Iragarkia

212. ALDIZKARIA - 2021eko irailaren 9a

1. NAFARROAKO FORU KOMUNITATEA

1.7. BESTELAKOAK

72/2021 FORU AGINDUA, abuztuaren 18koa, Hezkuntzako kontseilariak emana, Haur Hezkuntzako lehen zikloko ikastetxeetan hezkuntza jarduera aurrera eramateko prebentzio eta antolaketa protokoloa onesten duena 2021-2022 ikasturterako.

COVID-19ak eragindako osasun krisiari aurre egiteko prebentzio, euste eta koordinazio neurri urgenteak ezartzen dituen martxoaren 29ko 2/2021 Legearen 9. artikuluak ezartzen du hezkuntza administrazioek egiaztatu beharko dutela Hezkuntzari buruzko maiatzaren 3ko 2/2006 Lege Organikoaren 3. artikuluan jasotako irakaskuntzak ematen dituzten ikastetxe publiko zein pribatuetako titularrek betetzen dituztela hezkuntza administrazioek ikastetxeetarako ezartzen dituzten desinfekzio, prebentzio eta egokitzapen arauak.

Nolanahi ere, pilaketak saihesteko beharrezkoak diren antolamendu neurriak hartzen direla ziurtatu beharko da, eta bermatu ikasleek eta langileek betetzen ahal dituztela osasun eta hezkuntza arloko agintariek ezartzen dituzten neurriak gorde beharreko tarteari, kontaktuak mugatzeari eta prebentzio pertsonalari buruz.

Osasuneko kontseilariaren ekainaren 29ko 22/2021 Foru Aginduak, zeinaren bidez berariazko prebentzio neurri apartekoak hartzen baitira Nafarroako Foru Komunitaterako, COVID-19ak eragindako egoera epidemiologikoak izan duen bilakaeraren ondorioz, honako hau ezartzen du 36. apartatuan (“Hezkuntzari buruzko maiatzaren 3ko 2/2006 Lege Organikoaren 3. artikuluan ezarritako ikasketak ematen dituzten ikastetxeei dagozkien neurriak”):

“36.1. Ikastetxeetako hezkuntza jarduera unean-unean ezartzen diren osasun baldintzen arabera gauzatuko da.

36.2. Nahitaez bete beharko dira osasun agintaritzak ezartzen dituen desinfekzio eta prebentzio arauak.

36.3. Hezkuntza Departamentuak hezkuntza jarduera presentzialerako prebentzio eta antolaketa protokolo bat prestatuko du, orain arte onetsitako osasun gomendioak biltzeko. Nafarroako Osasun Publikoaren eta Lan Osasunaren Institutuak gainbegiratuko du protokolo hori.”

2021eko ekainaren 29an, Osasun Publikoaren Batzordeak gida bat onetsi zuen, “COVID-19a dela eta, ikastetxeetarako prebentzio, higiene eta osasunaren sustapenerako neurriak 2021-2022 ikasturterako” izenekoa.

Neurri horiek oinarri harturik, eta protokoloa Nafarroako Osasun Publikoaren eta Lan Osasunaren Institutuak gainbegiratu ondoren, 2021eko uztailaren 14an, Hezkuntza Departamentuak ikastetxeetara bidali zuen Haur Hezkuntzako lehen zikloko ikastetxeetan hezkuntza jarduera aurrera eramateko 2021-2022 ikasturterako prebentzio eta antolaketa protokoloaren lehen agiria, ikastetxeetako arduradunek neurri horiek kontuan har zitzaten.

Adierazitako guztiarekin bat, eta kontuan hartuz hartu diren neurri berriak, bidezkoa da onestea Haur Hezkuntzako lehen zikloko ikastetxeetan hezkuntza jarduera aurrera eramateko prebentzio eta antolaketa protokoloa 2021-2022 ikasturterako.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskudantziak erabiliz,

AGINTZEN DUT:

1. Hezkuntzako zuzendari nagusiaren eskumena hartzea, foru agindu honen edukiaren ondorioetarako.

2. Onestea Haur Hezkuntzako lehen zikloko ikastetxeetan hezkuntza jarduera aurrera eramateko prebentzio eta antolaketa protokoloa 2021-2022 ikasturterako, foru agindu honen eranskin gisa agertzen dena.

