I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
32/2007 FORU AGINDUA, otsailaren 12koa, Nekazaritza, Abeltzaintza eta Elikadura kontseilariak emana, Nafarroako mendialderako eta eskualde behartsuetarako kalte-ordainak eman, kudeatu eta kontrolatzeko araubide orokorra erregulatzen duena.
Kontseiluaren irailaren 20ko 1698/2005 (EK) Erregelamenduak, Landa Garapenerako Nekazaritzaren Europako Funtsaren bitartez kudeatzen diren landa garapenerako laguntzei buruzkoak (FEADER), neurri batzuk ezartzen ditu mendialdeko nekazariei, hango baldintza txar naturalak direla-eta, nahiz mendialdean egon gabe zailtasunak dituzten bestelako eremuetako nekazariei funts horrekin finantzatutako kalte-ordainak emateko.
Nafarroako Landa Garapenerako programak neurri horiek barne hartzen ditu 2007-2013 urteetarako.
Bestalde, neurri horrek Nafarroako Nekazaritzaren Plan Estrategikoaren jarraibideak biltzen ditu, bereziki ondoko helburu estrategikoei dagokienez: 1-1 "Ustiategien egokitzapena eta birmoldaketa sustatzea" eta 3-1 "Sektorearen ingurumenaren iraunkortasuna hobetzea".
Laguntzak modu egokian Nafarroako Foru Komunitatean aplikatu ahal izateko, beharrezkoa da Nafarroako Foru Komunitateko mendialderako eta eskualde behartsuetarako kalteordainak eman, kudeatu eta kontrolatzeko arauak ematea, Nafarroako Landa Garapenerako 2007/2013 Urteetarako Programaren aurreikuspenen barruan.
Urriaren 2ko 67/2006 Foru Dekretuaren bidez, Nekazaritzako Bermerako Europako Funtsa-FEAGA eta Landa Garapenerako Europako Funtsa-FEADERek finantzaturiko gastuak ordaintzen dituen erakundea baimendu eta haren antolamendua eta funtzionamendua ezarri ziren. Haren azken xedapenetako bigarrenak Nekazaritza, Abeltzaintza eta Elikadura kontseilariari esku ematen dio, bere eskumenen barruan, foru dekretu hori garatu eta betearazteko behar diren xedapen guztiak eman ditzan, bereziki nekazaritzarako Europar Batasuneko funtsen bidez osorik edo hein batean finantzaturiko dirulaguntzei buruzko arauak eman ditzan.
Nekazaritza Abeltzaintza eta Elikadura kontseilariak, otsailaren 8an emandako 30/2007 Foru Aginduaren bidez, FEADERek kofinantzatzen dituen landa garapenerako laguntzak kudeatzeko prozedura ezarri zuen.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz,
AGINDU DUT:
1. artikulua. Helburua eta aplikazio eremua.
Foru agindu honen xedea da araubide orokor bat ezartzea, Nekazaritza, Abeltzaintza eta Elikadura Departamentuak "Nafarroako mendialdeko eremuentzako kalte-ordainak" eta "Nafarroako eskualde behartsuentzako kalte-ordainak" izeneko laguntzak eman, kudeatu eta kontrola ditzan; laguntza Nafarroako Landa Garapenerako 2007-2013 Urteetarako Programan aurreikusi ziren.
2. artikulua. Laguntzak jasotzeko baldintzak.
1. Mendialdeko eta bestelako eremuentzako konpentsazio-ordainak ondoko baldintza hauek betetzen dituztenei baizik ez zaizkie emanen:
a) Nafarroan kokaturik eta Nafarroako Nekazaritza Ustiategien Erregistroan inskribaturik dagoen nekazaritzako ustiategi baten titularrei, Nafarroako Nekazaritza Ustiategien Erregistroari buruzko Foru Legearen testu bategina onesten duen uztailaren 2ko 150/2002 Legegintzako Foru Dekretuan ezarritakoaren arabera.
b) Nagusiki nekazari direnei.
Dena den, beren ustiategian lortutako nekazaritzako errenta osoaren %50 lortzeari buruzko baldintza izan ezik, nagusiki nekazari izateko gainerako baldintzak betetzen dituztenek ere laguntzak jasotzen ahalko dituzte baldin eta ondoko egoera batean badaude:
_Beren jarduera laguntza hauek eskatu baino bi urte lehenago hasi duten nekazari gaztea izatea.
