Iragarkia

5. ALDIZKARIA - 2010eko urtarrilaren 11

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak abenduaren 22an emandako 248/2009 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko Artxiboetako goi mailako teknikari izateko bi lanpostu oposizio bidez betetzeko.

Nafarroako Administrazio Publikoaren Institutuko zuzendari kudeatzaileak abenduaren 22an emandako 248/2009 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Artxiboetako goi mailako teknikari izateko bi lanpostu oposizio bidez betetzeko deialdia onetsi da.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatu estatutua garatu eta betearazteko Sarrera Erregelamendua, gainerako aplikazio arauak eta deialdi honen oinarriak.

1.-Deialdiaren xedea.

1.1. Deialdi honen xedea da Artxiboetako goi mailako teknikari izateko bi lanpostu, funtzionario araubidekoak eta A mailakoak, oposizio bidez betetzea, txanda hauetan banatuta:

-Lanpostu bat txanda irekian.

-Lanpostu bat igoera txandan.

1.2. Deialdiko lanpostu hutsak hauek dira:

-2 lanpostu Vianako Printzea Erakundea-Kultura eta Turismo Departamentuan, plantilla organikoan 6905 eta 30682 zenbakiak dituztenak, eta destinoak Cordovillan eta Iruñean, hurrenez hurren.

1.3. Igoera txandako lanpostua, izangaiek hautaprobak gainditzeko behar den gutxieneko puntuazioa atera ez dutelako bete gabe geldituz gero, txanda irekikoari gehituko zaio.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan probak gainditu arren lanpostua eskuratzen ez dutenek aukera izanen dute txanda irekiko lanpostu hutsa eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.1.2 oinarriko betebehar berariazkoak betetzen ez dituzten igoera txandako izangaiek aukera izanen dute txanda irekiko lanpostuak eskuratzeko, aurreko lerroaldean adierazitako modu berean.

1.4. Lanpostuen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsariei Buruzko Behin-behineko Erregelamenduan A mailarentzat oro har ezarritakoak eta aplika daitezkeen gainerako xedapenetan kasu bakoitzerako ezartzen direnak.

1.5. Halaber, deialdi honen bidez sarrerako hautapen prozesuan lanposturik lortzen ez duten izangaiekin aldi baterako kontratatuak izateko izangaien zerrenda hauek osatu nahi dira, 10. oinarrian xedatutakoarekin bat:

a) Sarrerako hautapen prozesuko ariketa guztiak gainditu arren lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

b) Aldi baterako kontratuak egiteko izangaien zerrenda, oposizioan bigarren ariketa gainditu arren ariketa guztiak gainditu ez dituztenekin osatua, Administrazio Erroko eremuan aldi baterako kontratatzeko.

2.-Betebeharrak.

2.1. Oposizio honetan onartuak izateko, izangaiek, eskaerak aurkezteko epea bukatzen den egunean eta agiriak aurkezteko epea bukatzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak:

a) Espainiarra izatea, edo Europar Batasuneko beste estatu batekoa edo, Europar Batasunak sinatu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunek ukitutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Lizentziadun, ingeniari edo arkitekto titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) Bete behar dituen eginkizunetan aritzeko adinako gaitasun fisikoa eta psikikoa izatea.

e) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute ez dutela diziplina zehapenik edo zigor penalik beren estatuko funtzio publikoan sartzea eragozten dienik.

2.1.2. Igoera txandako izangaiek bete beharreko baldintzak.

Igoera txandako izangaiek, aurreko atalean adierazitako betebeharrez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio publikoetan bost urteko antzinatasun aitortua izatea, Nafarroako polizia kidegoetako kideen kasuan izan ezik, horiek frogatu beharko baitute zortzi urtez benetan eman dituztela zerbitzuak kidego horietan.

Nafarroako Administrazio Publikoen Zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan parte hartzeko gainerako baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiaren 3.3 oinarriaren hirugarren puntuan aipatzen den salbuespena salbuespen, izendatuak izateko proposatzen diren izangaiek deialdiaren 7.2 atalean ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabidea posta bulego batean aurkeztuz gero, gutun-azal irekian eginen da, postako langileek data eta zigilua jar ditzaten, ziurtatu aurretik.

Eskabideak deialdi honen eranskineko ereduari lotu behar zaizkio eta, horietan, izangaiek adierazi beharko dute eskatutako baldintza guztiak betetzen dituztela. Eskabide eredua Nafarroako Gobernuaren edozein erregistro bulegotan dago eskuragarri. Internet bidez ere lortzen ahal da, www.navarra.es, bai argitaratzen deneko aldizkari ofizialetik abiatuta bai aipu honetatik abiatuta: "Zerbitzuak", "Enplegu publikoa".

