I. NAFARROAKO FORU KOMUNITATEA
Agintariak eta Langileak
11/2002 FORU AGINDUA, urtarrilaren 25ekoa, Hezkuntza eta Kultura kontseilariak emana, Hezkuntza Sistemaren Antolamendu Orokorrari buruzko Lege Organikoko bederatzigarren xedapen iragankorrarekin bat, aldez aurretik nahita erretiratzeko 2002an aurkezturiko eskabideei uko egiteko epea ezartzen duena.
Hezkuntza Sistemaren Antolamendu Orokorrari buruzko bederatzigarren xedapen iragankorreko lehenengo idatz-zatiak xedatzen du, Lege horretako hamargarren xedapen gehigarriko 1 idatz-zatian eta hamalaugarren xedapen gehigarriko 1, 2 eta 3 idatz-zatietan aipatzen diren irakasle kidegoetako funtzionarioek, Estatuko klase pasiboen araubidea aplikatzeko eremuan sarturik badaude, 1991tik 1996ra bitarte, biak barne, nahita erretiratzeko araubidea aukeratzen ahalko dutela, baldintza batzuk biltzen badituzte.
Gero, ikastetxeetako partaidetza, ebaluazio eta gobernuari buruzko azaroaren 20ko 9/1995 Lege Organikoko lehen xedapen iragankorrak ezartzen du, Hezkuntza Sistemaren Antolamendu Orokorrari buruzko bederatzigarren xedapen iragankorrak aipatzen dituen irakasle kidegoetako funtzionarioek nahita erretiratzeko araubidea aukeratzen ahalko dutela, xedapen horretan eta hori osatzen eta garatzen duten arauetan ezarririko baldintzetan, Lege Organiko horretan xedaturiko irakaskuntzak zabaltzen ari direlarik.
Zerga kontuetarako Administrazioaren eta Lanaren arloen Neurriei buruzko abenduaren 27ko 24/2001 Legeko 51. artikuluarekin bat, Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoko bederatzigarren xedapen iragankorraren indarraldia beste lau urtez luzatuko da, 2002ko urriaren 4tik hasita.
Hezkuntza Sistemaren Antolamendu Orokorrari buruzko Lege Organikoko bederatzigarren xedapen iragankorrak aurreikusten duenez, eskabidea kasuan kasuko erretiro organoan eskatu beharko da, nahita erretiratu nahi deneko urteko lehen bi hilabeteetan. Erretiroaren ondorioen eguna eskatzen deneko urteko abuztuaren 31 izanen da.
Erretiroak Langileri eta Zerbitzu Zuzendaritza Nagusian behar bezala izapidatzeko, bidezko da aldez aurretik nahita erretiratzeko 2002an aurkezturiko eskabideei uko egiteko epea irekitzea, Hezkuntza Sistemaren Antolamendu Orokorrari buruzko Lege Organikoko bederatzigarren xedapen iragankorrarekin bat.
Apirilaren 1eko 165/1996 Foru Dekretuaren bidez, Foru Diputazioko funtzionarioen erretiro eta pentsioei buruzko erregelamenduari atxikirik ez dauden langileen erretiroak izapidatzeko eskumena Hezkuntza eta Kultura kontseilariari esleitu zaio.
Horregatik, apirilaren 1eko 165/1996 Foru Dekretuak esleitu dizkidan eskumenekin bat,
AGINDU DUT:
1. 2002ko apirilaren 30a nahita erretiratzeko 2002an aurkezturiko eskabideei uko egiteko mugaegun gisa ezartzea, Hezkuntza Sistemaren Antolamendu Orokorrari buruzko Lege Organikoko bederatzigarren xedapen iragankorrean xedaturikoarekin bat.
2. Foru Agindu honen kontra bidezko da gora jotzeko helegitea paratzea, Nafarroako Gobernuari zuzendua, argitaratu eta biharamunetik hilabeteko epean.
3. Foru Agindu hau Idazkaritza Teknikora, Zerbitzuak Ikuskatzeko eta Ikuskapen Teknikorako Zerbitzura eta Giza Baliabideen Zerbitzuko Langileri Atalera igortzea, behar diren ondorioak izan ditzan.
Iruñean, bi mila eta biko urtarrilaren hogeita bostean.-Hezkuntza eta Kultura kontseilaria, Jesús María Laguna Peña.
Iragarkiaren kodea: A0201094
