1. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
10/2020 FORU DEKRETUA, otsailaren 12koa, Nafarroan Natura 2000 Sarearen barruan dauden kontserbazio bereziko eremuen kudeaketa planen indarraldia luzatzen duena.
ZIOEN AZALPENA
Kontseiluak, 1992ko maiatzaren 21ean, Natur Habitatak eta Basa Fauna eta Flora Kontserbatzeari buruz emandako 92/43/EEE Zuzentarauan ezarritakoarekin bat, Nafarroan kontserbazio bereziko 42 eremu izendatu dira eta haiei dagozkien kudeaketa planak onetsi dira, kasuan kasuko foru dekretuen bidez.
Kudeaketa plan horien indarraldia foru dekretu horietako azken xedapenetako lehenean ezarrita dago, “Bertizko Jaurerria” lekuaren kasukoan izan ezik, non arlo hori lekua erabili eta kudeatzeko plan zuzentzailean arautzen baita.
Onetsitako kudeaketa planetan epe luzeko plangintza ezartzen da, elementu hauekin: gako-elementuak (ardatz nagusiak, espazioaren babes aktiboaren oinarri direnak), azken helburuak, araudia eta kudeaketarako jarraibide edo orientabideak. Epe laburreko plangintza ere bada, planen indarraldian egin beharreko jarduketak (neurriak) dituena.
Epe luzerako plangintza mugagabea dela ezarrita dago. Dena dela, bai helburu operatiboek, bai jarduketek, iraungitze data bat dute.
Leku horien kudeaketan pilatutako esperientziak erakutsi du komenigarria dela, oro har, planetan aurreikusitako jarduketak berrikusi eta eguneratzeko aukera ematea, egikaritzen diren neurrien ordez beste batzuk ezartzeko, egikaritzeko zailak diren jarduketak berriz formulatzeko eta, finean, neurriak kudeaketa plan bakoitzaren garapen eta bilakaerara moldatzeko. Neurri horiek foru aginduen bidez eguneratzea, eta ez foru dekretuen bidez, lagungarria izan daiteke planak eraginkorragoak izan daitezen. Bestalde, komenigarria da planetan egikaritu gabe gelditzen diren neurri edo jarduketek indarrean segitzea harik eta haiek ordezteko beste neurri batzuk ezartzen diren arte.
Horrenbestez, Landa Garapeneko eta Ingurumeneko kontseilariak proposaturik, eta Nafarroako Gobernuak 2020ko otsailaren 12an egindako bilkuran hartutako erabakiarekin bat,
DEKRETATZEN DUT:
1. artikulua.
Eranskinean azaltzen diren foru dekretuen azken xedapenetako lehenaren testua aldatzen da, honela geldituko baita:
“Azken xedapenetan lehena.–Kudeaketa planaren indarraldia.
1. Hauxe da foru dekretu honen bidez onesten den kudeaketa planaren indarraldia:
a) Mugagabea, gako-elementuei, azken helburuei, arauei eta jarraibideei dagokienez.
b) 12 urtekoa, espero diren emaitzei eta jarduketei (neurriak) dagokienez. Epe hori bukatutakoan, neurriak berrikusiko dira, baina haien aplikazioa luzatuko da harik eta ordezko beste batzuk onesten diren arte.
2. Hala ere, ingurumenaren arloan eskumena duen departamentuak uste badu planean aurreikusirik ez zegoen funtsezko alderdiren bat nabarmen aldatu dela eta horrek eragina izan dezakeela gunearen balioen zainketan, plana berrikusten edo aldatzen ahalko da.
3. Kudeaketa planaren gako-elementuetan, azken helburuetan, araudian edo jarraibideetan eragina izan dezaketen aldaketak edo berrikuspenak foru dekretu bidez eginen dira. Espero diren emaitzen (helburu operatiboen) berrikuspenak eta aldaketak, baita jarduketak ere (neurriak), ingurumenaren arloan eskumena duen departamentuko titularraren foru aginduaren bidez onetsiko dira”.
2. artikulua.
Ekainaren 17ko 68/2008 Foru Dekretuari dagokionez, zeinaren bidez Bertizko Jaurerria kontserbazio bereziko eremu deklaratu baitzen eta hura erabiltzeko eta kudeatzeko III. plan zuzentzailea onetsi baitzen, aldatu egiten dira 3. atalaren (Aplikazio eremua eta indarraldia) hirugarren eta laugarren paragrafoak, honela idatzita geldituko baitira:
“Hauxe da erabili eta kudeatzeko plan zuzentzaile honen indarraldia:
a) Mugagabea, gako-elementuei, azken helburuei, arauei eta jarraibideei dagokienez.
b) 12 urtekoa, espero diren emaitzei eta jarduketei (neurriak) dagokienez. Epe hori bukatutakoan, neurriak berrikusiko dira, baina haien aplikazioa luzatuko da harik eta ordezko beste batzuk onesten diren arte.
