Iragarkia

26. ALDIZKARIA - 2010eko otsailaren 26a

1. NAFARROAKO FORU KOMUNITATEA

1.7. BESTELAKOAK

ERABAKIA, Gizarte Kontseiluarena, Nafarroako Unibertsitate Publikoak 2010eko ekitaldirako duen aurrekontua eta bestelako arau osagarriak onesten dituena.

Unibertsitateko Estatutuen 134. artikuluan xedatutakoaren arabera, Unibertsitate Publikoaren aurrekontua publikoa, bakarra eta orekatua izango da, baimenduriko gastu guztiak hartuko ditu, eta, Unibertsitateei buruzko Lege Organikoaren 81. artikuluak ezarritakoaren arabera, Unibertsitateak urte natural bakoitzean egiten dituen diru-sarreren balioespena jasoko du. Halaber, aipatu agindu horretan xedatzen da Kudeatzailetzak aurrekontuaren aurreproiektua egingo duela, eta honek Foru Erkidegoari eskatzen zaion finantzabidearen zenbatekoa adieraziko du. Eskatutako finantzabidea zehazturik, Gobernu Kontseiluak aurrekontu-proiektua onetsiko du, eta Gizarte Kontseiluari onesteko emango dio.

Gizarte Kontseiluak 2009ko uztailaren 2an hartutako erabakiaren ondorioz ezarri ziren Nafarroako Unibertsitate Publikoaren 2010. urteko aurrekontuaren proiektua prestatzeko irizpide orokorrak.

Irizpide horien arabera, Plangintza, Prospektiba eta Ekonomia Gaietarako Errektoreordetzak behar den analisia egin du, eta guztirako zenbatekoak ezarri ditu, Gizarte Kontseiluak onetsitako arauak aplikatu ondoren.

Kontu-hartzailetzaren txostena ikusirik.

Gobernu Kontseiluak proposatuta, eta Ekonomia Batzordeak aldeko txostena emanda, honako hau da Nafarroako Unibertsitate Publikoaren Gizarte Kontseiluak, 2010eko urtarrilaren 15ean egindako bileran, hartu duen

ERABAKIA

1/2010

Lehenengoa.-Nafarroako Unibertsitate Publikoaren 2010. urteko aurrekontua onestea, bere diru-sarreren eta gastuen egoera-orrien arabera. Aurrekontua 75.917.259,64 euro-koa da, eta honela dauzka banatuta gastuak eta diru-sarrerak:

GASTUAK:

I. kapitulua-Langileak: 51.076.078,77 euro.

II. kapitulua.-Ohiko ondasun eta zerbitzuen gastuak: 15.396.851,23 euro.

III. kapitulua.-Finantza gastuak: 10.723,24 euro.

IV. kapitulua.-Transferentzia arruntak: 1.303.010,19 euro.

VI. kapitulua.-Inbertsio errealak: 7.998.761,21 euro.

IX. kapitulua.-Finantza-pasiboak: 131.835,00 euro.

Gastuak osotara: 75.917.259,64 euro.

DIRU-SARRERAK:

III. kapitulua.-Tasak, prezio publikoak eta bestelako diru-sarrerak: 9.056.826,95 euro.

IV. kapitulua.-Transferentzia arruntak: 62.881.042,00 euro.

V. kapitulua.-Ondarezko diru-sarrerak: 277.290,69 euro.

VII. kapitulua.-Kapital transferentziak: 2.788.600,00 euro.

VIII. kapitulua.-Finantza-aktiboak: 913.500,00 euro.

Diru-sarrerak guztira: 75.917.259,64 euro.

Bigarrena.-Nafarroako Unibertsitate Publikoko Irakaskidegoetako irakasle eta ikertzaile funtzionarioen lansariak, beren lansariei aplikatzen ahal zaien Estatuko arauaren ehunekoan handituko dira.

Lan kontratupeko irakasle eta ikertzaileen lansariak, Hitzarmen Kolektibo indardunean eta aplikatu beharreko gainerako arauetan ezartzen direnak izango dira.

Administrazio eta zerbitzuetako langileen lansariak, Nafarroako 2010eko Aurrekontu Orokorrei buruzko Foru Legean, Nafarroako Administrazio Publikoen zerbitzuko funtzionarioen lansariak handitzen diren ehuneko berean handituko dira.

