitate titularraren ikastetxe bat baino gehiago egonez gero, edo ordutegi edo hizkuntza eredu bat baino gehiago izanez gero, eskatzaileek lehentasun ordena adierazi beharko dute.

Haur eskolaren titular den udalak beste udalerrietako haurrak ez onartzeko ahalmena izanen du, aurkezten ez bada udal titularrari dagokion moduluaren portzentajea bizilekuko udalak edo familiak berak ordaintzeko konpromisoa.

4.3. Dokumentazioa.

4.3.1. Haur eskolan sartzeko eskabideak eredu ofizialaren araberakoak izanen dira, eta dokumentazio hau izanen dute erantsita:

a) Haurraren jaioteguna eta eskatzailearen bizilekua egiaztatzen dituen dokumentua. Oraindik ere jaio ez den haur baten eskaera egiteko, noiz jaioko den aurreikusten duen txosten medikoa erantsiko da, eta, adoptatutako edo harreran hartutako haurren kasuan, kasuan kasuko frogagiria.

b) NANaren, pasaportearen, atzerritarrendako bizileku txartelaren edo aitaren eta amaren edo legezko tutoreen nortasun agiriaren edo baliokidea den dokumentuaren fotokopia.

c) Familia nork osatzen duen frogatzen duen dokumentazioa:

–Familia liburuaren fotokopia (aita, ama eta seme-alabak) edo, halakorik ez badago, antzeko agiri ofiziala osorik. Baldin familia liburuan ageri ez den seme-alabarik bada familia nukleoan, bestelako dokumentuen bidez frogatu beharko da; adibidez, jaiotza agirien, banantze edo dibortzio epaien eta abarren bidez.

–Haurra harrera egoeran dagoela edo adoptatua dela frogatzen duen agiria.

–Banantzearen edo dibortzioaren kasuan, hura ezartzen duen epai judiziala edo legez frogatzen duen dokumentua.

–Hala badagokio, familia unitateko kideren batek %33ko edo gehiagoko desgaitasun fisiko, psikiko edo sentsoriala duela egiaztatzen duen ziurtagiria.

–Familia ugariaren titulua.

–Halakorik izanez gero, familia gurasobakarraren titulua edo hori eskatu izanaren frogagiria. Halakorik izan ezean:

Familia gurasobakarrendako berariazko dokumentazioa.

–Erantzukizunpeko adierazpena, bikote egonkor bat ez osatzeari eta beste pertsona batekin ezkondu ez izateari buruzkoa.

–Pertsona alarguna bada, edo egoera parekoa bada: bikotekidearen heriotzaren deklarazioa.

–Pertsonak guraso ahala esklusiboki badu: banantze edo dibortzio epaia, edo ezkontzaz kanpoko seme-alabengatiko neurriei buruzko epaia, non egiaztatzen den guraso ahala esklusiboki esleitzen zaiola edo guraso ahala beste alderdiari kentzen zaiola.

–Adingabeak harreran badaude: familia harreragileei harrera ematen dien ebazpena.

Gurasobakartasun egoeran dauden familiendako berariazko dokumentazioa.

–Gurasoetako batek zaintza eta jagoletza esklusiboa badu: banantze edo dibortzio epaia, edo ezkontzaz kanpoko seme-alabengatiko neurriei buruzko epaia, zaintza eta jagoletza esklusiboa duela egiaztatzen duena.

–Guraso bizikideetako bat espetxean badago: espetxeratze egoera frogatzen duen ebazpen judiziala.

–Seme-alabak dituen gurasoak genero indarkeria jasan badu: egiaztagiri ofiziala (apirilaren 10eko 14/2015 Foru Legearen 4.2 artikuluari eta otsailaren 7ko 5/2019 Foru Legearen 16.2 artikuluari jarraikiz).

–Baliaezintasun handiaren ziurtagiria, mendekotasun handia aitortzeko ebazpena edo gurasoetako baten %33ko edo gehiagoko desgaitasun mailaren ebazpena.

d) Gurasoen edo legezko tutoreen lan egoera eta/edo egoera akademikoa justifikatzen duten agiriak:

–Besteren konturako langileen kasuan, aurreinskripzioaren epea bukatzeko egunaren aurreko 30 egunetan Gizarte Segurantzan edo dagokion mutualitatean alta emanda zegoela frogatzen duen agiria.