3. Protokolo hori Nafarroako Foru Komunitatean Haur Hezkuntzako lehen zikloa ematen duten ikastetxe guztietan aplikatu beharko da.

4. Protokoloa ikasturtean zehar eguneratuz joanen da, unean uneko osasun egoerak eskatzen duenean edo haren aplikazioa hezkuntza sistemaren beharretara egokitu beharra dagoenean. Eguneratze horiek foru aginduaren bidez onetsi eta Nafarroako Aldizkari Ofizialean argitaratuko dira, baita Hezkuntza Departamentuaren webgunean ere (https://www.educacion.navarra.es/eu/web/dpto/inicio), eta ikastetxeei bidaliko zaizkie.

5. Foru agindu hau eta eranskina Nafarroako Aldizkari Ofizialean argitaratzea.

6. Foru agindu honen eta eranskinaren aurka gora jotzeko errekurtsoa jartzen ahal dute interesdunek, Nafarroako Gobernuari zuzendua, argitaratu eta biharamunetik hilabeteko epean.

7. Foru agindu hau eta eranskina bidaltzea Hezkuntza Departamentuko eta Osasun Departamentuko idazkaritza tekniko nagusietara, Hezkuntza Departamentuko Hezkuntza Zuzendaritza Nagusira, Nafarroako Osasun Publikoaren eta Lan Osasunaren Institutura eta ikastetxeetara, behar diren ondorioak izan ditzaten.

Iruñean, 2021eko abuztuaren 18an.–Hezkuntzako kontseilaria, Carlos Gimeno Gurpegui.

ERANSKINA

Prebentzio eta antolaketa protokoloa, Nafarroako Foru Komunitateko Haur Hezkuntzako lehen zikloko ikastetxeetan hezkuntza jarduera aurrera eramatekoa 2021-2022 ikasturtean

Aurkibidea.

0. Sarrera.

1. Ikastetxeen antolaketa, pandemia egoerari egokitua.

1.1. Ikastetxeen antolaketari buruzko zenbait gogoeta orokor.

1.2. Egoeren sailkapena unean uneko osasun errealitatearen arabera.

–1. egoera: hezkuntza jarduera presentziala.

–2. egoera: ikastetxeak erabat ixtea.

2. Antolaketa eta segurtasun neurriak.

2.1. Aireztapen neurriak.

2.2. Prebentzio neurri pertsonalak.

2.3. Maskaren erabilera.

2.4. Ikasleen sarrera-irteerak.

2.5. Ikasgelen kudeaketa.

2.6. Barneko joan-etorrien kudeaketa.

2.7. Jolastokiaren eta jolasaldiaren kudeaketa.

2.8. Komunen erabileraren kudeaketa.

2.9. Garbiketa eta desinfekzioa.

2.10. Jantokia.

2.11. Siesta.

2.12. Ikastetxeko langileen kudeaketa.

2.13. Ikastetxekoak ez diren langileen kudeaketa.

2.14. Zer egin COVID-19aren aurrean kalteberak diren langileen kasuan.

2.15. COVID-19 kasuen kudeaketa ikastetxeetan.

2.16. Toki entitatearen eta ikastetxeko zuzendaritzaren arteko elkarlana.

2.17. Esteka interesgarriak COVID-19ari buruz.

Atarikoa

“36.1. Ikastetxeetako hezkuntza jarduera unean-unean ezartzen diren osasun baldintzen arabera gauzatuko da.

36.2. Nahitaez bete beharko dira osasun agintaritzak ezartzen dituen desinfekzio eta prebentzio arauak.

Pandemiaren ondorioz, prebentzio eta babes neurri zenbait hartu behar izan dira, eta horrek nahitaez dakar hainbat jardueraren antolaketa berriz planteatzea, jarduera horiei segurtasunez berrekin ahal izateko. Litekeena da zenbait neurrik jarduera edo metodologia batzuen gauzapena mugatzea, eta kasu horietan malgutasunez ezarriko dira, une epidemiologikoaren arabera egokituz eta era murriztaileagoan edo malguagoan ezarriz, unean uneko arriskuak eta onurak baloratuta.

