2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
BURLATA
Deialdia, izangaien zerrenda bat eratzeko, aldi baterako kontratuen bidez Lan-harremanetako eta arriskuen prebentzioko teknikari lanpostua betetzeko. Oinarriak errebokatzea
Udal honetako alkateak, 2019ko abenduaren 11n, 1167/2019 Ebazpena eman zuen. Hona hemen haren testua:
Ikusirik 2019ko urriaren 30eko 1004/2019 Ebazpena, zeinaren bidez onartu baitzen prozedura irekitzea eta izangaien zerrenda bat eratzeko deialdiaren oinarriak onestea, aldi baterako kontratuen bidez betetzeko Lan-harremanetako eta arriskuen prebentzioko teknikari lanpostua Giza Baliabideen alorrean, Burlatako Udalean sortzen diren beharrak betetze aldera.
Ikusirik Ebazpen hori 2019ko 225. Nafarroako Aldizkari Ofizialean, azaroaren 14an, argitaratu eta gero hautaketa prozedura bat abiarazi zela.
Ikusirik gobernu taldeak deialdi hori errebokatzeko agindua eman duela, berak egindako txosten batean oinarrituta. Izan ere, txosten horretan jasotakoaren arabera, deialdiak kalte egiten die zenbait laguni, euskara jakitea eskatzen duelako, nahiz eta lanpostuan ez zaion arretarik emango herritarrei eta nahiz eta Burlatan euskara gutxi hitz egin (herritarren % 72,9k ez du erabiltzen).
Kontuan hartuta epaitegiek adierazitakoa, besteak beste, Auzitegi Gorenaren 1982ko uztailaren 16ko sententzian. Haren arabera, ondoriozta daiteke administrazioek eskumena dutela hautaketa deialdiak errebokatzeko baldin eta bidezko kausarik badago eta hautagaiek oraindik ez badute inolako eskubiderik gauzatu esparru juridikoan. Ildo horretan, prozesuan parte hartze hutsa eskubide-itxaropena baino ez da, harik eta onartutako eta baztertutako izangaien zerrenda onartzen den arte. Egintza hori –zerrenda argitaratzea, alegia– ez da egin.
Idazkariari entzun ondotik, eta Toki Araubidearen Oinarriak arautzen dituen Legearen 21. artikuluan eta harekin bat datozen gainerako arauetan alkate udalburuari aitortzen zaizkion ahalmenak aintzat hartuta,
EBAZTEN DUT:
Lehena.–Errebokatzea izangaien zerrenda bat eratzeko deialdiaren oinarriak, zeinaren helburua baita aldi baterako kontratuen bidez Lan-harremanetako eta arriskuen prebentzioko teknikari lanpostua betetzea Giza Baliabideen alorrean, Burlatako Udalean sortzen diren beharrak asetze aldera. Errebokatzeko arrazoia da euskararen derrigortasuna ez dela jotzen bidezkotzat, eta, beraz, plantilla organikoa aldatzea proposatuko da.
Bigarrena.–Ofizioz adieraztea deialdi horretan parte hartu duten izangaiek ordaindutako tasak bueltan jasotzeko eskubidea dutela, bidegabeko diru-sarrera gisa jotzen dira-eta.
Hirugarrena.–Egintza hau jendaurrean jartzea, Nafarroako Aldizkari Ofizialean eta Udalaren iragarki-taulan eta web orrian argitaratuta, prozesuan parte hartu dutenen banakako jakinarazpenaren ordez.
Burlatan, 2019ko abenduaren 11n.–Alkatea, Ana María Góngora Urzaiz.
Iragarkiaren kodea: L1915996
