Iragarkia

77. ALDIZKARIA - 2007ko ekainaren 22a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

419/2007 EBAZPENA, maiatzaren 21ekoa, Industria eta Teknologia, Merkataritza eta Lan Departamentuko Lan zuzendari nagusiak emana, Mutiloabeitiko "Lavandería Industrial Olimpia, S.L." enpresaren lan hitzarmen kolektiboaren testua erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 54/2007).

Departamentu honetan 2007ko maiatzaren 4an sartu da "Lavandería Industrial Olimpia, S.L." enpresaren lan hitzarmen kolektiboaren testua, 21 artikuluz eta eranskin batez (2007rako lansarien taula) osatua, enpresaren ordezkaritzak eta langileen ordezkariek (ESK eta ELA) 2007ko maiatzaren 2an izenpetu eta onetsia.

Industria eta Teknologia, Merkataritza eta Lan Departamentuak bere esku du martxoaren 24ko 1/1995 Legegintzako Errege Dekretuaren 90. artikuluan aipatzen diren lan hitzarmen kolektiboak erregistratu, gorde eta argitaratzea, lan zerbitzuak Estatuko Administraziotik Nafarroako Foru Komunitatera eskualdatzen dituen apirilaren 11ko 937/1986 Errege Dekretuaren arabera, eta kontuan izanik Hitzarmen kolektiboak erregistratu eta gordetzeari buruzko maiatzaren 22ko 1040/1981 Errege Dekretuan xedatutakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Mutiloabeitiko "Lavandería Industrial Olimpia, S.L." enpresaren lan hitzarmen kolektiboa erregistratzea (kodea: 3107922) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2007ko maiaitzaren 21ean._Lan zuzendari nagusia, José María Roig Aldasoro.

"LAVANDERIA INDUSTRIAL OLIMPIA, S.L." ENPRESAREN LAN HITZARMEN KOLEKTIBOA

1. artikulua. Aplikazio eremua.

Hitzarmen hau Lavandería Industrial Olimpia, S.L. enpresak Mutiloabeitin (Nafarroa) duen lantokiari atxikita dauden besteren konturako langile guztiei aplikatuko zaie.

Aplikazio eremutik kanpora geldituko dira enpresako zuzendaritza karguetan ari direnak.

2. artikulua. Iraunaldia.

Hitzarmen honek hiru urteko indarraldia izanen du, 2007ko urtarrilaren 1etik 2009ko abenduaren 31 arte. Langileen Estatutuaren 86.2 artikuluan aurreikusitako ondorioetarako, hitzarmen honen amaiera sinatzen den momentutik iragartzen da.

Itundutako iraunaldia bukatuta eta honako honen ordez aplikatuko den hitzarmenari buruzko akordio espresurik adostu bitartean, betebeharren gaineko klausulek indarra galduko dute, baina artikulu arauemaileek bere horretan segituko dute.

Hitzarmen hau aplikatzearen ondorioz sortzen diren atzerapenen ordainketa hitzarmena sinatu eta ondoko bi hilabeteetan eginen da.

3. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira. Kasu horretan, hitzarmen honen hobekuntzek multzo bat osatzen dute, edozein modutan ere lehendik daudenekin konpentsatzekoa, eta konparazioa urteko guztirakoari begira eginen da, errendimendu normalean eta asistentzia osoa izanik.

4. artikulua. Lanaldia.

Hitzarmenaren indarraldiko hiru urteetan urteko lanaldia 1.788 ordukoa izanen da.

Lanaldi jarraian aritzen diren langileen benetako lanaldiaren barrenean atsedenaldirako 10 minutu sartu dira 2007. urtean. Denbora hori lan denboratzat hartuko da eta, beraz, ordainduko da. 2008. urtean, atsedenaldia 10 minutukoa izan beharrean 15 minutukoa izanen da, eta 2009. urtean 20 minutukoa.

Hitzarmenak indarra duen bitartean, urteko lanaldi hori enpresak eta batzordeak onetsi eta zehaztuko duten lan egutegiaren arabera banatuko da.