_Lehen graduko ahaide batek duela bi urte baino gutxiago ustiategia eskualdatu dien eskatzaile izatea, baldin eta aurreko titularra konpentsazio-ordainak jasotzen ari bazen eta eskualdaketa ustiategiaren ezaugarriak gehiegi aldatu gabe egin bazen.
c) Lanbidearteko gutxieneko soldata baino hiru aldiz gehiagokoa ez den errenta osoa izatea. 18 urtez beheitiko bi seme-alaba baino gehiago dituzten eskatzaileen kasuan, errenta hori lanbidearteko gutxieneko soldata halako hiru eta erdi izan daiteke.
d) Ustiategia non dagoen, udalerri horretako bizilaguna izatea, edo, bestela, inguruko udalerri batekoa, betiere mendialdeko edo behartsu gisara katalogatuak badaude eta udal erroldan gutxienez bost urteko antzinatasuna badute. Ustiategi osoa nahiz haren zati bat Bardean duten eta Erronkari eta Zaraitzu ibarretako udalerri partzuerren batean bizi diren titularrek ez dute baldintza hori bete beharko, ez eta Urbasa, Andia eta Lokitz mendietan trashumantzia tradizionala egiten dutenek ere.
Titularren batek bere bizilekua udalerri behartsu batetik beste behartsu batera aldatu baldin badu, etenaldirik gabe, antzinatasuna bi udalerrietan emandakoa izanen da.
Mendialdeko udalerri batean nahiz udalerri behartsu batean 5 urte baino gutxiago eman dituzten nekazari gazteek ez dute erroldan gutxienez bost urteko antzinatasuna edukitzeari buruzko baldintza bete behar.
e) Ustiategian ordainaren xede izan daitekeen azaleraren %50, gutxienez, mendialdean nahiz eremu behartsu batean egonen da, eta gutxienez bi hektarea zuretakoa ez den nekazaritzako edo basogintzako laborantzarako erabiliko dira.
2. Ondoko egoeretako batean dauden eremuek ezin izanen dute laguntzarik jaso:
a) Nafarroako mendialdean nahiz eremu behartsu batean ez egotea.
b) Zereala ekoiztekoak eta gainerako belarki-laboreak, Espainiako Belarki-laboreak Eskualdekatzeko Planaren arabera, lehorreko batez besteko errendimendua hektarea bakoitzeko 3,2 tonakoa baino handiagoa duten eskualdeetan daudenak.
c) Ureztaketakoak edo ardoa ekoiztekoak izatea eta mendialdekoa ez den eremu batean egotea.
3. Onuraduna Nafarroako Nekazaritza Ustiategien Erregistroan inskribatutako ustiategi asoziatibo bateko bazkide bada, laguntza jasotzen ahalko du bere parte-hartzearen arabera, eta, hala behar denean, laguntza hori erantsi eginen zaio banakako ustiategiarengatik dagokionari, ordain bakarra kalkulatzeko.
4. Laguntza emateko baldintzak betetzen diren ala ez, kanpaina honetako eskabideak aurkezteko epea bukatzen denean egiaztatuko da.
3. artikulua. Onuradunen konpromisoak eta eginbeharrak.
Laguntzak jasotzen dituztenek ondoko konpromisoak eta eginbeharrak izanen dituzte:
a) Lehenbiziko kalte-ordaina jaso ondoko bost urteetan gutxienez nekazaritzan aritzea mendialdeko eremu batean, ondoko kasuetan izan ezik:
a.1) Ezinbesteko kasuetan.
a.2) Onuraduna erretiro pentsio bat hartzen hasten denean.
a.3) Onuradunak nekazaritzako jarduerak aldez aurretik uzteko laguntzak jasotzen dituenean.
a.4) Ondoko gorabehera berezi hauetakoren bat gertatzen denean:
_Ekoizlearen heriotza.
_Ekoizlearen lanbide-eritasun luzea, entitate eskudunak deklaratua.
_Ustiategiaren zati handi baten desjabetzapena, konpromisoa hartu zenean ezin baldin bazen aurreikusi.
_Ustiategiko aziendarako eraikinen istripuzko suntsiketa.
_Epizootia bat, ekoizlearen azienda osoa edo zati bat ukitzen duena.
