Iragarkia
112. ALDIZKARIA - 2017ko ekainaren 12a
2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
NOAIN (ELORTZIBAR)
Noain Elortzibarko Udaleko alkate udalburuaren 2017ko maiatzaren 31ko Ebazpena, deialdia onesten duena, Noaingo San Migel ikastetxe publikoko eskolazain izateko lanpostuan aldi baterako kontratuarekin aritzeko izangaien zerrenda bat hautaproben bidez eratzeko, sortzen diren beharrei erantzutearren
Udaleko kudeatzaileak, Noaingo San Migel ikastetxe publikoko eskolazaintzak duen langileen beharra aztertu ondotik, beharrezkoa denez izangaien zerrenda bat osatzea, Noaingo San Migel ikastetxe publikoko eskolazain izateko lanpostuan aldi baterako kontratuarekin aritzeko, sortzen diren beharrei erantzutearren.
Aplikatzekoak diren xedapenek legez ematen dizkidaten eskudantziak erabiliz eta ekainaren 5eko 113/1985 Foru Dekretua kontuan hartuz.
EBATZI DUT:
1.–Deialdia onestea, Noaingo San Migel ikastetxe publikoko eskolazain izateko lanpostuan aldi baterako kontratuarekin aritzeko izangaien zerrenda bat hautaproben bidez eratzeko, sortzen diren beharrei erantzutearren.
2.–Hautapen proben deialdia arautuko duten oinarriak onestea. Ebazpen honen I. eranskinean daude.
3.–Ebazpen hau Nafarroako Aldizkari Ofizialean argitara dadila agintzea.
Ebazpen honen kontra, errekurtso hauetako bat aurkez daiteke, hautara:
a) Administrazioarekiko auzi-errekurtsoa, Nafarroako Administrazioarekiko Auzien Jurisdikzioko organo eskudunari zuzendua, bi hilabeteko epean, ebazpen hau jakinarazi eta biharamunetik hasita.
b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, jakinarazten denetik hasita.
c) Berraztertzeko errekurtsoa, egintzaren organo egileari zuzendua, hilabeteko epean, ebazpen hau jakinarazi eta biharamunetik hasita.
Noain Elortzibarren, 2017ko maiatzaren 31n.–Alkate udalburua, sinadura ulertezina.
I. ERANSKINA
Oinarriak
Lehena.–Arau orokorrak.
1.1. Deialdia egin da, Noaingo San Migel ikastetxe publikoko eskolazain izateko lanpostuan aldi baterako kontratuarekin aritzeko izangaien zerrenda bat hautaproben bidez eratzeko, sortzen diren beharrei aldi batez erantzuteko.
Deialdi honen babesean eratzen den zerrendak bost urteko indarraldia izanen du gehienez, indarra hartzen duen egunetik hasita, edo beste deialdi bat onesten den arte.
Izangaien zerrenda honek indarrik eta ondoriorik gabe uzten du izangaien beste edozein zerrenda, eskolazain izateko lanposturako aldi baterako kontrataziorako.
1.2. Lanpostuek D mailako ordainsariak izanen dituzte, bat etorririk uztailaren 4ko 158/1984 Foru Dekretuaren bidez onetsitako Ordainsariei buruzko Behin-behineko Erregelamenduan xedatuarekin eta Noain Elortzibarko Udalari aplikatzen ahal zaizkion gainerako xedapenekin, maila horretako eginkizunak baititu, eta plantilla organikoan ezarritako ordainsari osagarriak ere izanen ditu.
1.3. Lanaldiaren araubidea eta ordutegia Noain Elortzibarko Udalak lanpostu horretarako ezarritakoak izanen dira, zerbitzuaren beharretara egokituko dira beti, eta organo eskudunak edozein unetan aldatzen ahalko ditu.
Bigarrena.–Eginkizunak. Bete beharreko eginkizunak jarraian aipatzen dira, aipamen hutsez eta bestelakoak baztertu gabe.
–Eskolazaintzari dagozkion egitekoak beteko ditu, Noaingo San Migel ikastetxe publikoa irekita egoten den orduetan.
–Noaingo San Migel ikastetxe publikoaren eraikina, esparrua, patioa eta eranskinak zaintzea.
