Iragarkia

118. ALDIZKARIA - 2010eko irailaren 29a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak irailaren 13an emandako 211/2010 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko suhiltzaile-kabo izateko 16 lanpostu mailaz igotzeko lehiaketaren bidez betetzeko.

Nafarroako Administrazio Publikoaren Institutuko zuzendari kudeatzaileak irailaren 13an emandako 211/2010 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko suhiltzaile-kabo izateko 16 lanpostu mailaz igotzeko lehiaketaren bidez betetzeko deialdia onetsi da.

OINARRIAK

1. Xedea.

Deialdi honen xedea da suhiltzaile-kabo izateko 16 lanpostu mailaz igotzeko lehiaketaren bidez betetzea. Lanpostuak funtzionarioen araubidekoak dira eta C mailakoak, eta Nafarroako Larrialdietako Agentziako Prebentzio, Su-itzaltze eta Salbamendu Zerbitzuen Zuzendaritzari atxikiak daude.

1.1. Deialdiko lanpostuak, plantillan duten identifikazio zenbakia eta horien destinoa lanpostu hutsak hautatu aurretik zehaztuko dira, Nafarroako Larrialdietako Agentziako zuzendari kudeatzaileak maiatzaren 18an emandako 66/2010 Ebazpenaren bidez deitutako lekualdatze lehiaketa bukatu ondoren.

1.2. Ordainsariak.

Lanpostuek dagokien ordainsariak izanen dituzte, indarra duten xedapenen arabera.

2. Aplikatu beharreko araudia.

Prozedura hau arau hauen mende egonen da: uztailaren 1eko 8/2005 Foru Legea, Nafarroako Babes Zibilari eta Larrialdien Kudeaketari buruzkoa; abuztuaren 30eko 251/1993 Legegintzako Foru Dekretua, Nafarroako Administrazio Publikoen zerbitzuko Langileen Estatutuaren Testu Bategina onesten duena; hori garatzeko eta betetzeko emandako lanpostuak betetzeari buruzko Erregelamendua (azaroaren 6ko 215/1985 Foru Dekretuaren bidez onetsia); Lehendakaritza, Justizia eta Barneko kontseilariak abuztuaren 12an emandako 130/1998 Foru Agindua, merezimenduen baremoei buruzkoa; ekainaren 15eko 55/2009 Foru Dekretua, Nafarroako Foru Komunitateko Administrazioko eta haren erakunde autonomoetako plantilla organikoan euskaraz jakitearen trataera arautzen duena; eta aplikatzekoak diren gainerako arauak eta deialdi honetako oinarriak.

3. Izangaien betebeharrak.

Araudi indardunean xedatutakoaren arabera, deialdi honetan parte hartu ahal izateko ondoko betebeharrak bete behar dira eskabideak aurkezteko epearen azken egunean eta esleitutako lanpostuaz jabetu arte:

a) Nafarroako edozein administrazio publikotan suhiltzaile izateko lanpostu baterako izendatua izatea eta jardunean, zerbitzu berezietan edo eszedentzia berezian egotea.

b) C maila edo taldekoa izatea.

c) Suhiltzaile lanpostuan egiazki 3 urteko antzinatasuna izatea gutxienez.

d) Bigarren jarduerako lanpostu batean (zerbitzu osagarrietan, alegia) ez aritzea.

Lehiaketa honetan parte hartzeak ez du ekarriko parte hartu aurretik Nafarroako Foru Komunitateko Administrazioko funtzionarioak diren lehiatzaileek zuten araubide juridikoa aldatzea. Gainera, lehiatzaileek eskubide pasiboen eta osasun laguntzaren araubide berean jarraituko dute.

