2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
OLTZA ZENDEA
Oltza Zendeako Udalaren eta Ollarango Udalaren arteko lankidetza hitzarmena, kirol eta kultur instalazioak erabiltzeko
Iragarki honen bidez aditzera ematen da Oltza Zendeako Udalaren eta Ollarango Udalaren osoko bilkurek hartutako erabakia, Oltza Zendeako Udalaren jabetzako kirol eta kultur instalazioak Ollarango bizilagunek erabil ditzaten baldintzak arautzeko xedez, Sektore Publikoaren Araubide Juridikoari buruzko urriaren 1eko 40/2015 Legean ezarritakoari egokituz.
BATZARTURIK:
Alde batetik, Moisés Garjón Villanueva, Oltza Zendeako Udaleko alkate udalburua, Oltza Zendeako Udalaren izenean eta hura ordezkatuz, 2019ko uztailaren 25eko osoko bilkuran hartutako erabakiaren bidez emandako baimenaren babesean ari dena.
Bestetik, David Campión Ventura, Ollarango Udaleko alkate udalburua, Ollarango Udalaren izenean eta hura ordezkatuz 2019ko abenduaren 27ko osoko bilkuran hartutako erabakiaren bidez emandako baimenaren babesean ari dena.
Bi alderdiek bi udalen arteko hitzarmen hau izenpetzeko lege ahalmen nahikoa aitortzen diote elkarri, eta horretarako,
HONAKOA ADIERAZTEN DUTE:
1. Oltza Zendeako Udalak 2015eko maiatzaren 15eko osoko bilkuran hartutako erabakiaren bidez, udal kapital hutsez osatuta dagoen eta administrazio honen baliabide propioa eta zerbitzu teknikoa den Oltzaleku SL merkataritza sozietateari Oltza Zendeako Udalaren kirol eta kultur instalazioak kudeatzeko zerbitzu publikoaren kudeaketa agintzea erabaki zen.
Aipatu merkataritza sozietateak, besteak beste, kudeatzen dituen udal instalazioak honako hauek dira:
–Ororbiako Abajitabidea kiroldegia eta kanpoko pistak.
–Arazuriko Berokizelaia kiroldegia.
–Asiaingo Mostazulo pilotalekua.
–Ororbiako Kulturgunea.
2. Oltza Zendeako Udalaren kirol eta kultur instalazioetako erabilera eta barne araubidearen erregelamendua horretarako onetsi den ordenantzan jasota dago (2017ko 207. Nafarroako Aldizkari Ofiziala, urriaren 26koa).
Bestalde, Ororbiako Kulturgunearen erabilerak, horretarako onetsi den udal ordenantzan arautzen dira (2016ko 69. Nafarroako Aldizkari Ofiziala, apirilaren 12koa).
3. Udalaren kirol instalazioetan zerbitzuak emateko tasak, horretarako onetsi den ordenantza fiskalean arautzen dira (2017ko 205. Nafarroako Aldizkari Ofiziala, urriaren 24koa).
Aipatu ordenantza fiskalaren 5. artikuluan arautzen diren tarifetan, zenbait kasutan, bereizi egiten dira Oltza Zendeako udalerrian erroldaturik daudenen eta udalerrian erroldaturik ez daudenen zenbatekoak.
4. Administrazio publikoen eskumena da, bere interesak bere eskumenen esparruan kudeatzeko, era guztietako jarduerak sustatzea eta behar adina zerbitzu publiko ematea, herritarren beharrak eta nahiak betetzearren. Nolanahi, kirol, kultura eta aisialdia betetzeko jardueren esparruan, Toki Araubidearen Oinarriak arautzen dituen apirilaren 2ko 7/1985 Legeak 25. artikuluan ezartzen duenez, Nafarroako Toki Administrazioari buruzko uztailaren 2ko 6/1990 Foru Legearen 29. artikuluan xedatuarekin bat.
5. Ollarango Udalak bere borondatea adierazi du, sustapen jarduera baten bidez, herritarrenganako administrazio esku-hartze bat egiteko, pizgarriak emanez kirol eta kultura jardueretan parte hartzeko.
