100. ALDIZKARIA - 2011ko maiatzaren 25a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

1933/2010 EBAZPENA, abenduaren 23koa, Nafarroako Unibertsitate Publikoko errektoreak emana, Nafarroako Unibertsitate Publikoko Komunikazio Zerbitzuari atxikitako teknikaria izateko lanpostu huts bat oposizio-lehiaketaren bidez betetzeko deialdia onesten duena.

Nafarroako Administrazio Publikoen zerbitzuko Langileen Estatutuaren Testu Bategina onesten duen 1993ko abuztuaren 30eko 251/1993 Legegintzako Foru Dekretuan eta hura garatu eta betearazteko emandako sarbide Erregelamenduan ezarritakoari jarraikiz, bidezkoa da Nafarroako Unibertsitate Publikoko Komunikazio Zerbitzuari atxikitako teknikaria izateko lanpostu huts bat betetzeko hautaprobetarako dei egitea.

Ikusirik Giza Baliabideen Zerbitzuko buruaren txostena, zeinean baieztatzen baita ezen, 2010eko abuztuaren 20ko Nafarroako Aldizkari Ofizialean argitaratutako Nafarroako Unibertsitate Publikoaren 2010eko urteko Lan Eskaintza Publikoaren arabera, badagoela A mailako lanpostu huts bat, teknikaria (Komunikazio Zerbitzua), Komunikazio Zerbitzuari atxikia, aurrekontuan kontusaila badaukana eta plantilla organikoan 509 zenbakia duena.

Kudeatzaileak proposatuta.

Lege indardunek eman dizkidaten eskumenak erabiliz.

EBATZI DUT:

Lehena.-Nafarroako Unibertsitate Publikoko Komunikazio Zerbitzuari atxikitako teknikari lanpostu huts bat betetzeko hautaprobetarako dei egitea.

Bigarrena.-Deialdia arautuko duten oinarriak, ebazpen honekin batera doazenak, onestea.

Hirugarrena.-Gastua 2011ko Gastuen Aurrekontuan horretarako eratuko den kontusailari egotziko zaio.

Laugarrena.-Ebazpen hau eta deialdiaren oinarriak Nafarroako Aldizkari Ofizialean argitaratzeko agintzea.

Bosgarrena.-Ebazpen honek administrazio bidea agortzen du, Unibertsitateei buruzko Lege Organikoaren 6.4 artikuluan xedatzen denari jarraikiz, eta zilegi da, aukeran, berraztertzeko errekurtsoa errektorearen aurrean, edo, bestela, zuzenean administrazioarekiko auzi-errekurtsoa Nafarroako Administrazioarekiko Auzietako Epaitegietan, hilabeteko epean lehenengo kasuan, eta bi hilabeteko epean bigarrenean, biak ere ebazpena jakinarazi eta biharamunetik kontatzen hasita.

Iruñean, 2010eko abenduaren 23an.-Errektorea, Julio Lafuente López.

DEIALDIA, NAFARROAKO UNIBERTSITATE PUBLIKOKO KOMUNIKAZIO ZERBITZUARI ATXIKITAKO ZERBITZUKO TEKNIKARI LANPOSTU BAT, OINARRIZKO LANPOSTUA, OPOSIZIO-LEHIAKETAREN BIDEZ BETETZEKO

Oinarriak

1.-Arau orokorrak.

1.1. Deialdi honen xedea da oposizio-lehiaketaren bidez betetzea Nafarroako Unibertsitate Publikoko Komunikazio Atalari atxikitako teknikari izateko lanpostu huts bat, oinarrizko lanpostua, ingelesa eta euskara jakiteko eskakizuna duena.

1.2. Deialdiko lanpostu hutsak plantilla organikoan 509 zenbakia du, eta Iruñean jardutekoa da.

Ingelesaren eta euskararen ezagutza maila oinarri hauetan ezarri bezala frogatuko da.

1.3. Deialdi hau ondoko hauetan xedatutakoak arautuko du: Nafarroako Administrazio Publikoen zerbitzuko Langileen Estatutuaren Testu Bategina onesten duen 1993ko abuztuaren 30eko 251/1993 Legegintzako Foru Dekretua, hura garatu eta betearazteko emandako Sarbide erregelamendua, Nafarroako Unibertsitate Publikoko Gobernuak 1996ko apirilaren 2an hartutako erabakia, Nafarroako Unibertsitate Publikoan lanpostuak bete eta haietara sartzeko prozeduretan aplikatu beharreko merezimenduen baremoak arautzen dituena, deialdi honen oinarriak, eta aplikatu beharreko gainerako arauak.

1.4. Halaber, deialdi honen xedea da aldi baterako kontrataziorako izangaien zerrenda bat sortzea, sartzeko hautapen prozeduran lanpostua eskuratzen ez duten izangaiekin, deialdi honen 10. oinarrian xedatutakoari jarraikiz.

2.-Izangaiek bete beharrekoak.

2.1. Hautaprobetara onartuak izateko, izangaiek eskaerak aurkezteko epea bukatzen den egunean, ondoko baldintzak bete beharko dituzte:

a) Espainiako herritarra izatea edo Europar Batasuneko estaturen batekoa izatea edo, Europar Batasunak izenpetu eta Espainiar Estatuak berretsitako nazioarteko itunen arabera, langileen joan-etorri askea aplikatzekoa zaion estaturen batekoa.

Halaber, Espainiako, Europar Batasuneko estatuetako eta aipatu nazioarteko itunak aplikatzen diren eremuko estatuetako herritartasuna dutenen ezkontideek parte hartzeko aukera dute, betiere zuzenbidearen arabera bananduta ez badaude; herritartasuna duenaren ondorengoek eta haren ezkontidearen ondorengoek ere parte hartzeko aukera dute, zuzenbidearen araberako banaketarik ez dagoenean, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.

b) Hamasei urte beteta edukitzea, eta nahitaezko erretirorako gehieneko adina beteta ez edukitzea.

c) Doktore, lizentziadun edo arkitekto titulua edo haren baliokidea den Gradua edo titulua edukitzea, edo, bestela, eskabideak aurkezteko epea bukatzen den egunean, titulua erdiesteko moduan egotea.

Atzerrian erdietsitako titulazioak badira, aipatutako egunean izangaiak eskuan izan beharko du homologazioaren egiaztagiria.

d) Ingelesaren eta euskararen jakintza egiaztatzen duten C1 mailako tituluak edo ziurtagiriak edukitzea honako honetan xedatu bezala: 210/2010 Ebazpena, 2010eko irailaren 13koa, Nafarroako Administrazio Publikoaren Institutuko zuzendari kudeatzailearena, euskararen eta erkidegoko hizkuntzen ezagutza ziurtatzen duten tituluen eta ziurtagirien arteko baliokidetzak ezartzen dituena, Hizkuntzen Erreferentziako Europako Esparru Komunak ezartzen duenaren arabera.

e) Dagozkion eginkizunak betetzeko gaitasun fisiko eta psikikoak edukitzea.

e) Eginkizun publikoetarako desgaitua edo gabetua ez egotea eta administrazio publiko baten zerbitzutik bereizia ez izatea.

