I. NAFARROAKO FORU KOMUNITATEA
Agintariak eta Langileak
EBAZPENA, 2003ko maiatzaren 26koa, Funtzio Publikoaren zuzendari nagusiak emana, Nafarroako Foru Komunitateko Administrazioaren eta haren erakunde autonomoen zerbitzuko Nafarroako Ogasuneko kudeatzaile eta ikertzaile laguntzaileen 13 lanpostu huts lekualdatze lehiaketa bidez betetzeko deialdia onesten duena.
Funtzio Publikoaren zuzendari nagusiak, 2003ko maiatzaren 26ko Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Nafarroako Ogasuneko kudeatzaile eta ikertzaile laguntzaileen 13 lanpostu huts lekualdatze lehiaketa bidez betetzeko deialdia onetsi du, ondoko oinarriei atxikiz:
O I N A R R I A K
1._Xedea.
Deialdia iragartzen da, lekualdatze lehiaketa bidez Nafarroako Ogasuneko kudeatzaile eta ikertzaile laguntzaile izateko 13 lanpostu huts betetzeko. Destinoa Iruñean izanen dute eta plantilla zenbakiak ondoko hauek: 1092, 1097, 1114, 1119, 1120, 1132, 1228, 1229, 1327, 1331, 6760, 6763 eta 6764.
Lanpostu hutsak hautatzeko egintzan, deialdiaren 11. oinarrian aipatzen baita, aurreko lanpostuak, departamentuek egindako barne-mugikortasuneko prozeduretan bete gabe geldituak, organo eskudunek zerbitzuaren beharren arabera sarturiko aldaketengatik bidezko diren lanpostuekin ordezten ahalko dira.
2._Lanpostu hutsen kopurua handitzea.
Deialdi honetako lanpostuen kopurua handitu ahalko da, hutsik daudenak bete arte, epaimahaiak deialdia egin duen organoari lehiatzaileen zerrenda, lorturiko puntuen hurrenkerari jarraikiko zaiona, igortzen dion egunean.
Lehiaketa honetan beteko diren lanpostuak ondokoak izanen dira: deialdian bertan hasieratik eskainiak eta, hala badagokio, aurreko lerroaldeak aipatzen duen gehikuntzaren ondoriozkoak, bai eta lehiaketan beste lanpostu bat lortzen duten lehiatzaileek hutsik uzten dituztenak ere.
Hala ere, ez dira eskainiko lehiaketan lanpostua lortu ondoren lehiatzaileek utzitako lanpostu hutsak, "iraungitzeko" lanpostuak direla-eta, edo titularrek nahiz ordezkoek betetzen ez dituztela-eta, bete beharrekoak ez direnean.
Lehiatzaileren batek lanpostua lehiaketa honetan erdietsi, eta bere lanpostuaren izena deialdiko lanpostuena ez bezalakoa baldin bada, izendapenean izen berria hartuko du lanpostu berriaz jabetzen den unetik. Orobat, dagokionean, lehiaketaren ondorioz hutsik gelditu eta berriz lehiatzaileei eskaintzen zaizkien lanpostuen izena aldatu eginen da.
3._Aplikatu beharreko arauak.
Lekualdatze lehiaketa hau ondoko arauei jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretua, azaroaren 6ko 215/1985 Foru Dekretuaren bidez onetsiriko lanpostuak betetzeari buruzko Erregelamendua, Lehendakaritza, Justizia eta Barne kontseilariak merezimenduen baremoei buruz abuztuaren 12an emaniko 130/1998 Foru Agindua, aplikatzekoak diren gainerako arauak eta deialdiaren oinarriak.
4._Betebeharrak.
