97. ALDIZKARIA - 2005eko abuztuaren 15a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

597/2005 EBAZPENA, uztailaren 5ekoa, Industria eta Teknologia, Merkataritza eta Lan Departamentuko Lan zuzendari nagusiak emana, Nafarroako Foru Komunitateko "Kirol zerbitzuen eta ekipamenduen enpresa kudeatzaileak" sektorerako lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 70/2005).

Ikusirik Nafarroako Foru Komunitateko "Kirol zerbitzuen eta ekipamenduen enpresa kudeatzaileak" sektorerako lan hitzarmen kolektiboaren testua, negoziazio batzordeak sinatua (espediente zenbakia: 70/2005).

Gertakariak:

1. 2005eko ekainaren 28an departamentu honetan sartu da sektore horretarako lan hitzarmen kolektiboaren testua, 41 artikuluz, xedapen gehigarri batez, xedapen iragankor batez eta eranskin batez (2005eko lansarien taulak) osatua, sektoreko enpresaburuen elkartearen (AGEDENA) eta sindikatuetako biren ordezkariek (UGT eta CC OO) osaturiko negoziazio batzordeak 2005eko ekainaren 22an izenpetu eta onetsia.

2. Espediente hau izapidatzean aplikatu beharreko legezko eta arauzko manuak bete dira.

Zuzenbideko oinarriak:

1. Industria eta Teknologia, Merkataritza eta Lan Departamentu honek bere esku du lan hitzarmen kolektiboak erregistratu, gorde eta argitaratzea, martxoaren 24ko 1/1995 Legegintzako Errege Dekretuaren 90. artikuluan ezarrita dagoen bezala, eta hori, Lan zerbitzuak Estatuko Administraziotik Nafarroako Foru Komunitatera eskualdatzen dituen apirilaren 11ko 937/1986 Errege Dekretuarekin bat, bai eta irailaren 23ko 334/1996 Foru Dekretuarekin ere, Departamentu honi Estatutik transferitutako lan zerbitzuak esleitzen dizkionarekin, alegia.

2. Maiatzaren 22ko 1040/1981 Errege Dekretuaren bigarren artikuluak agintzen du Langileen Estatutuaren III. tituluan ezarritakoaren arabera egindako hitzarmenak hitzarmen kolektiboen erregistroan inskribatu behar direla.

3. Hitzarmen kolektiboak gordetzea, erregistratu ondoren, Industria eta Teknologia, Merkataritza eta Lan Departamentu honen eskumena da, zuzenbideko oinarrietako lehenbizikoan aipatutako manuen arabera.

Horiek horrela, Foru Komunitateko Administrazioari buruzko abenduaren 3ko 15/2004 Foru Legeak eta otsailaren 24ko 49/2005 Foru Dekretuak emandako eskumenak erabiliz,

EBATZI DUT:

1. Nafarroako "Kirol zerbitzuen eta ekipamenduen enpresa kudeatzaileak" sektorerako (kodea: 3108235) lan hitzarmen kolektiboa erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea. Hori guztia negoziazio batzordeari jakinaraziko zaio.

2. Nafarroako ALDIZKARI OFIZIALean argitara dadila agintzea.

Ebazpen honen aurka gora jotzeko errekurtsoa aurkez daiteke, Nafarroako Gobernuari zuzendua, jakinarazi eta biharamunetik hilabeteko epean.

Ebazpen honen berri ematea interesatuei, behar diren ondorioak izan ditzan.

Iruñean, 2005eko uztailaren 5ean._Lan zuzendari nagusia, José María Roig Aldasoro.

NAFARROAKO BESTE ENTITATE BATZUEN JABETZAPEKO KIROL ZERBITZUEN ETA EKIPAMENDUEN ENPRESA ETA ENTITATE PRIBATU KUDEATZAILEENTZAKO HITZARMEN KOLEKTIBOA

ATARIKO KAPITULUA

Aldeak zehaztea

1. artikulua Hitzarmen hau itundu dutenak honako hauek dira: enpresaren aldetik Nafarroako entitate publikoen edo/eta pribatuen jabetzapeko kirol zerbitzuen eta ekipamenduen enpresa kudeatzaileen Elkartea (AGEDENA) eta langileen aldetik UGT eta CC OO sindikatuak, langileen ordezkarien % 45,83 eta % 25 dituztenak, hurrenez hurren.

LEHENENGO KAPITULUA

Xedapen orokorrak

2. artikulua. Eremu funtzionala.

Hitzarmen hau beste entitate publikoen edo/eta pribatuen jabetzapeko kirol zerbitzuak eta ekipamenduak kudeatzen dituzten enpresa eta entitate pribatuetan aplikatuko da, euren langileak barne.

Hitzarmen kolektibo honen aplikazio eremutik kanpo geldituko dira kirol instalazio edo ekipamentuetan garbiketa lanetan diharduten langileak eta kirol instalazio edo ekipamentuetan ostalaritzan ari direnak, kirol zerbitzu edo ekipamenduaren entitate kudeatzaileak bere garbiketa lana edo/eta ostalaritzakoa aipatu instalazioan soilik ematen badu.

3. artikulua. Lurralde eremua.

Hitzarmen honen eremua eskualdea da eta lantokia Nafarroako Foru Komunitatean duten enpresetan aplikatuko da, enpresaren helbide soziala beste autonomia erkidego batean egon arren.

4. artikulua. Langileria.

Hitzarmen honi atxikiko zaizkio aurreko artikuluetan adierazitako funtzio eta lurralde eremuetako enpresetan enplegatutako langile guztiak, Langileen Estatutuari buruzko Legearen testu bategina onetsi zuen martxoaren 24ko 1/1995 Legegintzako Errege Dekretuaren 2. eta 13. artikuluetan bildutako langileentzat ezarritako salbuespenak izan ezik.

5. artikulua. Iraunaldia eta amaieraren iragarpena.

Hitzarmen honek 2005eko urtarrilaren 1ean hartuko du indarra, eta 2007ko abenduaren 31 arte iraunen du.

Hitzarmenaren indarraldia amaitzean, beste hitzarmenik ezean, lehengoaren arauek segituko dute indarrean.

Langileen Estatutuaren testu bategineko 86.2. artikuluan ezarritakoaren ondorioetarako, hitzarmen honen amaiera sinatzen den egunetik beretik iragartzen da.

Beraz, indarra duen bitartean alde batek ezin eskatu dio besteari enpresa itunen inongo negoziaziorik hitzarmenak arautzen dituen gaietan.

6. artikulua Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

Kasu horretan, hitzarmen honen hobekuntzek multzo bat osatzen dute, edozein modutan ere lehendik daudenekin konpentsatzekoa, baina konparazioa urteko guztirakoari begira eginen da, errendimendu normalean eta asistentzia osoa izanik.

