Iragarkia

76. ALDIZKARIA - 2019ko apirilaren 23a

1. NAFARROAKO FORU KOMUNITATEA

1.7. BESTELAKOAK

143/2019 EBAZPENA, martxoaren 8koa, Ingurune Naturalaren Zerbitzuko zuzendariak emana, prozedura onesten duena Urbasa eta Andia ondare mendietan larre azalerak eskatu eta eskaera onartzeko, eta Urbasa eta Andia ondare mendietako larreen erabiltzaileei emandako azalerak onesten dituena 2019ko kanpainarako.

Uztailaren 1eko 267/1996 Foru Dekretuaren bidez onetsi zen Urbasa eta Andia mendietako Natura Baliabideak Antolatzeko Plana, eta otsailaren 27ko 3/1997 Foru Legearen bidez deklaratu zen Urbasa eta Andia mendietako Parke Naturala. Gero, Natura Baliabideak Antolatzeko Plana aldatu zen irailaren 7ko 198/2011 Foru Dekretuaren bidez.

Abenduaren 4ko 340/2001 Foru Dekretuaren bidez onetsi zen Urbasa parke naturala erabili eta kudeatzeko plan zuzentzailea. Plan horren 4.1 artikuluaren arabera, eskubide tradizionalen erabilera, besteak beste larratzekoa, Ingurumen Zuzendaritza Nagusiak ezarri prozedurari jarraikiz eginen da.

Bestalde, Ingurumenaren eta Uraren zuzendari nagusiaren abuztuaren 12ko 1259/2011 Ebazpenaren bidez, Urbasa eta Andia mendietako larre eta oihanak antolatzeko proiektua onetsi zen.

Nekazaritza Zerbitzuak eta Eskualde Atlantikoa Kudeatzeko Atalak emandako txostenak ikusirik.

Horrenbestez, Ingurumeneko eta Lurraldearen Antolamenduko zuzendari nagusiaren irailaren 22ko 63/2015 Ebazpenaren bidez emandako eskumenak erabiliz (ebazpen horren bidez, Ingurune Naturalaren Zerbitzuaren esku uzten dira Ingurumeneko eta Lurraldearen Antolamenduko zuzendari nagusiak esleituta dituen zenbait eskumen),

EBAZTEN DUT:

1. Urbasa eta Andia ondare mendietan erabilera erkideko larre azalerak eskatu eta eskaera onartzeko prozedura onestea. I. eranskinean zehazten da.

2. Eskabidearen eredua onestea. Ebazpen honen II. eranskinean agertzen da.

3. Urbasa eta Andia ondare mendietako larreen onuradunei/erabiltzaileei emandako azalerak onestea, ebazpen honen III. eranskinean ageri den bezala.

4. Ebazpen hau jakinaraztea Eskualde Atlantikoa Kudeatzeko Atalari, Ingurumena Zaintzeko Atalari eta Nekazaritza Zerbitzuari, behar diren ondorioak izan ditzan.

5. Ebazpen hau Nafarroako Aldizkari Ofizialean argitaratzea.

6. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean.

Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2019ko martxoaren 8an.–Ingurune Naturalaren Zerbitzuko zuzendaria, Fermín Olabe Velasco.

I. ERANSKINA

Urbasa eta Andia ondare mendietan erabilera erkideko larreak eskatu eta eskaera onartzeko prozedura

Lehena.–Xedea.

Ebazpen honen xedea da Urbasa eta Andia mendietan erabilera erkideko larreak eskatu eta eskaera onartzeko prozedura ezartzea 2019ko kanpainarako.

Bigarrena.–Onuradunak.

Onuradun izateko, eskatzaileek baldintza hauek bete beharko dituzte:

1. Nafarrari dagokion foru izaera zibila izatea.

2. Aurkezten duten ganadu guztiaren jabe izatea.

Hirugarrena.–2018ko kanpainan Urbasa-Andia mendietako larreak erabili dituzten eta NPE eskatu duten abeltzainei adjudikatzea.

