Iragarkia

46. ALDIZKARIA - 2020ko martxoaren 6a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

124/2020 EBAZPENA, otsailaren 18koa, Nekazaritzako eta Abeltzaintzako zuzendari nagusiak emana, mahastiak berregituratu eta birmoldatzeko laguntzak emateko deialdia eta oinarri arautzaileak onesten dituena 2020-2021 kanpainarako.

Nekazaritzako produktuen merkatu antolakunde bateratua sortzen duen eta 922/72 (EEE), 234/79 (EEE), 1037/2001 (EE) eta 1234/2007 (EE) Erregelamenduak indarrik gabe uzten dituen Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 46. artikuluan aipatzen dira mahastiak berregituratu eta birmoldatzeko laguntzarako jarduketen erreferentziak, mahastizaintzako ekoizleen lehiakortasuna handitzeko neurri gisa.

Orobat, aplikatzekoak dira honako arau hauek: Batzordearen 2016ko apirilaren 15eko 2016/1149 (EB) Erregelamendu Delegatua, mahastizaintzaren eta ardogintzaren sektoreari laguntzeko programa nazionalei dagokienez Europako Parlamentuaren eta Kontseiluaren 1308/2013 Erregelamendua (EB) osatzen duena eta Batzordearen 555/2008 (EE) Erregelamendua aldatzen duena; eta Batzordearen apirilaren 15eko 2016/1150 (EB) Exekuzio Erregelamendua, ardogintzaren sektoreari laguntzeko programa nazionalei dagokienez Europako Parlamentuaren eta Kontseiluaren 1308/2013 Erregelamendua aplikatzeko xedapenak ezartzen dituena.

Azaroaren 2ko 1363/2018 Errege Dekretuak (urriaren 25eko 608/2019 Errege Dekretuak aldatua) oinarrizko araudia ezarri du Espainiako mahastizaintza eta ardogintza sektorerako laguntza programaren neurriak aplikatzeko 2019-2023 aldirako. Aipatu errege dekretuaren 2. atalak biltzen du mahastiak berregituratu eta birmoldatzeko aplikatzen ahal den oinarrizko araudia. Dena dela, bertako aurreikuspen batzuk zehazteko, autonomia erkidegoen arau osagarri baten beharra dago.

Adierazitakoarekin bat, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuak ematen dizkidaten eskudantziak erabiliz,

EBAZTEN DUT:

1. Mahastiak berregituratu eta birmoldatzeko laguntzak emateko deialdia onestea 2020-2021 kanpainarako.

2. 2020-2021 kanpainan mahastiak berregituratu eta birmoldatzeko laguntzak arautzen dituzten oinarriak, ebazpen honen I. eranskinean jasoak, onestea eta ebazpen honen II. eta III. eranskinak onestea.

3. 2021eko ekitaldian Nekazaritza Bermatzeko Europako Funtsak (NBEUF) Nafarroako Foru Komunitateari bideratzen dion aurrekontuak aukera ematen duen heinean erantzunen zaie ebazpen honen ondoriozko gastu konpromisoei.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute haren kontra, Landa Garapeneko eta Ingurumeneko kontseilariari zuzendua, argitara eman eta biharamunetik hasita hilabeteko epean.

Iruñean, 2020ko otsailaren 18an.–Nekazaritzako eta Abeltzaintzako zuzendari nagusia, Ignacio Gil Jordán.

I. ERANSKINA

Mahastia berregituratu eta birmoldatzeko laguntzak emateko deialdiaren oinarri arautzaileak 2020-2021 kanpainarako

Lehenbizikoa.–Xedea eta aplikazio-eremua.

1. Ebazpen honen xedea da Nafarroako Foru Komunitatean mahastia berregituratu eta moldatzeko laguntzen deialdia arautzea, mahastizaintzaren eta ardogintzaren merkatuaren antolakunde bateratuaren barrenean, 2020-2021eko kanpainarako, zeinak barne hartzen baitu 2020ko abuztuaren 1etik 2021eko uztailaren 31rako aldia.

2. Ardoa egiteko mahatsa ekoizten duten mahastiak berregituratu eta birmoldatzeko laguntzetan aplikatzeko izanen dira oinarri hauek, betiere jarduketa horiek Nafarroako Foru Komunitatearen lurraldean dauden amaierako lurzatietan gauzatzen badira, eta “Nafarroa” jatorri-deituraren eta lur-eremuko ardoen babesean, Nafarroako Foru Komunitateko udalerrietan aitortutako adierazpen geografiko babestuetan, eta “Errioxa” jatorri-deitura kalifikatuaren barrenean.