Etorkizunean ezar daitezkeen xedapenei dagokienez, aldaketa ekonomikorik badakarte, eragina izanen dute baldin eta, osotara kontuan harturik, hitzarmen honetan ezarritakoak baino gehiago badira urteko kopuruan.

7. artikulua. Konpentsazioa.

Hitzarmen honetan itundutako baldintzak, denak batera hartuta, indarra hartu aurretik zeuden guztiekin konpentsatzen ahal dira, edozein dela ere haien izaera edo jatorria.

8. artikulua. Berme pertsonalak.

Langileren batek, urteko kopuruan eta orokorrean, hitzarmen honetan ezarritakoak baino lan baldintza hobeak izanez gero, errespetatu eginen zaizkio.

9. artikulua. Probaldia.

Langileak enpresan lanean hastean proba gisan arituko direla ulertuko da idatziz horrela agertzen bada lan kontratuan. Probaldia ez da, inondik ere, ondoko denbora baino luzeagoa izanen:

_6 hilabete, hitzarmen honen 11. artikuluan finkatutako langileen sailkapenean 1. lanbide taldean daudenentzat.

_2 hilabete, 2. lanbide taldeko langileentzat.

_Hilabete bat, 3., 4. eta 5. lanbide taldeetako langileentzat.

_15 egun natural, 6. lanbide taldeko langileentzat.

Probaldian barna, bi aldeetako edozeinek lan kontratua bertan behera uzten ahal du aurreabisurako eperik jartzeke eta kalte-ordaina izateko eskubiderik gabe.

Probaldia bukatutakoan, atzera egin ez bada, kontratuak dagozkion ondorioak sortuko ditu.

10. artikulua. Batzorde paritarioa.

Hitzarmen honetako batzorde paritarioa eratu da, hitzarmenaren aplikazioa interpretatu eta zaintzeko, bere edukiaren gainean sor daitezkeen desadostasunetan.

Bi aldeek espresuki erabaki dutenez, zalantzarik edo desadostasunik sortuz gero, batzorde paritarioari txostena eskatuko zaio jurisdikzio eskudunari edozein erreklamazio egin aurretik.

Batzordea lau kidek osatuko dute, horietako bi enpresako ordezkariek hautatuak eta beste biak hitzarmena sinatzen duten langileen ordezkariek hautatuak. Batzuek eta besteek aholkularien laguntza izan dezakete, hizpidea bai baina botorik gabe.

Alde batek eskatzen duenean bilduko da batzordea, astebete lehenago jakinarazita, eta arazoak konpontzeko gehienez ere bi astebeteko epea izanen du.

Eztabaidatutako gaiak batzordea osatzen duten bi aldeetako bakoitzaren gehiengo soilaz onetsiko dira.

Batzorde paritarioak hartzen dituen erabakiak hitzarmenaren testuari erantsiko zaizkio eta haren osagai izanen dira.

BIGARREN KAPITULUA

Langileen sailkapena

11. artikulua. Maila funtzionalak.

Hitzarmen honen aplikazio eremuan biltzen diren langileak sei funtzio-mailatan sailkatuko dira, honela "1. taldea", "2. taldea", "3. taldea", "4. taldea", "5. taldea" eta "6. taldea", bakoitzaren oinarrizko zereginen eta eginkizunen arabera eratuak, bai eta horietan jarduteko eskatutako prestakuntzaren edo espezializazioaren arabera.

1. taldea

Irizpide orokorrak:

Eginkizun konplexuak eta heterogeneoak burutzea, maila handieneko gaitasun profesionala eskatzen dutenak.

Laguntzaile talde batek egiten dituen lanak integratu, koordinatu eta gainbegiratzeko diren eginkizunak.

Prestakuntza: eskatzen den prestakuntzaren parekoak dira unibertsitateko goi edo erdi mailako titulazioa, erdi mailako titulazioa edo esperientzia frogatua.

Parekatzea: talde honetan sartzen dira lanpostu hauei dagozkien jarduera guztiak: instalazioko zuzendariak, kudeatzailea, proiektuko arduraduna.

2. taldea

Irizpide orokorrak: zeregin heterogeneoak integratzeko, koordinatzeko eta gainbegiratzeko lanak, hala nola lankide talde baten lana antolatzeko ardura.

Multzo horretan sartzen dira, halaber, lan konplexuak eta aldi berean homogeneoak, aginte erantzukizunik izan gabe ere berariazko prestakuntza handia eskatzen dutenak.

Prestakuntza: erdi mailako prestakuntza akademikoa edo lanpostuari dagokion titulazio berariazkoa, praktikaldi batez edo antzeko lanetan izandako esperientziaz osatua.

Parekatzea: talde honetan sartzen dira lanpostu hauei dagozkien jarduera guztiak: kirol koordinatzailea, fisioterapeuta, OLT-EDU, departamentuko arduradunak.

3. taldea

Irizpide orokorrak: diseinuan, programazioan, prestakuntzan eta exekuzioan autonomia handia eskatzen duten eginkizunak, eduki homogeneoko zereginak, lankide talde txiki batek eginak, integratu, koordinatu eta gainbegiratzea eska dezaketenak.

Prestakuntza: eskatzen den oinarrizko prestakuntza egiten diren lanei dagokien titulazio berariazkoa izanen da edo bigarren mailako lanbide heziketaren parekoa (LH II). Hori ordezka daiteke eite bereko lanetan gutxienez urtebetez izandako esperientziaz enpresa berean edo sektoreko beste enpresa batzuetan.

Parekatzea: talde honetan sartzen dira kirol jardueretako tekinkariari (monitoreari) dagozkion jarduera guztiak, espezialitate guztietan.

4. taldea

Irizpide orokorrak: zeregin homogeneoak integratzeko, koordinatzeko eta gainbegiratzeko diren eginkizunak, lankide talde txiki batek eginak, edo aginte erantzukizunik izan gabe ere, exekuzioan autonomia handia eskatzen dutenak.

Prestakuntza: eskatzen den oinarrizko prestakuntza bigarren mailako lanbide heziketaren parekoa (LH II) izanen da edo egiten diren lanei dagokien titulazio berariazkoa. Hori ordezka daiteke eite bereko lanetan gutxienez urtebetez izandako esperientziaz enpresa barnean edo sektoreko beste enpresa batzuetan.

Parekatzea: talde honetan sartzen dira lanpostu hauei dagozkien jarduera guztiak: aretoko teknikaria, masajistak, lehen mailako administrari-ofiziala, zenbait lanbidetako lehen mailako ofiziala eta soroslea.

