35. ALDIZKARIA - 2007ko martxoaren 21a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

255/2007 EBAZPENA, otsailaren 20koa, Osasun zuzendari nagusiak emana, Osasun Departamentuak 2007an zehar sustatuko dituen ikerketa programak arautuko dituzten baldintzak ezartzen dituena.

Nafarroako Gobernuko Osasun Departamentuak, Foru Komunitatearen barrenean Osasun Zientzien arloko ikerketa sustatu eta bultzatu beharraz jabeturik, eta Osasunari buruzko Lege Orokorrak eta Zientzia eta Teknikaren Ikerketa Sustatu eta Koordinatzeko Lege Orokorrak ezarritako esparruan, eta, halaber, Osasunari buruzko azaroaren 23ko 10/1990 Foru Legearen Hamargarren Tituluan, "Osasun Irakaskuntza eta Ikerketa" izenekoan, aurreikusitakoa betez, Nafarroako Osasun Zientzietan ikerketa laguntzeari beharrezko deritzo. Kontuan harturik, Osasun Zientzietako ikerketa proiektuak finantzatzeko zenbait agentzia badaudela, eta dauden baliabideak eraginkorragoak izan daitezen, ebazpen honen helburua da oro har osasunean eta, beraz, Nafarroako Osasun Sisteman eraginik handiena duten arloetako ikerketa sustatzea.

Nafarroako Ogasun Publikoari buruzko abenduaren 26ko 8/1988 Foru Aginduko 41.4 artikuluan ezarritakoaren arabera, geroko urteetako ekitaldien kargura gastu konpromisoak hartzen ahalko dira Nafarroako Gobernuaren aldez aurreko baimenik gabe, baldin eta haiek egiteko baimena foru lege mailako xedapenen bitartez ematen bada, kasu horretan lege horietan ezarritakoari jarraikiz arautuko baitira.

Ikerkuntzari dagokionez, etorkizuneko ekitaldien kargura konpromisoak hartzeko baimena 2007ko ekitaldirako Nafarroako Aurrekontu Orokorrei buruzko abenduaren 27ko 17/2005 Foru Legean aipatzen da, bere 30.1 artikuluan ("Gastu-konpromisoak etorkizuneko aurrekontuen kargura") finkatzen baita Osasun Departamentuak, bai eta beste departamentu batzuek ere, dagozkien eskumenen esparruan, beka eta diru laguntzak eman ditzaketela ikertzaileen prestakuntza eta espezializaziorako. Xede horretarako, gastu-konpromisoak hartuko dituzte, dauden ekitaldiaren ondorengo aurrekontuen kargura, baldin eta esandako konpromisoek gainditzen ez badituzte xede horretarako aurreko ekitaldian aipatzen diren zenbatekoak.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Osasun Departamentuak 2007an zehar sustatuko dituen ikerketa programak arautuko dituzten baldintzak ezartzea.

2. Ebazpen hau eta bere eranskinak Nafarroako ALDIZKARI OFIZIALean argitaratzea.

3. Ebazpen honen aurka gora jotzeko errekurtsoa jar daiteke, Osasun kontseilariari zuzendua, argitaratu eta biharamunetik hilabeteko epean.

Iruñean, 2007ko otsailaren 20an._Osasun Departamentuko zuzendari nagusia, Francisco Javier Sada Goñi.

I. ERANSKINA

Arauak

1. Osasun Departamentuak Osasun zientzietako ikerketa proiektuak sustatuko ditu, 2007an zehar egitekoak, modalitate hauen arabera:

_A) modalitatea: Ortiz de Landázuri beka, oinarrizko ikerketarako, foru agindu honen I. eranskinean adierazten diren zehaztapenekin.

Modalitate honetan hiru proiektu onenak hautatuko dira; lehenbizikoari, haren kalitatearengatik hala merezi baldin badu, "Ortiz de Landázuri Beka" izena emanen zaio, eta beste biak akzesitak izanen dira.

_B) modalitatea: Foru Komunitatearentzat interesgarritzat jotzen diren arloetan aplikatzen den ikerketa eta bereziki foru agindu honen II. eranskinean lehentasunezko arlotzat jotzen direnetan.

