117. ALDIZKARIA - 2005eko irailaren 30a

II. NAFARROAKO TOKI ADMINISTRAZIOA

2.2. AGINTARIAK ETA LANGILEAK

2.2.2. Plantilla Organikoa, Lan Eskaintza Publikoa, oposizioak eta lehiaketak

L I Z A R R A

Deialdia, Lizarrako Udaltzaingoko kabo izateko 2 lanpostu maila igoeraren eta oposizio-lehiaketaren bidez betetzeko

Lizarrako Udaleko alkateak, 2005eko ekainaren 29an emandako 230 zenbakiko Ebazpenaren bidez, Lizarrako Udaltzaingoko kabo izateko 2 lanpostu maila igoeraren eta oposizio-lehiaketaren bidez betetzeko deialdia onetsi da.

O I N A R R I A K

1._Deialdiaren xedea.

1.1. Deialdi honen xedea da Nafarroako Polizia Kidegoetako kideen artean Lizarrako Udaltzaingoko kabo izateko 2 lanpostu betetzea, maila igoeraren bidez eta oposizio-lehiaketa sistema erabiliz. Lanpostuak honela banatuta daude:

_Lanpostu bat barne igoerako txandan, Lizarrako Udaltzaingoko kideentzat (aurrerantzean barne igoera txanda).

_Lanpostu bat igoera txanda irekian, Nafarroako gainerako Polizia Kidegoetako kideentzat (aurrerantzean igoera txanda irekia).

1.2. Hautapen probak gainditzeko eskatzen den gutxieneko puntuaziora ez iristeagatik, bete gabe gelditzen bada igoera txanda irekiko lanpostu hutsen bat, orduan barne igoerako txandakoei gehituko zaie.

Hautapen probak gainditzeko eskatzen den gutxieneko puntuaziora ez iristeagatik, bete gabe gelditzen bada barne igoerako txandako lanpostu hutsen bat, orduan bete gabekotzat joko da eta ez zaie gehituko igoera txanda irekikoei.

1.3. Izendapenarekin batera pertsona izendatu horiek nomina eta plantillako funtzionario bihurtuko dira, funtzionarioen arloan indarrean dauden xedapenetan ezarri diren eskubide eta betebehar guztiekin.

1.4. Lanpostuek C mailako lansariak izanen dituzte, eta aplikatu beharreko xedapenen araberako osagarriak.

1.5. Izangaiak, hautapen probak gainditu eta deialdi honetako lanpostuetan aritzeko izendatu ondoren, Lizarrako Udalaren administrazioan sartu eta funtzionario eginez gero, Gizarte Segurantzaren Araubide Orokorrean afiliatuko dira eta alta emanen zaie, araubide horretan aurreikusitako babesean.

Deialdi honetako lanpostuetarako izendatu eta lehendik eskubide pasiboen eta osasun eta gizarte laguntzaren araubidean, hots, Nafarroako Administrazio Publikoen zerbitzuko Langileen Estatutuan eta gainerako xedapen osagarrietan aipatzen den hartan, afiliatuta dauden funtzionarioek bertan segitzea aukera dezakete edo Gizarte Segurantzan afiliatzea.

1.6. Izendatuek beren destinoko lekuan beharko dute bizi, eta horretarako, Lizarrako udalerrian finkatuko dute beren bizilekua.

2._Izangaien betebeharrak.

2.1. Lehiaketa honetan onartuak izateko, izangaiek baldintza hauek bete beharko dituzte:

a) Barne igoerako txandan:

1._Gutxienez 2 urteko antzinatasuna izatea Lizarrako udaltzain bezala.

2._Abiapuntuko lanpostuan borondatezko edo nahitaezko eszedentzian ez egotea.

b) Igoera txanda irekian:

1._Gutxienez 2 urteko antzinatasuna izatea Nafarroako Polizia Kidego bateko polizia edo agente bezala.

2._Abiapuntuko lanpostuan borondatezko edo nahitaezko eszedentzian ez egotea.

