Iragarkia

26. ALDIZKARIA - 2007ko otsailaren 28a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

34/2007 FORU AGINDUA, otsailaren 7koa, Gizarte Ongizate, Kirol eta Gazteria kontseilariak emana, Nafarroako kirol federazioekin hitzarmenak egiteko 2007ko deialdia onesten duena.

Dirulaguntzei buruzko azaroaren 9ko 11/2005 Foru Legeak Nafarroako Aurrekontu Orokorretatik emandako dirulaguntzen orotariko araubide juridikoa arautzen du. 11. artikuluan ezartzen du, gainera, posible izanen dela Administrazioko organo emaileak eta entitate laguntzaileak elkarrekin lankidetza hitzarmenak izenpetzea.

Uztailaren 5eko 15/2001 Foru Legeak, Nafarroako Kirolari buruzkoak, 6. artikuluko 1. idatz-zatian ezartzen duenaren arabera, Foru Komunitateko kirol administrazioari dagokio, Nafarroako Kirol eta Gazteriaren Institutuaren bitartez, Nafarroako Gobernuaren kirol gaietako politika planifikatu eta betearaztea. 2. idatz-zatiko e) letran adierazten da haren eskumenen artean dagoela Nafarroako kirol federazioak, esleitu zaizkien eginkizun publikoak betetzen ari direnean, koordinatu eta begiratzea, haien jarduera pribatua ezertan eragotzi gabe.

Aipatu foru legeak, 33. artikuluko a) letran adierazten duenaren arabera, Foru Komunitateko kirol administrazioak zilegi izanen du Nafarroako kirol federazioei dirulaguntzak ematea. Hartarako, dirulaguntza horien arauetan ezarri bezalako lankidetza itun edo hitzarmenak erabiliko dira.

Halaber, foru lege beraren 42. artikuluko 1. idatz-zatiak ezartzen du Nafarroako kirol federazioen helburu nagusia Foru Komunitateko lurraldean aitormena duten kirol jarduerak sustatu eta garatzea dela; 4. idatz-zatian, berriz, Nafarroako kirol federazioek, berezko eginkizunez gain, administrazio kutsuko eginkizun publikoak ere hartzen dituztela delegazioz, eta kasu horretan Foru Komunitateko Administrazioaren lankide aritzen direla.

Azkenik, 50. artikuluan ezartzen du Foru Komunitateko kirol administrazioak lankidetza hitzarmenak sinatzen ahalko dituela, izaera juridiko-administratibokoak, Nafarroako Kirol Federazioekin, haiei dagozkien eginkizunak garatzearren.

Dirulaguntzei buruzko azaroaren 9ko 11/2005 Foru Legeak Nafarroako Aurrekontu Orokorretatik emandako dirulaguntzen araubide juridiko orokorra arautzen du. 17.1 artikuluan ezartzen du, gainera, posible izanen dela, Nafarroako Gobernuak onartutako kasu justifikatuetan, banakako ebaluazioaren araubidea aplikatuz, ematea.

Nafarroako Kirol Federazioen eginkizunak bereziak dira lehenago aipatu 15/2001 Foru Legearen ataletan garatu den bezala. Bestetik, legeak dioenez, lankidetza hitzarmenak egin daitezke Nafarroako Foru Komunitateko Kirol Administrazioaren eta Kirol Federazioen artean. Hori dela-eta, komenigarria da haietarako dirulaguntzak Dirulaguntzei buruzko 11/2005 Foru Legean dirulaguntzak banaka-banaka onesteko jasotako araubidearen bitartez ematea.

Foru agindu honetan Nafarroako Kirol Federazioentzako dirulaguntzak emateko oinarriak garatzen dira.

Deialdiaren arauetan baldintza orokorrak garatzen dira, bai eta onetsitako dirulaguntzetarako hitzarmenek izan behar dituzten ezaugarriak ere: xedea eta kirol federazioen ezaugarriak. Federazioek Kirol Entitateen Erregistroan halakotzat izen emanda eta onartuta egon behar dute, eta horretaz gainera, Kontabilitate Plan Orokorraren araberako kontabilitatea eraman behar dute, Gizarte Ongizate, Kirol eta Gazteria kontseilariaren abenduaren 12ko 91/2003 Foru Aginduaren bidez Nafarroako Kirol Federazioentzat onetsitako egokitzapenaren araberakoa.

Hitzarmenak tramitatzearren federazioek aurkeztu beharreko dokumentazioa eta hori egiteko epeak zehazten dira, bai eta hitzarmenetan jasotzeko jardueren kontzeptuak ere. Horien artean nabarmentzekoa da, Kirolari buruzko Legean ezarrita dagoen bezala, Nafarroa mailako kirol jarduera ofizialen errekonozimendua.