5. taldea

Irizpide orokorrak: eduki homogeneoko zereginak, autonomiaz eta jarraibide zehatzei lotuz burutzekoak.

Prestakuntza: eskatzen den oinarrizko prestakuntza lehen mailako lanbide heziketaren parekoa (LH I) izanen da edo egiten diren lanei dagokien titulazio berariazkoa. Hori ordezka daiteke eite bereko lanetan gutxienez sei hilabetez izandako esperientziaz enpresa barnean edo sektoreko beste enpresa batzuetan.

Parekatzea: talde honetan sartzen dira lanpostu hauei dagozkien jarduera guztiak: administrari laguntzailea, zerbitzu orokorretako langilea, monitorearen laguntzailea.

"Zerbitzu orokorretako langilea" deitzen zaio 5. eta 6. taldeetako eginkizunetan diharduen balioanitzeko langileari.

6. taldea

Irizpide orokorrak: lan metodo zehatz, jakin eta aurrez ezarritakoari jarraikiz egiten diren lanak, lanbide-ezagupen oinarrizkoak eta egokitze aldi labur bat eskatzen dituztenak.

Prestakuntza: eskatzen den prestakuntza eskola graduatuaren parekoa da, eginkizun horietan izandako esperientziaz ordezka daitekeena.

Parekatzea: talde honetan sartzen dira lanpostu hauei dagozkien jarduera guztiak: etxezaina, atezaina, zerbitzaria, peoia eta garbiketa peoia.

12. artikulua. Balioaniztasuna.

Sektorean ematen diren zerbitzuen izaeragatik, denbora partzialean eta lanaldi oso murriztuan ematen diren zerbitzu asko direnez, eta horrek, besteak beste, sektorea profesionalizatzea zailtzen duenez, bi aldeen iritziz funtsezkoa da sektoreko langileen balioaniztasuna espresuki arautzea, mugikortasun funtzionalaren mugak eta balioaniztasuna erregulatzekoak oztopo bihur ez daitezen sinatutako denbora partzialeko kontratuetan lanaldia luzatzeari eta hasieratik lanaldi luzeagoa kontratatzeari bidea ematerako orduan.

Aurreko horretan oinarrituz, erabaki da ezen, kontratu partzialetan lanaldi gehiago kontratatu ahal izateko edo ondoren luzatzeko, betiere ondotik adierazten diren kasuen mugetan, enpresaren eta langilearen artean ituntzen ahal dela lanbide talde batzuei dagozkien eginkizunak biltzea, aldeek espresuki adostu eta idatziz jasotzen badute hasierako lan kontratuan nahiz hasierako kontratu horretako lanaldia luzatzen duen kontratu berrituan.

Balioanitzeko kasu hauek ezarri dira:

a) Kirol jardueretako teknikaria (3. taldea) eta kirol koordinatzailea (2. taldea).

b) 3. eta 4. taldeak.

c) Kirol jardueretako teknikaria (3. taldea) eta zerbitzu orokorretako langilea (5. taldea).

d) Soroslea (4. taldea) eta zerbitzu orokorretako langilea (5. taldea).

Artikulu honetan aipatu kasuetan eta mugen barnean, eta bi aldeek balioaniztasun sistema honek bideratzen duen kontratazioan edo lanaldien luzapenean duten interesa ikusirik, itundu da ezen, kasu bakoitzeko eginkizunak gorabehera, bakoitzari ordaindu beharreko ordainsaria lanbide talde bakoitzarentzat ezarritakoa izanen dela, talde bakoitzeko eginkizunetan emandako denborararen arabera.

Artikulu honetan aurreikusitako inguruabarrak gerta ez daitezenean, legeria orokorrean balianiztasun eta funtzio-mugigarritasun kasuetarako xedatutakoa aplikatuko da.

HIRUGARREN KAPITULUA

Baldintza ekonomikoak

13. artikulua. Soldatak.

Hitzarmen kolektibo honen eraginpeko langileek hitzarmeneko I. eranskineko lansarien taulan lanbide talde bakoitzarentzat ezarritako ordainsariak jasoko dituzte. Ordainsari horiek lanaldi osoko zerbitzu emateari dagozkio.

Lansarien taulan ezarritako urteko diru kopuruetan sartzen dira hitzarmen honek indarra hartu aurretik kobratzen ziren behialako oinarrizko soldatak eta osagarriak.

Osotara urtean zenbatutako behialako eskurapenak hitzarmen honen testuan ezarritakoak baino handiagoak badira, langilearen aldeko diferentzian "ad personam" izeneko osagarria erantsiko da, "osagarri pertsonala" deitzen dena.

Argibide gisa, aipatu I. eranskinean lanbide talde bakoitzarentzat ezarri da benetan lan egindako ordu bakoitzaren prezio gordina, zeinean sartzen baita asteko atsedenaren ordainsariaren, aparteko pagen, oporren eta jaiegunen proportziozko partea.

Orduaren prezio horretan ez da sartzen hitzarmeneko 16. artikuluan ezarritako gaueko laneko plusa, ez eta benetan lan egindako jaieguneko edo igandeko plusak ere, 17. eta 18. artikuluetan ezarritakoak.

14. artikulua. Soldata igoera.

2005. urtea

2005eko urtarrilaren lehenaren aurrerako ondorioekin, hitzarmen honetako lansarien taulak, 2004ko abenduaren 31n indarrean zirenak, berrikusiko dira, % 4,05 igoz, hain zuzen ere Nafarroan 2004. urtean izandako behin betiko KPIa (% 3,3) gehi 0,75 puntu. Portzentaje berean igoko dira hitzarmen honetako 17. eta 18. artikuluetan araututako jaiegunetako eta igandeetako plusak ere.

2006. urtea

2006ko urtarrilaren lehenaren aurrerako ondorioekin, hitzarmen honetako lansarien taulak, 2005eko abenduaren 31n indarrean izanen direnak, berrikusiko dira, Nafarroan 2005. urtean izanen den behin betiko KPIa gehi puntu bat. Portzentaje berean igoko dira hitzarmen honetako 17. eta 18. artikuluetan araututako jaiegunetako eta igandeetako plusak ere.

2007. urtea

2007ko urtarrilaren lehenaren aurrerako ondorioekin, hitzarmen honetako lansarien taulak, 2006ko abenduaren 31n indarrean izanen direnak, berrikusiko dira, Nafarroan 2006. urtean izanen den behin betiko KPIa gehi puntu bat. Portzentaje berean igoko dira hitzarmen honetako 17. eta 18. artikuluetan araututako jaiegunetako eta igandeetako plusak ere.

15. artikulua. Aparteko eskersariak.