Eskabideak aurkezteko epea bukatzen denean bete beharko dira baldintza horiek.

3._Eskabideak.

3.1. Deialdian parte hartzeko eskabideak aurkeztu beharko dira Lizarrako Udalaren erregistro orokorrean (Sorkude Garbiaren pasealekua, 1, Lizarra), edo Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legearen 38.4 artikuluan ezarritako bideetako bat erabiliz. Horretarako, hogeita hamar egun naturaleko epea izanen da, deialdi hau Nafarroako ALDIZKARI OFIZIALean argitaratu eta biharamunetik hasita. Aipatu eskabideak deialdian argitaratutako ereduari lotuko zaizkio, eta haietan izangaiek adierazi beharko dute eskatzen diren baldintza guztiak betetzen dituztela, eskabideak aurkezteko epearen azken eguna baino lehenago. Eredua Lizarrako Udaleko eta Udaltzaingoko bulegoetan eskura daiteke.

3.2. Eskabidearekin batera ondoko agiriak aurkeztu beharko dira:

a) Nortasun Agiri Nazionalaren bi aldeen fotokopia, behar bezala konpultsatua.

b) Lizarrako udaltzain edo Nafarroako Polizien Kidegoetako polizia edo agente izendatu izana frogatzen duen egiaztagiria; era berean frogatuko da lanpostu horretako antzinatasuna eta egoera administratiboa.

c) Deialdiaren 2. eranskineko baremoaren arabera alegatutako merezimenduen egiaztagiriak.

3.3. Eskabideak aurkezteko epea ezin izanen da luzatu.

4._Onartu eta baztertuen behin-behineko eta behin betiko zerrendak.

4.1. Eskabideak aurkezteko epea bukatutakoan, Lizarrako Udaleko alkateak ebazpena emanen du, onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitaratzeko aginduko du.

Ezarritako epean eskabiderik aurkezten ez bada, Lizarrako Udaleko alkateak lehiaketa eman gabe gelditu dela deklaratzen duen Ebazpena emanen du. Ebazpen hori Nafarroako ALDIZKARI OFIZIALean argitaratu beharko da.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta egindako akatsak zuzentzeko.

4.3. Erreklamazioetarako epea amaitutakoan eta erreklamazioei erantzun ondoren, alkateak ebazpena emanen du onartu eta baztertuen behin betiko zerrenda onesteko, eta Nafarroako ALDIZKARI OFIZIALean argitaratzeko aginduko du.

5._Epaimahaia.

5.1. Epaimahaiko kideak hauek izanen dira:

_Mahaiburua: Lizarrako Udaleko alkatea.

Ordezkoa: Francisco Javier Cabezón Iliberri, Lizarrako Udaleko lehen alkateordea.

_Mahaikidea: Iosu Ganuza Armendáriz jauna, Lizarrako Udaltzaingoko burua.

Ordezkoa: Miguel Angel Remirez, Lizarrako Udaltzaingoko sarjentua.

_Mahaikidea: Jaime San Martín Gil, Lizarrako Udaltzaingoko kaboa.

Ordezkoa: José Cruz Valentín Artiz, Lizarrako Udaltzaingoko kaboa.

_Mahaikidea: langileak ordezkatzen dituzten organoek hautaturiko ordezkari bat.

Ordezkoa: langileak ordezkatzen dituzten organoek hautaturiko ordezkari bat.

_Idazkaria: Lizarrako Udaleko idazkaria.

Ordezkoa: Puy Barbarin Elcarte, Lizarrako Udaleko administrari-ofiziala.

Hauta probak egiten hasi aitzin eratuko da epaimahaia.

5.2. Epaimahaia ezin izanen da eratu, ezta aritu ere, gutxienez ere kideen gehiengo osoa bertan ez bada.

5.3. Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean aipatzen diren abstentzio arrazoietako bat gertatzen denean, epaimahaiko kideek ezin izanen dute epaimahaian parte hartu, eta deialdia egin duen organoari eman beharko diote horren berri.