Era berean, Zerbitzu zuzendarien, Gizarte Kontseiluko idazkariaren, kabineteburuaren eta Analisi eta Prospektibako aholkulariaren lansariak Nafarroako 2010eko Aurrekontu Orokorrei buruzko Foru Legean, Nafarroako Administrazio Publikoen zerbitzuko zerbitzu zuzendarientzat ezartzen direnak izango dira, indarrean dauden legeek ezarritakoaren arabera, gradu, antzinatasun eta familia-laguntzarengatik jasotzen ahal dituen lansarien kaltetan gabe, eta jatorrizko izendapenarengatik plantilla organikoan modu espezifikoan esleituta leuzkakeen osagarrien edo bere zerbitzu-ematearen baldintza berezien araberako beste edozeinen kaltetan gabe.

Hirugarrena.-Unibertsitateak 2010. urterako duen aurrekontua Betetzeko Oinarriak onestea.

Laugarrena.-2010. urteko aurrekontuaren II. eranskinean azaltzen diren prezio publikoak onestea.

Bosgarrena.-Unibertsitate-Gizarte Fundazioaren 2010eko aurrekontua onestea. 2010eko aurrekontuaren III. eranskinean agertzen da.

Seigarrena.-Lurralde nazional osoan ofizialak eta baliodunak diren tituluak erdiesteko ikasketen prezio publikoak ordaintzeko salbuespenak Estatuak edo Foru Erkidegoak beren eskumenak betez emandako araudian ezarritakoak izango dira, eta, betiere, aipatu prezio publiko horiek urtero arautzen dituen foru-arauan aurreikusitakoak.

Zazpigarrena.-Hasierako aurrekonturako aurreikusten zen Diruzaintzako Gerakin Orokorra, "Diruzaintzako Gerakin Orokorra" 870.01 kontusailekoa, 913.500 euro egiten dituena, "Aldizkariak" izeneko 61/61.00/628.01 kontusailera bideratzea.

Zortzigarrena.-Abenduaren 1eko 19/98 Foru Legearen 2. artikulua betetzeko, Nafarroako Unibertsitate Publikoko irakasleen ordainsariak onestea, apirilaren 20ko 37/2009 Foru Dekretuan ezarritakoarekin bat:

Nafarroako Unibertsitate Publikoko irakasleen lansariei buruzko abenduaren 1eko 19/98 Foru Legean ezarritakoarekin bat etorriz, irakaskidegoetako funtzionarioen ordainketa kontzeptuak aplikatzetik aterako den gehieneko zenbatekoa 2.940.000 euro-koa dela kalkulatu da, eta "Irakaskidegoetako ordainketa-osagarriak norberaren merezimenduengatik" izeneko 121.03 azpikontzeptu ekonomikoaren kargura beteko da.

Nafarroako Unibertsitate Publikoko irakasleen lansariei buruzko 19/98 Foru Legearen 2.c artikulua betetzeko, Nafarroako Unibertsitate Publikoaren 2010. urteko aurrekontuen eranskin gisa jarriko da bakoitzarentzako ordainketaren kontzeptuak jasoko dituztenen zerrenda, hartzaile bakoitzari dagokion zenbatekoa zehaztuta.

Bederatzigarrena.-Aurrekontuarekin batera Unibertsitateko kategoria guztietako lanpostuen zerrenda igorriko da, Unibertsitateei buruzko Lege Organikoaren 81.4 artikuluan agindutakoa betez.

Hamargarrena.-Kudeatzaileari, Plangintza, Prospektiba eta Ekonomia Gaietarako errektoreordeari, Ekonomia Gaietarako Zerbitzuko zuzendariari eta kontu-hartzaileari erabaki honen berri ematea.

Hamaikagarrena.-Erabaki hau Nafarroako Aldizkari Ofizialean argitaratzea.

Hamabigarrena.-Erabaki hau errektoreari igortzea, bete dadin.

Iruñean, 2010eko urtarrilaren 15ean.-Gizarte Kontseiluko burua, Jesús Irurre Arigita.

NAFARROAKO UNIBERTSITATE PUBLIKOAREN
TASAK ETA PREZIO PUBLIKOAK 2010. URTERAKO

I.-Tasak azterketa-eskubideengatik.

Unibertsitateko Irakaskidegoen eta Administrazio eta Zerbitzuetako langileen lanpostuetan sartzeko hautaprobetan behar diren zerbitzuak emateagatiko tasaren oinarria Tasei eta Prezio Publikoei buruzko maiatzaren 27ko 7/2001 Foru Legean ezarritakoa da, eta hauek ditu zenbateko indardunak:

Unibertsitateko irakaskidegoetako lanpostuak betetzen direnean: 40 euro.

Administrazio eta Zerbitzuetako Langileen lanpostuak betetzen direnean:

• A taldea: 40 euro.
• B taldea: 40 euro.
• C taldea: 25 euro.
• D eta E taldeak: 15 euro.

Zenbateko horiek foru lege baten bidez aldatzen badira, onesten direnak aplikatuko dira.

II.-Titulu Berekien prezio publikoak.