Aipatu eranskineko B.2.c modalitateko ikerketa proiekturik hoberenari "Ikerketarako Mikel Larumbe Zazu Beka" izena emanen zaio.

2. Eskatzaileak.

Ikerketa proiektuak proposatzen ahalko dituzte, ikertzaile nagusi gisa, osasun zentro publikoei eta Nafarroan kokatutako unibertsitateei atxikitako pertsonek. Halaber, Nafarroan kokatutako irabazi asmorik gabeko bestelako erakunde publiko zein pribatuetako ikertzaileek ere proposatzen ahalko dituzte.

Ikertzaile nagusia ezin izanen da Osasun Departamentuak finantzatutako proiektu batean baino gehiagotan agertu. Taldekide guztiek debekatuta izanen dute aldi berean abian diren proiektu bitan baino gehiagotan aritzea.

Prestakuntza aldian dauden profesionalak ez dira proiektuko ikertzaile nagusi izaten ahalko, baina bai, ordea, ikerketa taldekide.

3. Eskabideak.

3.1. Eskaerak agiri hauek bilduko ditu:

_1. agiria: Eskabidea, ikertzaile nagusiak eta proiektua zein zentro edo erakundetan eginen den, bertako legezko arduradunak sinatua. Proiektua hainbat zentrotan gauzatu behar bada, zentro bakoitzeko eskabide bana bete beharko da. Erreferentziako zentroa ikertzaile nagusiarena izanen da.

II. eranskineko sailkapenaren arabera, eskabide guztietan Agencia Nacional de Evaluación y Prospectiva (ANEP) delakoan dagokien arloa azalduko da, ebaluazioari begira. Orobat, kasu guztietan, "A modalitatea (oinarrizko ikerketa)" edo "B modalitatea (ikerketa aplikatua)" atalak beteko dira.

B modalitateko eskabideen kasuan, gainera, proiektuari dagokion lehentasunezko arloa adieraziko da, II. eranskinarekin bat.

_2. agiria: ikerketa proiektuaren memoria.

_3. agiria: ikertzaile nagusiaren curriculum vitaea, gainerako taldekideen curriculumaren laburpenarekin batera, bertan adierazten delarik zein diren proiekturako interes handieneko alderdiak.

_4. agiria: txosten bat, zentro edo erakundeko zuzendariak izenpetua. Horren bidez baimena emanen zaio talde ikertzaileari proiektua burutzeko. Horretan zehaztuko da zenbat ordu kontatuko diren horretarako ikertzaileen lanaldian, eskatzen diren ordu guztien artetik. Proiektuak zentro batekoak baino gehiagokoak badira, zentro horien txosten bana beharko da.

_5. agiria: ikerketa zein zentrotan eginen den hangoxe Ikerketa Batzordearen txostena. Ikerketa Batzorderik ez badago, txostena Zentro edo Erakundeko Zuzendaritzak eginen du. Proiektuak zentro batekoak baino gehiagokoak badira, zentro horien txosten bana beharko da.

_6. agiria: zentroko Etika Batzordeak luzatuko duen txostena, proiektuan gizakiak ikertzen direnean edo giza jatorriko lagin biologikoak erabiltzen direnean. Zentroan Etika Batzorderik ez badago, Nafarroako Foru Komunitateko Ikerketa Klinikoko Etika Batzordeak eginen du ebaluazioa. Saio kliniko bat izanez gero, Nafarroako Foru Komunitateko Ikerketa Klinikoko Etika Batzordeak eta Osasun eta Kontsumo Ministerioko Botiken Agentziak txosten bana luzatu beharko dute. Azken txosten hau eskabidearen ondoren aurkezten ahalko da, betiere 2007ko irailaren 1a baino lehen, baina ezinbesteko betebeharra izanen da onarpenaren agiria formalizatzeko.

_7. agiria: Osasun Zientzietako ikerketa sustatzeko bestelako agentzien finantzaketa baldin badago, proiektuaren kofinantzaketa adierazten duen ziurtagiria aurkeztu beharko da, eta bertan azaldu eskaera egin duen titularra nor den, proiektuaren izena, iraupena eta zenbatekoa, hala nola finantzaketa zein deialditan lortu zen.