Langile guztiek aparteko bi eskersari kobratuko dituzte. Horien zenbatekoak maila bakoitzarentzat hitzarmen honen 1. eranskineko lansarien taulan ezarriak daude.

Aparteko eskersariok ekainean eta abenduan kobratuko dira, eta hilez hil proportzioan banatzen eta ordaintzen ahal dira bakoitzaren soldata agirian, lan kontratuaren iraupena urtebetetik beherakoa baldin bada.

Bi eskersari horiek sei hilabetetik behin sorraraziko dira. Ordainketa, kontaketa edo likidaziorako hainbanaketa egiteko, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31 bitartekoa bigarrenean.

16. artikulua. Gaueko lanaren plusa.

22:00etatik 6:00ak bitarte egiten dena da gaueko lana.

Lana gauez egiten duten langileek soldata osagarria jasoko dute gaueko orduetan benetan lan egindako ordu bakoitzeko. Osagarriari "gaueko lanaren plusa" deitzen zaio eta gaueko orduetako zerbitzualdiaren arabera ordainduko da, hitzarmenaren 1. eranskineko lansarien taulan ezarritako ordainsarien maila bakoitzari ezarritako diru kopuruan.

Gaueko lanaren plusa benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

17. artikulua. Jaiegun plusa.

Artikulu honetan ezarritako ondorioetarako jaiegun izanen dira urterako ezarritako 14 jaiegun ofizialak; horiexek besterik ez.

Euren zerbitzuak 14 jaiegun ofizial horietakoetan ematen dituzten langileek jaiegun plusa kobratuko dute, kategoria guztietan berdina. 2005. urtean 3,38 euroko zenbateko gordina egun horietan benetan lan egindako ordu bakoitzeko.

Jaiegun plusa 14 jaiegun ofizial horietan benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

18. artikulua. Igandeko plusa.

Euren zerbitzuak igandeetan ematen dituzten langileek igandeko plusa kobratuko dute, kategoria guztietan berdina. 2005. urtean 1,70 euroko zenbateko gordina benetan lan egindako ordu bakoitzeko.

Igandeko plusa benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

19. artikulua. Lanerako aldi baterako ezintasunaren eta haurdunaldiko arriskuaren osagarria.

A) Laneko istripuaren edo eritasun profesionalaren ondoriozko aldi baterako ezintasuna:

Enpresak laneko istripuaren edo eritasun profesionalaren ondoriozko aldi baterako ezintasunaren prestazioak osatuko ditu, hil horretan langilea bajan egon ez balitz zegokiokeen soldata gordinaren % 100era arte, gaueko lanaren, jaiegun edo igandeko lanaren osagarriak salbuetsita.

B) Eritasun arruntaren edo lanetik kanpoko istripuaren ondoriozko aldi baterako ezintasuna:

Eritasun arruntaren edo lanetik kanpoko istripuaren ondoriozko aldi baterako ezintasunaren prestazio hauek ezarri dira, kontuan hartuta urte naturalean zehar langileen bajak zenbat izan diren eta haien iraupena:

Lehenbiziko baja: Urteko lehenbiziko bajako aurreneko 10 egunetan, enpresak hil horretan langilea bajan egon ez balitz zegokiokeen soldata gordinaren % 80era arte osatuko du, gaueko lanaren, jaiegun edo igandeko lanaren osagarriak salbuetsita.

Bajako 11. egunetik 60.era arte, biak barne, enpresak hil horretan langilea bajan egon ez balitz zegokiokeen soldata gordinaren % 100era arte osatuko du, gaueko lanaren, jaiegun edo igandeko lanaren osagarriak salbuetsita.

Bajako 61. egunetik aurrera, enpresak hil horretan langilea bajan egon ez balitz zegokiokeen soldata gordinaren % 80ra arte osatuko du, gaueko lanaren, jaiegun edo igandeko lanaren osagarriak salbuetsita.

Bigarren baja: Urteko bigarren bajako aurreneko 10 egunetan, enpresak hil horretan langilea bajan egon ez balitz zegokiokeen soldata gordinaren % 75era arte osatuko du, gaueko lanaren, jaiegun edo igandeko lanaren osagarriak salbuetsita.

Bajako 11. egunetik 60.era arte, biak barne, enpresak hil horretan langilea bajan egon ez balitz zegokiokeen soldata gordinaren % 90era arte osatuko du, gaueko lanaren, jaiegun edo igandeko lanaren osagarriak salbuetsita.

Bajako 61. egunetik aurrera, enpresak hil horretan langilea bajan egon ez balitz zegokiokeen soldata gordinaren % 75era arte osatuko du, gaueko lanaren, jaiegun edo igandeko lanaren osagarriak salbuetsita.

Hirugarren bajan eta hurrengoetan enpresek ez dute inolako osagarririk jarriko eta langileak dagozkion prestazioak besterik ez du jasoko.

Eritasun arruntaren edo lanez kanpoko istripuaren ondoriozko aldi baterako ezintasun kasuetan, langilea ospitaleratu beharra izanez gero, ospitalizazioak dirauen bitartean, enpresak hil horretan langilea bajan egon ez balitz zegokiokeen soldata gordinaren % 90era arte osatuko ditu aldi baterako ezintasunaren prestazioak, gaueko lanaren, jaiegun edo igandeko lanaren osagarriak salbuetsita.

C) Haurdunaldiko arriskua:

Gizarte Segurantzako Institutu Nazionalak emakumezko langile bati haurdunaldiko arriskuan dagoela aitortzen duen kasuetan, enpresek hil horretan langilea bajan egon ez balitz zegokiokeen soldata gordinaren % 90era arte osatuko dituzte aldi baterako ezintasunaren prestazioak, gaueko lanaren, jaiegun edo igandeko lanaren osagarriak salbuetsita.

20. artikulua. Kilometrajea.

Lana dela eta, langileak joan-etorriko bidaia, lan kontratua egin zaioneko herrian berean, beste lantoki batera egin baldin badu, garraio publikoaren diru zenbatekoa ordainduko zaio.

Langileak joan-etorriko bidaia, lan kontratua egin zaioneko herritik beste herri batera, enpresa beraren bi lantoki artean egin behar badu, langileak 0,19 euro kobratuko du kilometroko. Diru kopuru hori ez da aldatuko hitzarmenaren indarraldi osoan.

Iruñeko kasuan, kontuan izanik Iruñerriko udalerrien kontzentrazioa eta elkarren arteko erlazioa, aurreko lerroaldeetan xedatutakoaren ondorioetarako "herritzat" hartuko da Iruñerria bera, garraio publikoaren mugen barnean kokatzen dena.

21. artikulua. Laneko arropa.

Euren eginkizunetarako laneko arropa behar duten langile guztiei urtean bi uniforme emanen zaizkie.