Onuradunak gorabehera berezi edo ezinbesteko horien berri eman beharko dio Nekazaritza, Abeltzaintza eta Elikadura Departamentuari, idatziz.
b) Bere ustiategi osoan nekazaritza iraunkorra praktikatzea, irailaren 29ko Kontseiluaren (EK) 1698/2005 Erregelamenduaren arabera, landa garapenerako laguntzak jasotzen dituzten nekazariek bete beharreko legezko kudeaketa-beharkizunak eta nekazaritza eta ingurumen arloko baldintza egokiak betez.
c) Eman eta hartutako dirulaguntzak direla eta, Nekazaritza, Abeltzaintza eta Elikadura Departamentuak egiten dituen egiaztapen ekintzak oro onartzea.
d) Helburu bereko beste dirulaguntza publiko batzuk eskatu izanaren berri ematea Nekazaritza, Abeltzaintza eta Elikadura Departamentuari.
4. artikulua. Eskabideen aurkezpena.
1. Foru agindu honetako laguntzak lortzeko, ustiategiaren titularrak dagokion eskabidea aurkeztuko du eskabide bakarraren zati gisara, Batzordeak eman 796/2004 (EB) Erregelamenduan ezarritako moduan.
2. Nekazaritza, Abeltzaintza eta Elikadura kontseilariak foru agindu bat emanen du urtero kanpaina bakoitzeko eskabidea aurkezteko modua, epea eta bestelako zehaztapenak ezartzeko.
3. Epetik kanpo aurkezten diren eskaerei Batzordearen 796/2004 (EB) Erregelamenduan ezarritakoa aplikatuko zaie.
4. Eskabidearekin batera, honako agiri hauek aurkeztuko dira:
a) Egoitza-ziurtagiria, kasuan kasuko toki entitateak luzatua, zeinetan aipatuko baita zenbateko antzinatasuna duen udal erroldan.
b) Ustiategi asoziatibo bateko bazkide direla frogatzen duten agiriak, hala bada.
c) Ustiategian nekazaritzako produktuak eraldatzen dituztela frogatzen duten agiriak, hala bada.
5. artikulua. Ordainaren xede izan daitekeen azalera.
Foru agindu honetako laguntzak nekazaritzako ustiategian ordainaren xede izan daitekeen azaleraren arabera emanen dira, eta hori kalkulatzeko, ondoko doikuntzak aplikatuko zaizkio azalerari:
a) Bazkatoki parekoaren doikuntza. Bazkatoki parekoa ondoko koefizienteak aplikatuta ateratzen den bazkatokia da:
_0,50 NELIGSen zuhaixka-larre gisara sailkatutako bazkatokiari.
_0,25 NELIGSen zuhaitz-larre gisara sailkatutako bazkatokiari.
_0,15 lugorri edo galondoaren kasuan.
_1 bestelako bazkatokietarako.
Ustiategi osoan azienda-zama azienda larriko bi abelburu baino gehiagokoa bada hektarea bakoitzeko, bazkatokia ez da aintzat hartuko laguntza zenbatekoa den kalkulatzerakoan. Bazkatokia, hektareatan, ez da inoiz ustiategiko azienda larriko abelburuen balioa baino handiagoa izanen. Horretarako, ustiategiko azienda larriko abelburuak baizik ez dira kontatuko, ondoko baliokidetzen arabera:
_Bi urtetik gorako behi aziendako animaliak eta sei hilabetetik gorako zaldi azienda. ALU bat.
_Sei hilabetetik bi urte bitarteko behi azienda: 0,6 ALU.
_Ardiak eta ahuntzak: 0,15 ALU.
_Zerbidoak: 0,40 ALU.
b) Gainerako azalerarako, ondoko doikuntzak aplikatuko dira:
_Ureztaketa lurretako hektarea: 1.
_Laborantza estentsiboko eta lehorreko landaketetako hektarea: 0,50.
_Zuhaitz eta zuhaixka landaketak, zuretakoak ez direnak; hektarea: 0,30.
c) Aurreko doikuntzak batuz ateratzen diren hektareak hainbat tartetan banatuko dira, eta bakoitzari ondoren aipatzen diren koefizienteak aplikatuko zaizkio:
a.1) 1. tartea: lehen 5 hektareak: 1 koefizientea.
a.2) 2. tartea: 5-25 hektarea: 0,75 koefizientea.
a.3) 3. tartea: 25-50 hektarea: 0,50 koefizientea.
a.4) 4. tartea: 50-100 hektarea: 0,25 koefizientea.
a.5) 5. tartea: 100 hektarea baino gehiago: 0 koefizientea.
6. artikulua. Laguntzaren zenbatekoa.