Indarra duen araudian xedatutakoaren arabera, lekuz aldatzeko lehiaketa honetan parte hartu ahal izateko, ondoko beharkizunak behar dira bete, eskabideak aurkezteko epearen azken egunean eta lanpostuaz jabetzerakoan:
a) Nafarroako Foru Komunitateko edo haren erakunde autonomoetako langile finkoa izatea eta jardunean, zerbitzu berezietan edo eszedentzia berezian egotea.
b) B maila edo taldekoa izatea.
c) Nafarroako Ogasuneko kudeatzaile eta ikertzaile laguntzailearen lanpostu baterako izendatu izana.
Zerbitzu, atal, bulego edo unitate parekaturen bateko burutzaren bat betetzen ari diren funtzionarioek, zilegi dute lekualdatze lehiaketan beren oinarrizko lanpostutik parte hartzea.
Lanpostu erreserbarik gabe borondatezko eszedentzian edo nahitaezko eszedentzian dauden funtzionarioek zilegi izanen dute, halaber, lehiaketan parte hartzea, baldin eta deialdiak eskatzen dituen beharkizunak betetzen badituzte; horrela, berriz sartuko dira jarduneko zerbitzuan eta lanpostu bat behin betiko adjudikatuko zaie.
Abuztuaren 30eko 251/1993 Legegintzako Foru Dekretuaren zortzigarren xedapen gehigarrian xedatutakoari jarraikiz, deialdiaren baldintzak betetzen dituzten Parlamentuko funtzionarioek ere parte hartzen ahalko dute lekualdatze lehiaketa honetan.
Lehiaketa honetan parte hartzeak ez du ekarriko parte hartu aurretik lehiatzaileek zuten araubide juridikoa aldatzea.
5._Lansariak.
Lekuz aldatzen diren langileek indarra duten xedapenek esleitzen dieten soldata jasoko dute.
6._Eskabidea aurkezteko epea eta tokia.
a) Deialdian parte hartzeko eskabideak Nafarroako Gobernuko Erregistro Orokorrean (Karlos III.a etorbidea, 2, Iruña) aurkeztu beharko dira edo Administrazio Publikoen Araubide Juridikoari eta Guztientzako Administrazio Prozedurari buruzko azaroaren 20ko 30/1992 Legeko 38.4 artikuluan aurreikusitako bideetako edozeinetatik, deialdia Nafarroako ALDIZKARI OFIZIALean argitaratu eta biharamunetik hamabost egun naturaleko epean. Aipatu eskabideak deialdian argitaratutako ereduari lotuko zaizkio. Nafarroako Gobernuaren Argibide Bulegoan (Karlos III.a etorbidea, 2, ataria), edo interneteko helbidean, deialdia argitaratu zen aldizkari ofizialetik abiatuta, eskuratzen ahalko dira, eta haietan izangaiek adierazi beharko dute eskatzen diren baldintza guztiak betetzen dituztela, eskabideak aurkezteko epearen azken eguna baino lehenago.
Eskabideak aurkezteko epea luzaezina izanen da.
b) Eskabidearekin batera, deialdi honetan ezarritako baremoaren arabera alegatzen diren merezimendu guztien egiaztagiriak aurkeztuko dituzte, behar bezala kautotuak, salbu eta Administrazio Publikoetan emandako zerbitzuen egiaztagiriak, horiek zuzenean igorriko baitizkio Epaimahaiari deialdia egin duen organoak.
7._Onartuen behin-behineko zerrenda, erreklamazioak eta behin betiko zerrenda.
Eskabideak aurkezteko epea amaiturik, Funtzio Publikoaren zuzendari nagusiak onartu eta baztertuen behin-behineko zerrenda onetsiko du eta Nafarroako ALDIZKARI OFIZIALean argitara dadila aginduko, ohartaraziz, hurrengo bost egun naturaleko epean baztertuek erreklamazioak egin ditzaketela eta, akatsik baldin badago, haiek zuzendu.
Ezarritako epean eskabiderik aurkezten ez bada, Funtzio Publikoaren zuzendari nagusiak lehiaketa bete gabe gelditu dela deklaratzeko ebazpena emanen du. Ebazpen hori Nafarroako ALDIZKARI OFIZIALean argitaratu beharko da.