Hauek dira 2010-2011 ikasturterako Titulu Berekientzat ezarritako prezioak:

Kredituaren prezioa: 89,40 euro.

a) Zilegi izango da ± %10eko aldakuntza prezio horren gainean, kontuan harturik kostuen diferentzia eta eskariaren eta konkurrentziaren baldintzak. Guztira hartuta, kreditu/ikasle bakoitzeko gehieneko prezioa 98,34 euro da eta gutxienekoa 80,46 euro.

b) Prezio hori aldatu ahal izango da, geroago, kanpoko babesleek edo entitate lankideek egiten dituzten ekarpenen ondorioz. Guztirako bekak (alegia, doako matrikula, titulua tramitatzeko eta emateko kostuak izan ezik) edo zati baterako bekak (alegia, matrikularen kostua gutxiagotzea) emateko erabil daitezke ekarpen horiek.

Hauek dira administrazio zerbitzuen prezioak titulu berekietarako:

-Espedienteak edo beste agiri batzuk irekitzea: Hezkuntza Departamentuak 2010-2011 ikasturterako ezarriak.

-Titulua, kredituen arabera, honako balio hauekin.

• 60: 84,20 euro.
• 20: 65,55 euro.
• 20: 46,90 euro.

-Bertaratze-agiria edo gaitasun-agiria: 46,90 euro.

III.-Hizkuntzen Goi Mailako Ikastegiaren prezio publikoak.

2010/2011 ikasturtean, ikastaro bakoitzean, ordu bakoitzeko prezioa 128,50 euro izango da.

Ikastaro bakoitzeko matrikularen prezioa kalkulatzeko kontuan hartuko dira ikastaroak guztira dituen orduak, eta matrikulatutako ikasleen batez besteko kopurua. Ikasturte bakoitzeko matrikularen diru-laguntzak hauek dira:

-Unibertsitate Komunitateko kideentzat eta parekatuentzat1 %60ko dirulaguntza.

-Ikasle ohientzat %35eko diru-laguntza.

-Unibertsitatearen Adiskideentzat %5eko diru-laguntza.

IV.-Adiskideen eta Ikasle Ohien Programan parte hartzeko kuoten prezio publikoak.

Ezartzen da Nafarroako Unibertsitate Publikoko Adiskideen eta Ikasle Ohien programarako, 2010-2011 ikasturteko kuota 50,20 euro izango dela ikasle ohientzat, eta 118,90 euro adiskideentzat.

a) Kuota hori ordainketa bakarrean ordainduko da, eta ez da bidezkoa izango kuota hori itzultzea programan baja ematen bada, kuotaren indarraldian.

b) Ezartzen da kuotaren ordainketa proportzionala egingo dela, urte osokoak ez diren inskripzioetarako.

c) Langabezian daudela frogatzen duten ikasle ohiei %50eko murrizketa aplikatuko zaie lehenengo urteko kuotan.

V.-Kirol instalazioen eta jardueren prezio publikoak.

Kirol instalazioetan eta jardueretan parte hartzeko, 2010-2011 ikasturtean, prezio hauek egongo dira.

Kirol txartela.

Kirol txartela (KT) da kirol instalazioetara sartzeko aukera eta unibertsitateak antolaturiko jardueretan parte hartzeko aukera ahalbidetzen duen agiri bakarra. Kirol txartela urtekoa edo hilekoa izaten ahal da, eta Unibertsitate komunitateko kideak, ikasleak, irakasle-ikertzaileak edo administrazio eta zerbitzuetako langileak Unibertsitateko kideak direla egiaztatzen duen agiriaren barnean sartzen ahal da.

Urteko edo hileko kirol txartela erabili ahalko dute ondoko erabiltzaile talde hauek:

a) Titulu ofizialetako ikasleak.

b) Unibertsitateko langileak (II eta AZL) eta parekatuak1.

c) Ikasle ohiak.

d) Unibertsitatearen Adiskideak.

e) Kanpokoak.

(1) Parekatutzat hartuko dira ondoko hauek: Gizarte Kontseiluko kideak, titulu berekietako ikasle guztiak, Unibertsitate-Gizarte Fundazioko langileak, Unibertsitateko langile erretiratuak eta egoera parekatuak, eta halaber, G9 taldeak kontratatutako langileak, lantokia Iruñean badute.

Urteko Kirol Txartela (UKT) daukatenak doan sar daitezke kirol instalazio guztietara, Kirol Eskoletako batean matrikula daitezke, Nafarroako Unibertsitate Publikoaren Torneoan, modalitate guztietan, parte har dezakete eta Goi Mailako Kirolarien Araudiari hel diezaiokete; horrez gain, prezio onak erdiets ditzakete ikasturte eta jardueretako izen-emateetan.

