229. ALDIZKARIA - 2020ko urriaren 5a

3. ESTATUKO ADMINISTRAZIOA

GOBERNUAREN ORDEZKARITZA

Energia Politikako eta Meatzeetako Zuzendaritza Nagusiaren Ebazpena, zeinaren bidez aurretiazko administrazio baimena eta eraikitzeko administrazio baimena ematen baitzaizkio Geoalcali SLri, proiektu honetarako: aireko eta lur azpiko linea elektrikoa, 66 kV-ekoa, duplex zirkuitu bikoitzekoa, STA Mina Muga-STA Boca Mina tartea, Zangozako (Nafarroa) eta Undoze Lerdako (Zaragoza) udal-mugarteetan

2015eko abenduaren 21ean, Geoalcali SL enpresak eskatu zuen aurretiazko administrazio baimena, onura publikoaren deklarazioa eta eraikitzeko administrazio baimena eman zekizkiola proiektu honi: aireko eta lur azpiko linea, 66 kV-ekoa eta duplex zirkuitu bikoitzekoa –337-AL1/44-ST1A eroalea (lehengo LA-380 eroalea)–, STA Mina Muga-STA Boca Mina tartea, Potasako meatzea elektrizitatez hornitzeko, Zangozako (Nafarroa) eta Undoze Lerdako (Zaragoza) udal-mugarteetan.

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arlo Funtzionaleanan eta Gobernuak Zaragozan duen Ordezkariordetzako Industria eta Energia Arlo Funtzionalean.

Espedientea abiarazi eta tramitatu zen bat etorriz Energia elektrikoa garraiatu, banatu eta merkaturatzeko jarduerak, haren hornidura eta haren instalazioetarako baimenen prozedurak arautzen dituen abenduaren 1eko 1955/2000 Errege Dekretuan ezarritakoarekin, eta kasuan kasuko txostenak eskatu ziren.

Sektore Elektrikoari buruzko abenduaren 26ko 24/2013 Legearen 54.1 artikuluak honako hau ezartzen du: Onura publikoaren deklarazioa ematen zaie energia elektrikoa sortu, garraiatu eta banatzeko instalazio elektrikoei eta 250 kW-etik gorako potentzia duten ibilgailu elektrikoak kargatzeko estazioetako azpiegitura elektrikoei, haiek ezartzeko behar diren ondasun eta eskubideen nahitaezko desjabetzearen ondorioetarako, eta bide zortasuna ezarri eta erabili ahal izateko.

Hori ikusirik, ez da izapidetu proiektuaren onura publikoa zehazki deklaratzeko eskaera, aurreikusitako jarduketa hori ez baitago abenduaren 26ko 24/2013 Legearen 54.1 artikuluan aipatzen diren instalazioen artean.

Zangozako Udalak, Undoze Lerdako Udalak eta Nafarroako Gobernuko Biodibertsitatearen Zerbitzuak ez dute erantzun, bigarren aldiz galdetu ondoren ere; hortaz, ulertzen da ados daudela instalazioari baimena ematearekin, aplikatuz abenduaren 1eko 1955/2000 Errege Dekretuaren 127.2 eta 131.2 artikuluetan ezarritakoa.

Ebroko Konfederazio Hidrografikoak txosten bat egin du, eta hartan adierazi duenez, Geoalcali SLk aurkeztu dituen agiri teknikoetan ez dira identifikatu eta aztertu Bardeetako ubidea, haren instalazio osagarriak eta zerbitzu emateko bideak, eta, beraz, adierazten du ezin duela iritzirik eman separataren edukiaren gainean. Geoalcali SLk erantzun du, eta plano gehiago aurkeztu ditu, kokalekuarenak, oinplanokoak eta luzetarako profilarenak, eta haietan sartu dira aipatu azpiegiturak.

Ebroko Konfederazio Hidrografikoak eragozpenak jarri ditu erantzun horren aurrean, uste baitu zaila dela aurkeztutako informazioa interpretatzea. Haren iritziz, azalpenezko eta justifikazioko testu bat beharko litzateke. Gainera, adierazi du 00.004 euskarriaren kasuan ez direla betetzen behar diren baldintzak, euskarrien eta beste elementu batzuen artean (bideak, ibilguak eta tunelen lurgaineko proiekzioak) izan behar diren tarteei dagokienez. Geoalcali SLk erantzun du, eta beste eranskin bat prestatu du gauzatze proiektuan txertatzeko. Txosten hori 2016ko azaroaren 7an igorri zitzaion Ebroko Konfederazio Hidrografikoari, Nafarroako Industria eta Energia Arloaren bitartez, eta hark ez du erantzunik eman. Horregatik, 2019ko azaroaren 5ean, konfederazio hidrografiko horri entzunaldia eman zitzaion Energia Politikako eta Meatzeetako Zuzendaritza Nagusiaren ebazpen proposamenaren gainean, haren bidez aurretiazko administrazio baimena eta eraikitzeko administrazio baimena eman baitzitzaizkion Geoalcali SLri, proiektu honetarako: aireko eta lur azpiko linea elektrikoa, 66 kV-ekoa, duplex zirkuitu bikoitzekoa, STA Mina Muga-STA Boca Mina tartea, Zangozako (Nafarroa) eta Undoze Lerdako (Zaragoza) udal-mugarteetan. Hori guztia, bete zedin Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikulua. Konfederazioari hamabost egun balioduneko epea eman zitzaion alegazioak aurkez zitzan, eta gaur arte ez da erantzunik jaso.