Nolanahi ere, adin honetako haurren beharrak direla-eta, helburua izanen da, lehen bezala, hezitzailearekin afektuzko lotura bat sortzea, eta beste parametro batzuk birpentsatuko dira, beharrezkoa bada, harreman hori sor dadin.

Haurrak ikaskideekin eta helduekin duen garapen emozionala ezin da eten, baina neurriak hartuko dira bizikidetza talde egonkorrak elkarrengandik bereizteko eta kontaktua bultzatzen duten egoerak saihesteko, betiere kontuan harturik harremanak ezin direla debekatu eta ez direla debekatu behar.

Jende asko txertatu da dagoeneko, eta 2020-2021 ikasturteko esperientzia ere badugu; baina birusaren aldaera berriak agertu direnez, eta ikasle guztiak ez daudenez txertatuak, ezin da aurreikusi zein izanen den 2021-2022 ikasturtearen bilakaera. Ondorioz, kontuan hartuta Gobernu Zentralaren eta autonomia-erkidegoen artean ezarritako esparru orokorra, ezinbestekoa da gerta daitezkeen osasun-egoera desberdinak aurreikustea eta horietara nola egokitu pentsatzea.

Esparru-dokumentu horretan ezarritako jarraibideei jarraituz, jarduera-protokolo bat zehaztu da, aurreikusitako bost osasun-egoeretara egokitu daitekeena: normaltasun berria, eta 1etik 4ra bitarteko alerta-maila duten egoerak, 4.a izanik okerrena. Betiere, lehentasuna izanen dute premisa hauek: langileen nahiz ikasleen osasuna eta segurtasuna bermatzea; gurasoen familia- eta lan-bizitza, osasun-krisialdiko uneetan ere, ahalik eta bateragarrien egitea; eta, horrekin eta hezkuntza sisteman inplikatutako beste pertsona askoren enplegua sortzeko eta mantentzeko beste neurri batzuekin, Nafarroako ekonomia pixkanaka suspertzen laguntzea.

Oinarrizko premisa horietatik abiatuta, kontingentzia-protokolo bat prestatu da, bi agertoki desberdin aurreikusten dituena 2021-2022 ikasturterako. Lehenbizikoan (1. egoera), irakaskuntza-jarduera presentziala bermatzen da. Zuhurtziaz, aurreikusten da ikasturte hasieran 2020-2021 ikasturteko ordutegi bera izatea, eta, pandemiaren bilakaeraren arabera, lehenbiziko agertoki horren barrenean bi aukera daude: bata, neurri batzuk lasaitzea, eta, bestea, ikastetxeetako ordutegiari dagokionez normaltasunera itzultzea.

Aurreikusitako bigarren agertokia (2. egoera) da ikastetxeak erabat ixtea, izan ikastetxe bat, batzuk edo denak, osasun agintariek zehazten dutenaren arabera.

Pandemiaren bilakaeraren arabera, osasun agintariek bestelako jarraibideak ezarriko balituzte, kontingentzia plan hau egokitu beharko litzateke, eta berriz zehaztu. Edonola ere, osasun egoerak eragindako aldaketarik badago, aldaketok ikastetxearen hezkuntza proiektuan sartu beharko dira, eta ahalegina egin beharko da horiek ahalik eta gutxien baldintza dezaten haurren garapena.

Hezkuntza administrazioari dagokio jarduketa esparru orokorra zehaztea Nafarroako Foru Komunitate osorako, eta toki entitateek eta ikastetxeetako arduradunek zehaztu beharko dituzte esparru orokor horren xehetasunak, beren errealitatearen arabera egokitzeko.

Nafarroako Gobernuak eman du dokumentu honetan aurreikusitako protokoloa abiarazteko baimena, eta osasun agintarien oniritzia ere jaso du.

Ikastetxe bakoitzak zehaztuko du dokumentu hau, toki entitatearekin koordinatuta, ikastetxeko kontingentzia plan batean. Plan hori posta elektronikoz igorri beharko da Hezkuntza Departamentuko Hezkuntzako Ikuskapen Zerbitzura eta Haur Eskolen eta Landa Eskolen Atalera. (sie/hiz@navarra.es) (seccion.escuelas infantiles.escuelasrurales@navarra.es). Ikastetxeko zuzendaria izanen da harremanetarako pertsona, COVID-19ari buruz ikastetxean izan daitezkeen gorabeherei dagokienez.