Halaber, Nafarroako Administrazio Publikoen zerbitzuko Langileen Estatutuaren 15.4 artikuluaren azken lerroaldean eta testu bereko bederatzigarren xedapen gehigarriaren 1. eta 3. puntuetan xedaturikoaren arabera, lehiatzaileak Nafarroako beste administrazio publiko bateko funtzionarioak direnean, gora egitearekin batera Nafarroako Foru Komunitateko Administrazioan sartuko dira ondorio guztietarako. Ukituriko lehiatzaileak Gizarte Segurantzaren Araubide Orokorrean sartuko dira eta horrexek babestuko ditu, salbu eta jatorrizko administrazioko montepioaren eskubide pasiboen eta osasun laguntzaren araubidean afilaturik bazeuden. Kasu horretan, aukera izanen dute Nafarroako Foru Komunitateko Administrazioko montepioan egoteko, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzeko.

4. Parte hartzeko eskabideak.

Deialdian parte hartzeko eskabideak Nafarroako Larrialdietako Agentziako Erregistroan (Aralar kalea, 3, 31002-Iruña), Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002-Iruña) edo erregistro horretako beste edozein bulegotan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legearen 38.4 artikuluan adierazitako bideren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako betebehar guztiak betetzen dituztela. Eskabidearen eredu ofiziala Nafarroako Gobernuaren edozein erregistro bulegotan dago eskuragarri. Internet bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta bai deialdiaren aipu honetatik abiatuta: "Zerbitzuen Katalogoa", "Enplegu Publikoa".

Eskabideak aurkezteko epea ezin izanen da luzatu.

Eskabidearekin batera agiri hauek aurkeztuko dira:

a) Deialdiaren II. eranskinean ezarritako baremoa kontuan hartuta alegatutako merezimenduak frogatzen dituzten agiriak, jatorrizkoak nahiz fotokopiak (kasu horretan, behar bezala konpultsatuak), Nafarroako Foru Komunitateko Administrazioan eta haren erakunde autonomoetan egindako eta aitortutako zerbitzuei dagozkienak izan ezik.

b) Nortasun agiri nazionalaren bi aldeen fotokopia konpultsatua.

c) Nafarroako Foru Komunitatea ez beste administrazio publiko bateko suhiltzaileek, lanpostu horretarako izendapena, maila, egoera administratiboa eta egiazki egindako zerbitzuak frogatzen dituen agiria.

Jatorrizko agirien bitartez edo behar bezala konpultsatutako kopien bitartez frogatu beharko du izangaiak prozedura honetan parte hartzeko betebeharrak betetzen dituela eta alegatutako merezimenduak.

5. Onartuen behin-behineko zerrenda, erreklamazioak eta behin betiko zerrenda.

Eskabideak aurkezteko epea amaituta, Nafarroako Administrazio Publikoaren Institutuko zuzendari kudeatzaileak onartu eta baztertuen behin-behineko zerrenda onetsiko du eta Nafarroako Aldizkari Ofizialean argitara dadila aginduko, ohartaraziz, hurrengo bost egun naturaleko epean baztertuek erreklamazioak egin ditzaketela deialdia egin duen organoaren aurrean eta, akatsik baldin badago, haiek zuzendu.

Ezarritako epean eskabiderik aurkezten ez bada, Nafarroako Administrazio Publikoaren Institutuko zuzendari kudeatzaileak deialdia bete gabe gelditu dela deklaratzeko ebazpena emanen du. Ebazpen hori Nafarroako Aldizkari Ofizialean argitaratu beharko da.

Izangai bazterturik ez bada, zuzenean onetsiko da izangai onartuen behin betiko zerrenda, eta Nafarroako Aldizkari Ofizialean argitaratuko.

Erreklamazioetarako epea bukatutakoan eta horiek ebatzita, Nafarroako Administrazio Publikoaren Institutuko zuzendari kudeatzaileak onartu eta baztertuen behin betiko zerrenda onesten duen ebazpena emanen du, eta Nafarroako Aldizkari Ofizialean argitara dadila aginduko.

Halaber, onartu eta baztertuen behin-behineko eta behin betiko zerrendak interesdunen esku egonen dira Nafarroako Gobernuko web-orrialdean (www.navarra.es, "Zerbitzuen Katalogoa" "Enplegu Publikoa").

6. Epaimahaia.

6.1. Osaera.

Epaimahaia honako kide hauek osatuko dute:

-Mahaiburua: Javier Vergara Falces jauna, Nafarroako Larrialdietako Agentziako Prebentzio, Su-Itzaltze eta Salbamendu Zerbitzuen Zuzendaritzako zuzendaria.

