I. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
3/2006 FORU DEKRETUA, urtarrilaren 9koa, Naxurietako Kontzejua, Untzitibarko Udalekoa, desagertzea erabakitzen duena.
Untzitibarko Udalak Nafarroako Gobernuari eskatu dio Naxurietako Kontzejua toki entitate gisa iraungitzeko espedientearen tramitazioa, Nafarroako Toki Administrazioari buruzko uztailaren 2ko 6/1990 Foru Legearen 44.1. artikuluko 1. idatz-zatiko a) letran ezarritakoaren arabera. Horrekin batera, eskaera-idazkia aurkeztu du, Kontzeju horretako 18 herritarrek sinatua, hots, legez eskatzen den gehiengoak sinatua, eta, orobat, Udalak horren gainean 2005eko maiatzaren 17an hartutako erabakia, eskaerari oniritzia ematen diona.
Toki Administrazioko zuzendari nagusiak ekainaren 1ean emandako 657/2005 Ebazpenaren bidez Ollokiko Kontzejua iraungitzeko espedientea jendaurrean jarri eta Untzitibarko Udalari eta Naxurietako Kontzejuari entzutea ematea xedatzen zen. Aipatutako ebazpena 2005eko uztailaren 1eko Nafarroako ALDIZKARI OFIZIALean argitaratu zen.
Entzuteko eta jendaurrean egoteko emandako hilabeteko epea bukatu da eta ez da alegaziorik aurkeztu.
Nafarroako Toki Administrazioari buruzko uztailaren 2ko 6/1990 Foru Legeko 44.1.a) artikuluak xedatzen du Kontzejuak bertako bizilagun gehienek eskaera idatzia aurkezturik iraungitzen direla, Udalari entzun ondoren.
Uztailaren 2ko 6/1990 Foru Legeko 44. artikuluko 2. idatz-zatiak xedatzen du Nafarroako Gobernuari dagokiola kontzejuak iraungitzat jotzea, Lurralde Mugaketaren Batzordeak txostena eman ondoren.
Lurralde Mugaketaren Batzordeak, 2005eko abenduaren 1ean, Nafarroako Toki Administrazioari buruzko Foru Legearen 44.2 artikuluan xedatutakoaren arabera, Naxurietako Kontzejua desagertzearen aldeko txostena eman zuen.
Hori horrela, Toki Administrazioko kontseilariak proposaturik, eta Nafarroako Gobernuak 2006ko urtarrilaren 9an egindako bilkuran hartutako erabakiarekin bat,
DEKRETATU DUT:
1. artikulua. Naxurietako Kontzejua, Untzitibarko Udalekoa, desagertzea erabakitzea, Nafarroako Toki Administrazioari buruzko uztailaren 2ko 6/1990 Foru Legeko 44. artikuluko 1. idatz-zatian xedaturikoarekin bat.
2. artikulua. Kontzejua iraungitzeko prozedurako arau hauei jarraikiko zaie:
1. Naxurietako Kontzejuaren ondasun guztien inbentarioa egin eta Untzitibarko Udalarenari gaineratuko zaio.
2. Naxurietako Kontzejuaren kontuak itxiko dira. Pagatu gabeko obligazioak eta kobratu gabeko eskubideak Untzitibarko Udalaren aurrekontuei gaineratuko zaizkie. Iraungi den Kontzejuaren baliabide finantzario guztiak Udalaren diruzaintzara pasako dira.
3. Untzitibarko Udalari emaniko ondasun, artxibo eta zigiluen akta eginen da.
3. artikulua. Estatuko Administrazio Orokorrari foru dekretu honen berri eman behar zaio, Nafarroako Toki Administrazioari buruzko Foru Legeko 44. artikuluko 2. idatz-zatian aipatzen diren ondorioak sor daitezen. Urriaren 25eko 288/1990 Foru Dekretuaren 5. artikuluari jarraikiz, Naxurietako Kontzejuaren izena desagertaraziko da Nafarroako Toki Entitateen Erregistrotik.
4. artikulua. Untzitibarko Udalari eta Naxurietako Kontzejuari foru dekretu honen berri eman behar zaie, eta adierazi beronen kontra administrazioarekiko auzi-errekurtsoa jar dezaketela, Nafarroako Auzitegi Nagusiko Administrazioarekiko Auzien Salari zuzendua, argitaratu edo jakinarazi eta biharamunetik hasita bi hilabeteko epean, deusetan galarazi gabe, horren aurretik, Nafarroako Gobernuaren aurrean errekerimendua egitea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epeetan.
AZKEN XEDAPENA
Foru dekretu honek Nafarroako ALDIZKARI OFIZIALean argitaratzen den egunean berean hartuko du indarra.
Iruñean, 2006eko urtarrilaren 9an._Nafarroako Gobernuko lehendakaria, Miguel Sanz Sesma._Toki Administrazioko kontseilaria, Alberto Catalán Higueras.
Iragarkiaren kodea: F0600528