Espainiakoa ez beste nazionalitatea dutenek ere, diziplina-zehapen edo zigor kondenaren bidez beren estatuetako funtzio publikoetan aritzeko gabetuta ez egotearen zinpeko aitorpena aurkeztu beharko dute.

2.2. Izendapenerako proposatutako izangaiak aurreko baldintzak egiaztatu beharko ditu deialdiaren 8.4 oinarrian ezarritako epean eta moduan, salbu eta eskabidea aurkeztearekin batera egiaztatu behar direnak.

2.3. Aurreko arauetan ezarritako baldintzak eskaerak aurkezteko epea bukatzen denean bete beharko dira, eta, halaber, hautapen prozedurak eta, kasua bada, kontratazioek dirauten bitartean.

3.-Eskaerak.

3.1. Eskaera deialdi honen eranskinean (I. eranskina) dagoen ereduari lotu behar zaio eta, hartan, izangaiek adierazi beharko dute eskatutako baldintza guztiak betetzen dituztela. Eskabide eredua Interneten bidez lortzen da www.unavarra.es webgunean, "Concursos y contratos/Personal/Instancias" izeneko helbidean.

3.2. Eskabidea Nafarroako Unibertsitate Publikoko Erregistro Orokorrean aurkeztu behar da (Soforak eraikina; Arrosadiko campusa; 31006 Iruñea), edo, bestela, Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan ezarritako prozeduraren bidez. Eskabidea Nafarroako Unibertsitate Publikoko errektoreari zuzendu behar zaio. Eskaerak aurkezteko epea hogeita hamar egun natural igaro ondoren bukatuko da, deialdi honen iragarkia "Estatuko Aldizkari Ofizial"ean argitaratzen den egunaren biharamunetik kontatzen hasita. Deialdia Nafarroako Aldizkari Ofizialean argitaratuko da.

Eskaera posta bulego batean aurkeztuz gero, gutun-azal irekian egingo da, posta zerbitzuko langileak, ziurtatu aurretik, data eta zigilua jar ditzan, eta ondoren egiaztatu eta bidali Nafarroako Unibertsitate Publikoaren Erregistrora (Arrosadiko campusa, z/g, 31006 Iruñea).

3.3. Behar bezala betetako eskabideari, ondoko agiri hauek erantsiko zaizkio:

a) Izangaiaren Nortasun Agiri Nazionalaren edo izangaiaren nazionalitatea eta nortasuna ziurtatzeko agiriaren fotokopia.

b) Deialdian eskatutako tituluaren kopia edo eskuratzeko eskubideak ordaindu izanaren ordezkagiria.

c) 2.1.d) oinarrian aipatzen diren Ingelesaren eta Euskararen jakintza egiaztatzen duten tituluen edo ziurtagirien kopia.

d) Azterketa egiteko eskubideak ordaindu direla erakusten duen bankuaren agiria, 4. oinarrian ezarritakoari jarraikiz.

3.4. 4.1 a) oinarrian (tasen salbuespena) xedatutakoa aplikatzeko, eta, halaber, denborak eta baliabideak egokitzeko eskaera egiteko, %33ko edo gehiagoko ezgaitasuna duten izangaiek, hura egiaztatu beharko dute, ondoko agiri hauetako baten jatorrizkoaren edo kopia konpultsatuaren bidez:

-Imsersok edo autonomia erkidegoan eskumena duen organoak emandako ziurtagiria.

-Gizarte Segurantzako Institutu Nazionalaren ebazpena, ezgaitasun iraunkor osoa, ezgaintasun iraunkor absolutua edo baliaezintasun handia izateagatik prestazio bat jasotzeko eskubidea onartzen diona izangaiari.

Ezgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean (I. Bis eranskina) adierazi beharko dute nolako ezgaitasuna duten eta zein egokitzapen eskatzen duten.

3.5. Eskaeran atzematen diren akatsak edonoiz konponduko dira, ofizioz edo interesdunak hala eskatuta.

3.6. Eskabideak aurkezteko epea ezin izango da luzatu.

4.-Tasak.

4.1. Azterketa-eskubideak 40 eurokoak izango dira. Azterketa-eskubideen tasa ordaintzen ez duen izangaia hautaprobetatik baztertua izango da.

Tasari dagokiona eskudirutan ordainduko da, edo bestela, transferentzia egingo da, Nafarroako Kutxaren 2054.0000.44.1100110959 kontu korrontera. Ordainagirian izangaiaren nortasuna eta "Hautaprobak - Teknikaria (Komunikazioak)" adierazpena agertu behar dira.

Tasak ordaintzetik salbuetsita egongo dira:

a) %33ko edo gehiagoko ezgaitasun aitortua duten pertsonak.

b) Hautaproben deialdia egin aurretik hilabetez edo luzaroago lan-eskatzaile gisa inskribaturik egon direnak. Salbuetsita egoteko baldintza izango da inskripzio epean eskainitako inolako lan egokiri uko egin ez izana, eta lanbiderako igoera, prestakuntza edo eraberritze ekintzetan parte hartzeko uko egin ez izana, justifikaturiko arrazoirik ez badago, eta, halaber, hilabetean lanbide arteko gutxieneko lansaritik goragoko errentarik ez izatea.

Lan-eskatzaile gisa inskribaturik daudenek dagokien Enplegu Bulegoak emandako ziurtagiaren bidez egiaztatuko dute hori. Bertan adieraziko dute interesduna noiz inskribatu ziren lan-eskatzaile gisa, eta espresuki aipatuko dute inskribatuta egon diren bitartean ez diotela ezein lan egokiri uko egin, eta lanbide sustapen, prestakuntza edo eraberritze ekintzetan parte hartzeari ez diotela uko egin, justifikaturiko arrazoirik egon gabe.

Lanbide arloko gutxieneko lansaria, hilabeteko zenbaketan, gainditzen ez duela egiaztatzeko, interesdunak aitorpen nagusia egin beharko du.

4.2. Azterketako eskubideak ordaintzeak ez du inola ere ordezkatuko hautapen-prozesuan parte hartzeko eskaera, garaiz eta forman aurkeztea.

5.-Izangaien onarpena eta erreklamazioak.

5.1. Eskaerak aurkezteko epea bukatu eta gero, Nafarroako Unibertsitate Publikoko errektoreak ebazpena emango du, eta "Nafarroako Aldizkari Ofizialean" argitaratuko da. Horretan onartuen eta baztertuen behin-behineko zerrenda onetsitzat emango da; bigarren kasuan baztertzearen zergatia azalduko da.