Industria egutegiaren eta lan egutegiaren artean dauden diferentzia egunak norberak libreki hartzeko egunak izanen dira. Jende askok egun horiek batera har ez ditzan eta, ondorioz, produkzioaren eta zerbitzuen ohiko funtzionamenduari kalterik ez eragiteko, egun horiek hamabost egun lehenagotik eskatu beharko dira gutxienez. Salbuespen kasuetan, epe hori murrizten ahalko da. Egun libre horiek baimentzeko, eskaeren aurkezpen ordenari segituko zaio zorrozki. Egun bera txanda bakoitzeko langileen %12,5ek hartzen ahalko dute, gehienez.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

Bi alderdiak ados jarrita, zenbait egunetan sartzeko eta ateratzeko ordua aldatzen ahalko da, produkzio beharrei egokitzeko eta lana eraginkorragoa izan dadin, deusetan galarazi gabe itundutako urteko lanorduak eta ordutegia antolatu beharra.

5. artikulua. Igande eta jaiegunetako lana.

Kontuan harturik produkzio prozesua ezin dela eten, egun natural guztietan lan eginen da, igandeetan, urtarrilaren 1ean eta abenduaren 25ean izan ezik.

Urtarrilaren 1a eta abenduaren 25a igandearekin egokitzen badira enpresak eta batzordeak itunduko dute jaieguna aurreko edo hurrengo larunbatean edo astelehenean hartuko den.

Urteko lanaldia banatuko da egun horiek lan denboratzat hartuta, ezarrita dagoen ordu kopurua gainditu gabe.

Produkzioa dela-eta edo instalazioak zaindu edo mantentzeko lanak direla-eta jaiegunetan lan egin beharra dagoenean, benetako lanegun bakoitzeko plus bat ezarri da egutegiaren barrenean jaiegunetan lan egin beharra duten langile guztientzat. Plus hori 53,57 eurokoa izanen da hitzarmen honen indarraldi osorako.

6. artikulua. Oporrak.

Oporraldia hilabeteko natural batekoa izanen da, hilabeteak 30 egun edo 31 dituen kontuan hartu gabe.

Oporren egutegia enpresako zuzendaritzaren eta enpresa batzordearen artean adostuko da urteko lehenengo hiruhilekoan eta langile bakoitzaren oporraldia jasoko du.

Oporrak txandaka hartuko dira. Langileak, borondatez, azaroa, abendua, urtarrila edo otsaila aukeratzen baldin badu oporretarako, oporraldiari dagokion ordainketaz gainera, 1,14 euroko plus bat ordainduko zaio egun bakoitzeko. Borondatez, martxoa, apirila, maiatza edo urria aukeratzen badu, 0,91 euroko plusa ordainduko zaio egun bakoitzeko. Hilabete horietan oporraldiaren puska bat hartuz gero, plusa jaso ahal izateko, oporraldiaren %50 gutxienez hilabete horietan hartzea eskatuko da.

Oporren ordainsaria azkeneko hiru hilabeteetan kobratutako batez besteko soldata erreala adinakoa izanen da.

Urrian eta maiatzean hartzen direnak izan ezik, oporrak ekainetik urriaren 15era bitarte hartuko dira, biak barne, baina egun berean ezin dute bat egin txanda bakoitzeko langileen %12,5ek baino gehiagok. Uztailaren 15etik irailaren 30era arte, pertsona bakoitzak gehienez hamabost opor-egun hartzen ahalko ditu batera.

Jarduera handieneko garaia denez eta, horrenbestez, produkzio behar handia dagoenez, Lavandería Industrial Olimpiako ezein langilek ezin du opor-egunik hartu uztailaren 1etik 15era bitarte, biak barne, enpresako zuzendaritzak propio baimendutako salbuespen kasuetan izan ezik.

Oporraldia hasteko unean aldi baterako ezintasun egoeran dauden langileek eskubidea izanen dute alta-agiria hartu ondoren oporraldi osoa hartzeko, betiere alta hartzen badu oporraldiari dagokion urtearen ondoko urte naturalaren urtarrileko azkeneko eguna baino lehen.

Horrez gainera, urtean beren aferetarako bi egun hartzeko eskubidea izanen dute langile guztiek, enpresari 48 lehenagotik jakinaraziz gero. Aldi baterako langileen kasuan, eskubidezko denbora hori kontratuaren iraupenaren arabera kalkulatuko da. Egun horiek ezin dira opor-egunekin lotu, eta ezin izanen dira jaiegunetan, zubietan edo larunbatetan hartu.

7. artikulua. Lizentzia ordainduak.

Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborako:

a) Ezkontidearen heriotza: 5 egun natural.

b) Gurasoen, seme-alaben, anai-arreben edo koinatu-koinaten heriotza: 3 egun natural.

c) Aiton-amonen, biloben edo aita-amaginarreben heriotza: 2 egun natural.

d) Ezkontidea, gurasoak, seme-alabak edo aita/amaginarreba larriki gaixotu eta presaka ospitaleratu behar izatea edo erabateko anestesiarekin egiten den kirurgia edo kirurgia handi anbulatoria egin behar izatea: 2 egun natural.

e) Anai-arrebak edo koinatu-koinatak larriki gaixotu eta presaka ospitaleratu behar izatea: 2 egun natural.

f) Ezkontidearen, gurasoen, anai-arreben edo seme-alaben ospitaleratze programatua: 2 egun natural, betiere enpresari ospitaleratzea gertatu baino bi egun lehenagotik eskatzen bazaio.

g) Koinatu-koinaten edo aita/amaginarrebaren ospitaleratze programatua: 2 egun natural, betiere enpresari ospitaleratzea gertatu baino bi egun lehenagotik eskatzen bazaio.

h) Emaztearen erditzea, 3 egun natural.

Aurreko lizentziak erabiltzeko, langileak 200 kilometrotik gorako bidaia egin behar baldin badu, lizentzia egunei beste bat erantsiko zaie.

h) Seme-alaben, anai-arreben edo koinatu-koinaten ezkontza: 1 egun natural.

i) Langilearen ezkontza: 20 egun, betiere lehenbiziko eguna larunbata ez den beste edozein egun baldin bada.

j) Bizilekuz aldatzea: egun natural bat.

k) Beharrezkoa den denbora, Gizarte Segurantzako familia medikuaren kontsultara edo erakunde horretako espezialista batera joateko, medikuak jendea hartzeko duen ordutegia lanekoarekin bat etortzen denean, eta betiere 6 ordu urtean gehienez. Beharrezkoa den denbora izanen da kontsultara joan izana frogatzen duen agirian azaltzen dena, hartan emandako denbora zehaztu beharko da eta.

Baimen hori hartu ahal izateko, behar-beharrezkoa izanen da kontsultara joan izana frogatzeko agiria aurkeztea eta, gainera, Gizarte Segurantzako espezialista batera joanez gero, aldez aurretik langileak erakutsi beharko dio enpresaburuari medikuntza orokorreko fakultatiboak kontsulta horretara joateko emandako aginduaren ziurtagiria.

Artikulu honetako a) letratik j) bitartera adierazitako lizentziak egun naturaletan kontatu behar dira, gertaera egunetik beretik hasita.

Aurreko puntuetan azaldutako lizentziak emateko, gertaera eragilearen eguna baino urtebete lehenagotik bederen langilearekin bikotekide egonkor gisa bizi diren pertsonak ezkontidetzat hartuko dira, bizitokiko udalaren Izatezko Bikoteen Erregistroan inskribaturik daudela egiaztatzen badute. Bizitokian horrelako erregistrorik ez badago, gertaera eragilearen eguna baino urtebete lehenagotik bederen langilearekin bikotekide egonkor gisa bizi direla egiaztatzeko, bizitokiko udalaren ziurtagiria aurkeztu beharko da.

8. artikulua. Lizentzia ordaindugabea.

Urtebetetik gorako zerbitzualdia duten langileek lizentzia ordaindugabea eska dezakete, 15 egunekoa gutxienez eta 2 hilabetekoa gehienez. Eskaerak 15 egun lehenagotik egin behar dira, gutxienez. Langileak bi urtetik behin baliatzen ahalko dira eskubide honetaz. Baimena emanen da tartean premia larria izanez gero, behar bezala justifikatua.

Honelako lizentzia ezin izanen zaie eman plantillako %3ri baino gehiagori aldi berean.

Emanez gero, langileak ez du hartzekorik izanen eta enpresak ez dio Gizarte Segurantzari ezer kotizatu beharko.

Langileak lizentzia bukatu eta biharamunean itzuli beharko du lanera, lizentzia hasi aurreko egunean zituen baldintza beretan.

9. artikulua. Enpresan sartzea, probaldia eta borondatezko lanpostu-uzteak.

A._Enpresan sartzea.

