Iragarkia

95. ALDIZKARIA - 2002ko abuztuaren 7a

III. NAFARROAKO TOKI ADMINISTRAZIOA

B A R A Ñ A I N

Barañaingo udaltzain izateko bi lanpostu betetzeko deialdia

Gobernu Batzordeak aurtengo otsailaren 27an hartu erabakiaren bitartez, Barañaingo udaltzain izateko bi lanpostu betetzeko deialdia eta baldintzak onetsi ziren, oinarri hauekin bat.

Barañainen, bi mila eta biko ekainaren hamaikan. Alkatea, Joaquín Olloqui Osés.

BARAÑAINGO UDALTZAIN IZATEKO BI LANPOSTU BETETZEKO DEIALDIA

1. oinarria.-Arau orokorrak.

1.1. Barañaingo udaltzain izateko bi lanpostu betetzea da deialdi honen xedea.

1.2. Deialdi hau dela medio izendatzen diren izangaiak Barañaingo Udaleko funtzionario publiko eta udaltzain izanen dira. Gizarte Segurantzako Araubide Orokorrean izena eman eta bertan kidetzeaz gain erregimen horren babespean geldituko dira. Otsailaren 13ko 1/1987 Foru Legean eta hori garatzen duten arauetan ezarritako eginkizunak, eskubideak eta betebeharrak izanen dituzte. Deialdi honen helburu diren lanpostuak betetzeko izendatuko diren funtzionarioek, dagoeneko Nafarroako Administrazio Publikoen zerbitzuko Langileen Estatutuak eta gainontzeko xedapen gehigarriek jasotzen dituzten eskubide pasiboen eta osasun zein gizarte-laguntzaren erregimenera afiliatuta baldin badaude, honetan segitzeko nahiz Gizarte Segurantzakora afiliatzeko aukera izanen dute.

1.3. Izendatuek aipatu Foru Legean ezarritakoetatik, C maila izanen dute.

1.4. Izendatuek organo eskudunek haien gain utzitako eginkizunak beteko dituzte, Udaltzaingoari dagozkionak badira.

1.5. Lanaldi sistema zerbitzuaren beharretara egokituko da.

1.6. Izendatuek beren destinoan bertan beharko dute bizi, eta horretarako, Barañaingo udalerrian finkatuko dute beren helbidea.

1.7. Lanpostu hutsak honela banatuko dira: lehena txanda irekirako izanen da, eta bigarrena, txanda murrizturako.

1.8. Hautapen probak gainditzeko eskatzen den gutxieneko puntuaziora ez iristeagatik, bete gabe gelditzen diren txanda murriztuko lanpostu hutsak txanda irekikoei gehituko zaizkie.

Orobat, igoera txandan, lanpostu hutsak baino gehiago badira probak gainditzen dituzten izangaiak, lanpostu gabe gelditutakoek txanda irekiko izangaiekin lehiatuko dira, zein bere azken puntuazioarekin.

2. oinarria.-Izangaiek bete beharreko baldintzak.

2.1. Oposizio honetara onartuak izateko, izangaiek beharkizun hauek bete beharko dituzte:

a) Nazionalitatez espainiarra izatea.

b) Adinez nagusia izatea eta 35 urte baino gehiago ez izatea.

c) Batxiler titulua, Lanbide Heziketako bigarren mailakoa edo baliokideren bat izatea.

d) Beren egitekoa betetzeko behar diren gaitasun fisiko eta psikikoak izatea, eta deialdiaren 3. eranskinean ageri diren bazterbide medikorik ez izatea.

e) Gizasemeek 1,70 metroko altuera bederen izatea eta emakumezkoek 1,65 metrokoa.

f) Eginkizun publikoetan aritzeko desgaitua edo gabetua ez egotea eta inongo Administrazio Publikoren zerbitzutik baztertua ez izatea.

g) Ibilgailuak gidatzeko B.T.P. eta A motako baimenak izatea.

