53. ALDIZKARIA - 2018ko martxoaren 15a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

NOAIN (ELORTZIBAR)

Deialdia, Kontu-hartzailetza Alorreko Zerga Ikuskapeneko eta/edo Premiamendu bidezko Diru-bilketako Atalari atxikitako diplomadunaren lanpostua, aldi baterako kontratuarekin eta oposizio-lehiaketa bidez, betetzeko izangaien zerrenda hautaproben bidez eratzeko

Ebazpena, 2018ko otsailaren 28koa, Noain Elortzibarko Udaleko alkate-udalburuak emana, zeinaren bidez deialdia onesten baita, merezimenduaren eta gaitasunaren printzipioetan oinarriturik, Noain Elortzibarko Udalaren Kontu-hartzailetza Alorreko Zerga Ikuskapeneko eta/edo Premiamendu bidezko Diru-bilketako Atalari atxikitako diplomadunaren lanpostua, aldi baterako kontratuarekin eta oposizio-lehiaketa bidez, betetzeko izangaien zerrenda hautaproben bidez eratzeko, sortzen diren beharrei erantzutearren.

Aplikatzekoak diren xedapenek legez ematen dizkidaten eskudantziak erabiliz eta ekainaren 5eko 113/1985 Foru Dekretua kontuan hartuz,

EBATZI DUT:

1. Deialdia onestea, Noain Elortzibarko Udalaren Kontu-hartzailetza Alorreko Zerga Ikuskapeneko eta/edo Premiamendu bidezko Diru-bilketako Atalari atxikitako diplomadunaren lanpostua, aldi baterako kontratuarekin eta oposizio-lehiaketa bidez, betetzeko izangaien zerrenda hautaproben bidez eratzeko, merezimenduaren eta gaitasunaren printzipioetan oinarriturik, sortzen diren beharrei erantzutearren.

2. Hautaproben deialdia arautuko duten oinarriak onestea. Ebazpen honen I. eranskinean daude.

3. Ebazpen hau Nafarroako Aldizkari Ofizialean argitaratzeko agindua ematea.

Ebazpen honen kontra, errekurtso hauetako bat aurkez daiteke, hautara:

a) Administrazioarekiko auzi-errekurtsoa, Nafarroako Administrazioarekiko Auzien Jurisdikzioko organo eskudunari zuzendua, bi hilabeteko epean, ebazpen hau jakinarazi eta biharamunetik hasita.

b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, jakinarazten denetik hasita.

c) Berraztertzeko errekurtsoa, ebazpen hau eman duen organoari zuzendua, hilabeteko epean, ebazpena jakinarazi eta biharamunetik hasita.

Noain Elortzibarren, 2018ko otsailaren 28an.–Alkate udalburua.

I. ERANSKINA

Oinarriak

Lehena.–Arau orokorrak.

Deialdia iragartzen da, Noain Elortzibarko Udalaren Kontu-hartzailetza Alorreko Zerga Ikuskapeneko eta/edo Premiamendu bidezko Diru-bilketako Atalari atxikitako diplomadunaren lanpostua, aldi baterako kontratuarekin eta oposizio-lehiaketa bidez, betetzeko izangaien zerrenda hautaproben bidez eratzeko, merezimenduaren eta gaitasunaren printzipioetan oinarriturik, sortzen diren beharrei erantzutearren. Beharrezkoa da oposizio-lehiaketa izatea, kontuan harturik lanpostuan bete beharreko zereginen konplexutasuna, eta ez litzatekeelako prestakuntzarako denborarik izanen presako kontratazioa egin behar izanez gero.

Deialdi honen babesean eratzen den zerrendak bost urteko indarraldia izanen du gehienez, indarra hartzen duen egunetik hasita, edo beste deialdi bat onesten den arte.

1.1. Lanpostuek B mailako ordainsariak izanen dituzte, Ordainsariei buruzko Behin-behineko Erregelamenduan ezarritakoaren arabera (uztailaren 4ko 158/1984 Foru Dekretuaren bidez onetsia), eta Noain Elortzibarko Udalari aplikatu beharreko gainerako xedapenekin bat, ezertan ukatu gabe bete beharreko lanpostuak esleitua duen lanpostuko osagarria.

Bigarrena.–Betebeharrak.