–Ikastetxeko berogailua piztea eta haren mantentze-lanak egitea.
–Elektrizitate, iturgintza, zurgintza, igeltserotza eta pinturari dagozkion mantentze-lanak egitea, eta zentroan egin beharreko konponketa txikiak ere bai. Konponketak edo mantentze-lanak espezialitate zehatz batekoak badira, matxuren berri eman beharko da eta konponketak lehenbailehen eta ongi egiten diren kontrolatu.
–Mantentze eta konponketa lan bereziak egiten dituzten gremioetako langileei kasu egin eta laguntzea (udaleko langileak edo kanpokoak izan).
–Lokalen garbiketari kasu egitea, egoera onean egon daitezen beti; horretarako, beharrezkoak diren garbiketa puntualak eginen ditu eta esleipena hartua duen enpresak egiten dituen garbiketak kontratuaren araberakoak diren kontrolatuko, eta, akatsen bat edo gorabeheraren bat ikusiz gero, horren berri emanen die zentroko Zuzendaritzari eta Noain Elortzibarko Udalari.
–Botika kutxaz eta hura ongi hornitua edukitzeaz arduratuko da, bai eta instalazioak erabiltzen dituzten pertsonek behar duten arretan laguntzeaz ere.
–Zentroko Zuzendaritzak eta, hala egokitzen denean, Noain Elortzibarko Udalak eskatutako fotokopiak eta azaleztatzeak egitea.
–Ikastetxe publikoak ekintzak eta jarduerak egiten dituenean, lokaletan egon beharko du, ekintza eta jarduera horiek egiteko beharrezkoa den laguntza emateko.
–Bere ardura izanen da zentroa ireki eta ixtea, bertako Zuzendaritzak eta, hala egokitzen denean, Noain Elortzibarko Udalak ematen duen ordutegiaren arabera.
–Eskolaldia amaitutakoan, gela, zerbitzu eta bulego guztietatik pasatu beharko du, zaintza zerbitzua egiteko, eta dena ongi dagoela egiaztatu beharko du.
–Gela guztien giltzak gordeko ditu, eta giltza horiek langile baimenduen eskura egonen dira.
–Zentrora edo bertako Zuzendaritzara igortzen diren gutunak, abisuak etab. eraman, bildu eta entregatu beharko ditu, eta zentrora iristen diren salgaiak eta mezularitza bidezko gauzak kontrolatu, jaso eta entregatu.
–Gizalegezkoak ez diren jokabideen berri eman beharko dio zentroko Zuzendaritzari.
–Eskolako ekitaldi eta festak egiteko behar den laguntza emanen dio Zuzendaritzari, eta ikastetxearen funtzionamendurako mesedegarria den orotan lagunduko du.
–Udalak eta zentroko Zuzendaritzak uneren batean batera ezartzen dituzten eginkizun guztiak, betiere eskolazain lanpostuari dagozkionak eta bere mailakoak direnak.
–Noain Elortzibarko Udalak lanpostu horri loturik esleitzen ahal dizkion eginkizunak.
Hirugarrena.–Betebeharrak.
3.1. Parte hartu nahi dutenek, eskabideak aurkezteko epea bukatzen den egunean, baldintza hauek bete beharko dituzte:
a) Espainiako nazionalitatea izatea edo Europar Batasuneko estaturen batekoa edo, Europar Batasunak izenpetu eta Espainiako estatuak berretsitako nazioarteko itunen arabera, langileen joan-etorri askea aplikatzen den estaturen batekoa.
Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak baldin haien kontura bizi badira.
b) Hamasei urte beteak izatea eta nahitaezko erretiroa hartzeko gehieneko adina ez gainditzea.
c) Eskaerak aurkezteko epea bukatzen den egunean, DBHko graduatuaren titulua, Eskola graduatuen titulua, erdi mailako Lanbide Heziketakoa edo horien baliokide bat izatea, edo titulu hori eskuratzeko eskubideak ordaindu izanaren gordekina.
Atzerrian lortutako tituluak badira, homologazioaren egiaztagiria eduki beharko da.
d) Bete behar dituen eginkizunetan aritzeko adinako gaitasun fisiko eta psikikoa izatea.
e) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.
