1. NAFARROAKO FORU KOMUNITATEA
1.5. ESTATUTUAK ETA LAN HITZARMEN KOLEKTIBOAK
976/2009 EBAZPENA, ekainaren 24koa, Arriskuen Prebentziorako eta Lanaren zuzendari nagusiak emana, Nafarroako "Eraikinen eta lokalen garbiketa" sektorearen hitzarmenaren interpretazioari buruzko akordioa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 60/2008).
Departamentu honetan 2009ko ekainaren 24an sartu da Nafarroako "Eraikinen eta lokalen garbiketa" sektorearen hitzarmenaren interpretazioari buruzko akordioa, hitzarmenaren 17.I artikuluari buruzkoa, batzorde paritarioak 2009ko ekainaren 10ean izenpetu eta onetsia (hasierako espedientearen zenbakia: 60/2008).
Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoari jarraikiz, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan hartu da Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.
Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,
EBATZI DUT:
1. Nafarroako "Eraikinen eta lokalen garbiketa" sektorearen (kodea: 3104605) hitzarmen kolektiboaren interpretazioari buruz batzorde paritarioak 2009ko ekainaren 10ean hartutako akordioa erregistratzea, departamentu honetan dagokion erregistroan, non gorderik gelditzen baitira haren testua eta dokumentazioa.
2. Ebazpen honen berri negoziazio batzordeari ematea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.
3. Ebazpen hau Nafarroako Aldizkari Ofizialean argitaratzea, orok jakin dezan.
Iruñean, 2009ko ekainaren 24an.-Arriskuen Prebentziorako eta Lanaren zuzendari nagusia, Imelda Lorea Echavarren.
Iruñean, 2009ko ekainaren 10eko 16:00etan.
Valentín Velasco Carrasco jauna buru zela bildu zen Nafarroako Eraikinen eta lokalen garbiketa sektorearen Hitzarmen Kolektiboaren Interpretaziorako Batzorde Paritarioa, honako entitate eta ordezkari hauez osaturik:
Enpresaburuen aldetik, David Bueno Martínez jauna eta Inmaculada Martín andrea, ASPEL-Garbiketa Enpresen Elkarte Profesionalaren izenean, eta Carlos Esquisábel Esteban eta José Manuel Ayesa Villar jaunak Nafarroako Eraikin eta Lokalen Garbiketaren arloko Enpresaburuen Elkarte Profesionalaren izenean.
Langileen aldetik, Ana Fernández eta María José Martínez andreak, UGTren izenean, eta Juan Antonio Vidal Canabal jauna, CC.OO.ren izenean.
Bi alderdiek legezko gaitasuna aitortzen diote elkarri eta bertaratu diren guztien aldeko botoa izanda,
ERABAKI DUTE:
Lehena.-Ana Fernández andreak, UGT sindikatuaren izenean eta hura ordezkatuz, kontsulta bat planteatu du indarreko hitzarmen kolektiboaren 17. artikuluaren interpretazioari buruz. Kontsulta hori aktari erantsi zaio, baina ez da hemen jasotzen, prozedura ekonomiaren arrazoiengatik. Batzorde paritario honek, aho batez, uste du 17. artikuluaren lehenengo paragrafoa honela interpretatu behar dela: kontingentzia arrunten eta lanekoak ez diren istripuen ondoriozko aldi baterako ezgaitasunarengatik, urteko lehenengo hiru bajetan, baja bakoitzaren lehenbiziko hamar egunetan, ematen diren prestazioak hobetuko dira lehenbiziko baja egunetik hamargarren egunera arte.
Eta aztertzeko beste gairik ez dagoenez, bilerari bukaera eman zaio eta, adostasunaren adierazgarri, honako akta hau sinatu da goian aipatutako tokian eta egunean.
UGT, CCOO, ASPEL, APELELNA, batzordeburua.
Iragarkiaren kodea: F0919845