Halakoak egiteko udal instalaziorik ez duenez, Ollarango Udalak bere borondatea adierazi du Oltza Zendeako Udalaren lankidetza hitzarmen bat sinatzeko, Ollarango herritarrek Oltza Zendeako udalaren instalazioak erabiltzeko aukera izan dezaten.
6. Oltza Zendeako Udalak, eraginkortasun eta lankidetza irizpideak aintzat hartuz, eta kontuan izanik aipatu udalarekin dauden hurbiltasuna eta harremanak esparru guztietan, arrazoizkoa dela udalerri horretako herritarrek udal honen kirol eta kultura instalazioak erabili ahal izatea.
7. Herriko Oltzaleku SL merkataritza sozietateak hitzarmen honekiko adostasuna adierazi du.
Azaldutako guztiarekin ados, alderdiek erabaki dute hitzarmena formalizatzea ondokoarekin bat,
KLAUSULAK:
Lehena.–Hitzarmenaren xedea.
Hitzarmen honen xedea da Oltzaleku SL merkataritza sozietateak kudeatzen dituen Oltza Zendeako Udalaren kirol eta kultura instalazioak erabiltzeko baldintzak erregulatzea, eskaera egiten duten Ollarango herritarrendako, instalazioen titularra den udaleko herritarren eskaera bete ondoren zentroan leku bete gabeak baldin badaude.
Hitzarmen honetan aipatzen diren instalazioak honako hauek dira:
–Ororbiako Abajitabidea kiroldegia eta kanpoko pistak.
–Arazuriko Berokizelaia kiroldegia.
–Asiaingo Mostazulo pilotalekua.
–Ororbiako Kulturgunea.
Edonola ere, Oltzaleku SL merkataritza sozietateak kudeatzen dituen jardueretara mugatzen da.
Bigarrena.–Alderdien betebeharrak:
–Ollarango Udalak konpromisoa hartzen du Oltza Zendeako Udalari edo, beharrezkoa bada, Oltzaleku SL merkataritza sozietateari, udalean erroldaturik daudenen eta ez daudenen tarifen arteko aldeari dagokion defizita ordaintzeko, Oltza Zendeako Udalaren kirol instalazioetan zerbitzuak emateko tasak arautzen dituen ordenantza fiskalean xedatuarekin bat.
–Ollarango herritarrak izanik, Oltza Zendeako Udalaren kirol eta kultura instalazioak erabiltzen dituztenek, ordenantza fiskalean “erroldatuak” daudenendako ezarritako tarifak ordainduko dituzte; tarifa horiek behin-behinekoak izango dira. Ollarango herritarrak direla frogatzeko, instalazioetan aurkeztu behar dute erroldaren ziurtagiria edo bolantea.
–Oltza Zendeako Udalak edo, beharrezkoa bada, Oltzaleku SL merkataritza sozietateak, Oltza Zendeako Udalaren kirol eta kultura instalazioak erabili dituzten Ollarango herritarren tarifak likidatuko ditu hiruhiletik behin. Horretarako, behin betiko likidazioa egingo da, eta kalkulatuko da erroldatuen eta erroldatu gabeen tarifen artean dagoen aldeari dagokion derrama, eta Ollarango Udalari eskatuko zaio.
–Likidazioa jakinarazten denetik, ordaindu beharko da gehienez ere hilabete bateko epean.
–Hitzarmen honen barnean sartzen dira Oltzaleku SL merkataritza sozietateak aipatu udal instalazioetan antolatzen dituen jarduera guztiak.
–Oltza Zendeako Udalak, Toki Araubidearen Oinarriak arautzen dituen apirilaren 2ko 7/1985 Legearen 16. artikuluan ezarritakoarekin bat, Ollarango Udalari eskatu ahalko dio errolda datuetarako sarbidea, instalazioak erabiltzen dituztenak hango herritarrak direla egiaztatzeko. Hori guztia galarazi gabe datu pertsonalen tratamenduari dagokionez aplikagarria den araudian ezarritako segurtasun neurriak betetzeko beharra.
–Edonola ere, instalazioak erabiltzen dituzten guztiek Oltza Zendeako Udalaren kirol eta kultur instalazioetako erabilera eta barne araubidearen erregelamendua betetzeko beharra dute. Halaber, Ororbiako Kulturgunearen erabilerak arautzen dituen udal ordenantza betetzeko beharra dute.