NUPeko langileei (II eta AZL) ezarritako prezioak ondoko hauei aplikatuko zaizkie:

a) Ezkontideari (horri begira, bikote egonkorra osatzen duten kideak ezkontide direla ulertuko da, bikote egonkorren berdintasun juridikorako uztailaren 3ko 6/2000 Foru Legeak ezartzen duen moduan).

b) Gurasoei.

c) 30 urtez azpiko seme-alabei.

b) eta c) kasuetan, familiaren etxebizitzan bizi zarela egiaztatu behar duzu.

Ikastaroen eta beste jarduera batzuen prezioak

-Golf piloten saskiaren prezioa:

a) Titulu ofizialetako ikasle, Unibertsitateko langile (II eta AZL) eta parekatuentzatk, urteko txartela badute, eta NUPeko Golf klubeko kideentzat: 1,70 euro

b) Kanpokoentzat: 2,70 euro.

Horiek guztiek federatuta egon behar dute.

Taldekako erabilera beste entitate eta kirol klub batzuentzat

• Kiroldegia denboraldi osoan erabiltzeagatik % 20ko deskontua aplikatuko da entrenemenduetan.
• Ikusleak partidetara doan sartzen dituzten taldeek instalazioak denboraldi osoan erabiltzen badituzte, partiden prezioei % 20ko deskontua aplikatuko zaie.
• Kirol instalazioetarako aurreko prezioak BEZik gabekoak dira.
• Kirol instalazioak erabiltzeko hitzarmenak daudenean, hitzarmenetan ezarritako prezioak aplikatuko dira.

-Publizitate tasak

Kirol instalazio eta jantzietarako publizitate tasak finkatuko dira hitzarmenaren bidez, aurrekontuaren exekuzio-oinarrietan ezarritakoari jarraikiz.

VI.-Ikasgelak erabiltzeko prezio publikoak.

1. Aretoak erabiltzeko prezio publikoak 2010. urterako (BEZa kanpo).

2. Prezioak, langileak behar direnean.

Langile tekniko adituak behar direnean, edo aretoak larunbatetan edo jai-egunetan erabiltzen direnean, prezioak handituko dira, arau indardunen arabera, areto edo instalazioaz arduratzeko behar diren langileei ordaindu behar zaien zenbatekoarekin.

3. Ikus-entzunezko eta informatika baliabideak erabiltzeko prezioak.

Aplikazioa.

a) prezio hauek ez zaizkie aplikatuko Unibertsitate Komunitateko kideei, ikasgelak erabiltzen badira ikasketa ofizialekin lotutako jardueretarako, edo zeharkako kostuak fakturatzen dituzten bestelako jardueretarako, salbu eta kontratuan edo proiektuan espresuki jasotzen direnean.

b) Unibertsitate Komunitateko kideek, ikasgelak ikasketa ofizialak ez diren bestelako unibertsitate jardueretarako erabiltzen dituztenean, eta zeharkako kosturik fakturatzen ez denean, aurreko prezioen % 50 ordainduko dute; salbuespenez, kudeatzaileak prezio osoa ordaintzetik salbuetsi ahalko ditu.

c) Ikasgelak erabiltzeko hitzarmenak daudenean, hitzarmenetan ezarritako prezioak aplikatuko dira.

Hau izango da lehentasunaren hurrenkera ikasgelen eskaerei aurre egiteko orduan:

1. Unibertsitate Komunitatea.

2. Unibertsitate-Gizarte Fundazioa.

3. Administrazio eta enpresa publikoak.

4. Hitzarmena duten entitateak.

5. Beste erakunde batzuk.

VII.-Ikerketa Laguntzeko Zerbitzuaren prezio publikoak.

Ikerketari Laguntzeko Zerbitzuak (ILZ) bere eginkizunak burutzeko laborategiak dauzka, Nafarroako Unibertsitate Publikoko Sario eraikinean, eta horietan dauka instalatuta bere ekipamendu egokia.

Horretaz gainera, Ikerketari Laguntzeko Zerbitzuari atxikita daude Nafarroako Unibertsitate Publikoko sailetan banatutako talde batzuk. Eskaintzen diren analisien eta saiakuntzen aplikazio eremua oso zabala da. Hor sartzen dira, besteak beste, aleazioak, plastikoak, urak, olioak, lurrak, landare gaiak, disolbatzaileak eta atmosferak.

Eskura dauden teknika eta ekipamenduetan ondoko hauek nabarmendu behar dira:

ILZko laborategietan dauden ekipo handiak urtero kalibratzen dituzte bermea ematen duten enpresek, eta horiek ematen dituzte berrikusteko eta kalibratzeko ziurtagiriak.