Lehiatzaile bat ere baztertu ez bada, behin betiko zerrenda zuzenean onetsiko da eta Nafarroako ALDIZKARI OFIZIALean argitaratuko.
Erreklamazioak egiteko epea bukatu eta haiek ebatzitakoan, Funtzio Publikoaren zuzendari nagusiak ebazpena emanen du onartu eta baztertuen behin betiko zerrenda onesteko, eta Nafarroako ALDIZKARI OFIZIALean argitaratzeko aginduko du.
8._Epaimahaiaren osaera.
Epaimahaia honako hauek osatuko dute:
_Mahaiburua: Nafarroako Zerga Ogasuneko zuzendari kudeatzailea.
Ordezkoa: José Ignacio Pérez de Albéniz Andueza jauna, Zuzeneko Tributuen eta Enpresa Handien Zerbitzuko zuzendaria.
_Mahaikideak:
1. Nafarroako Foru Komunitateko Langileen Batzordeko ordezkari bat, batzordeak izendatua.
Ordezkoa: Nafarroako Foru Komunitateko Langileen Batzordeko ordezkari bat, batzordeak izendatua.
2. Zuberoa Baines Gracia andrea, Nafarroako Ogasuneko kudeatzaile eta ikertzaile laguntzailea, idazkari lanetan arituko dena.
Ordezkoa: Isidoro Alonso Sánchez jauna, Nafarroako Ogasuneko kudeatzaile eta ikertzaile laguntzailea.
9._Merezimenduen kalifikazioa.
Epaimahaiak eranskin gisa ageri den baremoaren arabera kalifikatu eta puntuatuko ditu izangaiek alegatu eta frogatutako merezimenduak.
Merezimendu guztiak, salbu eta Administrazio Publikoetan egindako zerbitzuenak, agiri bidez alegatu eta frogatuko ditu lehiatzaile bakoitzak lekualdatze lehiaketa honetan parte hartzeko eskabidea aurkeztean. Agiriak behar bezala kautoturik aurkeztu behar dira.
Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzean aipatutako gehieneko puntuazioa baino altuagorik eman ere.
Lehiatzaileek lehiaketan guztira lortzen dituzten puntuetan berdinketarik bada, administrazio publikoen zerbitzuan antzinatasunik handiena dutenen alde joko da. Hala ere berdinduta badaude, lehiatzaile zaharrenari emanen zaio lehentasuna.
Epaimahaiak azalpenak eta datu osagarriak eskatzen ahalko ditu, lehiatzaileek alegatu eta frogaturiko merezimenduen gainean.
Merezimenduen kalifikazioa bukatu ondoren, Epaimahaiak argitara emanen du Nafarroako Gobernuko Iragarki Oholean lehiatzaile bakoitzak lortutako puntuazioa eta bost eguneko epea emanen dio merezimenduen balorazioaren gainean eskubideko jotzen duen guztia alega dezan.
10._Izangaien zerrenda, erdietsitako puntuazioaren araberakoa.
Behin aurkeztutako erreklamazioak ebatzi ondoren, Epaimahaiak behin betiko puntuazioak argitaratuko ditu Nafarroako Gobernuaren iragarki oholean, eta lehiatzaileen zerrenda, lortutako puntuazioaren arabera ordenaturik, Funtzio Publikoaren zuzendari nagusiari igorriko dio espediente osoarekin batera, behar den ebazpena eman dezan, hasieran deitutako lanpostuen kopurua handitzeari dagokionez.
11._Lanpostu hutsak hautatzea.
Lehiatzaileek lehiaketan lortutako puntuazioaren arabera aukeratzen ahalko dituzte lanpostu hutsak, Funtzio Publikoaren Zuzendaritza Nagusiak antolatuko duen ekitaldi batean.