2.2. Nafarroako Administrazio Publikoen Zerbitzuko Langileen Estatutuko 15. artikuluarekin bat (abuztuaren 30eko 251/1993 Legegintzako Foru Dekretua), igoera txandako lanpostu hutsa eskuratzeko aurkezten ahalko dira honako baldintza hauek betetzen dituzten funtzionarioak:

a) Deialdiko lanpostu hutsen maila berekoa edo beheragokoa izatea.

b) Deialdian eskatzen den titulazioa edukitzea eta Administrazio Publikoetan 5 urteko antzinatasun onartua izatea. Otsailaren 13ko 1/1987 Foru Legeko 39. artikuluan xedatuarekin bat (uztailaren 5eko 19/2001 Foru Legean emandako testuaren arabera), Nafarroako polizia kidegoetako funtzionarioek benetan zortzi urtetan zerbitzuak eman dituztela frogatuko dute.

c) Borondatezko eszedentzian edo nahitaezko eszedentzian ez egotea.

d) letran adierazitako baldintzen ordez, nahikoa izanen da Administrazio Publikoetan zortzi urteko antzinatasun onartua frogatzea.

2.3. Aurreko baldintzak eskabideak aurkezteko epea akitzen denerako bete beharko dira, g) letrako baldintza salbu, oinarrizko prestakuntzaren ikastarorako izangaien behin-behineko zerrenda jendaurrera ateratzen denerako bete beharko baita, deialdi honen 5.2.3 oinarrian ezartzen den bezala.

3. oinarria.-Eskabideak.

3.1. Deialdian parte hartu ahal izateko eskabideak Barañaingo Udalaren erregistro orokorrean beharko dira aurkeztu, deialdi hau Nafarroako ALDIZKARI OFIZIALean argitaratu eta biharamunetik aitzina, hogeita hamar egun naturaleko epean, azken eguneko, egun balioduna bada, edo hala den hurrengoko 14:00ak arte. Eskabide horiek deialdi honetan argitaratzen den ereduari beharko zaizkio lotu. Ereduak Barañaingo Udaleko bulego orokorretan eskura egonen dira. Haietan, eskabideak aurkezteko epearen azken egunerako oposizioan parte hartzeko eskatu baldintza guzti-guztiak betetzen dituztela adierazi beharko dute.

3.2. Eskabidearekin batera osasun ziurtagiri ofiziala beharko dute aurkeztu, izangaia 1. eranskinean ageri diren proba fisikoak egiteko gai dela dioena, eta izen-emate eskubideetarako 6,55 euro ordaindu izanaren frogagiria.

3.3. Eskabideak aurkezteko epea luzaezina da.

4. oinarria.-Izangaien onarpena eta erreklamazioak.

4.1. Eskabideak aurkezteko epea akiturik, alkate jaunak ebazpena emanen du, onartu eta baztertuen behin-behineko zerrenda onesten duena, eta Nafarroako ALDIZKARI OFIZIALean argitara dadin aginduko.

4.2. Izangai baztertuek, Nafarroako ALDIZKARI OFIZIALean argitalpen horren ondoko hamar egun baliodunen barrenean, erreklamazioak egiten ahalko dituzte edo egindako akatsak zuzendu.

4.3. Erreklamazio epea iraganik eta behin horiek ebatzita direla, alkate jaunak, onartu eta baztertuen behin betiko zerrenda onesten duen ebazpena emanen du eta Nafarroako ALDIZKARI OFIZIALean argitara dadin aginduko.

5. oinarria.-Oposizioa nola eginen.

5.1. Onartu eta baztertuen behin betiko zerrenda onesten duen ebazpen berean finkatuko da zein toki, egun eta ordutan hasiko diren oposizioaren ariketak. Lehenengotik aurrerako probetarako iragarkiak, azkeneko proba non egin, hantxe adieraziko da, baita Udaletxeko iragarki oholean, 48 ordu lehenagotik.

Bi txandetako probak, hala murriztukoak nola irekikoak, egun eta ordu beretan eginen dira.

5.2. Oposizioak fase hauek izanen ditu:

5.2.1. Hautapen fasea, proba hauekin:

Altueraren neurketa:

Probak hasi baino lehenago, izangaien altuera neurtuko da, 2.1.e) oinarriko baldintza frogatzeko.

a) Lehen proba.