Saiakuntzak arau ofizialen arabera egingo dira, baldin badaude, eta, bestela, bezeroak emandako metodoaren arabera, edo harekin adostutako irizpideei jarraikiz.

Lan bat egiteko honako etapak hauek izango dira, hemengo ordenari jarraikiz:

1. Lana eskatzea.

2. Aurrekontuaren onarpena sinatu eta zigilatzea.

3. Laginak hartzea.

4. Lana egitea.

5. Ziurtagiria eta faktura bidaltzea.

ILZan inoiz ere ez da lagin bat hartuko, aurrekontua behar bezala sinatu eta zigilatu ez bada.

Aldizka hitzartzen diren saiakuntzak egiteko, ILZko zuzendaritzak urteko tarifak aztertuko ditu. Halaber, lagin edo ordu kopuruak hala justifikatzen badu, zuzendaritzak tarifa murriztu ahalko du, kasu berezi horietarako.

Zerrendan ez dauden saiakuntzetarako eta analisietarako, eta saiakuntza metodologia berriak prestatzeko, galdetu lehenago. Kasu horietan tekniken eta kalkulatutako denboraren arabera moldatuko da tarifa.

Joan-etorriak egin behar badira, orduko eta kilometroko kobratuko da, administrazio publikoan ezarritakoari jarraikiz.

UNE-EN-ISO 9001: 2000 kalitatearen kudeaketa sistemaren ziurtagiriaren kopia bezeroen eskura dago; interesdunek aldez aurretik eskatu beharko dute, hura lortzeko.

Tarifak hiru kategoriatan banatzen dira, ondoko hauentzat: Nafarroako Unibertsitate Publikoko (NU) ikertzaileentzat, bestelako unibertsitate publikoetako edo ikerketa erakunde publikoetako (IEP) ikertzaileentzat eta bestelako erabiltzaile pribatu, enpresa edo partikularrentzat (ENP./PRIB.).

Katalogo honen prezioak BEZik gabekoak dira, eta zerga hori lege indardunen arabera aplikatuko da.

-Laginak prestatzea:

Analizatzeko metodoaren arabera, laginek aldez aurreko tratamendu hauetako bat izan beharko dute: degestio azidoak, fusioak, erauzketak, eta abar. Prezioak lagin bakoitzeko ezartzen dira. Bestelako tratamendu-mota batzuk badira, galdetu zer prezio duten.

-Kromatografia likidoa (HPLC-MS):

Bada bereizmen handiko kromatografo likidoa, 1100 seriekoa, Agilent markakoa, UV-VIS (DAD) detektagailua duena eta/edo masa-espektrometroa (tranpa ionikoa) SL modelokoa eta marka berekoa. Horri esker masa-masa espektroak egin daitezke (MSn). Hemen agertzen diren tarifak aurrez prestakuntzarik behar ez duten eta zuzenean neur daitezkeen laginetarako dira. Kromatografiarako baldintzak eta, hala behar denean, zutabeak, bezeroak jarriko ditu. Bestela, laginen tratamenduaren eta metodoa rhobereneratzearen kostua aurrekontuan sartuko da. Kostu handiko patroi edo substantziak behar direnean, horien zenbatekoa aurrekontuari gehituko zaio, edo, bestela, bezeroak jarriko ditu.

-Gas-kromatografia (GC):

GC3800 gas-kromatografo bat dago, FID detektatzailearekin, eta masa-espektrometro bat (tranpa ionikoa) MS4000 eredukoa eta Varian markakoa. Hemen agertzen diren tarifak aurrez prestakuntzarik behar ez duten eta zuzenean neur daitezkeen laginetarako dira. Kromatografiarako baldintzak eta, hala behar denean, zutabeak, bezeroak jarriko ditu. Bestela, laginen tratamenduaren eta metodoaren optimizazioaren kostua aurrekontuan sartuko da. Kostu handiko patroi edo substantziak behar direnean, horien zenbatekoa aurrekontuari gehituko zaio, edo, bestela, bezeroak jarriko ditu.