3. Ez da laguntzarik emanen ekintza hauetarako:

a) Berezko ziklo naturala bukatua duten mahastien berritze normala, hots, lurzati bera ardotarako mahatsen barietate berarekin eta “landaketa metodo” beraren arabera birlandatzea.

b) Azkeneko hamar kanpainetan mahastia berregituratu eta moldatzeko laguntzen onuradun izan diren azalerak, salbu eta ontzi itxurako mahatsondotik besora pasatzeko izan bada, eta Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2. artikuluaren 2. puntuan aipatutako ezinbesteko kasuetan edo salbuespenezko egoeretan izan ezik, eta betiere aipatu azaleran zegoen ardotarako mahatsen barietate bera eta landaketa metodo bera erabiltzen ez badira, Europako Parlamentuaren eta Kontseiluaren 2013ko abenduaren 17ko 1302/2013 Erregelamenduaren (EB) 46.3 artikuluko 6. paragrafoari jarraikiz. Epe hori onuradunak azalera horretarako ordainketa eskatu zuen egunetik hasita kontatuko da, edo, aurrerakina eskatuz gero, saldoaren likidazioa eskatu zuenetik.

c) Batzordearen 2016ko apirilaren 15eko 2016/1149 (EB) Erregelamendu Delegatuaren 14. artikuluan jasotako ekintzen kostuak. Honako hauek sartzen dira horietan: mahastien eguneroko kudeaketa egitea, ehizak, hegaztiek edo txingorrak eragin litzaketen kalteak eragozteko babesa jartzea, haize-babesak eta hormak eraikitzea haizetik babesteko, sarbideak eraikitzea eta jasogailuak jartzea, eta nekazaritzako ibilgailuak erostea.

d) Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 63. eta 64. artikuluen arabera emandako landaketa berria egiteko baimenarekin landatutako azalerak, landaketa dataren ondoko lehen bost urteetan.

e) Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 63. eta 64. artikuluen arabera emandako landaketa berria egiteko baimenarekin edo SIGPAC doikuntzaren bidez esleitutako baimenekin eginen diren jarduketak.

f) Lurzatiak berrantolatzeko prozesuan dauden eremuetako lurzatietarako eskaerak, salbu eta Landa Garapeneko eta Ingurumeneko Departamentuko Nekazaritzako Azpiegituren Zerbitzuaren baimena duten lurzatietarako, bosgarren oinarriko n) atalean adierazitakoarekin bat.

g) Mahastiekin batera beste labore bat duten amaierako lurzatien azaleretan jarduketak egitea.

Bigarrena.–Onuradunak.

1. Mahastizaintza eta ardogintza sektorerako 2019-2023 laguntza programaren esparruan, mahastiak berregituratu eta birmoldatzeko laguntzaren onuradun izaten ahalko dira ardoa egiteko mahatsa ekoizteko mahastiak dituzten edo izanen dituzten mahastizainak.

2. Ezin dira laguntza hauen onuradun izan:

a) Mahastien ustiategiko edozein azalerari dagokionez mahastiak landatzeari buruz indarra duen araudiari aurka egiten dioten mahastizainak.

b) Espainiako mahastizaintza eta ardogintza sektorerako 2019-2023 laguntza programaren barruan, aurreko urteetan eragiketa baterako laguntza eskatu eta onartu zaien mahastizainak, baldin eta laguntzari uko egin badiote, salbu eta ukoa laguntza onetsi zuen ebazpenaren jakinarazpena egin zenetik hilabeteko epean egin bada, 1363/2018 Errege Dekretuko 34.5 artikuluari jarraikiz.

c) Autonomia erkidegoak ordainketa eskaera aurkezteko ezarritako epea bukatu ondoren eragiketa baten ordainketa eskatu ez duten mahastizainak, Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2. artikuluaren 2. puntuan aipatutako ezinbesteko kasuetan edo salbuespenezko egoeretan izan ezik.

Hirugarrena.–Jarduera diruz lagungarriak.

1. Mahastiak berregituratzeko eta moldatzeko laguntza 2020-2021eko kanpainan ondoko jarduera baterako edo batzuetarako eman daiteke soilik:

a) Mahastiak berrezartzea.

b) Mahats barietatea aldatzea.

c) Mahastiak kudeatzeko teknikak hobetzea, ontzi itxurako mahastitik besorako mahastira aldatzeko.

2. Aurreko atalean aipatutako jarduerei laguntza emateko, honako definizio hauek finkatu dira:

a) “Mahastiak berrezartzea”: lurzati bateko edo batzuetako mahatsondoak beste landaketa baten edo batzuen bidez ordeztea, betiere azalera bera badute. Mahastizaintzako lurzati berean berrezartzen bada, barietate aldaketa edo laborantza metodoaren aldaketa egin dela frogatu beharko da, diruz lagungarria den gidamoduaren sistema edo txertaka aldatu dela ulertuta.