Azaldutakoarekin bat, eta Hezkuntzako eta Lanbide Heziketako Ministerioaren eta osasun agintarien ildoei jarraikiz, honako alderdi hauek jasotzen dira dokumentu honetan:

1. Ikastetxeen antolaketa, pandemia egoerari egokitua.

2. Antolaketa eta segurtasun neurriak.

1. Ikastetxearen antolaketa, pandemia egoerari egokitua

1.1. Ikastetxeen antolaketari buruzko zenbait gogoeta orokor.

–Ardatz nagusiak:

Helburu nagusia izanik koronabirusaren aurrean langileen eta haurren segurtasuna eta osasuna bermatzea, honako ardatz nagusi hauen inguruan eratu da dokumentu hau:

Kutsatzeak saihestea.
Ikastetxeetan gerta daitezkeen kasuak garaiz detektatzea eta isolatzea.
Hezkuntza arreta presentziala lehenestea.
Gurasoen lan bizitza eta familia bateragarri egitea, eta bermatzea haurrek hezkuntza eta arreta egokia jasotzen dutela ikastetxean.
Hezkuntza sisteman inplikatuta dauden sektore guztietan enplegua mantentzea, ahal den neurrian.

–Neurriei eustea:

Frogatuta dago edozein patogenoren kontrolerako bi alderdi nagusi hartu behar direla kontuan:

Espazioak eta pertsonen joan-etorriak antolatzea.
Neurri higienikoak.

Segurtasun neurri batzuk –esaterako, higienearen eta garbitasunaren inguruko irizpideak– berdin ezar daitezke pandemia gainditu ondoren ere, onuragarriak baitira hau eta beste edozein agente infekzioso kontrolatzeko.

Informazioa ematea ikastetxeko langileei eta familiei.

Oso garrantzitsua da, beraz, ikastetxeko langile guztiei eta familiei helaraztea jarduketa protokoloei buruzko informazioa, baita kontingentzia planean jasotako eta ikastetxeetan ezarritako neurriei buruzkoa ere (neurri horien helburua izanen da prebentzioa, higienea eta osasunaren sustapena bermatzea), eta bermatu beharko da informazio hori ongi ulertzen dela.

–Helburua hau da:

Jarraituko da ikastetxeko langileei informazioa ematen eta prebentzio nahiz higiene neurriei buruzko trebakuntza eskaintzen, eta haiek familiei helaraziko diete informazio hori.
Informazioa igorriko zaie familia guztiei, eta kanal ireki bat edukiko da, sor litezkeen zalantza guztiak argitzeko.
Infografiak, kartelak eta seinaleak erabiltzen jarraitu behar da, prebentzio eta higiene neurriak ulertzea eta betetzea sustatzeko. Informazio hori osasun agintarien irizpideen arabera eguneratua dagoela zainduko da.

–Bizikidetza talde egonkorrak:

Bizikidetza talde egonkorrak sortzeak helburu du pertsonak eta haiek okupatzen dituzten espazioak eremutan banatzea; horrela, aukera izanen da agerraldi baten aurrean talde egonkor osoa isolatzeko, gainerako taldeek jardunean jarraitzen duten bitartean, zaintza zorrotzeko eta alertako sistema baten pean.

Bizikidetza talde egonkorra da unitate bat, zeinetan haurrak elkarrekin baitaude ikasgela batean, hezitzailearekin batera, eta ikastetxeko gainerako talde egonkorrengandik isolatuta.

Bizikidetza talde egonkor bakoitzean egonen da martxoaren 26ko 28/2007 Foru Dekretuan ezarritako gehieneko haur kopurua, adin tartearen araberakoa. Haur horiek elkarren artean sozializatzen eta jostatzen ahal dira, hezitzailearekin batera. Halaber, bizikidetza talde egonkorrean sartuko dira hezkuntza premia bereziak dituzten haurrak, laguntzako hezitzailea eta, kasua bada, errefortzuko hezitzailea.