Ordezkoa: Javier Vitrián Arigita jauna, Nafarroako Larrialdietako Agentziako Kudeaketako Zuzendaritzako zuzendaria.

-Mahaikidea: Pedro Zaro Loperena jauna, Nafarroako Larrialdietako Agentziako Prebentzio, Su-itzaltze eta Salbamendu Zerbitzuen Zuzendaritzako suhiltzaile ofizialordea.

Ordezkoa: Francisco Javier Zalba Barberena jauna, Nafarroako Larrialdietako Agentziako Prebentzio, Su-itzaltze eta Salbamendu Zerbitzuen Zuzendaritzako suhiltzaile ofizialordea.

-Mahaikidea: Javier Ullate Domaica jauna, Nafarroako Larrialdietako Agentziako Prebentzio, Su-Itzaltze eta Salbamendu Zerbitzuen Zuzendaritzako suhiltzaile sarjentua.

Ordezkoa: Francisco Javier Baldanta Petrirena jauna, Nafarroako Larrialdietako Agentziako Prebentzio, Su-itzaltze eta Salbamendu Zerbitzuen Zuzendaritzako suhiltzaile sarjentua.

-Mahaikidea: langileen ordezkari bat, Nafarroako Larrialdietako Agentziako Langileen Batzordean ordezkatuta dauden erakunde sindikalek proposatu eta izendatu beharrekoa.

Ordezkoa: langileen ordezkari bat, Nafarroako Larrialdietako Agentziako Langileen Batzordean ordezkatuta dauden erakunde sindikalek proposatu eta izendatu beharrekoa.

-Mahaikide idazkaria: Begoña Martínez Barrado andrea, Nafarroako Larrialdietako Agentziako Gai Ekonomiko-administratiboen eta Langileriaren Kudeaketaren Arloko burua.

-Ordezkoa: Yolanda Núñez Rosón andrea, Nafarroako Larrialdietako Agentziako Langileriaren Kudeaketarako Unitateko burua.

6.2. Eraketa eta jarduna.

Onartu eta baztertuen behin betiko zerrenda argitaratu ondoko bost eguneko epean eratuko da epaimahaia.

Epaimahaia ezin izanen da eratu, ezta jardun ere, kideen gehiengo osoa gutxienez bildu gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo, kasua bada, haien ordezkoek egon beharko dute bertan.

Epaimahaiak gehiengoz erabakiko ditu deialdiaren oinarriak aplikatzeko moduaz sortzen diren arazo guztiak.

Administrazio prozeduraren arauetan aipaturiko arrazoiren bat gertatzen denean, epaimahaiko kideek parte hartzeari uko egin beharko diote, eta horren berri eman deialdia egin duen organoari.

Izangaiek, halaber, zilegi dute mahaikideak errefusatzea, egoera horietako bat gertatzen denean.

Lanpostuaren edukiari eta eginkizunei buruzko proba praktikorako aholkulari espezialistak biltzen ahalko ditu epaimahaiak. Aholkulari horiek dagokien espezialitate teknikoan aritzera mugatuko dira, eta epaimahaiari horietan baizik ez diote lagunduko.

7. Mailaz igotzeko lehiaketako elementuak.

7.1. Epaimahaiak ondoko elementuak baloratuko ditu mailaz igotzeko lehiaketan:

a) Merezimenduak:

-Administrazio publikoetan egindako zerbitzuak: gehienez ere 35 puntu.

-Prestakuntza, irakaskuntza, ikerketa eta beste merezimendu batzuk: gehienez ere 25 puntu.