5.2. Baztertutako izangaiek, behin-behineko zerrenda Nafarroako Aldizkari Ofizialean argitaratu eta hurrengo hamar egun balioduneko epean, zilegi dute erreklamazioa eta, akatsen bat badago, akatsak zuzentzea.

5.3. Erreklamazioetarako epea iragan eta haiek ebatzi ondoren, Nafarroako Unibertsitate Publikoko errektoreak ebazpena emango du eta "Nafarroako Aldizkari Ofizialean" argitaratuko da. Horretan onartuen eta baztertuen behin betiko zerrenda onetsitzat emango da.

5.4. Ez da bidezkoa izango azterketa-eskubideak itzultzea, baztertzeko arrazoia izangaiei egotzi ahal zaien arrazoia denean.

6.-Epaimahaia.

6.1. Epaimahaia honako kide hauek osatuko dute:

Mahaiburua: errektorea edo berak eskuordetua.

Epaimahaikideak:

Nafarroako Unibertsitate Publikoko kudeatzailea edo berak eskuordetua.

Ordezkari bat, Nafarroako Foru Erkidegoan dagoen beste administrazio publiko batekoa edo Estatuko beste unibertsitate publiko batekoa.

Nafarroako Unibertsitate Publikoko administrazio eta zerbitzuetako langile bat, Administrazio eta Zerbitzuetako Langileen Batzordeak izendatua.

Idazkaria: Nafarroako Unibertsitate Publikoko administrazio eta zerbitzuetako langile bat, Giza Baliabideen Zerbitzuko zuzendariak izendatua epaimahaian parte hartzeko interesa erakutsi dutenen artetik.

Hautaprobetako epaimahaiko kide titular eta ordezkoen behin betiko izendapena onartuen eta baztertuen behin-behineko zerrenda onesten duen ebazpen berean egingo da, eta Nafarroako Aldizkari Ofizialean argitaratuko da.

Epaimahaia hautaprobak hasi baino lehen eratu beharko da.

6.2. Epaimahai kalifikatzailearen eraketak eta jardunak balio izan dezaten, gutxienez kide guztien gehiengo osoa beharko da.

Epaimahaiaren eraketak eta jardunak balio izateko, mahaiburuak eta mahaikide idazkariak edo haien ordezkoek egon behar dute bertan.

6.3. Epaimahaiko kideek ez dute parte hartuko, eta organo dei-egileari jakinaraziko diote, Herri Administrazioen Araubide Juridikoari eta Administrazio Prozedura Erkideari buruzko 1992ko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

6.4. Deialdi honetako arauak interpretatzeak eta aplikatzeak sorrarazitako zalantzak Epaimahaiaren gehiengoak ebatziko ditu, eta hautaprobak aurrera egin ahala deialdian aurreikusten ez diren eta sor litezkeen auziak ebazteko neurriak hartuko.

6.5. Epaimahai kalifikatzaileak aukera izango du aholkulari adituak sartzeko hautaproba guztietarako zein batzuetarako. Aholkulari horiek beren espezialitate teknikoen esparrura mugatuko dute lankidetza.

6.6. Epaimahai kalifikatzaileak neurri egokiak hartuko ditu beharrezkoa den kasuetan, ezgaitasunak dituzten izangaiek gainontzeko izangaien baldintza berberak eduki ditzaten probak egiteko orduan, 3.4 oinarrian ezarritakoari jarraikiz.

6.7. Epaimahaiburuak behar dituen neurriak hartuko ditu oposizio aldian idatziz egingo diren eta Epaimahaiaren aurrean irakurri behar ez diren ariketen erantzunak zuzentzeko, betiere, izangaiak nor diren jakin gabe.

6.8. Jakinarazpenak emateko eta bestelako gorabeheretarako, Epaimahaiaren egoitza Nafarroako Unibertsitate Publikoko Administrazio eta Kudeaketa eraikina izango da.

6.9. Hautaketa prozesua bukatu ondoren, Epaimahaiak zerrenda bat egingo du; bertan hautaprobaren bat gainditu eta lanposturik atera ez duten izangaiak zerrendatuko dira, proba bakoitzean erdietsitako puntuazioekin. Giza Baliabideen Zerbitzuari bidaliko dio, kontratatzeko zerrendak prestatzeko, Kontratazioa eta izendapen-zerrendak prestatzeko eta kudeatzeko prozedura arautzen duen erabakian ezarritakoa aplikatzeko.

7.-Oposizio-lehiaketaren garapena.

7.1. Oposizio aldiko lehen ariketa 2011ko irailetik aurrera egingo da. Onartutako eta baztertutako izangaien behin betiko zerrenda onesten duen ebazpen berean, hautaprobak hasteko lekua, eguna eta ordua ezarriko dira. Ondoren, Epaimahaiak gainerako probak egiteko iragarkiak jakinaraziko ditu, arauz egin behar den moduan.

7.2. Hautatzeko prozesuak honako aldi hauek edukiko ditu:

7.2.1. Oposizio aldia:

Lehenengo ariketa: Teorikoa, 80-100 galdera bitarteko galdetegi bat, idatziz erantzun beharrekoa, deialdiaren II. eranskinean dagoen gai zerrendako lehen zatiari buruz. Galdera bakoitzarentzat aukerako erantzun batzuk izango dira, eta horietatik bakar bat izango da zuzena. Epaimahaiak zehaztuko du, ariketa hasten denean, zenbat denbora duten lehiatzaileek hura egiteko, eta nola balioetsiko diren huts egindako erantzunak.

Bigarren ariketa: Praktikoa, Epaimahaiak proposatzen dituen kasuak ebatziz erantzun beharrekoa, deialdiaren II. eranskinean dagoen gai zerrendako bigarren eta hirugarren zatiei buruz, eta xede den lanpostuaren eginkizunei dagozkionak. Ariketa ordenagailuaren bidez egingo da. Ariketa hau bost ordukoa izango da gehienez ere. Ariketa egiteko denbora Epaimahaiak zehaztuko du hasi aurretik.

Hirugarren ariketa: Teorikoa, idatziz hiru gai garatu beharrekoa, bat II. eranskinean dagoen gai zerrendako bigarren zatiari buruz, beste bat hirugarren zatiari eta beste bat laugarren zatiari buruz. Horretarako, Epaimahaiak zozketaz bi gai hautatuko ditu zati bakoitzetik, eta izangaiek zati bakoitzetik bat aukeratu eta garatuko beharko dute. Ariketa ordenagailuaren bidez egingo da. Ariketa hau sei ordukoa izango da gehienez ere. Ariketa egiteko denbora Epaimahaiak zehaztuko du hasi aurretik.

Oposizio aldiko ariketen balioespena 70 puntukoa izango da gehienez ere, eta puntuak honela banatuko dira:

-Lehenengo ariketa: 10 puntu gehienez ere.

-Bigarren ariketa: 36 puntu gehienez ere.

-Hirugarren ariketa: 24 puntu gehienez ere (gai bakoitzak 8 puntu izango ditu gehienez ere).