Soroslearen uniformea honela dago osatua: kamiseta, galtzamotzak, txankletak eta bisera.

Monitorearen uniformea honela dago osatua: kamiseta, bainujantzia eta txankletak.

Noizbehinka erabiltzen den laneko arropa berritzeko nola dagoen kontuan hartuko da.

Kirol jardueretako teknikarien kasuan (monitoreak), ikusirik uniformeak jarduerak bezain ugariak direla, goian aipatu uniforme horien ordez 52 euro gordin ordainduko dira urtean, 0,14 euro, alegia, enpresan alta izandako eguneko, benetako lanaldia edozein dela ere.

LAUGARREN KAPITULUA

Lanaldia, atsedenaldiak, baimenak, eszedentziak eta oporrak

22. artikulua. Lanaldia.

Orokorrean, eta Langileen Estatutuaren 34. artikuluak xedatzen duenarekin bat, urtean lanaldi osoko ordu hauek izanen dira:

2005. urterako 1.720 orduko benetako lanaldia.

2006. urterako 1.712 orduko benetako lanaldia.

2007. urterako 1.704 orduko benetako lanaldia.

Kirol jardueretako teknikoen (monitoreak) jardueren baldintzak ikusirik, batez ere euren lan fisiko handia, talde horrek urtean ordu hauek izanen ditu lanaldi osoan:

2005. urterako 1.629 orduko benetako lanaldia.

2006. urterako 1.621 orduko benetako lanaldia.

2007. urterako 1.613 orduko benetako lanaldia.

Aretoko teknikaria: 1637 ordu hitzarmenaren indarraldi osoan.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

Sei ordutik gorako eguneroko lanaldi jarraituan, 15 minutuko atsedenaldia ezarri da, benetan lan egindako denbora gisa hartuko ez dena.

Atsedenaldiok hartzeko txandak enpresaren arduradunen eta langileen artean adostuko dira, zerbitzuaren beharrak kontuan hartuta.

23. artikulua. Asteko atsedenaldia.

Asteko atseden etengabea, egun eta erdikoa, hamalau eguneko tartean, gehienez ere, metatzen ahal da, eta horrelakoetan hiru eguneko atsedenaldia har daiteke hamalau egunetik behin.

24. artikulua. Oporrak.

Urtean 30 egun naturaleko oporraldi ordaindua ezarri da.

Eskolako kanpainarako berariaz kontratatutako langileak izan ezik, enpresan lan handia izan ohi delako opor guztiak urriaren 1etik maiatzaren 31 bitarte hartzera behartuta dauden langileek eskubidea dute, konpentsazioz, lau opor egun gehiago hartzeko.

Arrazoi horregatik, oporretako hilabete osoa ez baina 15 egun gutxienez aipatu epean hartu beharko balituzte, bi opor egun gehituko lirateke.

Konpentsazioko egun horiek oporrak benetan hartuz gero gehituko lirateke eta ez, ordea, oporren likidazioa egitea egokitzen denean.

Opor egunen ordainsaria langilearen oinarrizko soldatak eta lansari osagarri finkoek osatzen dute, eta espresuki salbuesten dira gaueko laneko plusa, jaieguneko plusa eta igandeko plusa, horiek gaueko orduetan, jaiegunetan edo igandeetan benetan lan egindako orduengatik soilik kobratzen baitira.

25. artikulua. Aparteko orduak.

Aparteko ordu bakoitzeko ordu eta erdiko konpentsazioa izanen da, atsedenaldiekin konpentsatu nahiz dirutan.

Aparteko orduak urteko 14 jaiegun ofizialetako batean eginez gero, aparteko ordu bakoitzeko bi orduko konpentsazioa izanen da.

Konpentsazioaldia 4 hilabetekoa izanen da aparteko orduak eginez geroztik.

Aparteko orduak borondatezkoak izanen dira.

26. artikulua. Lizentzia ordainduak.

Langilea, aurretik abisatu eta justifikatuta, lanetik atera daiteke, ordaindua izateko eskubidearekin, arrazoi hauetako bat dela medio eta honenbeste denborako:

A) Langilearen ezkontza: 15 egun natural.

B) Seme edo alaba baten jaiotza: 3 egun natural.

C) Ondokoen heriotza:

Ezkontidea eta seme-alabak: 5 egun natural.

Gurasoak, aitaginarreba-amaginarrebak eta anai-arrebak: 2 egun natural.

Koinata-koinatuak eta aiton-amonak: egun natural bat.

D) Ondokoen eritasun larria edo ospitalizazioa:

Gurasoak, aitaginarreba-amaginarrebak, ezkontidea eta seme-alabak: 2 egun natural.

Anai-arrebak, koinata-koinatuak eta aiton-amonak: egun natural bat.

Baimen hauek hartzeari begira, ebakuntza eta horretarako prestatzeko aurretik behar litezkeen ospitaleratzeak kasu bakartzat hartuko dira. Halaber, espresuki ezarri da baimena ezin dela ospitaleratzealdia baino luzeagoa izan.

Lizentzia hartuko da ospitalizazioak dirauen bitartean. Ezein kasutan ezin izanen dira hartu, gozamen gerokotuaren sistema honen bidez, gertaera eragilearen ondo-ondotik hartu izan balitu zegozkiokeenak baino lanegun gehiago.

Joan-etorriko bidaia bi herriren artean egin beharra izanez gero, bien artean 200 kilometroko tartea edo handiagoa izanik, C) eta D) ataletan adierazitako baimenak luzatu ahal izanen dira:

Egun bat gehiago, 200 km-tik 400era arteko tartea baldin bada.

Bi egun gehiago, 400 km-tik gorako tartea baldin bada.

E) Ohiko bizilekuz aldatzeko (ezkontzaren ondoriozkoarekin bat ez badator): egun bat.

F) Gurasoen, seme-alaben, edo anai-arreben ezkontza: egun natural bat.

G) Publikoa eta pertsonala den eginbehar saihestezina betetzeko behar-beharrezkoa den denbora.

H) Hezkuntza eta Zientzia Ministerioak edo Nafarroako Gobernuak ofizialki onartutako titulu akademiko edo profesional bat ateratzeko azterketak egitera joateko behar-beharrezkoa den denbora. Joan-etorrietan ematen den denbora ez da lizentzia ordaindutzat hartuko.

A), B), C), E) eta F) ataletan aipatutako kasuetan, baimen egunak gertaera eragilea sortu den unetik beretik hasiko dira kontatzen.