3.2. Dokumentazio normalizatua Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalean eskuratzen ahalko da, hala nola interneteko ondoko orri honetan: www.cfnavarra.es/salud/docencia.investigacion.

4. Eskaera non eta noiz aurkeztu.

4.1. Eskabideak hilabeteko epean aurkeztuko dira, ebazpen hau Nafarroako ALDIZKARI OFIZIALean argitaratu eta biharamunetik hasita, dagokion eguneko 14:30a bitarte.

4.2. Eskabideak, ahal bada, Osasun Departamentuaren Osasunaren Irakaskuntza, Ikerketa eta Garapen Zerbitzuan, Nafarroako Ospitaleko Irakaskuntza Pabiloian, edo Administrazio Publikoen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38. artikuluko 4. idatz-zatian adierazitako erregistro edo bulegoetan ere.

4.3. Eskaerak aipatu baldintzak betetzen ez baditu, Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalak interesatuari eskatuko dio gehienez ere 10 egun balioduneko epean akatsak zuzen ditzala eta jakinaraziko dio, zuzentzen ez baditu, bere eskaera ezetsi eta artxibatu eginen dela, beste tramiterik gabe.

5. Proiektuen onarpena.

Batzorde Tekniko batek eskabideak baloratu eta proiektuak onartzeko proposamena eginen du. Batzorde hori Osasun zuzendari nagusiak izendatuko du eta kide hauek izanen ditu:

_Kudeaketari loturiko bi pertsona.

_Nafarroako Osasun Sistemako Ikerketa Batzordeetako bi pertsona.

_Ikerketan adituak diren lau pertsona.

6. Eskabideen balorazioa.

Batzorde Tekniko batek baloratuko du proiektuak eskatutako modalitatera egokitzen ote diren. Eskaerak ezetsiko ditu modalitate batekin ere moldatzen ez badira edo beste modalitate batean sartuko, proiektuaren gaiekin hobeki badira.

Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalak "Agencia Nacional de Evaluación y Prospectiva" erakundeari igorriko dizkio onartutako proiektuak, bertan baloratzeko. Ebaluazio hori Osasun zuzendari nagusiak izendatutako Batzorde Teknikoaren esku utziko da, eta batzorde horrek proiektuak onartzeko proposamena eginen du ondoko irizpideak baloratu ondoren:

1) Proiektuaren kalitatea, interes zientifikoa eta bideragarritasuna, baloraziorako kanpoko erakundeak emandako balorazio-txostenaren arabera.

2) Proiektua ebazpen honen xedeetara egokitzen den, ondoko alderdiok era positiboan baloratuz:

_Lehentasunezkotzat jotako arloekin bat datorren ebaluatzea, B modalitateari dagokionez.

_Proiektua egokitzen ote zaion ikertzaile taldeak finkaturik duen ikerketa ildo bati. Hori baloratzeko, ikertzaileen argitalpenek izan duten garrantzi zientifikoa aztertuko da. Ikertzaile talde berriek egindako proposamenak ere aintzat hartuko dira, ikerketarako metodologiari buruzko prestakuntza dutela frogatzen badute, proposaturiko helburuak beteko direla bermatzea badago eta deialdiko gainerako baldintzak betetzen badituzte.

_Ikertzaile nagusiak bere helburuak lortu ote dituen lehenago finantzaturiko proiektuetan.

_Proiektuan zentro eta laguntza maila desberdinak lankidetzan aritzea, hala nola diziplina anitzeko ikerketa taldeak izatea.

_Osasun zientzietan ikerketa sustatzeko beste agentzia batzuek _ofizialki aitortuak_ eskainitako hein bateko finantzaketa, lehia irekian eskuratua.

_Aurreikusitako finantza baliabideak proiektuan proposatutako helburuetara egokitzea.

7. Ikerketa proiektuen onarpena eta formalizazioa.

Osasun zuzendari nagusiak, Ebazpenaren bidez eta Batzorde Teknikoak eginiko proposamen arrazoituari jarraikiz, Osasun Departamentuak sustatuko dituen ikerketa proiektuak zehaztuko ditu, berari eskatu zaizkionen artean; zenbatekoa, gastu kontzeptuak eta urtesariak adierazi beharko ditu.