Oposizioko ariketak baztertzaileak izango dira. Ariketa bakoitzari dagokion gehieneko puntuazioaren erdia, gutxienez ere, lortzen ez duten izangaiak baztertu egingo dira. Halaber, baztertu egingo dira bigarren ariketako edozein gaitan edo hirugarren ariketako edozein proba praktikotan gehieneko puntuazioaren herena edo hori baino puntu gutxiago lortzen duten izangaiak.

Ariketa bakoitzaren kalifikazioa bukatu ondoren, Epaimahaiak Nafarroako Unibertsitate Publikoaren webgunean www.unavarra.es "Concursos y contratos/Personal/Personal de Administración y Servicios" izenburupeko helbidean, gainditu duten izangaien zerrenda argitaratuko du, haien nortasun agiri zenbakiarekin eta lortutako kalifikazioekin batera, eta, halaber, oposizio aldiko hurrengo ariketa non eta zer egun eta ordutan izango den adieraziko du, gutxienez 48 ordu lehenago.

Ariketa bakoitzerako deialdia bakarra izango da, hau da, deitutako izangaiek epaimahai kalifikatzaileak probak egiten hasteko adierazitako lekuan eta egunean egon beharko dute, epaimahai berak esandako orduan, eta deialdi horretara azaltzen ez direnak oposiziotik baztertuak izango dira, probak ekitaldi batzuetan banatu arren. Izangaiek Nortasun Agiri Nazionala, pasaportea, gidatzeko baimena edo Epaimahaiak ontzat eman dezakeen bestelako agiri bat erakutsi beharko dute nortasuna egiaztatzeko. Oposiziotik kanpo geldituko dira beren nortasuna azaldu bezala egiaztatzen ez dutenak.

Ezgaitasun aitortua izanik, eskabidean eskaera egin duten izangaientzat, ariketak egiteko behar diren denbora eta baliabideetan izan litezkeen egokitzapenak ezarriko dira hautaprobak garatzeko.

Hautaproba prozesuan edonoiz, Epaimahaiak jakiten badu izangaietakoren batek ez dituela deialdi honetan eskatzen diren betebeharreko guztiak, eta interesdunari entzun ondoren, Unibertsitateko errektoreari proposatu beharko dio izangai hori baztertzeko, eta esan beharko dio, halaber, zein zehazgabetasun edo faltsutasun jarri dituen izangaiak hautaprobetara onartua izateko eskaeran, horrek bere ondorioak sor ditzan.

7.2.2. Lehiaketa aldia:

Epaimahaiak balioetsi egingo ditu oposizio-aldia gainditu duten izangaiek azaldutako merezimenduak, jarraian zehazten den baremoaren arabera.

Merezimendu guztiak agiriaren bidez alegatu eta frogatu beharko dira, oposizio aldiko emaitzak argitaratu eta hamar egun naturalen epean, dela jatorrizko agiriaren bidez, dela administratiboki egiaztaturiko kopien bidez, deialdi honetan ezartzen den baremoaren arabera. Emandako zerbitzuen agiria, zerbitzuak zein erakundetan eman diren, erakunde horretako langileen bulegoak luzatu beharko du.

Lehiaketa aldiko atal bakoitzari dagozkion merezimenduak batu, eta erdietsitako puntuazioa inoiz ere ez da izango 30 puntu baino gehiagokoa. Horretan erdietsitako puntuazioa oposizio aldia bukatutakoan jakinaraziko da, eta bi aldietako puntuazioen batura izango den behin betiko puntuazioa argitara eman aurretik.

Merezimenduak balioesteko kontuan hartuko dira, bakarrik, deialdiaren iragarkia "Estatuko Aldizkari Ofizialean" argitaratzeko epera arte lortu direnak, eta baliogabeak izango dira egun hori eta gero lortutakoak. Epaimahaiak inolaz ere ez du onartuko izangaiek alegatu ez duten edo agirien bidez frogatu ez duten merezimendurik, eta ezin izango du atal bakoitzean adierazitako gehieneko puntuazioa baino handiagorik eman. Epaimahai kalifikatzaileak edozein unetan azalpenak eta datu osagarriak eskatzeko aukera du, izangaiek alegatu eta frogaturiko merezimenduen gainean.

A) Lan esperientzia: jarraian zehazten diren merezimenduak balioetsiko dira; atal honetako gehieneko puntuazioa 16,5 puntu da eta balioetsi daitekeen gehieneko denbora 4 urte:

a) Eskaerak aurkezteko epea bukatzean unibertsitate publikoetan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,35 puntu.

b) Eskaerak aurkezteko epea bukatzean unibertsitate publikoa ez den edozein administrazio, organismo edo erakunde publikotan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,15 puntu.

B) Beste hainbat hizkuntzari buruzko jakite-maila: honako merezimendu hauek balioetsiko dira, eta atal honetako gehieneko puntuazioa 9 puntukoa izango da.

a) Ingelesa ez den Europar Batasuneko edozein hizkuntza ofizialen Gaitasun Agiria, Hizkuntza Eskola Ofizialek ematen dutena, edukitzeagatik edo, bestela, titulazio baliokidea, 4,95 puntu hizkuntza bakoitzagatik.

b) Europar Batasuneko edozein hizkuntza ofizialen Oinarrizko Zikloaren Ziurtagiri Ofiziala, Hizkuntza Eskola Ofizialek ematen dutena, edukitzeagatik edo, bestela, titulazio baliokidea, 3,15 puntu hizkuntza bakoitzagatik.

Hizkuntza titulazioen baliokidetzak balioesteko, Epaimahaiak kontuan hartuko du ondoko honetan ezarritakoa: 210/2010 Ebazpena, 2010eko irailaren 13koa, Nafarroako Administrazio Publikoaren Institutuko zuzendari kudeatzailearena, euskararen eta Europar Batasuneko hizkuntzen jakite-maila egiaztatzen duten tituluen eta ziurtagirien arteko baliokidetzak ezartzen dituena, Hizkuntzen Erreferentziako Europako Esparru Bateratuak ezartzen duenaren arabera.

C) Beste merezimendu batzuk: gehienez ere 4,5 puntu emango zaie.

-Titulazioak edukitzeagatik, betiere, izangaiek ez badituzte alegatu 2.1.c) oinarrian eskatutakoa betetzeko, gehienez ere, 2 puntu emango zaie, honela:

a) Diplomadun, ingeniari tekniko edo arkitekto tekniko titulu bat edo batzuk, edo baliokideak edukitzeagatik, gehienez ere puntu 1.

b) Doktore, lizentziadun, ingeniari edo arkitekto titulu bat edo batzuk edukitzeagatik, 1,5 puntu.

