1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
139E/2019 FORU AGINDUA, martxoaren 29koa, Osasuneko kontseilariak emana, honako hauek aldatzen dituena, osasun garraioari dagokionez kudeaketa egitura eta eginkizun berriak ezartzeko: Osasuneko kontseilariaren otsailaren 2ko 12/2016 Foru Agindua, Osasunbidea-Nafarroako Osasun Zerbitzuko Kudeaketa Zuzendaritzaren eta organo zentralen egitura ezartzen duena, eta Osasuneko kontseilariaren abuztuaren 22ko 63/2016 Foru Agindua, Oinarrizko Osasun Laguntzako Kudeatzailetzaren osasun laguntzako eta osasun laguntzaz kanpoko unitateen egitura organikoa ezartzen duena.
Osasunbidea-Nafarroako Osasun Zerbitzuaren Estatutuetan (irailaren 3ko 171/2015 Foru Dekretua) ezartzen da, 19.2 artikuluan, ezen arreta zerbitzuak, atalak eta unitateak Osasun Departamentuko titularraren foru aginduen bidez ezarriko direla, Osasunbidea-Nafarroako Osasun Zerbitzuko Kudeaketa Zuzendaritzak proposaturik.
Osasuneko kontseilariaren otsailaren 2ko 12/2016 Foru Aginduaren bidez, Osasunbidea-Nafarroako Osasun Zerbitzuko Kudeaketa Zuzendaritzaren eta organo zentralen egitura ezarri zen.
Osasuneko kontseilariaren abuztuaren 22ko 63/2016 Foru Aginduaren bidez, Oinarrizko Osasun Laguntzako Kudeatzailetzaren osasun laguntzako eta osasun laguntzaz kanpoko unitateen egitura organikoa ezarri zen.
Foru Parlamentuak sustatutako Osasun Garraioko Mahaiaren esparruan, adostasun zabalenarekin, Osasun Departamentuak Foru Komunitateko osasun garraioaren eredu berriaren plangintza estrategikoa ezarri du, pazientearengan ardaztutako zerbitzuaren kalitate osoa bermatzeko asmoz.
Osasun garraioaren eredu berria eraginkortasunez garatze aldera, beharrezkotzat jotzen da Osasunbidea-Nafarroako Osasun Zerbitzua egitura eta erantzukizun bereiziez hornitzea, alde batetik, larrialdietako osasun garraioa kudeatzeko eta, bestetik, osasun garraio programaturako eta larrialdietakoa ez denerako.
Egoki irizten zaio larrialdietako osasun garraioko zerbitzuen kudeaketa operatiboa osasun laguntzako zerbitzuekin integratzeari Nafarroako osasun larrialdietako sare batean, sare hori egonik Ospitalez Kanpoko Larrialdietako Zerbitzuaren menpe eta larrialdietako zerbitzuetako medikuez eta erizainez eta bai osasun garraioko zerbitzu propioez bai premiazko garraioari atxikitako zerbitzu itunduez osatuta.
Era berean, Prestazio eta Itunen Kudeaketarako Zerbitzuaren menpeko egitura berri bat garatu behar da, osasun garraio programatuaren eta larrialdietarako ez den garraioaren programazioa, kontrola eta kalitatearen ebaluazioa egokiro egiten direla ziurtatzeko.
Oinarrizko Osasun Laguntzako Kudeaketako Zuzendaritzak eta Eriari Osasun Laguntza emateko Zuzendaritzak txostena eman dute eta, bertan, bi zuzendaritzen egitura aldatzeko eskatu dute, eraldaketa gauzatu ahal izateko osasun garraioaren eredu berria helburu.
