261. ALDIZKARIA - 2023ko abenduaren 19a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

77/2023 Foru Agindua, azaroaren 16koa, Ekonomia eta Ogasuneko kontseilariak emana, zeinaren bidez garapen-arauak onesten baitira bidalketa bermatuen mugimenduei dagokienez, 504, 505 eta 507 ereduak onesten baitira (504 "Baimen-eskabidea, fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko", 505 "Baimena, fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko" eta 507 "Itzultzeko eskabidea bidalketa bermatuen sisteman"), eta ohiko bidaltzaile eta hartzaile egiaztatuen lurralde-erregistroko izen-ematea arautzen baita.

Estatuaren eta Nafarroako Foru Komunitatearen arteko Hitzarmen Ekonomikoaren 35.5 artikuluaren esparruan, tributu-harmonizazioari buruzko ekainaren 21eko 3/2023 Legegintzako Foru Dekretuak zerga bereziei buruzko abenduaren 30eko 20/1992 Foru Legea aldatzen du, foru-arauan zenbait aldaketa txertatzeko, Zerga-bereziei buruzko abenduaren 30eko 38/1992 Foru Legean eginak maiatzaren 8ko 11/2023 Legeak, zeinaren bidez zenbait produktu eta zerbitzuren irisgarritasunaren, kualifikazio handiko pertsonen migrazioaren, zergen eta notario- eta erregistro-jarduketen digitalizazioaren arloko Europar Batasunaren zenbait zuzentarauren transposizioa egiten baita eta zeinaren bidez aldatzen baita 12/2011 Legea, maiatzaren 27koa, Kalte nuklearren edo material erradioaktiboek eragindako kalteen erantzukizun zibilari buruzkoa.

Aldaketan barne hartzen diren alderdien artean, nabarmentzekoak dira bidalketa bermatuen prozedura berriro definitzea, "bidaltzaile ziurtatua" eta "hartzaile ziurtatua" figura berriak sartzea eta "jasotzaile baimendua" figura desagertzea; hori guztia Kontseiluaren 2019ko abenduaren 19ko 2020/262 (EB) Zuzentarauaren (zerga berezien araubide orokorra ezartzen duena) transposizioa eginez.

"Bidalketa bermatuak" dira fabrikazio-zerga bereziei lotutako produktuak Batasunaren barrenean zirkulatzeko prozedura bat, zeinean jatorrizko estatu kidean zerga sorrarazi baita eta helmugako estatu kideko hartzaile ziurtatu bati zuzentzen baitzaio, betiere produktu horiek saltzaileak edo saltzailearen kontura bidali edo garraiatu ez badira, ez zuzenean ez zeharka, eta araudian ezarritako baldintza eta betekizunak betetzen badira.

Aipatutako 11/2023 Legeak txertatutako Zerga berezien erregelamenduaren 33 bis, ter, quater, quinquies, sexies eta septies artikuluek modu xehatuan arautzen dute bidalketa bermatuen prozedura berria, zeina prozedura informatizatua baita. Hala, etendura-araubideko zerga bereziei lotutako produktuen zirkulaziorako gaur egun erabiltzen den sistema informatizatua, EMCS (ingelesezko siglak: Excise Movement Control System), orobat erabiliko da estatu kide bateko lurraldean kontsumitzeko bidali diren eta beste estatu kide bateko lurraldera –han merkataritza-helburutarako entregatzeko– eraman diren produktuen zirkulaziorako ere. Mugimendu horiek babesteko, papereko "Agiri laguntzaile erraztua" 503 ereduaren ordez, administrazio-agiri elektroniko erraztu berri bat ezarri da.

Sistema informatizatu horren erabilerarekin, adierazitako zirkulazioaren jarraipena erraztu eta barne-merkatuaren funtzionamendu egokia bermatu nahi da. Agiri elektroniko berri horrekin, bidalketa bermatuen eragiketa horien fabrikazio-zerga berezien sortzapena kontrolatu nahi da kontsumoko estatu kideetan. Sortzapena eginen da hartzaile ziurtatuak produktua jasotzen duenean xedeko helmugan, helmugako hori dela zergadun.