3.2. Eskabideari, behar bezala bete ondoren, agiri hauek erantsiko zaizkio:

A) Izangai guztiek aurkeztu beharreko agiriak:

Bat.-Nortasun agiri nazionalaren fotokopia, edo izangaiaren nortasuna frogatzen duen beste agiri baliokideren batena.

Bi.-Espedientea formalizatzeko eta azterketa eskubideetarako 40 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

-Behar den bezala betetako ordainketa gutunaren bidez (Nafarroako Foru Komunitateko banku entitateetan ordaintzeko). Interneten, deialdiaren iragarkian, agertzen da ordainketa gutunaren eredua, arestian aipatutako helbidean.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo hortik gorako ezgaitasun aitortua duten pertsonak. C) atalean ezarri bezala frogatu beharko da hori.

b) Deialdia argitaratu aurretik hilabetez edo luzaroago lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo aldaketarako ekintzetan parte hartzeari ere, justifikatutako kasuetan izan ezik.

Interesdunaren adierazpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Adierazpen eredua Nafarroako Gobernuko Informazio Bulegoan eskuratzen ahalko da, edo bestela Interneten bidez, arestian emandako helbidean.

B) Igoera txandako izangaiek aurkeztu beharreko berariazko dokumentazioa, izangai horiek Nafarroako Foru Komunitateko Administrazioa ez den Nafarroako beste administrazio publiko bateko langile finkoak badira edo Nafarroako Foru Komunitatera transferitutako Justizia Administrazioko zerbitzuei atxikitako langile finkoak badira:

A atalean adierazitakoaz gain, ondokoa aurkeztu beharko dute:

-deialdi honen 2.1.2. ataleko a), b) eta c) letretan aipatzen diren betebeharrak betetzen dituztela frogatzen duten agiriak.

C) Ezgaitasuna duten izangaiak.

3.2 oinarriaren A) atalean (tasak ordaindu beharrik ez izatea) eta 8. oinarrian (lanpostuak aukeratzeko lehentasuna) xedatutakoari dagokionez, eta denborak eta baliabideak egokitzea eskatzeko, %33ko edo hortik gorako ezgaitasuna duten izangaiek hori frogatu beharko dute, jatorrizko agiri hauetako baten bidez edo kopia konpultsatuaren bidez:

-IMSERSOk edo autonomia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Ezgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean adierazi beharko dute nolako ezgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, Zerbitzuen Katalogoko "Enplegu Publikoa" atalean, deialdiaren aipuan.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Nafarroako Administrazio Publikoaren Institutuko Sarrerarako Hautapenaren Zerbitzuko zuzendariak, erakunde autonomoko zuzendari kudeatzailearen ordez (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko du.

4.2. Behin-behineko zerrenda Nafarroako Aldizkari Ofizialean argitaratu eta biharamunetik, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gainean ebatzi ondoren, Administrazio Publikoaren Institutuko Sarrerarako Hautapenaren Zerbitzuko zuzendariak, erakunde autonomoaren zuzendari kudeatzailearen ordez (103/2008 Ebazpena, ekainaren 26koa), ebazpena emanen du izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko du.

4.4. Izangaiei ez zaizkie azterketa egiteko eskubideak itzuliko, baldin beraiei egotzitako arrazoiengatik baztertzen badira.

5.-Epaimahaia.

5.1. Epaimahaia honako kide hauek osatuko dute:

-Mahaiburua: Carlos Idoate Ezquieta jauna, Vianako Printzea Erakundea-Kultura eta Turismo Departamentuko Artxiboen eta Dokumentu Ondarearen Zerbitzuko zuzendaria.

-Ordezkoa: Fermín Guillorme Rodrigo jauna, Vianako Printzea Erakundea-Kultura eta Turismo Departamentuko Liburutegien Zerbitzuko zuzendaria.

-Mahaikidea: Susana Herreros Lopetegui andrea, Vianako Printzea Erakundea-Kultura eta Turismo Departamentuko Dokumentu Ondarea Kudeatzeko Ataleko burua.

-Ordezkoa: María Teresa Sola Landa andrea, Vianako Printzea Erakundea-Kultura eta Turismo Departamentuko Artxiboen eta Dokumentu Ondarearen Zerbitzuko Artxiboetako goi mailako teknikaria.

-Mahaikidea: Joaquim Llansó Sanjuan jauna, Nafarroako Unibertsitate Publikoko Artxibo Nagusiaren Ataleko burua.

-Ordezkoa: Félix Segura Urra jauna, Vianako Printzea Erakundea-Kultura eta Turismo Departamentuko Artxiboen eta Dokumentu Ondarearen Zerbitzuko Artxiboetako goi mailako teknikaria.

-Mahaikidea: langileen ordezkari bat, Administrazio Erroko Langileen Batzordeak proposaturik izendatua.

-Ordezkoa: langileen ordezkari bat, Administrazio Erroko Langileen Batzordeak proposaturik izendatua.