-Hizkuntzak jakitea: gehienez ere 26,50 puntu.

b) Lanpostuaren edukiari eta eginkizunei buruzko proba praktikoa: gehienez ere 25 puntu.

c) Txosten psikoteknikoa: gehienez ere 15 puntu

7.2. Merezimenduak

Alegatutako merezimenduak deialdi honen II. eranskinean ageri den baremoari jarraikiz kalifikatu eta puntuatuko ditu epaimahaiak. Epaimahaiak zuzenean eskatuko dizkio Funtzio Publikoaren Zuzendaritza Nagusiko Langileriaren Erregistro Nagusiaren Atalari merezimendu horiek, Nafarroako Foru Komunitateko Administrazioan eta haren erakunde autonomoetan egindakoak eta aitortutakoak izan ezik, eta agirien bidez alegatu eta frogatu beharko dira, deialdian parte hartzeko eskabidearekin batera. Horretarako, jatorrizkoak edo konpultsatutako fotokopiak aurkeztuko dira. Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzean aipatutako gehieneko puntuazioa baino altuagorik eman ere.

Epaimahaiak azalpenak eta datu osagarriak eskatzen ahalko ditu, lehiatzaileek alegatu eta frogatutako merezimenduen gainean.

Lanpostuko eginkizunei eta edukiei buruzko proba teknikoa gainditzen duten lehiatzaileek alegatu eta frogatutako merezimenduak baizik ez ditu baloratuko epaimahaiak.

7.3. Lanpostuaren eginkizunei eta edukiei buruzko proba praktikoa.

2010eko abenduan izanen da. Onartu eta baztertuen behin betiko zerrenda onesten duen ebazpenean bertan zehaztuko dira proba egiteko tokia, eguna eta ordua.

Idatziz egin beharko da. Epaimahaiak suhiltzaile-kaboren lanaren edukiari eta eginkizunei buruz proposatzen dituen kasu praktiko operatiboak ebatzi beharko dira. Plika sistemaren bidez eginen da.

Epaimahaiak hala erabakitzen badu, test motako galde-sorta bat gehitzen ahalko du. Galdera bakoitzean hainbat erantzun egonen dira aukeran, bakarra izanen da zuzena eta hutsengatik puntuak kenduko dira.

Proba hau baztertzailea izanen da, eta, gainditzeko, gutxienez ere 12,50 puntu lortu beharko dira.

7.4. Txosten psikoteknikoa.

Nafarroako Administrazio Publikoaren Institutuko Psikologia Atalak, lanpostuaren edukiei eta eginkizunei buruzko proba praktikoa egin ondoren, gainditzen duen izangai bakoitzari buruzko txosten psikoteknikoa eginen du. Horretan, izangai bakoitza deialdiaren xedeko lanpostuaren izaera eta ezaugarriei nola egokitzen zaien baloratuko da.

Zerbitzu horrek txosten psikoteknikoan izangai bakoitzari ematen dion puntuazioa loteslea izanen da epaimahaiarentzat.

Egin baino lehen, Nafarroako Larrialdietako Agentziako zuzendari kudeatzaileak lanpostuaren ezaugarri profesiografikoak onets ditzala proposatuko dio Nafarroako Administrazio Publikoaren Institutuko zuzendari kudeatzaileari. Onespena epaimahaiari jakinaraziko zaio.

Proba hau ez da baztergarria izanen eta 0tik 15 puntura baloratuko da.

Proba hau gainditzen duten izangaiek lorturiko puntuazioa lehiaketaren gainerako ataletako puntuazioari batuko zaio, bakoitzak guztira lorturiko puntuazioa ateratzeko.

7.5. Behin-behineko kalifikazioak eta erreklamazioak.

Lehiaketako elementuen balorazioa bukatu ondoren, epaimahaiak parte hartzaileek lortutako puntuazioak paratuko ditu Nafarroako Gobernuko iragarki oholean, eta bost eguneko epea emanen du, interesdunek beren eskubidearen arabera komeni zaiena erreklama dezaten balorazio horri buruz.

Lehiatzaileek lehiaketan guztira lortzen dituzten puntuetan berdinketarik bada, administrazio publikoen zerbitzuan antzinatasunik handiena dutenen alde joko da. Hala ere berdinketa hausten ez bada, lehiatzaile zaharrenari emanen zaio lehentasuna.