Haur Hezkuntzako lehen zikloko ikastetxeetan, askotan, unitate batek baino gehiagok erabiltzen dituzten gelak egoten dira, 28/2007 Foru Dekretuan jasotzen den bezala. Horietan, haurren bi unitate egoten dira, beren hezitzaileekin, espazio fisiko berean eta jostaketarako espazioak, komunak eta material pedagogikoa partekatzen. Antolaketa hori, zeina pedagogiaren eta antolamenduaren aldetik egokiagoa baita, bizikidetza talde egonkortzat har daiteke.

Zuzendaria ere sartuko da bizikidetza talde egonkorrean, baldin eta errefortzuko hezitzaile gisa parte hartzen badu, ikastetxeko hezkuntza proiektuari jarraikiz. Halaber, bizikidetza talde egonkorrean sartuko dira praktiketako ikasleak, ikastetxeko kontingentzia planean ezartzen diren baldintzetan.

Posible bada, komun bat esleituko zaio bizikidetza talde egonkor bati edo biri, eta, ahal den neurrian, ez dira erabiliko beste talde egonkorrei esleituriko komunak. Nolanahi ere, garbiketa eta desinfekzioa indartuko dira.

Ahal den neurrian, talde egonkorrak ez du harremanik izanen gainerako talde egonkorrekin gune komunetan (jolastokia, jantokia...).

–Higiene neurriak:

Gobernu Zentralaren eta autonomia-erkidegoen artean adostutako esparru-dokumentuan ezartzen den bezala, COVID-19aren aurrean prebentzioa, higienea eta osasuna sustatzeko oinarrizko printzipioak ikastetxeetan honako printzipio hauetan egituratzen dira:

Bizikidetza talde egonkorraren funtzionamendu orokorra.

Talde egonkorreko hezitzailea erreferentziako ikasgelan egonen da bere lanaldian, eta, kasua bada, baita gune komunetan ere, haur taldearekin batera, salbu eta une jakin batzuetan.

Ahal den neurrian, errefortzuko hezitzaile bat baino gehiago duten ikastetxeetan, bizikidetza talde egonkor beretan ariko da hezitzaile bakoitza.

Gainera, bestelako profesionalak egon daitezke, hezkuntza arretan parte hartzen dutenak, bizikidetza talde egonkorrekoak izan gabe ere: zuzendaria, Nafarroako Hezkuntza Bereziko Baliabideen Zentroko (NHBBZ) langileak, Laguntza Goiztiarreko Zentrokoak (LGZ), lantegikoak... Horrelakoetan, ahalik eta pertsona gutxien sartuko dira bizikidetza talde egonkorrean, higiene eta segurtasun neurriak errespetatuz betiere.

Baldin talde egonkor batek baino gehiagok sarbide bera erabili behar badute (sarrera, korridoreak...), modu mailakatuan erabiliko dute, ez dadin pilaketarik sortu eta ez daitezen denak aldi berean ibili gune komunetan.

Ikasgela batetik bestera joaten diren langileak, edo zenbait talde egonkorrek erabiltzen dituzten ikasgeletan eta gune komunetan egoten direnak, kutsatze bektoreak dira, eta birusa zabaltzen ahal dute gune horietan guztietan. Hori dela eta, komeni da ahalik eta joan-etorri gutxien egitea ikastetxe barnean. Garrantzitsua da pertsona bakoitzak, ahal den neurrian, bere lekua izatea eta lanerako berak bakarrik erabiliko duen materiala edukitzea.

Ahal den heinean, ez da haurrik pasatuko bizikidetza talde egonkor batetik bestera.

1.2. Egoeren sailkapena unean uneko osasun errealitatearen arabera.

Egoera epidemiologikoa osasun agintariek zehaztuko dute, eta maila desberdinak ditu, osasun egoeraren larritasunaren arabera eta kutsatzeko arriskuaren arabera. Egoera epidemiologiko horren arabera erabakiko da noiz pasatu behar den egoera batetik bestera, ikastetxean kasuak agertu direlako edo Foru Komunitatearen osasun egoera aldatu delako, aparteko agerraldi baten ondorioz.