2023ko otsailaren 13tik aurrera aplikatuko dira neurri horiek guztiak. Hala ere, zerga berezien xede diren produktuak bidalketa bermatuen prozeduraren bidez jasotzen jarraitzen ahalko da 2023ko abenduaren 31 arte, Kontseiluaren 2008/118/EE Zuzentarauaren (2020/262 (EB) Zuzentarauak indargabetua) 33, 34 eta 35 artikuluetan jasotako izapideak betez.

"Hartzaile ziurtatua" izanen da edozein pertsona edo erakunde, helmugako estatu kideko agintari eskudunen aurrean erregistratua zerga bereziei lotutako produktuak jasotzeko, zeinak, pertsona horren jardun profesionalean, estatu kide bateko lurraldean kontsumorako bidali baitira eta, gero, beste estatu kide bateko lurraldera lekualdatu.

"Bidaltzaile ziurtatua" izanen da edozein pertsona edo erakunde, bidalketako estatu kideko agintari eskudunen aurrean erregistratua zerga bereziei lotutako produktuak bidaltzeko, zeinak, pertsona horren jardun profesionalean, estatu kide bateko lurraldean kontsumorako bidali baitira eta, gero, beste Estatu kide bateko lurraldera lekualdatu.

Bidalketa bermatuei buruzko araudi berri hau indarrean sartzeak eskatzen du eragindako ohiko operadoreak beren zerga-egoitzari dagokion bulego kudeatzaileko lurralde-erregistroan izena emateko modua, eskakizunak eta baldintzak zehazteko beharrezko arauak eta erregistroaren funtzionamenduari buruzko arauak onartzea.

Beharrezkoa da, halaber, noizbehinkako operadoreendako baimenei buruzko arauak garatzea fabrikazioaren gaineko zerga berezien xede diren eta Batasunaren barrukoa ez den lurralde-eremutik, etendura-araubidetik kanpo, barruko lurralde-eremura bidalketa bermatuen prozeduraren bidez bidalitako produktuak bidaltzeko eta jasotzeko.

Halaber, aldaketak aurreikusten dira Espainian bidalketa bermatuen sisteman zerga berezien kuotak itzultzeari dagokionez. 2023ko otsailetik aurrera, eskatzaileak bidaltzaile ziurtatu gisa erroldatuta egon beharko du, eta produktuak entregatu aurretik egiaztatu beharko du hartzaile ziurtatuak zergen ordainketa bermatu duela helmugako herrialdean. Kasu guztietan, itzulketan, entregatutako produktuei dagozkien kuotak sartuko dira, eta itzulketa horretarako baldintza izanen da destinoko estatu kidean zerga ordaintzea. Horretarako, bidaltzaile ziurtatuak hiruhileko bakoitzean egindako entregak itzultzeko eskabide bat aurkeztu beharko du entrega horiek egin diren establezimendu bakoitzari dagokion bulego kudeatzailean.

20/1992 Foru Legearen azken xedapenetako hirugarrenak zerga gaietan eskuduna den departamentuko titularra gaitzen du beharrezkoak diren xedapen guztiak eman ditzan, foru-aginduen bidez, foru-legea hori erregelamenduz garatu eta betearazteko.

Foru-agindu honen bidez garatutako erregelamendu-ahalaren erabilera bat dator Administrazio Publikoen Administrazio Prozedura Erkideari buruzko urriaren 1eko 9/2015 Legearen 129. artikuluan aurreikusitako erregulazio onaren printzipioekin. Halaber, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 129. artikuluan ezarritako printzipio hauek ere betetzen dira: premia eta eraginkortasuna, proportzionaltasuna, segurtasun juridikoa, gardentasuna, sinpletasuna, efizientzia eta irisgarritasuna.

Horrenbestez,

AGINTZEN DUT:

I. KAPITULUA.–OHIKO BIDALTZAILE ETA HARTZAILE ZIURTATUEN LURRALDE-ERREGISTROA

1. artikulua. Lurralde-erregistroan izena ematera behartuak.