Nafarroako Gobernuak, 2007ko urtarrilaren 8an egindako bilkuran hartutako erabakiaren bidez, Nafarroako Kirol Federazioentzako 2007ko dirulaguntzak banaka-banaka ebaluatzeko araubidea onetsi zuen.

Horrenbestez, Nafarroako Gobernuari eta bere lehendakariari buruzko 14/2004 Foru Legeak ematen dizkidan eskumenak erabiliz,

AGINDU DUT:

1. Nafarroako Kirol Federazioentzako 2007ko dirulaguntzen deialdiaren arauak onestea. Testua, osorik, foru agindu honen 1. eranskinean dago.

2. Aipatu deialdia ebazteko 2007an erabili beharreko irizpideak eta baremoa onestea. Foru agindu honetako II. eranskinean ageri dira.

3. Guztira 1.847.150,00 euroko gastua baimentzea, Nafarroako 2007ko Aurrekontu Orokorren kontusail hauen kargura:

_1.450.000,00 euro "Federazioentzako dirulaguntzak" izeneko 940002-95120-4819-336100 kontusailaren kargura.

_357.000,00 euro "Kirol Teknifikazioko Zentroak" izeneko 940002-95120-4819-336103 kontusailaren kargura.

_40.150,00 euro "Kirol federazioen ekipamendua" izeneko 940002-95120-7819-336100 kontusailaren kargura.

4. Foru agindu hau eta bere eranskinak Nafarroako ALDIZKARI OFIZIALean argitaratzea eta Nafarroako Kirol eta Gazteriaren Institutuari eta Kirol Zuzendariordetzari jakinaraztea, behar diren ondorioak izan ditzaten.

Iruñean, 2007ko otsailaren 7an._Gizarte Ongizate, Kirol eta Gazteria kontseilaria, María Isabel García Malo.

I. ERANSKINA

2007. urterako Nafarroako Kirol eta Gazteriaren Institutuak eta Nafarroako Kirol Federazioek sinatu beharreko hitzarmenen arauak

1. araua. Xedea.

1. Deialdi honen xedea Nafarroako Kirol eta Gazteriaren Institutuaren eta Nafarroako kirol federazioen artean izenpetu beharreko hitzarmenak arautzea da.

2. Hitzarmenen helburu nagusia Nafarroako kirol jarduera biziagotzea da eta, horri begira, federazioei laguntza emanen zaie beren funtzionamendurako eta egiten dituzten jardueretarako, eta bereziki interesgarriak diren jarduerak bultzatuko dira.

3. Hitzarmen horietan eginkizun administratiboak eskuordetu, helburuak zehaztu eta Nafarroako kirol federazioentzako laguntzak ezarriko dira, beren programak garatu ditzaten.

2. araua. Onura publikoaren edo sozialaren helburua eta xedea.

Foru Komunitateko Kirol Administrazioaren eta Nafarroako Kirol Federazioen artean hitzarmenak sinatzeko bidea erraztea da aurreko arauak aipatutako laguntzaren xedea.

Kirol Federazioei laguntzeko premiak dakar onura publiko edo sozialekoa izatea, Nafarroako Kirolari buruzko 15/2001 Foru Legean azalduta dagoen bezala.

3. araua. Federazioen betebeharrak.

Kirol Federazioek, foru dekretu honetan aipatutako hitzarmenak sinatu ahal izateko, baldintza hauek bete behar dituzte:

1. Nafarroako Kirol Entitateen Erregistroan inskribatuta egotea.

2. Zerga betebeharrak eta Gizarte Segurantzarekikoak eguneratuak izatea.

3. Kontabilitate Plan Orokorraren araberako kontabilitatea eramatea, Gizarte Ongizate, Kirol eta Gazteria kontseilariaren abenduaren 12ko 91/2003 Foru Aginduaren bidez Nafarroako Kirol Federazioentzat onetsitako egokitzapenaren araberakoa.

4. Federazioek antolaturiko jardueren ondoriozko erantzukizun zibila babesten duen aseguru bat kontrataturik edukitzea, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat).

4. araua. Dirulaguntzen xedea:

Ondoko xede hauetarako eskatzen ahalko dira dirulaguntzak:

a) Administrazioa eta Kudeaketa

b) Nafarroa mailako jarduera ofizialak.

c) Espainia mailako jarduera ofizialak, Nafarroako selekzioen programan sarturik ez daudenak. Nafarroatik gorako txapelketa ofizialen antolamendua ere sartzen da.

d) Sustapen jarduerak.

e) Ekipamendua.

f) Nafarroako Kirol Teknifikazio Zentroen programak.

g) Nafarroako selekzioen programak.

h) Prestakuntza.

5. araua. Eskaerak eta dokumentazioa aurkezteko epea.