-Erakunde eta instituzio publikoek antolatutako ikastaroak egin dituztenean, izangaiei 0,1 puntu emango zaizkie 10 prestakuntza ordu-tarte bakoitzeko, eta balioetsiko zaien gehieneko puntuazioa puntu batekoa izango da egindako ikastaro bakoitzeko; atal honetako gehieneko puntuazioa ez da 2,5 puntu baino gehiagokoa izango.

Deialdiko lanpostuari dagozkion eginkizunekin zerikusia duten gaiei buruzko ikastaroak balioetsiko dira soilik, eta, zehazki gai hauek:

-Komunikazioa.

-Diseinu grafikoa.

-Web-orrialdeen diseinua eta kudeaketa.

-Gizarte Sareak.

-Marketina.

-Marka grafikoa eta identitate korporatiboa.

-Unibertsitateari buruzko arautegia.

8.-Gaindituen zerrenda, izendapen proposamena eta agiriak aurkeztea.

8.1. Oposizio aldia bukatu ondoren, Epaimahaiak Administrazio eta Kudeaketa eraikineko (Soforak eraikina) iragarki oholean eta Interneten bidez Nafarroako Unibertsitate Publikoko www.unavarra.es webgunean "Concursos y contratos/Personal/Personal de Administración y Servicios" izenburupeko helbidean, aditzera emango ditu oposizio aldiko hiru probak gainditu dituzten izangaiek lortutako emaitzen batuketa, eskuratutako puntuazioaren ordenari jarraikiz.

8.2. Lehiaketa aldia bukatu eta gero, epaimahaiak aditzera emango du, aurreko oinarrian esandako tokian, eta merezimenduen balioespenaren emaitza, izangai bakoitzak lortu duen puntuazioa adieraziko du.

8.3. Epaimahaiak gainditu dutenen behin betiko zerrenda argitaratuko du, lortu duten behin betiko postuaren arabera antolatuta, oposizio aldian eta lehiaketa aldian lortu dituzten puntuazioak batu eta gero.

Hautaproben azken emaitzan gertatzen diren berdinketak ebazteko, oposizio aldian puntuaziorik handiena lortu duenaren alde egingo da; berdinketak segitzen badu, probak egin diren hurrenkeraren alderantzizko hurrenkeran ateratako puntuazioen arabera ebatziko dira eta, hala ere berdinketak irauten badu, izangai zaharrenaren alde ebatziko da.

8.4. Izendapen proposamena Nafarroako Aldizkari Ofizialean argitaratu eta hogeita hamar egun naturaleko epean, proposameneko izangaiek Unibertsitateko Erregistro Orokorrean ondoko agiri hauek aurkeztu beharko ditu:

a) 2.1 c) oinarrian eskatutako tituluaren jatorrizkoa edo fotokopia kautotua, edo hura eskuratzeko eskubideak ordaindu izanaren ordezkagiriarena.

b) 2.1 d) oinarrian eskaturiko titulu edo egiaztagirien jatorrizkoa edo fotokopia kautotua.

b) Aitorpena, zeinetan adierazten baita, diziplina espediente baten ondorioz, lehiatzailea ez dagoela bereizita inongo administrazio edo kargu publikotik, eta ez dagoela zigor baten bidez desgaitua eginkizun publikoak betetzeko. Izangaiak ez badu Espainiako nazionalitatea, diziplina-zehapen edo zigor kondenaren bidez bere estatuko funtzio publikoetan aritzeko gabetuta ez egotearen zinpeko aitorpena aurkeztu behar du.

c) Ziurtagiri medikoa, eskaintzen den lanpostuaren eginkizunetan aritzeko gaitasun psikikoa eta fisikoa edukitzea egiaztatzen duena. Horretarako, azterketa Nafarroako Unibertsitate Publikoaren Aurrezaintza Zerbitzuaren mediku zerbitzuek egingo dute.

Proposatutako izangaiak ezgaitasuna alegatu badu, ekarri behar du, halaber, organo eskudunen ziurtagiria, deialdiaren xede den lanpostuaren eginkizunak eta lanak egiteko moduan dagoela dioena.

8.5. Behar bezala justifikatutako ezinbesteko kasuak alde batera utzita, ezarri den epearen barruan agiriak aurkezten ez dituen, edo agiriak aztertzearen ondorioz, deialdian eskatzen diren betebeharretakoren bat betetzen ez duen izangaia ezin izendatuko da funtzionario, eta bere jardun guztiak deuseztu egingo dira, hasierako eskaeran faltsukeriatan ibiltzeagatik eduki lezakeen erantzukizunaren kaltetan gabe.

8.6. Aurreko atalean aurreikusten den kasuan, eta oinarri hau aipatzen dutenetan, Nafarroako Unibertsitate Publikoko errektoreak hutsunea beteko du 8.3 atalean aipatzen den gainditu dutenen zerrendan ondoren dagoenarekin, deialdiaren oinarrietan ezartzen diren baldintzak betetzen baditu, eta horrekin aurreko ataletan aipatu den moduan jokatuko da.

9.-Funtzionario izendatzea.

9.1. Nafarroako Unibertsitate Publikoko errektoreak, karrerako funtzionario izendatuko du aurreko oinarrietan ezarritakoa betetzen duen izangaia, Nafarroako Aldizkari Ofizialean argitaratuko den ebazpenaren bidez. Izendapena jakinarazten denetik hilabete bateko epean hartu beharko du jabetza.

9.2. Aipatutako epean eta ezinbesteko kasuetan izan ezik, lanpostuaren jabe egiten ez bada, Nafarroako Unibertsitate Publikoaren funtzionario izateko eskubide guztiak galduko ditu. Kasu horretan, 8.6 oinarrian ezarritakoari jarraituko zaio.

9.3. Izangaia funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 8.6 oinarriak agintzen duen moduan beteko da.

10.-Izendapenetarako edo kontratazioetarako zerrenda prestatzea.

10.1. Kontratazio eta izendapen-zerrendak prestatzeko eta kudeatzeko prozedura arautzen duen erabakian ezarritakoari jarraikiz, hautaketa prozesua bukatu ondoren, Unibertsitateak zerrenda bat prestatuko du, izendapenetarako edo kontratazioetarako, hautaketa prozesuko proba bat, gutxienez ere, gainditu duten izangaiek osatua.

10.2. Zerrenda osatzen dutenak ordenatzeko ondoko irizpide hauek erabiliko dira:

a) lehenbizi, hautaketa prozesuan oposizio aldi osoa gainditu baina lanpostua lortu ez duten izangaiak. Ezarriko zaien puntuazioa izango da oposizio aldiaren eta lehiaketa aldiaren batura.

b) bigarrenik, hautaketa prozedura osoa ez, baina proba bat, gutxienez ere, gainditu duten izangaiak. Ezarriko zaien puntuazioa izango da gainditu dituzten probena eta lanbide-esperientziarena, 10.4 oinarrian ezarritakoaren arabera, batzeak ematen duena.