Artikulu honen C) eta D) ataletan aipatutako lizentziak, ezkontideari dagozkionak, langilearekin bikotekide egonkor gisa bizi denari ere aplikatuko zaizkio, baldin eta gertaera eragilea baino urtebete lehenagotik gutxienez elkarrekin bizi badira eta inguruabar horiek bizilekua duten herriko udalaren ziurtagiriaren bidez frogatzen badituzte.

27. artikulua. Borondatezko eszedentzia.

Enpresan gutxienez urtebeteko antzinatasuna duten langileek eskubidea izanen dute borondatezko eszedentzia hartzeko, urtebetekoa gutxienez eta 2 urtekoa gehienez, lanpostua gordea baina antzinatasuna kontatzeko eskubiderik gabe, betiere.

Eszedentzian dagoen langileak ez du zilegi eszedentzian dagoen bitartean sektore bereko edo antzeko beste enpresetan lan egitea, adibidez gimnasioetan edo kirol klubetan.

Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

28. artikulua. Adingabe bat zaintzeko lanaldi-murrizketa.

Legepeko zaintza dela eta, langileren batek adingabekoren bat edo ordaindutako lanik egiten ez duen urritu fisiko edo psikikoren bat bere kargu izanez gero, eskubidea izanen du lanaldia murrizteko, heren bat gutxienez eta erdia gehienez ere, lansaria ere hein berean murriztuta. Lanaldia murrizteko eskubideak haurrak 6 urte bete bitarte iraunen du, eta luzatu ere luzatzen ahal da semeak edo alabak urteak betetzen ditueneko urteko ikasturtea amaitu bitartean (ekaina).

29. artikulua. Haurrari esnea emateko baimena.

Haurrari esnea emateko baimena, Langileen Estatutuaren 37.4 artikuluan ezarritakoa, hartzeko eskubidea duten emakumezko langileek aukeran Estatutuan ezarri bezala har dezakete ala hamalau egun naturaleko baimen ordaindu batekin ordeztu. Azken kasu horretan amatasun baimenaren ondoren hartuko litzateke.

Aukera hori izateko amatasun baimena amaitu baino hamabost egun lehenago, gutxienez, eskatu beharko da.

BOSGARREN KAPITULUA

Kontratazioak eta lanpostu uztea

30. artikulua. Praktikaldiko kontratua.

Praktiketako kontratuaren modalitatean kontrataturiko langileek lehenbiziko urtean hitzarmen kolektibo honetan lanpostu berean edo baliokidean ari den langilearentzat finkatutako soldataren % 75 izanen dute lansaria eta % 90 bigarren urtean.

31. artikulua. Aldizkako kontratu finkoak.

Langileen Estatutuaren 15.8 artikuluan ezarritakoarekin bat, aldizkako langile finko bihurtuko dira egun jakin batzuetan errepikatzen ez diren lanak egiteko kontratatu diren langileak, aldi baterako lanetan aritzeko hirugarren denboraldirako deitzen zaien momentuan.

Horri dagokionez, zenbaketa 2004ko urriaren 1ean hasiko da, aurretik enpresan lanean aritu izana kontuan hartu gabe.

32. artikulua. Behin-behineko kontratuak.

Langileen Estatutuaren 15.1 b) artikuluan ezarritakoaren arabera, espresuki erabaki da Langileen Estatutuaren 15.1 b) artikuluan berean araututako produkzio gorabeherak, lana metatzeak edo eskabide gehiegiak beharturik egiten diren behin-behineko kontratuek gehienez ere 9 hilabete iraunen dutela 12 hilabeteko epean, kontratu mota hori egiteko arrazoia gertatzen denetik hasita.

33. artikulua. Lanpostu uzteak eta aurreabisuak.

Langileek euren borondatez lanpostua uzteko erabakiaren berri emanen diote enpresari, idatziz eta 15 egun aurretik.

Aurrez abisatzen ez bada, enpresak ahalmena izanen du azken likidazioan abisatu gabe utzitako egun kopurua kentzeko.

Era berean, enpresak kontratuaren amaiera idatziz eta gutxienez 15 egun lehenago jakinaraziko dio langileari, salbu eta langilearekin bitarteko kontratua itundua duenean -zeinean ez baitago jakiterik ordezkatzearen arrazoia noiz bukatuko den-, bai eta diziplinako kaleratze kasuetan ere.

34. artikulua. Langileriaren subrogazioa.

34.1. Kirol zerbitzu edo instalazio bat kudeatzeko kontrata baten titulartasun aldaketak ez du, berez eta kasu guztietan, lan harremanen amaiera ekarriko.

Kontrata egile berriaren aldetiko subrogazioa ezarri da aurrekoaren lan eskubide eta betebehar guztietan, kontrata utzi duen enpresaren langileei dagokionez, zehazki hitzarmen honen 11. artikuluan ezarritako lanbide sailkapeneko sistemaren 4., 5. eta 6. lanbide taldeetan sartutakoei, horiexek baitira kontratatzen den kudeaketaren gai den instalazioarekin lotura zuzenena dutenak. Langile horiek, dena den, lantokian 8 hilabeteko antzinatasuna behar dute izan gutxienez, sinatutako kontratu modalitatea edozein dela ere.

34.2. Aurreko lerroaldean finkatutako baldintzak betetzen dituzten langileak, kirol kudeaketaren kontrataren titulartasuna aldatzen den momentuan aldi baterako ezintasunean, lanpostua gorderik eszedentzian, oporretan edo lanpostua gordetzeko eskubidea sortzen duen beste edozein egoeratan badaude titular berriari atxikiko zaizkio. Aurreko lerroaldean eskatzen den gutxieneko antzinatasunaren ondorioetarako kontuan hartzen dira aldi baterako ezintasunean, lanpostua gorderik eszedentzian, oporretan edo lanpostua gordetzeko eskubidea sortzen duen beste edozein egoeratako denboraldiak.

Langile horiek ordezten dituzten bitarteko kontratudun langileak enpresa titular berriaren aldetiko subrogazioan sartuko dira bitarteko gisa, ordeztuak itzuli arte.

34.3. Kontrata desberdinak daudelako, langile batek bere zerbitzuak enplegu emaile berarentzat lantoki batean baino gehiagotan ematen duen kasuetan, kirol kudeaketako kontrata horietako batean titulartasuna aldatzen baldin bada, artikulu honetan araututako subrogazioa titulartasuna aldatzen duen kontratari dagokion lanaldian baino ez da gertatuko. Modu berean eginen da balioaniztasuna espresuki itundutako kasuetan.