Lurzatiak berrantolatzeko prozesu batean, lurzatiak berrantolatzeko eremuan mahastiak kentzearen ondorioz sortutako baimen guztiak baliozkoak izanen dira mahastia berrezartzeko.

b) “Mahats barietatea aldatzea”: mahasti lurzati bateko barietatea aldatzea, oraingo barietatearen gainetik txertatuz, lurzatiko mahatsondo kopurua handitu gabe. Barietatearen aldaketa 2016-2017 kanpainaren aurretik landatutako lurzatietan baizik ez da egiten ahalko.

c) “Ontzi itxurako mahastitik besorako mahastira aldatzeko jarduera”: gidamodu baxua duen mahastia besorako gidamodura jasotzeko jarduerak, mahastia modu egokian mekanizatu ahal izateko, bereziki inausketarako eta mahats-bilketarako. Transformazioa landare eta osasun egoera onean dauden mahastietan baizik ez da egiten ahalko, betiere 2016-2017 kanpainaren aurretik landatuak baldin badira.

d) Behar diren jatorri-deituren kontseilu arauemaileek edo adierazpen geografiko babestuak kudeatzen dituzten agintaritza eskudunak baimendutako barietate guztiek jaso dezakete dirulaguntza.

Laugarrena.–Mahastiak berregituratu eta birmoldatzeko laguntzarako eskaerak.

1. Mahastiak berregituratzeko eta birmoldatzeko neurria gauzatuko da mahastiak berregituratzeko eta birmoldatzeko eskaeren bidez. Horietan jasoko dira gauzatu beharreko jarduketak eta horietariko bakoitzaren jardueren xehetasunak. Eragiketak urteka eginen dira, 1363/2018 Errege Dekretuaren 2. artikuluko m) atalean ezarritakoarekin bat.

2. Eskabideak banaka nahiz taldeka aurkezten ahalko dira. Taldeka aurkeztuz gero, solaskide bakarraren bidez eginen da kasuan kasuko administrazioan.

3. Eskabideak taldeka aurkezteko, gutxienez ere 10 eskatzaile indibidual egon beharko dira.

Bosgarrena.–Mahastiak berregituratzeko eta birmoldatzeko eskabideak aurkeztea.

1. Eskatzaileek, mahastiak berregituratzeko eta birmoldatzeko laguntzen onuradun izan nahi badute, dagokion eskabidea aurkeztu beharko dute, urriaren 1eko 39/2015 Legearen 16. artikuluan aipatzen diren erregistro edo bitartekoren bat erabiliz. Nafarroako Gobernuaren Interneteko Atariko zerbitzuen katalogoan eskuratzen ahal den eskabide ereduaz baliatu beharko dute.

Eskaerak aurkezteko epea 10 egunekoa izanen da, ebazpen hau argitaratzen denetik hasita.

2. Dirulaguntzaren xede diren jarduerak egin baino lehen aurkeztu beharko dira eskaerak, eta 2020-2021 kanpainan egin beharreko eragiketei buruzkoak izanen dira.

3. Eskatzaileek, laguntza eskabidearekin batera, informazio eta agiri hauek aurkeztu beharko dituzte:

a) Eskatzailearen identifikazioa eta, kasua bada, ordezkatzen dituen mahastizainena. Horretarako, NANaren edo IFKren fotokopiak aurkeztuko dira.

b) Eskabidean jasotako jarduketa bakoitzaren helburuak.

c) Eskabidean jasotako jarduketa bakoitzaren ordainketak eskatuko diren ekitaldi finantzarioa. Eragiketak urteka eginen direnez, eta 1363/2018 Errege Dekretuaren 2. artikuluko m) atalean ezarritakoarekin bat, laguntzaren ordainketa hamargarren eta/edo hamaikagarren oinarrian (eskatu den ordainketa motaren arabera) ezarritako epean egin behar da.

d) Proposatutako jardueren eta diruz lagungarriak diren kostuen deskribapen zehatza.

e) Jarduketa bakoitzak zer azalerari eraginen dion, bai eta lurzatien kokapena eta ezaugarriak ere, hasierakoak zein berregituratu ondorengoak (barietateak, txertakak eta eraketa sistemak), eskaera osatzen duten lurzatien Nekazaritzako Lurzatien Informazio Geografikoko Sistemen (hemendik aurrera, SIGPAC) barrutiak identifikatuta.

f) Mahastien Erregistroaren fitxa, non inskribatuta egonen diren eskabidean sartutako hasierako lurzatiak.

g) Barruti partzialak sartzen badira, krokis bat erantsi beharko da, eskabidean berregituratzeko edo moldatzeko sartutako azalera non dagoen jakin ahal izateko.

h) Taldean aurkeztutako eskaeraren ordezkaritzaren kasuan, laguntza hauen esparruan ordezkari gisa baimendutako pertsonaren identifikazioa eta ordezkatzen diren mahastizainak agertzen duen dokumentua.

i) Ogibide nagusia nekazaritza duenaren kasuan, lehentasunezko ustiategi baten titularra edo titulartasun partekatuko ustiategi batena denean, bere ustiategia Nafarroako Nekazaritza Ustiategien Erregistroaz besteko erregistro batean inskribatuta badago, horren ziurtagiria, dagokion Nekazaritza Ustiategien Erregistroak luzatua.