Ebazpena eskatzaile guztiei jakinaraziko zaie, bai ikertzaile nagusiari, bai eta ikerketa burutzen deneko zentroko zuzendariari ere, eta jendaurrean paratuko da Osasunaren Irakaskuntza, Ikerketa eta Garapen Zerbitzuko iragarki oholean eta Interneteko www.cfnavarra.es/salud/docencia.investigacion web-orrian.

Ikertzaile nagusiarendako jakinarazpenari onarpen agiria erantsiko zaio, finantzaketa egin baino lehen formalizatu beharrekoa, eta behar bezala bete beharko da eta aipatu Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalera igorri.

Proiektua onartzen ez bada, eskabidearekin batera aurkeztutako dokumentazioa berreskuratzeko epea hilabete batekoa izanen da jakinarazpena jasotzen denetik aitzina.

Azken memoria, Osasun Departamentuak aurretik finantzatutako proiektuen gastuen justifikazioa barne, aurkezten ez duten ikertzaile nagusiek ezin izanen dute proiektu gehiago formalizatu.

8. Finantzaketa.

8.1. Ikerketa proiektuetarako finantzaketa ez da 24.000,00 eurotik gorakoa izanen proiektu bakoitzeko eta urteko, eta proiektuak sortutako gastuak finantzatzeko izanen da, osorik edo hein batean.

8.2. Proiektuen iraupena, gehienez, Nafarroako Ogasun Publikoari buruzko abenduaren 26ko 8/1988 Foru Legearen 41. artikuluan inbertsioetarako aurreikusitakoa izaten ahalko da, bertan ezarritako betebeharrak zehatz-mehatz beteta.

8.3. Laguntza ez da ikertzaile taldeko kideak ordaintzeko, prestatze aldian dauden lizentziatuak barne.

8.4. Deialdi honetan ondoko bi modu hauek ezarri dira giza baliabideak kontratatzeko:

a) Proiektuaren karguko ikerketa-bekadunak, proiektu bakar batean lan eginen dutenak, lanaldi osoan bada, ezin izanen da aldi berean beste edozein lanetan aritu. Bekadunak proiektuei atxikitzeko, haien ezaugarriak eta gaiak aztertuko dira, ikerketa zientifikoaren eta garapen teknologikoaren arloetan prestakuntza emateko egokiak diren baloratzeko, kontuan harturik bekaduna lanaldi osoan edo partzialean arituko den eta proiektuan zenbat denboraz jardunen duen. Kontzeptu horrengatik, gehienez, 10.800,00 euro emanen dira urtean, eta osasun laguntza bekadunaren esku egonen da.

Ikertzaile nagusiak hautatu eta kontratatuko du bekaduna, proiektua aurkezteko baimena eman zuen zentroko edo erakundeko zuzendariak onetsi ondoren.

b) Zerbitzu profesionalak kontratatzea, behar bezala justifikatuak eta proiektua burutzeko premiazkoak badira. Haien kuantifikazioa orduen araberakoa izanen da, edo, bestela, egindako lan unitatearen araberakoa (inkestak, aholkularitzak, etab.).

8.5. Adostutako finantzaketa honela burutuko da:

_2007ko ekitaldiari dagokiona osorik ordainduko da onarpen agiria bete ondotik.

_Hurrengo aurrekontu ekitaldietarako onetsitako finantzaketa Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalak bere txostena egin ondotik gauzatuko da, urteko memoria aurkeztu eta harekiko adostasuna agertu eta gero, eta horien ordainketa kontzeptuz kontzeptu eginen da, honela:

a) Material inbentariagarria: osorik.

b) Gainerako kontzeptuak (bekaduna, material suntsikorra, profesionalen zerbitzuak eta gastu osagarriak): hiruhilebeteka, aurretik.

9. Pagatzeko prozedura.

Proiektuari esleitzen zaion zenbatekoa ordainduko zaio ikertzaile nagusiari, bankuko kontuan. Kontu horretan titular gisa agertuko da eta adieraziko da zein proiektutarako den dirua.