8. Izangaien zerrenda, erdietsitako guztizko puntuazioaren araberakoa, eta izendapen proposamena.

Erreklamazioak aurkezteko epea iraganda eta horiek ebatzita, epaimahaiak lehiaketako elementuen behin betiko puntuazioak Nafarroako Gobernuko iragarki oholean eta web-orrialdean (www.navarra.es, ''Zerbitzuen Katalogoa'', ''Enplegu Publikoa'') argitaratuko ditu eta lanpostuko eginkizunei eta edukiei buruzko proba praktikoa gainditzen duten izangaien zerrenda igorriko du deialdia eman duen organora, haietariko bakoitzak lehiaketako elementu guztietan osotara lortutako puntuazioa eta bete beharreko lanpostuetan sartzen diren lehiatzaileak izendatzeko proposamena adieraziz.

9. Lanpostu hutsak hautatzea.

Lehiatzaileek lanpostu hutsak hautatzen ahalko dituzte lorturiko puntuazioaren arabera, Nafarroako Larrialdietako Agentziako Gai Ekonomiko-administratiboen eta Langileriaren Kudeaketaren Arloak deituko duen ekitaldi batean.

Kontuan izanik euskarak, merezimendu gisa, beste balorazio bat duela bete beharreko lanpostu hutsa atxikia dagoen eremuaren arabera, lanpostuak hautatzeko ekitaldia prestakuntza ikastaroa baino lehen eginen da, bete beharreko lanpostuetan benetan nor sartuko den zehazte aldera.

10. Prestakuntza ikastaroa.

Bete beharreko lanpostuetan sartzeko proposatutako izangaiek prestakuntza ikastaro bat eginen dute Nafarroako Segurtasun Eskolan. "Gai" edo "ez gai" kalifikazioak lortzen ahalko dira bertan, eta ezin izanen dira izendatu "ez gai" kalifikazioa lortzen dutenak.

Ikastaroa irailaren 12ko 113/2005 Foru Dekretuan xedatutakoaren arabera arautuko da. Horren bidez Nafarroako Segurtasun Eskolaren antolamendu eta funtzionamendurako Erregelamendua onetsi zen.

Prestakuntza ikastaroa bukatu ondoren, Nafarroako Segurtasun Eskolako zuzendariak ikastaroa gainditzen duten izangaien zerrenda igorriko dio Funtzio Publikoaren zuzendari nagusiari, izenda ditzan eta lanpostu hutsak eslei diezazkien.

11. Izendapena eta jabetza hartzea.

11.1. Izendapena.

Eskatutako agiriak aurkeztu ondoren, Funtzio Publikoaren zuzendari nagusiak, mailaz igotzeko lehiaketa gainditzen duten izangaiak suhiltzaile-kabo izendatuko ditu, ebazpen baten bidez, eta lanpostu hutsak esleituko dizkie.

Izendapena Nafarroako Aldizkari Ofizialean argitaratuko da.

11.2. Lanpostuaz jabetzea.

Izendatutako izangaiek izendapena jakinarazi ondoko hamar egun naturalean jabetu beharko dute dagozkien lanpostuez. Behar bezala frogatutako ezinbesteko kasuetan izan ezik, lanpostuez jabetzen ez direnek suhiltzaile-kabo lanpostuan aritzeko eskubidea galduko dute.

Izendapenarekin batera pertsona izendatu horiek nomina eta plantillako funtzionario bihurtuko dira, funtzionarioen arloan indarrean dauden xedapenetan ezarritako eskubide eta betebehar guztiekin.

12. Aurkeztutako agiriak

Izangaiek, baldin eta erreklamazio edo errekurtsorik jartzen ez bada, aurkeztu dituzten agiriak berreskuratzen ahalko dituzte, halaxe eskatu ondotik. Agiriak berreskuratzeko eskaera hiru hilabeteko epean aurkezten ahalko da, esleipenaren ebazpena Nafarroako Aldizkari Ofizialean argitaratu eta beste hiru hilabete pasatu eta gero.

Aurreko atalean ezarritako epea agiriak eraman gabe bukatzen bada, izangaiak agiriak berreskuratzeari uko egin diola ulertuko da eta, beraz, horretarako eskubidea galduko du eta agiriak suntsitu eginen dira.

