1. NAFARROAKO FORU KOMUNITATEA
1.7. BESTELAKOAK
206E/2020 EBAZPENA, abuztuaren 26koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez ofizioz berrikusten baita paper eta kraft pasta kimikoaren fabrikazio integratuko instalazioaren ingurumen baimen integratua. Instalazioa Zangozako udal mugartean dago, eta Smurfit Kappa Navarra SA da titularra.
Instalazio horrek badu ingurumen baimen integratua, Ingurumenaren eta Uraren zuzendari nagusiaren urtarrilaren 21eko 177/2008 Ebazpenaren bidez emana, gero Ingurumenaren eta Uraren zuzendari nagusiaren urriaren 6ko 441E/2014 Ebazpenaren bidez eguneratua eta Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpenaren bidez aldatua.
Landa Garapeneko eta Ingurumeneko kontseilariaren otsailaren 13ko 31E/2020 Foru Aginduaren bidez partez baietsi da Smurfit Kappa Navarra SA enpresaren izenean eta horren ordezkari modura Pedro Mendarozketa Gómez jaunak aurkeztutako gora jotzeko errekurtsoa, Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpenaren aurka aurkeztua, instalazioa teknika erabilgarri onenei (TEO) buruzko ondorioak jasotzen dituen 2014/687/EB Erabakira egokitzeko.
Aipatutako otsailaren 13ko 31E/2020 Foru Aginduak, Landa Garapeneko eta Ingurumeneko kontseilariak emanak, agindu du honako aldaketa hauek egiteko Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpenaren bidez ezarritako funtzionamendu baldintzetan:
1. Emisioaren muga balioa ezabatzea 2. zenbakidun fokuaren CO parametroan, “Biomasa galdara”.
2. 2021-06-01eko data muga gisa ezartzea zuzia instalatu eta martxan jartzeko.
3. Baimena ematea 1.1.1 ataleko datuetan eta Katalogazioa taulan ageri beharreko informazioa bateratzeko eta testuan aurkezteko.
4. II. eranskineko isurketa baldintzetan AOX kutsatzailerako balioa zuzentzea, horren gehieneko balioa 0,05 kg/t paper neurrian ezarriz.
5. “Isurketa baldintzak” II. eranskinetik, “Neurgailuen informazioaren konexioa modu jarraituan denbora errealean” epigrafetik COT neurgailuaren aipamena ezabatzea, DQO neurgailuarekin neurtzea aski baita.
6. Instalazioen zerrendan bi trementina biltegien aipamena zuzentzea, biltegi bakarra baitago.
Horren ondorioz, instalazio honen ingurumen baimen integratua ofizioz berrikusi behar da, ebazpen honen eranskinean zehaztutako aldaketak aplikatuz, Landa Garapeneko eta Ingurumeneko kontseilariaren otsailaren 13ko 31E/2020 Foru Aginduak eskatutako aldaketak egite aldera.
Kasu honetan, Kutsaduraren Prebentzio eta Kontrol Integratuaren Legearen testu bateginaren 26.4 artikuluaren e) letran aurreikusitako inguruabarrak gertatzen dira (abenduaren 16ko 1/2016 Legegintzako Errege Dekretuak onetsi zuen lege hori), eta horrenbestez, bidezkoa da ofizioz berrikustea ingurumen baimen integratuan ezarritako baldintzak, Kutsaduraren Prebentzio eta Kontrol Integratuaren Legea garatzeko eta industriako isurien Erregelamendua onesten duen urriaren 18ko 815/2013 Errege Dekretuaren 16.5 artikuluan xedatutako administrazio prozedurarekin bat.
Ebazpenaren proposamena instalazioaren titularrari entzuteko tramitean egon da 15 egunez. Ebazpen honen IV. eranskinean jaso dira titularrak aurkeztutako alegazioen zerrenda eta haiei emandako erantzunak.
Adierazitakoarekin bat, eta Ingurumeneko zuzendari nagusiaren azaroaren 8ko 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehena.–Paper eta kraft pasta kimikoaren fabrikazio integratuko instalazioaren ingurumen baimen integratua ofizioz berrikustea, Smurfit Kappa Navarra SA titulartzat duena, Zangozako udal mugartean, ebazpen honen I. eranskinean zehaztutako aldaketen arabera. Hortaz, instalazioak eta jarduerak berak instalazioari ingurumen baimen integratua eman, eguneratu eta aldatzeko lehendik tramitatutako espedienteetan ezarritako baldintzak bete beharko dituzte, eta, horiez gainera, ebazpen honen eranskinean adierazitako baldintzak eta neurriak ere bai.
Bigarrena.–Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpena aldatzea; horrela, 2020ko abenduaren 1a baino lehen, titularrak instalazioa egokitzeko proiektuak aurkeztu beharko ditu, ebazpen honen III. eranskineko A ataleko neurri tekniko geroratuak jasota. 2023ko urriaren 1a baino lehen, berriz, B ataleko neurri geroratuen proiektua aurkeztu beharko du. Horrela, bada, instalazioa nabarmen aldatzeko administrazio prozedura tramitatzen has daiteke, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 29. artikuluan xedatutakoaren arabera (erregelamendu hori abenduaren 28ko 93/2006 Foru Dekretuaren bidez onetsi zen).
Hirugarrena.–Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpena aldatzea; hala, instalazioa egokitzeko proiektuak egiteko epe berriak ezarriko dira, kontuan izanik ebazpen honen III. eranskineko neurri tekniko geroratuak funtzionatzen hasiko direla III. eranskin horren beraren A eta B ataletan zehaztutako betearazpen datetan.
Laugarrena.–Ekonomia Zirkularraren eta Uraren Zerbitzuko zuzendariaren ekainaren 25eko 188E/2019 Ebazpena aldatzea; hala, 2020ko abenduaren 1a baino lehen, martxan jartzeari buruzko erantzukizunpeko adierazpen bat aurkeztu beharko du titularrak Landa Garapeneko, Ingurumeneko eta Toki Administrazioko Departamentuan, ebazpen honen II. eranskineko neurri teknikoak funtzionatzen hasteari buruz, Landa Garapeneko, Ingurumeneko eta Toki Administrazioko kontseilariaren abenduaren 23ko 448/2014 Foru Aginduaren 16. artikuluan xedatuarekin bat.
Bosgarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina-neurriak hartzea, hain zuzen ere, Kutsaduraren Prebentzio eta Kontrol Integratuaren Legearen testu bateginaren IV. tituluan jasotakoak (abenduaren 16ko 1/2016 Legegintzako Errege Dekretuak onetsia), ezertan galarazi gabe sektoreko legerian ezarritakoa, aplikatzekoa izaten segituko baitu, eta, subsidiarioki, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen araubidean jasotakoak.
Seigarrena.–Ebazpen hau Nafarroako Aldizkari Ofizialean argitaratzea.
Zazpigarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Zortzigarrena.–Ebazpen hau Smurfit Kappa Navarra SAri eta Zangozako Udalari igortzea, behar diren ondorioak izan ditzan.
Iruñean, 2020ko abuztuaren 26an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: ebazpen honetan aipatzen diren eranskinak interesdunen eskura egonen dira Ingurumeneko Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua), eta Nafarroako Gobernuaren webgune honetan: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.
Iragarkiaren kodea: F2009860