10. Proiektua burutzea.

10.1. Proiektua ebazpen honetan eta ikertzaile nagusiaren eta Osasun zuzendari nagusiaren artean sinatzen duten onarpen agirian aurreikusitako moduan garatuko da.

10.2. Proiektuaren aurreikusitako garapenean gertatzen den aldaketa oro jakinarazi beharko zaio Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalari.

Egindako lana aurreikusitako garapenari ez zaiola egokitzen frogatzen bada, Osasun zuzendari nagusiak, Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalak egindako txosten arrazoitua ikusita, bertan behera uzten ahalko du emandako laguntza, izan daitezkeen erantzukizunak ezertan galarazi gabe.

10.3. Urte bakoitzeko abenduaren 15a baino lehen, ikertzaile nagusiak urteko memoria eguneratua eta laburbildua aurkeztu beharko du Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalean, emaitza teknikoei eta aurrekontuaren exekuzioari buruzkoa. Gastu guztiak jatorrizko fakturen bidez justifikatuko dira. Ordainagiri horiek itzultzen ahalko dira interesatuak eskatuta, behar diren frogaketak egin ondoren. Bekadunari ordaintzeko aurrekontuetan dirurik bada, jatorrizko agiriak aurkeztu beharko dira, ordainketa egiaztatzeko.

10.4. Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalak ordainketa proposamenari dirulaguntzaren helburuak bete direla frogatzen duen txostena erantsiko dio.

11. Proiektuaren amaiera.

11.1. Ikerketa amaitzen deneko data administratibotik hilabeteko epean ikertzaile nagusiak amaierako memoria igorriko du Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalera honako xehetasunekin:

a) Memoria teknikoa, xeheki emana. Egoki juzgatzen diren kasuetan argibide osagarri gehiago eskatzerik izanen da.

b) Memoria ekonomikoa: bertan justifikatuko dira laguntza ekonomikoarekin lotzen diren gastuak, jatorrizko agirien bidez. Banku mugimenduen agiria erantsiko da.

Bekadunari egiten zaion ordainketa jatorrizko agiriak aurkeztuz justifikatuko da.

Edonola ere, Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalari dagokio behar diren ikuskapenak egitea eta bidezko erregulazioak proposatzea.

c) Paperean (2 ale) eta euskarri elektronikoan (ale bat) aurkeztutako laburpena, gehienez 2 orrialdekoa. Orrialde horietan sartuko ez diren irudi bat eta taula bat gehienez onartuko dira. Atal hauek izanen ditu: Oinarria, Materiala eta Metodoak, Emaitzak eta Ondorioak. Lehenbiziko orrian egileen datu pertsonalak azalduko dira. Bibliografiarik ez du behar. Laburpen hori Osasun Departamentuaren "Anales del Sistema Sanitario de Navarra" izeneko aldizkarian argitaratzen ahalko da, Osasun Departamentuak onarturiko proiektuen sailean.

11.2. Proiektuaren amaieran, Nafarroako Gobernuak diruz lagundutako material inbentariagarria bere beharren arabera erabiliko du.

11.3. Material bibliografikoa proiektua egin duen zentro edo erakundearen esku geratuko da.

12. Konpromiso osagarriak.

12.1. Ikertzaile taldeak egiaztatuko du proiektua burutzeko behar den ordu kopurua izanen dela. Zentro eta erakunde publikoetako langileek ohiko lanaldian proiektuan ematen duten denbora Zuzendaritza Medikoak eta Langileriaren Zuzendaritzak lanaldiaren barnean kontatuko dute.

12.2. Finantzaketa onartzeak, ikertzaile taldearentzat, ebazpen honetan ezarritako baldintzak ere onartzea dakar.

12.3. Ebazpen honetan eta aplikatzekoak diren beste arauetan ezarririko betebeharrak edo proiektua onartzeko agirian ezarririko baldintzak erabat edo hein batean bete ezik, proiektua bertan behera utziko da eta kobraturiko dirua itzuli egin beharko da, izan litekeen erantzukizuna deusetan ukatu gabe.