1. 2018ko kanpainan Urbasa-Andia mendietako larreak erabili dituzten eta NPE eskatu duten abeltzainei zuzenean adjudikatzen zaie larreen erabilera 2019ko kanpainarako. Eskatzaile bakoitzak azienda larriko zenbat unitate erabili zituen aurreko kanpainan, horren arabera adjudikatuko zaizkio larreak. Horrenbestez, adjudikazio ratioa honako hau izanen da: SIGPACen arabera kanpainan Urbasak duen azalera garbia zati aurreko urtean benetan igotako azienda larriko unitateen batura.

III. eranskinean arrazoitzen da zein izan den 2018ko kanpainan Urbasa-Andiako larreak erabili dituzten abeltzainei adjudikatzeko jarraitu den prozedura, eta onuradunen eta azaleren zerrenda agertzen da.

Adjudikazio hori interesdunei jakinaraziko zaie, Nafarroako Aldizkari Ofizialean eta eskualdeetako nekazaritza bulegoetan argitaratuta, jakinaren gainean egon daitezen. Jakinarazpen horretan agertuko dira aurreko urtean igotako AzLUak, bai eta aurtengo kanpainarako adjudikatutako azalera ere.

Egiaztatuko da interesdunaren jabetzako aziendak baizik ez direla bazkatu adjudikaturiko azaleretan, eta, besterik frogatzen bada, adjudikazio hori eta deklaratutako azalera baliogabetuko dira.

Ingurune Naturalaren Zerbitzuak jakinaraziko ditu 2019an benetan igotako aziendaren datuak, behar besteko aurrerapenaz, halako moduz non hurrengo kanpainaren otsailaren 1a baino lehen egiten ahalko diren adjudikazioaren kalkuluak.

2. Ezinbesteko arrazoiak direla medio 2018ko kanpainan larreak erabiltzerik izan ez duten abeltzainek, hurrengo kanpainan larreen erabilera egin nahi badute, eskaera aurkeztu beharko dute idatziz, II. eranskineko ereduari jarraikiz. Eskaera hori 10 eguneko epean aurkeztuko da, Nafarroako Aldizkari Ofizialean eta eskualdeetako nekazaritza bulegoetan argitaratzen denetik hasita, eta harekin batera aurkeztuko dira ezinbesteko kasuak frogatzen dituzten agiriak.

Ebazpena emateko epea 3 hilabetekoa izanen da. Epe hori iraganik berariazko ebazpenik eman eta jakinarazi gabe, eskaera isiltasun administratiboz ezetsi dela ulertzen ahalko da.

3. 2019ko kanpainan Urbasa eta Andiako mendietako larreak erabiltzeko adjudikazioari uko egin nahi dioten abeltzainek uko egiteko agiria aurkeztu beharko dute eskualdeetako nekazaritza bulegoetan, 10 eguneko epean, Nafarroako Aldizkari Ofizialean argitaratzen denetik hasita.

Laugarrena.–Emateko prozedura, 2018ko kanpainan larreen erabilera adjudikaturik ez zuten abeltzainendako.

1. Eskaera aurkezteko era:

–Idatziz aurkeztuko da, 10 eguneko epean, ebazpen hau Nafarroako Aldizkari Ofizialean argitaratzen denetik hasita. Ebazpena Nafarroako Aldizkari Ofizialean argitaratu aurretik aurkezturiko eskaerak ere onartuko dira.

–Landa Garapeneko, Ingurumeneko eta Toki Administrazioko Departamentuko Nekazaritza Zerbitzura igorriko da.

–Departamentu horren edozein erregistro ofizialetan aurkeztuko da, edo, bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako bideetako edozein erabiliz.