1. eranskinean ageri diren ariketa fisikoak egin beharko dira, eta haietako bakoitzak balioko du jendea baztertu eta puntuatzeko, egiten den markaren arabera. Epaimahaiak finkatzen duen ordenan eginen dira ariketak.

Edozein izangai antidoping kontrola egitera behartuta egonen da, ariketak egin bitartean edo beste edozein unetan, epaimahaiak hala eskatuz gero. Praktika debekatuak atzeman edo egiaztatzeko analisiak, dagokion organo espezializatuak eginen ditu. Horretarako, debekatuta egonen dira galarazitako substantzia eta talde farmakologikoei eta kirolean arauz kanpokoak diren doping metodoei buruz Kiroletako Kontseilu Gorenak emandako 1996ko urtarrilaren 25eko Ebazpenaren eranskinean (1996ko otsailaren 8ko 34. Estatuko Aldizkari Ofizialean argitaratua) heldu diren substantziak, talde farmakologikoak, doping metodoak eta manipulazioak. Baztertuta geldituko dira kontrol horretan positibo ematen duten izangaiak.

b) Bigarren proba.

Honelakoa izanen da:

1. Idatzizko ariketak eginen dira deialdi honen 2. eranskineko gaiei buruz (legeria eta erakundeak). Zozketaz aukeratutako gaiak azaldu beharko dira, edo test moduko galderei erantzun edo bi gauzak batera, epaimahaiak zer erabaki.

2. Matematika, Fisika edo Kimikako hamar problema egitea. Horretarako, aski izanen dira Batxilergoko edo horren pareko mailako ezagupenak.

3. Ortografia eta idazketa ariketa bat.

c) Hirugarren proba.

Zenbait ariketa psikotekniko egin beharko da, izangaiak lanpostuaren eskakizunei zenbateraino egokitzen zaizkien zehazteko. Proba hori Nafarroako Gobernuko Psikologia Aplikatuaren Institutuaren laguntzaz eginen da.

5.2.2. Hautapen faseko proba guztiak dei bakarraren bidez eginen dira, eta bazterturik geldituko dira esaten den egun, ordu eta tokietan agertzen ez diren izangaiak, arrazoia edozein delarik ere.

Salbuespenez, eta altuera neurtzeko proba, proba fisiko eta psikoteknikoetarako, interesatuek hala eskatzen badute, deietan aurreikusitako ordena aldatzen ahalko da.

5.2.3. Oinarrizko Prestakuntza Ikastaroa.

NAPIren menpeko Segurtasun Eskolak emanen du Oinarrizko Prestakuntzaren Ikastaroa.

Hautapen fasea gainditu ondotik, epaimahaiak argitara emanen du ikastaroan behin-behinekoz onartutako izangaien zerrenda, lortzen duten puntuazioaren arabera ordenatua, eta kopurua ez da 2 ikaslerena, hots, deialdiko lanposturena, baino handiagoa izanen. Prestakuntza ikastarora onartzen ez diren gainerako izangaiak baztertuta geldituko dira.

Prestakuntza Ikastaroan parte hartu ahal izateko, izangai onartuen behin-behineko zerrenda jendaurrean jartzen denetik hamabortz egun naturaleko epean, izangaiek frogatu egin beharko dute eskabideak aurkezteko epea akitzen den egunerako 2.1 oinarriaren a), b), c) eta f) baldintzak betetzen dituztela eta Oinarrizko Prestakuntza Ikastaroan behin-behinekoz onarturiko izangaien zerrenda argitaratzen denean, oinarri hartako g) baldintza betetzen dutela. Horretarako dokumentazio hau aurkeztuko dute:

-Jaiotze aktaren ziurtagiria, Erregistro Zibilak luzatua, edo nortasun agiri nazionalaren fotokopia konpultsatua.

-Lanbide Heziketako 2. mailako titulua edo baliokideren bat.

-B.T.P. eta A motako gidatzeko baimenaren fotokopia konpultsatua.

-Zinpeko aitorpena, eginkizun publikoetan aritzeko ezgaitua edo gabetua ez dagoela eta inongo Administrazio Publikoren zerbitzutik baztertua izan ez dela dioena.