Enpresako zuzendaritzak enpresa batzordeari jakinaraziko dio zein lanpostu bete nahi dituen eta izangaiek zein lanbide baldintza bete behar dituzten, salbu eta kontratazioa berehala egitekoa denean, halakoetan jakinarazpena geroago eginen baita.

Aginte edo konfiantzako lanpostuak betetzen direnean ez da aplikatuko goian ezarritakoa.

Ahal den guztietan, zuzendaritza saiatuko da lanpostu hutsak eskatzen diren baldintzak betetzen dituzten plantillako langileen barne-igoeraren sistemaren bidez betetzen.

B._Probaldia.

Langileak enpresan lanean hastean proba gisa aritzen direla ulertuko da. Probaldiaren iraupena alda daiteke bete beharreko lanpostuaren arabera, eta ez da, inondik ere, ondoko eskalan finkatutako denbora baino luzeagoa izanen:

_Peoiak, espezialistak eta titulurik gabeko teknikariak: hilabete bat.

_Teknikari tituludunak: 6 hilabete.

Probaldian, enpresak eta langileak lan kontratua bertan behera uzten ahal dute aurreabisurako eperik jarri gabe eta kalte-ordaina izateko eskubiderik gabe. Probaldia pasatuta kontratua bertan behera utzi gabe, kontratuak ondorio guztiak sortuko ditu.

Probaldian dagoen langileak lanerako ezintasun iragankorra hartuz gero, ez da horregatik probaldia moztuko denbora kontatzeari dagokionez.

C._Borondatezko lanpostu-uzteak.

Beren borondatez enpresa utzi nahi duten langileak behartuak daude enpresari jakinaraztera, aurreabisurako epe hauek betez: hamabost egun, peoi, espezialista eta administrarien kasuan, eta 2 hilabete, teknikari eta tituludunen kasuan.

Aipatu epeetan aurreabisua egiten bada, enpresak, epea amaitzean, ordurako kalkulatzen ahal diren kontzeptu finkoak pagatu beharko ditu. Gainerako kontzeptuak ordainketa egin ohi den egunean pagatuko dira.

Aipatu epeetan aurreabisua egiten ez bada, enpresak eskubidea izanen du langilearen likidaziotik egun bateko soldata deskontatzeko atzeratzen den egun bakoitzeko.

10. artikulua. Antzinatasun saria.

Hitzarmen honen soldaten egituran ez dago antzinatasun saririk.

11. artikulua. Ordainsariak.

2007. urtean, kategoria bakoitzak jasoko dituen ordainsariak hitzarmen honen I. eranskinean agertzen dira. Diru-kopuru horiek 2006ko taulari 2006ko KPIa + %0,5eko igoera aplikatzetik atera dira.

2008. eta 2009. urteetan, kasuan kasuko aurreko urteko taulari aurreko urteko KPIa + %0,5eko igoera aplikatuko zaio, kontzeptu guztietan.

Aplikatuko den KPIa historikoa izanen da, aurreko urtekoa, hots, Espainiako Estatistikako Institutuak Espainiako estatu osorako argitaratzen duena. KPIaren berri jakin bezain pronto, hitzarmen honen indarraldiaren barreneko urte bakoitzerako ezarrita dauden igoerak aplikatuko dira eta KPIaren argitalpen ofiziala egiten den hilabetearen ondoko hilabeteko nominan ordainduko dira.

Borondatezko plusik edo lanpostuaren plusik jasotzen ez duten langileek, hitzarmeneko plus gisa, diru-kopuru hauek kobratuko dituzte:

_Espezialistak: 37,8 euro hilean.

_Peoi espezialista: 67,8 euro hilean.

Laneratze plus gisa, ondoko diru-kopuru hauek ordainduko dira benetan lan egindako egun bakoitzeko:

_Espezialistak eta peoi espezialista: 74,49 euro hilean.

_Peoia: 47,83 euro hilean.

Hilabeteko kopuru horietatik ondoko diru-kopuru hauek kenduko dira absentzia egun bakoitzeko:

_Garbiketako peoia Laneratze plusa: 1,99 euro eguneko.

_Peoi espezialista Laneratze plusa: 3,19 euro eguneko.

_Hitzarmeneko plusa: 2,82 euro eguneko.

_Espezialista: Laneratze plusa: 3,10 euro eguneko.

_Hitzarmeneko plusa: 1,57 euro eguneko.

Deskontua egiteko orduan ez dira aintzat hartuko ez igandeak, ez eta enpresaren lan egutegiaren arabera langileak lanera joan beharrik ez duen egunak ere.