-Mahaikide idazkaria: José Miguel Gamboa Gamboa jauna, Vianako Printzea Erakundea-Kultura eta Turismo Departamentuko Araubide Juridikoaren Ataleko burua.

-Ordezkoa: Alejandro Alonso Zapata jauna, Vianako Printzea Erakundea-Kultura eta Turismo Departamentuko administrazio publikoko teknikaria (arlo juridikoa).

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, eta organo dei egileari hori jakinaraziko diote, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2010eko maiatzean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehenbiziko ariketa: teorikoa, gai zerrendako gaiei buruzko 25 galderari erantzun laburra ematea idatziz, epaimahaiak proposatzen dituen 33ren artetik. Bi ordu izanen dira gehienez.

Bigarren ariketa: teorikoa, hiru gai garatu beharko dira idatziz; eranskinean ageri den gai zerrendako zati bakoitzeko bat. Horretarako, epaimahaiak zati bakoitzeko bi gai aterako ditu zozketaz, eta izangaiek horietako bat, nahi dutena, garatu beharko dute. Hiru gaiak garatzeko lau ordu izanen dira gehienez.

Hirugarren ariketa: praktikoa, idatziz ebatzi beharko dira epaimahaiak proposatzen dituen lau kasu; horietako bat gutxienez, XVII. mendearen aurreko letraz idatzitako dokumentu bati buruzkoa izanen da. Lau ordu izanen dira gehienez.

Laugarren ariketa: ingeleseko probak. Borondatezko ariketa da eta ez baztertzailea, eta aurreko hiru ariketak gainditzen dituzten izangaiek egiten ahalko dute.

Idatzizko proba bat eta ahozko bat izanen ditu, izangaien jakite maila zehazteko.

Proba horiek Nafarroako Administrazio Publikoaren Institutuak prestatuko ditu eta haren emaitza loteslea izanen da epaimahaiarentzat.

6.3. Oposizioko ariketen balorazioan 100 puntu eman daitezke gehienez, honela banatuak:

-Lehenbiziko ariketa: gehienez ere 25 puntu.

-Bigarren ariketa: gehienez ere 25 puntu.

Lehen zatiko gaia: gehienez ere 5 puntu.

Bigarren zatiko gaia: gehienez ere 5 puntu.

Hirugarren zatiko gaia: gehienez ere 15 puntu.

-Hirugarren ariketa: gehienez ere 40 puntu. Kasu bakoitzak 10 puntu izanen ditu gehienez.

-Laugarren ariketa: gehienez ere 10 puntu.

6.4. Lehenbiziko, bigarren eta hirugarren ariketak baztertzaileak izanen dira. Baztertuta geldituko dira kalifikaziorik onena lortzen duen izangaiaren puntuazioaren erdia gutxienez lortzen ez dutenak; betiere, hura probaren gehieneko puntuazioaren 1/3 edo handiagoa bada.

6.5. Lehenbiziko, bigarren eta hirugarren ariketak plika sistemaren bidez eginen dira.

6.6. Ariketa bakoitza zuzendu ondoren, kalifikazio epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez nor diren frogatzen ez dutenak oposiziotik baztertuko dira.

6.8. Hautaprobak egiteko, ezgaitasun aitorturen bat dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

7.-Probak gainditzen dituztenen zerrenda, izendapen proposamena eta agirien aurkezpena.

7.1. Azken ariketaren kalifikazioa bukaturik, epaimahaiak jendaurrean jarriko du probak gainditzen dituztenen zerrenda, oposizioan lortutako kalifikazioekin, egin direneko tokian eta Nafarroako Gobernuaren iragarki oholean. Gero, zerrenda hori Nafarroako Administrazio Publikoaren Institutuko zuzendari kudeatzaileari igorriko dio, puntuaziorik altuenak izanik deialdiko lanpostuetan sartzen ahal diren izangaiak izendatzeko proposamenarekin eta espediente osoarekin batera. Proposamen hori Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik gertatuz gero, hirugarren ariketan puntu gehien lortzen dutenen alde ebatziko da. Eta hala ere berdinduta segitzen badute, lehenbiziko ariketan eta bigarren ariketan lortutako puntuazioak hartuko dira kontuan, ordena horrexetan.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiek berariazko inprimaki batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Proposatutako izangaiek Espainiako nazionalitatea ez badute, zinpeko aitorpen bat aurkeztu beharko dute, adierazteko ez dutela beren Estatuko funtzio publikoan sartzea eragozten dien diziplina zehapenik edo zigor penalik.

e) Zin egin edo hitz ematea Nafarroako Foru Araubidea errespetatuko dutela, Konstituzioari eta legeei men eginen dietela eta karguari dagozkion eginkizunak zuzen beteko dituztela.