Espainiako nazionalitatea ez izanik parte hartu nahi dutenek zinpeko aitorpena edo hitzematea aurkeztu beharko dute, adierazteko ez dutela diziplina-zehapenik edo kondena penalik beren estatuko funtzio publikoan sartzea galarazten dienik.
Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoen kasuan, itunaren frogagiria aurkeztu beharko da.
f) B mailako gidabaimen indarduna izatea.
g) Aurrekari penalik ez izatea.
Oinarri honetan ezarritako baldintza guztiak eskaerak aurkezteko epea bukatzen den egunerako bete beharko dira, bai eta hautapen prozedurak eta kontratazioak iraun bitartean mantendu ere. Gerora horietakoren bat ez betetzea nahikoa arrazoi izanen da deirik ez egiteko, harik eta arrazoi hori desagertu arte.
Laugarrena.–Eskabideak.
4.1. Deialdian parte hartzeko eskabideak Noain Elortzibarko Udaleko Erregistro Orokorrean (Foruen plaza, 3, 31110 Noain) aurkeztu beharko dira, deialdi hau Nafarroako Aldizkari Ofizialean argitaratu eta biharamunetik hasita 15 egun naturaleko epean, azken eguneko 14:00ak arte, edo, bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako gainerako bideak ere erabil daitezke eskabideak aurkezteko. Eskabidea posta bulego batean aurkeztuz gero, gutun-azal irekian aurkeztuko da, postako langileek data eta zigilua jar ditzaten, ziurtatu aurretik.
Halaber, eskabidea telematika bidez aurkezten ahalko da, Noain Elortzibarko Udalaren Erregistro Orokor Elektronikoaren bidez. Erregistro hori Noaingo Udalaren egoitza elektronikoan dago (www.noain.es/eu/). Kasu horretan, parte hartzeko berariazko eskabidea eta beharrezkoak diren gainerako agiriak aurkezteko, Erregistro Elektroniko Orokorrean artxiboak eransteko aurreikusita dauden formatuetatik edozein erabil daiteke.
4.2. Eskabideak II. eranskinean argitaratzen den ereduari lotuko zaizkio. Horiek Udaleko bulego orokorretan eskura daitezke, baita Interneten ere, www.noain.es/eu/ helbidean. Eskabideetan izangaiek adierazi beharko dute eskatutako baldintza guztiak betetzen dituztela.
4.3. Izangaiek honako hau aurkeztu behar dute eskabidearekin batera:
–Nortasun Agiri Nazionalaren kopia.
–Azterketaren eskubideen tasa ES 48 2100 5264 49 2200065040 kontuan ordaindu izanaren ziurtagiria edo, bestela, frogatzea lanik gabe dagoela, prestaziorik kobratu gabe.
Ordaindu beharreko zenbatekoa 13,27 eurokoa izanen da oro har. Dohainik izanen da baldin pertsona lanik gabe badago eta inolako prestaziorik jasotzen ez badu.
Azterketarako eskubideen tasa ordaintzen ez bada edo, frogagiria aurkezten ez bada, kasua zein den, izangaia baztertu eginen da.
Kontratua egiteko deitzen zaien pertsonek bakarrik aurkeztu behar dute eskatzen diren titulazio baldintzak eta deialdian eskatzen diren bestelakoak betetzen dituztela frogatzeko dokumentazioa.
4.4. Desgaitasun aitorturen bat duten izangaiek, parte hartzeko eskabidearekin batera, egoera horren frogagiria aurkeztu beharko dute, organo eskudunak emana. Halaber, azterketak egiteko denboraren edo baliabideen egokitzapenak eskatzen ahalko dituzte. Kasu horretan, eskabidean behar den tokian adierazi beharko dute, eta, horrez gainera, aparteko orri batean, nolako desgaitasuna duten eta zer egokitzapen eskatzen duten.
4.5. Eskabideak aurkezteko epea luzaezina da.
Bosgarrena.–Izangaiak onartzea.
5.1. Behin-behineko zerrendak.
Eskabideak aurkezteko epea amaiturik, Noain Elortzibarko Udaleko alkateak onartu eta baztertuen behin-behineko zerrenda onesten duen ebazpena emanen du, eta aginduko du Noain Elortzibarko Udaleko iragarki oholean eta Udalaren webgunean (www.noain.es/eu/) argitara dadila. Izangai bazterturik ez bada, zuzenean onetsiko dira onartuen behin betiko zerrendak.