1. Zenbatekoa kalkulatzeko, biderketa eginen da laguntza jaso dezakeen azaleraren eta oinarrizko moduluaren artean, honela:
a) Mendialdeko eremuak, 43 euro hektareako.
b) Mendialdean egon gabe zailtasunak dituzten eremuak, 34,5 euro hektareako.
2. Ateratzen diren zenbatekoak ondoko koefizienteen bidez doituko dira:
a) Eskatzailearen errenta osoaren arabera:
a.1) Lanbide arteko gutxieneko soldataren halako 1,5 baino gutxiago: 1,20 koefizientea.
a.2) Lanbide arteko gutxieneko soldataren halako 1,5 edo gehiago: 1 koefizientea.
b) Ustiapenaren koefizientea: 1 + (ustiategiaren balorazioa/100).
Ustiategiaren balorazioa eranskinean ezarritakoari jarraikiz eginen da.
3. Laguntza jasotzea eta eskatutako betebeharren egiaztapena banaka eginen dira, baita onuraduna ustiategi asoziatibo bateko bazkide denean ere.
4. Ez da dirulaguntzarik emanen baldin eta eskabideari dagokion zenbatekoa 50 eurotik beheitikoa bada.
7. artikulua. Laguntzak emateko lehentasunak.
Eskaturiko laguntzen zenbatekoak aurrekontuetako mugak gainditzen baditu, onuradunak hautatzeko, lehentasun irizpideei jarraituko zaie. Hauxe izanen da lehentasunen hurrenkera:
1. Nekazari gaztea izatea.
2. Emakumea izatea.
3. Ustiapenaren koefizientearen arabera lortutako puntuaziorik altuena.
4. Eskatzailearen gaztetasuna.
8. artikulua. Gorabeheren jakinarazpena.
Eskatzaileak beharturik daude idatziz jakinaraztera Nekazaritza, Abeltzaintza eta Elikadura Departamentuari beren ustiategian gertatzen diren gorabeherak, hauen berri izan bezain laster, gorabehera horiek laguntzak eskuratzeko baldintzak eta konpromisoak ez betetzea badakarte.
9. artikulua. Bateraezintasunak.
Nafarroako mendialdeko eta, mendialdean egon gabe, zailtasunak dituzten eskualdeentzako laguntzen onuradunak ezin izanen du nekazaritzako jarduera aldez aurretik uzteko laguntza publikorik, erretiro pentsiorik, langabezi sorospenik edo antzeko beste prestazio publikorik jaso.
10. artikulua. Murrizketak eta bazterketak.
1. Laguntzak jasotzen ahal izateko 2.1 artikuluan ezarritako baldintzetako edozein betetzen ez bada, laguntza ukatuko da.
2. Azalerari buruzko neurriak bete ezean, murriztapenak eta bazterketak aplikatuko dira, landa garapenari laguntzeko neurriei kontrolaren eta baldintzen prozedurak aplikatzeari buruz Batzordeak abenduaren 7an emandako 1975/2006 (EK) Erregelamenduaren 16. artikuluan ezarritakoari jarraikiz.
3. Onuradunek 3. artikuluan aipatzen diren konpromisoak betetzen ez badituzte, ondoko murriztapen hauek aplikatuko zaizkie:
a) 3. artikuluko a) letran ezarritako denboran nekazaritzan jarduten ez badu, ezinbesteko kasuetan eta gorabehera berezietan izan ezik, onuraduna laguntzen araubidetik at geldituko da eta foru agindu honen babesean hartutako laguntzak itzuli beharko ditu.
b) Eskatutako nahiz emandako laguntzak kontrolatzeko Nekazaritza, Abeltzaintza eta Elikadura Departamentuak egiten dituen jarduketak oztopatuz edo galaraziz gero, dagokion kanpainako laguntzak ukatu eginen dira, eta, laguntzarik jaso baldin bada, itzuli beharko da.
c) d) letrako konpromisoa bete ezean, eta laguntzen bateraezintasuna batere ukatu gabe, dagokion kanpainako laguntza %3 murriztuko da.
4. Baldintzak bete ezik, murrizketak eta bazterketak aplikatuko dira, Batzordearen 1975/2006 (EB) Erregelamenduko 22. eta hurrengo artikuluetan xedaturikoarekin bat.
Lehendabiziko xedapen gehigarria. Arau osagarriak.
Foru agindu honetan ezarririk ez dagoen guztian Dirulaguntzei buruzko azaroaren 9ko 11/2005 Foru Legean xedatu bezala eginen da.