Deialdi hau egin ez duen Nafarroako beste administrazio publikoren bateko langile finkoek edo Nafarroako Foru Komunitateari transferitutako Justizia Administrazioko zerbitzuei atxikitako langile finkoek, gainera, beste ziurtagiri bat aurkeztu beharko dute, aurreko administrazioko espediente pertsonalean ageri diren inguruabar eta aurrekari guztiak frogatzeko, hots, sarrerari, antzinatasunari, mailari, egoera administratiboari eta abarri buruzko guztiak.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barnean, eta aski justifikaturik dauden ezinbesteko kasuetan izan ezik, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, beren eskabidearen faltsukeria dela-eta legokiekeen erantzukizuna galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Nahitaezko betebehar eta baldintzen frogagiriez gain, Funtzio Publikoaren Zuzendaritza Nagusiak, bere eskudantziak erabiltzeko, beste edozein agiri eska diezaioke izangaiari, eta horrek deialdi honen 7.2 oinarrian ezarritako moduan aurkeztu beharko du.

8.-Lanpostu hutsak hautatzea.

8.1. Aurreko oinarrian xedatu dena betetzen duten izangaiek Nafarroako Administrazio Publikoaren Institutuak (NAPI) hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharren arabera horiek aldatzea erabakitzen bada.

8.2. Lanpostu hutsak aukeratzerakoan, %33ko ezgaitasun aitortua edo handiagoa duten izangaiek lehentasuna izanen dute gainerako izangaien aurretik, kontuan hartu gabe zein txandaren bidez parte hartu duten.

Hala izanagatik ere, ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

8.3. Hautaprobak igoera txandan gainditzen dituzten izangaiek deialdiko lanpostuak betetzeko lehentasuna izanen dute txanda irekiko izangaien aldean, aurreko atalean adierazitako salbuespenarekin betiere.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Artxiboetako goi mailako teknikari lanpostuan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, eta Nafarroako Foru Komunitateko funtzionarioen arloan indarra duten xedapenetan ezarri diren eskubide eta betebehar guztiak izanen dituzte. Gizarte Segurantzako araubide orokorrean afiliatuko dira, araubide horretan ezarritakoaren babesean.

Aurrekoa gorabehera, Nafarroako Administrazio Publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein montepioren eskubide pasiboetan sarturik daudenek bi aukera izanen dituzte: Nafarroako Foru Komunitateko administrazio publikoen montepioan segitzea, martxoaren 5eko 10/2003 Foru Legearen bidezko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den araudian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako Aldizkari Ofizialean argitaratuko da eta izangai izendatuek hilabeteko epean jabetu beharko dute lanpostuez, izendapenaren jakinarazpenetik kontatzen hasita.

Aipatutako epean eta ezinbesteko kasuetan izan ezik, izangairen bat lanpostuaren jabe egiten ez bada, Foru Komunitateko Administrazioaren funtzionario izateko eskubide guztiak galduko ditu. Hala gertatzen bada, deialdiaren 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Kontuan harturik Nafarroako Administrazio Publikoan sartzeko Erregelamenduaren 42. artikulua, Lehendakaritza, Justizia eta Barneko kontseilariaren azaroaren 14ko 146/2005 Foru Agindua (Lanpostuak aldi baterako betetzeko kudeaketa arauak onetsi zituena) eta oinarri honexetan ezarritako prozedura, eta horiei jarraikiz, aldi baterako kontratazioetarako izangaien zerrenda hauek prestatuko dira:

a) Sarrerako hautapen prozesuko ariketa guztiak gainditu arren lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

b) Hautapen prozesuko bigarren ariketa gainditu arren ariketa guztiak gainditu ez dituzten izangaien zerrenda, Administrazio Erroan aldi baterako kontratatuak izateko.

10.2. Probak gainditu arren lanposturik lortu ez duten izangaien zerrenda eta Administrazio Erroan aldi baterako kontratatzeko izangaien zerrenda.

Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpen bidez onetsiko dira probak gainditu arren lanposturik lortzen ez duten izangaien zerrenda eta bigarren ariketa gainditzen dutenena, une horretan indarrean diren kudeaketa arauekin bat, eta argitaratu eginen dira Nafarroako Gobernuko iragarki oholean (Karlos III.aren etorbidea, 2, atalondoa, Iruña) eta Nafarroako Gobernuaren web orrian: www.navarra.es.

Hauxe izanen da aldi baterako kontratazio zerrenden ordena: oposizioa gainditu arren lanposturik lortzen ez dutenen kasuan, sarrerako hautapen prozesuan lortutako puntuazioarik handienaren arabera; gainerako izangaien kasuan, gainditutako ariketetan lortutako puntuazioen batura. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

Aldi baterako kontrataziorako izangaien zerrendan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, horiek oinarri honetan adierazten den bezala frogatu beharko dituzte.