Uztailaren 7ko 1165/1995 Errege Dekretuaren bidez onetsitako Zerga Berezien Erregelamenduaren 40.5 artikuluarekin bat etorriz, Nafarroako Foru Ogasuneko lurralde-erregistroan inskribatu beharko dute betebeharpeko hauek, betiere zerga-egoitza Nafarroan badute:

1. Ohiko bidaltzaile eta hartzaile ziurtatuak.

2. Bidalketa bermatuak bidaltzaile ziurtatu gisa Europar Batasuneko beste estatu kide batzuetara ohikotasunez eginen dituzten lantegi edo gordailu fiskalak edo bidaltzaile erregistratuak.

3. Bidalketa bermatuak hartzaile ziurtatu gisa barruko lurralde-eremuan ohikotasunez jasoko dituzten lantegi edo gordailu fiskalak edo hartzaile ziurtatuak.

2. artikulua. Lurralde-erregistroan inskribatzeko eskabidea.

1. Inskribatu aurretik, eskatzaileak alta emanda agertu beharko du eginen den jarduerari dagokion jarduera ekonomikoen gaineko zergaren epigrafe batean, eta zerga-betebeharrak egunean dituela ziurtatu beharko du.

Pertsona juridikoen kasuan, ziurtatu beharko da, halaber, administratzaileek ere, egitezkoek barne, beren zerga-betebeharrak egunean dituztela.

2. Lurralde-erregistroan izena emateko betebeharpekoak inskribatzeko eskabidea aurkeztu beharko du jarduera hasi aurretik, eta agiri eta informazio hauek eman beharko ditu:

a) Datu identifikagarri osatuak, izena, deiturak, sozietate-izena eta ohiko hartzaile edo bidaltzaile ziurtatuaren identifikazio fiskaleko zenbakia eta, hala badagokio, ordezkariarenak, ordezkaritza ziurtatzen duen dokumentazioarekin batera.

b) Ohiko bidaltzaile edo hartzaile ziurtatuaren establezimenduaren helbide osoa.

c) Garatu beharreko jardueraren azalpen-memoria laburra, zeinagatik inskripzioa eskatzen baita. Halaber, jarduera horren ekonomia-jardueren gaineko zergaren epigrafea zein den adieraziko da.

d) Ohiko hartzaile ziurtatuak indarreko araudian eskatzen diren ziurtagiriak eta berme-zenbakia eta haren zenbatekoa aurkeztu beharko ditu.

e) Sektorearen berariazko araudian eskatutako baimenak, inskribatu nahi den jarduera gauzatzeari lotuta baldin badaude.

3. Eskabidea jaso eta dagokion espedientea izapidetu ondotik, emandako datuak egiazkoak diren frogatu aurretik, zerga berezien alorrean eskumena duen Nafarroako Foru Ogasuneko atalak ebatziko du, hala badagokio, lurralde-erregistroan inskribatzea.

Inskripzioari buruzko ebazpena interesdunari jakinaraziko zaio eta, harekin batera, lurralde-erregistroko inskripzioa egiaztatzen duen txartela igorriko zaio –hartan dagokion ohiko bidaltzaile edo hartzaile ziurtatuaren inskripzio-kodea agertuko da–.

Inskripzioa ukatzen bada, eskatzaileari jakinaraziko zaio, behar bezala arrazoituta, eta ezar daitezkeen errekurtso edo erreklamazioak adieraziko dira.

4. Ohiko bidaltzaile edo hartzaile ziurtatuak Nafarroako Foru Ogasunari eman beharko dio inskripziorako emandako datuetan gertatzen den aldaketa ororen berri, aldaketa eragiten duten inguruabarrak gertatu eta hamar eguneko epean.

3. artikulua. Ohiko bidaltzaile edo hartzaile ziurtatuaren inskripzio-kodea.

1. Ohiko bidaltzaile edo hartzaile ziurtatuaren inskripzio-kodeak (JEK) lurralde-erregistroan inskribatutako betebeharpekoa identifikatzen du.