j) Elkarteen kasuan, laguntza hauetarako prozesuan elkartearen ordezkari aritzeko baimena duen pertsonaren identifikazioa agertzen duen dokumentazioa.

k) Berregituratu edo birmoldatu beharreko lurzatiak eskatzailearenak baldin badira, lurzati zedula aurkeztuko da, gaurkotua, edo bestela, jabetzaren eskritura publikoa, non eskatutako lurzatien identifikazioa agertuko den. Berriki lurzatien berrantolamendua egin duten udalak izanez gero, berrantolamenduan esleitutako lurren orrialdea aurkeztuko da, eta, lurzatiak berrantolatzeko prozesuan lurzatien jabetzan aldaketak izaten badira gero, organo eskudunak emandako dokumentazioa aurkeztuko da, lurzatiaren titularra nor den jakiteko.

Lurzatiaren jabetza frogatzeko agiriak eskaera aurkezten den eguna baino lehenagoko data izanen du.

l) Berregituratu edo birmoldatu beharreko lurzatiak mahastizainarenak ez badira, jabearen baimena beharko da eta haien azalera erabiltzeko eskubidea modu hauetakoren batean frogatu beharko da:

–Errentamenduko kontratua, eskabidea aurkeztu baino lehenagokoa, Landalurreko Errentamenduen Erregistroan inskribatua edo kasuan kasuko tributuak likidatuak. Haren indarraldia 2031ko uztailaren 31 artekoa izanen da gutxienez.

–Lurzatiaren gaineko gozamenerako eskubide bat eratu dela agiri bidez frogatzea.

–Herri-lurzatiak izanez gero, udalaren ziurtagiria, adierazten dituena adjudikazioduna, adjudikatze data eta adjudikazioaren iraupena.

–Zuzenbidearen araberakoa den beste edozein bide frogagarri, egoki diren tributuen dokumentu likidatua aurkeztuta.

m) Landare-ateratzea laguntza eskaera aurkeztu aurretik egiten bada:

1.–Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. artikuluaren arabera emandako erauzketarako eta/edo landaketa berria egiteko baimenari buruzko ebazpenak.

2.–Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 68. artikuluaren arabera emandako birlandaketa eskubideak, landaketarako baimen bihurtu beharrekoak, eta/edo landaketarako baimenak, mahastizain beraren ustiategian egindako erauzketagatik sortuak eta erabili beharrekoak.

n) Lurzatiak berrantolatzeko prozesuan dauden eremuetako lurzatien kasuan, oraindik horri buruzko akordiorik ez badago, Landa Garapeneko eta Ingurumeneko Departamentuaren Nekazaritzako Azpiegituren Zerbitzuaren baimena, laguntzen eskaeran adierazitako datuekin bat datorrena.

Seigarrena.–Laguntza eskaeren betebeharrak.

1. Mahastiak berregituratzeko eta birmoldatzeko eskaera bakoitzaren esparruan guztira berregituratzen edo birmoldatzen den azalera 0,5 hektareakoa izanen da gutxienez.

2. Mahasti bakoitzaren lurzatiak, behin berregituratuta, gutxienez 0,5 hektarea izan behar du. Dena dela, mahastizain baten berregituratze eta birmoldatze lana egin ondoren gelditzen diren lurzatien kopurua hasierako kopuruaren %80 baino txikiagoa baldin bada, muga hori txikiagoa izaten ahalko da. Mahastiak mahastizain beraren beste lurzati batekin egiten badu muga, orduan ere 0,5 hektarea baino txikiagoa izan daiteke.

Ondorio horietarako, hauxe hartuko da mahasti lurzatitzat: mahastizain bakar batek mahatsondoak lantzeko duen azalera etenik gabea, barruti bakar batek edo erreferentzia alfanumeriko bat edo gehiago dituzten barruti puskek osatua, SICPACen grafikoki irudikatua.

Mahats barietatea aldatzeko edo ontzi itxuratik besora aldatzeko lana besterik ez bada, gutxieneko azalera hasierakoa izanen da.

3. Dirulaguntza jasoko duen azalera, gehienez, 25 hektarea izanen da mahastizain eta kanpaina bakoitzeko.

4. Landaketa guztietan, ziurtatutako txertakak erabili behar dira nahitaez. Dirulaguntza jasotzeko, baimendutako merkatariaren edo mintegizainaren fakturak aurkeztu behar dira nahitaez.

5. Mahastia berrezartzeko eskatutako barrutiak ezin izanen ditu SICPACen erabilera hauek: zuhaixka-larreak, larreak edo larre zuhaiztunak edo paisaiaren egiturazko elementuak.

6. Nolanahi ere, berregituratu beharreko azalerei mahastilanerako aproposa den erabilera emanen zaie.

Zazpigarrena.–Eskaerak onestea eta funtsak esleitzea.

1. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.1 artikuluarekin bat, eskabideak horretarako ezarritako epean aurkeztu ote diren egiaztatuko da eta onartzekoak diren edo ez ebaluatuko da. Kasua bada, eskatzaileei eskatuko zaie 10 eguneko epean aurkez dezatela zuzendu beharreko informazioa edo agiriak, edo, hala badagokio, gehitu beharrekoa.

2. Eskaerek ez badituzte onartuak izateko 1. ataleko eskakizunak betetzen, eskaerak baztertzeko arrazoiak zein izan diren argituko zaie eskatzaileei.

3. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.2 artikuluarekin bat, II. eranskinean ezarritako lehentasun irizpideei dagokien ponderazioa aplikatzean lortutako puntuazioa kontuan hartuz klasifikatuko dira eskaerak.

4. Nafarroako Foru Komunitateak dakienean zer finantzaketa dagoen eskura NBEUF 2020 ekitaldirako, aurkeztutako eskaera onargarriak hautatuko dira, puntuazio handienetik txikienerako ordenan, 3. apartatuan jasotako lehentasun irizpideen ponderazioa aplikatuta, aurrekontua agortu arte.

5. Laugarren atalean aipatutako hautaketa oinarri harturik, 2021eko finantza ekitaldian finantzatuko diren eskaeren behin betiko onespena eginen da.

6. Nekazaritzako eta Abeltzaintzako zuzendari nagusiak eskaeren onespena ebatziko du, eskaerak aurkezteko epea bukatu eta sei hilabeteko epean. Baldin eta sei hilabeteko epea igarotakoan interesdunei ez bazaie inongo ebazpenik jakinarazi, beren eskaera baztertu egin dela ulertu behar dute.

7. 2021eko ekitaldian NBEUFetik Nafarroako Foru Komunitatearen esku utzitako diru kopuruak, lehenik eta behin, NBEUF 2020 ekitaldian edo aurrekoetan ordaindu gabe utzitako ordainketak egiteko erabiliko dira; eta bigarrenik, 2020-2021 kanpainan ebazpen honen arabera aurkeztutako eskaerak asetzeko, NBEUFek Nafarroako Foru Komunitatearen esku utzitako aurrekontuaren zenbatekoa agortu arte.

Zortzigarrena.–Onuradunen eragiketen aldaketak.

1. Batzordearen apirilaren 15eko 2016/1149 Erregelamendu Delegatuaren (EB) 53. artikuluko 1. apartatuan ezarritakoaren arabera, eta galarazi gabe aipatutako Erregelamenduaren 53. artikuluko 2. puntuan ezarritakoa, onuradunek eska dezakete aldaketak egin ahal izatea hasiera batean onetsitako lanetan, azken ordainketaren aurretik eta, betiere, ez badira egin azken ordainketaren aurreko tokian tokiko kontrolak. Gauzatu aurretik baimendu beharko dira aldaketa guztiak.

2. Aldaketa-eskaera bakoitza behar bezala justifikatu beharko da, ez du baldintzatu beharko lanaren helburu orokorra, ez du gorantz aldatuko onetsitako aurrekontua, ez du aldaketarik ekarriko onargarritasunari dagokionez, eta ez du aldatu behar aukeraketarako egindako ponderazioan, baldin horrek berekin badakar azken ponderazioa gelditzea eskaera onartu eta ez onartuen arteko mozketa-puntuazioaren azpitik, eta posta elektronikoz aurkeztuko da Merkatuen Erregulaziorako Atalean, beranduenez 2021eko maiatzaren 15ean.

3. Nolanahi ere, baimenduko da halakoak aldez aurreko baimenik gabe egitea, baldin ez badute baldintzatzen lanaren helburu orokorra, ez badute onetsitako aurrekontua gorantz aldatzen, ez badute aldaketarik ekartzen onargarritasunean, eta ez badakarte aldaketarik aukeraketarako egindako ponderazioan, baldin horrek berekin badakar azken ponderazioa gelditzea eskaera onartu eta ez onartuen arteko mozketa-puntuazioaren azpitik; orobat, ekintzen aurrekontuen arteko transferentziak baimenduko dira, baldin ekintza bakoitzerako onetsitako aurrekontuaren %20tik beherakoak badira, betiere ekintza guztiak gauzatu badira.

Bederatzigarrena.–Laguntzaren kalkulua.

1. Laguntzaren ordainketa kostu unitarioko baremo estandarren arabera eginen da. Baremo horiek gauzazko ekarpenen balioak biltzen dituzte.

Laguntzak kalkulatzeko, ebazpen honen III. eranskinean aipatzen diren ekintzen kostuak hartuko dira kontuan.

Mahastia berrezartzeko laguntzarako, ekintza hauek hartuko dira kontuan: Zaharrak ateratzea (mahatsondoak biltzea barne), lurra prestatzea, desinfekzioa, harriak kentzea, lurra berdintzea, landarea eta landatze-lana, landatzeko momenturako untxien kontrako babes indibiduala (jartzeko lana barne) eta besorako euskarria (jartzeko lana barne).