1. Hitzarmena izenpetzeko eskaera Nafarroako Kirol eta Gazteriaren Institutuko erregistroan aurkeztuko da edo, bestela, Herri Administrazioen Araubide Juridikoari eta Administrazio Prozedura Erkideari buruzko 30/1992 Legeko 38.4 artikuluan aipatutako edozein bide erabiliz.

2. Eskaera Nafarroako Kirol eta Gazteriaren Institutuari zuzenduko zaio, "Nafarroako kirol federazioekin hitzarmenak egiteko deialdia" jarrita.

3. Eskaerak epe hauetan aurkeztuko dira:

a) Dirulaguntzen eskaera arruntak foru agindu hau Nafarroako ALDIZKARI OFIZIALean argitaratu eta 30 eguneko epean aurkeztuko dira. Eskaerak posta bulegoen bidez bidaltzen badira, kartazala zabalik aurkeztu beharko da, posta-funtzionarioak zertifikatu baino lehen, eguna eta zigilua jar diezazkion eskaerari.

b) Aurreko epeaz gainera, kirol federazioek urte bakoitzeko ekainaren 30 arte ere aurkezten ahalko dituzteeskaerak, beren eginkizunen berezitasuna dela-eta izandako gorabeherak konpontzeko. Kasu horretan, aurrekontuetan behar adina diru dagoenean baizik ez dira aztertu eta baloratuko eskabideak, betiere aurreko atalean adierazitako epean aurkeztutako eskaerak baloratu eta gero.

4. Eskabideekin batera ondoko agiriak joanen dira:

a) Jardueren urteko proiektua, aurrekontua zehatz emanda, federazioko Batzar Nagusiak onetsia, Nafarroako Kirol eta Gazteriaren Institutuak ezarritako ereduen arabera. Agiriak aurkezten diren egunerako Batzar Nagusia egin ez bada, Federazioko Zuzendaritza Batzordeak onetsi beharko ditu agiriak eta Batzar Nagusiaren onespena aurkezteko konpromisoa hartuko du, egiten denetik hamabost eguneko epean.

b) Erantzukizunpeko aitorpena, zerga betebeharrak eta Gizarte Segurantzarekikoak eguneratuak dituela dioena.

c) Federazio bakoitzari egokiak iruditzen zaizkion beste agiri batzuk, edo Nafarroako Kirol eta Gazteriaren Institutuak bereziki eskatzen dizkionak.

5. Zuzenketa. Aurkeztutako dokumentazioa aski izan ez edo deialdian eskatzen direnak betetzen ez baditu, entitateari eskaera eginen zaio, jaso izanaren agiriaren bidez, hamar egun balioduneko epean dokumentazioa osatu edo akatsak zuzen ditzan, eta ohartaraziko zaio hala egin ezean ezetsi eginen dela bere eskaera, azaroaren 26ko 30/1992 Legearen 71. artikuluak dioen bezala.

6. araua. Antolamendua eta izapideak.

Nafarroako Kirol eta Gazteriaren Institutuko Kirol Zuzendariordetza izanen da dirulaguntza hauek emateko prozedura antolatu eta aurrera eramateko unitate organikoa.

7. araua. Balorazioa.

Aurkeztutako eskaerak baloratu eta laguntzak zehaztu behar direnean, Kirol Zuzendariordetzak irizpide orokor hauek izanen ditu kontuan:

a) Kirol federazioaren helburu orokorrak eta berariazkoak betetzen diren, eta Kirolari buruzko Foru Legearen eta Nafarroako Kirol eta Gazteriaren Institutuko xedeei begira egokiak eta interesgarriak diren.

b) Programatu eta egindako jardueren nolakotasuna, kalitatea, interesa eta eragina, Nafarroako Foru Komunitatean bultzatu eta zabaltzen zer-nola laguntzen duen eta kirol modalitateak nazioan eta nazioartean zenbateko agerpena duen.

c) Kirol federazioaren eta bere kirol kluben, taldeen eta kirolarien ibilbidea, finkapena, kualifikazioa eta kirol mailako garrantzia, eta Nafarroako Foru Komunitatean duten ezarpena.

d) Kirol federazioaren beraren baliabideak, bere kirol proiektuaren bideragarritasuna eta ibilbidearen balorazioa Nafarroako Kirol eta Gazteriaren Institutuarekin izandako harremanetan eta tramitazioan.

8. araua. Ebazpena.

1. Nafarroako Kirol eta Gazteriaren Institutuko zuzendari kudeatzaileak, ebazpen baten bidez, ebatziko du aurkezturiko eskabideen gainean eta onetsiko ditu hitzarmenen testuak, non pagatzeko epeak eta dirulaguntzaren xede diren programa eta jarduerak zehaztuko baitira.

