I. NAFARROAKO FORU KOMUNITATEA
Xedapen Orokorrak. Foru Aginduak
FORU AGINDUA, otsailaren 23koa, Nekazaritza, Abeltzaintza eta Elikadura kontseilariak emana. Honen bidez dirulaguntzak ematen dira 2001eko ekitaldian entitate pribatuekin sinatutako zenbait asegurutarako, zehazki Nekazaritzako Aseguru Konbinatuen Urteko Plan indardunean sartuak ez diren berotegien egituretan izandako kalteak eta haragitarako zaldi-aziendaren istripuak babesteko direnetarako.
Uztailaren 3ko 5/2000 Foru Legeak, 2. artikuluan, xedatzen du, otsailaren 16ko 54/1998 Legegintzako Foru Dekretuko 23. artikuluaren arabera, Nekazaritza, Abeltzaintza eta Elikadura kontseilariak onetsi eta argitara emanen dituela urtero, laboreen, abeltzaintzako ekoizpenen eta berotegietako egitura nahiz instalazioen arriskuak aseguratzen dituzten entitate pribatuekin hitzartutako aseguruen kontratazio kostuak murrizteko aseguru-lerroetako dirulaguntzak.
Nekazaritza eta Nekazaritzako Finantzaketa Zerbitzuko zuzendariak aurkeztutako txostena ikusirik, zeinean proposatzen baita dirulaguntzak ematea 2001eko ekitaldian entitate pribatuekin sinatutako zenbait asegurutarako, zehazki Nekazaritzako Aseguru Konbinatuen Urteko Plan indardunean sartuak ez diren berotegien egituretan izandako kalteak eta haragitarako zaldi-aziendaren istripuak babesteko direnetarako.
Horiek horrela, Nafarroako Foru Komunitateko Gobernuari eta Administrazioari buruzko apirilaren 11ko 23/1983 Foru Legeko 36. artikuluan xedatutakoarekin bat,
AGINDU DUT:
1. artikulua. Dirulaguntzak emanen dira, Nekazaritzako Finantzaketako lege-mailako xedapenen Testu Bategina onesten duen otsailaren 16ko 54/1998 Legegintzako Foru Dekretuaren VI. Tituluko 1. eta 3. Kapituluetan aipatzen diren baldintza eta beharkizun orokorren arabera, berotegien egitura eta instalazioetako kalteetarako eta haragitarako zaldi aziendaren istripuetarako aseguruak kontratatzeko.
Kontratazio horrek aseguru entitateekin 2001eko ekitaldian zehar egina izan behar du, 2001eko urtarrilaren 1az gero, alegia.
2. artikulua. Aurreko artikuluan sartutako aseguruak kontratatzeko Nafarroako Gobernuak emanen dituen dirulaguntzak kalkulatzeko aseguruaren kontratazioaren kostuaren gainean honako portzentaje hauek aplikatuko dira, betiere adierazten diren gehienezko mugekin:
a) Berotegien egitura eta instalazioetarako kalte aseguruak.
-Aseguratu guztiei aplikatzeko oinarrizko dirulaguntza: 100eko 15, gehienezko 3,60 pezetako mugarekin, aseguratutako berotegiaren metro karratuko, "estaldura malgukoen" kasuan edo 5,40 pezetakoa metro karratuko "estaldura zurrunekoenean".
-Nagusiki nekazaritzan diharduten aseguratuei aplikatuko zaien emendiozko dirulaguntza: 100eko 15, gehienezko 3,60 pezetako mugarekin, aseguratutako berotegiaren metro karratuko, "estaldura malgukoen" kasuan edo 5,40 pezetakoa metro karratuko "estaldura zurrunekoenean".
-Nekazari gazteak diren aseguratuei aplikatuko zaien emendiozko dirulaguntza, baldin eta bost urte baino gutxiago eman badituzte nekazaritzan hasi zirenetik eta irailaren 26ko 297/1992 Foru Dekretuaren aplikaziotik sortutako dirulaguntzak eman bazaizkie: 100eko 20, gehienezko 4,80 pezetako mugarekin, aseguratutako berotegiaren metro karratuko, "estaldura malgukoen" kasuan edo 7,20 pezetakoa metro karratuko, "estaldura zurrunekoenean".
Oinarrizko dirulaguntza eta emendiozkoak bateragarriak dira eta bidezko direnean honela aplikatuko dira: alde batetik protzentajeen eta, bestetik, ezarritako gehienezko dirulaguntza mugen batuketa eginez.
b) Haragitarako zaldi aziendaren istripuetarako asegurua: 100eko 50, gehienezko 1.000 pezetako mugarekin Azienda Larri Unitateko.
3. artikulua. Aipatu dirulaguntzen onuradunek Nekazaritza, Abeltzaintza eta Elikadura Departamentuan aurkeztu behar dute laguntzarako eskabide ofiziala eta sinatutako polizaren fotokopia.
4. artikulua. Laguntza eskabidea eta aipatu agiriak aurkezteko epea hogeita hamar egunekoa izanen da, poliza sinatu zen datatik kontatzen hasita, Foru Agindu hau argitaratu ondokoa bada, eta argitaratzen denetik kontaturik data hori baino lehen sinatua bada.
XEDAPEN GEHIGARRIA
Foru Dekretu honen aplikaziotik sor daitezkeen laguntzen zenbatekoa 2001eko Gastuen Aurrekontu indarduneko 71220-4700-7191, "Aseguru primen konpentsazioa" Kontu-saileko, 10002 proiektuaren kargura izanen da.
AZKEN XEDAPENA
Foru Dekretu honek Nafarroako ALDIZKARI OFIZIALean argitaratzen den egun berean hartuko du indarra.
Iruñean, bi mila eta bateko otsailaren hogeita hiruan.-Nekazaritza, Abeltzaintza eta Elikadura kontseilaria, Ignacio Javier Martínez Alfaro.
Iragarkiaren kodea: A0101993