Oporraldian eta aparteko pagak ordaintzen direnetan, laneratze plusa eta hitzarmeneko plusa azkeneko hiru hilabeteetako batez besteko errealaren arabera ordainduko dira.

12. artikulua. Aparteko orduak.

Legez ezarritakoez gainera, aparteko ordu gehiagorik ez egitera joko da. Egin behar izanez gero, dela ezinbesteko arrazoiengatik, dela jarduera punturik gorenean dagoelako, ondoko taularen arabera ordainduko dira:

_Arruntak: 9,62 euro.

_Gauekoak: 11,68 euro.

_Jaiegunetakoak: 11,36 euro.

Gaueko aparteko orduak gaueko txandako lanaldia bukatu ondoren egiten direnak izanen dira. Gaueko txandako lanaldia 22:00etatik 06:00ak bitartekoa da.

Egiturazko aparteko orduak dira gutxienez duela bi hilabetez geroztik egunero-egunero zerbitzua egiten zaien bezero egonkorrek eskaera handitzearen ondorioz egiten direnak.

13. artikulua. Osasun azterketa.

Arlo honetan indarra duten legeei jarraituko zaie.

14. artikulua. Laneko arropa.

Enpresa behartua dago langile bakoitzak behar dituen laneko arropak ematera, urtean bitan, hots, urtarrilean eta ekainean.

Langilea toki hezeetan aritzen bada, enpresak babeserako arropa eta oinetakoak eman beharko dizkio. Egoera txarrean daudenetan, aldatuko dira.

Arropa beti erabili beharko da, nahitaez, lantegiko langile guztien txukuntasuna eta berdintasuna erakusteko asmoz.

Arropa zikinaren eremuan lan egiten dutenek eskuetan jantzi babesgarriak eramanen dituzte nahitaez, arriskuei aurrea hartzeko. Jantzi horiek ordezkatuko dira erabiltzearen poderioz higatzen direnean.

Langile guztiek ilea bilduta eramateko jantzi egokiak eraman beharko dituzte nahitaez. Jantzi horiek enpresak baimendu beharko ditu.

15. artikulua. Prestakuntza kontratua eta praktiketako kontratua.

Indarra duen legeriari jarraituko zaio.

16. artikulua. Aparteko eskersariak.

Hitzarmen honen eraginpeko langileek aparteko eskersari bana jasoko dute uztailaren 15ean eta abenduaren 15ean, hilabeteko horietako soldataren adinakoa. Hori hala izanik ere, enpresa saiatuko da uztaileko eskersaria uztailaren 1etik uztailaren 6ra bitartean ordaintzen.

Eskersari hori kalkulatzeko, hilabete bateko soldatatzat hartuko da aurreko hiruhilabeteetan kontzeptu hauetan jasotakoaren batez bestekoa: oinarrizko soldata + jarduera plusa + hitzarmeneko plusa + laneratze plusa. Kontzeptu horietan ez da jaiegunak konpentsatzeko plusa sartuko.

Aparteko bi paga horiek sei hilabetetik sorraraziko dira. Horrenbestez, lanean hasi berriek edo lana uzten dutenek hurbilen duten eskersaria kobratuko dute, seihileko horretan lan egindako denboraren arabera kalkulatua.

17. artikulua. Lanerako ezintasun iragankorra.

Eritasunaren ondoriozko absentziak, are egun batekoak badira ere, baja-agiriaren bitartez justifikatu beharko dira. Bajan dauden langileek berrespen partea nahitaez aurkeztu beharko dute, legez ezarritako epean. Frogagiririk aurkeztu ezean enpresak ez du inolako ordainsaririk eman beharko denbora horrengatik.

Lanerako ezintasun iragankorreko prozesuetan, enpresak Gizarte Segurantzaren prestazioa osatuko du, prestazioaren oinarriaren %80ra arte, prozesuaren hamargarren egunetik aurrera, hori barne.

Erregulazio honen xede den dirua kobratzeko eskubidea izateko, langileak baldintza hauek bete behar ditu:

_Baja-agiria jaso eta hurrengo 24 orduetan enpresari telefonoz abisatzea.

_Baja-agiri ofizialaren kopia, osasun zerbitzu publiko bateko medikuak emana, aurkeztea enpresan, prozesua hasi ondoko 72 orduko epean.