–Norberaren konturako langileen lan egoera frogatzeko, aurreinskripzioa bukatzeko egunaren aurreko 30 egunetan mutualitate orokorrean edo Gizarte Segurantzan dagokion araubidean eta ekonomia-jardueren gaineko zergan altan zegoela frogatzen duten agiriak beharko dira.

–Langabeziaren kasuan, enplegu eskariaren txartelaren fotokopia.

–Eszedentzian egonez gero hiru urtetik beherako seme-alabak zaintzeko, eszedentziaren jakinarazpena aurkeztu behar da. Lan egoera aktibotzat hartzeko, idatziz zehaztu beharko da lanera itzuliko dela ikasturtea hasi ondoko hilabete eta erdi baino lehen.

–Eskaera aurkezteko unean ikasten arituz gero, matrikularen, ikasturteko egutegiaren eta ordutegiaren frogagiriak aurkeztuko dira.

–Hala badagokio, honako hau egiaztatzen duen dokumentazioa: familia unitateko kideren bat ezintasun iraunkor osoko edo absolutuko nahiz baliaezintasun handiko pentsioa aitortuta duen Gizarte Segurantzako pentsioduna dela.

e) Errenta mailak frogatzeko agiriak:

–Gurasoek edo legezko tutoreek pertsona fisikoen errentaren gaineko zergari buruz egindako azken aitorpenaren fotokopia. Aitorpena egitera behartuta ez badaude, dagokion dokumentazio ofiziala aurkeztu beharko da, edo, azken buruan, errenten edo diru-sarreren zinpeko aitorpena eta/edo ikastetxearen titularra den toki entitateak familiaren 2018ko diru-sarrerak zehazteko beharrezkotzat jotzen dituen agiriak, edo 2019ko diru-sarrerei dagozkienak, onarpen prozesua 2020ko ekainaren 30a baino geroagokoa bada.

–Interesdunak bi aukera izanen ditu: dokumentazioa berak aurkeztea, edo entitate titularrari baimena ematea behar den dokumentazioa eska diezaion Nafarroako Foru Komunitateko Administrazioaren barrenean eskumena duen unitate organikoari edo departamentuari. Baimen hori eskabide bitartez eman beharko da, deialdian dokumentazioa aurkezteko ezartzen den epearen barrenean, eta agiria noiz eta zein organotan aurkeztu zen adierazi beharko da.

f) Gurasoen edo legezko tutoreen bizilekua edo lantokia eraginpeko eremu geografikoan dagoela frogatzen duen dokumentua:

–Erroldaren ziurtagiria, udalak emana, haurra eta haren gurasoak edo haurraren legezko tutoreak 2020ko urtarrilaren 1a baino lehen udalerrian erroldatuta daudela jasotzen duena, edo, udalerri horretara bizitzera joan badira lanagatik edo haurrarekin bizi den gurasoari dagozkion beste arrazoi justifikatu batzuk daudelako, udalerri horretara bizitzera aldatu diren eguneko ziurtagiria.

–Jaio gabeko haurren kasuan, haurraren aitaren eta/edo amaren edo legezko tutoreen erroldaren ziurtagiria.

–Zaintza eta jagoletza dituen gurasoaren edo legezko tutorearen lantokia zein den frogatzen duen agiria.

–Bizilekuz aldatzea aurreikusi bada, etxebizitza berria ikasturtea hasi baino lehen emanen dietela frogatzen duen agiria aurkeztea baloratuko da. Kasu horretan, gaur egungo bizilekua zein den adieraziko da jakinarazpenetarako, eta bizileku berria, berriz, baremazioa egiteko.

