1. NAFARROAKO FORU KOMUNITATEA
1.7. BESTELAKOAK
22E/2012 EBAZPENA, otsailaren 27koa, Ingurumen Kalitatearen Zerbitzuko zuzendariak emana, Ingurumen ukipenetarako baimena ematen duena, zenbait baldintzarekin, Nafarroako Errege Bardeako 52. poligonoko 322. lurzatian lurrak ateratzeko proiekturako. Sustatzailea Antonio Echave Rodríguez da.
Xedea: Ebazpena.
Erreferentzia: Espediente kodea: 0001-0015-2011-000104.
Unitate kudeatzailea: Ingurumenaren eta Uraren Zuzendaritza Nagusia. Ingurumen Kalitatearen Zerbitzua. Ingurumenaren gaineko Eragina Aztertzeko Atala. González Tablas, 9-31005 Iruña. Telefonoa: 848 427625. Posta elektronikoa: secevamb@cfnavarra.es.
Espedientea: Ingurumen ukipenetarako baimena. Jarduera: Errege Bardean lurrak ateratzea. IBEHFL Erregelamenduaren eranskina: 2C-Ingurumen ukipenen baimenaren mende dauden jarduerak eta proiektuak. Herria: Tutera. Udalerria: Tutera. Sustatzailea: Antonio Echave Rodriguez. Eskaeraren data: 2011/11/10.
2011ko azaroaren 10ean, Ingurumen Kalitatearen Zerbitzuan sartu zen txosten honen idazpuruan aipatutako jarduerari dagokion Ingurumen ukipenetarako baimena lortzeko eskaera. Espedientea abenduaren 28ko 93/2006 Foru Dekretuaren 2C eranskineko O atalean sartua dago. Beraz, Ingurumen ukipenetarako baimena behar du. Foru dekretu horrek Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onetsi zuen.
Jarduketa horren bidez landare lurra kendu nahi da 52. poligonoko 322. lurzatian, metro bateko sakoneran, Tausteko ubidetik iristen den urarekin ureztaketa zuzena egiteko. Inguru horretan dauden legar ustiategiak lehengoratzeko erabiliko da lur hori.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak ebazpen arrazoitua emanen duela Ingurumen ukipenetarako baimena eman ala ukatzeari buruz.
Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu.
Eskaera Nafarroako Errege Bardeako Komunitateari igorri zaio, 93/2006 Foru Dekretuaren 35. artikuluan xedatutakoarekin bat. Errege Bardeako Komunitateko buruak 2012ko otsailaren 16an emandako 04/2012 Ebazpenaren bidez, jarduketaren aldeko txostena eman zen, baina baldintza batekin, hau da, ebazpen honen baldintzen multzoan ageri diren neurrietako batzuk betetzea.
Espedientean dauden txostenak ikusirik eta Ingurumenaren eta Uraren zuzendari nagusiaren irailaren 13ko 1436/2011 Ebazpenaren bidez eskuordetutako eskumenak erabiliz,
EBATZI DUT:
1. Ingurumen ukipenetarako baimena ematea, zenbait baldintzarekin, Nafarroako Errege Bardeako 52. poligonoko 322. lurzatian lurrak ateratzeko proiekturako. Sustatzailea Antonio Echave Rodríguez da.
2. Baimena neurri zuzentzaile hauek betetzearen baldintzapean eman da:
-Lurra gehienez ere metro bateko sakoneratik aterako da, Errege Bardeako Komunitatearen 52. poligonoko 322. lurzatian.
-Baimena lurzatiaren ureztatzea hobetzeko ematen denez, eskatzaileak adierazi behar du erretenen bidezko ureztaketa egiteko behar diren jarduketak eta obrak gauzatuko dituela; hori dela eta, lurzatiaren beheratzeak bat etorri behar du lurzatiaren barnean sakanik ez sortzeko egiten den hargunearekin.
-Beheratzea egitean gutxienez ere 5 metroko zabalera izanen duen babes zerrenda bat utzi behar ondoko lurzati eta bideen alboan. Makineria pasatzeko segurtasuneko areka bat sortuko da, metro bateko zabalerakoa, lurzatiaren perimetro guztian.
-Lurzoruaren gainazaleko geruza kenduko da 30 cm-ko lodieran. Lur pilaketak ongi kontserbatuko dira, ukitutako gainazalak lehengoratzeko erabili ahal izateko.
-Lur hori Buñuelgo udal mugapean dauden legar-hobi agortuak lehengoratzeko erabiliko da. Hala, lur horiek ez dira eraikuntzako eta eraispeneko hondakintzat (EEH) joko, Nafarroako Foru Komunitateko lurraldean eraikuntza eta eraispenetako hondakinen sorrera eta kudeaketa arautzen dituen martxoaren 28ko 23/2011 Foru Dekretua aplikatzearen ondorioetarako.
-Hondeaketaren ondoriozko ezponda perimetralak gehienez ere 45º-ko maldarekin (2H/1V erlazioa) geldituko dira, berezko birlandareztatzea errazteko.
-Hondeaketako behe kotara iritsitakoan, aurretik pilatutako landare lurra hedatu eta lurra prestatuko da, lur lantze arina eginez, laborantzarako prestatzeko.
-Hondeaketa lanak hasi aurretik, Vianako Printzea Erakundea-Kultura eta Turismo Departamentuko Ondasun Higigarrien eta Arkeologiaren Atalaren aldeko txostena beharko da, 2009ko maiatzekoa.
3. Proiektuaren Ingurumen ukipenetarako baimena eskuratzeko ezinbestekoa da 3.000 euroko fidantza jartzea, baimendutako jarduerak kalterik sortzen badu haiek lehengoratu edo gutxituko direla bermatzeko.
4. Baimen honek, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu. Artikulu horretan, lurzoru urbanizaezinean egin behar diren jarduerak baimentzeko prozedura ezartzen da.
5. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, horren kontra gora jotzeko errekurtsoa jar dezakete, Nafarroako Gobernuari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Epeak ebazpen hau jakinarazi eta biharamunetik hasita kontatuko dira.
6. Ebazpen hau Nafarroako Aldizkari Ofizialean argitaratzea.
7. Ebazpen hau Lurraldearen Antolamendu eta Hirigintza Zerbitzuari, Nafarroako Errege Bardeako Komunitateari, Tutera aldeko Basozaintzari eta interesdunari igortzea, behar diren ondorioak izan ditzan.
Iruñean, 2012ko otsailaren 27an.-Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1203446