Izangaiek, halaber, zilegi izanen dute mahaikideak errefusatzea, arrazoi horietako bat gertatzen denean.

5.4. Epaimahaiak gehiengoz erabakiko ditu deialdiaren arauak ulertu eta aplikatzerakoan sor daitezkeen afera guztiak.

5.5. Epaimahaiak aholkulari adituak hartu ahalko ditu, proba guztietarako nahiz batzuetarako. Aholkulari horiek dagozkien espezialitate teknikoetan aritzera mugatuko dira, eta epaimahaiari horietan baizik ez diote lagunduko.

6._Lehiaketa.

6.1. Merezimendu lehiaketa.

Merezimenduetan, honako elementu hauek baloratuko dira, Nafarroako Polizia Kidegoetako Langileen Erregelamendua onesten duen abenduaren 29ko 718/2003 Foru Dekretuko 2. eranskinarekin bat:

a) Administrazio publikoetan egindako zerbitzuak: 35 puntu gehienez.

b) Prestakuntza, irakaskuntza, ikerketa eta bestelako merezimenduak: 25 puntu gehienez.

c) Hizkuntzak jakitea: euskara, frantsesa, ingelesa eta alemana; gehienez ere 20,25 puntua; frantsesa, ingelesa edo alemanagatik, bakoitzagatik gehienez ere 5 puntu emanen dira; euskaragatik, berriz, gehienez ere 5,25 puntu.

d) Sariak: 2,50 puntu gehienez.

Aurreko a) eta b) ataletan alegatu eta egiaztaturiko merezimenduak epaimahaiak kalifikatu eta puntuatuko ditu, deialdi honetako 2. eranskineko baremoaren arabera. Izangaiek beren merezimenduak azaldu behar dituzte lehiaketan parte hartzeko eskabidea aurkezten duten unean, eta frogatu ere une horretan frogatu behar dituzte, agirien bidez. Epaimahaiak ez du inolaz ere kontuan hartuko agiri bidez egiaztatu ez den merezimendurik, eta ez du emanen merezimenduen atal bakoitzarendako adierazitako puntuazioa baino altuagorik.

Lanpostuko errendimenduaren balorazioari eta lehiatzaileek aurkeztu merezimenduei buruzko argibideak eta datu osagarriak eskatu ahalko ditu epaimahaiak.

7._Oposizioaldia.

7.1. Oposizioaldiak honako proba hauek izanen ditu:

a) Ezagupenen gaineko probak.

b) Proba psikoteknikoak.

c) Gaikuntza ikastaroa.

7.2. Ezagupenen gaineko probak: gehienez ere 150 puntu. Ezagutza proben gaitegia 3. eranskinean dago (eranskin horretako edukia eskatuko da, deialdi hau Nafarroako ALDIZKARI OFIZIALean argitaratzen den egunean indarrean den legediaren arabera) eta idatzizko ariketa hauek eginen dira:

a) Proba objektiboa, 3. eranskineko gaitegiari buruz epaimahaiak proposatuko dituen galdera laburrei edo test modukoei erantzun beharko zaie. Probak gehienez ere ordubete iraunen du eta 75 puntu lortu ahalko dira. Baztertu eginen dira 37,5 puntu lortzen ez dituzten izangaiak.

b) Antolaketaren eta/edo esku-hartzearen gaineko kasu bat ebaztea. Proba, gehienez ere, bi ordukoa izanen da eta 75 puntu lortu ahalko dira. Baztertuak izanen dira gutxienez 37,5 puntu lortzen ez dituztenak.

7.3. Proba psikoteknikoak: gehienez ere 70 puntu.

Proba psikoteknikoak hasi aitzin, Psikologia Aplikatuaren Zerbitzuak, Udaltzaingoko Burutzari kontsulta egin ondoren, lanpostuaren profilaren gaineko proposamena igorriko dio Alkatetzari berari. Lizarrako Udaleko alkateak profil hori onetsiko du eta epaimahaiari jakinaraziko dio.