–Idatzizko konpromisoa, jasotzen duena bizilekuko udalak edo familiak berak ordainduko duela udal titularrari dagokion moduluaren portzentajea.

g) Sarbide zuzenerako baldintza bereziak betetzen direla frogatzen duen agiria:

–Haurraren desgaitasuna kalifikatzeko ziurtagiria eta/edo haurraren mendekotasun handia (III. gradua) aitortzen duen egiaztagiria, eta/edo profesional batek egindako txostena, berariazko hezkuntza beharrak ekar ditzaketen ezaugarriak deskribatzen dituena.

h) Beste edozein egoera berezi baloratzeko frogagiriak:

–Egoera frogatzeko txosten bat, mediku edo psikologo batek, gizarte zerbitzuek edo zerbitzu espezializatu ofizialek egina.

4.3.2. Alegatzen den egoerari buruzko ziurtagiriak aurkezten ez badira, zero puntuazioa emanen da onarpen baremoan dagokion atalean.

4.3.3. Egiaztatzen bada eskabidean edo erantsitako agirietan adierazitako datuak okerrak edo faltsuak direla, dagokion puntuazioa aldatuko da, eta, kasua bada, emandako ikaspostua kenduko zaio.

4.3.4. Hautapen batzordeak zilegi izanen du noiznahi eskatzea haurrak onartzeko baremoan puntuazioa duten inguruabarrei buruzko frogagiriak zuzentzeko.

4.4. Ebazpenaren faseak.

4.4.1. Eskabideak baloratzeko, hautapen batzordeak ebazpen honen eranskinean ageri den baremoa aplikatuko du, haurren gurasoek edo legezko tutoreek aurkeztutako dokumentazioaren arabera.

4.4.2. Behar pertsonal, familiar edo sozial larriak dituzten haurrak Haur Hezkuntzako lehen zikloko ikastetxeetan sartzeko aukera baloratuko du Hezkuntza Departamentuak, baldin haur horiek eskaturiko haur eskolan ikasposturik lortzen ez badute, ebazpen honen eranskineko 2.5 atalean aipatzen diren 10 puntuak esleitu ondoan. Behar larri horiek behar bezala justifikatu eta frogatu beharko dituzte toki entitateek. Onartuen behin-behineko zerrenda argitaratu baino lehen eginen da balorazio hori, hautapen batzordeak hala eskatzen badu.

4.4.3. Onartuen behin-behineko zerrenda eta behin-behineko itxaron zerrenda ikastetxearen eta entitate titularraren iragarki taulan jarriko dira 2020ko maiatzaren 11n, ebazpen honetan ezarritako baremoa aplikatu ondoren lortutako puntuazioaren hurrenkerari zorrotz jarraikiz.

4.4.4. Erreklamazioak ikastetxearen titular den entitatean aurkeztuko dira, hautapen batzordeari zuzenduta, eta azalduko da zergatik eskatzen den behin-behineko zerrendan agertutako puntuazioa berrikusteko. Aurkezteko epea 2020ko maiatzaren 11n hasiko da, eta maiatzaren 15ean bukatuko, biak barne. Onartzeko baremoan puntuazioa ematen duten agirietako akatsak ez dira inola ere zuzenduko.

4.4.5. Onartuen behin betiko zerrenda eta behin betiko itxaron zerrenda 2020ko maiatzaren 25ean argitaratuko dira ikastetxearen eta entitate titularraren iragarki tauletan, lortutako puntuazioaren hurrenkerari zorrotz jarraikiz.

4.5. Matrikula egitea.

4.5.1. Matrikulak entitate titularrak finkatzen duen tokian eginen dira 2020ko maiatzaren 25etik 29ra bitarte, biak barne.

4.5.2. Matrikula egiteko, beharrezkoa da haurrak 16 aste beteak izatea ikasturtea hasten den egunean, edo 12 hilabete, urte batetik beherako haurrendako instalaziorik ez duten ikastetxeen kasuan.

4.5.3. Ezarritako epean matrikularik egiten ez bada, ikaspostuari uko egin zaiola ulertuko da, eta beste bati esleituko zaio itxaron zerrendako hurrenkerari jarraikiz.

