1. NAFARROAKO FORU KOMUNITATEA
1.7. BESTELAKOAK
200/2019 EBAZPENA, apirilaren 11koa, Hezkuntzako zuzendari nagusiak emana, Osasun Larrialdietako Teknikarien Lanbide Heziketako titulua lortzeko probetarako berariazko deialdia arautzen duena Nafarroako Foru Komunitatean, 2018-2019 ikasturterako.
Hezkuntzari buruzko Lege Organikoak 69.4 artikuluan dioenez, hezkuntza administrazioek aldian behin antolatuko dituzte, beren eskumenen esparruan, lanbide heziketako tituluak zuzenean lortzeko probak.
Xedapen horren haritik, Hezkuntza sistemako lanbide heziketaren antolamendu orokorra ezartzen duen uztailaren 29ko 1147/2011 Errege Dekretuak 35. artikuluan dio lanbide heziketako tituluak horiek zuzenean lortzeko antolatutako probak gaindituz lortzen ahal direla.
Bestalde, Hezkuntzako kontseilariak ekainaren 27an emandako 76/2016 Foru Aginduak, Lanbide Heziketako titulu ofizialak lortzeko proben deialdiak egiteko baldintza orokorrak ezartzen dituenak, ezartzen du 1. eranskinaren 2. oinarrian deialdia berariazkoak egiteko aukera, zenbait eremu edo kolektibo profesionali zuzenduak, zeinek, Nafarroako Komunitatearentzat duten interes bereziagatik edo kasuan kasuko lanbide jarduera arautzen duten inguruabar bereziengatik, besteak beste, deialdi hauen bidez arreta berezia behar baitute.
Ikusirik Osasun Larrialdietako Teknikarien titulua lortzeko proba libreen berariazko deialdiari buruz Lanbide Heziketaren Zerbitzuak aurkeztu duen txostena.
Nafarroako Foru Komunitateko Administrazioari eta Foru-sektore publiko instituzionalari buruzko martxoaren 11ko 11/2019 Foru Legearen 32.1.d) artikuluak ematen dizkidan ahalmenak erabiliz,
EBATZI DUT:
1. Osasun Larrialdietako Teknikarien titulua lortzeko proben berariazko deialdia egitea, 2018-2019 ikasturterako, Nafarroako Foru Komunitateko Administrazioaren eta haren erakunde autonomoen zerbitzuko suhiltzaile izateko 17 lanpostu oposizio bidez betetzeko deialdiari lotutako suhiltzaileen Oinarrizko Prestakuntzaren ikastaroan onartutako izangaientzat, ebazpen honen 1. eranskinean jasotako oinarriekin bat; deialdi hori Funtzio Publikoko zuzendari nagusiak apirilaren 26an emandako 965/2018 Ebazpenaren bidez onetsi zen.
2. Osasun Larrialdietako Teknikarien titulua lortzeko proben berariazko deialdia ekainaren 27ko 76/2016 Foru Aginduan ezarritako baldintza orokorrei eta ebazpen honetan xedatutako berariazko baldintzei jarraikiz garatuko da.
3. Ebazpen hau igortzea Lehendakaritzako, Funtzio Publikoko, Barneko eta Justiziako Departamentuko Barne Zuzendaritza Nagusira eta Nafarroako Segurtasun eta Larrialdi Eskolara, Lanbide Heziketaren Zerbitzura, Hezkuntzako Ikuskapen Zerbitzura, Baliabide Ekonomikoen Zerbitzura, Giza Baliabideen Zerbitzura, Lanbide Heziketaren Plangintza, Antolamendu eta Garapenerako Atalera, Lanbide Kualifikazioen Atalera eta “Nafarroako Lanbide Eskola Tekniko Sanitarioa” ikastetxe bateratura, baita Nafarroako Aldizkari Ofizialera ere, argitara dadin.
4. Ebazpen honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2019ko apirilaren 11n.–Hezkuntzako zuzendari nagusia, Roberto Pérez Elorza.
1. ERANSKINA
I.–Osasun Larrialdietako Teknikarien titulua lortzeko proben deialdiaren berariazko baldintzak.
1. Ebazpen honen xede den proben berariazko deialdia bada ziklo osoko proba libreen deialdi bat. Ez da proba libreen deialdi modular bat.
2. Aurrekoa oinarri hartuta, inskribatu ondoren onartuak diren pertsonek ziklo osoaren inskripzioa eta matrikula egiten dituzte, hau da, hori osatzen duten modulu guztienak; ez dute inskripzio eta matrikula modularrik egiten, hots, zikloko modulu baten bati lotutakorik.
3. Horregatik, ez da 20 zenbakiko tarifa aplikatzen, Osasun Larrialdietako Teknikarien Lanbide Heziketako titulua lortzeko proba modularretako inskripzioari lotuta dagoena eta Nafarroako Foru Komunitateko Administrazioaren eta haren erakunde autonomoen Tasa eta Prezio Publikoei buruzko martxoaren 27ko 7/2001 Foru Legearen 99. artikuluan ezarri zena.
II.–Osasun Larrialdietako Teknikarien titulua lortzeko proben inskripzioa eta matrikula.