Nafarroako Administrazio Publikoaren Institutuko Psikologia Aplikatuaren Zerbitzuak, egoki diren probak egin ondoren, txosten psikotekniko bat emanen du lehiatzaile bakoitzari buruz. Horretan, norbera deialdiaren xede den lanpostuaren izaera eta ezaugarriei nola egokitzen zaien baloratuko da. Zerbitzu horrek txosten psikoteknikoan izangai bakoitzari ematen dion puntuazioa loteslea izanen da epaimahaiarentzat.

Baztertu eginen dira 35 puntu lortzen ez dituzten izangaiak.

Proba guztiak deialdi bakarrean eginen dira. Bazterturik geldituko dira horietako edozeinetara agertzen ez diren izangaiak.

7.4. Igoerarako prestakuntza ikastaroa gainditzea: 200 puntu.

Proba psikoteknikoak egindakoan, epaimahaiak jendaurrean jarriko du, Lizarrako Udalaren iragarki oholean eta azken probaren tokian, probak gainditu dituzten izangaien behin-behineko zerrenda, lortutako puntuazioa eta txanda adierazita, eta gaikuntza ikastaroa egiteko onartu diren izangaien zerrenda (2 ikasle gehienez).

Nafarroako Segurtasun Eskolak emanen du gaikuntza ikastaroa, gehienez 214 eskola ordukoa; 200 puntuko balorazioa izanen du.

Epaimahaiak gaikuntza ikastaroa egiteko onartutakoen behin-behineko zerrendarekin batera adieraziko du ikastaroa zein toki, egun eta ordutan hasiko den.

Gaikuntza ikastaroa egin bitartean izangaiak zerbitzu berezien egoeran deklaratuko dituzte haien jatorrizko administrazioek, Nafarroako Administrazio Publikoen zerbitzuko Langileen Estatutuaren 24.2 artikuluan ezarritakoaren arabera.

Ikastaroa bukatutakoan, langilea jarduneko egoerara itzuliko da berehala, zerbitzu berezien egoeran deklaratu zenean zuen lanpostura.

Zerbitzu berezien egoeran deklaratzeak ez du aldaketarik sortuko izangaiaren gizarte aurreikuspeneko erregimenean, jatorrizko lanpostuan zuenarekin segituko baitu.

Zerbitzu berezien egoeran deklaratu eta gaikuntza ikastaroa egiteko onartzen diren izangaiek honako lansari hauek jasoko dituzte Lizarrako Udaletik: C mailako hasierako soldatari dagozkionak eta deialdiko lanpostuen berariazko osagarriak, bai eta jatorrizko lanpostuan onarturik dituzten gradua, antzinatasuna eta famili laguntza ere.

Izangaiak gaikuntza ikastaroa uzten badu, egun horretara arte izanen du eskubidea aurreko atalean aipatu lansariak jasotzeko.

Zerbitzu berezien egoera bukatzen denean, aurreko atalean aipaturiko lansarien erregimena izateari utziko zaio, eta ez du eskubiderik ekarriko, ez eskubide pasiborik sortuko, ez eta deialdiko lanpostuaren ondoriozko inolako eskubiderik ere.

Izangaiak Nafarroako Administrazio Publikoaren Institutuko Segurtasun Eskolari atxikiko zaizkio.

Izangaiek hamabost egun naturaleko epea dute, gaikuntza ikastaroan onartu eta baztertu direnen behin-behineko zerrenda argitaratzen denetik hasita, ikastaroak dirauen bitartean zerbitzu berezien egoeran daudela frogatzeko.

Baztertu eginen dira ikastaroa osatzen duten arloetakoren bat gainditzen ez duten izangaiak.

8._Probak gainditzen dituztenen zerrenda eta izendapen proposamena.