4.5.4. Eskatutako aukeretako batean matrikula egiteak ikastetxe bereko beste aukera guztiei uko egitea ekarriko du, edo herri bereko beste edozein ikastetxetakoei, ikastetxearen titular den entitateak hala ezartzen duen udalerrietan.

4.5.5. Matrikula egiteko honako agiri hauek aurkeztu beharko dira:

a) Haurra inskribatuta dagoen Gizarte Segurantzako kartillaren edo txartelaren fotokopia.

b) Matrikulari dagokion kuota ordaindu izanaren egiaztagiria.

c) Beste udalerri batean bizi diren haurren kasuan, udalari dagokion moduluaren portzentajearen finantzaketaren frogagiria. Finantzaketa hori bizilekuko udalak edo familiak berak hartzen ahalko du bere gain.

d) Pertsona fisikoen errentaren gaineko zergaren 2019ko aitorpenaren fotokopia, gurasoena edo legezko tutoreena. Aitorpen hori egin beharrik ez bada, egoki den dokumentazio ofiziala aurkeztu beharko da, edo, besterik ezean, 2019. urteari dagozkion errenta edo diru-sarreren gaineko zinpeko aitorpena eta/edo ikastetxearen titular den toki entitateak beharrezkotzat jotzen dituen agiriak, kalkulatzeko familiak zer diru-sarrera izan dituen urte horretan

Agiri horiek aurkezteko eguna 2020ko ekainaren 30era arte atzeratzen ahalko da.

e) Ordainagiriak helbideratzeko banku entitateko kontu zenbakiaren fotokopia, titularra eta zenbakia agertzen dituena.

f) Kasua bada, beharrezkoa den osasun informazioa, haurrari behar duen arreta eman dakion.

4.5.6. Familiek ezin izanen dute matrikula formalizatu baldin eta haur eskolako bi kuota ordaindu gabe baldin badituzte.

4.5.7. Itxaron zerrendan sartutako haurrak ikaspostu hutsak sortzen direnean matrikulatzen ahalko dira ikastetxean, puntuazio ordenari zorrotz jarraituz, harik eta 2021-2022 ikasturteko ikaspostuen erreserba egiteko epea ireki arte.

4.5.8. Matrikula epe arrunta bukaturik, haurrak onartzeko eskaera gehiago aurkezten ahalko dira, harik eta 2021-2022 ikasturteko ikaspostuen erreserba egiteko epea ireki arte; betiere, aurkezteko unean, haurrak 16 aste beteak izan beharko ditu, edo urtebete ikasturte hasieran, adin horretatik beherako haurrendako instalaziorik ez duten ikastetxeen kasuan.

Eskaera horiek kontuan hartuko dira baldin eta ikaspostu hutsik badago onarpen prozesu arruntean sortutako itxaron zerrenda agortu ondoren. Eskaera aurkezteko egunaren ordenari jarraituz emanen dira ikaspostuak.

4.5.9. Oro har, ez da haurrik onartuko ikaspostuen erreserbaren ondoren. Salbuespenez, entitate titularrak hala erabakitzen duenean, epe hori bukatutakoan ere matrikulatzen ahalko dira haurrak, Hezkuntza Departamentuak ontzat emanez gero. Matrikulazio horiek ez dute eskubiderik ematen hurrengo ikasturtean ikaspostua erreserbatzeko.

5.–Hezkuntza laguntzako askotariko premiak dituzten ikasleak.

Hezkuntza laguntzako askotariko premiak dituzten haurrek sarbide zuzena izanen dute Haur Hezkuntzako lehen zikloko ikastetxeetan. Hezkuntza Departamentuak antolatuko du nola banatu eta non kokatu haur horiek.

Sarbide zuzena emateko beharrezkoa izanen da Hezkuntza Departamentuak (Nafarroako Hezkuntza Bereziko Baliabideen Zentroa) aldeko txostena ematea, deusetan ukatu gabe eskaerekin batera aurkezten diren bestelako txostenak.

6.–Epeak egokitzea.

Aldez aurretik Hezkuntza Departamentuari jakinarazita, entitate titularrek egokitzen ahalko dituzte ebazpen honen 4.2, 4.4.3, 4.4.4 eta 4.4.5 ataletan aipatutako epeak, baina 2020-2021 ikasturterako ikaspostuen erreserba egiteko azkeneko eguna 2020ko apirilaren 8a izanen da.