Ondorio horietarako, lurraren nibelazioa diruz laguntzeko modukoa izanen da, soilik, lurrak mugitzearen helburua denean lurrak denboraldiko ureztaketak uholdeka egiteko mailan uztea.

Ez dira finantzatuko erauzketaren kostuak Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako birlandaketarako baimenak erabiltzen diren azaleretan, ez badira sortu birmoldatzeko lanaren aplikazioan, eta aipatu eragiketaren eskaera egin aurretik atera ez badira.

Erauzketa gastuak diruz lagungarritzat jotzeko, beharrezkoa izanen da 2020-2021 kanpainan hastea horretan.

2. Mahasti baten azalera berregituratu eta birmoldatzeagatik mahastizainak jaso dezakeen laguntzaren zenbatekoa zehazteko, berregituratutako edo mahatsondoak kendutako mahastiaren azalera neurtuko da, Batzordearen 2016ko apirilaren 15eko 2016/1150 (EB) Exekuzio Erregelamenduaren 44. artikuluan jasotako metodoari jarraikiz.

3. Halaber, laguntzaren ordainketaren barruan sartzen ahalko da eragiketa aplikatzearen ondorioz mahastizainek gal ditzaketen diru-sarreren konpentsazioa, puntu honetan jasotako zehaztapenen arabera, jarraian adierazten den bezala.

a) 2020-2021 kanpainarako onesten diren eskaera berrietan diru-sarreren galera orekatzeko laguntzaren zenbatekoa honako hau izanen da:

• 597,00 euro hektareako, “Nafarroa” jatorri-deituraren kasuan, bai eta lur-eremuko ardoen eta Nafarroako Foru Komunitateko udalerrietan aitortutako adierazpen geografiko babestuen kasuan ere.

• 1.345,00 euro hektareako, “Errioxa” jatorri-deitura kalifikaturako.

b) Diru-sarrerak galtzeagatiko konpentsazioa bi kanpainatan emanen da, mahastien berrezartze lanetarako.

c) Ez dute diru-sarrerak galtzeagatiko konpentsaziorik jasotzeko eskubiderik izanen Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako landaketarako baimenarekin berregituratutako azalerek, sortu badira laguntza eskatu aurretik egindako erauzketagatik.

Diru-sarreren galerengatiko konpentsaziorako eskubidea izateko, beharrezkoa izanen da erauzketa 2020-2021 kanpainan egin izana.

d) Barietateak aldatzeko eta ontzi itxurako mahatsondoko lurzatia besorako mahasti bihurtzeko jarduketetan, kanpaina bakar batean emanen da konpentsazioa diru-sarreren galeragatik.

4. Harriak kentzeko ekintzak, lurrak desinfektatzekoak eta lurrak berdintzekoak, mahastizainak aldez aurretik eskatu behar ditu eta agintaritza eskudunak onetsi, eta ondoko baldintza hauek bete behar dituzte:

a) Eragiketa horietarako laguntzak jasotzen ahalko dira soilik lan horiek 2020-2021 kanpainan egin direla froga daitekeen kasuetan. Laguntza emateko ezinbesteko baldintza izanen da tokian bertan kontrol bat egin izana, eta, horretarako, beharrezkoa izanen da lanak hasiko diren egun zehatza komunikatzea, hasi baino 10 egun natural lehenago gutxienez, Landa Garapeneko eta, Ingurumeneko Departamentuko Ikuskapenen Atalean. Jakinarazpen hori mezu elektroniko bat igorriz eginen da: inspecciones@navarra.es. Epe horretan ez bada egiten aldez aurreko jakinarazpena, eragiketa ezin izanen da aukeratu laguntza ordaintzeko.

b) Lurra desinfektatzeko laguntzak jasotzen ahalko dira, baldin eta mahastiak berriro landatzen badira 2016ko abuztuaren 1aren ondoren kendu direneko lurzatietan.

5. Mahastia berregituratu eta birmoldatzeko kostuetan parte-hartzeko laguntzak ebazpen honen III. eranskinean bildutako lanetarako baizik ezin izanen dira bideratu. Bakarka ezin izanen da finantzatu lanik, salbu eta gainetik txertatzeko lana edo ontzi itxuratik besora aldatzekoa. Bigarren eskuko materialarekin egindako eragiketengatik ere ezin da laguntzarik jaso.

Ebazpen honen III. eranskinean bildutako kostu unitarioko baremo estandarren zenbatekoen %50 da berregituratze eta birmoldatze lan bakoitzari emanen zaion laguntza.

6. Eskaera onesteak sortutako eskubide eta betebeharrak subrogatzen ahal zaizkio mahastizain berri bati, baldin eta horrek bere gain hartzen baditu subrogatutako lurzatietan eskaera onetsi zitzaion mahastizainak hartutako konpromisoak.

7. Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2.2 artikuluaren 2. puntuan aipatutako ezinbesteko kasuetan edo salbuespenezko egoeretan edo desjabetzeetan izan ezik, mahastia berregituratu eta birmoldatzeko laguntzen onuradun izan diren azalerek gutxienez hamar kanpainatan egon beharko dute landaturik, ordainketa eskatu eta hurrengo kanpainatik hasita.

Lurzatian nekazaritzako azpiegituretarako jarduerak egin behar izateagatik edo interes orokorreko herri lanen exekuzio batengatik laguntza hauek jaso dituen onuradunak ezin badio eutsi hartutako konpromisoari, erauzketa egin baino lehen, espresuki eskatu beharko dio organo kudeatzaileari hartutako konpromisotik salbuesteko, hori justifikatzen duen dokumentazioa aurkeztuta. Dokumentazio hori azterturik ezintasun hori ondorioztatzen bada, onuraduna salbuetsia egonen da. Beraz, konpromisoa bukatutzat jo, eta ez da exijituko jasotako laguntza itzultzea.

Laguntzetan sarturiko azalerak gutxienez ere hamar kanpainatan landatuta eduki beharra betetzen ez bada, jasotako laguntza gehi legez dagozkion interesak itzuli beharko ditu onuradunak.

8. Egiaztatzen bada onuradunak, mahastia berregituratu eta birmoldatzeagatik lehen laguntza jaso den urte naturalaren hurrengo urteko urtarrilaren 1etik hurrengo hiru urtean, ez dituela errespetatu bere ustiaketan kudeaketarako legezko betekizunak eta nekazaritzarako zein ingurumenerako baldintza egokiak, Europako Parlamentuaren eta Kontseiluaren 2013ko abenduaren 17ko 1306/2013 (EE) Erregelamenduaren 91., 92., 93., 94. eta 95. artikuluetan aipatuak, onuradunari zuzenean leporatzen ahal zaion ekintza edo omisioagatik bete ez bada, laguntzaren zenbatekoa hein batean edo erabat murriztuko edo deuseztatuko da, zein den hutsegitearen larritasuna, hedadura, iraupena eta errepikapena, eta onuradunak, bidezkoa bada, itzuli egin beharko du, aipatu xedapenen arabera. Baldintza horiek betetzen direla kontrolatzeko, informazio eguneratua izan beharko da, onuradunaren ustiategiaren parte diren lurzati guztien SIGPACeko erreferentzia alfazenbakikoei buruz.

9. Onuradunek eta dirulaguntzaren xedearekin edo horren justifikazioarekin zerikusirik duten hirugarrenek foru erkidegoko administrazioko eta haren erakunde autonomoetako organoei dagozkien kontrol-eginkizunak betetzea errazteko betebeharra dute, bai eta Estatuko nahiz Europar Batasuneko kontrol organo eskudunek egin ahal dituzten egiaztapen eta finantza-kontrol guztiak errazteko betebeharra ere; bereziki, ikerketaren xede diren lokaletara sartzen utziko diete, dokumentazioa eskuratuko diete eta horren kopia erdiesteko aukera emanen diete.

Hamargarrena.–Aurrerakinak.

1. Hamargarren oinarrian xedatua gorabehera, eskatzaileek aurrerakina eskatzen ahalko dute, hasieran onetsitako laguntzaren zenbatekoaren %60ra bitarte, aurrerakinaren zenbateko bera duen berme bat eratuta dutenean. 2021eko maiatzaren 20an bukatuko da hori eskatzeko epea.

2. Aurrerakinak ematen direnean, bermea betearazi eginen da, baldin eta ez bada emandako aurrerakinaren zenbateko guztia gastatu jarduketa egiteko lanetan eta ezarritako epeetan. Jarduketa amaitu dela eta jarduketa egiteko lanetan egindako gastuaren justifikazioa idatziz komunikatuko da, 2021eko ekainaren 30a bitarte.

3. Baldin eta dena delako azalerak agintari eskudunek onartutako hondamendi natural bat jasan duen eremu batean baldin badaude edo aurreikusitako jarduketak ezin badira gauzatu erakunde baimendu batek egiaztatuta dituen arazo fitosanitarioen ondorioz, aurrerakin gisa emandako zenbatekoa gastatzeko epea egokitzen ahalko da.

4. Organo eskudunak zehazten badu aurrerakinaren zenbatekoak gainditu egiten duela dena direlako jarduketak egiteko Europar Batasunak egiten duen ekarpenari dagozkion gastu errealen zenbatekoa, bermea askatzen ahalko da.

Betiere, bermea ez da itzuliko ordainketa egin aurretik, edo, behar denean, laguntzaren saldoa itzuli aurretik.

Hamaikagarrena.–Laguntza onuradunei ordaintzeko prozedura.