10.3. b) atalean aipatzen diren izangaiek, lanbide-esperientzia egiaztatzen duten agiriak aurkeztu beharko dituzte, dagokien eskabidearekin batera, oposizio aldiko bigarren probaren emaitzak argitaratzen direnetik, eta, dagokion hautaketa prozesuaren behin betiko emaitzak argitaratu ondoren, hamar egun iragan arte.

Lanbide esperientzia egiaztatzeko aurkeztu beharko da egiaztagiriaren jatorrizkoa edo kopia kautotua, zer administrazio publikotan eman ziren zerbitzuak, horretako langileen unitateak egina. Agirian dagokion titulazio taldea agertu beharko da.

10.4. Lanbide esperientzia honela balioetsiko da:

-0,66 puntu deialdian aipatutako lanpostuan zerbitzu ematen egindako hiruhileko bakoitzeko. Gehienez ere 8 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

-0,66 puntu azken hamar urtean unibertsitate publiko batean deialdian aipatutako lanpostuan zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

-0,26 puntu azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko, edo azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

11.-Datu pertsonalen erabilera.

11.1. Zilegi da interesdunek emandako datuak fitxategi automatizatu batean gordetzea. Fitxategi hori langileen datu-basea edo lan-poltsaren datu-basea da, Norberaren Datuak Babesteko abenduaren 13ko 15/1999 Lege Organikoari jarraikiz.

11.2. Fitxategia Kudeatzailetzaren ardurapean geldituko da (Arrosadiko campusa, Soforak eraikina).

11.3. Lortutako informazioa langileen kudeaketarako prozesatuko da, ez bestetarako.

11.4. Datu pertsonalak tratatzeko babes maila ezarrita dago Norberaren Datuak Babesteko 1999ko abenduaren 13ko 15/1999 Lege Organikoa garatzeko arautegia onesten duen abenduaren 2007ko 21eko 1720/2007 Errege Dekretuan.

11.5. Interesdunek zilegi dute sarbidea izateko, zuzentzeko, deusezteko eta aurka egiteko eskubidea, Datuak Babesteko Lege Organikoak ezartzen duena betetzeko. Eskabideak Nafarroako Unibertsitate Publikoko kudeatzaileari zuzenduko zaizkio (Arrosadiko campusa, z.g., Soforak eraikina, 31006, Iruñea).

12.-Errekurtsoak.

Deialdi honen aurka, haren oinarrien aurka eta errektoreak harturiko izendapen erabakiaren aurka zilegi da ondoko errekurtsoetako bat, arau indardunekin bat etorriz:

a) Aukerako berraztertze-errekurtsoa errektorearen aurrean, hilabete bateko epean, ekitaldia edo erabakia jakinarazten edo iragartzen den egunaren biharamunetik kontatzen hasita.

b) Administrazioarekiko auzi-errekurtsoa Nafarroako Justizia Auzitegi Gorenaren Administrazioarekiko Auzietako Salan, bi hilabeteko epean, erabakia jakinarazten den egunaren biharamunetik kontatzen hasita.

Epaimahai kalifikatzaileak ematen dituen egintza eta ebazpenen kontra zilegi da gora jotzeko errekurtsoa, errektoreari zuzendua, errekurtsoaren xede den egintza argitaratu edo jakinarazi, eta biharamunetik aurrera, hilabeteko epean. Gorako errekurtso ebazlearen aurka zilegi da administrazioarekiko auzi-errekurtsoa, Nafarroako Justizia Auzitegi Nagusiaren aurrean.

I. ERANSKINA

F1108785_0.pdf

I BIS ERANSKINA

F1108785_1.pdf

II. ERANSKINA

Gai Zerrenda

Lehen zatia.

1. gaia.-Espainiako 1978ko Konstituzioa: egitura eta edukia. Funtsezko betebeharrak eta eskubideak.

2. gaia.-Konstituzioaren IV. Titulua. Gobernua eta Administrazioa. Nazioko Gobernuaren 2008-2012 botere legegilea: ministerioen antolamendua eta eskumenen banaketa.

3. gaia.-Estatuaren lurralde-antolamendua. Autonomia erkidegoen ekinbidea. Autonomia erkidegoak sortu, aldatu eta desegiteko modua. Autonomia estatutuak. Izaera. Edukia. Prestatzeko prozedura. Eskumenen banaketa eta edukia. Erreforma prozesu nagusiak.

4. gaia.-Europar Batasuna. Bere erakundeak.

5. gaia.-Europako Erkidegoko Zuzenbidea. Europar Batasuneko herritarren eskubideak eta askatasunak.

6. gaia.-Europar Batasuneko Eskualdeen zeregina. Eskualdeen Batzordea. Nafarroa Europar Batasunean. Pirinioetako Lan Erkidegoa.

7. gaia.-Nafarroako Foru Eraentza Birrezarri eta Hobetzeari buruzko Lege Organikoa. Atariko Titulua. Nafarroako Foru Erakundeak. Nafarroaren eskumenak.

8. gaia.-Parlamentua edo Nafarroako Gorteak. Nafarroako Kontuen Ganbera. Arartekoa.

9. gaia.-Nafarroa XX. mendean. Jarduera politikoa eta gizarte errealitatea mendearen lehen herenean. II. Errepublika. Estatutu planteamenduak. Gerra zibila 1936-1939. Nafarroa frankismo garaian. Trantsizio politikoa Nafarroan. Nafarroako bizitza publikoaren gertaerak 1983tik 1999ra. Hauteskunde emaitzak.

10. gaia.-XXI. mendea Nafarroan. Nafarroako bizitza publikoaren gertaerak 2000. urtetik 2010. urtera. Hauteskunde emaitzak.

11. gaia.-Herri Administrazioen Araubide Juridikoari eta Administrazio Prozedura Erkideari buruzko Legea: Administrazio prozedura erkidea: Hasiera, antolamendua, instrukzioa eta bukaera. Administrazio errekurtsoak.

12. gaia.-Nafarroako administrazio publikoen zerbitzuko langileen estatutua. Egitura eta edukia.

13. gaia.-Kontratu Publikoen Foru Legea: aplikazio-eremua eta aplikagarriak diren arau orokorrak.

14. gaia.-15/1999 Lege Organikoa, abenduaren 13koa, Datu Pertsonalak Babesteari buruzkoa. Printzipioak. Pertsonen eskubideak.

15. gaia.-Administrazio elektronikoa. 11/2007 Legea, 2007ko ekainaren 22koa, Herritarrak zerbitzu publikoetara bide elektronikoz sartzeari buruzkoa. Justifikazioa, eremua eta printzipio orokorrak.

16. gaia.-11/2007 Foru Legea, 2007ko apirilaren 4koa, Nafarroako Foru Komunitateko administrazioan administrazio elektronikoa ezartzekoa. 37/2007 Legea, 2007ko azaroaren 16koa, sektore publikoaren informazioa berriz erabiltzeari buruzkoa.

17. gaia.-34/1988 Legea, 1988ko azaroaren 11koa, Publizitatearen Lege Orokorra.