7.–Ikasleak onartzeko prozedura berezia.

Haurrak 2020-2021 ikasturtean onartzeko prozedura bereziak ezartzen ahalko dira ikastetxe berrietarako edo unitateak gehitzen dituzten ikastetxeetarako. Halakoetan, horretarako eratutako hautapen batzordeak ebazpen honen 4.2, 4.4.3, 4.4.4, 4.4.5, 4.5.1 eta 4.5.7 ataletan adierazitako epeak zehaztuko ditu, aldez aurretik Hezkuntza Departamentuari jakinarazita.

8.–Tarifak.

Hezkuntza Departamentuak, 2020-2021 ikasturterako, familien tarifei buruz onetsi duen araudian ezarritakoarekin bat aplikatuko dira tarifak.

9.–Bajak.

Hauek dira baja emateko arrazoiak:

a) Gurasoek edo legezko tutoreek baja eskatzea.

Banantze, dibortzio edo desadostasun egoeran dauden guraso edo tutoreen kasuan, Hezkuntzako kontseilariaren abenduaren 13ko 112/2013 Foru Aginduan ezarritako irizpideak erabiltzen ahalko dira, orientabide gisa.

b) Haurra ikastetxean ez hastea ikasturtea hasi eta 15 egun natural iraganik, non ez dagoen horretarako arrazoi justifikaturik.

c) Behin ikastetxean hasita, ondoz ondoko 15 egun naturalean ikastetxera ez joatea.

d) Hileko bi kuota ez ordaintzea, jarraian edo ez.

2. Ebazpen hau eta eranskina Nafarroako Aldizkari Ofizialean argitaratzea.

3. Ebazpen honen eta dagokion eranskinaren kontra gora jotzeko errekurtsoa jartzen ahal da, Hezkuntzako kontseilariari zuzendua, argitaratu eta biharamunetik hilabeteko epean.

4. Ebazpen hau eta dagokion eranskina igortzea, behar diren ondorioak izan ditzaten, Hezkuntzako Ikuskapen Zerbitzura, Inklusio, Berdintasun eta Bizikidetza Zerbitzura, Pertsonen Autonomiarako eta Garapenerako Nafarroako Agentziako Familiaren eta Adingabeen Zuzendariordetzako Familien Atalera, Nafarroako Udal eta Kontzejuen Federaziora eta 0-3 urteko Zikloaren eta Landa Eskolen Atalera.

Iruñean, 2020ko otsailaren 17an.–Hezkuntzako zuzendari nagusia, Gil Sevillano González.

ERANSKINA

Onartzeko baremoa

1.–Baremazioaren ondorioetarako kontuan izan beharreko alderdiak.

1.1. Familiako egoerari dagokionez.

Nafarroako Foru Komunitatean familia gurasobakarrak egiaztatzeari buruzko otsailaren 7ko 5/2019 Foru Legean ezarritakoaren arabera:

–Familia gurasobakarra edo gurasobakartasun egoera aitortzeko edo egoera horri eusteko, seme-alabek gurasoarekin behar dute bizi, eta ekonomikoki haren mende egon; horrez gainera, baldintza hauetako bat bete beharko da:

• 21 urte baino gutxiago izatea. Muga hori 26 urtera arte luzatuko da, baldin eta lanpostu bat lortzea xede duten ikasketak egiten ari badira.
• %33ko edo gehiagoko desgaitasun aitortua, mendekotasun handia, ezintasun iraunkor absolutua edo baliaezintasun handia izatea, adina edozein dela ere.

–Guraso bakarreko familiatzat hartuko da:

• Guraso bakar bat, erregistro zibilean berak bakarrik inskribaturiko seme-alabak dituena.
• Guraso alarguna, zenduaren haurrak bere kargura dituena.
• Guraso bat, bere seme-alaben gaineko guraso ahal esklusiboa duena.
• Adingabeak familia harreran dituen pertsona bakar bat, harrera urtebetetik gorakoa denean.