Izangaiei deitu eta, kasua bada, haiek kontratatzerakoan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ematen dituen Lehendakaritza, Justizia eta Barneko kontseilariaren azaroaren 14ko 146/2005 Foru Agindua (144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiterakoan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriaren 4. atalean ezarritakoa.

Kontratatzeko deitzen diren izangaiek bakarrik aurkeztu beharko dituzte 2.1 oinarrian tituluei buruz eskatzen zaiena betetzen dutela frogatzeko agiriak; hain zuzen ere kontratua formalizatzen den unean, jatorrizko agiriak edo behar bezala konpultsatutako kopiak aurkeztuz.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte; betiere, parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

10.3. Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrendak onetsiko dira eta Nafarroako Gobernuaren iragarki oholean argitaratuko (Karlos III.aren etorbidea, 2, atalondoa, Iruña).

10.5. Hauxe izanen da aldi baterako kontratazio zerrenden ordena: oposizioa gainditu arren lanposturik lortzen ez dutenen kasuan, sarrerako hautapen prozesuan lortutako puntuazioarik handienaren arabera; gainerako izangaien kasuan, gainditutako ariketetan lortutako puntuazioen batura. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11.-Errekurtsoak.

Epaimahaiak ematen dituen egintzen eta ebazpenen kontra, gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurritu nahi den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoari jarraikiz.

Iruñean, 2009ko abenduaren 22an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

II. ERANSKINA

Gai zerrenda

Lehen zatia: Nafarroako Foru Komunitateko Administrazioaren oinarrizko araudia.

1. gaia.-Espainiako 1978ko Konstituzioa: printzipio orokorrak. Funtsezko eskubide eta betebeharrak. Botere Judiziala. Gorte Nagusiak: osaera eta eginkizunak. Gobernua eta Estatuko Administrazioa. Auzitegi Konstituzionala: osaera, izaera eta eskumenak.

2. gaia.-Europar Batasuna. Parlamentua. Europako Kontseilua. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko antolamendu juridikoaren iturriak: jatorrizko zuzenbidea eta zuzenbide eratorria.

4. gaia.-Espainiako 1978ko Konstituzioaren lehen xedapen gehigarria. Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua. Nafarroaren eskumenak.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua. Funtzioak. Osaera, izendapena, eratzea eta kargu-uztea. Eskudantziak eta eskumenak. Funtzionamendua. Laguntzako eta sostenguko organoak. Nafarroako Parlamentuaren erantzukizun politikoa, kontrola eta desegitea. Nafarroako Gobernuko lehendakaria.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Foru Komunitateko Administrazioarekiko harremanetan. Antolaketa: printzipio nagusiak eta egitura organikoa, kide anitzeko organoak eta administrazio organoen eskumenak.

8. gaia.-Administrazio publikoen araubide juridikoaren printzipio orokorrak. Administrazio publikoen organoak. Prozedura administratiboko interesdunak.

9. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

10. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

11. gaia.-Kontratu Publikoei buruzko Foru Legea: aplikaziorako arau orokorrak eta eremua. Kontratistak. Administrazio publikoen kontratu guztietarako xedapenak. Esleipenaren aurreko jarduketak.

12. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Egoera administratiboak. Funtzionarioen eskubideak, betebeharrak eta bateraezintasunak. Ordainsariak.

13. gaia.-11/2007 Foru Legea, apirilaren 4koa, Nafarroako Foru Komunitateko Administrazioan Administrazio Elektronikoa ezartzeari buruzkoa.

14. gaia.-Abenduaren 29ko 21/2005 Foru Legea, Politika Publikoak eta Zerbitzu Publikoen Kalitatea Ebaluatzeari buruzkoa.

15. gaia.- Abenduaren 13ko 15/1999 Lege Organikoa, Datu Pertsonalak Babesteari buruzkoa. 1720/2007 Errege Dekretua, abenduaren 21ekoa, Datu Pertsonalak Babesteari buruzko abenduaren 13ko 15/1999 Lege Organikoa garatzeko Erregelamendua onesten duena.

16. gaia.-12/2007 Foru Legea, apirilaren 4koa, Nafarroako Artxibo eta Dokumentuei buruzkoa.

17. gaia.-75/2006 Foru Dekretua, urriaren 30ekoa, Dokumentuen Ebaluaziorako Batzordearen osaera, antolamendua eta funtzionamendua arautzeko Erregelamendua onesten duena.

18. gaia.-11/2007 Legea, ekainaren 22koa, herritarrak zerbitzu publikoetara bide elektronikoz sartzeari buruzkoa. LAECSP-ak zer garapen duen autonomia erkidegoetan eta Estatuko Administrazio Orokorrean.