_Ezintasun prozesuaren laugarren egunean, eta astero, berrespenaren agiria aurkeztea enpresan.

_Enpresak izendatzen duen medikuaren hitzorduetara joatea, bere osasun egoera dela-eta joaterik baldin badu.

_Arau hauetako edozeini nahiz arlo hau erregulatzeko ematen direnei iruzur eginez gero edo men egiten ez bazaie, hemen finkatutako onurak kentzen ahalko dira gehienez sei hilabetez, kasu bakoitzean ezar litezkeen arauzko zehapenak galarazi gabe.

18. artikulua. Lan osasuna.

Arlo honetan indarra duten legeei jarraituko zaie.

19. artikulua. Diziplina araubidea.

Disziplina arau hauen bidez errespetuzko lan giroa sustatu nahi da elkarbizitza ona izateko eta enpresaren ordenamendu teknikoari eta antolaketari eusteko, bai eta langileen zein enpresaren eskubide eta interesak bermatu eta defendatzeko ere.

Enpresak zilegi du langileen egintza edo ez-egite zigorgarriak zehatzea, kontratuan ezarritako lan betebeharrak betetzen ez direnean, hurrengo artikuluetan ezartzen diren hutsegiteen mailaketaren arabera betiere.

Langileek egindako hutsegiteak arinak, larriak edo oso larriak izan daitezke. Enpresak hutsegite guztiei buruzko jakinarazpen idatzi eta arrazoitua helarazi beharko dio langileari, hutsegitearen kalifikazioa edozein dela ere.

Hutsegite larrien ondoriozko zehapenak jarriz gero, langileen legezko ordezkariei jakinaraziko zaie, horrelakorik baldin badago.

Zehapena ezarririk, haren datatik hirurogei egun iragan arte luzatzen ahal da bete gabe.

A._Hauek dira hutsegite arinak:

1._Puntualtasun falta lanera sartzean edo lanetik ateratzean, hiru aldiz gehienez hilabete batean, justifikatu gabe.

2._Hilabete batean egun batez lanera ez agertzea justifikatu gabe, jaieguna izan ezik.

3._Lanera joanen ez dela ez jakinaraztea, aurretiaz edo, bidezkoa denean, hurrengo 24 orduen barrenean, hori egiteko ezintasuna egiaztatzen denean izan ezik.

4._Zerbitzutik edo lanpostutik denbora laburrerako alde egitea funtsezko arrazoirik gabe, baldin eta horren ondorioz pertsonei edo gauzei nolabaiteko kaltea egiten bazaie.

5._Norberaren ardurapean dauden ekipoak eta lan materiala zaindu edo mantentzeko lanetan akats arinak.

6._Enpresaren bezeroak edo hornitzaileak adeitasunez eta arretaz ez hartzea.

7._Bizilekuz edo helbidez aldatu izanaren berri ez ematea enpresari, horrek lankideei edo enpresari kalterik edo arazorik ekartzen badie.

8._Langilearen familian izandako aldaketak, Gizarte Segurantzan edo Zerga Administrazioan ondorioak izan ditzaketenak, ez jakinaraztea behar den garaian.

9._Beren ohiko eginkizunak betetzen ari diren nagusiek emandako aginduei jaramonik ez egitea, horrek pertsonei edo gauzei kalte edo arriskurik ekartzen ez badie.

10._Lankide, bezero edo hornitzaileekin eztabaidatzea lanaldiaren barrenean.

11._Noizean behin mozkortuta edo drogak hartuta egotea lanean.

B._Hauek dira hutsegite larriak:

1._Puntualtasun falta lanera sartzean edo lanetik ateratzean, hiru aldiz baino gehiagotan hilabete batean, justifikatu gabe.

2._Hilabete batean bi egunetik lau egunera bitarte lanera ez agertzea justifikatu gabe. Aski izanen da lana behin bakarrik huts egitea jaieguna baldin bada edo horren ondorioz lankide baten txanda nahaspilatzen bada edo enpresari kalte handi samarra sortzen bazaio.

3._Zerga kontuan edo Gizarte Segurantzan eragina izan dezaketen datuak maltzurkeriaz faltsutzea edo ez aipatzea.

4._Lanorduetan jolasean edo denbora pasa ibiltzea, behin eta berriz eta laneko martxari kalte eginez.