Izangai baztertuek, behin-behineko zerrenda argitaratu ondoko 5 egun baliodunen barrenean, erreklamazioak egiten ahalko dituzte eta, okerrik egin baldin badute, horiek zuzendu.
5.2. Behin betiko zerrendak.
Erreklamazioetarako epea bukatutakoan eta haiei erantzun ondotik, alkateak ebazpena emanen du, onartu eta baztertuen behin betiko zerrenda onesteko, eta aginduko du www.noain.es/eu/ Udalaren webgunean eta iragarki oholean bakarrik argitaratzeko. Ebazpen horretan berean zehaztuko da lehen proba non, noiz eta zer ordutan hasiko den.
5.3. Onartuen zerrendan agertzea ez da aski deialdian eskatutako betebeharrak betetzen direla aitortzeko. Izangaiek aurkeztutako dokumentazioa edo Udalak bere eskuetan daukana aztertuta, eskatutako baldintzetako bat betetzen ez dutela ohartuz gero, interesdunek deialdian parte hartzeagatik dituzten eskubide guztiak galduko dituzte.
5.4. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45.b) artikuluan ezarritakoarekin bat.
Seigarrena.–Proben nondik-norakoak.
Hautapen prozesua bi proben bidez eginen da. Bata teorikoa izanen da, eta bestea psikoteknikoa, eskakizunei zenbateraino egokitzen zaizkien neurtzekoa.
6.1. Proba teorikoa.
Proba teorikoan, 50 galdera erantzun beharko dira 45 minutuan gehienez. Galderak ondoko hauei buruz izanen dira: arrazoibide matematikoa, hitzezko arrazoibidea, ortografia eta lanpostuarekin lotutako zenbait gorabehera. Galderetarako hiru erantzun emanen dira aukeran, baina bat bakarra izanen da baliozkoa.
Aldi hau gehienez ere 50 punturekin baloratuko da, eta okerreko erantzunei 0,50 puntuko zigorra ezarriko zaie. Proba gainditzeko, ezarritako gehieneko puntuazioaren %50 lortu behar da gutxienez (25 puntu). 25 puntu eskuratu ez dutenak bazterturik geldituko dira.
Proba hau egiteko ez da inolako testurik erabiltzen ahalko, ezta kalkulagailurik edo bestelako materialik ere, bolaluma urdina edo beltza ez bada.
Ariketa plika sistemaren bidez eginen da, eta baztertzailea izanen da.
6.2. Profilari egokitzeko proba psikoteknikoa.
Eskakizunei zenbateraino egokitzen zaizkien neurtzeko ariketa psikoteknikoa izanen da proba, Nafarroako Administrazio Publikoaren Institutuko Psikologia Aplikatuaren Ataleko talde profesionalak prestatua; talde hori deialdi honetako gaiari buruzko aholkulari espezialista bezala agertuko da. Izangaiek lanpostuko eginkizunak betetzeko dituzten gaitasunak baloratuko dira.
Proba honek gehienez ere 50 puntu izanen ditu. Proba gainditzeko, ezarritako gehieneko puntuazioaren %50 lortu behar da gutxienez (25 puntu). 25 puntu eskuratu ez dutenak bazterturik geldituko dira.
6.3. Dei bakarra eginen da. Hartara nortasun agiri nazionala, pasaportea, gidabaimena edo nortasuna frogatzeko epaimahaiak nahikotzat jotzen duen beste agiriren bat aldean dutela agertu beharko dute parte-hartzaileek. Ezarritako moduan nor diren frogatzen ez dutenak edo agertzen ez direnak baztertuta geldituko dira.
6.4. Minusbaliotasun frogatua dutenentzat (organo eskudunaren ziurtagiri bidez), ariketa egiteko denborak eta baliabideak egokituko dira, baldin eta eskabidean horixe eskatu badute.
6.5. Ariketak kalifikatutakoan, epaimahaiak izangaien eta beren kalifikazioen zerrenda jarriko du Noain Elortzibarko Udaleko iragarki oholean eta Udalaren webgunean (www.noain.es/eu/).