18. gaia.-49/2002 Legea, 2002ko abenduaren 23koa, Irabazi asmorik gabeko entitateen zerga araubideari eta mezenasgoaren hobari fiskalei buruzkoa.

Bigarren zatia.-Unibertsitateari buruzko gaiak.

1. gaia.-Unibertsitatearen bilakaera Europako testuinguruan. Espainiako unibertsitate eredua.

2. gaia.-Nafarroako hezkuntza sistema. Derrigorrezko hezkuntza, unibertsitateaurreko ikasketak eta lanbide heziketa. Unibertsitatekoak ez diren beste ikasketa batzuk. Nafarroako unibertsitate sistema.

3. gaia.-Unibertsitatea zerbitzu publiko gisa. 2001eko abenduaren 21eko Unibertsitateei buruzko 6/2001 Lege Organikoa. Unibertsitatearen autonomia eta bere mugak. Unibertsitate Publikoen araubide juridikoa.

4. gaia.-Unibertsitateko irakasleak. Irakaskidegoetako irakasleak. 898/1985 Errege Dekretua, 1985eko apirilaren 30ekoa, unibertsitateko irakasleen eraentzari buruzkoa.

5. gaia.-Lan kontratupeko irakasleak: motak eta araubide juridikoa.

6. gaia.-Administrazio eta Zerbitzuetako langileak. Funtzionarioak: hautapena eta araubide juridikoa. Kontratupeko langileak: araubide juridikoa eta kontratazio motak.

7. gaia.-Boloniako prozesua. Europako Unibertsitate-eremuaren eraikiera. Itunen jatorria eta bilakaera. Gaur egungo egoera.

8. gaia.-Ikasketen antolamendua Europako Unibertsitate Eremuan. ECTS kredituak. Tituluaren Europako gehigarria. Ikasketen eta tituluen egitura. Gradua eta Graduondoko ofiziala.

9. gaia.-Kalitate sistemen ezarpena administrazio publikoetan. Kalitatearen kudeaketa unibertsitateetan. Ebaluazioa eta akreditazioa Unibertsitateetan. Kalitatea Ebaluatu eta Egiaztatzeko Agentzia Nazionala.

10. gaia.-NUPen jatorria eta sorrera. 8/1987 Foru Legea, 1987ko apirilaren 21ekoa, Nafarroako Unibertsitate Publikoa sortzeari buruzkoa. 25/2002 Foru Legea, 2002ko uztailaren 2koa, 8/1987 Foru Legea aldatzen duena, Tuteran unibertsitate ikasketak ezartzeko.

11. gaia.-NUP sortu zenetik izan duen bilakaera historikoa. Erakundearen mugarri nagusiak. Errektoretza taldeak. Gaur egungo egoera.

12. gaia.-Nafarroako Unibertsitate Publikoaren Estatutuak. Beste arau berariazko batzuk.

13. gaia.-Nafarroako Unibertsitate Publikoaren egitura. Oinarrizko Ikastegiak, Sailak, Unibertsitateko Ikerketa Institutuak. Beste hainbat zentro. Katedrak.

14. gaia.-Nafarroako Unibertsitate Publikoaren Gobernua. Eremu orokorreko eta mugatuko erakunde kolegiatuak eta lagun bakarrekoak. Erakundeak hautatzea eta baliogabetzea. Unibertsitateko Arartekoa.

15. gaia.-Gizartearen parte-hartzea unibertsitatean. Gizarte Kontseilua. 15/2008 Foru Legea, 2008ko uztailaren 2koa, Nafarroako Unibertsitate Publikoko Gizarte Kontseilua sortzeari buruzkoa. Unibertsitatearen eta gizartearen arteko harremanak sustatu eta bideratzeko fundazioak.

16. gaia.-Irakaskuntza-eskaintza Nafarroako Unibertsitate Publikoan. Graduak, graduondo ofizialak eta doktoretzak.

17. gaia.-Irakaskuntza-eskaintza Nafarroako Unibertsitate Publikoan. Titulu berekiak eta etengabeko prestakuntza unibertsitateetan. Arautegi erregulatzailea Nafarroako Unibertsitate Publikoan.

18. gaia.-Ikerketa Nafarroako Unibertsitate Publikoan. Unibertsitateko irakasleen ikerketa-lana. Ikerketa proiektuak. Ikerketa Emaitzak Bestetaratzeko Bulegoa (OTRI).

19. gaia.-NUP, Nazioarteko Bikaintasun Campusa. Campus Iberus proiektua.

20. gaia.-Kalitatea NUPen. Ikerketa eta irakaskuntzaren adierazle nagusiak. Jakintza bestetaratzea gizarteari.

21. gaia.-Nafarroako Unibertsitate Publikoko irakasle iraunkorren eta kontratupeko irakasle eta ikertzaileen araubidea.

22. gaia.-Nafarroako Unibertsitate Publikoko Administrazio eta Zerbitzuetako langileak.

23. gaia.-NUPen egitura administratiboa. Administrazio eta kudeaketa antolamendua.

24. gaia.-Ikasleak NUPen. Eskubideak eta betebeharrak. Ikasleen Kontseilua.

25. gaia.-Unibertsitate hedapena NUPen. Unibertsitate Osasungarriaren aldeko plana. Irisgarritasuna, eta berdintasun, ingurumen, boluntariotza eta ezgaitasun programak. Kultura, kirola.

26. gaia.-Euskara Nafarroako Unibertsitate Publikoan.

27. gaia.-Nafarroako Unibertsitate Publikoa Espainiako eta nazioarteko testuinguruan. NUP ingurune hurbilenean. Zein erakundetan parte hartzen duen. Moderna Plana. Nafarroaren Nazioartekotze Plana.

28. gaia.-Nafarroako Unibertsitate Publikoaren Plan Estrategikoak. Helburuak, emaitzak.

29. gaia.-NUPen Nazioartekotzea. Mugikortasun programak. Hitzarmenak.

30. gaia.-Nafarroako Unibertsitate Publikoaren aurrekontuak: egitura, edukia eta betetzeko arautegia.

Hirugarren atala.-Marketing eta instituzio komunikazioari buruzko gaiak.

1. gaia.-Instituzio komunikazioa. Instituzioen arteko komunikazioa, komunikazio politikak eta nortasuna. Sorrera eta gaur egungo egoera. Erakunde kanpainak.

2. gaia.-Irudi korporatibo kontzeptua. Irudi korporatiboaren garrantzia. Logotipoak, markak, ikurrak...

3. gaia.-Identitate korporatiboaren diseinua. Identitate korporatiboaren plangintza estrategikoa.

4. gaia.-Marka, identitate zeinu eta kontsumo objektu gisa.

5. gaia.-Merchandising-a irudi korporatiboaren tresna gisa.