8.1. Gaikuntza ikastaroa bukatutakoan, Nafarroako Administrazio Publikoaren Institutuak epaimahaiari igorriko dizkio ikastaroko puntuazioak, bai eta arlo bakoitzeko kalifikazio proposamena eta ikastaroaren azken kalifikazioa ere.

Epaimahaiak izangaien kalifikazioa onetsiko du eta oposizio-lehiaketa gainditzen duten izangaien zerrenda, azken puntuazioaren araberakoa, Lizarrako Udaleko Alkatetzari igorriko dio.

9._Izendapena eta jabetza hartzea.

9.1. Lizarrako Udaleko alkateak Lizarrako Udaltzaingoko kabo izendatuko ditu lehiaketa gainditzen duten izangaiak. Izendapenak Nafarroako ALDIZKARI OFIZIALean argitaratuko dira.

9.2. Izangai izendatuek hamar egun naturaleko epea izanen dute lanpostuaren jabetza hartzeko, izendapena jakinarazten denetik hasita. Aipatu epean, eta ezinbesteko kasuetan izan ezik, jabetza hartzen ez badute, igoerarako eskubidea galduko dute.

10._Errekurtsoak.

Deialdi honen, bere oinarrien edo berau aplikatzeko egintzen aurka, hautara, ondoko errekurtsoetako bat aurkez daiteke:

a) Berraztertzeko errekurtsoa, egintzaren organo egileari zuzendua, hilabeteko epean, jakinarazi edo argitaratu eta biharamunetik hasita.

b) Administrazioarekiko auzi-errekurtsoa, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, errekurtsoa paratzen zaion egintza edo erabakia jakinarazi edo argitaratu eta biharamunetik hasita.

c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurtsoa paratzen zaion egintza edo erabakia jakinarazi edo argitaratzen denetik hasita.

Lizarran, 2005eko irailaren 6an._Alkatea, María José Fernández Aguerri.

I. ERANSKINA

Eskabide eredua

Izena .................................... adinez nagusia, N.A.N. .............. jaioteguna ............. jaioterria .............. probintzia .............. egungo helbidearen herria ............. probintzia ................. kalea .............. zenbakia ....... solairua .......... letra ........ posta kodea ............ etxeko telefonoa ............. laneko telefonoa ................... sakelako telefonoa ........... Zure aitzinean agertu eta adierazten dut:

Lizarrako Udalaren Administrazioaren zerbitzuko Lizarrako Udaltzaingoko kabo izateko 2 lanpostu lehiaketa bidez betetzeko deialdian parte hartzeko onar nazatela eskatzen dudala, honako txanda honetan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an).

Barne igoera txanda, Lizarrako Udaltzaingoko kideendako.

Igoera txanda irekia, Nafarroako gainerako polizia kidegoetako kideendako.

Eskabideak aurkezteko epea bukatzen den egunean eskatzen diren baldintza guztiak betetzen ditudala.

Lizarran, 2005eko ............aren ...(e)an.

(Izenpea)

LIZARRAKO UDALA.

II. ERANSKINA

Merezimenduak baloratzeko baremoa

a) Administrazio publikoetan egindako zerbitzuak: 35 puntu gehienez.

1) Nafarroako Polizia Kidego batean egiazki egindako zerbitzu urte bakoitzeko: 1,50 puntu.

2) Nafarroako Polizia Kidego batean bere maila baino goragoko lanpostuan egindako zerbitzu urte oso bakoitzeko: 1,65 puntu; urtebete baino iraupen txikiagoko aldiengatik proportzioan dagokiena jasoko da.

3) Administrazio Publiko baten bestelako segurtasun indar eta kidegoetan, lanpostu finkoan, emandako zerbitzuak: 0,50 puntu urte bakoitzeko.

4) Edozein administrazio publikotan langile finko gisa polizia kidegoetakoak ez diren lanpostuetan emandako zerbitzuak: 0,25 puntu urte bakoitzeko.

Oharrak:

1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie lehiatzaileei.