Bigarren xedapen gehigarria. Aplikatzeko baldintza.
Foru agindu honetan ezarritakoa aplikatzeko, beharrezkoa izanen da Europar Batzordeak Nafarroako Landa Garapenerako 2007-2013 Urteetarako Programan bildutako "Nafarroako mendialdeko eta, mendian egon gabe, zailtasunak dituzten eskualdeetako konpentsazio-ordainak" izeneko neurriak hartzea. Europar Batzordearen eskakizunak aintzakotzat hartzeko neurri horietan egin beharreko edozein aldaketa, foru agindu honetako laguntzei buruzko arauak egokitu beharko dira.
Hirugarren xedapen gehigarria. Eskualde behartsuak eta mendialdekoak.
Eskualde behartsuak eta mendialdekoak dira Nekazaritza, Abeltzaintza eta Elikadura kontseilariak 2002ko maiatzaren 15ean emandako Foru Aginduan ageri direnak.
Azken xedapen bakarra. Indar hartzea.
Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2007ko otsailaren 12an._Nekazaritza, Abeltzaintza eta Elikadura kontseilaria, José Javier Echarte Echarte.
I. ERANSKINA
Ustiapenaren koefizientea
1._Udalak sailkatzeko parametroak:
1.1. Ustiategiko udalerriaren edo fazeriaren malda eta kota:
_65 puntu: mendialdeko gisa sailkatutako udalerriak, ondoko ezaugarri hauetakoren bat dutenak:
-950 m-ko batez besteko altitudea edo gehiagokoa.
-20% baino gehiagoko batez besteko malda.
-900 m-ko batez besteko altitudea edo gehiagokoa eta %15eko
edo gehiagoko batez besteko malda.
Homogeneizazioa eta hurbiltasuna direla-eta, puntuazio honetan 28 udalerri gehiago sartu dira.
_45 puntu: mendialdeko gainerako udalerriak.
_30 puntu: behartsu gisa katalogatutako udalerriak.
1.2. Titularraren udalerriko biztanle hustuketa.
a) Populazio dentsitatea:
_10 biztanle/km² baino gutxiago dituzten udalerriak: 2 puntu.
_10-35 biztanle/km² dituzten udalerriak: puntu bat.
b) Biztanle hustuketarako joera: 2000. eta 2005. urteetako biztanleriaren zentsuak erkatuz ebaluatu da.
_Biztanleriaren beheratzea %10 baino handiagoa duten udalerriak: 10 puntu.
_Biztanleriaren beheratzea %0-10 bitartekoa duten udalerriak: 5 puntu.
_Biztanleriaren handitzea %5 baino txikiagoa duten udalerriak: puntu bat.
c) Herriaren egitura; biztanleen %25 65 urte baino gehiagokoa duten udalerriei 4 puntu emanen zaizkie.
d) Onuraduna bizi den herrigunearen tamaina: zuzenbideko 500 biztanle baino gutxiago dituzten udalerri batean bizi baldin bada, 4 puntu emanen zaizkio.
1.3. Eskualdekatzeko Planaren arabera, hektarea bakoitzeko 2,2 tonakoa edo gutxiagoko lehorreko errendimendua duen udalerria edo fazeria: 10 puntu.
1.4. BIL deklaratutako udalerriei edo lurralde entitateei 15 puntu emanen zaizkie gehienez. Puntuazioa kalkulatzeko, BIL-ak udalerrian ukitutako azalera, bateko hainbestean adierazia, 15 puntuz biderkatuko da.
2._Ustiategiak sailkatzeko parametroak:
2.1. Titularra nekazari gaztea bada: 15 puntu.
2.2. 2000. urtearen ondoko hobekuntza planaren onuradun den ustiategia: 10 puntu.
2.3. Nekazaritzako kooperatibetako kidea: 5 puntu.
2.4. Ustiategitik ateratako produktuen eraldaketa eta salmenta: 5 puntu.
2.5. ALUen %80 gutxienez bertako arrazez osatua duten ustiategiak: laguntza hauei begira, bertako arrazatzat hartzen dira abelgorriak, esnetarako arrazak izan ezik, Nafarroako latxa edo rasa arrazetako ardiak, Aurizko zaldiak eta Nafarroako zaldikoa: 15 puntu.
2.6. Nekazaritza arloko aholku zerbitzua duen utstiategia: 10 puntu.
Iragarkiaren kodea: F0702678