Horrenbestez, Osasunbidea-Nafarroako Osasun Zerbitzuko zuzendari kudeatzaileak proposaturik, eta Osasunbidea-Nafarroako Osasun Zerbitzuaren Estatutuak onesten dituen irailaren 3ko 171/2015 Foru Dekretuak eta Nafarroako Gobernuari eta Lehendakariari buruzko abenduaren 3ko 14/2004 Foru Legeak ematen dizkidaten ahalmenak erabiliz,
AGINTZEN DUT:
1. artikulua. Osasuneko kontseilariak otsailaren 2an emandako 12/2016 Foru Agindua aldatzea. Foru agindu horren bidez, Osasunbidea-Nafarroako Osasun Zerbitzuko Kudeaketa Zuzendaritzaren eta organo zentralen egitura ezarri zen.
Bat.–Artikulu bakarreko bigarren apartatuko 11. puntua aldatzen da. Hona testu berria:
“11. Prestazioen eta Itunen Kudeaketarako Zerbitzuaren egitura.
Prestazioen eta Itunen Kudeaketarako Zerbitzuak atal hauek ditu bere egituran:
a) Itunen Atal Tekniko Asistentziala.
b) Osasun Garraioaren eta Prestazioen Atala.
c) Kudeaketa Ekonomiko eta Administratiboaren Atala”.
Bi.–Artikulu bakarreko bigarren apartatuko 12. puntua aldatzen da. Hona testu berria:
“12. Itunen Atal Tekniko Asistentzialaren eginkizunak.
Itunen Atal Tekniko Asistentzialak eginkizun hauek izanen ditu:
a) Plangintza egitea, preskripzio teknikoak egitea eta osasun zentro eta zerbitzuekin egin beharreko itunak proposatzea.
b) Itundutako zentro eta zerbitzuen preskripzio teknikoen eta jardueraren betetzearen jarraipenaz eta kontrolaz arduratzea eta haien fakturazioaren gaineko txostena egitea.
c) Eriak itundutako zentroetara bidaltzeko aukera baloratu eta, hala badagokio, baimentzea.
d) Begiratzea erien eskubideak errespetatzen direla eta, orobat, osasun zentro eta zerbitzuekin egiten diren kontratu eta itunetan ezarritako baldintzak betetzen direla.
e) Itundutako zentro eta zerbitzuen erabiltzaileek jasotzen duten arreta ebaluatzea.
f) Beste autonomia erkidego batzuekin osasun laguntza jasotzeko hitzarmenak proposatu eta kudeatzea.
g) Osasun Garraioaren eta Prestazioen Atalarekin elkarlanean aritzea.
h) Aurrekoekin loturik Prestazio eta Itunen Kudeaketarako Zerbitzuaren titularrak agintzen dion beste edozein”.
Hiru.–Artikulu bakarreko bigarren apartatuko 13. puntua aldatzen da. Hona testu berria:
“13. Itunen Atal Tekniko Asistentzialaren egitura.
Itunen Atal Tekniko Asistentzialari atxiki zaio Itunen Unitatea. Eginkizun hauek izanen ditu:
a) Eriak zentro eta zerbitzu itunduetara zein Osasun Sistema Nazionaleko beste zentro batzuetara bidaltzeko eskaerak ebaluatu, egiaztatu eta baimentzea.
b) Eriak zentro itunduetara bidaltzeko aukera baloratu eta onartzea.
c) Aurrekoekin loturik Itunen Atal Tekniko Asistentzialaren titularrak agintzen dion beste edozein”.
Lau.–Artikulu bakarreko bigarren apartatuko 14. puntua aldatzen da. Hona testu berria:
“14. Osasun Garraioaren eta Prestazioen Atalaren eginkizunak.
Osasun Garraioaren eta Prestazioen Atalak eginkizun hauek izanen ditu:
a) Osasun Sistema Nazionaleko zerbitzuen zorroaren barnean hartutako prestazioak eskuratzeko programak planifikatu eta kudeatzea.
b) Osasun Sistema Nazionaleko zerbitzuen zorroaren barnean hartutako prestazioak eskuratzeko eskubidea duten herritarrak horietara iristea bermatzen duten ekintzak planifikatu, prestatu eta proposatzea.
c) Osasun Sistema Nazionaleko zerbitzuen zorroaren barnean hartutako prestazioak eskuratzeko eskaerak baloratzea eta, hala badagokio, onartzea.