6. gaia.-Komunikatzeko diseinatzea: kartelgintzaren ezaugarriak. Argitalpenen edizioa paperean: teknikak, tipografia eta irakurgarritasuna. Argitalpenen edizio elektronikoa: teknikak eta baliabideak.

7. gaia.-Iritzi publikoa. Definizioa eta ebaluatzeko metodoak. Iritzi publikoaren osaera. Prozesu psikologikoak eta soziologikoak.

8. gaia.-Ezaugarriak, sondeoen erabilera eta lege esparrua.

9. gaia.-Identitatea eta Kultura barne komunikazioan.

10. gaia.-Teknologia berriak eta komunikazioa: Intraneten analisia barne komunikazioaren euskarri gisa.

11. gaia.-Barne Komunikazioaren dimentsio intelektuala eta emotiboa: ezagutzaren kudeaketa eta motibazioa.

12. gaia.-Komunikazio kanalak. Komunikabideak eta publizitatea.

13. gaia.-Publizitatea. Izaera eta ezaugarriak. Eragina kontsumitzaileen portaeran. Medioen plangintza eta ikerketa. Publizitatearen eraginkortasunaren ebaluazioa.

14. gaia.-Komunikazio publizitarioa. Irudia, lengoaia eta publizitatea. Publizitaterako baliabideen plangintza eta kudeaketa.

15. gaia.-Publizitaterako baliabideak munduan eta Espainian. Publizitate agentziak. Publizitatearen lege eraentza Espainian. Espainiako publizitate arloaren ezaugarriak. Inbertsio publizitarioa komunikabideetan.

16. gaia.-Publizitate instituzionala. Helburuak. Xedeak bereiztea: merkatuaren segmentazioa. Komunikabide plana. Erakundeen publizitate kanpainen diseinua. Publizitate txertaketak prentsan, irratian eta Interneten.

17. gaia.-Publizitatea Nafarroan. Publizitatea eta komunikabideak. Publizitate instituzionala. Publizitate sektorea, agentziak eta erosketa zentralak. Ikuspegiak.

18. gaia.-Seinaletika identitate korporatiboaren tresna gisa. Kanpo eta barne errotulazio sistemak eta ikusizko identitate korporatiboarekin duten lotura.

19. gaia.-Instituzio publiko baten Komunikazio Plana.

20. gaia.-Instituzio publiko baten Marketing Plana.

21. gaia.-Internet masa komunikabide gisa. Komunikabide tradizionalak sarean; on-line komunikabideak; informazio eta iritzi pertsonalen orrialdeak.

22. gaia.-Webguneak. Kokapena. Irisgarritasuna. Ikusgarritasuna. Bilatzaileak, edukien sindikazioa.

23. gaia.-Gizarte sareak komunikazio tresna gisa.

24. gaia.-Nafarroako komunikabideak 1975. urtetik: prentsa, irratia, telebista eta Internet. Enpresa egitura eta komunikazio taldeak. Hedapena eta merkatuan sartzea. Euskarri eta ekimen berriak. Ikuspegiak.

25. gaia.-Komunikazioa azoketan eta ekitaldietan (erakustokia, liburuxkak, promoziorako opariak).

Laugarren zatia.-Irakasgai espezifikoak unibertsitateen komunikazio eta marketinari buruz.

1. gaia.-Komunikazioa unibertsitate eremuan. Unibertsitateen komunikazioaren eta irudiaren garrantzia Europako unibertsitate eremuaren esparruan.

2. gaia.-Unibertsitatea marka gisa. Kokapena gizartean, instituzio lidergoa. Komunikazioaren zeregina unibertsitate-marken eraketan.

3. gaia.-Komunikazio eta marketin planak Espainiako unibertsitateetan. AMIA, helburuak, estrategiak, ekintzak, adierazleak, ebaluazioa.

4. gaia.-Marketina unibertsitate testuinguruan. Plangintza, erakarpena eta zabalpena. Informatzeko eta orientatzeko kanpainak, aretoak eta azokak. Ateak zabaltzeko egunak.

5. gaia.-Barne komunikazioa Espainiako Unibertsitateetan. Barne komunikazioaren estrategiak, publikoak eta tresnak. Ikuspegiak.

6. gaia.-Espainiako unibertsitateetako komunikazio eta marketin kabineteak. Helburuak eta eginkizunak. Erabilitako baliabideak. Ezarpena Espainiako unibertsitateetan.

7. gaia.-Nafarroako Unibertsitate Publikoaren Komunikazio kabinetearen antolamendua, egitura eta eginkizunak.

8. gaia.-Marka Nafarroako Unibertsitate Publikoan. Ikurraren eta logotipoaren konbinazioen bertsioak eta erabilerak.

9. gaia.-NUPen identitate ikurrak erabiltzeko arauak. Nafarroako Unibertsitate Publikoaren Marka Grafikoaren eskuliburua. Atal eta aplikazio nagusiak.

10. gaia.-Barne eta kanpo errotulazio sistemak eta ikusizko identitate korporatiboarekin duten lotura. Nafarroako Unibertsitate Publikokoaren kasua.

11. gaia.-Barne komunikazioa NUPen. Komunikazio kanalak eta funtzioak. Publiko mapak.

12. gaia.-Kanpo komunikazioa NUPen. Funtzioak eta kanalak.

13. gaia.-Unibertsitatearen identitatea eta gizarte erantzukizuna. Unibertsitateentzako adierazleak. NUPen kasua.

14. gaia.-Publizitatea unibertsitateetan. Publizitate instituzionala eta merkataritza komunikazioa. Baliabideen plangitza prestatzea.

15. gaia.-Publizitate kanpainak eta marketina Nafarroako Unibertsitate Publikoan. Publikoen mapa. Ekintzak.

16. gaia.-Komunikazio eta marketin tresnak unibertsitatean ikasleak erakartzeko. NUPen kasua.

17. gaia.-Bigarren hezkuntzako ikasleen joerak. Informazioa biltzeko teknikak marketin kanpainak egiteko.

18. gaia.-Merchandising-aren kudeaketa Nafarroako Unibertsitate Publikoan.

19. gaia.-Teknologia berriak eta haien aplikazioa unibertsitateen instituzio-komunikaziorako kabineteetan. Errealitatea eta ikuspegiak. Interneten eta intraneten bidezko informazioa.

20. gaia.-Unibertsitateen estrategiak Webgunean. Helburuak, egitura, publikoak, edukiak.

21. gaia.-Unibertsitateko ikasleekiko komunikazioa plataforma mugikorren bidez (telefonoak, tabletak...).

22. gaia.-NUPen web-orrialdea komunikazio eta promozio tresna gisa. Helburuak, egitura, publikoak, edukiak.

23. gaia.-Gizarte sareak identitate korporatiboaren tresna gisa. NUPek horietan duen presentzia.

Oharra: Deialdi hau argitaratzen den egunean indarra duten arauei jarraituz eskatuko dira gai guztiak.

Iragarkiaren kodea: F1108785