19. gaia.-1/1996 Legegintzako Errege Dekretua, apirilaren 12koa, Jabetza Intelektualari buruzko Legearen Testu Bategina onesten duena, arlo horretan indarra duten lege xedapenak erregularizatu, argitu eta bateratzeko. Europako Kontseiluak eta Parlamentuak horri buruz emandako zuzentarauak. Artxiboen arloan duten aplikazioa.

20. gaia.-Artxiboak eta dokumentazioa Espainiako legedia zibil, penal eta prozesalean.

Bigarren zatia: Nafarroako erakundeak eta dokumentazio iturriak.

1. gaia.-Nafarroako Erresumako erakundeak aztertzeko dokumentazio iturriak (VIII.-XVI. mendeak).

2. gaia.-Erdi Aroko kronikariak. Kronikari nafarrak eta Nafarroaren gaineko kronikak.

3. gaia.-Nafarroako Erresumako lege bildumak (X.-XVI. mendeak).

4. gaia.-Iruñeko Erresumaren gobernua Goi Erdi Aroan (X.-XIII. mendeak). Erregea eta haren ordezkariak. Errege kuria.

5. gaia.-Nafarroako Erresumaren gobernua eta administrazioa. Erakundeen sendotzea eta lurraldearen antolamendua (XIII.-XVI. mendeak). Gorteak. Errege Kontseilua. Gorteko Auzitegia. Kantzilleria.

6. gaia.-Nafarroako erakunde erlijiosoak. Apezpikutzak, monasterioak eta erlijio ordenak, Trentoko Kontzilioa baino lehenagokoak.

7. gaia.-Aro Modernoko Nafarroako historioa aztertzeko iturriak (XVI.-XVIII. mendeak).

8. gaia.-Nafarroa Gaztelako Koroan sartzea: historia, izaera eta ondorio instituzionalak.

9. gaia.-Nafarroako Gorteak. Sorrera eta izaera. Eskudantziak eta osaera. Erresumako Diputazioa.

10. gaia.-Erregeordetza. Erdi Aroko aurrekariak. Kargudunak: eskudantziak, jatorri soziala eta jokabide politikoa.

11. gaia.-Errege Kontseilua eta Gorte Nagusia. Erdi Aroko sorburua, eginkizunak eta bilakaera.

12. gaia.-Comptos Ganbera. Sorrera eta bilakaera. Egitura eta eginkizunak 1836an desagertu zen arte.

13. gaia.-Nafarroako historiografia Aro Modernoan. Urte-liburuak, kronikak eta kronikariak.

14. gaia.-Nafarroako merkataritza eta hiria. Jatorria eta bilakaera historikoa Antzinako Erregimenean.

15. gaia.-Nafarroako zuzenbidea Aro Modernoan. Legeak, laidoak eta ordenantzak.

16. gaia.-Nafarroako komentuak eta erlijio ordenak Aro Modernoan eta Garaikidean.

17. gaia.-Nafarroako gizartea Antzinako Erregimenean. Erdi Aroko jatorria eta bilakaera. Gizarte taldeak eta haien ordezkaritza erakundeetan.

18. gaia.-Nafarroako historiografia Aro Garaikidean. Erudiziotik ikerketa zientifiko eta unibertsitariora.

19. gaia.-Foruen Aldaketari buruzko 1841eko Legearen (Lege Itundua) sorrera eta esanahia. Nafarroako Foru Zuzenbidea aplikatzean sortutako gatazkak eta bilakaera.

20. gaia.-Nafarroako Foru Administrazioa 1836tik 1982ra bitarte. Berezitasunak, erakundeak eta egitura.

21. gaia.-Politika eta gizartea XIX. mendean. Nafarroako desamortizazio prozesuak eta haien eragina gizartean.

22. gaia.-Industrializazio eta urbanizazio prozesua XX. mendean. Demografian, gizartean eta ideologian eragindako aldaketak.

23. gaia.-Mugimendu sindikala Nafarroan. Sindikatu nagusien jatorria eta garapena. Hori aztertzeko dokumentazio iturriak eta bibliografia.

24. gaia.-Osasun eta ongintza arloko erakundeak Nafarroan. Sorrera eta bilakaera.

25. gaia.-Nafarroa 1978ko Konstituzioaz geroztik. Alderdi politiko, sozio-ekonomiko eta kulturalak. Hori aztertzeko dokumentazio iturriak eta bibliografia.

26. gaia.-Udalerriak eta kontzejuak. Legezko kontzeptua, bilakaera historikoa eta eskumenak. Dokumentazio iturriak eta bibliografia.

27. gaia.-Justizia Administrazioa eta botere judiziala Aro Garaikidean. Dokumentazio iturriak eta bibliografia. Nafarroari buruzko aipamen berariazkoa.

28. gaia.-Notariotzaren eta erregistroaren instituzioa. Dokumentazio iturriak eta bibliografia.

29. gaia.-Nafarroako hezkuntza erakundeak XIX. eta XX. mendeetan. Aurrekariak eta bilakaera. Iturriak.