d) Osasun Sistema Nazionaleko zerbitzuen zorroaren barnean hartutako prestazioetara iristea bermatzen duten ekintzak planifikatu, prestatu eta proposatzea.
e) Gastuak itzultzeko eskaerak jaso eta horien gaineko txostena egitea.
f) Osasun Sistema Nazionaleko zerbitzuen zorroaren barnean hartutako prestazioekin zerikusia duten erreklamazioak jaso eta horien gaineko txostenak egitea.
g) Prestazio osagarrietarako eskaerak baloratu eta, hala badagokio, onartzea.
h) Plangintza egitea, preskripzio teknikoak egitea eta osasun garraioko zerbitzuetarako kontratuak proposatzea.
i) Osasun garraio programatuaren eta larrialdietarako ez denaren programazio orokorrean parte hartzea, ospitaleetako osasun garraioaren koordinatzaileekin eta hornitzaileekin koordinatuta.
j) Larrialdietarako ez den osasun garraioko eta garraio programatuko zerbitzuak antolatzea ospitaleetako osasun garraioaren koordinatzaileekin.
k) Larrialdietarako ez den osasun garraiorako eta garraio programaturako ezarritako denborak eta kalitate irizpideak betetzen diren monitorizatu, ebaluatu eta kontrolatzea.
l) Osasun garraioko zerbitzuen fakturazioaren gaineko txostena egitea.
m) Adjudikaziodunek formalizatutako kontratuak betetzen direla zaintzea.
n) Erabiltzaileek jasotako arretan hautemandako kalitatea ebaluatzea.
o) Itunen Atal Tekniko Asistentzialarekin elkarlanean aritzea.
p) Aurrekoekin loturik Prestazio eta Itunen Kudeaketarako Zerbitzuaren titularrak agintzen dion beste edozein”.
Bost.–Artikulu bakarreko bigarren apartatuko 15. puntua aldatzen da. Hona testu berria:
“15. Osasun Garraioaren eta Prestazioen Atalaren egitura.
Osasun Garraioaren eta Prestazioen Atalari atxiki zaio Prestazioen Unitatea. Eginkizun hauek izanen ditu:
a) Prestazioak jasotzeko eskaerak hartu, egiaztatu eta tramitatzea.
b) Prestazioetarako eskaerak baloratu eta, hala badagokio, onartzea.
c) Gastuak itzultzeko espedienteen administrazio tramitazioa kudeatzea.
d) Osasun Sistema Nazionaleko zorro komun gehigarriaren barnean hartutako prestazioekin zerikusia duten erreklamazioen administrazio tramitazioa kudeatzea.
e) Laguntza prestazioei eta laguntzaz kanpokoei buruzko indarreko araudia eguneraturik mantentzea eta eskuragarri jartzea.
f) Herritarrei eskaintzen zaizkien prestazio eta zerbitzuei buruzko informazioa sustatzea.
g) Aurrekoekin loturik Osasun Garraioaren eta Prestazioen Atalaren titularrak agintzen dion beste edozein”.
Sei.–Artikulu bakarreko bigarren apartatuko 16. puntua aldatzen da. Hona testu berria:
“16. Kudeaketa Ekonomiko eta Administratiboaren Atalaren eginkizunak.
Kudeaketa Ekonomiko eta Administratiboaren Atalak eginkizun hauek izanen ditu:
a) Prestazio eta Itunen Kudeaketarako Zerbitzuaren aurrekontua kontrolatu eta kudeatzea.
b) Zentro eta zerbitzu itunduen fakturak hartu, egiaztatu eta haien ordainketa tramitatzea.
c) Prestazio eta Itunen Kudeaketarako Zerbitzuan kudeatutako prestazioen ordainketa tramitatzea.
d) Zentro eta zerbitzu itunduen tarifen eta prezioen proposamenak aztertu, analizatu eta horien gaineko txostena egitea.