2 Kodeak hamahiru karaktere izanen ditu, honela banatuak:

a) ES letrak izanen dira lehen bi karaktereak.

b) Hirugarren, laugarren eta bosgarren karaktereak zeroak izanen dira, Ogasuneko eta Funtzio Publikoko Ministerioko titularrak beste karaktere batzuekin ordeztea xedatzen ez badu.

c) Seigarren eta zazpigarren karaktereek kudeaketa-bulegoa identifikatzen dute, zeinaren bidez inskripzioa egin baita lurralde-erregistroan.

d) Zortzigarren eta bederatzigarren karaktereek egiten den jarduera identifikatzen dute: (EH) karaktereak izanen baitira ohiko bidaltzaile ziurtatuentzat, eta (DH) karaktereak ohiko hartzaile ziurtatuentzat.

e) Hamargarren, hamaikagarren eta hamabigarren karaktereek inskripzioaren zenbaki sekuentziala adieraziko dute, kudeaketa-bulegoari dagokion lurralde-erregistrokoa.

f) Hamahirugarren karakterea kontrolerako letra bat izanen da.

3. Betebeharpekoaak izan beharko ditu bidaltzaile gisa nahiz ohiko hartzaile ziurtatu gisa garatuko dituen jarduera adina inskripzio-kode.

4. artikulua. Lurralde erregistroan baja hartzea.

1. Ohiko bidaltzaile edo hartzaile ziurtatuak uzten badio inskripzioa eragin zuen jarduerari, inskripzioaren baja eskatu beharko du lurralde-erregistroan, jarduerari utzi eta hilabeteko epean.

Ondorio horietarako, inskribatutako operadorearen heriotzak edo nortasun juridikoa azkentzeak baja-eskaeraren ondorioak izanen dituzte.

2. Era berean, jarduera ekonomikoen gaineko zergan inskripzioaren xede den jarduerari eta instalazioari dagokion baja-eskaera aurkezteak lurralde-erregistroan baja emateko eskaerari dagozkion ondorioak izanen ditu.

3. 20/1992 Foru Legean, 38/1992 Legean eta hura garatzen duen erregelamenduan eta, hala badagokio, inskripzio-ebazpenean ezarritako arau, muga eta baldintzak ez badira betetzen eta egiaztatzen bada eskabidean aitortzen den jarduera ekonomikoa ez dela gauzatzen, Nafarroako Foru Ogasunak atzera botako du baimena eta ofiziozko baja emanen da lurralde-erregistroan.

II. KAPITULUA.–NOIZBEHINKAKO BIDALTZAILE ETA HARTZAILEAK BAIMENTZEA

5. artikulua. Europar Batasuneko gainerako herrialdeetako fabrikazioaren gaineko zerga berezien xede diren produktuak bidaltzeko edo jasotzeko eskabidea.

1. Noizbehinka etendura-araubidetik kanpoko fabrikazioaren gaineko zerga berezien xede diren objektuak bidali edo jaso nahi dituzten bidaltzaile eta hartzaile ziurtatuek bidaltzeko edo jasotzeko baimenaren eskabide bat aurkeztu beharko diote zerga berezien alorrean eskumena duen Nafarroako Foru Ogasuneko atalari, betiere produktuak bidali edo jaso nahi diren tokia Foru Komunitatean badago.

2. Bidaltze- edo jasotze-eragiketa hasi aurretik aurkeztu beharko da baimen-eskabidea. Horretarako, 504 eredua bete beharko da, zeina 9.2 artikuluan onesten baita.

3. Eskabidea bidaltzaile edo hornitzaile bakar batentzat izanen da baliagarria, betiere Hidrokarburoen gaineko Zerga Bereziaren, Tabako Moten gaineko Zergaren eta Alkoholaren eta Edari Eratorrien gaineko Zergaren esparruan, produktu-kantitate jakin baterako –banaketari buruzko sektoreko araudia bete beharko da kasu guztietan– eta denbora-tarte jakin baterako.

4. Jasotzeko eskabidearekin batera, noizbehinkako hartzaile ziurtatuak jasotzeko eskatzen duen produktuei dagokien fabrikazioaren gaineko zerga berezien kuoten guztizko zenbatekoaren bermea eman beharko du, betiere ez bada aplikatzen salbuespenen bat edo tasa murrizturen bat, barneko lurralde-eremuan sortzen diren zerga berezien ordainketa bermatzeko.

5. Bidaltzaile ziurtatuak, produktuak entregatu aurretik, ziurtatu beharko du hartzaile ziurtatuak fabrikazioaren gaineko zerga berezien ordainketa bermatu duela helmugako estatu kidean.