Zazpigarrena.–Epaimahaia.
7.1. Kalifikazio epaimahaia honako hauek osatuko dute:
Mahaiburua: Alberto Ilundáin Avellaneda, Noain Elortzibarko Udaleko alkate udalburua.
Ordezkoa: María Cecilia Antolín Astigarraga, Noain Elortzibarko Udaleko Hezkuntzako zinegotzi ordezkaria.
Lehen mahaikidea: Manuel Sánchez Sánchez, Noaingo San Migel ikastetxe publikoko eskolazaina.
Ordezkoa: Miguel Galafete Rodríguez, Noain Elortzibarko Udaleko zerbitzu anitzetako enplegatua.
Bigarren mahaikidea: Juan Carlos Turumbay Senosiáin, Noaingo San Migel ikastetxe publikoko zuzendaria.
Ordezkoa: Maite Asiáin Esparza, Noaingo San Migel ikastetxe publikoko zuzendaritza batzordeko idazkaria.
Hirugarren mahaikidea: Marian Cuesta Márquez, Noain Elortzibarko Udaleko langileen ordezkaria.
Ordezkoa: Fermín Etayo Soteras, Noain Elortzibarko Udaleko langileen ordezkaria.
Idazkaria: Juan Carlos Zapata Santos, Noain Elortzibarko Udaleko kudeatzailea.
Ordezkoa: Isabel García Layana, Noain Elortzibarko Udaleko idazkaria.
7.2. Epaimahaiko kideek parte hartzeari uko egin beharko diote Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan abstentziorako aurreikusiak dauden arrazoiak suertatzen direnean.
Bestetik, izangaiek mahaikideak errefusatzen ahalko dituzte, Sektore Publikoaren Araubide Juridikoari buruzko urriaren 1eko 40/2015 Legearen 24. artikuluan aurreikusitako egoeraren bat izaten denean.
Epaimahaia aldatzen bada, mahaikideek beraiek uko egiteko edo haiek errefusatzeko legez ezarritako kasuak direla-eta, aditzera emanen da, izangai onartu eta baztertuen zerrendekin batera.
7.3. Hautaprobak hasi baino lehen eratu beharko da epaimahaia.
Epaimahaia ezin izanen da eratu, ezta jardun ere, gutxienez ere kideen gehiengo osoa bertan ez bada. Halaber, epaimahaiaren eraketak eta jardunak balio izateko, mahaiburuak eta idazkariak edo haien ordezkoek bertan egon beharko dute.
7.4. Epaimahaiak gehiengoz ebatziko ditu deialdiaren oinarriak interpretatu eta aplikatzeko moduari buruz sor daitezkeen gorabehera guztiak.
7.5. Epaimahaiak aholkulari espezialistak hartzen ahalko ditu probarako, eta horiek beren espezialitate teknikoetan baizik ez dira ariko, eta haietan bakarrik emanen diete laguntza epaimahaikoei.
Zortzigarrena.–Emaitzak.
8.1. Parte-hartzaileen artean berdinketarik gertatuz gero, epaimahaiak ebatziko du, kontuan izanik zein izan den lehen probako notarik altuena. Arestian ezarritako irizpideak aplikatuta ere berdinketak jarraitzen badu, epaimahaiak eginen duen berariazko zozketa bakar baten bidez ebatziko da. Zozketaren emaitzak Noain Elortzibarko Udalaren webgunean (deialdiaren aipuan) eta Udaleko iragarki oholean argitaratuko dira.
8.2. Behin lehen probaren kalifikazioa bukaturik, epaimahaiak Noain Elortzibarko Udalaren iragarki oholean eta webgunean (www.noain.es/eu/) jarriko du proba gainditu duten pliken zerrenda, lortutako puntuazio ordenaren arabera, zehaztuz plikak irekitzeko data, tokia eta ordua. Gero, epaimahaiak Noain Elortzibarko Udalaren iragarki oholean eta webgunean (www.noain.es/eu/) jarriko du proba gainditzen duten izangaien zerrenda, lortzen duten puntuazioaren ordenaren arabera. Izangaiek erreklamazioak jar ditzakete gainditu dutenen behin-behineko zerrenda hau argitaratu eta hurrengo 5 egun balioduneko epean. Erreklamazioak ebatzirik, epaimahaiak Noain Elortzibarko Udalaren iragarki oholean eta webgunean (www.noain.es/eu/) jarriko du lehen proba gainditzen duten izangaien behin betiko zerrenda, eta zerrenda berean bigarren probaren data, tokia eta ordua zehaztuko ditu.
