1. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
34/2010 FORU DEKRETUA, maiatzaren 31koa, Pertsona Fisikoen Errentaren gaineko Zergaren Erregelamendua (maiatzaren 24ko 174/1999 Foru Dekretuak onetsia) eta Sozietateen gaineko Zergaren Erregelamendua (urriaren 13ko 282/1997 Foru Dekretuak onetsia) aldatzen dituena.
Informazio betebeharren arloan estatuko araudian sartu diren aldaketen ondorioz, beharrezkoa da Nafarroako Foru Komunitateko erregulazioa horietara egokitzea, kontuan hartuta, zerga administrazioen artean egon behar den ezinbesteko koordinazioaren esparruan, zergen aplikazioari eta kontrolari begira betebehar horiek hartu duten garrantzia. Estatuko araudi horretara moldatzeak Pertsona Fisikoen Errentaren gaineko Zergaren Erregelamendua aldatzea dakar, Nafarroan subjektu pasiboek bete behar dituzten informazio betebehar formal gehienak testu arauemaile horretan araututa baitaude.
Era berean, Sozietateen gaineko Zergaren Erregelamendua aldatu da, Baloreak Erregistratu, Konpentsatu eta Likidatzeko Sistemen Kudeaketarako Sozietatea baloreen zenbait mailegutatik ondorioztatzen diren errentei buruzko atxikipenak egin eta jasan beharretik salbuesteko asmoz.
Pertsona Fisikoen Errentaren gaineko Zergaren Erregelamenduari dagokionez, lehenik eta behin 62.1 artikuluaren e) letraren testua aldatu da, eta, hala, zehazten da ondasun higiezina edo ondasun higiezin baten gaineko eskubide erreala erostea finantzatzen duten maileguak eman edo horretan esku hartzen duten entitateek "finantzaketaren gainerako gastuak" ere jakinarazi beharko dituztela.
Bigarrenez, 62.10 artikulua aldatu da, enpresen gizarte aurreikuspeneko planetarako kontribuzioei buruzko informazioa eman beharretik salbuesteko plan horietarako kontribuzioak edo ekarpenak egiten dituzten enpresak edo entitateak. Izan ere, informazio betebehar hori 62. artikuluaren 15. idatz-zatian adierazita dago aseguru entitateetarako.
Hirugarrenez, 62. artikuluaren 17. idatz-zatia aldatu da. Alde batetik, kreditu entitateek beraiek emandako kredituetan eta maileguetan abenduaren 31n dauden saldoei buruz egin behar duten aitorpenean informazioa eman beharra mugatzen da 6.000 eurotik gorako saldoa duten kasuetara. Beste aldetik, ezarri da entitate horiek informazio gehiago eman behar dutela: txanponetan edo banku billetetan egiten diren ezarpenen, funtsen erabileren eta kobrantzen gaineko aitorpena, haien zenbatekoa 3.000 eurotik gorakoa denean (eurotan edo beste edozein monetatan emanda) eta edozein ingurune fisiko edo elektroniko erabiltzen dela.
Azkenik, 62. artikuluaren 21. idatz-zatian informazio betebehar berria ezarri da enpresaburuei eta profesionalei kobrantzak kudeatzeko zerbitzua kreditu edo zordunketa txartelen bidez eskaintzen dieten kreditu entitateetarako: kreditu edo zordunketa txartelen bidezko kobrantza sistema horri atxikitako enpresaburuek edo profesionalek egiten dituzten eragiketei buruzko urteko informazio aitorpena aurkeztu beharko dute, kobrantza horien urteko zenbateko garbia 3.000 eurotik gorakoa denean.
Sozietateen gaineko Zergaren Erregelamenduari dagokionez, 34. artikuluari 25. idatz-zatia gehitu zaio; hala, aurretik adierazi den bezala, atxikipena egin eta jasan beharretik salbuetsiko da Baloreak Erregistratu, Konpentsatu eta Likidatzeko Sistemen Kudeaketarako Sozietatea baloreen zenbait maileguri lotutako kasuetan.