Osasun agintariek erabakiko dute, kasua bada, egoera batetik bestera igarotzea.

–1. egoera: hezkuntza jarduera presentziala.

1. egoeran, hezkuntza jarduera presentziala izanen da. Egoera honetan arreta presentziala bermatuko da ikastetxeetan, haur guztientzat, eskola-egun guztietan.

Egoera hori mantenduko da ikasturte osoan, salbu eta, osasun agintarien iritziz, beste egoera murriztaileago batera igaro behar bada, osasun arriskua handiagotu delako.

–Taldeen antolaketa:

Egoera honetan, bermatuko da haur guztiei arreta presentziala ematen zaiela ikastetxeetan.

Ikasgelen banaketa eta ratioa zehaztuko dira martxoaren 26ko 28/2007 Foru Dekretuan ezarritakoari jarraikiz.

Ikastetxe bakoitzeko talde arduradunak beharrezkotzat jotzen badu, aztertuko da espazio batzuei (lantegiak, motrizitate gela...) beste erabilera bat eman ahal izatea.

1. egoeran, ikastetxeko bizitza normaltasunaren barnean dago, indar bereziz zaintzen dira urruntze eta higiene neurriak (1,5 metroko tartea helduen artean, maskara, eskuak maiz garbitzea eta hidrogela erabiltzea) eta saihesten da talde egonkor berekoak ez diren haurren arteko interakzioa.

Egoera honetan, hezitzaile bakoitza une oro dago bere bizikidetza talde egonkorrarekin. Ikastetxeko zuzendaria, errefortzuko hezitzaileak eta zenbait bizikidetza talde egonkorretako haurrei arreta egiten dieten langileak (NHBBZko langileak, LGZkoak, lantegikoak...) talde egonkor batetik bestera mugitzen ahal dira, une oro betez horietako bakoitzarentzat ezarritako segurtasun eta higiene neurriak.

Haur Hezkuntzako lehen zikloko ikastetxeetan, askotan, goizean hezitzaile batek harrera egiten die zenbait ikasgelatako haurrei, edo horiei arreta ematen die azken orduetan; egoera berrian, haur horiek ez dira izanen talde egonkor berekoak, eta horietako batzuk beharbada joanen dira beren erreferentziako ikasgela ez den beste batera.

Egoera horri eusten ahalko zaio, baldin eta haurrak gehienez ere hiru bizikidetza talde egonkorretakoak badira eta behar diren segurtasun neurriak aplikatzen badira haurren artean, ez dadin interakziorik egon; horretarako, bereizteko bitarteko fisikoak (itxiturak...) erabiltzen ahalko dira, edo zehaztuko da zenbat haur joan daitezkeen, hezitzailearentzat erraza izan dadin une oro zaintzea haurren artean tarte egokia gordetzen dela.

Gainera, behar diren neurriak bete beharko dira higieneari, desinfekzioari eta aireztapenari dagokienez, bizikidetza talde egonkorra bere ikasgelara joan aurretik, edo azken orduetan zenbait talde egonkorretako haurrak ikasgela berera joan aurretik.

Ahal den heinean, aire zabaleko jarduerak lehenetsiko dira, helburutzat jarrita inguruneko heziketa indartzea eta naturarekin lotutako pedagogia bat aurrera eramatea.

–Jarduera osagarriak:

Osasun egoera zein den, horren arabera erabakiko da ikastetxeko proposamen pedagogikoan aurreikusitako jarduera osagarriak egin ala ez (eskolatik ateratzea, bisitak, txangoak...).

–Hezkuntza jarduerak lantegian:

Ikastetxean lantegi bat badago, ikasgelatik kanpokoa eta denek erabiltzen dutena, oinarrizko printzipio hau bete beharko da: ez da interakziorik egonen talde egonkor berekoak ez diren haurren artean. Horrez gain, erabilitako materiala garbitu eta desinfektatu beharko da lantegiko saioa bukatutakoan.

–Antolaketa, harrera-aldian:

Harrera-aldirako aurreikusiriko egunetan, familiak ikasgeletan sartzen ahalko dira, baldin eta higiene eta ardura neurri egokiak hartzen badituzte, hala gune komunetan nola ikasgelan.