8.3. Behin bigarren probaren kalifikazioa bukaturik, epaimahaiak Noaingo (Elortzibar) Udalaren iragarki oholean eta webgunean (www.noain.es/eu/) jarriko du bi probak gainditzen dituzten izangaien zerrenda, guztira lortzen duten puntuazioaren ordenaren arabera.
Bi probak gainditu dituzten izangaiak aldi baterako kontratatzeko izangaien zerrendetan sartuko dira.
8.4. Probak gainditu dituztenen zerrenda, puntuazio hurrenkeraren araberakoa, alkate udalburuari bidaliko zaio eta, horrekin batera, hautapen prozesuaren espediente osoa, onets dadin.
Bederatzigarrena.–Aldi baterako kontrataziorako dei egitea.
9.1. Gainditu duten izangaiei Noain Elortzibarko Udalean gertatzen diren beharren arabera eginen zaie dei, deialdi honetan ezarritakoari eta aplikatzekoak diren gainerako arauei jarraituz.
9.2. Izangaiei dei egiterakoan, kontuan hartuko da Nafarroako Administrazio Publikoen zerbitzuko Langileen Estatutua, abuztuaren 30eko 251/1993 Legegintzako Foru Dekretuak onetsia, desgaitasuna duten pertsonek enplegu publikoa lortzeari dagokionez. Behar diren zereginak eta eginkizunak betetzeko bateragarritasuna frogatzen duten agiriak Noain Elortzibarko Udalak egiaztatuko ditu.
9.3. Errazago aurkitu ahal izateko, izangaiek harremanetarako telefono bat bederen eman beharko dute (harremanetarako beste telefono batzuk ere eman ditzakete), baita helbide elektroniko bat ere. Informazio hori etengabe eguneratua eduki behar dute.
9.4. Lanpostu baterako aldi baterako kontratazioa egin behar denean, une horretan zerrendako lehenbiziko lekuan dagoen izangaiari deituko zaio. Izangai bakoitza lokalizatzeko bi saiakera eginen dira telefonoz bi lanegun jarraituetan, eta dei horren frogak utziko dira, alegia, eguna, ordua eta inguruabarrak. Telefonozko harremana izateko lehenbiziko saiakerarekin batera, posta elektroniko bat bidaliko da izangaiak emandako helbide elektronikora. Mezu elektroniko hori egiten denetik egun bateko epean erantzunik lortzen ez bada, eta telefonoz hitz egiterik ere ez bada, zerrendako hurrengoari deituko zaio.
Izangai batekin harremanetan jarri, eta kontrataziorako eskaintza bat eginik, izangaiak erantzuten ez badu edo uko egiten badio, zerrendako azkeneko postura igaroko da, salbu frogatzen badu arrazoi justifikatuengatik uko egiteko kasu batean dagoela, 9.5 atalean xedatutakoarekin bat.
Izangai batekin harremanetan jartzerik ez bada, zerrendan duen lehentasunari eutsiko dio eta zerrendan hurrengoa denari deituko zaio, harik eta eskaintzen den lanpostua bete arte.
Izendapena eginda, eskaera egin duen toki entitateak aldi baterako kontratatuko du proposaturiko izangaia.
Deia eginda kontratu bat onartzen dutenei ez zaie zerrenda bereko beste lanposturik eskainiko kontratua indarrean den bitartean.