Geoalcali SLren eskaera jendaurrean egon zen (2016ko 100. Estatuko Aldizkari Ofiziala, apirilaren 26koa; 2016ko 65. Nafarroako Aldizkari Ofiziala, apirilaren 6koa; 2016ko 85. Zaragozako Aldizkari Ofiziala, apirilaren 15ekoa), bat etorriz abenduaren 1eko 1955/2000 Errege Dekretuan ezarritakoarekin. Epe horretan zenbait partikularren alegazioak jaso ziren, eta Geoalcali SLk erantzuna eman zien, egokitzat jotzen diren arrazoiak emanez.

2019ko martxoaren 1ean, Geoalcali SLk erantzukizunpeko adierazpen bat izenpetu zuen, frogatzen duena ezen gauzatze proiektuak betetzen duela aplikatzekoa zaion araudia, Sektore Elektrikoari buruzko abenduaren 26ko 24/2013 Legearen 53.1 artikuluan ezarri bezala.

2017ko otsailaren 15ean, Gobernuak Nafarroan duen Ordezkaritzako Industria eta Energia Arloak aldeko txostena egin zuen, hain zuzen, aurkezturiko proiektuari aurretiazko administrazio baimena eta eraikitzeko administrazio baimena ematearen aldekoa, baldintza izanik ingurumen-inpaktuaren azterketaren tramitea burutzea.

2019ko martxoaren 21ean, Gobernuak Zaragozan duen Ordezkariordetzako Industria eta Energia Arloak aldeko txostena eman zuen, hain zuzen, aurkezturiko proiektuari aurretiazko administrazio baimena eta eraikitzeko administrazio baimena ematearen aldekoa, baldintza izanik ingurumen-inpaktuaren azterketaren tramitea burutzea.

Biodibertsitatearen eta Ingurumen Kalitatearen Zuzendaritza Nagusiaren 2019ko maiatzaren 31ko Ebazpenaren bidez, ingurumen-inpaktuaren adierazpena eman zen Mina Muga proiektuaren gainean. Proiektu horren barnean dago ebazpen honen xede den linea elektrikoa.

Bete zedin urriaren 1eko 39/2015 Legearen 82. artikuluan ezarrita dagoen entzunaldia, 2019ko urriaren 22an ebazpen proposamena igorri zitzaion Geoalcali SLri, hark aukera izan zezan egokitzat jotzen zituen alegazioak aurkezteko. Entzunaldi horretan, Geoalcali SLk idazki bat aurkeztu zuen 2019ko abenduaren 2an, eta horren bidez eskatu zuen hogeita hamasei hilabetera luzatu zedila ebazpen proposamenaren eranskineko bigarren baldintzan adierazitako epea; hots, ustiapen baimena emateko epea. Alegazioa baietsi da.

Merkatuen eta Lehiaren Batzorde Nazionaleko Ikuskapen Erregulatzailearen Salak, 2020ko apirilaren 15ean egin bilkuran, INF/DE/153/19 espedientea onetsi zuen, eta haren bidez aldeko txostena eman zuen zuzendaritza nagusi honek igorritako ebazpen proposamenaren gainean.

Abenduaren 1eko 1955/2000 Errege Dekretuaren 128. eta 131. artikuluekin bat, Energia Politikako eta Meatzeetako Zuzendaritza Nagusi hau eskuduna da ebazteko ebazpen honen xede diren jarduketen aurretiazko administrazio baimena eta eraikitzeko administrazio baimena emateko prozedura.

Baimen hauek ematen badira ere, lurraldearen antolamenduari eta ingurumenari dagozkien eta beharrezkoak diren emakidak eta baimenak beharko dira, bai eta aplikatzekoak diren xedapenek eragindako beste guztiak ere. Halaber, obra egiteko beharrezkoak diren gainerako baimen guztiak eskuratu beharko dira.

Horregatik guztiagatik, abenduaren 1eko 1955/2000 Errege Dekretu horretan legez ezarritako eskumenak baliatuz, Energia Politikako eta Meatzeetako Zuzendaritza Nagusi honek

EBAZTEN DU:

Lehenbizikoa.–Geoalcali SLri aurretiazko administrazio baimena ematea proiektu honetarako: aireko eta lur azpiko linea elektrikoa, 66 kV-ekoa, duplex zirkuitu bikoitzekoa, STA Mina Muga-STA Boca Mina tartea, Zangozako (Nafarroa) eta Undoze Lerdako (Zaragoza) udal-mugarteetan. 2016ko azaroaren 7an aurkeztutako eranskineko aldaketak izanen ditu proiektu horrek. Hona hemen haren ezaugarri nagusiak:

1. azpitartea: lur azpiko linea, zirkuitu bikoitza, A, 66 kV-ekoa.