2.1. Parte hartu nahi dutenek, eskabideak aurkezteko epea bukatzen den egunean, baldintza hauek bete beharko dituzte:

a) Espainiako nazionalitatea izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko tratatuen arabera, langileen joan-etorri askea aplikatzen den estaturen batekoa.

Parte har dezakete, orobat, espainiarren eta Europar Batasuneko beste estatuetako herritarren ezkontideek, edo aipatutako nazioarteko itunen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, hogeita bat urtetik beherakoak badira edo, hortik gorakoak izanez gero, haien kontura bizi badira.

b) Hamasei urte beteak izatea eta nahitaezko erretiroa hartzeko gehieneko adina ez gainditzea.

c) Enpresa Zientzietako diplomatu tituluaren edo horren baliokidearen jabe izatea, edo arlo ekonomikoaren, enpresaren, kontabilitatearen edo finantzen graduarena (Gizarte eta Zuzenbide Zientzien Jakintza Arloa); edo Zuzenbideko graduarena; edo Ekonomiako, Enpresen Administrazio eta Zuzendaritzako, Enpresa Zientzietako, edo Zientzia Aktuarial eta Finantzarioetako lizentziaren lehenengo hiru kurtsoak gainditu izana, urriaren 10eko 1272/2003 Errege Dekretuaren lehen xedapen gehigarrian xedatutakoarekin bat, edo, bestela, titulua lortzeko eskubideak ordaindu dituela frogatzen duen gordekina, eskabideak aurkezteko epea bukatzen den egunean.

Titulua atzerrian eskuratu baldin bada, haren homologazioa frogatzen duen ziurtagiriaren jatorrizko agiria edo notario batek edo administrazioak berak konpultsaturiko kopia.

Izangaiek alegatzen badute eskatutako kategorian aritzea ahalbidetzen dieten ikasketa baliokideak dituztela, baliokidetasun hori onartzen duen lege edo erregelamenduzko xedapena aipatu beharko dute edo, bestela, Hezkuntza eta Zientzia Ministerioak emandako ziurtagiria aurkeztu.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez izanik parte hartu nahi dutenek zinpeko aitorpena edo hitzematea aurkeztu beharko dute, adierazteko ez dutela diziplina-zehapenik edo kondena penalik beren estatuko funtzio publikoan sartzea galarazten dienik.

Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoen kasuan, itunaren frogagiria aurkeztu beharko da.

Oinarri honetan ezarritako baldintza guztiak eskaerak aurkezteko epea bukatzen den egunerako bete beharko dira, bai eta hautapen prozedurak eta kontratazioak iraun bitartean mantendu ere. Gerora horietakoren bat ez betetzea nahikoa arrazoi izanen da deirik ez egiteko, harik eta arrazoi hori desagertu arte.

Hirugarrena.–Eskabideak.

3.1. Deialdian parte hartzeko eskabideak Noain Elortzibarko Udaleko Erregistro Orokorrean (Foruen plaza, 3, 31110 Noain) aurkeztu beharko dira, deialdi hau Nafarroako Aldizkari Ofizialean argitaratu eta biharamunetik hasita 30 egun naturaleko epean, azken eguneko 14:00ak arte, edo, bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako gainerako bideak ere erabil daitezke eskabideak aurkezteko. Eskaera posta bulego batean aurkeztuz gero, gutun-azal ireki batean aurkeztuko da, postako langileek data eta zigilua jar diezazkioten eskabideari, ziurtatu aurretik.

Halaber, eskabidea telematika bidez aurkezten ahalko da, Noain Elortzibarko Udalaren Erregistro Orokor Elektronikoaren bidez. Erregistro hori Noaingo Udalaren egoitza elektronikoan dago (www.noain.es). Kasu horretan, parte hartzeko berariazko eskaera eta beharrezkoak diren gainerako agiriak aurkezteko, Erregistro Elektroniko Orokorrean artxiboak eransteko aurreikusita dauden formatuetatik edozein erabil daiteke.

3.2. Eskabideak III. eranskinean argitaratzen den ereduari lotuko zaizkio. Horiek Udaleko bulego orokorretan eskura daitezke, baita Interneten ere, www.noain.es helbidean. Eskabideetan izangaiek adierazi beharko dute eskatutako baldintza guztiak betetzen dituztela.