1.–Sartzeko baldintzak.
a) Baldintza orokorrak: Hezkuntzako kontseilariak ekainaren 27an emandako 76/2016 Foru Aginduaren 3. artikuluan ezarritakoak dira.
b) Berariazko baldintzak: Nafarroako Foru Komunitateko Administrazioaren eta haren erakunde autonomoen zerbitzuko suhiltzaile izateko 17 lanpostu oposizio bidez betetzeko deialdiari lotutako suhiltzaileen Oinarrizko Prestakuntzaren ikastaroa egiten ari izatea; deialdi hori Funtzio Publikoko zuzendari nagusiak apirilaren 26an emandako 965/2018 Ebazpenaren bidez onetsi zen.
2.–Aurreko atalean ezarritako betebeharrak agiri hauen bidez egiaztatuko dira.
–Indarra duen nortasun agiri nazionalaren edo pasaportearen fotokopia.
–Derrigorrezko Bigarren Hezkuntzako graduatu tituluaren edo ondorio akademikoetarako baliokidea denaren fotokopia, edo Lanbide Heziketako erdi mailako heziketa zikloetan sartzeko gainerako baldintzetako edozeinena.
–Nafarroako Segurtasun eta Larrialdi Eskolak emandako ziurtagiria, eskatzailea eranskin honen 1.b) atalean aipatutako suhiltzaileen Oinarrizko Prestakuntzaren ikastaroa egiten ari dela egiaztatzen duena.
3.–Inskribatzeko prozedura.
a) Inskribatzeko epea: 2019ko maiatzaren 2an eta 3an, 14:00ak arte.
b) Inskripzio-orria aurkezteko tokia: ESTNA - Nafarroako Lanbide Eskola Tekniko Sanitarioa ikastetxe bateratuko Idazkaritza (Irunlarrea kalea 3, 31008 Iruña).
c) Inskripzio-orriaren eredua ebazpen honen 2. eranskinean ezarritakoa da. Inskripzio-orriaren bidez eskatzen da Osasun Larrialdietako Teknikarien erdi mailako zikloko modulu guztietan inskribatzea. Beraz, onartuz gero, matrikula ziklo osorako eginen da.
d) Inskripzio-orriarekin batera II. epigrafe honen 2. atalean aipatutako dokumentazioa aurkeztu beharko da.
4.–Onartuen behin-behineko zerrenda maiatzaren 6an argitaratuko da.
Erreklamazioak maiatzaren 7an eta 8an (14:00ak arte) aurkeztuko dira, ESTNA ikastetxe bateratuan. Onartuen behin betiko zerrenda maiatzaren 9an argitaratuko da.
5.–Ikastetxeak ofizioz gauzatuko ditu onartuen matrikulak. Matrikula hori ziklo osorako izanen da.
6.–Moduluak baliozkotzea eta aitortzea:
moduluak baliozkotzea eta aitortzea nahi duten pertsonek hori egin beharko dute inskripzio epean, hango zuzendaritzari zuzendutako eskabide baten bidez, ekainaren 27ko 76/2016 Foru Aginduaren 1. eranskinaren 7. oinarrian ezarritakoarekin bat.
III.–Osasun Larrialdietako Teknikarien titulua lortzeko probetako ebaluazio batzordea.
1. Lanbide Heziketaren Zerbitzuko zuzendariak, ekainaren 27ko 76/2016 Foru Aginduaren 1. eranskinaren 8. oinarrian ezarritakoa garatzeko, ebaluazio batzorde bat izendatuko du proba horietarako; gutxienez bost kidek osatuko dute batzordea, eta horietako bat batzordeburu arituko da, eta beste bat, aldiz, idazkari; horiek biak funtzionario publikoak izanen dira.
Betiere, ebaluatu beharreko lanbide modulu bakoitzerako, modulu horretan irakaslana esleitua duen kide bat arituko da batzordean, gutxienez.
Lanbide Heziketaren Zerbitzuko zuzendariak profesional adituak izendatzen ahalko ditu ebaluazio batzordean parte har dezaten edo batzordeari aholku eman diezaioten.
2. Ebaluazio batzordearen eginkizunak ekainaren 27ko 76/2016 Foru Aginduaren 1. eranskinaren 8.3 oinarrian daude ezarrita.
3. Ebaluazio batzordeko kideei, baita horretan parte hartzen duten aholkulariei ere, Hezkuntzako zuzendari nagusiaren martxoaren 22ko 84/2016 Ebazpenean ezarritako diru konpentsazioak dagozkie. Ebazpen horren bidez, proben epaimahaietako kideek jaso beharreko konpentsazioak ezartzen dira.
IV.–Proben egutegia eta ezaugarriak, eta ebaluazio irizpideak.
1. Berariazko deialdi honen xede diren probak 2019ko maiatzaren 13tik ekainaren 26ra eginen dira ESTNA-Nafarroako Lanbide Eskola Tekniko Sanitarioa ikastetxe bateratuan, 2019ko maiatzaren 9an argitaratuko den egutegiari jarraikiz.
2. Proben egitura eta edukia, egiteko prozedura, ebaluazioa, emaitzen argitalpena eta emaitza horien aurka erreklamatzeko modua ekainaren 27ko 76/2016 Foru Aginduan ezarritakoak izanen dira.
3. Lantokiko Prestakuntza modulua gainditzeari eta Osasun Larrialdietako Teknikarien heziketa zikloaren titulazioa eskuratzeari dagokienez, foru agindu horren 14. eta 15. oinarrietan xedatutakoari jarraituko zaio.
2. ERANSKINA
Inskripzioa eta matrikula (PDFa).
Iragarkiaren kodea: F1905471