Dirulaguntza emateko ebazpenean dirulaguntzaren xedeak, zenbatekoa eta ordainketa modua agertuko dira. Orobat, dirulaguntza jaso duten eskatzaileen zerrenda jaso beharko da eta espresuki adieraziko da zein eskaerari esan zaien ezetz, halakorik baldin bada. Dirulaguntzak emateko ebazpen hori gora edo behera doitzen duen azkeneko ebazpen baten bidez aldatzen ahalko da, egiatan buruturiko programaren arabera.

2. Laguntzen gainean emateko ebazpena sei hilabetekoa izanen da, eskabideak aurkezteko epea bukatzen denetik hasita. Epe hori espresuki ebazpenik eman gabe bukaturik, eskabidea ezetsi dela ulertuko da.

3. Ordainketen egiteko modua: hitzarmena sinaturik, urteko dirulaguntza onartuko da. Diru kopurua hitzarmenaren testuan zehaztuko da eta hiru puskatan ordainduko da (martxoan, ekainean eta irailean). Buruturiko jardueren gastuak eta dirusarrerak aurkeztuz dirulaguntza justifikatuta, dagokion diru kopurua ordainduko da (hiruhileko justifikazioa partzialak egiten ahal dira, oraindik bukatu gabeko jarduerena). Hilabeteka ordainduko da, urterako onetsitako diru kopuruaren arabera, administrazio gastuen eta langileen gastuen kasuan. Abenduaren 31 baino lehen osorik ordainduko da dirulaguntza (ordu arte egindako ordainketen eta, 10.1 arauan ezarritako justifikazioa eginda, behin betiko kopuruaren arteko aldea).

4. Laguntzak ekitaldi ekonomiko jakin baten kargura jasotzeak ez dakarkio onuradunari hurrengo urteetan laguntza izateko eskubidea.

5. Hitzarmenetan, urteko eranskinaren bidez, zehatz agertuko dira esleitutako laguntzak, 4. arauan azaldutako atalen arabera.

6. Laguntzen gaineko proposamena eta hitzarmenaren testua eskatzaileari jakinaraziko zaizkio. Honek bere adostasuna adierazi beharko du, jakinarazpena jaso eta 30 eguneko epean, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean xedaturikoarekin bat.

7. Nafarroako Kirol eta Gazteriaren Institutuak ebazpenaren bidez eta hitzarmena izenpetuz ez ezik deialdi honen arabera emaniko dirulaguntzen zerrenda Institutuko bereko iragarki oholean argitaratuz emanen du onarturiko dirulaguntzen berri.

8. Bateragarritasuna: deialdi honetako dirulaguntzak ez dira bateraezinak Kirol Federazioek beste entitate publiko edo pribatuetan lor ditzaketenekin.

9. araua. Hitzarmenaren aldaketak.

1. Hitzarmenak aurreko idatz-zatian ezarririko prozeduraren arabera izenpetu ondoren, federazioek proposamenak aurkezten ahalko dituzte haietan beste jarduera batzuk sartzeko. Proposamen horiek aurrekontuetan dirurik dagoen heinean hartuko dira kontuan.

2. Eskaera berri hauek, betiere, haiek egin baino lehen aurkeztuko dira. Eskaerari jarduera proiektua erantsiko zaio, urterako aurkeztutako gainerako jardueren eduki berarekin.

3. Jarduera berrien eskabidea aurkeztu ondoren, Kirol Zuzendariordetzak erabakiko du, irizpide eta baremo orokorrei jarraikiz, ea komeni den jarduera berri horiek sartzea. Jarduera berrietako dirulaguntza eman edo ez eman, Nafarroako Kirol eta Gazteriaren Institutuko zuzendari kudeatzaileak dirulaguntzaren azken zatia ordaintzeko emanen duen ebazpenean adieraziko da.

10. araua. Jardueren justifikazioa.

1. Urte bakoitzeko azaroaren bata baino lehenago, federazioek urriaren 31 bitarte egindako jardueren fitxak aurkeztuko dizkiote Kirol Zuzendariordetzari, Nafarroako Kirol eta Gazteriaren Institutuko erregistroan, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38. artikuluko 4. idatz-zatian aipatzen den edozein bide erabiliz.

2. Hurrengo urteko martxoaren 1a baino lehen, federazioek egindako jardueren urteko proiektua (gauzatutako aurrekontua barne) aurkeztuko dute Kirol Zuzendariordetzan, Nafarroako Kirol eta Gazteriaren Institutuko erregistroan, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38. artikuluko 4. idatz-zatian aipatzen den edozein bide erabiliz. Proiektu horrek federazioaren Batzar Nagusiak onetsia izan beharko du; kontuan hartuko dira Nafarroako Kirol eta Gazteriaren Institutuan ezarritako ereduak eta Nafarroako kirol federazioei egokitutako Kontabilitate Plan Orokorra. Agiriak aurkezten diren egunerako Batzar Nagusia egin ez bada, Federazioko Zuzendaritza Batzordeak onetsi beharko ditu agiriak eta konpromisoa hartuko du Batzar Nagusiaren onespena aurkezteko, egiten denetik hamabost eguneko epean.