6. artikulua. Fabrikazioaren gaineko zerga berezien xede diren produktuak bidaltzeko edo jasotzeko baimena.

1. Baimena igorri aurretik, Nafarroako Foru Ogasunak hauek egin beharko ditu:

a) Baimena eskatzen duten operadoreak eginen den jarduerari dagokion jarduera ekonomikoen gaineko zergaren epigrafe batean alta emanda agertzen direla eta zerga-betebeharrak egunean dituztela egiaztatu.

b) Noizbehinkako hartzaile ziurtatuak emandako bermeak jaso nahi diren produktuen zerga bereziari dagozkion kuoten zenbateko totala estaltzen duen egiaztatu.

c) Noizbehinkako bidaltzaile ziurtatuek eta hartzaileek foru-agindu honetako eskakizunak betetzen dituzten egiaztatu.

2. 1. atalean adierazitako frogantza eta egiaztapen guztiak egin ondotik, Nafarroako Foru Ogasunak, 9.3 artikuluan onesten den 505 ereduaren bidez, Europar Batasuneko gainerako herrialdeetako produktuak bidaltzeko edo jasotzeko baimena igorriko du. Baimen hori sei hilabeterako izanen da baliagarria, igortzen den datatik hasita. Noizbehinkako hartzaile ziurtatuak jasotze-baimenaren baliagarritasuna beste hiru hilabetez luzatzeko eskatzen ahalko du.

3. Noizbehinkako bidaltzaile eta hartzaile ziurtatuak 505 ereduan sortutako jasotze- edo bidaltze-baimenaren kodearen bidez (CARE) identifikatuko dira.

4. Noizbehinkako hartzaile ziurtatu batendako mugimenduak babesten dituzten dokumentu administratibo erraztuetan barne hartzen diren produktuen kantitateak ezin du gainditu jasotze-baimenean agertzen den produktu-kantitatea.

7. artikulua. Noizbehinkako hartzaile ziurtatuaren bermea ezeztatzea.

1. Noizbehinkako hartzaile ziurtatuak emandako bermea ezeztatzen bada, dagokion zerga berezia ordaintzearen ziurtagiria aurkeztu beharko zaio Nafarroako Foru Ogasunari.

2. Bermea ezeztatuko da, halaber, baimendutako jasotze-eragiketa egiteari uko egin zaiola jakinarazten bazaio Nafarroako Foru Ogasunari.

3. Baimenaren baliozkotasun-aldia igaro ondotik, eta, hala badagokio, luzapenaren baliozkotasun-aldia igaro ondotik, ez bada ezeztatu bermea, Nafarroako Foru Ogasunak dagokion zerga berezia likidatuko du eta bermea exekutatzeko eskatuko die bilketa-organoei.

III. KAPITULUA.–ITZULKETA BIDALKETA BERMATUEN SISTEMAN

8. artikulua. Fabrikazioaren gaineko zerga berezien itzulketa eskatzea bidalketa bermatuen sisteman.

1. Bidaltzaile ziurtatuak, ohikoak nahiz noizbehinkakoak, eskatu nahi badu jasandako fabrikazio-zerga berezien kuotak itzultzeko, bat etorriz 20/1992 Foru Legearen 10.1.d) artikuluan ezarritakoarekin eta Zerga Berezien Erregelamenduaren 9. artikuluan ezarritakoarekin, itzulketa-eskabidea aurkeztu behar dio zerga berezien alorrean eskumena duen Nafarroako Foru Ogasuneko atalari, entrega egin den establezimendua Nafarroako lurraldean dagoenean.

2. Itzulketa-eskabidea aurkeztu beharko da mugimendu horiei dagokien zerga berezia helmugako estatu kidean ordaindu den hiruhilekoa bukatu ondoko hilabetearen lehen hogei egunetan. Horretarako, 9.4 artikuluan onetsitako 507 eredua bete beharko da.

3. Eskabidea jaso eta dagokion espedientea izapidetu ondotik eta helmugako estatu kidean sortutako zerga berezia ordaindu dela ziurtatu ondotik, Nafarroako Foru Ogasunak ebatziko du bidaltzaile ziurtatuak jasandako kuotak itzultzea dagokion ala ez.