Foru dekretu hau bi artikuluz eta azken xedapen batez osatua dago.
Horrenbestez, Ekonomia eta Ogasuneko kontseilariak proposaturik, Nafarroako Kontseiluak emandako txostenarekin bat, eta Nafarroako Gobernuak 2010eko maiatzaren 31ko bilkuran hartutako erabakiari jarraikiz,
DEKRETATU DUT:
1. artikulua. Pertsona Fisikoen Errentaren gaineko Zergaren Erregelamendua aldatzea. Erregelamendu hori maiatzaren 24ko 174/1999 Foru Dekretuaren bidez onetsi zen.
Maiatzaren 24ko 174/1999 Foru Dekretuaren bidez onetsitako Pertsona Fisikoen Errentaren gaineko Zergaren Erregelamenduko manu batzuk aldatu dira eta honela geratu dira:
Bat. 62.1.e) artikulua.
"e) Maileguaren edo eragiketaren zenbateko osoa, urtean kapitalaren amortizaziorako, interesetarako eta gainerako finantzaketa gastuetarako ordaindutako kopuruak."
Bi. 62.10. artikulua.
"10. Pentsio funtsak kudeatzen dituzten erakundeek urteko informazio aitorpena aurkeztu behar dute hurrengo urteko urtarrilean; bertan funtsei atxikitako planetako partaideak eta haiek (zuzenean zein planen sustatzaileen bidez) egindako ekarpenak adierazi behar dira.
Pentsio planen sustatzaileek, planetarako kontribuzioak egiten badituzte, urteko informazio aitorpena aurkeztu behar dute hurrengo urteko urtarrilean; bertan banaka agertu behar dira ekarpenak egin dituzten partaideak eta bakoitzak jarritako zenbatekoa.
Maiatzaren 12ko 3/1988 Foru Legearen 77.1 artikuluan aurreikusitako moduan pentsioengatiko konpromisoei aurre egiteko kontribuzio edo ekarpenak egiten dituzten enpresek edo entitateek (enpresen gizarte aurreikuspeneko planetarako kontribuzioak egiten dituztenak kanpo) hurrengo urteko urtarrilean urteko informazio aitorpena aurkeztu behar dute. Bertan banaka agertuko dira egindako kontribuzio edo zuzkiduren xede izan diren pertsonak eta bakoitzari dagokion zenbatekoa.
Gizarte aurreikuspeneko mutualitateek informazio aitorpena aurkeztu behar dute hurrengo urteko urtarrilean; bertan mutualista guztien zerrenda jarri behar da, bai eta bakoitzak zerga honi buruzko arauetan ezarritakoaren arabera murrizketa egiteko edo zerga oinarria txikitzeko arrazoi izan daitezkeen kontingentziak estaltzeko ordaindu duen kopurua ere.
Helbidea Europar Batasuneko beste herrialde batean duen pentsio funts batek Espainian langileentzako pentsio planak garatzen baditu Espainiako legeriaren pean, haren ordezkariak urteko informazio aitorpena aurkeztu beharko du hurrengo urteko urtarrilean; bertan adierazi behar dira funtsei atxikitako planetako partaideen zerrenda eta haiek (zuzenean zein pertsona baimenduen edo planen sustatzaileen bidez) egindako ekarpenen zenbatekoak.
Idatz-zati honetan aipatutako aitorpenetan aurreko urte naturaleko datuak eman behar dira."
Hiru. 62.17. artikulua.
"17. Kreditu entitateek eta, indarra duen araudiaren arabera, banku edo kreditu trafikoan jarduten duten gainerako entitateek urteko hurrengo informazio aitorpenak aurkeztu beharko dituzte:
a) Horiek emandako kredituetan eta maileguetan abenduaren 31n dauden 6.000 eurotik gorako saldoen gaineko aitorpena. Bertan adieraziko dira kreditu edo mailegu hartzailearen izen-deiturak edo sozietatearen izena edo izen osoa eta identifikazio fiskaleko zenbakia.
b) Txanponetan edo banku billetetan egiten diren ezarpenen, funtsen erabileren eta kobrantzen gaineko aitorpena, haien zenbatekoa 3.000 eurotik gorakoa denean (eurotan edo beste edozein monetatan emanda) eta edozein ingurune fisiko edo elektroniko erabiltzen dela.