3. Dirulaguntzaren xede den gastuak Dirulaguntzei buruzko azaroaren 9ko 15/2005 Foru Legearen 28. artikuluan ezarritako diru kopurua gainditzen badu, onuradunak erantzukizuneko aitorpen bat aurkeztu beharko du, non azalduko baitu hornitzailea eraginkortasun eta ekonomia irizpideei jarraituz hautatu dela, aholkularitza edo laguntza enpresek ekipo ondasunez hornitu edo zerbitzuak ematen dituztenean.

11. araua. Betebeharrak.

1. Nafarroako Kirol eta Gazteriaren Institutuarekin hitzarmena izenpetzen duten federazio guztiek honako konpromisoak hartzen dituzte, kasuan kasuan erabakitzen direnez gainera:

a) Foru dekretu honetako eranskineko bigarren arauan ezarritako betebeharrak.

b) Aurkeztutako jarduera proiektuan izaten den funtsezko edozein aldaketaren berri ematea Kirol Zuzendariordetzari.

c) Nafarroako Gobernuaren laguntza jaso dela adieraztea jardueren edozein eratako publizitatean, Kirol Zuzendariordetzak adierazten duen irudi korporatiboa jarriz. Baldintza hori bete dela erakutsi beharko da urteko memoria aurkeztean.

d) Federazioko Batzarrari hitzarmenaren edukia zehatz azaltzea, hitzarmena izenpetu eta hilabeteko epean. Baldintza hori bete izanaren berri idatziz emanen zaio Kirol Zuzendariordetzari.

e) Kirol Zuzendariordetzarekin batera, hala denean, Nafarroako Kirol Jokoak antolatzea, eta gure komunitateak Kirol Kontseilu Nagusiak antolatzen dituen kirol programetan parte hartzea; halaber, Nafarroako selekzioen parte-hartzea.

f) Kirol Zuzendariordetzarekin batera aritzea bakoitzaren kirol esparruko araudi eta laguntzen informazioa zabaltzen, herritarren osasun onari begira egiten diren kirol eta gizarte jardueretan eta Nafarroako Kirol Sarietan; horrekin batera, Kirol Sariei buruzko urteroko proposamena aurkeztea.

g) Kirol Zuzendariordetzak bakoitzaren kirol esparruan eskatzen dituen txosten tekniko edo informatiboak aurkeztea, eta klubek eta kirolariek batik bat nazioan eta nazioartean izaten dituzten emaitzen berri aldian-aldian ematea.

h) Teknifikaziorako eta Selekzioetarako Zentrorako araudia betetzea, federazioek harremana baldin badute harekin.

2. Laguntzak zer xedetarako ematen diren, hartarako erabiliko dira; zertarako erabiltzen diren frogatu beharko da, egiaztapenak onartu eta Kirol Zuzendariordetzak eskatutako agiriak eta programatutako jarduerak egin izanari buruzkoak eman.

3. Egiaztatu eta kontrolatzeko ahalmenak bermatzeko, kontabilitate liburuak, erregistro diligentziatuak eta behar bezala auditaturiko bestelako agiriak eduki beharko dira, merkataritzari eta sektoreari buruzko legeetan xedatu bezala.

4. Dirulaguntzei buruzko azaroaren 9ko 11/2005 Foru Legeko 35. artikuluan aurreikusitako kasuetan, hartutako dirulaguntzak itzultzea.

5. Lagundutako jarduera finantzatzeko eskatu edo lortutako beste laguntza, dirulaguntza, diru-sarrera edo baliabideen berri ematea. Haien zenbatekoak, bakarrik edo denak baturik, ezin izanen du behin ere gainditu garatu beharreko jardueraren kostua.

6. Kirol Federazio onuradun guztiek, beren komunikazioetan, espresuki adierazi beharko dute jarduerak Nafarroako Gobernuaren dirulaguntza batekin finantzatuko direla, bidezkoa den kasuetan betiere.

12. araua. Gorabeherak eta eginbeharrak ez betetzea.

1. Arau hauetan aipatu diren eginbeharrak, haien araudi bidezko garapena edo erabakitzen den beste edozein eginbehar ez betetzeak, edo aurkeztu diren datuak faltsuak izateak, jasotako dirua partez nahiz osorik itzuli beharra ekarriko du, berandutze interesekin edo gabe, eta baita Nafarroako Kirol eta Gazteriaren Institutuak bere aldetik hitzarmena indargabetzea ere. Horretaz gainera, xede bera edo antzekoa duten hurrengo eskaerak ez onartzea ekar dezake, ezertan galarazi gabe antolamendu juridikoan aurreikusitako gainerako arauen aplikazioa.