Itzulketari buruzko ebazpena interesdunari jakinaraziko zaio. Ordainketa banku-transferentziaren bidez eginen da, interesdunak eskabidean adierazitako kontuan.

Itzulketa ukatzen bada, eskatzaileari jakinaraziko zaio, behar bezala arrazoituta, eta ezar daitezkeen errekurtso edo erreklamazioak adieraziko dira.

IV. KAPITULUA.–FORU-ARAU HONETAN ARAUTZEN DIREN INSKRIPZIO-,
BAIMEN- ETA ITZULKETA-ESKABIDEEI BURUZKO ALDERDI FORMALAK, BALDINTZA OROKORRAK ETA AURKEZTEKO PROZEDURAK

9. artikulua. Lurralde-erregistroaren inskripzio txartela eta 504, 505 eta 507 ereduak onestea.

1. Ohiko bidaltzaile eta hartzaile ziurtatuen lurralde-erregistroaren inskripzio-txartelaren eredua onesten da; I. eranskinean dago.

2. "Baimen-eskabidea, fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko" izeneko 504 eredua onesten da; II. eranskinean dago haren edukia.

3. "Baimena, fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko" izeneko 505 eredua onesten da; III. eranskinean dago haren edukia.

4. "Itzultzeko eskabidea bidalketa bermatuen sisteman" izeneko 507 eredua onesten da; IV. eranskinean jasotzen da haren edukia.

5. 505 eta 507 ereduak Nafarroako Foru Ogasunak ondorio hauetarako garatzen duen izapide-fitxan baino ez dira lortzen ahalko, zeina erakunde horren Interneteko atarian izanen baita eskura.

10. artikulua. Eskabideak aurkezteko modua.

Lurralde-erregistroan inskribatzeko eskabideak, fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko baimentzekoak eta bidalketa bermatuen sisteman itzultzeko eskabideak, modu elektronikoz aurkeztu beharko dira, 12. eta 13. artikuluetan azaltzen diren baldintza orokorrak eta prozedurak betez.

Aurkezpena egiten dutenek kontuan hartu beharko dituzte aurkezpen telematiko hori egiteko behar diren arau teknikoak, Nafarroako Gobernuaren webgunean argitaratuak, Nafarroako Foru Ogasunari dagokion atalean.

11. artikulua. Eskabideak aurkezteko gaikuntza.

Honako hauek aurkezten ahalko dituzte adierazitako eskabideak modu elektronikoz, Internet bidez:

1. Zergapekoek edo, hala dagokionean, haien ordezkariek.

2. Tributuen aplikazioan laguntzaile sozialen izaera duten pertsonek edo erakundeek, Tributuei buruzko abenduaren 14ko 13/2000 Foru Lege Orokorraren 90. artikuluan eta ekainaren 29ko 130/2009 Foru Aginduan xedatutakoarekin bat, foru-agindu horretan onesten baita kanpo-lankidetzarako akordioa, hirugarren pertsonen izenean telematika bidez aurkezteko aitorpenak, jakinarazpenak eta zerga arloko beste agiri batzuk eta telematika bidez tramitatzeko tributu-zorren ordainketa.

12. artikulua. Eskabideak aurkezteko baldintza orokorrak.

Adierazitako eskabideak elektronikoki aurkezteko, bete beharko dira Ekonomia eta Ogasuneko kontseilariaren uztailaren 3ko 132/2009 Foru Aginduaren 2. artikuluan ezarritako baldintza orokorrak, foru-agindu horretan arautzen baitira zenbait tributu-aitorpen baliabide telematikoen bidez edo ordenagailuak irakurtzen ahal duen euskarriaren bidez aurkeztera behartzen duten kasuak.

13. artikulua. Eskabideak modu elektronikoan aurkezteko prozedura.

1. 2. artikuluan zehazten den lurralde-erregistroan inskribatzeko eskabidea egiteko, instantzia orokorra aurkeztu beharko da Erregistro Orokor Elektronikoan, beteta.