12.4. Proiektua burutzeko zentroak edo erakundeak, hirugarrenei eta zentroari berari proiektua burutzetik etor dakizkiekeen arriskuen estaldura behar du izan proiektuarekin ikustekorik duten inguruabarren aurrean.

12.5. Ikerketa proiektu horretarako beste edozein motatako dirulaguntzarik eman baldin bada, horren berri eman beharko zaio Osasunaren Irakaskuntza, Ikerketa eta Garapen Zerbitzuko Ikerketa Biomedikoaren Atalari, honek Osasun Zuzendaritza Nagusiari jakinaraz diezaion, zeinek aldatu ahalko baititu ikerketa proiektuaren baldintzak.

12.6. Ikerketa proiektuek Helsinkiko Adierazpenean, giza eskubideei eta biomedikuntzari buruzko Europako Kontseiluaren Hitzarmenean, giza genomari eta giza eskubideei buruzko UNESCOren Adierazpen Unibertsalean eta bioetikari buruzko Espainiako legerian ezarririko oinarrizko hastapenak bete beharko dituzte.

12.7. Animaliekin saioak egiten dituzten proiektuak indarra duen arautegian, bereziki, esperimentu eta beste helburu zientifiko batzuetarako erabiltzen diren animalien babesari buruzko urriaren 10eko 1201/2005 Errege Dekretuan xedaturikoari lotu beharko zaizkio.

12.8. Saio klinikoak diren proiektuak legeria indardunak xedatzen duenari lotuko zaizkio, saio Klinikoak egiteko arauei buruzko otsailaren 6ko 223/2004 Errege Dekretuaren arabera.

13. Gastuaren muga.

Ebazpen honetan aipatzen den proiektuak 2007ko aurrekontuetan onetsitako kontusailen kargura finantzatuko dira, ondoko zenbatekoekin gehienez: 301.869,00 euro "Lehentasunezko arloetako ikerketa-proiektuak" 512002 51320 6092 465102 kontusailaren kargura, 85.080,00 euro "Oinarrizko Ikerketa Proiektuak. Ortiz de Landázuri Beka" 512002 51320 6092 465103 kontusailaren kargura eta 8.278,00 euro Osasun kudeaketako ikerketa-proiekturako Mikel Larumbe Zazu Beka" 512002 51320 6092 465104 kontusailaren kargura.

Aurrekontuetako kontusail horietako batean soberakinik geratuz gero, beste edozeinetan erabiltzen ahalko da, eman beharreko proiektuen arabera, betiere aurreikusitako gehieneko zenbatekoa gainditu gabe.

Urte anitzeko jarduerak badira, zilegi izanen da hurrengo ekitaldietan ere gastuak finantzatzeko konpromisoa hartzea, Nafarroako Ogasun Publikoari buruzko abenduaren 26ko 8/1988 Foru Legean ezarritakoari jarraikiz. Gehienez ere 95.000,00 euro izanen dira "Lehentasunezko arloetako ikerketa-proiektuak" izeneko kontusailean, 45.000 euro "Oinarrizko Ikerketa Proiektuak. Ortiz de Landázuri Beka" kontusailaren kargura, eta 8.000,00 euro "Osasun kudeaketako ikerketa-proiekturako Mikel Larumbe Zazu Beka" kontusailaren kargura 2008ko ekitaldian; eta gehienez ere 95.000,00 euro "Lehentasunezko arloetako ikerketa-proiektuak" kontusailaren kargura, 35.000 euro "Oinarrizko Ikerketa Proiektuak. Ortiz de Landázuri Beka" kontusailaren kargura eta 5.000,00 euro "Osasun kudeaketako ikerketa-proiekturako Mikel Larumbe Zazu Beka" kontusailaren kargura 2009ko ekitaldian.

II. ERANSKINA

I._Osasun Departamentuaren arloak.