Erreklamazio edo errekurtsoren bat aurkezten baldin bada, aurkeztutako agiriak gorde eginen dira, ikuskatu eta aztertzeko. Agiriak berreskuratzen ahalko dira erreklamazioaren edo errekurtsoaren tramitazioak horretarako aukera ematen duenean.

13. Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xedeko egintza argitaratu edo jakinarazi eta biharamunetik hilabeteko epean.

Deialdiaren, oinarrien eta oinarri horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2010eko irailaren 13an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA

Eskabide eredua

Eskabidea, ..............................izateko ... lanpostu mailaz igotzeko lehiaketa bidez betetzeko deialdian parte hartzeko. Deialdia . ...... zenbakiko Nafarroako Aldizkari Ofizialean argitaratu zen, ..........(e)ko ...aren ...(e)an.

1.-Datu pertsonalak.

Izen-abizenak: ............................................., NAN zenbakia: ......................., letra: ......., Jaioteguna: .............................., Jaioterria (herria): ..........................., Probintzia: ............................, Helbidea (herria): ....................................., Probintzia: ................, Kalea: ......................................, Zenbakia: ......, Solairua: ......, Letra: ...., Posta kodea: ............, Etxeko telefonoa: ..................., Lantokiko telefonoa: ........................., Sakelako telefonoa: ....................

2.-Administrazio datuak.

a) Zer lanpostutarako izendatu zuten.

[ ] Nafarroako Foru Komunitateko Administrazioko funtzionarioa.

[ ] ........................................................(e)ko Udaleko funtzionarioa.

b) Egoera administratiboa (X batez adierazi behar dena).

[ ] Jardunean.

[ ] Zerbitzu berezietan.

[ ] Eszedentzia berezian.

[ ] Borondatezko eszedentzian.

[ ] Nahitaezko eszedentzian.

c) Zein maila edo taldetakoa:

3.-Nik, sinatzaileak, adierazten dut eskatutako baldintza guzti-guztiak betetzen ditudala, eskabideak aurkezteko epearen azken egunean.

4.-Eskabidearekin batera, deialdian parte hartzeko eskatzen diren agiriak eta alegatu ditudan merezimenduen egiaztagiriak aurkeztu ditut, .......(e)tik ........... (e)ra numeratuak, baremoko puntuazio eskemari jarraikiz.

5.-[ ] Adierazten dut euskara maila neurtzeko proba egin nahi dudala*.

6.-[ ] Adierazten dut frantses eta ingeles maila neurtzeko proba egin nahi dudala*.

Horrenbestez,

Eskabide honetan aipatzen den deialdian onar nazatela eskatzen dut.

Iruñean, ........(e)ko ............................aren .................(e)an.

(Sinadura)

(*) Bidezkoa denean bakarrik.

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA.

ERANSKINA

Merezimenduak baloratzeko baremoa

A) Administrazio publikoetan egindako zerbitzuak: gehienez ere 35 puntu.

1) Deialdi honetako maila/talde eta titulazioko lanpostuetan, edozein administrazio publikotan egindako zerbitzuak: Urte bakoitza: 1,50 puntu.

2) Edozein administrazio publikotan, aurrekoak ez bezalako lanpostuetan egindako zerbitzuak: Urte bakoitza: 0,37 puntu.

Oharrak:

-1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie izangaiei.

-2. Deialdia argitaratu ondoren egindako zerbitzuak ez dira baloratuko.

-3. Funtzionarioa zerbitzu berezietan edo eszedentzia berezian egon bada, edo unitate organiko bateko buru edo zuzendari lanetan aritu bada, aldi horietako zerbitzuak kontatzeko, egoera horietan sartzean zuen lanpostuan egin izan balitu bezala kontatuko dira.

B) Prestakuntza, irakaskuntza, ikerketa eta beste merezimendu batzuk: gehienez ere 25 puntu.

1) Erakunde edo zentro publikoek eta unibertsitateek antolaturiko prestakuntza ekintzetan parte hartzea: 0,10 puntu kreditu akademiko edo horren baliokide bakoitzeko (10 ikastordu), eta gehienez ere 10 puntu.