2. Halaber, onuradunak betebeharrak ia osorik bete dituenean eta zalantzarik gabe bere konpromisoak burutzeko jarrera frogatzen duenean, itzuli beharreko dirua aurreko idatz-zatian aipatzen den proportzionaltasun irizpideari jarraituz zehaztuko da.

3. Aldi berean beste entitate bateko dirulaguntzak hartzeak edo jardueraren berak sortutako dirusarrerak izateak ere emandako laguntza aldatzea ekar dezake, dirulaguntza guztien batuketa dirulaguntzapeko jardueraren kostua baino gehiagokoa bada.

13. araua. Administrazio errekurtsoak.

Deialdi honen eta bere arauen kontra gora jotzeko errekurtsoa paratu daiteke, Nafarroako Gobernuari zuzendua, Nafarroako ALDIZKARI OFIZIALean argitaratu eta biharamunetik hasita hilabeteko epean, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Era berean, Nafarroako Kirol eta Gazteriaren Institutuko zuzendari kudeatzailearen ebazpenen aurka gora jotzeko errekurtsoa jartzen ahalko da, Gizarte Ongizate, Kirol eta Gazteria kontseilariari zuzendua, jakinarazi eta biharamunetik hasita hilabeteko epean, Nafarroako Foru Komunitateko Administrazioari buruzko abenduaren 3ko15/2004 Foru Legean xedatutakoarekin bat.

14. araua. Aplikatu beharreko legeria.

Foru dekretu honetan aurreikusirik ez dagoen guztian Dirulaguntzei buruzko azaroaren 9ko 11/2005 Foru Legean eta Nafarroako Kirolari buruzko uztailaren 5eko 15/2001 Foru Legean xedatutakoari jarraituko zaio.

II. ERANSKINA

Irizpideak eta baremoa

1._Administrazio gastuak.

1. Federazioaren funtzionamendurako beharrezkoak diren gastuak hartuko dira aintzat: telefonoa, aseguruak, publizitatea, zabalkundea, hornidurak eta kudeaketako beste gastu arrunt batzuk.

2. Atal honetarako jasotzen ahalko den dirulaguntza, gehienez, gastu guztiaren %70 izanen da.

3. Federazio batzuen artean federazioen administrazio kudeaketa kontratatzen bada, gastu horren %80 bitarteko laguntza jasotzen ahalko da.

4. Dirulaguntzak gastuen %100era iristen ahalko dira, baldin eta federazioak auditoria bat egiten badu, Nafarroako Kirol eta Gazteriaren Institutuak planean Nafarroako Kirol Federazioen auditoriak direla-eta ezarritakoari jarraikiz.

2._Langileen gastuak.

1. Federazioko langileak kontratatzearen ondorioz sortutako gastuak hartuko dira kontuan. Administrazioko langileak zein teknikariak izaten ahal dira.

2. Atal honetarako jasotzen ahalko den dirulaguntza, gehienez, gastuaren %70 izanen da.

3. Jarduera programa zehatz batzuen garapenaren ondorioz, langile berariazkoak kontratatu behar eta, hortaz, gastuak sortzen dira. Kasu horietan, gastuak berariazko programa bakoitzaren bitartez aztertuko dira.

4. Ez da dirulaguntzarik jasoko langileen gastuetarako, baldin eta haien eginkizunak beste deialdi batzuetako edo foru agindu honetako beste atal batzuetako programen eginkizun funtsezkoak badira.

3._Lehiaketa nazionaletan parte hartzea.

1. Espainiko lehiaketetan Nafarroako selekzioen parte hartzearen gainekoak bilduko dira ata honetan. Atal honetatik kanpo gelditzen dira 24. artikuluan espresuki federaziotzat jotzen diren Nafarroako erakundeen selekzioen programak.

2. Honako kontzeptu hauengatik jasotzen ahalko da dirulaguntza: izena ematea, joan-etorriak, ostatu hartzea, mantenua eta parte hartzeko ezinbestekoak diren beste batzuk.

3. Lehiaketa bakoitzean egindako osoko gastuaren %100era iristen ahalko da dirulaguntza, aurreko puntuko kontzeptuei dagokienez eta, betiere, federazio bakoitzaren ezaugarriak kontuan hartuta.

4. Ez da dirulaguntzarik emanen beste deialdi bateko lehiaketa nazionaletan parte hartzeagatik.

5. Aldez aurretik Kirol Zuzendariordetzak baimenduriko kirol jantzi ofizialak erosteko gastuak, litekeena baita atal honetarako arau bereziak izatea.