_"A" modalitatea: Ortiz de Landázuri beka. Oinarrizko ikerketa

Oinarrizko Zientziak (Klinikaurrekoak): Oinarrizko Ikerketa bezala definitzen ahal da, giza patologiari dagokiona, baina ez ezinbestean giza materialarekin egiten dena. Oinarrizko fenomenoen azterketarekin zerikusia duten proiektuak hartzen ditu, baldintza edo entitate kliniko bati modu espezifikoan edo orokorrean lotzen ahal zaizkionak. Gai-arlo zabal honi dagozkio oraindik klinikoki aplikatu ez diren prozesu zelularrekin, mekanismo fisiopatologiko oinarrizkoekin, mekanismo immunologiko eta genetikoekin lotutako prozesu gehienak.

_"B" modalitatea. Ikerketa aplikatua

B.1. Zientzia klinikoak: eriari bideratutako ikerketa aplikatuak dira. Bertan sartzen diren proiektuen helburu nagusia jarduera klinikoarekin lotua dago, edozein direla ere horren ikuspuntua edo aztertu beharreko alderdi espezifikoak, erizaintzako prozedura eta zainketa bereziak barne direla. Bertan sartzen da, halaber, faktore klinikometrikoei eta eritasunen pronostikoari buruzko Epidemiologia Klinikoko ikerketa. Hemen kokatzen dira, beraz, patologia jakin batzuei edo entitate nosologiko klinikoei dagozkienak, salbu eta, oinarrizkoak direlako, A.1 idatz-zatian biltzen direnak.

B.2. Epidemiologia, Osasun Publikoa eta Osasun Zerbitzuak: arlo horietan, era espezifikoan edo orokorrean, alderdi edo tresna metodologikoak jorratzen dituzten proiektuak. Jende multzo handia ukitzen duten patologien edo/eta arriskuen azterlan epidemiologikoak. Kolektibitatearen osasun programak aplikatu eta ebaluatzea.

.Lehentasunezko arloak ("B" modalitateko proiektuak).

a) Patologia garrantzitsuak:

1._Eritasun neoplasikoa.

2._Bihotz-hodietako eritasunak.

3._Gaixotasun neurodegeneratiboak eta adimen arazoak.

4._Arnas-eritasun kronikoak.

5._Eritasun immunologikoak.

b) Osasuna eta eritasuna baldintzatzen dituzten faktoreak eta osasunaren sustapena:

1._Desberdintasunak Osasun arloan.

2._Bizimodu osasungarriak. Osasunerako Hezkuntza.

3._Ezgaitasuna eta errehabilitazioa.

4._Zainketa alternatiboak eta baliabide ez-formalak osasun arazoetan. Komunitatearen parte hartzea.

c) Osasun sistemaren garapena.

1._Osasun baliabideak eta teknologia.

2._Osasun laguntzaren prozesuen ebaluazioa eta kontrola. Praktika klinikoaren aldakortasuna.

3._Informazio sistemak.

II._Ebaluazio eta Prospektiba Agentzia Nazionala-ANEPen arloak.

Nekazaritza (AGR).

Biologia Molekularra, Zelularra eta Genetikoa (BMC).

Landare Biologia, Abere Biologia eta Ekologia (BVA).

Elikagaien Zientzia eta Teknologia (TA).

Materialen Zientzia eta Teknologia (TM).

Konputazioaren eta Teknologia Informatikoaren Zientziak (INF).

Lurraren Zientziak (CT).

Gizarte Zientziak (CS).

Zuzenbidea (DER).

Ekonomia (ECO).

Filologia eta Filosofia (FFI).

Fisika eta Espazioaren Zientziak (FI).

Fisiologia eta Farmakologia (FFA).

Abeltzaintza eta Arrantza (GAN).

Historia eta Artea (HA).

Ingeniaritza Zibila eta Arkitektura (ICI).

Ingeniaritza Elektrikoa, Elektronikoa eta Automatikoa (IEL).

Ingeniaritza Mekanikoa, Itsasontzietakoa eta Aeronautikoa (IME).

Matematika (MTM).

Medikuntza (MED).

Psikologia eta Hezkuntza Zientziak (PS).

Teknologia Kimikoa (QMC).

Teknologia Elektronikoa eta Komunikazioetakoa (TEC).

Teknologia Kimikoa (TQ).

Teknologia Transferentziak eta Garapen Teknologikoa (IND).

Iragarkiaren kodea: F0703165