Epaimahaiak izangai horien osasun azterketa egiteko agindua emanen du, 3. eranskinean zehaztutako gaitasun fisikoa frogatzeko. Udalak erabakiko du zein erakundek eginen duen osasun azterketa hori, eta horren bidez adieraziko da izangaia gai oten den deialdiko lanpostua betetzeko.

Aipatu tramiteak eginik, epaimahaiak argitara emanen du Prestakuntza Ikastarora onartutako izangaien behin betiko zerrenda. Behin-behinekoz onartutako izangairen batek ez badu eskatzen zaion dokumentazioa aurkezten edo osasun azterketa gainditzen, probak gainditu eta puntuazio handiena duen izangaiarekin ordeztuko da behin betiko zerrendan, bere dokumentazioa bete eta osasun azterketa iragan ondoren.

Ikastaroa gainditu egin beharko da eta gutxienez bederatzi hilabete iraunen du. Ikasgai teoriko eta praktikoak izanen ditu, eta azken horiek hiru hilabete bederen iraunen dute.

Ikastaroak iraun bitartean, izangaiak Barañaingo Udalaren zerbitzuko praktikako funtzionarioak izanen dira, eta Barañaingo Udaleko funtzionarioen enplegu baldintzei buruzko erabakian ezarritako lansariak jasoko dituzte.

Epaimahaiak Oinarrizko Prestakuntza Ikastarotik baztertu ahalko du edozein ikasle, ikastarora ez joateagatik, diziplina, errespeto, aprobetxamendu eta puntualitate faltagatik; baita ikastaroko barne araubideko arauak (deialdi honen eranskinetako batean baitaude) eta horietan egiten den edozein aldaketa ez betetzeagatik ere.

Ikastarotik baztertua izanez gero, deialdian segitzeko eskubidea galduko da, eta beka ere galduko da, egotzia izan eta une berean.

6. oinarria.-Proben balorazioa.

6.1. Lehen probako ariketa bakoitza "gai" edo "ez gai" kalifikatuko da.

I. eranskineko edozein ariketatan "ez gai" kalifikazioa duten izangaiak baztertu eginen dira.

6.2. Bigarren probako azterketak honela kalifikatuko dira:

-II. eranskineko gaiei buruzko azterketa 0 eta 50 artean kalifikatuko da.

-Matematika, fisika edo kimikari buruzko azterketa, 0 eta 25 artean kalifikatuko da.

-Ortografia eta/edo idazketari buruzko azterketa ere 0 eta 25 artean kalifikatuko da.

Baztertuak izanen dira bigarren probako ariketa bakoitzean puntuazioaren erdia lortzen ez duten izangaiak.

6.3. Hautapen faseko hirugarren probako ariketa psikoteknikoei 0tik 70 puntura bitarteko kalifikazioa emanen zaie, betiere egindako txosten teknikoari jarraikiz.

"Ez gai" deklaratuko dira eta hortaz, deialditik baztertuko, gutxienez ere 35 puntu lortzen ez duten izangaiak.

6.4. Gaiak landu behar badira, epaimahaikide bakoitzak bere aldetik emanen du kalifikazioa eta ariketaren puntuazio osoa kalifikazio guztien banazbertzeko aritmetikoa izanen da.

Epaimahaikideek emandako gehieneko eta gutxieneko puntuazioen artean, ariketaren baldintzetan aurreikusi puntuazioaren % 30 baino tarte handiagoa badago, bi muturretako puntuazioak alde batera utziko dira; gainerako puntuazioak erabiliko dira banazbertzeko aritmetikoa ateratzeko.

6.5. Prestakuntza Ikastaroak "gai" edo "ez gai" kalifikazioa izanen du. "Ez gai" kalifikazioa eskuratzen duen izangaia baztertuta geldituko da deialditik.

6.6. Izangai bakoitzaren azken kalifikazioa hautapen faseko puntuazioak batuz ateratzen dena izanen da.

7. oinarria.-Epaimahaiaren osaketa, eraketa eta jarduketa.

7.1. Kide hauek osatuko dute epaimahaia:

Mahaiburua: Barañaingo alkatea.