–Abeltzainak eskaeran adierazi beharko du bere jabetzako zer azienda sartu nahi duen Urbasa-Andian 2019ko kanpainan, azienda kopurua espezieka eta adin tarteka zehaztuta, bai eta Urbasa eta Andia mendietan adjudikatzea eskatzen duen larre azalera garbi maximoa ere, hektareatan emana. Ez dira deklarazio horretan sartuko sei hilabetetik gorako behi-aziendako arrak, debekatua baitute mendi horietan larratzea sexu bidezko gaixotasunen transmisioagatik, Nekazaritza eta Abeltzaintzako zuzendari nagusiaren 1391/2015 Ebazpena aplikatuz.

2. Prozeduraren instrukzioa.

–2018ko kanpainan Urbasa-Andiako mendietan sartu ziren titularren abeltzaintzako ustiategiak eskualdaketa bidez jasotzen dituztenen eskaera berriei dagokienez, lagatzaileak igotako AzLU kopurua hartuko da kontuan, larreak adjudikatzeko orduan.

–Adjudikazio berrietako ratioa kalkulatzeko, behin adjudikazioa eginik 2018ko kanpainan Urbasa-Andiako larreak erabili dituzten abeltzainei, kontuan hartu beharko da adjudikazio berrietarako gordetako azalera (350 ha) gainditzen ote den, honako hauek biderkatu ondoan: igo nahi den AzLU kopurua (eskaera berrian adierazia) eta lehen adjudikazioan erabilitako ratioa (0,5071 ha/AzLU).

–Behin prozedurak instruituta, eta ebazpen proposamena idatzi aurretik, eskatzaileei hamar eguneko epea emanen zaie alegazioak egin eta egokiak iruditzen zaizkien dokumentuak eta frogagiriak aurkez ditzaten.

3. Adjudikazioa. Urbasa-Andia mendietako larreen azalerak adjudikatzeko eskaerak Ingurune Naturalaren Zerbitzuko zuzendariak ebatziko ditu. Ebazpena emateko epea 3 hilabetekoa izanen da. Epe hori iraganik berariazko ebazpenik eman eta jakinarazi gabe, eskaera isiltasun administratiboz ezetsi dela ulertzen ahalko da.

Bosgarrena.–Onuradunen betebeharrak.

Abeltzain adjudikaziodunek Urbasa eta Andia Erabili eta Kudeatzeko Plan Zuzentzailean biltzen diren abeltzaintzarako jarraibideak bete beharko dituzte.

II. ERANSKINA

Urbasa eta Andia ondare mendietako erabilera erkideko larreak adjudikatzeko eskaera (titular berriendako [2018an ganadua igo ez zutenak] edo adjudikazioari uko egin nahi dioten titularrendako baizik ez) (PDFa).

III. ERANSKINA

2019ko kanpainarako Urbasa eta Andia ondare mendietako erabilera erkideko larreen adjudikaziodunen zerrenda

Prozesu honi jarraitu zaio adjudikazioa egiteko:

1. Nekazaritzako Informazio Sistemen Bulegoari kontsulta eginez ezagutu dira Urbasa-Andia mendilerroetako larreen azalera garbiak.

2. Ezagutzen da guztira zenbat AzLU igo ziren benetan Urbasa-Andia mendilerroetara aurreko kanpainan.

3. Adjudikazio ratioa kalkulatzeko, Urbasa-Andiaren azalera garbitik 350 ha kendu dira (adjudikazio berrietarako gordeak), eta azalera hori zatitu da AzLU kopuru jakin batekin; hain zuzen ere, 2018ko kanpainan Urbasa-Andiako mendietan sartu ziren AzLU kopuruarekin, titularrek egindako laguntza-eskaera bakarrari jarraikiz. Adjudikazioa kalkulatzeko aplikatuko da adjudikazio ratioa.

4. Ingurune Naturalaren Zerbitzuak aurreko kanpainan Urbasa-Andia mendietara benetan igotako abeltzainen zerrenda komunikatzean balioztatu da aurreko kanpaina horretarako adjudikatutako azalera. Ez bada igoerarik izan, azalera hori deuseztatu da laguntza-eskaerei dagokienez.

Iragarkiaren kodea: F1903610