1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
951/2008 FORU AGINDUA, abenduaren 15ekoa, Lehendakaritza, Justizia eta Barneko kontseilariak emana, Nafarroako Foru Komunitateko Administrazioaren eta haren erakunde autonomoen zerbitzuko langileen 2010eko lan egutegia onesten duena.
Arriskuen Prebentziorako eta Lanaren zuzendari nagusiak, ekainaren 3ko 838/2008 Ebazpenaren bitartez, Nafarroako Foru Komunitatean 2010eko jaiegun ordainduak, errekuperatu ezinezkoak, zein izanen diren erabaki ondoren, bidezkoa da langile horien 2010eko aste barreneko jaien egutegia eta haien lanaldiaren urteko lanordu kopuruaren banaketa onestea, abenduaren 27ko 624/1999 Foru Dekretuak ezarritako urteko lanordu kopuruaren arabera.
Horrenbestez, otsailaren 21eko 30/2005 Foru Dekretuaren bidez esleiturik ditudan eskudantziak erabiliz,
AGINDU DUT:
1. artikulua. Jaiegunak zehaztea.
1. Nafarroako Foru Komunitateko Administrazioaren eta haren erakunde autonomoen zerbitzuko langileek aste barreneko jaiegun hauek izanen dituzte 2010ean:
Urtarrilaren 1a: Urteberri.
Urtarrilaren 6a: Jaunaren Agerkundea.
Martxoaren 19a: San José.
Apirilaren 1a: Ostegun Santua.
Apirilaren 2a: Ostiral Santua.
Apirilaren 5a: Pazko Biharamuna.
Maiatzaren 1a: Langileen eguna.
Uztailaren 6a: San Fermin bezpera. 12:00etatik aurrera jai izanen dute Iruñean lan egiten dutenek.
Uztailaren 7a, 8a, 9a eta 10a: sanferminak. Jai izanen dute Iruñean lan egiten dutenek.
Urriaren 12a: Espainiako Festa Nazionala.
Azaroaren 1a: Omiasaindu.
Azaroaren 29a: San Saturnino. Jai izanen dute Iruñean lan egiten dutenek.
Abenduaren 3a: San Frantzisko Xabierkoa, Nafarroaren Eguna.
Abenduaren 6a: Konstituzioaren eguna.
Abenduaren 8a: Ama Birjina Sortzez Garbia.
Abenduaren 25a: Eguberri.
2. Iruñean lan egiten ez dutenek jai izanen dute, lan egiten duteneko herriko festak direla eta, horiek hasten diren eguneko 12:00etatik aurrera, eta hurrengo lau egunak, betiere festak lehenago amaitzen ez badira. Halaber, jaiegun izanen da Nafarroako herrietako festen 2010eko Ebazpenean adierazten den tokiko festaren eguna, betiere egun hori ez badator bat herriko festak direla-eta egonen diren jaiegunekin.
2. artikulua. Urteko lanorduen banaketa.
Nafarroako Foru Komunitateko Administrazioan eta haren erakunde autonomoetan urteko lanorduen kopurua 1.592koa izanen da eta honela banatuko da:
1. Astelehenetik ostiralera bitarteko eguneroko lanaldia, orokorrean, 7 ordu eta 20 minutukoa izanen da. Nahitaez aritu beharko da 8:00etatik 15:00ak arte; gainerako 20 minutuak egiteko langileek malgutasuna izanen dute, 7:40tik 8:00ak arte eta 15:00etatik 15:20 arte.
2. Artikulu honetan ezarritako urteko lanorduen banaketa doitzeko, foru agindu honen 2.1 artikulan aipatutako lanaldia duten langileek murrizketa hauek izanen dituzte, Iruñean arituz gero:
a) Uztailaren 12a, 13a eta 14a: sanferminak. Ordutegi finkoa: 8:40etik 13:00etara.
b) Abenduaren 24a eta 31: ordubete, lanadiaren amaieran.
3. Artikulu honetan ezarritako urteko lanorduen banaketa doitzeko, foru agindu honen 2.1 artikulan aipatutako lanaldia duten langileek murrizketa hauek izanen dituzte, Iruñean aritu ezik:
a) 34 ordu, noberaren herriko festetan, kasu bakoitzaren arabera banatzekoak. Murrizketa honek Iruñean diharduten langileei dagokienak bezainbat ordu egiten du.
b) 7 ordu eta 20 minutu, baldin eta tokiko festatzat jo den eguna bat baldin badator herriko jaiak direla-eta jaitzat jo diren egunekin, kasu bakoitzaren arabera hartzekoak. Murrizketa honek Iruñean diharduten langileei dagokienak bezainbat ordu egiten du.
c) Abenduaren 24a eta 31: ordubete, lanadiaren amaieran.
4. Artikulu honetako aurreko ataletan ezarritako lanaldiaren banaketa ez zaie aplikatuko, zerbitzuko beharrak direla-eta lanaldi berezia edo ordu konpentsazioren bat dutenei (lana txandaka, gauez, etab.), ez eta ikastetxeei eta osasun zentroei atxikita daudenei ere, horiek lan egutegi berezia izanen baitute.
Urteko lanorduen kopurua banatzeko orokorrean ezarritakoa ez bezalako erregimena dagoen kasuetan, lan egutegi berezi horrek, betiere lanaldiaren urteko kopurua errespetatuz, indarrean dagoen erregimenari eutsiko dio, bai eguneko lanaldiaren edo txanden iraupenari dagokionez bai urteko lanorduak asteko egunetan banatzeko kasu bakoitzean erabiltzen den moduari dagokionez; horrek guztiak ez du galarazten beste ordutegi batzuk edo urteko lanorduak banatzeko bestelako erregimenak ezartzeko aukera, zerbitzuaren beharrek hala aholkatzen dutenean, dagokion mahai orokorrean edo sektorialean negoziatu ondoren.
5. Zerbitzuaren beharrak direla-eta hala komeni denean, Lehendakaritza, Justizia eta Barne Departamentuak, horretan interesa duen departamentuak proposaturik, zenbait kasu edo administrazio unitatetan artikulu honetako lan ordutegia ez-bezalakoa izatea baimen dezake, goiko atalean aipatutako mahai orokorrarekin edo sektorialekin negoziatu ondoren eta, betiere, ezarritako urteko lanordu kopurua errespetatzen bada.
AZKEN XEDAPENA
Azken xedapen bakarra.-Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2009ko abenduaren 15ean.-Lehendakaritza, Justizia eta Barneko kontseilaria, Javier Caballero Martínez.
Iragarkiaren kodea: F0928376