Behar bezala arrazoituriko ezinbesteko kasuetan salbu, aipatu epean lanpostua hartzen ez duten lehiatzaileek lehiaketaren xedea diren lanpostu hutsak betetzeko eskubide guztiak galduko dituzte.
12._Esleipena eta lanpostuaren jabetza hartzea.
Funtzio Publikoaren zuzendari nagusiak, ebazpen bidez, lanpostua esleituko die proposatutako lehiatzaileei, eta hori Nafarroako ALDIZKARI OFIZIALean argitara dadila aginduko du.
Lehiatzaileek adjudikazioari buruzko ebazpena jakinarazi eta hamar egun naturaleko epean jabetu beharko dute lanpostuaz, non eta deialdia egin duen organoak jabetza hartzeko beste data bat ezartzen ez duen ebazpen horretan.
Zerbitzuko zuzendaritza edo atal, bulego nahiz unitate parekaturen bateko burutza batean diharduten funtzionarioek ez dute eragozpenik izanen beren zuzendaritzan edo burutzan jarraitzeko, nahiz eta beste lanpostu oinarrizko bat esleitu eta hartaz jabetu.
13._Aurkeztutako agiriak.
13.1. Izangaiek aurkezturiko agiriak berreskuratu ahalko dituzte, erreklamaziorik edo errekurtsorik paratu ez bada, espresuki hala eskatu eta gero. Agiriak eramateko eskaera hiru hilabeteko epean aurkeztu ahalko da, lanpostuak esleitzeko ebazpena Nafarroako ALDIZKARI OFIZIALean argitaratu eta beste hiru hilabeteren buruan.
13.2. Aurreko atalean ezarririko epea agiriak eraman gabe bukatzen bada, ulertuko da lehiatzaileak uko egin diola agiriak eskuratzeari, horretarako eskubidea galduko du eta agiriak suntsituko dira.
13.3. Erreklamazio edo errekurtsoren bat aurkeztu baldin bada, aurkezturiko agiriak gorde eginen dira, ikuskatu eta aztertzeko. Erreklamazio edo helegitearen tramitazioak ahalbidetzen duenean eraman ahalko dira agiriak.
14._Helegiteak.
Deialdi honen eta oinarri hauen eta ondoko egintzen aurka gora jotzeko helegitea aurkezten ahal da, Nafarroako Gobernuari zuzendua, hilabeteko epean, helegindako egintza argitaratu edo jakinarazten denetik hasita, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legeko 114 eta 115. artikuluetan eta hura aldatzen duen urtarrilaren 13ko 4/1999 Legean xedaturikoarekin bat.
Iruñean, bi mila eta hiruko maiatzaren hogeita seian._Funtzio Publikoaren zuzendari nagusia, Ignacio Bandrés Urriza.
I. ERANSKINA
Eskabide eredua
................ izateko ....... lanpostu lekualdatze lehiaketa bidez betetzeko deialdian parte hartzeko eskabidea. Deialdia ........zk.ko Nafarroako ALDIZKARI OFIZIALean argitaratu zen, ...(e)ko .....aren .....(e)an.
1._Norberaren datuak:
Izen-deiturak:
Jaiotze eguna eta tokia.
N.A.N.:
Helbidea: ......................................... P.K.
Etxeko telefonoa: ....................... Laneko telefonoa:
2._Datu administratiboak:
a) Egoera administratiboa:
Zer lanpostutarako izendatu zuten:
f Nafarroako Foru Komunitatearen Administrazioko funtzionarioa.
f Estatutik Nafarroako Foru Komunitatera transferitutako funtzionarioa.
f Gizarte Segurantzatik Nafarroako Foru Komunitatera transferitutako estatutupeko langilea.
f Lan-kontratudun finkoa.
f Nafarroako Parlamentuko funtzionarioa.
f Jardunean.
f Zerbitzu berezietan.
f Eszedentzia berezian.
f Borondatezko eszedentzian.
f Nahitaezko eszedentzian.
