I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
250/2006 FORU AGINDUA, uztailaren 3koa, Nekazaritza, Abeltzaintza eta Elikadura kontseilariak emana, Nekazaritza, Abeltzaintza eta Elikadura kontseilariak 2003ko martxoaren 5ean emandako Foru Agindua aldatzen duena. Horren bidez Nafarroako Foru Komunitatearen nekazaritza sektorearendako Estatuko laguntzei buruzko Erregelamenduko "Nekazaritzako produktuak eraldatu eta merkaturatzeko sektorean inbertitzeko laguntzak" izeneko 16. artikulua betearazi eta garatu zen. Erregelamendua abenduaren 30eko 280/2002 Foru Dekretuaren bidez onetsi zen.
Nafarroako Foru Komunitatearen nekazaritza sektorearendako Estatuko laguntzei buruzko Erregelamenduko "Nekazaritzako produktuak eraldatu eta merkaturatzeko sektorean inbertitzeko laguntzak" izeneko 16. artikulua betearazi eta garatzeko 2003ko martxoaren 5ean Nekazaritza, Abeltzaintza eta Elikadura kontseilariak emandako Foru Aginduaren 5. artikuluak laguntzak aplikatzeko baremoa ezartzen du, ponderazio faktoreak adierazirik. Aipatutako Erregelamendua abenduaren 30eko 280/2002 Foru Dekretuaren bidez onetsi zen.
Nekazaritzako elikagaien industriaren sektorean aspaldi honetan ikus daiteke aldatu egin direla enpresen estrategiak: deslokalizazio prozesuak, ekoizpenen orientazio berriak, merkataritzarako formatu eta prestakinetan espezializatzea etab. Horrek guztiak nabarmen eragin dio herrietako sare sozioekonomikoari.
Nafarroako Nekazaritzaren plan estrategikoak aukera eman du zenbait helburu estrategiko ezartzeko, zein bere jarduketa ildoarekin, aipatutako enpresa planteamendu horien aplikazioak ekarri dituen erronkei aurre egiteko xedearekin hein handi batean.
Beraz, komeni da behar diren aldaketak egitea nekazaritzako elikagaien industriarendako laguntzak arautzen dituen araudian, helburu eta jarduketa ildo horiekin bat datozen inbertsio proiektuak interes bereziko proiektu deklaratu ahal izateko.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskurantzak erabiliz,
AGINDU DUT:
Artikulu bakarra._Nekazaritza, Abeltzaintza eta Elikadura kontseilariak 2003ko martxoaren 5ean emandako Foru Aginduaren 5. artikulua aldatzea, zazpigarren idatz-zatia gehitzeko. Agindu haren bidez, Nafarroako Foru Komunitatearen nekazaritza sektorearendako Estatuko laguntzei buruzko Erregelamenduko "Nekazaritzako produktuak eraldatu eta merkaturatzeko sektorean inbertitzeko laguntzak" izeneko 16. artikulua aplikatu eta garatu zen. Abenduaren 30eko 280/2002 Foru Dekretuaren bidez onetsi zen Erregelamendua. Hauxe da testu berria:
"7. Nekazaritza, Abeltzaintza eta Elikadura Departamentuak proposaturik Nafarroako Gobernuak interes bereziko proiektu deklaratutakoetan, laguntzak Europako Batzordeak ezarritako gehienekoak izaten ahalko dira.
Inbertsio proiektu bat interes berezikoa dela deklaratzeko, Nafarroako Nekazaritzaren Plan Estrategikoan jasotako helburuekin eta jarduketa ildoekin bat datorrela justifikatu beharko da, bereziki Elikagaien eraldaketa, merkaturatzea, kalitatea eta segurtasuna izeneko 2. ardatzarekin.
Horrez gain, bost alderdi hauetatik hiruk, gutxienez, balorazio positiboa egiten dela arrazoitu beharko da:
_Inbertsioaren bolumena.
_Lanpostuak sortzea.
_Garapenerako arazoak dituzten tokietan egotea.
_Enpresaren edo/eta eskualdearen jarduera ekonomikoari eusteak duen garrantzi estrategikoa.
_Eremuko bertako baliabideen eta lehengaien erabilera."
AZKEN XEDAPEN BAKARRA
Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2006ko uztailaren 3an._Nekazaritza, Abeltzaintza eta Elikadura kontseilaria, José Javier Echarte Echarte.
(-- F0611797 --)
Iragarkiaren kodea: F0611797