5._Organikoki langilearen ardura dutenek, beren ohiko eginkizunak betetzen ari direla, ematen dituzten aginduei jaramonik ez egitea, horrek pertsonengan edo gauzetan ondorio larria baldin badakar.

6._Beste langile baten lekua hartu eta laneko sarrerako edo irteerako erregistroak eta kontrolak aldatzea.

7._Enpresaren baimenik gabe, lan partikularrak egitea lanorduetan, bai eta enpresako tresnak, erremintak, makinak edo ibilgailuak norberarentzat edo beste batentzat erabiltzea, lanorduetatik kanpo bada ere.

8._Norberaren garbitasun eta txukuntasunik eza, enpresaren produkzio prozesuan edo zerbitzu ematean eraginik izan dezakeenean, eta betiere aurretik enpresaren abisua jaso baldin bada.

9._Zabarkeriaz edo utzikeriaz aritzea lanean, zerbitzuaren kaltetan, baina, horren ondorioz, pertsonengan edo gauzetan kalte larririk sortu gabe.

11._Langileen sexu askatasunaren kontrako edozein eraso, hala nola ahoz zein egitez iraintzea eta pertsonen intimitatea edo duintasuna ez errespetatzea.

12._Noizean behin mozkortzea edo drogak hartzea, lanerako ondorio makurrak badakartza edo langileen segurtasuna eta osasuna arriskutan jartzen bada.

13._Hiru hilabeteko epean hutsegite arin bat baino gehiago egitea (puntualtasunari buruzkoak izan ezik), desberdinak izan arren, aurretik hitzezko kargu-hartzea ez den zehapen bat jarri bazaio.

C._Hauek dira hutsegite larriak:

1._Puntualtasun falta lanera sartzean edo lanetik ateratzean justifikatu gabe, hamar aldiz sei hilabeteko epean edo hogei aldiz urte batean, aurretik behar bezala ohartarazi baldin bazaio.

2._Lana hiru egun jarraian huts egitea justifikatu gabe, edo bost egun tartekatutan hilabete batean.

3._Agindutako kudeaketan iruzur, leialtasun eza edo konfiantza-abusu egitea eta beste lankideei, enpresari edo edozein pertsonari ebastea edo lapurtzea enpresaren lantokietan edo, lanean ari dela, beste edozein lekutan.

4._Eritasunaren edo istripuaren itxurak egitea. Langilea bajan egonik, bere zein besteren kontura edozein lanetan aritzea lan arloko arau-haustetzat hartuko da. Halaber hutsegite oso larritzat joko da istripuaren edo eritasunaren ondoriozko baja luzatzeko egiten den trikimailu oro.

5._Zerbitzutik edo lanpostutik alde egitea justifikatutako arrazoirik gabe denbora gutxirako bada ere, baldin eta horrela enpresari edo lankideei kalte handi samarra ekartzen bazaie, segurtasuna arriskuan jartzen bada edo istripuren bat eragiten bada.

6._Enpresako sekretuak, nahitaez isilpean gorde beharrekoak, haustea edo urratzea.

7._Enpresari bidegabeko lehia egiten dioten jardueretan aritzea.

8._Ohiko edota itundutako errendimendua nahita eta luzaroan gutxitzea.

9._Hitzezko eta egitezko tratu txarrak ematea edo errespetu falta agertzea goragokoei edo haien senideei, baita lankideei eta enpresaren hornitzaile eta bezeroei ere.

10._Laneko edozein kontutan goragokoen esanak edo aginduak ez betetzea, horrek enpresari edo lankideei kalte nabarmena eragiten badie, salbu eta zuzendari, nagusi edo erdi mailako kargudunek agintekeriaz jarduten dutenean, legezko manuak nabarmen eta nahita urratuz eta langilearen kaltetan.

11._Sexu askatasunaren kontrako erasoak, langilea menpekoa dela aprobetxatuz egiten direnak, edo beren lanbidea edo lan egoera dela-eta bereziki ahulak diren pertsonei egiten zaizkienak.

12._Mozkortuta edo toxikatuta maiz egotea, baldin eta lanean ondorio okerrak badakartza.

13._Zuzendarien, nagusien edo erdi mailako agintarien agintekeria. Agintekeriaz jokatzen dela ulertuko da egintza arbitrarioren bat burutzen badu, legezko manuak nabarmen eta nahita urratuz eta menpekoari kalte nabarmena eginez.