(X batez markatu dagokion kontzeptua).
b) Gaur eguneko destinoa:
Lanpostua:
Jabetza hartzearen eguna:
Departamentua:
Zerbitzua:
Atala:
Bulegoa:
Erakunde autonomoa:
c) Zein maila edo taldetakoa den:
3._Sinatzaileak adierazten du eskabideak aurkezteko azken egunean eskaturiko baldintza guztiak betetzen dituela.
4._Eskabideari eransten zaizkion merezimendu alegatuen frogagiriak.
5._f Adierazten du euskararen gaitasuna frogatzeko proba egin nahi duela*
Horrenbestez,
Eskatzen du deialdian onar dezatela, eskabide honetan dioen bezala.
Iruñean, 200..(e)ko .............aren ............(e)an.
(Sinadura)
(*) Bidezkoa bada, besterik ez.
II. ERANSKINA
Merezimenduak baloratzeko baremoa
a) Administrazio publikoetan egindako zerbitzuak.
Administrazio publikoetan emandako zerbitzuen balorazioa egiteko, puntu 1 emanen zaio urteko, deialdia argitaratzen den egunean onetsitako antzinatasunari.
Oharrak:
1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie izangaiei.
2. Honako a) atal honi dagokion puntuazioa gehienez ere 30 puntu izanen da.
b) Prestakuntza, irakaskuntza eta ikerketa.
1) Erakunde edo zentro publikoek eta Unibertsitateek antolaturiko prestakuntza ekintzetan parte hartzea: 0,10 puntu kreditu akademiko edo haren baliokide (10 ikastordu) bakoitzeko; gehienez ere, 7 puntu.
Oharrak:
1. Baloratu beharreko ikastaroetan, ikastorduen zatikiak proportzionalki kalkulatuko dira.
2. Ikastorduen kopurua agertzen ez duten ziurtagiriei kreditu bateko balorazioa emanen zaie.
3. Ikasturte bateko iraupena agertzen duten ziurtagiriei 12 kredituko balorazioa emanen zaie.
4. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.
2) Biltzar edo jardunaldietan ponentziak edo komunikazioak aurkeztea, beka edo saria jaso duten zientzia edo ikerketa lanak egitea eta aldizkari espezializatuetan lanak argitaratzea: 2 puntu, gehienez ere, epaimahaiak baloratu beharrekoak, lana edo jarduera bakarka edo taldean egina den eta biltzarrak edo argitalpenak herri, eskualde, nazio edo nazioarteko maila duen kontuan hartuz.
3) Sektore publikoan prestakuntza ekintzak antolatu edo/eta horietan irakasle gisa parte hartzea: gehienez ere, puntu 1. Epaimahaiak baloratuko du haien iraupenaren arabera.
Oharrak b) atal osorako:
1. Atal honetan aipatutako merezimenduak deialdiko lanpostuarekin zerikusia izanez gero soilik baloratuko dira.
2. Honako b) atal honi dagokion puntuazioa gehienez ere 10 puntukoa izanen da.
Puntuazio erantsia hizkuntzak jakiteagatik.
_Frantsesa, ingelesa edo alemana jakiteagatik, Europar Batasuneko hizkuntza ofizialak diren aldetik, hizkuntza horietako bakoitzeko 2 puntu gehienez.
Ondorio horietarako, hizkuntza eskola ofizial batek luzaturiko gaitasun agiria edo ofizialki baliokidea den titulua edukitzeagatik aurreko ataletan adierazten den gehieneko puntuazioa emanen da.
Halako titulaziorik ez dutenei, hizkuntza eskola ofizialen batean gainditutako maila bakoitzagatik guztira gehienez eman daitekeen puntuazioaren bostena emanen zaie.
Iragarkiaren kodea: A0305632