e) Laguntza prestazioen, laguntzaz kanpoko prestazioen eta itunen kostuak baloratzea.
f) Osasun zentro eta zerbitzuekin egin beharreko kontratuen baldintza administratiboak prestatu, proposatu eta horien gaineko txostena egitea.
g) Osasun prestazioak eta osasunaz kanpokoak betetzeko zerbitzuak kontratatzeko baldintza administratiboak prestatu, proposatu eta horien gaineko txostena egitea.
h) Prestazio eta Itunen Kudeaketarako Zerbitzuak kudeatzen dituen kontratu eta itunen lizitazioen prozesu osoa argitaratu eta kudeatzea.
i) Aurrekoekin loturik Prestazio eta Itunen Kudeaketarako Zerbitzuaren titularrak agintzen dion beste edozein”.
Zazpi.–Artikulu bakarreko bigarren apartatuko 17. puntua aldatzen da. Hona testu berria:
“17. Kudeaketa Ekonomiko eta Administratiboaren Atalaren egitura.
Kudeaketa Ekonomiko eta Administratiboaren Atalak unitate hauek ditu bere egituran:
a) Kudeaketa Administratiboaren Unitatea.
b) Kontratazio Unitatea.”
Zortzi.–Artikulu bakarreko bigarren apartatuko 18. puntua aldatzen da. Hona testu berria:
“18. Kudeaketa Administratiboaren Unitatearen eginkizunak.
Kudeaketa Administratiboaren Unitateak eginkizun hauek izanen ditu:
a) Zentro eta zerbitzu itunduen fakturak hartu, egiaztatu eta haien ordainketa tramitatzea.
b) Beste autonomia erkidego batzuetara bidalitako erien bidaiarako laguntzak hartu, egiaztatu eta haien ordainketa tramitatzea.
c) Zerbitzuak kudeatutako prestazioen ordainketa tramitatzea.
d) Aurrekoekin loturik Kudeaketa Ekonomiko eta Administratiboaren Atalaren titularrak agintzen dion beste edozein”.
Bederatzi.–Artikulu bakarreko bigarren apartatuko 19. puntua aldatzen da. Hona testu berria:
“19. Kontratazio Unitatearen eginkizunak.
Kontratazio Unitateak eginkizun hauek izanen ditu:
a) Prestazio eta Itunen Kudeaketarako Zerbitzuak kudeatzen dituen kontratu eta itunen lizitazioen prozesu osoa argitaratu eta kudeatzea.
b) Zerbitzuaren kontratu eta itunen artxiboa mantentzea eta zaintzea.
c) Zerbitzuari bidalitako dokumentazioa hartu eta erregistratzea.
d) Aurrekoekin loturik Kudeaketa Ekonomiko eta Administratiboaren Atalaren titularrak agintzen dion beste edozein”.
2. artikulua. Osasuneko kontseilariaren abuztuaren 22ko 63/2016 Foru Agindua aldatzea. Agindu horren bidez Oinarrizko Osasun Laguntzako Kudeatzailetzaren osasun laguntzako eta osasun laguntzaz kanpoko unitateen egitura organikoa ezarri zen.
Bat.–5. artikuluko d) letra kentzen da.
Bi.–7. eta 8. artikuluak kentzen dira.
Hiru.–14. artikulua aldatzen da. Hona testu berria:
“14. artikulua. Ospitalez kanpoko Larrialdien Zerbitzuaren egitura.
Ospitalez kanpoko Larrialdien Zerbitzuak atal hauek ditu bere egituran:
a) Kudeaketa Administratiboaren Atala.
b) Osasun Larrialdien eta Garraioaren Atala.
c) Iruñeko Barrutiko Ospitalez kanpoko Larrialdien Atala”.
Lau.–15. artikulua aldatzen da eta honela idatzita gelditzen da:
“15. artikulua. Kudeaketa Administratiboaren Atalaren eginkizunak.