2. Lanaldi partzialean egindako zerbitzuen kasuan, behar den zatia kenduko da.

3. Deialdia argitaratu ondoren egindako zerbitzuak ez dira baloratuko.

4. Funtzionarioa zerbitzu berezietan edo eszedentzia berezian egon den edo unitate organiko bateko buru edo zuzendari lanetan aritu den aldietako zerbitzuak, egoera horietan sartzean zuen lanpostuan eman izan balitu bezala kontatuko dira.

b) Prestakuntza, irakaskuntza eta ikerketa eta beste merezimendu batzuk: 25 puntu gehienez.

1) Erakunde edo zentro publikoek eta unibertsitateek antolaturiko prestakuntza ekintzetan parte hartzea: 0,10 puntu kreditu akademiko bakoitzeko edo haren baliokide bakoitzeko (10 ikastordu).

Oharrak:

1. Baloratu beharreko prestakuntza jardueretan, irakastorduen zatikiak hainbanatuko dira.

2. Irakastorduen kopurua agertzen ez duten ziurtagiriei kreditu bateko balorazioa emanen zaie.

3. Ikasturte bateko iraupena agertzen duten ziurtagiriei 12 kredituko balorazioa emanen zaie.

4. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.

2) Biltzar edo jardunaldietan ponentziak edo komunikazioak aurkeztea, beka edo saria jaso duten zientzia edo ikerketa lanak egitea eta aldizkari espezializatuetan lanak argitaratzea: 3 puntu, gehienez ere, epaimahaiak baloratu beharrekoak, lana edo jarduera pertsona bakar batek edo taldean egina den eta biltzarra edo aldizkaria herrirako, eskualderako, naziorako edo nazioartekoa den kontuan hartuz.

3) Sektore publikoan prestakuntza ekintzak antolatu edo/eta horietan irakasle gisa parte hartzea: gehienez ere 2 puntu, epaimahaiak haien iraupenaren arabera baloratu beharrekoak.

4) Titulazio eta espezialitate akademikoak, deialdian eskatutakoak ez direnak: 4 puntu gehienez.

5) Doktore edo lizentziatu gradua, deialdian eskatutako titulazioari buruz: 2 puntu gehienez.

6) Bestelako merezimenduak, epaimahaiak baloratu beharrekoak: besteak beste, hizkuntzak, sektore pribatuan egindako lanak, bekak edo prestakuntza egonaldiak, kontsulta egiteko, aholku emateko, parte hartzeko edo ordezkaritzako organoetan parte hartzea: 4 puntu gehienez.

Oharrak b) atal osorako:

Idatz-zati honetan aipatutako merezimenduak deialdiko lanpostuarekin zerikusia izanez gero soilik baloratuko dira. Inolaz ere ez da baloratuko sarreratako prestakuntza ikastaroa.

c) Hizkuntzak jakitea: 20,5 puntu gehienez.

Hizkuntza Eskola Ofizial batek luzaturiko Gaitasun Agiria edo ofizialki baliokidetzat jotzen den titulua edukitzeagatik aurreko atalean hizkuntza bakoitzerako adierazten den gehieneko puntuazioa emanen da.

Titulurik eduki ezik, Hizkuntza Eskola Ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.

d) Sariak: 2,5 puntu gehienez.

1) Zerbitzu Goraipagarrien plakagatik: 1,25 puntu.

2) Zerbitzu Goraipagarrien Dominagatik: 0,75 puntu.

3) Jendaurreko Esker Onagatik: 0,50 puntu.

4) Esker On pribatuagatik: 0,25 puntu.

III. ERANSKINA

Gai-zerrenda, ezagupenen gaineko probarako

1._1978ko abenduaren 27ko Espainiako Konstituzioaren Atariko eta Lehenengo tituluak.

2._2/1986 Lege Organikoa, martxoaren 13koa, Segurtasun Indar eta Kidegoei buruzkoa.

3._213/2002 Legegintzako Foru Dekretua, urriaren 14koa, Nafarroako Polizia Kidegoei buruzko Foru Legearen Testu Bategina onesten duena.