Hala ere, ingurumenaren arloan eskumena duen departamentuak uste badu planean aurreikusirik ez zegoen funtsezko alderdiren bat nabarmen aldatu dela eta horrek eragina izan dezakeela gunearen balioen zainketan, plana berrikusten edo aldatzen ahalko da.
Kudeaketa planaren gako-elementuetan, azken helburuetan, araudian edo jarraibideetan eragina izan dezaketen aldaketak edo berrikuspenak foru dekretu bidez eginen dira. Espero diren emaitzen (helburu operatiboen) berrikuspenak eta aldaketak, baita jarduketak ere (neurriak), ingurumenaren arloan eskumena duen departamentuko titularraren foru aginduaren bidez onetsiko dira”.
AZKEN XEDAPENAK
Azken xedapenetako lehena.–Garatzeko gaikuntza.
Ahalmena ematen zaio ingurumen gaietako eskumenak dituen departamentuko titularrari foru dekretu hau garatzeko eta betetzeko behar diren xedapenak eman ditzan.
Azken xedapenetako bigarrena.–Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2020ko otsailaren 12an.–Nafarroako Gobernuko lehendakaria, María Chivite Navascués.–Landa Garapeneko eta Ingurumeneko kontseilaria, Itziar Gómez López.
ERANSKINA
KONTSERBAZIO BEREZIKO EREMUA | EREMUA ONESTEKO FORU DEKRETUA |
Orreaga-Iratiko oihana | 9/2011 FD, otsailaren 7koa |
Arrigorrietako mendilerroa eta Ezkaurre | 242/2011 FD, abenduaren 14koa |
Larrondo-Kartxela | 243/2011 FD, abenduaren 14koa |
Larra-Aztaparreta | 244/2011 FD, abenduaren 14koa |
Aritzakun-Urritzate-Gorramendi | 47/2014 FD, ekainaren 11koa |
Orabideko erreka eta Arxuriko zohikaiztegia | 48/2014 FD, ekainaren 11koa |
Baztan ibaia eta Artesiagako erreka | 49/2014 FD, ekainaren 11koa |
Irati, Urrobi eta Erro ibaien ibai-sistema | 54/2014 FD, uztailaren 2koa |
Zaraitzu ibaia | 55/2014 FD, uztailaren 2koa |
Ezka eta Binies ibaiak | 56/2014 FD, uztailaren 2koa |
Bidasoa ibaia | 51/2014 FD, uztailaren 2koa |
San Migel mendilerroa | 53/2014 FD, uztailaren 2koa |
Illongo mendilerroa eta Burgiko arroila | 52/2014 FD, uztailaren 2koa |
Belate | 105/2014 FD, azaroaren 5ekoa |
Aralar | 117/2014 FD, abenduaren 29koa |
Artikutza | 264/2015 FD, abenduaren 2koa |
Areta ibaia | 265/2015 FD, abenduaren 2koa |
Las Cañas urtegia | 36/2016 FD, ekainaren 1ekoa |
Juncaleko aintzira | 50/2016 FD, uztailaren 20koa |
Dos Reinosko aintzira | 37/2016 FD, ekainaren 1ekoa |
Aragoi ibaiaren erdiko tartea | 53/2016 FD, abuztuaren 31koa |
Pitillasko aintzira | 109/2016 FD, azaroaren 23koa |
Pulguerreko idoia | 108/2016 FD, azaroaren 23koa |
Escuderako putzua | 107/2016 FD, azaroaren 23koa |
Lokizko mendilerroa | 8/2017 FD, otsailaren 15ekoa |
Aragoi eta Arga ibaien beheko tarteak | 14/2017 FD, martxoaren 8koa |
Ebro ibaia | 15/2017 FD, martxoaren 8koa |
Ega-Urederra ibaiak | 16/2017 FD, martxoaren 8koa |
Ugarrako mendilerroa | 22/2017 FD, apirilaren 5ekoa |
Leireko mendilerroa eta Arbaiungo arroila | 43/2017 FD, maiatzaren 24koa |
Arabarko | 44/2017 FD, maiatzaren 24koa |
Artxuga eta Zarikietako mendilerroak eta Aretako mendiak | 45/2017 FD, maiatzaren 24koa |
Kodesko mendilerroa | 46/2017 FD, maiatzaren 24koa |
Itzaga | 68/2017 FD, uztailaren 5ekoa |
Estellerriko Erriberako igeltsuak | 76/2017 FD, abuztuaren 30ekoa |
Errege Bardea | 120/2017 FD, abenduaren 27koa |
Iragarkiaren kodea: F2002220