Kudeaketa Administratiboaren Atalak eginkizun hauek izanen ditu:
a) Ospitalez kanpoko Larrialdien Zerbitzuari atxikitako baliabideen jarduerak modu egokian gauzatzen direla bermatzea.
b) Ospitalez kanpoko Larrialdien Zerbitzuko langileak eta baliabideak antolatu eta kudeatzea.
c) Ospitalez kanpoko Larrialdien Zerbitzuko dokumentazioa eta artxiboa kudeatzea.
d) Esleitzen zaizkion langileen laneratzeak kudeatzea eta absentziak planifikatu eta kontrolatzea, oporretan daudenean edo erregelamenduzko baimena duten kasuetan.
e) Ospitalez kanpoko Larrialdien Zerbitzuaren menpeko zentroen hornikuntza egokia bermatzea.
f) Zentroek ematen dituzten zerbitzu orokorrak eta mantentze zerbitzuak kudeatu, gainbegiratu eta koordinatzea.
g) Oinarrizko Osasun Laguntzako Kudeatzailetzako Profesionalen Zerbitzuko buruak eta Kudeaketa Ekonomikoaren eta Zerbitzu Orokorretako buruak eskuordetutako eginkizunak bere gain hartzea.
h) Ospitalez kanpoko Larrialdien Zerbitzuko buruak agintzen dion beste edozein”.
Bost.–15 bis artikulua gehitzen da. Hona testua:
“15 bis artikulua. Larrialdien eta Presako Osasun Garraioaren Atalaren eginkizunak.
Larrialdien eta Osasun Garraioaren Atalak eginkizun hauek izanen ditu:
a) Nafarroako Osasun Larrialdien Sarearen erantzukizun teknikoa bere gain hartzea.
b) SOS Nafarroaren osasun koordinazioa bere gain hartzea.
c) SOS Nafarroak osasun baliabideak erabiltzeko eta mugiarazteko berariazko jarraibideak eta protokoloak ezartzea eta betetzen direla bermatzea.
d) Nafarroako Osasun Eskualde guztirako ospitalez kanpoko larrialdietako osasun laguntzari eta larrialdiko osasun garraioari buruzko jarraibideen, prozeduren, funtzionamendu arauen eta protokoloen proposamenak prestatzea.
e) SOS Nafarroaren osasun koordinazioan parte hartzen duten osasun baliabide guztien antolaketa bere gain hartzea.
f) Iruñeko Barrutiko ospitalez kanpoko larrialdietako zerbitzuetako langile eta baliabide guztiak kudeatzea.
g) Foru Komunitateko lurralde osoko premiazko eta larrialdietako osasun garraioan parte hartzen duten baliabide propio zein itundu guztien kudeaketa eragilea eta antolaketa egitea.
h) Nafarroako Osasun Larrialdien Sarean parte hartzen duten langile propio zein itundu guztien etengabeko prestakuntzako plana prestatzea eta hori antolatzen laguntzea.
i) Ospitalez kanpoko Larrialdien Zerbitzuko buruak agintzen dion beste edozein”.
Sei.–15 ter artikulua eransten da. Hona hemen:
“15 ter artikulua. Larrialdien eta Osasun Garraioaren Atalaren egitura.
Larrialdien eta Osasun Garraioaren Atalari atxiki zaio Larrialdietako Osasun Garraioaren Unitatea. Eginkizun hauek izanen ditu:
a) Osasun garraioko baliabide publikoak kudeatzea.
b) Foru Komunitateko lurralde osoko premiazko eta larrialdietako osasun garraioan parte hartzen duten baliabide propio zein itundu guztien kudeaketa eragilea eta antolaketa egitea. Ezarritako denborak eta kalitate irizpideak betetzen diren monitorizatu, ebaluatu eta kontrolatzea.
c) Larrialdien Sarea osatzen duten anbulantzia itunduen kontratuaren baldintzak betetzen diren kontrolatzea eta Prestazio eta Itunen Kudeaketarako Zerbitzuari jakinaraztea.
d) Unitatearen urteko memoria egitea.
e) Aurrekoekin loturik Larrialdien eta Larrialdietako Osasun Garraioaren Ataleko buruak agintzen dion beste edozein”.