–Gurasobakartasun egoeran dagoen familiatzat hartuko da:

• Seme-alaben zaintza eta jagoletza esklusiboa duen pertsona bat, baldin eta familia unitatearen diru-sarrerak Errenta Egokiagatiko Erosahalmen Nahikotasunaren (SARA) adierazlea halako 1,7 edo gutxiago badira.
• Seme-alabak bere kargura dituen gurasoa, beste gurasoarengandik genero indarkeria pairatu duena.
• Seme-alabak bere kargura dituen gurasoa, beste gurasoa espetxean badago urtebetez edo hortik gora, baldin eta familia unitatearen diru-sarrerak Errenta Egokiagatiko Erosahalmen Nahikotasunaren (SARA) adierazlea halako 1,7 edo gutxiago badira.
• Seme-alabak dituen familia unitate bat, baldin eta guraso bizikideetako batek mendekotasun handia, ezintasun iraunkor absolutua edo baliaezintasun handia aitortua badu eta familia unitatearen diru-sarrerak Errenta Egokiagatiko Erosahalmen Nahikotasunaren (SARA) adierazlea halako 1,7 edo gutxiago badira.

–Familia ugaritzat joko da Familia Ugariak Babesteko azaroaren 18ko 40/2003 Legearen 2. artikuluan eta hurrengoetan halakotzat definitzen dena.

–Honako hauek familia unitateko kide konputagarriak dira:

• Haurraren bi gurasoak, legez banandurik ez daudenak, edo dibortziatu edo banandu ondoan zaintza eta jagoletza partekatua dutenak, edo, bestela, adingabea zaintzeko eta babesteko ardura duten tutoreak edo pertsonak.
• 26 urtetik beherako seme-alabak, familiaren egoitzan bizi direnak eta lan errentarik jasotzen ez dutenak, baldin eta egoera hori frogatzen bada lan bizitzaren ziurtagiri negatiboaren bidez edo hori frogatzen duen agiri ofizial baten bidez. Orobat, epai baten ondorioz ezinduriko seme-alabak, guraso ahal luzatu edo birgaituaren mende daudenak.
• Banandutako bikotekideek zaintza partekatua badute eta berriz ezkondu badira edo bikote egonkorra eratu badute, ezkontide edo bikotekide berria ez da familia unitateko kidetzat hartuko ondorio hauetarako.
• Alargunak berriz ezkondu badira edo bikote egonkorra eratu badute, ezkontide edo bikotekide berria familia unitateko kidetzat hartuko da ondorio hauetarako.
• Gurasoak banantzen edo dibortziatzen badira, gurasoetako batek edo legezko tutoreetako batek baldin baditu zaintza eta jagoletza, ez da kide konputagarritzat joko adingabekoaren zaintza eta jagoletza ez dituen gurasoa.
• Gurasoetako batek beste seme-alaba batzuen zaintza eta jagoletza partekatua badu, horien erdiak ere familia unitateko kidetzat hartuko dira.
• Harreran dauden adingabeen kasuan, harrerako familiari aplikatuko zaio aurreko puntuetan xedatu dena.

–6 urtetik beherako seme-alabak kontuan hartzeko, seme-alabek ez dituzte 6 urteak beteak izan beharko aurreinskripzioa egiteko epea bukatzen den egunean. Jaio gabeko alaba edo semea ere kontuan hartuko da baldin eta eskaturiko ikaspostua harendako bada.

–“Bi anai-arrebarendako edo gehiagorendako ikaspostua eskatzea deialdi berean” kontzeptuagatik emandako puntuazioa galdu eginen da, eskatzaileari egotz dakizkiokeen arrazoiengatik anai-arreba horiek guztiak matrikulatzen ez badira.

–Familia harreran dauden haurrek, egoera hori behar bezala frogatzen bada, ikastetxean anai-arrebak izateagatik ematen den puntuazioa lortzen ahalko dute, harrerako familiak beste haur bat badu eskolatuta eskatutako ikastetxean.