Hirugarrena.–Hitzarmenaren indarraldia.
Hitzarmen honen indarraldia 2019ko ekainaren 1ean hasi eta 2020ko maiatzaren 31n (urtebete) amaituko da. Iraupen bereko luzapenak egin ahalko dira, gehienez lau urte egin arte. Luzapenak aho batez adostuko dituzte bi alderdiek, noiznahi eta ezarritako epea bukatu aurretik.
Laugarrena.–Hitzarmena eta alderdietako konpromisoak betetzearen jarraipen, zaintza eta kontrol mekanismoak.
Hitzarmena eta izenpetzaileek hartutako konpromisoak betetzearen jarraipen, zaintza eta kontrola egiteko, izenpetu dutenen ordezkaritza parekidea izango duen batzorde bat eratuko da.
Kide hauek osatuko dute batzordea:
–Oltza Zendeako Udaleko bi ordezkari.
–Ollarango Udaleko bi ordezkari.
Batzorde horretan parte hartu ahalko dute, era berean, bi udaletako lege aholkulariek, ekonomikoek edo teknikoek, ahotsarekin baina botorik gabe.
Batzordeko burutza Oltza Zendeako Udalari dagokio eta Sektore Publikoaren Araubide Juridikoari buruzko urriaren 1eko 40/2015 Legearen 19.2 artikuluan ezarritako eginkizunak beteko ditu, bere botoarekin berdinketak ebaztea izan ezik.
Jarraipen batzordeak ebatziko ditu hitzarmen hau interpretatu eta betetzeko moduari buruz sortzen ahal diren eztabaidak.
Bosgarrena.–Hitzarmena suntsiaraztea.
Hitzarmen hau suntsiaraziko da xede dituen jarduketak betetzean edo suntsitzeko arrazoietako bat gertatzen denean.
Honako hauek dira suntsitzeko arrazoiak:
a) Hitzarmenaren indarraldia igarotzea haren luzapena adostua izan gabe.
b) Sinatzaile guztiek hala adostea.
c) Sinatzaileetako batek hartutako betebehar eta konpromisoak ez betetzea.
Betetzen ez badira, alderdi batek errekerimendu bat jakinarazten ahalko dio bete ez duenari, ez-betetzat jotzen dituen betebeharrak edo konpromisoak epe jakin batean bete ditzan. Errekerimendu hori jakinaraziko zaio hitzarmenaren konpromisoak betetzearen jarraipen, zaintza eta kontrol mekanismoaren arduradunari eta izenpetu duten gainerako alderdiei.
Errekerimenduan adierazitako epea igaro ondoren jarraitzen badu bete gabe, errekerimendua egin zuen aldeak alderdi sinatzaileei jakinaraziko die suntsiarazteko arrazoia bere horretan dagoela eta hitzarmena suntsiarazitzat joko da. Hitzarmena arrazoi horregatik suntsitzeak sorrarazitako kalteen ordaina eragin ahalko du.
d) Hitzarmenaren deuseztasuna aitortzen duen epai judiziala.
e) Aurreko horietatik desberdina den legeetan ezarritako beste edozein.
Seigarrena.–Hitzarmenaren izaera.
Hitzarmen honek administrazio izaera du eta Sektore Publikoaren Araubide Juridikoari buruzko urriaren 1eko 40/2015 Legearen atariko tituluan ezarritakoaren babesean izenpetzen da.
Hitzarmenaren aplikazioaren ondoriozko jarduketek alderdien artean sortzen dituzten auziak, Jarraipen batzordean konpondu ezin direnak, administrazioarekiko auzien gaineko jurisdikzioak ebatziko ditu, jurisdikzio hori arautzen duen Legean xedatutakoari jarraikiz.
Hori guztia, ezertan ukatu gabe Nafarroako toki entitateen egintza eta erabakien inpugnazioari dagokionez indarreko legedian ezartzen diren berezitasunak.
Oltza Zendean, 2020ko urtarrilaren 17an.–Oltza Zendeako alkatea, Moisés Garjón Villanueva.–Ollarango Udaleko alkatea, David Campión Ventura.
Iragarkiaren kodea: L2000753