14._Hutsegite larri bat egin ondoren, bi hilabeteren barnean gehiago egitea, mota desberdinetakoak izan arren, aurretik zehapena jaso badute.

D._Zehapenak.

Ondoren azaltzen dira aipatu hutsegiteengatik langileei ezartzen ahal zaizkien gehieneko zehapenak:

Hutsegite arinengatik: hitzezko kargu-hartzea edo kargu-hartze idatzia eta bi egun arteko enplegu-soldaten etenaldia.

Hutsegite larriengatik: kargu-hartze idatzia edo hiru egunetik hamalaura bitarteko enplegu-soldaten etenaldia.

Hutsegite oso larriengatik: kargu-hartze idatzia, hamalau egunetik hilabete batera bitarteko enplegu-soldaten etenaldia edo kaleratzea.

E._Preskripzioa.

Graduaren arabera, hutsegiteak preskribatzeko epeak honakoak izanen dira:

_Hutsegite arinak: hamar egun.

_Hutsegite larriak: hogei egun.

_Hutsegite oso larriak: hirurogei egun.

Hutsegiteen preskripzio epea enpresak gertaeren berri izaten duenean hasiko da kontatzen eta, betiere, gertatu eta handik sei hilabetera.

19. artikulua. Kontratazioak.

Merkatuaren egoera dela-eta edo lana edo eskaerak pilatzen direnean, enpresaren ohiko jardunbidean bada ere, horretarako kontratazioak egiten ahalko dira jarduera dela-eta, 10 hilabeterako gehienez ere 12 hilabeteko epean, Ikuztegien sektorerako Nafarroako hitzarmenean ezarritakoari jarraikiz.

Langileen Estatutuaren 15.1.a) artikuluarekin bat etorriz, hitzarmen kolektibo honetako alderdi negoziatzaileek adostu dute enpresa jardueraren barrenean izaera berezia duten lan edo eginkizunak identifikatzea, hain zuzen, obra edo zerbitzu jakin baterako kontratuen bidez betetzen ahal direnak. Hori horrela, honako bezero hauentzako lanetarako, kontratu horiek erabiltzea erabaki da, zerbitzuak iraun bitartean: AMMA zahar-etxeak eta AC Ciudad de Pamplona hotela; eta orobat, bezeroaren lantokian bertan lan egiteko eta bezero horren ez beste inoren arroparen hornidura eta banaketa egiteko kontratatzen diren langile guztien kasuetan.

Empresak plantillako langileen %60ri mugagabeko kontratupean izateko konpromisoari eutsi dio. Ehuneko 60 hori zehazteko, lan gutxien dagoen hilabetean aritzen den plantilla hartuko da oinarri.

20. artikulua. Sanferminak.

Sanferminetako igandean lan egiten duten langileek 92,88 euroko dieta jasoko dute, baina ez da beste diru-kopururik kobratuko kontzeptu horregatik. Egun horretako lanaldia ez da urteko lanaldian sartuko, eta jaiegun bat hartzeko eskubidea sortuko du.

21. artikulua. Batzorde paritarioa.

Hitzarmena sinatzearekin batera eratuko da, eta lau kide izanen ditu, bi langileen izenean eta bi enpresaren izenean.

Batzordearen eginkizuna da hitzarmena interpretatu eta haren segimendua egitea eta eranskinak urtero eguneratzea.

Bi alderdietako batek idatziz eskatzen duenean bilduko da batzordea. Eskaera bilera-eguna baino hamabost egun lehenagotik egin beharko da eta harekin batera gai-zerrenda bidaliko da. Olimpiako langileren batek hitzarmen honen aplikazioaren gaineko kontsultaren bat egin nahi izanez gero, idatziz aurkeztu beharko du batzordeko alderdiren bati igorrita. Batzordeak, gehienez, hilabete bateko epean bideratuko du.

I. ERANSKINA

2007. urteko soldaten taula

ESPEZIALISTA 624,00 82,31 74,49

PEOI ESPEZIALISTA 550,59 82,31 74,49

PEOIA 550,59 11,12 47,83

_Aparteko orduak:

Arruntak: 9,62 euro orduko.

Gauekoak: 11,68 euro orduko.

Jaiegunetakoak: 11,36 euro orduko.

_Jaiegunetako plusa: 53,57 euro.

Iragarkiaren kodea: F0708742