1.2. Gurasoen edo legezko tutoreen lan eta gizarte egoera edo egoera akademikoari dagokionez.

–Gizarte Segurantzan edo, zein den kasua, ekonomia-jardueren gaineko zergan alta eman gabe egindako lana ez da kontuan hartuko.

–Ulertuko da lan eszedentzian dagoen pertsona bat lanean ari dela, lanaldi osoan edo partzialean, baldin eta ikasturtea hasi ondoko hilabete eta erdian hasiko bada berriz lanean. Lan kontraturik ez izateagatik, haur bat jaio ondoan pertsona bat ez bada lanera itzultzen (ordezkapen zerrendak...), egoera hori ez da eszedentziatzat hartuko.

–Ikasketa araututzat hartzen dira titulu akademiko ofizialak eskuratzeari begira egiten direnak: DBH, Batxilergoa, Lanbide Heziketa, unibertsitate tituluak, etab.

–Dedikazio handia behar duen ikasketatzat joko da baldin eta interesduna, ikasketa planaren arabera, ikasturte oso bateko kreditu edo orduen %80an, gutxienez ere, matrikulatua badago.

–Pertsona bat lan bila dabilela joko da Nafarroako Enplegu Zerbitzuan enplegu eskatzaile gisa inskribatuta dagoenean.

1.3. Egoera ekonomikoari dagokionez.

–Familia unitatearen urteko errenta izanen da gurasoen edo legezko tutoreen 2018ko diru-sarrera edo errenta indibidual justifikatuen batura. Pertsona fisikoen errentaren gaineko 2018ko zergaren aitorpena aurkeztuta justifikatuko da familia unitatearen urteko errenta.

–Errenta indibiduala honela kalkulatuko da: zerga oinarriaren zati orokorra gehi kapital higigarriaren etekinen saldo positiboa gehi ondare eskualdaketen saldo positiboa, ken etxebizitza birgaitzeko edo eskuratzeko jasotako dirulaguntzak.

–Ondorio praktikoetarako, errenta kalkulatzeko laukitxo hauek batuko dira: Nafarroako Foru Komunitatean, 2018ko ekitaldiko pertsona fisikoen errentaren gaineko zergaren 507, 8810, 8808 laukitxoak ken 708 laukitxoa, edo horien baliokide direnak Estatuko gainerako aitorpenetan.

–Per capita errenta lortzeko, eragiketa hau eginen da: familia unitatearen errenta zati familiako kide guztien kopurua. Familiako kide kopurua zehazteko, kontuan hartuko dira bakarrik aurreinskripziorako epea bukatu arte jaiotako seme-alabak. Jaio gabeko alaba edo semea ere kontuan hartuko da baldin eta eskaturiko ikaspostua harendako bada.

–Banantze edo dibortzio kasuetan per capita errenta kalkulatzeko:

a) Baldin zaintza eta jagoletza partekatua bada: kontuan hartuko dira bi gurasoen errenta aitorpenak edo diru-sarrerak.

b) Baldin zaintza eta jagoletza partekatua ez bada: kontuan hartuko dira haurraren zaintza eta jagoletza dituen gurasoaren errenta aitorpena edo diru-sarrerak. Horri gehituko zaio, behar denean, zaintza eta jagoletza ez dituen gurasoak seme-alaben mantenurako urtean ordaindutakoa; betiere, hitzarmen arautzaile edo erabaki judizial baten arabera ordaindutakoa izan beharko du.

• Horri kenduko zaio, behar denean, zaintza eta jagoletza dituen gurasoak beste seme-alaba batzuen mantenurako urtean ordaindutakoa, baldin eta hitzarmen arautzaile edo erabaki judizial baten arabera ordaintzen bada.

2.–Puntuazio baremoa.

2.1. Familia unitatea: gehienez ere 15 puntu.

–Deialdi eta ikastetxe beretan bi seme-alabarendako edo gehiagorendako ikaspostua eskatzen duten familiak (ikaspostuaren erreserba sartzen da, baita jaio gabeko haurrarendako eskaera ere): 15 puntu.