Informazio aitorpen horretan ez dira adieraziko artikulu honen 9. idatz-zatian ezarritakoaren arabera zerga administrazioari jakinarazi behar zaizkion eragiketak.
Aitorpenak honako hauek bilduko ditu: eragiketa bakoitzaren zenbatekoa, eurotan; ezarpena, erabilera edo kobrantza den; eguna; egin duenaren identifikazioa; zordunketak edo ordainketak egiteko kontuaren zenbakia; eta dagokion eredua onesten duen foru aginduak ezarririko informazioa zehazteko garrantzitsua den beste edozein datu."
Lau. 62. artikuluaren 21. idatz-zatia 22. idatz-zati bihurtu da, eta 21. idatz-zatia honela idatzita geratu da:
"21. Bai banketxeek edo kreditu entitateek, bai, indarra duen araudiaren arabera, Espainian ezarrita dauden enpresaburuei eta profesionalei kobrantzak kudeatzeko zerbitzua kreditu edo zordunketa txartelen bidez eskaintzen dieten gainerako entitateek sistema horri atxikitako enpresaburuek edo profesionalek egiten dituzten eragiketei buruzko urteko informazio aitorpena aurkeztu beharko dute, kobrantza horien urteko zenbateko garbia 3.000 eurotik gorakoa denean.
Aitorpenean informazio hau jasoko da: enpresaburuen edo profesionalen identifikazio osoa, horiek sisteman lan egiteko erabiltzen duten merkataritza zenbakia, fakturaturiko urteko zenbatekoa, kobrantzak egiteko erabiltzen diren kontuen identifikazioa eta dagokion eredua onesten duen foru aginduak ezarririko informazioa zehazteko garrantzitsua den beste edozein datu."
2. artikulua. Urriaren 13ko 282/1997 Foru Dekretuaren bidez onetsi zen Sozietateen gaineko Zergaren Erregelamendua aldatzea.
Urriaren 13ko 282/1997 Foru Dekretuaren bidez onetsi zen Sozietateen gaineko Zergaren Erregelamenduaren 34. artikuluari 25. idatz-zatia gehitu zaio.
"25. Baloreak kontuko idazpenen bidez adierazteari eta burtsako eragiketak konpentsatzeari eta likidatzeari buruzko otsailaren 14ko 116/1992 Errege Dekretuaren 57. artikuluan ezarritakoa betetzeko egindako baloreen maileguengatik Baloreak Erregistratu, Konpentsatu eta Likidatzeko Sistemen Kudeaketarako Sozietateak jasotzen dituen eskubide ekonomikoengatiko ordainsariak eta konpentsazioak.
Era berean, aurreko lerroaldean aipatzen den entitateak ez du betebeharrik atxikipenak egiteko 57. artikuluan ezarritakoa betez hartutako baloreen maileguetatik ondorioztatzen diren eta entitate edo pertsona mailegu-emaileei ordaintzen dizkien ordainsari eta konpentsazioengatik. Hori guztia eginen da, errenta horiek mailegu-emailearen zerga pertsonala arautzen duen araudiaren arabera bidezkoa den atxikipenari lotzeari kalterik egin gabe. Bidezkoa denean, hari egindako ordainketan esku hartzen duen entitateak atxikipena egin beharko du eta ondorio horretarako ulertuko da ez duela egiten ordainketaren bitartekotza hutsa."
Azken xedapen bakarra.-Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2010eko maiatzaren 31n.-Nafarroako Gobernuko lehendakaria, Miguel Sanz Sesma.-Ekonomia eta Ogasuneko kontseilaria, Álvaro Miranda Simavilla.
Iragarkiaren kodea: F1009650