30. gaia.-Lege bildumak eta errepertorioak Espainia garaikidean (XIX.-XX. mendeak). Argitalpen ofizial eta ez-ofizialak.

Hirugarren zatia: Artxibozaintza.

1. gaia.-Artxibozaintza eta artxiboa. Kontzeptua, oinarriak eta bilakaera historikoa. Nortasun profesionala: ikuspegi tradizionala eta lanerako aukerak. Kode deontologikoa.

2. gaia.-Artxibozaintzaren zientzia lagungarriak. Dokumentazioa artxibozaintzaren ikuspegitik antolatzea: ezaugarriak eta aplikazioa.

3. gaia.-Dokumentua. Kontzeptu orokorra. Dokumentu multzoak. Artxiboko dokumentua eta informazio-laguntzarako dokumentua. Dokumentuen balioa. Dokumentuen bizitza zikloaren teoria.

4. gaia.-Dokumentu idatzia. Diplomen azterketa: dokumentuaren barne eta kanpo ezaugarriak. Dokumentu tradizioa: kontzeptua eta bilakaera dokumentu produkzioan. Dokumentu elektronikoari aplikatzea.

5. gaia.-Administrazioko dokumentazioa. Espedientea egin, tramitatu eta artxibo gisa kudeatzea. Dokumentu elektronikoari aplikatzea.

6. gaia.-Idaztegiak eta idazkerak. Nafarroako Erresumako idazkeraren berezko ezaugarriak eta kanpoko eraginak.

7. gaia.-Sailkatze kronologikoak. Horien aplikazioa IX. mendetik XVI. mendera bitarteko Nafarroako dokumentazioan.

8. gaia.-Zigilugrafia. Kontzeptu orokorrak. Zigiluen sailkapena, deskribapena eta kontserbazioa. Nafarroako ikerketak eta bildumak.

9. gaia.-Dokumentu eta artxiboen kudeaketarako politikak eta programak. Kontzeptua eta ezaugarriak. Osagaiak.

10. gaia.-Nazioarteko normalizazioa dokumentuen kudeaketan. ISO 15489 araua: ezaugarriak eta elementuak. DIRKS metodologia, dokumentuen kudeaketarako sistema bat ezartzeko.

11. gaia.-Artxibo sistema. Kontzeptua eta ezaugarriak. Osagaiak. Artxibo sistemak eta sareak. Nafarroako Artxibo Sistema.

12. gaia.-Funtsen eta sailen identifikazioa. Metodologia eta aplikazioa dokumentuen artxibozaintzako tratamenduan.

13. gaia.-Artxibozaintzako tratamenduko antolakuntza. Sailkapen sistemak eta antolaketa motak. Sailkapen taula: definizioa, ezaugarriak, motak eta prestatzeko metodologia.

14. gaia.-Dokumentuen ebaluazioa. Osagaiak. Irizpide metodologikoak. Tresnak: dokumentuen ebaluazioaren espedientea, kontserbazio egutegia. Ingurune elektronikoan aplikatzea.

15. gaia.-Artxibo deskribapena. Nazioarteko normalizazioa. Artxibo Deskribapeneko Nazioarteko Araua, ISAD (G), eta Espainian duen garapena. NEDA batzordea.

16. gaia.-Dokumentu deskribapena eskuragarri izateko puntuen normalizazioa eta kontrola. Autoritateen erregistroak. ISAAR (CPF) araua. Espainian aplikatzean izan diren esperientziak.

17. gaia.-Artxiboko instituzioen deskribapenerako ISIAH araua eta funtzioen deskribapenerako ISDF araua.

18. gaia.-Datuen formatua, artxiboetako informazioa trukatzeko. EAD eta EAC arauak.

19. gaia.-Tesauroak eta hizkuntza dokumentalak. Definizioa eta ezaugarriak. Lanketa prozesua. Haien aplikazioa artxiboko deskribapenean.

20. gaia.-Funtsen sarrerak eta transferentziak. Jarri eta biltegiratzea. Formatu bereziak: kontserbatu eta zabaltzeko arazoak eta konponbideak.

21. gaia.-Artxiboa dokumentuak gorde eta erabili ahal izateko leku gisa: eraikina, gordailua eta instalazioak.

22. gaia.-Kontserbazioa planifikatzea. Ingurumeneko eragile hondatzaileak aurreikusi eta zuzentzeko neurriak.

23. gaia.-Artxiboetako segurtasuna. Hondamendiei aurrea hartzea eta salbamendurako planak. Funtsezko dokumentuen programak.

24. gaia.-Dokumentuen euskarri tradizionalak eta teknologikoak. Dokumentuak hondatzeko faktoreak: berezkoak, ingurumen arlokoak, biologikoak, gizakiak eragindakoak eta hondamendiak. Materialaren kontserbazioa.