Familia gurasobakarrak edo gurasobakartasun egoeran daudenak, Nafarroako Foru Komunitatean guraso bakarreko familiak egiaztatzeko otsailaren 7ko 5/2019 Foru Legean ezarritakoaren arabera: 5 puntu.

–Familia ugariak: 5 puntu.

–Familia unitateko kideren batek %33ko edo gehiagoko desgaitasun fisiko, psikiko edo sentsoriala badu, behar bezala aitortua: 4 puntu.

–6 urtetik beherako bi haur edo gehiago dituzten familien kasuan: puntu bat haur bakoitzeko.

2.2. Gurasoen edo legezko tutoreen lan eta gizarte egoera edo egoera akademikoa: 20 puntu gehienez.

a) Familia orokorrak.

Guraso berak bi egoera posible baditu, horietako bat bakarrik hartuko da kontuan, puntuaziorik handiena duena:

–Lanaldi osoan edo partzialean lan egiten duen guraso edo legezko tutore bakoitzeko, edo behar bezala justifikatutako dedikazio handia eskatzen duten ikasketa arautuak egiten ari den guraso edo legezko tutore bakoitzeko, edo ezintasun iraunkor absolutuko edo baliaezintasun handiko egoera aitortuan dagoen guraso edo tutore bakoitzeko: 10 puntu.

–Lana bilatzen ari den guraso edo legezko tutore bakoitzeko: 5 puntu.

b) Familia gurasobakarrak edo gurasobakartasun egoeran daudenak.

–Lanaldi osoan edo partzialean lan egiten duen gurasoa, edo behar bezala justifikatutako dedikazio handia eskatzen duten ikasketa arautuak egiten ari dena, edo ezintasun iraunkor absolutuko edo baliaezintasun handiko egoera aitortuan dagoena: 20 puntu.

–Lana bilatzen ari den gurasoa: 15 puntu.

c) Zaintza eta jagoletza esklusiboa duen gurasoa, guraso bakarreko familia edo guraso bakarreko familia egoeran dagoena izan gabe.

–Lanaldi osoan edo partzialean lan egiten duen gurasoa, edo behar bezala justifikatutako dedikazio handia eskatzen duten ikasketa arautuak egiten ari dena, edo ezintasun iraunkor absolutuko edo baliaezintasun handiko egoera aitortuan dagoena: 20 puntu.

–Lana bilatzen ari den gurasoa: 15 puntu.

2.3. Per capita errenta: 15 puntu, gehienez.

2.4. Eraginpeko eremu geografikoa: 20 puntu, gehienez.

–Haurra eta aita eta/edo ama eta/edo legezko tutoreak erroldatua egoteagatik, 2020ko urtarrilaren 1a baino lehen, eskaeraren xedeko ikastetxea dagoen udalerrian edo eraginpeko eremu geografikoaren barneko udalerri batean (horretarako akordioa ezarria duten udalerrietan): 20 puntu.

–Aita eta/edo ama edo legezko tutorea eskaeraren xedeko ikastetxea dagoen udalerrian edo eraginpeko eremu geografikoan lanean aritzeagatik: 8 puntu.

–Aita eta/edo ama edo legezko tutorea entitate titularraren Haur Hezkuntzako lehen zikloko ikastetxe batean lanean aritzeagatik: 5 puntu.

2.5. Beste irizpide batzuk.

Hautapen batzordeak premiazko beste egoera larri batzuk –pertsonalak, familiakoak edo sozialak– hartzen ahal ditu kontuan, behar bezala frogatuak eta aurreko ataletan bildu ez direnak: 10 puntu gehienez.

3.–Puntuazioko berdinketa kasuak ebaztea.

Baremoa aplikatuta, adin talde bakoitzeko azken ikaspostua eskaintzean berdinketa gertatuz gero, irizpide hauek aplikatuko dira, bata bestearen ondoren:

–Ikastetxean anai-arrebak dituzten haurrak.

–Familia unitatearen per capita errenta baxuena.

–Berdinketak jarraituz gero, hautapen batzordeak ebatziko du jendaurreko zozketa baten bitartez.

Iragarkiaren kodea: F2002565