3.3. Izangaiek honako hau aurkeztu behar dute eskabidearekin batera:

–Nortasun Agiri Nazionalaren kopia.

–Lehiaketaldian baloratzeko alegatutako merezimenduen frogagiriak, jatorrizkoak edo behar bezala konpultsatuak.

–Azterketaren eskubideen tasa 2100 5264 49 2200065040 kontuan ordaindu izanaren ziurtagiria edo, bestela, frogatzea lanik gabe dagoela, prestaziorik kobratu gabe.

Ordaindu beharreko zenbatekoa:

  • 13,27 euro, oro har.

–Doakoa, lanik izan ez eta prestaziorik kobratzen ez dutenentzat.

Azterketarako eskubideen tasa ordaintzen ez bada edo, frogagiria aurkezten ez bada, kasua zein den, izangaia baztertu eginen da.

Arintasuna helburu, kontratua egiteko deitzen zaien pertsonek bakarrik aurkeztu behar dute eskatzen diren titulazio baldintzak eta deialdian eskatzen diren bestelakoak betetzen dituztela frogatzeko dokumentazioa.

3.4. Desgaitasun aitorturen bat duten izangaiek, parte hartzeko eskabidearekin batera, egoera horren frogagiria aurkeztu beharko dute, organo eskudunak emana. Halaber, azterketak egiteko denboraren edo baliabideen egokitzapenak eskatzen ahalko dituzte. Kasu horretan, eskabidean behar den tokian adierazi beharko dute, eta, horrez gainera, aparteko orri batean, nolako desgaitasuna duten eta zer egokitzapen eskatzen duten.

3.5. Eskabideak aurkezteko epea luzaezina da.

Laugarrena.–Izangaien onarpena.

4.1. Behin-behineko zerrendak.

Eskabideak aurkezteko epea amaiturik, Noain Elortzibarko Udaleko alkateak onartu eta baztertuen behin-behineko zerrenda onesten duen ebazpena emanen du, eta aginduko du Noain Elortzibarko Udaleko iragarki oholean eta Udalaren web-orrian (www.noain.es) argitara dadila. Izangai bazterturik ez bada, zuzenean onetsiko dira onartuen behin betiko zerrendak.

Izangai baztertuek, behin-behineko zerrenda argitaratu ondoko 10 egun baliodunen barrenean, erreklamazioak egiten ahalko dituzte eta, okerrik egin baldin badute, horiek zuzendu.

4.2. Behin betiko zerrendak.

Erreklamazioetarako epea bukatutakoan eta haiei erantzun ondotik, alkateak ebazpena emanen du, onartu eta baztertuen behin betiko zerrenda onesteko, eta aginduko du www.noain.es Udalaren web-orrian eta iragarki oholean bakarrik argitaratzeko. Ebazpen horretan berean zehaztuko da probak non, noiz eta zer ordutan hasiko diren.

4.3. Onartuen zerrendan agertzea ez da aski deialdian eskatutako betebeharrak betetzen direla aitortzeko. Izangaiek aurkeztutako dokumentazioa edo Udalak bere eskuetan daukana aztertuta, eskatutako baldintzetako bat betetzen ez dutela ohartuz gero, interesdunek deialdian parte hartzeagatik dituzten eskubide guztiak galduko dituzte.

4.4. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45.b) artikuluan ezarritakoarekin bat.

Bosgarrena.–Hautapen prozesua nola eginen den eta haren balorazioa.

5.1. Lehiaketaldia: epaimahaiak lehiatzaileek alegatutako eta egiaztatutako merezimenduak baloratuko ditu lehiaketaldian, izangaien esperientzian oinarritutako baremo honi jarraikiz:

  • Administrazio publikoetan egindako zerbitzu urte bakoitzeko, tributuen ikuskapenean laguntzeko eginkizunetan edo tributuen premiamendu bidezko diru-bilketa lanetan: 6 puntu, urte bakoitzeko.
  • Urtebete baino gutxiagoko denbora tarteak eta lanaldi partzialeko kontratuak proportzioaren arabera kontatuko dira.
  • Ez da puntuaziorik emanen esperientzia 6 hilabetetik beherakoa denean.
  • Apartatu honen ondorioetarako, administrazio publikoetan egindako zerbitzuen parekoak izanen dira ente publiko edo merkataritza elkarteetan, publikoak zein pribatuak izan, egindako zerbitzuak, baldin eta horiek administrazio publikoei laguntzen badiete tributuen ikuskapen zerbitzuetan eta/edo premiamendu bidezko diru-bilketan, hitzarmen bidez edo laguntza kontratu publikoaren bidez.
  • Izangaiak egindako zerbitzuak lan edo administrazio araubideko kontratuaren bidez egindakoak izanen dira, edozein modalitatetan. Orobat, gutxienez C mailako lanpostu batean egindakoak izanen dira, 251/1993 Legegintzako Foru Dekretuaren 12. artikuluarekin bat, edo gutxienez 3. kotizazio taldearen barnean, Gizarte Segurantzako araubide orokorreko araudiarekin bat.

Aurkezten diren egiaztagiriek baremoaren aplikaziorako beharrezkoa den informazio guztia jaso beharko dute. Justifikatu gabeko merezimenduak ez dira baloratuko.

Izangaiek alegatutako merezimenduen gaineko argibideak eta datu osagarriak eskatzen ahalko ditu kalifikazio epaimahaiak, edozein unetan.

Lehiaketaldiaren balorazioa ez da baztergarria izanen. Gehienez ere 30 puntukoa izanen da.

Merezimenduak baloratzean, deialdia Nafarroako Aldizkari Ofizialean argitaratzen den egunera arte egindakoak baizik ez dira kontuan hartuko. Geroagoko merezimenduak ez dira aintzat hartuko.

Egindako zerbitzuen ziurtagiriak lanean ibili den administrazioan edo lantokian ziurtapenak egiteko ahalmena duen organoak luzatu beharko ditu, eta agiri horietan datu hauek agertu beharko dira nahitaez:

–Zerbitzuak zein lanpostutan eta zein administrazio edo lantokitan egin diren, bai eta haren eginkizunak zein izan diren ere.

–Egindako zerbitzualdia, datatik datara.

–Zerbitzuak lanaldi partzialean eman baldin badira, honako hau erantsi:

  • edo egunean, astean, hilabetean edo urtean egindako orduen kopurua, eta zerbitzuak egin diren urteko lanaldia.
  • edo, bestela, egindako orduek ohiko lanaldiaren aldean zein portzentaje osatzen duten.

Lehiaketaldia bukatu ondoren, epaimahaiak argitara emanen du Noain Elortzibarko Udaleko iragarki oholean eta bere web-orrian (www.noain.es) parte-hartzaile bakoitzak lortutako puntuazioa, eta bost egun balioduneko epea ezarriko du interesdunek erreklamazioak aurkeztu eta merezimenduen balorazioaren gainean eskubideko jotzen duten guztia alega dezaten.

5.2. Proba teoriko-praktikoa.

Proba teoriko-praktikoa: bertan erantzun laburreko galdera batzuk idatziz erantzun beharko dira, II. eranskineko gaiei buruzkoak.

Ariketa hau egiteko izangaiek izanen duten denbora epaimahaiak erabakiko du hasi aurretik, baina ez da 4 ordutik gorakoa izanen.

Ariketaren balorazioak 70 puntu egin ditzake gehienez ere eta bazterturik geldituko dira 45 puntu eskuratzen ez duten izangaiak.

Proba hau egiteko ez da inolako testurik kontsultatu ahalko, ezta kalkulagailurik edo bestelako materialik ere, bolaluma urdina edo beltza ez bada.

5.3. Ariketak plika sistemaren bidez eginen dira.

5.4. Probarako dei bakarra eginen da. Parte-hartzaileek aldean eraman beharko dute nortasun agiri nazionala, pasaportea edo gidabaimena. Agirien bidez nor diren frogatzen ez dutenak edo agertzen ez direnak baztertuta geldituko dira.

5.5. Hautaproba egiteko, desgaitasun aitorturen bat dutenentzat bidezkoak diren denbora eta baliabide egokitzapenak jarriko dira, eskabidean azaldutakoaren arabera.

Seigarrena.–Epaimahaia.