1. Behin jarduketak bukatutakoan, onuradunak jarduketaren amaiera eta laguntza ordaintzeko eskaera jakinarazteko agiria aurkeztu behar du. Jakinarazpen hori idatziz egin behar da 2021eko maiatzaren 20a bitarte. Hamargarren oinarrian zehazten den laguntzaren aurrerakina eskatuz gero, 2021eko ekainaren 30a bitarte egiten ahalko da bukatu izanaren komunikazioa.

a) Bukatu izanaren komunikazioarekin eta ordainketa eskaerarekin batera, beharrezko diren dokumentuak aurkeztu beharko dira, egiaztatzeko erabilitako txertaka eta barietatea, mahastiak berrezartzearen kasuan, eta erabilitako barietatea, kasua birmoldatzea bada. Horretarako, lurzati bakoitzean erabilitako landare materialaren kopiak aurkeztu beharko dira.

2. Eragiketa guztiz egin dela eta onetsitako edo, hala badagokio, aldatutako eskaerari lotzen zaiola frogatutakoan ordainduko dira laguntzak, bederatzigarren oinarrian ezarritako kalkuluaren arabera.

Ez da jarduketa bati loturiko inolako laguntzarik ordainduko, bertan ekintzaren bat gauzatu ez bada dagokion jarduketaren aldaketaren aurretiazko baimenik izan gabe.

3. Baldin mahastizainak eragiketa osorik gauzatzen badu baina ez laguntzan zehaztutako azalera osoan, planean onetsitako edo aldatutako azaleraren eta benetan landutako azaleraren arteko aldea kalkulatuko da. Tokian bertan egindako kontrolen bidez zehaztuko da jarduketa benetan zer azaleratan egin den. Alde hori ez bada %20 baino handiagoa, tokian bertan egindako kontrolek zehaztutako azalera hartuko da kontuan laguntza kalkulatzeko. Aldea %20 baino handiagoa bada, baina %50 baino txikiagoa edo berdina, laguntza kalkulatzeko tokian bertan egindako kontrolek zehaztutako azalera hartuko da kontuan, baina, egiaztatutako aldearen portzentajearen bikoitza zenbat den, ehuneko hori murriztuta. Azaleren arteko aldea %50 baino gehiago bada, ordea, ez da laguntza jasotzeko eskubiderik izanen.

4. Baldin eta onuradunak behin betiko laguntza baino aurrerakin handiagoa jaso badu, aldea itzuli beharko du. Behin betiko laguntza jasotako aurrerakina baino handiagoa bada, aldiz, aldea kobratzeko eskubidea izanen du. Dena dela, laguntza, guztira, ezin da hasieran onetsi edo aldatu zena baino handiagoa izan.

5. Onuradunak aurkezten badu jarduketa baten ordainketa-eskaera oinarri honetako 1. apartatuan ezarritako epeen ondoren, aipatu jarduketarengatik dagokion laguntza %20 murriztuko da, Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2.2. artikuluaren 2. puntuan aipatutako ezinbesteko kasuetan edo salbuespenezko egoeretan izan ezik, ukitutako jarduketari edo jarduketei dagokienez. Halere, ezin izanen da atzeratu eskaeran adierazitako finantza ekitaldia, Bosgarren oinarriko 3.c) apartatuan ezarritakoarekin bat.

6. Nekazaritza eta Abeltzaintzako zuzendari nagusiak emanen du laguntzak eman eta ordaintzeko ebazpena. Eragiketa gauzatu zen ekitaldiaren barnean ordainduko zaio laguntza onuradunari, edo gehienez ere, hamabi hilabeteko epean, laguntza ordaintzeko eskaera baliozkoa osorik aurkeztu zuen datatik zenbatzen hasita.

Hamabigarrena.–Emandako dirulaguntzen publizitatearen eta datuen babesaren araubidea.

1. Onuradunei emandako dirulaguntzak argitaratu eginen dira Nekazaritza Politika Erkidearen finantzaketari, kudeaketari eta jarraipenari buruzko Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 111. artikuluari jarraikiz. Batzordeko eta Estatuetako auditoretza eta ikerketa organismoek tratatu ditzakete horien datuak, Batasunaren finantza interesak babestearren.

2. Datu pertsonalak direnean, estatu kideek haien eskubideak jakinaraziko dizkiete onuradunei, datuen babeserako arauekin bat eta eskubide horiek erabiltzeko aplikagarriak diren prozedurekin bat, Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduarekin bat. Aipatu erregelamenduaren bidez, pertsona fisikoen babesa arautu zen datu pertsonalen tratamenduari eta datu horien zirkulazio askeari dagokienez (Datuen babeserako erregelamendu orokorra).

II. ERANSKINA

Lehentasun eta ponderazio irizpideak

III. ERANSKINA

Kostu unitarioko baremo estandar gisa aplikatu beharreko zenbatekoak

Iragarkiaren kodea: F2002583