I. NAFARROAKO FORU KOMUNITATEA
Herrilanak eta Zerbitzu Publikoak
949/2000 EBAZPENA, azaroaren 14koa, Industri zuzendari nagusiak emana, Artzin eta Orotz-Betelun goi tentsioko instalazio elektrikoa jartzeko baimena eman, dagokion proiektua onetsi eta, zehazki, haren onura publikoa deklaratzen duena.
Ikusirik Iberdrola D.E.S.A.U. enpresak egin duen eskakizuna, ondotik aipatzen diren ezaugarri nagusiak dituen linea elektriko baten instalazioa baimendu, proiektua onetsi eta, zehazki, haren onura publikoa deklaratzeko, bide zortasuna ezartzearren, eta linea elektrikoak ukitutako ondasun eta eskubideen presako okupazioa deklara dadin.
a) Eskatzailea: Iberdrola, S.A.
b) Instalazioa jartzeko tokiak: Artzi eta Orotz-Betelu.
c) Instalazioaren xedea: inguru horretan, energia elektrikoaren hornidura hobetzea.
d) Ezaugarri nagusiak: Aireko linea 20 kV-koa, Agoitz-Orotz Betelu STRko 20. euskarritik, Nagoren, 12.991 metrokoa LA-110, hormigoi eta metalezkoa; bukaera 31-37. euskarrian duena, Orotz-Betelun.
Aireko deribazioa 30-70. euskarritik, 2820 metrokoa; LA-78, hormigoi eta metalezkoa, bukaera "Usotz" TZ-ko 38-13. euskarrian duena.
Aireko deribazioa 31-34. euskarritik, 2481 metrokoa; LA-56, hormigoi eta metalezkoa, bukaera "Azparren" TZn duena.
Aireko deribazioa 31-34. euskarritik, LA-56; 64 metrokoa, bukaera "Orotz-Betelu" TZn duena, Nagore, Artzin, Zandueta, Uritz, Imizkoz, Gorraiz, Azparren dermioetan, Artzi eta Orotz-Betelu udalerrietan.
e) Nongo materialak: nazionalak.
f) Aurrekontua: 330.492.853 pezeta.
Kontuan harturik, horretarako irekitako espedientean behar ziren erregelamenduzko tramiteak bete direla. Herrilan, Garraio eta Komunikazio Departamentuko Zainketa Zerbitzuak aurkeztutako alegazioei dagokienez, Telefónica, Iberdrola D.E.S.A.k adierazi du ados dagoela, eta Isabel Elizondo Larrañeta andreak, Artziko 21. poligonoko 11 eta 20. finken titularra baita, aurkeztutako alegazioetan adierazi duenari buruz, Iberdrola D.E.S.A.U.k hark eskatutakoa onartu du eta akordio ekonomiko batera iritsi dira, 2000ko irailaren 27ko hitzarmenean adierazten den moduan. Hitzarmen hori espedientean bildu da.
Horiek horrela, Industri, Merkataritza, Turismo eta Lan kontseilariaren urriaren 14ko 572/1999 Foru Aginduaren bidez (99-10-25eko 133. Nafarroako ALDIZKARI OFIZIALa) esleitu zaizkidan ahalmenak erabiliz,
EBATZI DUT:
1. Aipatu instalazio elektrikoa jartzeko baimena ematea.
2. Zehazki, instalazio horren onura publikoa deklaratzea, Sektore Elektrikoari buruzko azaroaren 27ko 54/1997 Legearen 52, 53 eta 54. artikuluetan, urriaren 20ko 2617/1966 Dekretuaren 9. artikuluan eta egun bereko 2619/1966 Dekretuaren 10. artikuluan aurreikusitako ondorioetarako.
3. Instalazioa egiteko aurkezturiko proiektua onestea eta 12 hilabeteko epea ematea lanak egiteko. Proiektua Iruñean datatua da, 2000ko urtarrilean, Francisco Iraizoz Indaberea industri ingeniari teknikoak sinatua.
4. Ebazpen hau jakinaraztea Iberdrola D.E.S.A.U.ri (Orreaga etorbidea, 7, Iruña), Nafarroako Gobernuko Herrilan, Garraio eta Komunikazio Departamentuko Zainketa Zerbitzuari (San Ignazio etorbidea, 3), Telefónicako Ingeniaritza Departamentuari (La Olivako monasterioa, 9-1.a) eta María Isabel Elizondo Larrañeta andreari (Bergamín 39, 4.a, esk., Iruña) eta, orobat, Nafarroako ALDIZKARI OFIZIALean argitaratzea, behar diren ondorioak izan ditzan.
Iruñean, bi milako azaroaren hamalauan.-Industri zuzendari nagusia, Enrique Jiménez Goicoa.
Iragarkiaren kodea: A0010667