6.1. Kalifikazio epaimahaia honako hauek osatuko dute:

Mahaiburua: Alberto Ilundáin Avellaneda, Noain-Elortzibarko Udaleko alkatea.

Ordezko mahaiburua: Amara Galafate Pérez, Noain Elortzibarko Udaleko alkateordea.

1. mahaikidea: Uxue Cilveti Zazpe, Noain Elortzibarko Udaleko administrari-ofiziala.

1. mahaikidearen ordezkoa: Miguel Angel Núñez Iriarte, Noaingo Udaleko musika eskolako udal patronatuko administrari-ofiziala.

2. mahaikidea: Raquel Asiáin Valencia, Noain Elortzibarko Udaleko idazkaria.

2. mahaikidearen ordezkoa: Juan Carlos Zapata Santos, Noain Elortzibarko Udaleko kudeatzailea.

3. mahaikidea: María Angeles Cuesta Márquez. Noain Elortzibarko Udaleko ordezkari sindikala.

3. mahaikidearen ordezkoa: Nieves Beloqui Ros. Noain Elortzibarko Udaleko ordezkari sindikala.

Mahaikide-idazkaria: Carlos Ignacio Revilla Pascual. Noain Elortzibarko Udaleko kontu-hartzailea.

Ordezko mahaikide-idazkaria: Encarnación Santos Martos. Noain-Elortzibarko Udaleko administrari-ofiziala.

6.2. Epaimahaiko kideek parte hartzeari uko egin beharko diote Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan abstentziorako aurreikusiak dauden arrazoiak suertatzen direnean.

Bestetik, izangaiek mahaikideak errefusatzen ahalko dituzte, Sektore Publikoaren Araubide Juridikoari buruzko urriaren 1eko 40/2015 Legearen 24. artikuluan aurreikusitako egoeraren bat izaten denean.

Epaimahaia aldatzen bada, epaimahaikideek beraiek uko egiteko edo haiek errefusatzeko legez ezarritako kasuak direla-eta, aditzera emanen da, izangai onartu eta baztertuen zerrendekin batera.

6.3. Hautaprobak hasi baino lehen eratuko da epaimahaia.

Epaimahaia ezin izanen da eratu, ezta jardun ere, kideen gehiengo osoa gutxienez bildu gabe. Halaber, epaimahaiaren eraketak eta jardunak balio izateko, epaimahaiburuak eta idazkariak edo haien ordezkoek bertan egon beharko dute.

6.4. Epaimahaiak gehiengoz ebatziko ditu deialdietako oinarrien interpretazio eta aplikazioaren inguruan sortzen diren arazoak.

6.5. Epaimahaiak aholkulari espezialistak hartzen ahalko ditu probarako, eta horiek beren espezialitate teknikoetan baizik ez dira ariko, eta haietan bakarrik emanen diete laguntza epaimahaikoei.

Zazpigarrena.–Emaitzak.

7.1. Parte-hartzaileen artean berdinketarik gertatuz gero, epaimahaiak ebatziko du, kontuan izanik zein izan den probako puntuaziorik handiena. Arestian ezarritako irizpideak aplikatuta ere berdinketak jarraitzen badu, epaimahaiak eginen duen berariazko zozketa bakar baten bidez ebatziko da. Zozketaren emaitzak Noain Elortzibarko Udalaren web-orrian (deialdiaren aipuan) eta Udaleko iragarki oholean argitaratuko dira.

7.2. Behin proben kalifikazioa bukaturik, epaimahaiak Noain Elortzibarko Udalaren iragarki oholean eta web-orrian (www.noain.es) jarriko du probak gainditzen dituzten izangaien zerrenda, guztira lortzen duten puntuazioaren ordenaren arabera, lehiaketaldia kontuan hartuta.

Proban bazterturik gelditu ez direnak sartuko dira aldi baterako kontratatzeko izangaien zerrendetan.

7.3. Aurreko 7.2 apartatuan adierazitako emaitzen argitalpenaren ondotik, izangaiek 5 egun naturaleko epea izanen dute bidezko deritzeten alegazioak aurkezteko, bai proban lortutako puntuazioari buruz bai lehiaketaldian lortutakoari buruz.

7.4. Epaimahaiak alegazioak ebatzi ondotik, probak gainditu dituztenen zerrenda, puntuazio hurrenkeraren araberakoa, alkate udalburuari bidaliko zaio eta, horrekin batera, hautapen prozesuaren espediente osoa, onets dadin.