34.4. Titulartasuna aldatzen den kasuetan, hura utzi duen enpresak astebete lehenago, gutxienez, kontrata hartzen duen enpresari honakoak jakinaraziko dizkio:

a) Lantegiko langileen zerrenda, bertan duten antzinatasuna, lanaldia, zerbitzu emateko ordutegia, lan kontratuaren kopia eta, halakorik bada, kontratu berritzeena, hartutako edo/eta hartu gabeko oporrak eta azkeneko nomina adieraziz. Zerrendan agerraraziko dira, halaber, artikulu honen 2. atalean adierazitako arrazoietako bategatik kontratua eten zaien langileak.

b) Subrogazioak ukitutako langileak, kontrataren titulartasuna aldatzen den eguneko datan, euren soldaten kobrantzan eguneratuta daudela egiaztatzen duen agiria.

c) Gizarte Segurantzako Diruzaintza Orokorrak luzatutako ziurtagiria, kontrata utzi duen enpresa Gizarte Segurantzaren kuoten ordainketan eguneratuta dagoela egiaztatzen duena.

d) Kontrata utzi duen enpresa zerbitzuak emateko kontratuaren amaieraz, amaieraren iragarpenaz edo ez berritzeaz jakitun egin zeneko dataren behar bezalako egiaztapena.

Kontrata utzi duen enpresak aurreko xehetasun guztiak egiaztatzen ez baditu, kontrata hartzaile berriak dokumentu fede-emailea eskatuko dio, egiaztatu ez diren betebeharrak espresuki adierazten dituena, bi egunen buruan egindako hutsak zuzen ditzan.

Aipatu diren egiaztapenak ez aurkezteagatik kontrata hartzaile berriari kalte ekonomikoak sortuko balitzaizkio, kontrata utzi duen enpresa izanen litzateke haien erantzule zibila.

Kontrata utzi duen enpresak langileari aparteko orduak likidatuko dizkio, bai eta hilabetetik gorako mugaeguna duten beste soldata kontzeptu batzuk ere, kontrata bukaerako datan sorraraziak baina kobratu gabeak, oporretakoak izan ezik.

Sorrarazi bai baina hartu gabe utzitako oporrak, bai eta horien kostua Gizarte Segurantzan ere likidatu behar izanez gero, kontrata hartzen duen enpresaren eta hura utzi duenaren artean konpentsatuko dira.

SEIGARREN KAPITULUA

Beste gai batzuk

35. artikulua. Nominen ordainketa.

Hileko nomina, hura sorrarazi eta hurrengo hileko lehen bost egun baliodunen barnean ordainduko da.

36. artikulua. Prestakuntza.

Enpresa guztiek urtero prestakuntza plan bat egiteko konpromisoa hartu dute.

37. artikulua. Lan osasuna.

Hitzarmen hau sinatzean batzorde bat eratuko da eta bertan proposatu eta zehaztuko dira lan osasun arloan egin beharreko jarduketak.

38. artikulua. Ordu sindikalak metatzeko aukera.

Langileen Estatutuaren 68 e) artikuluan ezarritakoaren arabera, enpresa batzordeetako kideek edo langileen delegatuek hilean daukaten ordu kreditua langileen ordezkari batek edo batzuek biltzen ahal du, hauteskunde gune bereko ordezkariak gai horretan ados jarriz gero, betiere.

Itun hori gauzatzen bada, idatziz jakinaraziko zaio enpresako zuzendaritzari.

39. artikulua. Kanpo gelditzeko klausula.

Ezein enpresak ezin izanen du hitzarmen hau aplikatu gabe utzi, hitzarmenaren batzorde paritarioko kideen 100eko 75en aldeko erabakia ez badago.

40. artikulua. Hutsegiteak eta zehapenak.

Honako hauek dira hutsegite arinak:

a) Hogeita hamar egunean lanera hiru aldiz berandu iristea.

b) Lanera huts egitearen arrazoiak ez jakinaraztea aurrez behar den denboraz.

c) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta, arau-hauste larri edo oso larritzat hartzerik ez badago.

d) Fitxatzeko eginbeharra ez betetzea.

e) Zabarkeriaz jokatzea arauei edo jasotako aginduei dagokienez.

f) Aldi baterako ezintasuneko kasuan, baja edo berrespen agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta gizarte segurantzaren ondorioetarako garrantzitsuak izan daitezkeen gainerako datuak ere.

g) Laneko segurtasun eta higiene arauak ez betetzea, horren inguruabar edo ondorioengatik larritzat edo oso larritzat kalifikatzerik ez badago.

Hutsegite larriak honako hauek dira:

a) Lanera behin berandu iristea, enpresari edo erabiltzaileei kalte larria egiten bazaie edo haientzako arriskugarria bada.

b) Hogeita hamar egunean lanera hiru aldiz baino gehiagotan eta hamar baino gutxiagotan berandu iristea.

c) Hogeita hamar egunean, bidezko arrazoirik izan gabe, behin lanera ez joatea.

d) Agindutako lanetan behar den arreta ez jartzea eta goragokoen jarraibideei jaramonik ez egitea, zerbitzuei dagokienez, enpresaren edo erabiltzaileen kalterako.

e) Hirurogei egunean hutsegite arin bera errepikatzea edo beste hutsegite arin bat egitea.

f) Hirurogei egunean hutsegite arin bera errepikatzea edo beste hutsegite arin bat egitea, nahiz eta beste mota batekoa izan, tartean idatzizko zehapena izan denean.

g) Lankide baten ordez fitxatzea.

h) Laneko segurtasun eta higiene arauak ez betetzea, horren inguruabar edo ondorioengatik oso larritzat kalifikatzerik ez badago.

Hutsegite oso larriak honako hauek dira:

a) Lanera bitan edo gehiagotan berandu iristea, enpresari edo erabiltzaileei kalte larria egiten bazaie edo haientzako arriskugarria bada.

b) Bidezko arrazoirik gabe hamabi hilabeteko aldian 20 aldiz baino gehiagotan berandu iristea.

c) Hogeita hamar egunean, bidezko arrazoirik izan gabe, hirutan lanera ez joatea.

d) Eritasunaren edo istripuaren itxura egitea.

e) Lana utzi edo zabarkeriaz jardun, baldin eta enpresari edo erabiltzaileei kalte larria egiten bazaie edo egin badakieke.

f) Hitzezko eta egitezko tratu txarrak ematea erabiltzaileei, goragokoei edo lankideei.

g) Iruzurra, leialtasun eza edo konfiantza-abusua agindu zaion lanean.

h) Enpresari edo beste edozein pertsonari ebastea, lapurtzea edo jokabide horren konplize gisa aritzea, enpresan berean edo jardueraren kokaleku den lantokian.

i) Agintekeria.

j) Lanerako bajan dagoen bitartean langileak norbere zein besteren kontura lan egitea, bai eta baja egoera sortu edo luzatze aldera iruzur egitea ere.

k) Laurogeita hamar egunean hutsegite larri bera errepikatzea edo beste hutsegite larri bat, nahiz eta beste mota batekoa izan, egitea.