-Igorpen espektroskopia akoplamendu induktibozko plasma iturriekin (ICP):

Aldi bereko ICP talde modernoak daude, aldi berean zehazten dituztenak metalak eta metal ez diren elementu batzuk (B, S, P, etab.). Ekipamendua hauek osatzen dute: ICP axial bat eta beste bat erradiala, biak MPX modelokoak eta Varian markakoak; bestalde, VGA sistema, lurrun metalikoa edo hidruroak sortzeko (kasuan kasu), eta lainoztatze ultrasonikoko sistema bat, detekzio-maila xurgapen atomikoaren atomizazio elektrotermikoko sistemen (grafitozko ganbera) antzeko balioetara murrizten laguntzen duena. Ekipo horiei esker, dagoeneko finkatuta dauden 50 elementuren analisi semikuantitatiboa egin daiteke. Ondoko elementu hauen analisia egiten da: Ag, Al, Li, S, P, Si, Mg, Na, K, Ca, Ti, V, Cr, Mn, Fe, Co, Ni, Cu, Zn, As, Se, Pb, Au, Pt, Pd, La, Ce, Pr, Nd, Sm, Eu, Gd, Ho, Yb, Zr, Y, Tl, Tm, W, Sn, Sr, Te, Sb, Sc, Mo, Er, Cd, Bi, B, Rb. Hemen agertzen diren tarifak aurrez prestakuntzarik behar ez duten edo dagoeneko digeritu diren eta tresnarekin zuzenean neur daitezkeen laginetarako dira. Bestela, laginak prestatzearen kostua ere aurrekontuan sartuko da.

-Espektrofotometro ultramore ikusgaia:

Bada UV-Vis espektrofotometro bat, UVIKON1603 modelokoa eta Shimadzu markakoa, baita kuartzozko ontzi binatuak ere, hainbat pase optiko dutenak. Ekipo horren bidez anioi, katioi eta konposatu organiko askoren zehaztapen kuantitatiboa egin daitezke, baita konposatuen absortzio-espektroak lortu ere disolbatzaile batzuetan. Prezioak zuzeneko zehaztapen horietarako dira. Aldez aurretik lagina prestatu behar bada, edo kolorea garatu behar bada, horiek aurrekontuari gehituko zaizkio.

-Fourier-en transformatuaren bidezko espektroskopia infragorria (IR-FT):

Bada FT-IR bat AVATAR modelokoa eta Nicolet markakoa, ATR sistema duena. Sistema hau ezin hobea da lagin solidoak eta likidoak aztertzeko.

-Ekortze mikroskopia elektronikoa (SEM).

Bada ekortze mikroskopio elektronikoa, JSM-5610LV modelokoa; 30 kV-koa du gehienezko azelerazio-tentsioa. Halaber, bada elementuen mikroanalisia egiteko zunda bat, X izpien fluoreszentziaren bidezkoa, energia dispertsioko bertsioan (EDX), Oxford markakoa; analisi kualitatiboak edo semikuantitatiboak egin ditzake.

-Elementuen mikroanalisia: C, N:

Bada elementu-analizatzaile bat, NC 2500 modelokoa (Carlo Erba). Thermo Quest markakoa, 50 analisi egiteko porta duena. Instrumentuaren konfigurazioa dela eta, gai da, aldi berean C eta N analizatzeko. Bezeroak bestela agintzen ez badu, analisi bakarra egingo da, lagin bakoitzarekin.

Oharrak:

(1) Laginak aldez aurretik eho eta lehortu behar dira. Bestela, bezeroa NUP, IEP edo enpresa pribatua izan, teknikariaren ordu bakoitzagatik 10,96euro, 18,64euro edo 37,27 euro kobratuko da.

(2) Bakarrik NUPeko ikertzaileentzat: Bezeroak lagin kapsulatuak ematen baditu, %15eko deskontua egingo da analisiaren kostutik, lagin eta elementu bakoitzeko.

-Isotopo egonkorren masa-espektrometroa, ?15/14N eta ?13/12C harreman isotopikoa zehazteko:

Bada isotopo egonkorren masa-espektrometro bat, Deltaplus modelokoa eta ThermoQuest markakoa, eta akoplatuta dago NC 2500 elementu-analizatzaile bati (Carlo Erba), harreman isotopikoak analizatzeko, lagin solidoetan. Prezio horiek eztainuzko kapsula estandarrekin analisia egiten den kasuetarako dira. Horretarako kondizio optimizatuak ditu laborategi honek. Bezeroak bestela agintzen ez badu, analisi bakarra egingo da, lagin bakoitzarekin.

Neurriaren zehaztasuna harreman isotopikoa neurtu nahi zaion elementuaren edukiaren araberakoa da; beraz, emaitzen kalitatea bermatzeko, ezinbestekoa da elementuaren mikroanalisi bat, lagin-mota bakoitzeko. Bezeroak ez badu aurretiazko analisi hau egin nahi, emaitzak ezin dira bermatu.

Oharrak:

(1) Laginak aldez aurretik eho eta lehortu behar dira. Bestela, bezeroa NUP, IEP edo enpresa pribatua izan, teknikariaren ordu bakoitzagatik 10,96 euro, 18,64 euro edo 37,27 euro kobratuko da.