Zortzigarrena.–Aldi baterako kontrataziorako dei egitea.

8.1. Gainditu duten izangaiei Noain Elortzibarko Udalean gertatzen diren beharren arabera eginen zaie dei, deialdi honetan ezarritakoari eta aplikatzekoak diren gainerako arauei jarraituz.

8.2. Izangaiei dei egiterakoan, kontuan hartuko da Nafarroako Administrazio Publikoen zerbitzuko Langileen Estatutua, abuztuaren 30eko 251/1993 Legegintzako Foru Dekretuak onetsia, desgaitasuna duten pertsonek enplegu publikoa lortzeari dagokionez. Behar diren zereginak eta eginkizunak betetzeko bateragarritasuna frogatzen duten agiriak Noain Elortzibarko Udalak egiaztatuko ditu.

8.3. Errazago aurkitu ahal izateko, izangaiek harremanetarako telefono bat bederen eman beharko dute (harremanetarako beste telefono batzuk ere eman ditzakete), baita helbide elektroniko bat ere. Informazio hori etengabe eguneratua eduki behar dute.

8.4. Lanpostu baterako aldi baterako kontratazioa egin behar denean, une horretan zerrendako lehenbiziko lekuan dagoen izangaiari deituko zaio. Izangai bakoitza lokalizatzeko bi saiakera eginen dira telefonoz bi lanegun jarraituetan, eta dei horren frogak utziko dira, alegia, eguna, ordua eta inguruabarrak. Telefonozko harremana izateko lehenbiziko saiakerarekin batera, posta elektroniko bat bidaliko da izangaiak emandako helbide elektronikora. Mezu elektroniko hori bidaltzen denetik egun bateko epean erantzunik lortzen ez bada eta, telefonoz hitz egiterik ere ez bada, zerrendako hurrengoari deituko zaio.

Izangai batekin harremanetan jarri, eta kontrataziorako eskaintza bat eginik, izangaiak erantzuten ez badu edo uko egiten badio, zerrendatik kenduko da, salbu frogatzen badu arrazoi justifikatuengatik uko egiteko kasu batean dagoela, 8.5 apartatuan xedatutakoarekin bat.

Izendapena eginda, toki entitate eskatzaileak aldi baterako kontratatuko du proposaturiko izangaia.

Deia eginda kontratu bat onartzen dutenei ez zaie zerrenda bereko beste lanposturik eskainiko kontratua indarrean den bitartean.

8.5. Honako hauek onartuko dira eskainitako lanpostua kontratatzeari uko egiteko arrazoi justifikatu gisa eta, beraz, ez dute izangaiaren lehentasun ordena aldatuko aldi baterako kontratazioko izangaien zerrendetan:

a) Aldi baterako ezintasuna.

b) Amatasun edo aitatasun baimena.

c) Hiru urtez azpiko haurra zaintzea edo hiru urtez azpiko adingabea harrera iraunkorrean edo adoptatua izatea.

d) Zaindu behar badu bigarren gradura arteko odol edo ezkontza bidezko ahaide bat, adina, istripua edo eritasuna dela-kausa bere burua ezin gobernatu duena.

e) Norberaren ezkontza edo Bikote Egonkorrentzako Berdintasun Juridikoari buruzko uztailaren 3ko 6/2000 Legearen arabera parekatutako egoera, baldin eskainitako kontratazio administratiboaren hasiera eguna hura eratu ondoko edo aurreko hamabost egun naturalean bada.

f) Kontratazioren bat indarrean izatea, administrazio araubidekoa edo lanekoa izan.

g) Desgaitasunen bat behar bezala onartua izatea eta desgaitasunaren ezaugarriak bateraezinak izatea eskaintzen zaion lanpostuaren ezaugarri bereziekin.

Aipatu egoeretako batean dauden izangaiek 7 egun naturaleko epea izanen dute, errefusatu duten lanpostua eskaintzen zaien egunetik, agiri bidez eta fede emanez justifikatzeko. Hala bada, zerrendan zuten toki berean jarraituko dute.

