I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
ERABAKIA, 2005eko apirilaren 11koa, Nafarroako Gobernuak hartua, 2004ko uztaileko euri jasa handiek eta uholdeek nekazaritzarako azpiegitura publikoetan eragindako kalteak babestekoak direla deklaratu eta laguntzetarako baldintzak ezartzen dituena.
2004ko uztailean Nafarroan izandako ohiz kanpoko ekaitz eta uholdeek kalte larriak ekarri zizkieten Estellerriko hainbat toki entitateren nekazaritzako azpiegiturei.
Martxoaren 15eko 79/1999 Foru Dekretuak xedatzen duenez, nekazaritzan erabiltzen diren azpiegitura publikoetan kalteak gertatzen direnean Nafarroako Gobernuak mugatuko du zein diren zona konkretuak eta zein lagundu beharreko kalte motak. Halaber, eskaerak aurkezteko epea eta laguntzak zein kondiziotan emanen diren ezarriko du. Nafarroako Gobernuari eta lehendakariari buruzko abenduaren 3ko 14/2004 Foru Legeko 12. artikuluan ezarritakoari jarraikiz, inguruabar horiek Erabaki batean bilduko ditu Nafarroako Gobernuak.
Horrenbestez, Nafarroako Gobernuak, Nekazaritza, Abeltzaintza eta Elikadura kontseilariak proposaturik,
ERABAKI DU:
1. Babestu beharreko jarduketak.
Martxoaren 15eko 79/1999 Foru Dekretuaren arabera babestu beharko dira 2004ko uztaileko euri jasa handiek eta uholdeek ondoko udalerri eta kontzejuetako nekazaritzarako azpiegitura publikoetan eragindako kalteak: Allo, Ameskoabarren, Andosilla, Arellano, Arroitz, Aiegi, Deikaztelu, Lizarra, Goñi, Gesalatz (Argiñao, Estenotz, Iruxo, Iturgoien, Izurtzu, Muetz, Muzki, Bidaurre eta Biguria), Ollo, Jaitz, Villatuerta eta Deierri (Arandigoien, Aritzala, Gorozin, Ibiriku, Lakar, Murelu, Murugarren, Errezu, Ugar, Hiriberri, Zabal eta Zurukuain).
2. Dirulaguntzen zenbatekoa.
Azpiegiturak konpontzeko behar diren lan guztietarako Nekazaritza, Abeltzaintza eta Elikadura Departamentuak aintzat hartzen duen kostu errealaren 100eko 50eko dirulaguntza jasoko dute entitate eskatzaileek.
3. Eskabideak noiz eta non aurkeztu.
1. Eskaerak Nekazaritza, Abeltzaintza eta Elikadura Departamentura bidali beharko dira, erabaki honek indarra hartu eta biharamunetik ondoko hogei egun balioduneko epean.
2. 79/1999 Foru Dekretuko 7. artikuluan ezarritako agiriez gain, eskabideari honako hauek ere erantsiko zaizkio:
_Nekazaritzako azpiegitura kaltetuak konpontzeko egin beharreko gastuen zerrenda baloratua.
_Ezbeharra gertatu eta berehala entitateak berak presaz egindako konpontze-lanen fakturak.
4. Eskabideen gaineko ebazpena.
1. Eskabideak aurkeztu eta, gehienez ere, bi hilabeteko epean, Landa Garapenerako zuzendari nagusiak laguntzak eman, edo kasua izanez gero, ukatzeko ebazpena emanen du. Epe hori ebazpenik eman gabe bukatzen bada, eskabidea administrazioaren isiltasunaren bidez ukatu dela ondorioztatzen ahalko da.
2. Laguntza emateko ebazpenean, konponketen kostu errealaren balorazioa egin ondoren, eskaera bakoitzari dagokion laguntza zehaztuko da, bai eta dirulaguntza jasoko duten lehentasunezko konpontze-lanak ere. Gainerakoak entitate onuradunek pagatuko dituzte zuzenean.
5. Lanak egitea.
1. Ezbeharra gertatu eta berehala entitateak berak 2004an presaz egindako konpontze-lanei dirulaguntza emanen zaie, obrak egiteko enpresa esleitua edozein dela ere.
2. Laguntzak emateko ebazpenean lehentasunezko deklaratu diren gainerako lanak Foru Komunitateko Administrazioak eginen ditu,Tragsa enpresa publikoaren bidez, 2005eko abenduaren 31 baino lehen.
6. Laguntzak ordaintzea.
1. 2004an egindako presako konpontze-lanei dagozkien laguntzak onartu eta berehala ordainduko dira, Administrazioak ongi egin direla egiaztatu ondoren.
2. Administrazioak berak Tragsa enpresa publikoaren bidez egiten dituen lanak enpresa horri ordainduko zaizkio zuzenean, obra ziurtagiriak onetsi eta gero.
7. Aurrekontuetako kredituak.
Erabaki hau betearazteko behar diren gastuak, 700.000 euro gehienez, 2005eko ekitaldirako Nekazaritza, Abeltzaintza eta Elikadura Departamentuak dituen gastuen aurrekontuan "ohiz kanpoko uholdeek titulartasun publikoko nekazaritza azpiegituretan eragindako kalteak konpontzeko laguntzak" izeneko 720001-72120-7600-412105 kontusailetik ordainduko dira.
8. Errekurtsoak.
Erabaki honek bide administratiboa agortzen du. Horren aurka, aukeran, errekurtso hauetako bat paratzen ahal da: berraztertzeko errekurtsoa Nafarroako Gobernuari zuzendua, hilabeteko epean, Nafarroako ALDIZKARI OFIZIALean argitaratu eta biharamunetik aurrera, edo administrazioarekiko auzi-errekurtsoa, Nafarroako Auzitegi Nagusiaren Administrazioarekiko Auzien Salari zuzendua, bi hilabeteko epean, Nafarroako ALDIZKARI OFIZIALean argitaratu eta biharamunetik hasita.
Administrazio publikoek, berraztertzeko errekurtsoaren ordez, aurretiko errekerimendua egin dezakete, Administrazioarekiko Auzien Jurisdikzioa arautzen duen uztailaren 13ko 29/1998 Legearen 434. artikuluan ezarritako moduan eta epeetan.
Erabaki honen ondoriozko egintzen aurka gora jotzeko errekurtsoa jar daiteke, Nekazaritza, Abeltzaintza eta Elikadura kontseilariari zuzendua, jakinarazi eta hilabeteko epean. Administrazio publikoek aurretiko errekerimendua egin dezakete aipatu den moduan.
9. Argitara ematea.
Erabaki hau Nafarroako ALDIZKARI OFIZIALean argitaratuko da eta argitaratu eta biharamunetik izanen ditu ondorioak.
Iruñean, 2005eko apirilaren 11n._Lehendakaritza, Justizia eta Barne kontseilaria. Nafarroako Gobernuko idazkaria, Javier Caballero Martínez.
Iragarkiaren kodea: F0510523