6. Autonomia erkidegoetako federazioen artean antolatutako lehiaketetan Nafarroako selekzioek izaten duten parte-hatzea sartuko da atal honetan, betiere Nafarroako Kirol eta Gazteriaren Institutuak baimena eman eta gero.

4._Lehiaketa nazionalen eta nazioartekoen antolamendua.

1. Jardueraren antolamenduak Kirol Zuzendariordetzak baimendurik egon behar du. Egin baino sei hilabete lehenago eginen da antolatzeko eskaera. Salbuespen gisa, betiere arrazoiak emanda, eskaera egiteko epea laburragoa izaten ahalko da.

2. Jardueraren finantzabideak bermaturik egon beharko du. Ezin izanen du sortu Federazioaren funtzionamendu ekonomikoa eragozten duen defizitik.

3. Gastuen artean ez dira sartuko jarduera antolatzeko beharrezkoak ez diren kontzeptuak.

4. Jarduera egin eta Kirol Zuzendariordetzan kirol memoria eta hartan egindako gastu eta dirusarreren balantzea aurkeztu ondoren hartuko da dirulaguntza behin betikotzat.

5. Atal honetako dirulaguntza gehienez ere buruturiko aurrekontuaren %33koa izanen da. Lehiaketa batzuk "interes bereziko" deklaratzeko ahalmena izanen du Kirol Zuzendariordetzak. Kasu horietan, aplikatzen ahal den dirulaguntzaren portzentajea beste bat izan liteke eta ez lehendik aipatua, edo aurrekontuko kontusail berezi bat izanen dute.

5._Nafarroako lehiaketak.

1. Liga edo jardunaldien bitartez antolatutako Nafarroako lehiaketak sartuko dira atal honetan.

2. Haiek egiteko beharrezkotzat jotzen diren kontzeptuak izanen dira dirulaguntzen xede: garaikurrak, afixak, erantzukizuneko aseguruak, instalazioak, antolakuntzako langile gastuak, megafonoak eta kirol mota bakoitzaren arabera kontuan hartzekoak direnak.

3. Nafarroako Kirol Jokoetako lehiaketen edo jardueren ondoriozko gastuak horretarako ezarritako prozeduraren bidez hartu dira aintzat.

4. Arestian aipatutako kontzeptuak direla-eta, egindako gastuaren %100ra bitartekoa izaten ahalko da atal honetarako dirulaguntza.

6._Sustapen jarduerak.

1. Atal honetan, Kirol Zuzendariordetzak finkatuko du zer jarduerari emanen zaien dirulaguntza haien helburuen arabera.

2. Lehiaketa egiteko beharrezkoak diren kontzeptuei lagunduko zaie diruz atal honetan: langileak, aseguruak, megafonia, ostatua eta mantenua, osasun laguntza eta aintzat hartu beharreko beste batzuk, egindako gastuaren %50era bitarte.

Kirol Zuzendariordetzak ahalmena izanen du jarduera batzuk "interes bereziko" deklaratzeko. Kasu horietan, aplikatzen ahal den dirulaguntzaren portzentajea ez da izanen aurretik aipatutakoa.

3. Eskola Kanpainetan, Udalaren Kirol Eskoletan edo antzekoetan egindako jardueren ondoriozko gastuak horretarako ezarritako bideen arabera tratatuko dira.

7._Prestakuntza jarduerak.

1. Atal honetan, alde batetik, kirol titulazio berrien esparruan eta erdibideko denboraren barruan dauden jarduerak sartzen dira eta, bestetik, federazioek egindako prestakuntza jarduera osagarri arruntak: birziklatze ikastaroak, gaurkotze jardunaldiak, clinic teknikoak, zabalkunde jardunaldiak eta antzeko jarduerak.

2. Prestakuntzarako dirulaguntzek ikasleek prestakuntza jarduerarako egiten duten matrikulan edo izen ematean izanen dute eragina.

3. Prestakuntza jarduerak irekiak izanen dira denentzat eta argitara emanen da haien deialdia.

4. Eman beharreko dirulaguntza baloratzerakoan, prestakuntzaren eragin ekonomikoa edo profesionala eta jardueraren federazio sustatzailearen baliabide ekonomikoak hartuko dira kontuan.

5. Dirulaguntza garatu beharreko proiektua eta aurrekontu eta dirusarreren aurrekontua (matrikulaturiko ikasle bakoitzagatik pagatu beharreko dirua barne) ezagutu ondoren zehaztuko da. Atal honetarako dirulaguntza gehienez ere %50ekoa izanen da.

8._Teknifikazioa eta Nafarroako Selekzioen programak.