Kontratazio eskaintzari uko egiteko arrazoi justifikatua frogatzen duen dokumentazioa epe barrenean aurkezten ez bada, izangaia zerrendako azkeneko tokira igaroko da.

Uko egiteko arrazoi justifikatua dagoenean, idatziz adierazi beharko dute noiz dauden berriz lanerako prest, uko egitea ekarri zuen egoera bukatzen den egunetik hasita. Jakinarazpen hori egiten ez den bitartean, ez zaie lanposturik eskainiko.

8.6. Deia eragiten duen zerrendatik baztertuko dira ondoko egoera hauetako batean dauden izangaiak:

a) Kontratazio eskaintza onartuta dela, kontratua ez sinatzea, izangaiari egozten ahal zaion arrazoiagatik.

b) Sinatutako kontratuari uko egitea, salbu horren arrazoia baldin bada beste kontratu bat sinatu dela beste entitate publiko edo pribatu batekin. Agiri bidez eta modu fede-emailean frogatu beharko da hori, ukoaren formalizaziotik 7 egun naturaleko epean. Kasu honetan, izangaia zerrendako azkeneko tokira igaroko da.

c) Lanpostua bertan behera uztea.

d) Probaldia ez gainditzea, kontratuan aurreikusi den kasuetan.

e) Urtebeteko epean izangaiarekin harremanetan jartzea ezinezkoa izatea, hark emandako telefonoaren edo helbide elektronikoaren bidez kontratatzeko deiak behin eta berriz eginda ere.

8.7. Deia jasotzen dutenek deialdian titulazioari eta bestelakoei buruz eskatutako betebeharrak betetzen dituztela frogatzeko dokumentazioa aurkeztu beharko dute.

8.8. Eskatutako baldintzak betetzen ez dituzten pertsonak hautapen prozesutik baztertuko dira, Alkatetzaren ebazpen baten bidez, eta deialdi honetan parte hartzeagatik izan ditzaketen eskubide guztiak galduko dituzte.

Bederatzigarrena.–Errekurtsoak.

Deialdi honen aurka, nahiz bere oinarrien eta aplikazio egintzen aurka, errekurtso hauetako bat aurkez daiteke, aukeran:

a) Administrazioarekiko auzi-errekurtsoa, Nafarroako Justizia Auzitegi Nagusiko arlo bereko salari zuzendua, erabaki hau edo errekurritzen den egintza argitaratu edo jakinarazi eta biharamunetik bi hilabeteko epean, organo egileari errekurritzeko asmoaren berri emanik; edo, bestela,

b) Gora jotzeko errekurtsoa, zuzenean Nafarroako Administrazio Auzitegiari zuzendua, erabaki hau argitaratu edo errekurritzen den egintza jakinarazi eta biharamunetik hasita hilabeteko epearen barnean.

c) Berraztertzeko errekurtsoa, egintza eman duen erakundean berean, hilabeteko epean, jakinarazi eta biharamunetik hasita.

Epaimahaiaren egintzen aurka gora jotzeko errekurtsoa aurkez daiteke, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik hasita.

II. ERANSKINA

Gai-zerrenda

1. gaia.–2/1995 Foru Legea, martxoaren 10ekoa, Nafarroako Toki Ogasunei buruzkoa.

2. gaia.–Nafarroako Tributuei buruzko abenduaren 14ko 13/2000 Foru Lege Orokorra.

3. gaia.–Ekainaren 11ko 152/2001 Foru Dekretua, Nafarroako Foru Komunitateko Administrazioko Zerga Ikuskaritzaren Erregelamendua onesten duena.

4. gaia.–Uztailaren 2ko 177/2001 Foru Dekretua, Nafarroako Foru Komunitateko Diru-bilketaren Erregelamendua onesten duena.

5. gaia.–Tributuei buruzko Foru Lege orokorraren xedapenak Nafarroako Foru Komunitateko Administrazioaren zerga arloko arau-hauste eta zehapenen arloan garatzeko ekainaren 11ko 153/2001 Foru Dekretua.

Oharra: zein egunetan argitaratzen den deialdia Nafarroako Aldizkari Ofizialean, egun horretan indarra duen araudiaren arabera eskatuko dira gai guztiak.

III. ERANSKINA

Eskabide eredua (PDFa).

Iragarkiaren kodea: L1802911