25. gaia.-Artxiboetako kopiagintza. Prozedura teknikoak, plangintza eta zerbitzua.

26. gaia.-Informatika dokumentuen kudeaketari eta artxiboei aplikatua. Oinarrizko kontzeptuak eta erronka nagusiak. Datu-baseen kudeaketa. Informazioa biltegiratu, berreskuratu eta zabaltzea.

27. gaia.-Dokumentu grafikoen eta ikus-entzunezkoen kudeaketa artxiboetan.

28. gaia.-Dokumentuen kudeaketa ereduak nazioartean. Kontzeptuaren sorrera eta bilakaera eremu geografiko eta administratibo desberdinetan.

29. gaia.-Zabalkundea. Administrazioarentzako eta herritarrendako zerbitzua.

30. gaia.-Artxiboen eginkizuna hezkuntza eta kultura aldetik. Marketina artxiboen arloan eta zerbitzuaren kalitatea. Zerbitzuen gutunak. Nafarroako kasua.

31. gaia.-Genealogia ikerketak eta artxiboa. Zabalkunderako irizpideak eta gaiaren egoera.

32. gaia.-Artxiboen Nazioarteko Kontseilua. Eginkizunak. Egitura eta funtzionamendua. Plan estrategikoak. Argitalpenak. UNESCOk artxiboen eta dokumentuan arloan dituen programak.

33. gaia.-Dokumentu ondarea Espainian. Horri buruzko legedia. Eskumenak. Dokumentu ondarea osatzen duten ondasunen zentsua. Nafarroako kasua.

34. gaia.-Espainiako Artxibo Historiko Probintzialak. Nafarroako kasua.

35. gaia.-Nafarroako artxibo nagusiak. Antolaketa, funtsak eta deskribatzeko tresnak. Nafarroako dokumentazioa beste artxibo nazional eta nazioarteko batzuetan.

36. gaia.-Artxibo pribatuak. Kontzeptua eta motak. Ezaugarriak eta artxiboen tratamendua.

37. gaia.-Artxibo familiarrak. Instalatu eta antolatzeko zailtasunak. Ereduak eta konponbideak.

38. gaia.-Enpresetako artxiboak. Artxibo horiek sortu, antolatu eta tratatzeko ezaugarri bereziak. Haien garrantzia historia ekonomikoaren ikerketarako iturri gisa. Enpresetako artxiboen egoera Espainian.

39. gaia.-Informazioaren eta komunikazioaren teknologiak, eta horien eragina dokumentuen eta artxiboen kudeaketan. Erronka nagusiak.

40. gaia.-Artxiboak eta Internet. Artxiboen eta artxibozaintzaren eginkizuna informazioaren gizartean. Artxibo espainiarrak Interneten. PARES ataria.

41. gaia.-Dokumentu elektronikoak. Definizioa eta ezaugarriak. Betebeharren ereduak.

42. gaia.-Artxiboko dokumentu elektronikoen epe luzerako kontserbazioa. OAIS eredua.

43. gaia.-Metadatuak. Helburua eta ezaugarriak. Metadatu motak. Metadatuen kudeaketa. Metadatuen ereduak. Metadatuen eskemak: horiek prestatzeko metodologiak. Nazioarteko erreferente nagusiak.

44. gaia.-e-Administrazioa. Definizioa eta ezaugarriak. Europako esparrua. Administrazio elektronikoa Espainian: Estatuko Administrazioa, Autonomia erkidegoetako Administrazioa, Toki Administrazioa. Perspektibak eta errealitateak. Plan estrategikoak eta ekintzak.

45. gaia.-Notariotzako dokumentazioa. Motak eta ezaugarriak. Nafarroako egoeraren erreferentzia.

46. gaia.-Osasun arloko dokumentazioa. Pasiboen historia klinikoaren tratamendua, artxibozaintzaren ikuspegitik. Legedia eta araudia.

47. gaia.-Arkitekturako dokumentazioa. Instalatu, eskuratu eta erreproduzitzeko proposamenak. Legedia eta araudia.

48. gaia.-Epaitegietako dokumentazioa. Epaitegietako artxiboak modernizatzeari buruzko araudia. Nafarroako epaitegietako funtsak.

49. gaia.-Ogasuneko dokumentazioa. Dokumentazioaren tratamendurako arauak. Foru Ogasunaren modernizazioa eta haren eragina dokumentazioan.

50. gaia.-Nafarroako elizaren artxiboak. Funtsak eta deskribatzeko tresnak.

51. gaia.-Nafarroako udal artxiboak. Funtsak, antolakuntza eta zabalkundea.

Oharra.-Zein egunetan argitaratzen den deialdia Nafarroako Aldizkari Ofizialean, egun horretan indarra duen legediaren arabera eskatuko dira gai guztiak.

Iragarkiaren kodea: F0929026