2. Fabrikazio-zerga berezien xede diren produktuak Europar Batasuneko gainerako herrialdeetara bidaltzeko edo haietatik jasotzeko baimentzeko eskabideak eta bidalketa bermatuen sisteman itzultzeko eskabideak Internet bidez aurkezteko prozedurak, zeinak 5. eta 8. artikuluetan azaltzen baitira, hauek izanen dira:

1. Nafarroako Foru Ogasunak ondorio hauetarako garatutako izapidean sartu, zeina erakunde horren Interneteko atarian izanen baita eskura.

2. 504 edo 507 eredua bete beharko da, dagokionaren arabera. Eredu horiek betetzeko, dagokion izapidearen web-orrian dagoen ereduaren PDFa deskargatu behar da. Hura deskargatu ondotik, ireki egin behar da, eta eremu editagarriak bete. Azkenik, PDF formatuan gorde beharko da (ez irudi gisa). Ez da beharrezkoa dokumentua sinatzea.

3. Ondoren, sartu "TRAMITAZIOAK" atalean. Eskatzen den informazioa bete eta ereduaren PDFa erantsi beharko da "3. urratsa-Dokumentazioa erantsi" urratsean.

4. Erabili bidaltzeko aukera.

3. Eskabideak bidali ondotik, aurkeztutako eskabideari esleitutako zenbakia emanen du aditzera sistemak, eta inprimatzeko aukera eskainiko du, frogagiri gisa erabiltzeko.

Xedapen gehigarri bakarra.–Datu pertsonalen tratamendua.

Zergapekoak bere tributu-eskubide eta -betebeharrak betetzean emandako datu pertsonalak tributu-sistema aplikatzeko erabiliko dira, eta Nafarroako Foru Ogasuna izanen da datu horien tratamenduaren arduraduna. Tratamendua bat etorriko da Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduarekin eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoarekin. Nafarroako Gobernuaren web-orrian emanen da Erregelamenduaren 13. artikuluak exijitzen duen informazioa, balizko tratamenduei eta haien gaineko eskubideen erabilerari buruzkoa.

Xedapen iragankor bakarra.–Ohiko bidaltzaile eta hartzaile egiaztatuen lurralde-erregistroan inskribatzeko epea.

Zerga-egoitza Nafarroako lurraldean duten eta foru-agindu hau indarrean sartzean fabrikazio-zerga berezien xede diren produktuak, ohikotasunez, bidalketa bermatuen sistemaren bidez Europar Batasuneko gainerako herrialdeetara bidaltzen edo haietatik jasotzen dituzten operadore ekonomikoek ohiko bidaltzaile edo hartzaile ziurtatu gisa inskribatu beharko dute Nafarroako Foru Ogasuneko lurralde-erregistroan, foru-agindu hau indarrean sartu eta hurrengo hogeita hamar egunetan; eta, kasu guztietan, Zerga Berezien Erregelamenduaren 33 ter artikuluan jasotzen den dokumentu administratibo erraztu berriaren babespean bidalketa bermatuen mugimenduak egin aurretik.

Xedapen indargabetzaile bakarra.–Arauak indargabetzea.

Foru-agindu hau indarrean sartzen denetik aurrera, indargabetuta geldituko dira Ekonomia eta Ogasuneko kontseilariak irailaren 19an emandako 172/2000 Foru Aginduak 500, 504, 505, 518, 520 eta 552 ereduei buruz jasotzen dituen xedapenak. Hartan onetsi ziren zerga bereziei eta aseguru-primen gaineko zergei dagozkien aitorpen ereduak, pezetatan eta eurotan, eta haiek kudeatzeko arauak ezarri.

Halaber, 2024ko urtarrilaren 1etik aurrera, indargabetuta geldituko dira 172/2000 Foru Aginduan 503 eta 551 ereduei buruz jasotzen dituen xedapenak.

Azken xedapen bakarra.–Indarra hartzea.

Foru-agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2023ko azaroaren 16an.–Ekonomia eta Ogasuneko kontseilaria, José Luis Arasti Pérez.

I. ERANSKINA.–Erregistroaren inskripzio-txartela.

II. ERANSKINA.–504 eredua.

III. ERANSKINA.–505 eredua.

IV. ERANSKINA.–507 eredua.

Deskargatzeko dauden eranskinak PDF formatuan daude.

Iragarkiaren kodea: F2316378