Oharrak:

-1. Baloratu beharreko prestakuntza ekintzetan, irakastorduen zatikiak proportzionalki kalkulatuko dira.

-2. Ikastorduen kopurua agertzen ez duten ziurtagiriei kreditu bateko balorazioa emanen zaie.

-3. Ikasturte bateko iraupena agertzen duten ziurtagiriei 12 kredituko balorazioa emanen zaie.

-4. Erakunde antolatzaileari buruzko betebeharrak betetzen ez badituzte ere, administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek administrazio publikoetako etengabeko prestakuntzarako itunen barruan antolatutakoak sartuko dira.

-5. Titulu akademiko bat eskuratzeko ikasketak, hala unibertsitatekoak nola unibertsitatez kanpokoak, ez dira atal honetan baloratuko.

2) Biltzar edo jardunaldietan txostenak edo komunikazioak aurkeztea, beka edo saria jaso duten zientzia edo ikerketa lanak egitea eta aldizkari espezializatuetan lanak argitaratzea: 3 puntu, gehienez ere, epaimahaiak baloratu beharrekoa, kontuan hartuz lana edo jarduera bakar batek edo taldean egina den eta biltzarra edo argitalpena zein mailatakoa den, tokikoa, eskualdekoa, naziokoa edo nazioartekoa.

3) Sektore publikoan prestakuntza ekintzak antolatzea eta/edo halakoetan irakasle gisa parte hartzea: gehienez ere 2 puntu, epaimahaiak haien iraupenaren arabera baloratu beharrekoak.

4) Titulazio eta espezialitate akademikoak, deialdian eskatu ez direnak: gehienez ere 4 puntu.

5) Doktore edo lizentziadun maila, deialdian eskatutako titulazioaren gainean: gehienez ere 2 puntu.

6) Beste merezimendu batzuk, epaimahaiak baloratu beharrekoak: besteak beste, sektore pribatuko lanak, prestakuntzarako beka edo egonaldiak, edo kontsulta, aholkularitza, partaidetza edo ordezkaritza organoetan parte hartzea: gehienez ere 4 puntu.

Oharrak B) atal osorako:

-1. Atal honetan aipatutako merezimenduak soilik baloratuko dira deialdiko lanpostuarekin zerikusia izanez gero. Ez dira inolaz ere baloratuko kidegoan sartzeko edo gora egiteko trebakuntza ikastaroak.

-2. Baremoaren B) atal honetako puntuazioa 25 puntukoa izanen da gehienez.

C) Hizkuntzak jakitea: gehienez ere 26,50 puntu.

Frantsesa, ingelesa edo alemana jakiteagatik, Europar Batasuneko lan hizkuntzak diren aldetik, hizkuntza horietako bakoitzeko 5 puntu gehienez.

Euskaraz jakiteagatik: destinoa eremu euskaldunean duten lanpostuetarako 11,50 puntu gehienez, plantilla organikoan euskara jakitea nahitaezkotzat hartu ez bada, eta destinoa eremu mistoan dutenetarako 6,90 puntu gehienez.

Horretarako, EGA titulua edo beste titulu ofizial bat, Hizkuntzen Europako Erreferentzia Esparru Bateratuaren C1 mailaren baliokidea, izanez gero aurreko atalean emandako gehieneko balorazioa jasoko da.

Titulu hori izan ezean, Hizkuntzen Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da, A2 maila izanez gero 2/5, B1 izanez gero 3/5 eta B2 izanez gero 4/5. Titulu baliokideek balorazio bera izanen dute. Bestela, Nafarroako Gobernuak antolatutako ikastaroetan gainditutako urrats bakoitzarengatik gehienez eman daitekeen puntuazioaren 1/12 jasoko da.

Lau hizkuntza horietako bakoitzean izangaiak zer dakien baloratzeko, Nafarroako Administrazio Publikoaren Institutuak espresuki antolatutako azterketak egiten ahal dira; bost zailtasun maila izanen dira, eta hizkuntza bakoitzari ematen ahal zaion gehieneko balorazioaren 1/5 izanen du maila bakoitzak.

Iragarkiaren kodea: F1015318