(2) Bakarrik NUPeko ikertzaileentzat: Bezeroak lagin kapsulatuak ematen baditu, %15eko deskontua egingo da analisiaren kostutik, lagin eta isotopo bakoitzeko.

-Analisi termograbimetrikoa (TGA):

Bada HI-RES 2950 termobalantza bat, TA Instruments markakoa, eta inguruneko tenperaturatik hasita, 1000.º Cra arteko lan-tenperaturara iristen da. Bezeroak adierazi beharko du zein lan-tenperaturaren tartetan lan egitea nahi duen, eta zein berotze-abiaduraren malda nahi duen. Bestela, teknikariek ezarriko dituzte, bezeroaren beharretara hobekien egokitzen zaion irizpidea bilatuz.

Oharra:

(1) Laginek prestatuta egon beharko dute jarraian neurtzeko. Bestela, bezeroa NUP, IEP edo enpresa pribatua izan, teknikariaren ordu bakoitzagatik 10,96euro, 18,64euro edo 37,27 euro kobratuko da.

-Ekortzearen bidezko bero-neurketa diferentziala (DSC):

Bada 2920 modeloko ekipoa, TA Instruments markakoa, RCS eta LNCA hozte sistemak dituena. Bezeroak adierazi beharko du zein kapsulatan eta lan-tenperaturaren tartetan lan egitea nahi duen, eta zein berotze-abiaduraren malda nahi duen. Bestela, teknikariek ezarriko dituzte, bezeroaren beharretara hobekien egokitzen zaion irizpidea bilatuz. Saiakuntza ordutzat hartuko da hozte sistemak prestatzeko denbora (hala egin behar bada), eta hasierako behe-tenperaturak iristeko beharrezko denbora, lanak hala eskatzen badu.

Oharrak:

(1) Laginek prestatuta egon beharko dute jarraian neurtzeko. Bestela, bezeroa NUP, IEP edo enpresa pribatua izan, teknikariaren ordu bakoitzagatik 10,96euro, 18,64euro edo 37,27 euro kobratuko da.

(2) Tarifa honi gehituko zaio saiakuntza egiteko behar den nitrogeno likidoaren prezioa

-Analisi termiko diferentziala (DTA):

Bada 1600 modeloko ekipoa, TA Instruments markakoa. Bezeroak adierazi beharko du zein kapsulatan eta lan-tenperaturaren tartetan lan egitea nahi duen, eta zein berotze-abiaduraren malda nahi duen. Bestela, teknikariek ezarriko dituzte, bezeroaren beharretara hobekien egokitzen zaion irizpidea bilatuz.

-Charpy-Izod pendulua:

Bada Charpy-Izod pendulu bat, IMPATS-15 modelokoa eta Metrotec markakoa. Egokia da material polimerikoekin lan egiteko.

Erresilientzi saiakuntzak (talka) Izod saiakuntza; arau erabilgarria: UNE-EN ISO 180, eta probeta mota hauek. 1, 2, 3 eta 4. Charpy saiakuntza; arau erabilgarria: UNE-EN ISO 179.

Oharra:

Prezio bera da Charpy zein Izod saiakuntzarako.

-Saiakuntzetarako makina unibertsala:

Bada saiakuntzetarako makina unibertsal bat, H25K-S modelokoa, Hounsfield markakoa, ohiko estentsometroa eta laser estensometroa dituena. Hauek dira erabilgarri dauden karga-zelulak: 250N, 2500N eta 25000N. Ekipoak badu -70tik eta 300.º C-ra arteko tenperaturetan saiakuntzak egiteko kamera bat. Gehienezko lan-karga 25000N da. Beraz, karga-tarte horretan proba daitezkeen material guztiekin egin daitezke saiakuntzak, probeta normalizatuarekin edo pertsonalizatuarekin.

Makurdurarekiko erresistentziaren saiakuntzak

Arau erabilgarria: UNE-EN ISO 178 araua:

Trakzioarekiko erresistentziaren saiakuntzak

Arau erabilgarriak: DIN 5350, DIN 53455, ISO 527-2, ISO 527-3, ASTM D638:

-Gogortasun-neurgailuak:

Bi gogortasun-neurgailu daude, bola-indentazioaren bidezko bat, eta beste Shore neurgailua, material plastikoetarako.

Gogortasun saiakuntza: Bola-indentazioaren metodoa; arau erabilgarria: ISO 2039 araua. Shore metodoa; arau erabilgarriak: ASTM D2240-00 mota hauek: A, B, C, D, DO; ISO 7619 mota hauek: A eta D; DIN 53505 mota hauek: A eta D.