–Hasiera: STA Mina Muga.

–Bukaera: 00.01 euskarria, proiektaturiko linean jarri beharrekoa.

–Tokia: Zangozako udal-mugartea.

–Luzera oinplanoan: 190 m.

2. azpitartea: aireko linea, duplex zirkuitu bikoitza, A, 66 kV-ekoa.

–Hasiera: 00.01 euskarria, proiektaturiko linean jarri beharrekoa.

–Bukaera: 00.07 euskarria, proiektaturiko linean jarri beharrekoa.

–Tokia: Zangozako eta Undoze Lerdako udal-mugarteak.

–Luzera oinplanoan: 1.484 m.

Bigarrena.–Eraikitzeko administrazio baimena ematea Geoalcali SLri, proiektu honetarako: aireko eta lur azpiko linea elektrikoa, 66 kV-ekoa, duplex zirkuitu bikoitzekoa, STA Mina Muga-STA Boca Mina tartea, Zangozako (Nafarroa) eta Undoze Lerdako (Zaragoza) udal-mugarteetan. 2016ko azaroaren 7an aurkeztutako eranskineko aldaketak izanen ditu proiektu horrek, eta ebazpen honen eranskineko baldintza bereziak bete beharko ditu.

Proiektuaren xedea da potasa meatzea elektrizitatez hornitzea, hala obrak egiteko fasean nola ustiatzeko fasean.

Eraikitzeko administrazio baimen horrek ondorioak izanen ditu soilik baldin eta meatzaritzako proiektuak ustiapen baimena lortzen badu aldez aurretik, Meategiei buruzko uztailaren 21eko 22/1973 Legean ezarritako moduan eta baldintzetan.

Hirugarrena.–Ezestea proiektuaren onura publikoa zehazki deklaratzeko eskaera, ez delako betetzen abenduaren 26ko 24/2013 Legearen 54. artikuluan ezarritakoa.

Geoalcali SLk hamabi hilabeteko epea izanen du, ebazpen hau jakinarazi eta biharamunetik aurrera, aipatu ustiapen baimena eskuratzeko. Epea iragaten bada baimen hori eskuratu gabe, baimen hau iraungiko da.

Geoalcali SLk bete beharko ditu izapidetzean onartutako baldintzak eta Mina Muga proiektuaren ingurumen-inpaktuaren adierazpenean ezarritako baldintzak.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta honen kontra gora jotzeko errekurtsoa aurkezten ahalko da Energiaren estatu-idazkariaren aurrean, Estatuko Aldizkari Ofizialean argitaratu eta biharamunetik hasita hilabeteko epean.

Zuzendari nagusia, Manuel García Hernández.

(Elektronikoki sinatua, marjinan adierazitako egunean).

ERANSKINA

Eraikitzeko administrazio baimena ematen da, abenduaren 1eko 1955/2000 Errege Dekretuan xedatutakoarekin bat eta baldintza berezi hauekin:

1. Lanak egin beharko dira aurkeztu den proiektuarekin eta aplikatzekoak zaizkion erregelamenduzko xedapenekin bat, eskatu eta baimentzen diren aldaketak eginda, beharrezkoak badira.

2. Eraikitzeko administrazio baimen horrek ondorioak izanen ditu soilik baldin eta meatzaritzako proiektuak ustiapen baimena lortzen badu aldez aurretik, Meategieei buruzko uztailaren 21eko 22/1973 Legean ezarritako moduan eta baldintzetan. Hortaz, linea elektrikoaren lanak gauzatzen hasteko, baldintza hori bete beharko da.

3. Ustiapen baimena emateko epea hogeita hamasei hilabetekoa izanen da, ebazpen hau eskatzaileari jakinarazten zaionetik hasita.

4. Instalazio horren titularrak lanen amaieraren berri eman beharko dio probintziako organo eskudunari, ustiapen baimena behin betikoz onartu eta zabaltzeko.

5. Eraikitzeko administrazio baimenak ez du inola ere instalazioaren titularra salbuesten instalazioek behar dituzten gainerako baimen osagarriak lortzetik; besteak beste, lortu beharko ditu industria segurtasunaren arloko legeriak, sistema laguntzaileei dagokienez, horiek instalatu edo abian jarri aurretik, eskatzen dituen baimenak, autonomia erkidegoen eskumenekoak, edo, bestela, kontrolerako beste formalitate guztiak bete beharko ditu.

6. Administrazioak ondoriorik gabe utziko du ebazpen hau baldin eta ikusten bada, denboraren joanean, ebazpenean ezartzen diren eskubideen titularrak ez dituela betetzen bertan ezarritako baldintzak. Kasu horietan, Administrazioak, behar den espedientea bideratu ondoren, kasuko baimena baliogabetzea erabakiko du, horrek dakartzan ondorio administratibo eta zibil guztiekin, indarra duten lege xedapenekin bat.

7. Instalazioaren titularrak kontuan hartuko du, exekuziorako, erakundeek ezarri dituzten baldintzak, zeinak jakinarazi zaizkion eta berak berariaz onartu dituen.

Iragarkiaren kodea: E2010953