Heldu BAKAR BATek lagunduko dio haurrari harrera-aldian, baina gerta liteke lagun egiten dion pertsona bat baino gehiago egotea aldi horretan. Ahalegina eginen da ahalik eta laguntzaile gutxien egon dadin aldi berean ikasgelan.

Laguntzaileak ezin du harrera-aldian parte hartu, baldin eta COVID-19arekin bateragarriak diren sintomak baditu edo bakartze aldian edo berrogeialdian badago. Horretaz gainera, COVID-19aren aurrean arriskuko eritasun bat duten laguntzaileak (diabetesa, eritasun kardiobaskularra –hipertentsioa barne–, eritasun hepatiko kronikoa, biriketako eritasun kronikoa, giltzurrunetako eritasun kronikoa, immunoeskasia, fase aktiboan dagoen minbizia, obesitate morbidoa) eta haurdun dauden emakumeak harrera-aldian parte hartzea komeni den jakiteko beren erreferentziako mediku-taldearen ebaluazioa beharko da.

Aldi honek dirauen bitartean, ikastetxean garbiketa neurriak zorrotz beteko dira, hala gune komunetan (sarbideak, korridoreak...) nola ikasgelan.

Haur bakoitzak bere objektu pertsonala eramaten ahalko du, harrera-aldian lagungarri izateko. Azpimarratu behar da ezen familien erantzukizuna dela higiene neurriak zorrotz betetzea, haurrek etxetik daramatzaten materialei eta gauzei dagokienez (arropa, motxilak, objektu pertsonala...).

Harrera-aldia bukatutakoan, laguntzailea ikasgelako ateraino joaten ahalko da haurrarekin.

–Ordutegiak:

2021-2022 ikasturtearen hasieran, ordutegia izanen da Hezkuntza Departamentuak 2020-2021 ikasturterako ezarritako bera. Ikastetxeetako arduradunek sarrera-irteerak antolatuko dituzte, era mailakatuan, eta ordutegiak ezarriko dituzte ahalik eta familia gutxien elkartzeko sarrera-irteera horietan.

Ikasturtea hasi aurretik, bilera bat eginen da familiekin, azaltzeko zein izanen diren haiei dagozkien ordutegiak (ikastetxean sartzeko eta ateratzeko), harrerarako guneak eta sartu eta ateratzeko zirkuituak. Egun horretarako prestatuta egon behar dira beharrezkoak diren seinaleztatze eta balizatze neurriak.

–Jantoki zerbitzua:

Jantokiaren antolaketan bermatu eginen da aireztapen, higiene eta urruntze neurriak betetzen direla. Ukipen fisikoa ahalik eta gehien saihesteko, eremua antolatuko da ikastetxean antolatu diren talde egonkorren arabera. Bitarteko fisikoak (itxiturak, seinaleak, balizak, etab.) erabiliko dira bizikidetza taldeen arteko segurtasun tartea errespetatzeko, txanda bat baino gehiago ezartzeko aukera baztertu gabe.

Ikasturtearen hasieratik beretik jantoki zerbitzua ikasgelan emateko aukera aztertuko da. Horretarako, bermatu beharko da ikasgela behar bezala aireztatuta dagoela eta baldintza higienikoak egokiak direla, elikadura-segurtasun neurriak betez bazkaldu ahal izateko han. Behin ikasturtea hasita, ahalegina eginen da haurrei aldaketarik ez eragiteko.

Jantoki zerbitzuari buruz prestatutako fitxan adierazten dira jarraibide espezifikoak.

–Bilerak familiekin:

1. egoeran, osasun egoerak horretarako bide ematen badu, familiekin egin beharreko bilerak presentzialak izan daitezke. Prebentzio neurriak bete beharko dira eta haur bakoitzeko pertsona batek, gehienez, parte hartzen ahalko du. Nolanahi ere, ahal dela, telefonoz edo modu telematikoan eginen dira.

–1. egoeraren indarraldia eta har litezkeen erlaxazio neurriak:

1.egoerari eutsiko zaio osasun agintariek arrisku epidemiologikoak hala eskatzen duela uste duten bitartean.