9.5. Honako hauek onartuko dira eskainitako lanpostua kontratatzeari uko egiteko arrazoi justifikatu gisa eta, beraz, ez dute izangaiaren lehentasun ordena aldatuko aldi baterako kontratazioko izangaien zerrendetan:
a) Aldi baterako ezintasuna.
b) Amatasun edo aitatasun baimena.
c) Hiru urtez azpiko haurra zaintzea edo hiru urtez azpiko adingabea harrera iraunkorrean edo adoptatua izatea.
d) Zaindu behar badu bigarren gradura arteko odol edo ezkontza bidezko ahaide bat, adina, istripua edo eritasuna dela-kausa bere burua ezin gobernatu duena.
e) Norberaren ezkontza edo Bikote Egonkorrentzako Berdintasun Juridikoari buruzko uztailaren 3ko 6/2000 Legearen arabera parekatutako egoera, baldin eskainitako kontratazio administratiboaren hasiera eguna hura eratu ondoko edo aurreko hamabost egun naturalean bada.
f) Kontratazioren bat indarrean izatea, administrazio araubidekoa edo lanekoa izan.
g) Desgaitasunen bat behar bezala onartua izatea eta desgaitasunaren ezaugarriak bateraezinak izatea eskaintzen zaion lanpostuaren ezaugarri bereziekin.
Aipatu egoeretako batean dauden izangaiek 7 egun naturaleko epea izanen dute, errefusatu duten lanpostua eskaintzen zaien egunetik, agiri bidez eta fede emanez justifikatzeko. Hala bada, zerrendan zuten toki berean jarraituko dute.
Kontratazio eskaintzari uko egiteko arrazoi justifikatua frogatzen duen dokumentazioa epe barrenean aurkezten ez bada, izangaia zerrendako azkeneko tokira igaroko da.
Uko egiteko arrazoi justifikatua dagoenean, idatziz adierazi beharko dute noiz dauden berriz lanerako prest, uko egitea ekarri zuen egoera bukatzen den egunetik hasita. Jakinarazpen hori egiten ez den bitartean, ez zaie lanposturik eskainiko.
9.6. Deia eragiten duen zerrendatik baztertuko dira ondoko egoera hauetako batean dauden izangaiak:
a) Kontratazio eskaintza onartuta dela, kontratua ez sinatzea, izangaiari egozten ahal zaion arrazoiagatik.
b) Sinatutako kontratuari uko egitea, salbu horren arrazoia baldin bada beste kontratu bat sinatu dela beste entitate publiko edo pribatu batekin. Agiri bidez eta modu fede-emailean frogatu beharko da hori, ukoaren formalizaziotik 7 egun naturaleko epean. Kasu honetan, izangaia zerrendako azkeneko tokira igaroko da.
c) Lanpostua bertan behera uztea.
d) Probaldia ez gainditzea, kontratuan aurreikusi den kasuetan.
e) Urtebeteko epean izangaiarekin harremanetan jartzea ezinezkoa izatea, hark emandako telefonoaren edo helbide elektronikoaren bidez kontratatzeko deiak behin eta berriz eginda ere.
9.7. Deia jasotzen dutenek deialdian titulazioari eta bestelakoei buruz eskatutako betebeharrak betetzen dituztela frogatzeko dokumentazioa aurkeztu beharko dute.
9.8. Eskatutako baldintzak betetzen ez dituzten pertsonak hautapen prozesutik baztertuko dira, Alkatetzaren ebazpen baten bidez, eta deialdi honetan parte hartzeagatik izan ditzaketen eskubide guztiak galduko dituzte.
Hamargarrena.–Errekurtsoak.
Deialdi honen aurka, nahiz bere oinarrien eta aplikazio egintzen aurka, errekurtso hauetako bat aurkez daiteke, aukeran:
a) Administrazioarekiko auzi-errekurtsoa, Nafarroako Justizia Auzitegi Nagusiko arlo bereko salari zuzendua, erabaki hau edo errekurritzen den egintza argitaratu edo jakinarazi eta biharamunetik bi hilabeteko epean, organo egileari errekurritzeko asmoaren berri emanik; edo bestela,
b) Gora jotzeko errekurtsoa, zuzenean Nafarroako Administrazio Auzitegiari zuzendua, erabaki hau argitaratu edo errekurritzen den egintza jakinarazi eta biharamunetik hasita hilabeteko epearen barnean.
c) Berraztertzeko errekurtsoa, egintza eman duen erakundean berean, hilabeteko epean, jakinarazi eta biharamunetik aitzina.
Epaimahaiaren egintzen aurka gora jotzeko errekurtsoa aurkez daiteke, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik hasita.
II. ERANSKINA
Eskabide eredua (PDFa).
Iragarkiaren kodea: L1706682
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