4._718/2003 Foru Dekretua, abenduaren 29koa, Nafarroako Polizia Kidegoetako Langileen Erregelamendua onesten duena.

5._8/1990 Foru Dekretua, urtarrilaren 25ekoa, Nafarroako Toki Polizien Antolaketari buruzko Esparru Erregelamendua onesten duena.

6._Indarraren erabilera. Suzko armak eta nola erabiltzen dituzten Polizi Kidegoek.

7._Sexu askatasunaren kontrako delituak. Agintaritzaren agenteen kontrako delituak.

8._Trafikoari, Ibilgailu Motordunen Zirkulazioari eta Bide Segurtasunari buruzko Legea. Zirkulazioaren Erregelamendu Orokorra.

9._1/1992 Lege Organikoa, otsailaren 21ekoa, Herritarren Segurtasuna Babesteari buruzkoa.

10._2/1989 Foru Legea, martxoaren 13koa, Ikuskizun Publikoak eta Josteta Jarduerak arautzen dituena.

11._201/2002 eta 202/2002 Foru Dekretuak, irailaren 23koak, Ikuskizun publikoen eta josteta jardueren ordutegi orokorra arautu eta Ikuskizun publikoen eta josteta jardueren katalogoa onetsi eta enpresa eta lokalen erregistroak arautzen dituztenak.

12._Zigor Kodea: I. liburua: Delitu eta hutsegiteen gaineko xedapen orokorrak, pertsona erantzuleak, zigorrak, segurtasun neurriak eta zigor zuzenbideko hutsegiteen gainerako ondorioak. I. titulua: Zigor zuzenbideko arau-haustea; eta II. titulua: delitu eta hutsegiteen erantzule kriminalak. II. liburua: Delituak eta haien zigorrak; IX. titulua: Sorotsi beharra ez betetzea; eta XIX. titulua: Administrazio publikoaren kontrako delituak.

13._Prozedura Kriminalari buruzko Legea: I. liburua: IV. titulua: Delitu eta hutsegiteetatik sortzen diren ekintzen erabilera nori dagokion. II. liburua: I. titulua: Salaketa; III. titulua: Polizia judiziala; V. titulua: Delituaren egiaztapena eta delitugilea bilatzea. VI. titulua: II. kapitulua: Atxiloketa; eta IV. kapitulua: Defentsa eskubidearen erabilera abokatuaren laguntzari dagokionez eta atxilotu eta presoen tratamendua; eta VIII. titulua: Leku itxian sartu eta miatzea, liburu eta paperak miatzea eta idatzizko nahiz telegrafo bidezko posta atxiki eta irekitzea.

14._13/1989 Foru Legea, uztailaren 3koa, Merkataritza ez-egonkorra arautzen duena.

15._10/1991 Foru Legea, martxoaren 16koa, Adin txikikoen edari alkoholdunen kontsumoa prebenitu eta mugatzen duena.

16._135/1989 Foru Dekretua, ekainaren 8koa, Hotsak edo dardarak egiteagatik pertsonei eragozpenak egin ahal dizkieten jarduerek bete beharreko baldintza teknikoak ezartzen dituena.

17._Zehapen prozeduraren erregelamendua, trafikoari, ibilgailu motordunen zirkulazioari eta bide segurtasunari dagokienez.

18._Ibilgailu motordunen zirkulazioari lotutako erantzukizun zibilari eta aseguruari buruzko legea.

19._Lizarrako Udaleko ordenantzak (MUGA, Animalia arriskutsuak, Taxiak, Ibilgailuak espaloietan barna sartu eta eremu publikoko lekua erreserbatzeko lizentziak arautzen dituena).

20._Trafiko istripuak (lehenbiziko eginbeharrak, atestatua, txostena, etab.).

21._Polizia administratiboa, obra lizentzia, bide publikoa okupatzea, etab.

22._Ibilgailu abandonatuak, Udaltzaingoaren esku hartzea.

Iragarkiaren kodea: L0518856