1. Kontzeptuen definizioa:

a) Teknifikazioa: Atal honetan gehienbat entrenamendu programa bereziak sartuko dira, Espainian eta nazioartean nafar kirolariek dituzten emaitzak hobetzekoak, eta, bereziki, teknifikazio taldearekin Nafarroako Kirol eta Gazteriaren Institutuaren instalazioetan edo instalazio itunduetan entrenatzen diren entrenamendu talde egonkorren programak.

b) Nafarroako selekzioen programak. Nafarroako Kirol eta Gazteriaren Institutuak onetsiriko selekzioen programak sartuko dira atal honetan, ohiko entrenamenduz osatuak daudenak, Nafarroako selekzioek Espainian eta gure foru erkidegoa ordezkatzeko parte hartzen duten lehiaketa guztietan kirol emaitzak hobetzeko xedearekin.

2. Salbuespen gisa, interes bereziko kirolari edo programen egoera bereziak hartzen ahalko dira aintzat.

3. Dirulaguntzak emateko irizpideak kontzeptuka:

a) Instalazioak: NKGIak bere instalazioak debalde erabiltzeko baimena emanen du. Nafarroako Kirol eta Gazteriaren Institutuarena ez den instalazio bat behar baldin bada, hori erabiltzeko lankidetza hitzarmenak izenpetuko dira.

b) Teknikariak: %100era bitarte, Kirol Zuzendariordetzak teknifikazio programa zehatzerako ezartzen dituen beharren arabera.

c) Entrenamenduetako joan-etorriak: %75era bitarte.

d) Entrenamenduetako gosariak eta bazkariak: %75era bitarte.

e) Material suntsikorra: erabilera orokorra baldin badu eta programa ezinbestekoa bada programa garatzeko, %100era bitarte. Partikularrek erabiltzekoa bada, ez da dirulaguntzarik emanen.

f) Kiroleko materiala: federazioarena bada, %75era bitarte. Kirolariarentzat bada, %50era bitarte, salbuespen gisa.

g) Ekipamenduak: erabilera orokorrekoa bada, %100era bitarte. Partikularrek erabiltzekoa bada, %50era bitarte.

h) Elkarretaratzeak eta lehiaketak Nafarroan. Aurreko atalak aplikatuko dira eta, ahal dela, ostatua Nafarroako Kirol eta Gazteriaren Institutuaren instalazioetan emanen zaie kirolari nafarrei. Bestela, diruz lagundu beharreko portzentajea negoziatuko da.

i) Elkarretaratzeak eta lehiaketak Nafarroatik kanpo. Aurreko ataletakoa aplikatuko da eta kirolari nafarren ostatuaren gastua%100era bitarte lagutzen ahal da diruz.

j) Programako teknikarien prestakuntza: gastuaren %75era bitarteko dirulaguntza ematen ahalko da.

9._Ekipamendua.

1. Ondoko kontzeptuetarako dirulaguntza eskatzen ahalko da: informatikako ekipamendua, kirol materiala, fotokopiagailua, komunikazio sistemak, bulegoko bestelako materiala eta antzekoak.

2. Balorazio irizpideetan honako hauek hartuko dira kontuan:

a) Modo bateratuan aurkezten diren federazioen eskaerak.

b) Aurreko ekitaldietan materiala eskatu dutenen kasuan, eskaera berriaren bidez ordezteko asmorik bada, aurrekoa amortizatu dela aztertuko da.

c) Aurreko urteetan atal honetan dirulaguntzarik jaso ez duten federazioak.

d) Programen bolumena, lizentzia kopurua eta dirusarrera eta gastuen aurrekontua.

e) Aurreko ekitaldietan izan duten bilakaera, baldintzak betetzeari dagokionez, atal honetako dirulaguntza jaso duten federazio eskatzaileen kasuan.

3. Aplikatu beharreko baremoa: erosi behar den materialaren aurrekontuaren arabera, dirulaguntza portzentaje hauei jarraikiz aplikatuko da:

_601 eurotik behera, %85.

_601,01 eurotik 1.200era bitartean, %80.

_1.200,01 eurotik 1.800era bitartean, %75.

_1.800,01 eurotik 2.400era bitartean, %70.

_2.400,01 eurotik 3.000ra bitartean, %65.

_3.000,01 eurotik 3.600era bitartean, %60.

_3.600,01 eurotik 4.200era bitartean, %55.

_4.200,01 eurotik 5.000ra bitartean, %50.

_5.000,01 eurotik 10.000ra bitartean, %45.

_10.000 eurotik gora %40ra bitartean.

4. Ateratzen diren portzentajeak federazioek eskatutako materialaren aurrekontuari aplikatuko zaizkio. Aurrekontua kontzeptu hauetan banatuko da:

_Kiroleko edo jardueretarako materiala

_Bulegoko, komunikaziorako edo administrazioko materiala etab.

Iragarkiaren kodea: F0702633