-Sugar-puntuaren analizatzaileak:

FP 92 5G sugar-puntuko analizatzaile automatiko bat dago, Cleveland (kopa ireki erakoa), I.S.L./ATPEM, arau hauen araberakoa: ASTM D92; ISO 2592;EN 22592;IP 36;DIN/EN 22592;JIS K-2265;NF-EN 22592. Gainera, FP 93 5G sugar-puntuaren puntuaren analizatzaile bat ere badago, Pensky-Martens (kopa itxi erakoa), I.S.L./ATPEM, arau hauen araberakoa: ASTM D93, metodoak: A eta B; ISO 2719-IP34-EN-22719-DIN / EN 2219.

-Analisi eta saiakuntza metodoen diseinua, garapena eta balidazioa:

Ikerketa Laguntzeko Zerbitzuari (ILZ) askotan eskatzen zaio analisi eta saiakuntza metodoak diseinatu eta garatzeko, lagin edo lan jakin batzuetara egokitzeko; ez daudelako normalizatuta, edo bezeroak ez dituelako tresna egokiak. Horrelakoetan ILZk argibideak eman ditzake, kasu bakoitza aztertu eta, ahal bada, metodo berriak diseinatu edo daudenak behar bakoitzari egokitu. Egoera horietan, ILZk kasu bakoitza aztertuko du, eta aurrekontu pertsonalizatua eman.

Bezeroak hala eskatzen badu, aurrekontua egin daiteke analisi edo saiakuntza metodo baten balidaziorako.

VIII.-Zero Ikastaroen prezio publikoak.

Prezio hauek ezarri dira 2010-11 ikasturterako:

Zero Ikastaroak (prezioa ordu bakoitzeko) 4,20 euro/ordu bakoitzeko

IX.-Gela Irekiaren Ikastaroen prezio publikoak.

Prezio hauek ezarri dira 2010-11 ikasturterako:

-Ohiko Matrikula 8,75 euro/ordu bakoitzeko

-Nafarroako Unibertsitate Publikoaren Adiskideak eta Ikasle Ohiak 6,55 euro/ordu bakoitzeko

-Unibertsitate komunitatea 4,40 euro/ordu bakoitzeko

Kanpoko finantzazioa izanez gero, prezioa txikiagotu egin daiteke, betiere, ikastaroa autofinantzatzen bada.

X.-Unibertsitatearen promoziorako produktuen prezio publikoak.

Produktuen zerrendan zerbait berriz jartzen bada edo berritzen bada, Unibertsitateko kudeatzaileak jarriko duen prezioa izango du, kalkulu prozesu berari jarraikiz, eta gehikuntza gehienez % 50eko izanda, kostuaren prezioaren gainean.

XI.-Esperientziaren Ikasgela Programaren prezio publikoak.

1. Programa honetan 2010-2011 ikasturtean parte hartzen duten ikasleek, zenbateko hauek ordaindu beharko dituzte prezio publikoengatik:

Giza eta Gizarte Zientziei buruzko diploma: 17,15 euroeuro/kreditu bakoitzeko.

2. Nafarroako Unibertsitate Publikoko Esperientziaren Ikasgela Programa finantzatuko da ikasleek ordaintzen dituzten prezio publikoekin, eta, gainera, Administrazio Publikoek horretarako ematen dituzten dirulaguntzekin, eta lankidetzarako hitzarmenen bidezko ekarpenekin, Unibertsitateak sinatu ditzakeenekin beste erakunde, organismo, enpresa publiko edo pribatuekin, eta finantza entitateekin.

Aurreko atalean adierazitako dirusarrerak batu ondoren, programa ez bada gauza autofinantzatzeko, Unibertsitateak bere gain hartuko du gelditzen den zatia, osorik finantzatu arte, Nafarroako Unibertsitate Publikoko Ikasketa Berekiak eta Unibertsitateko Master Titulu Ofizialak arautzen dituzten Arauen 68. artikuluan ezarritakoarekin bat eginez.

XII.-Liburuen prezio publikoak.

Nafarroako Unibertsitate Publikoko langileek % 33ko murrizketa izango dute Unibertsitateak argitaratzen dituen liburuen publikoarentzako salmenta-prezioetan.

Hona hemen Nafarroako Unibertsitate Publikoak argitara eman eta banatzen dituen liburuen zerrenda, ondoan dutela publikoarentzako salmenta-prezioa (BEZa barne)

XIII.-Kultura Jardueren ikastaro eta lantegiak.

Prezio hauek ezarri dira 2010-11 ikasturterako:

XIV.-Beste prezio batzuk.

Errektoreari ahalmena ematen zaio, kudeatzaileak hala proposaturik, jar ditzan prezioak 2010. urtean atera daitezkeen produktu edo jardueretarako, betiere, Gizarte Kontseiluaren Ekonomia Batzordeak gero berresten baditu.

Iragarkiaren kodea: F1002264