Aurreko artikuluetako hutsegiteen zerrenda adierazpen gisa eman da.

Zehapenak:

Enpresak zehapenak jartzeko ahalmena du. Zehapenak idatziz jakinaraziko zaizkio langileari; gertakariak, hutsegitearen gradua eta ezarritako zehapena adieraziko dira.

Arau-hauste larriak eta oso larriak lehenbizi langileen ordezkariei jakinaraziko zaizkie eta haien iritziak entzunen ditu enpresak zehapena jarri aitzin. Dena den, zehatzeko ahalmena betiere enpresak izanen du.

Enpresak, egindako hutsegiteen larritasuna eta inguruabarrak kontuan hartuta, gehienez zehapen hauek jartzen ahal ditu:

a) Hutsegite arinak: idatzizko kargu-hartzea.

Gehienez bi eguneko enplegu-soldaten etenaldia.

b) Hutsegite larriak: idatzizko kargu-hartzea.

3 egunetik 15era arteko enplegu-soldaten etenaldia.

c) Hutsegite oso larriak: 16 egunetik 60ra arteko enplegu-soldaten etenaldia.

Lanetik bidaltzea.

41. artikulua. Hutsegiteen preskripzioa.

Graduaren arabera, hutsegite arinak hamar egunen buruan preskribituko dira, larriak hogei egunetan eta oso larriak hirurogei egunetan.

Horiek guztiak enpresak gertaeren berri izaten duenetik eta, betiere, gertatu eta handik sei hilabetera.

42. artikulua. Legezko berrikuspena.

Hitzarmen honetan aurreikusi ez den orotan, Langileen Estatutuan eta aplikatzekoa den gainerako legerian xedatutakoari jarraituko zaio.

43. artikulua. Nafarroako Lan Gatazkak Konpontzeko Auzitegiaren menpe jartzea.

1. Bi aldeek erabaki dute lan hitzarmen hau interpretatu eta aplikatzerakoan sortzen diren liskarrak konpontzeko, adiskidetze eta bitartekotza aldietan, Nafarroako Lan Gatazkak konpontzeko Auzitegiaren iritziaren menpe jarriko direla.

Era berean, beren konpromisoa agertu dute ahaleginak egiteko ukituriko aldeak aipatu auzitegiaren prozedura arbitralaren esanetara jar daitezen.

Artikulu hau, beraz, aldeen atxikimendu espresua da gatazken konponbiderako arbitraje organo horrekiko, eraginkortasun orokor gisa eta, ondorioz, itunak behartzen ditu enpresa, ordezkari sindikalak eta langileak beren desadostasunak epaiketara jo aitzin aipatu organoaren bitartekotza eta adiskidetze prozeduretan azaltzera. Hartaz, ez da nahitaezkoa aldeen desadostasun edo gatazka bakoitzerako atxikimendu espresua eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

2. Era berean, lan hitzarmen honen sinatzaileek hitza eman dute ahaleginak eginen dituztela langileen eta enpresaburuen artean sor daitezkeen banakako gatazkak Nafarroako Lan Gatazkak Konpontzeko Auzitegiaren aurrean Adiskidetze, Bitartekotza eta Arbitraje prozeduren mendean borondatez eta era espresuan jar daitezen, Nafarroako Foru Komunitateko lan gatazkak auzibidetik kanpo ebazteko Lanbide arteko Akordioaren bigarren xedapen gehigarrian adierazten diren gaietan.

LEHENENGO XEDAPEN IRAGANKORRA

Espresuki adostu da ezen hitzarmen honen aplikazio eremuko langileei 2005etiko urtarrilaren 1etik hitzarmena argitaratu arte dagozkien atzerakinak 30 eguneko epean ordaintzen ahal zaizkiela, sektoreko hitzarmen kolektibo hau Nafarroako ALDIZKARI OFIZIALean argitaratzen denetik kontatzen hasita.

AZKEN XEDAPENETAN LEHENA

"Fideltasun plusa" izenekoa ezarri da, hamabi hilabeteko paga bakoitzean kobratuko dena, enpresarekiko fideltasun baldintza jakin batzuk betetzen dituzten langileentzat, era honetan:

2004-1-1etik kontatzen hasita enpresarekin 2 urte eta egun bateko lotura duten langileek kontzeptu honegatik hitzarmeneko tauletan maila bakoitzari dagokion hileko oinarrizko soldataren % 2 kobratuko dute, edo bestela, kontratatua duten lanaldiaren proportziozko partea.

Enpresarekin 3 urte eta egun bateko lotura duten langileek, 2004-1-1etik kontatzen hasita, kontzeptu honegatik hitzarmeneko tauletan maila bakoitzari dagokion hileko oinarrizko soldataren % 4 kobratuko dute, edo bestela, kontratatua duten lanaldiaren proportziozko partea.

Enpresarekin 4 urte eta egun bateko lotura duten langileek, 2004-1-1etik kontatzen hasita, kontzeptu honegatik hitzarmeneko tauletan maila bakoitzari dagokion hileko oinarrizko soldataren % 6 kobratuko dute, edo bestela, kontratatua duten lanaldiaren proportziozko partea.

Portzentaje horiek ez dira metatzen ahal.

Adierazi bezala, edozein modutan ere lotura hori 2004ko urtarrilaren 1ean hasiko da kontatzen, enpresan bakoitzak duen antzinatasuna kontuan hartu gabe; beraz, plus hori ez da inola ere 2006ko urtarrila baino lehen kobratuko.

Ezarritako portzentaje bakoitzean plus hori kobratzeko loturako denbora-tarte guztiak erabat osatu behar dira, hau da, 2 urte eta egun batekoa, 3 urte eta egun batekoa eta 4 urte eta egun batekoa.

1. ERANSKINA

2005-1-1etik 2005-12-31ra arteko lansarien taula (% 4,05) (zenbateko gordinak eurotan)

OINARRIZKO SOLD. APARTEKO PAGA URTEKOA

(12 paga) (2 paga) GUZTIRA

1. taldea 1.380,86 1.380,86 19.332,04

2. taldea 1.259,72 1.259,72 17.636,08

3. taldea 1.065,92 1.065,92 14.922,88

4. taldea 1.065,92 1.065,92 14.922,88

5. taldea 1.017,46 1.017,46 14.244,44

6. taldea 969,02 969,02 13.566,28

Orduko soldata gehi aparteko pagen eta oporren zati proportzionala = Urteko guztirakoa / urteko lanaldia.

Gaueko orduaren prezioa = (oinarrizko soldata x 12 paga x % 25) / urteko lanaldia.

Iragarkiaren kodea: F0516046