Zazpi.–15 quater artikulua eransten da. Hona hemen:
“15 quater artikulua. Iruñeko Barrutiko Ospitalez kanpoko Larrialdien Atalaren eginkizunak.
Iruñeko Barrutiko Ospitalez kanpoko Larrialdien Atalak eginkizun hauek izanen ditu:
a) Iruñeko Barrutiko Ospitalez kanpoko Larrialdien Atalaren jardueren erantzukizun teknikoa bere gain hartzea eta egokiro garatzen direla bermatzea.
b) Iruñeko Barrutiko ospitalez kanpoko larrialdien zerbitzuetako langile eta baliabide guztiak kudeatzea.
c) Osasun laguntzari buruzko prozedurak, funtzionamendu arauak eta protokoloak prestatzea.
d) Agintzen zaizkion planak eta proiektuak ezartzea.
e) Bere ardurapeko langileen etengabeko prestakuntza sustatzea eta antolatzea.
f) Helburuen betetzea eta garatutako osasun laguntzaren kalitatea ebaluatzea.
g) Ospitalez kanpoko Larrialdien Zerbitzuko buruak agintzen dion beste edozein”.
Zortzi.–15 quater artikulua eransten da. Hona hemen:
“15 quater artikulua. Iruñeko Barrutiko Ospitalez kanpoko Larrialdien Atalaren egitura.
Iruñeko Barrutiko Ospitalez kanpoko Larrialdien Atalari atxiki zaio Ospitalez kanpoko Larrialdietako Erizaintzaren Unitatea. Eginkizun hauek izanen ditu:
a) Ospitalez kanpoko Larrialdien Zerbitzuko langileen jarduera egokia dela bermatzea eta lan hori ebaluatzea.
b) Ospitalez kanpoko Larrialdien Zerbitzuari atxikitako erizaintzako langileen antolaketa bermatzea.
c) Erizaintzako langileek ematen duten osasun laguntzaren kalitatea ebaluatzea.
d) Erizaintzako langileak koordinatzea eta irizpideen batasuna bermatzea pazientearen zainketaren eta arretaren inguruko alderdi garrantzitsuenetan.
e) Ospitalez kanpoko Larrialdien Zerbitzuaren funtzionamendurako behar diren baliabide material guztiak ebaluatzea, kontrolatzea eta haien mantentze-lanez arduratzea.
f) Plan eta proiektuak ezartzea eta haien garapena ebaluatzea.
g) Ospitalez kanpoko Larrialdien Zerbitzuaren plan eta helburuak urtero ebaluatzea.
h) Iruñeko Barrutiko Ospitalez kanpoko Larrialdien Ataleko buruak berariaz agintzen dizkion gainerako eginkizunak bere gain hartzea”.
Xedapen gehigarri bakarra.–Izendapenak.
Honako izendapen hauek berresten dira, egin ziren baldintza berberetan:
1) Ospitalez kanpoko Larrialdietako Zainketa Asistentzialetarako eta Etxeko Arretarako Erizaintzaren Unitateko Burutzarena, Ospitalez kanpoko Larrialdietako Erizaintzaren Unitateko Burutza gisa.
2) Atal Tekniko Asistentzialeko Burutzarena, Itunen Atal Tekniko Asistentzialeko Burutza gisa.
3) Kudeaketa Kontrolerako Ataleko Burutzarena, Kudeaketa Ekonomiko eta Administratiboaren Ataleko Burutza gisa.
4) Fakturazio Unitateko Burutzarena, Kudeaketa Administratiboaren Unitateko Burutza gisa.
5) Barne Kontrolerako Unitateko Burutzarena, Kontratazio Unitateko Burutza gisa.
6) Izendapenaz aldatu ez diren unitate organikoetako burutzenak.
Azken xedapena.–Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2019ko martxoaren 29an.–Osasuneko kontseilaria, Fernando Domínguez Cunchillos.
Iragarkiaren kodea: F1904663