Ikasturteko bi une zehatzetan soilik, urriko lehen hamabostaldian eta Eguberrietako oporren ondorengo lehen hamabostaldian, har litezke egoera hori erlaxatzeko neurriak, baldin eta osasun agintariek hilabeteko aurrerapenarekin jakinarazten badiote Hezkuntza Departamentuari egoera epidemiologikoak erlaxazio hori ahalbidetzen duela edo pandemia-arriskua desagertu dela, eta Hezkuntza Departamentuarekin hala adosten bada, bermatzeko behar bezala antolatzen direla ikastetxeetako ordutegiak, hala langileena nola familiena.

–Har litezkeen erlaxazio neurriak:

1.–Harrera-alditik kanpo ere familiak ikasgeletan sartzen ahalko dira, baldin eta higiene eta ardura neurri egokiak hartzen badituzte, hala gune komunetan nola ikasgelan. Harrera-aldian bezala, heldu bakar batek lagunduko dio haurrari, eta ahalegina eginen da ahalik eta laguntzaile gutxien egon dadin aldi berean ikasgelan.

2.–Harrera-alditik kanpo ere haur bakoitzak bere objektu pertsonala eramaten ahalko du. Azpimarratu behar da ezen familien erantzukizuna dela higiene neurriak zorrotz betetzea, haurrek etxetik daramatzaten materialei eta gauzei dagokienez (arropa, motxilak, objektu pertsonala...).

3.–Familiek eskolan uzten ahalko dituzte aulkitxoak, horretarako berariaz prestatutako tokian.

–Normaltasun berria:

Osasun agintarien iritziz pandemiaren arrisku-egoerak hala ahalbidetzen badu, ikastetxe bakoitza pandemiaren aurretik zeukan ordutegira itzultzen ahalko da, agintariek ezarritako baldintzak betez. Osasun agintarien onespena izanez gero, normaltasun berrian, taldeen arteko interakzioa onartuko da aire zabaleko jarduerak egiteko.

Bestalde, osasun agintariek aldatzen badituzte “COVID-19a dela eta, ikastetxeetarako prebentzio, higiene eta osasunaren sustapenerako neurriak” dokumentuan jasotako neurriak (apartatu honetan: COVID-19ari erantzuteko jarduketak arlo, kolektibo eta taldeen arabera-Hezkuntza arloa), protokolo hau ezartzen diren neurri berrietara egokituko da ikasturteko bi data horietan (urria eta urtarrila), salbu eta Ministerioak ezarritako neurri berriak murriztaileagoak badira pandemiaren eraginagatik eta berehala aplikatu behar badira.

2. egoera: ikastetxeak erabat ixtea.

Agintariek ikastetxeak erabat ixtea agintzen badute, bertan behera geratuko da jarduera presentziala.

Inklusio, Berdintasun eta Bizikidetza Zerbitzua, batez ere NHBBZ zentroaren bitartez, ikastetxeekin elkarlanean ariko da, premia bereziak dituzten ikasleei eta gizarte-bazterketaren arriskuan direnei zuzendutako arreta- eta jarraipen-mekanismoak garatzeko.

2. Antolaketa eta segurtasun neurriak

Jarraian ematen diren fitxetan zehazten dira sarrera-irteerak eta joan-etorriak antolatzeari dagozkion neurriak, eta segurtasun nahiz osasun neurri orokorrak.

2.1. Aireztapen neurriak.

2.2. Prebentzio neurri pertsonalak.

2.3. Maskaren erabilera.

2.4. Ikasleen sarrera-irteeren kudeaketa.

2.5. Ikasgelen kudeaketa.

2.6. Barneko joan-etorrien kudeaketa.

2.7. Jolastokiaren eta jolasaldiaren kudeaketa.

2.8. Komunen erabileraren kudeaketa.

2.9. Garbiketa eta desinfekzioa.

2.10. Jantokia.

2.11. Siesta.

2.12. Ikastetxeko langileen kudeaketa.

2.13. Ikastetxekoak ez diren langileen kudeaketa.

2.14. Zer egin COVID-19aren aurrean kalteberak diren langileen kasuan.

2.15. COVID-19 kasuen kudeaketa ikastetxeetan.

2.16. Toki entitate titularraren eta ikastetxeko zuzendaritzaren arteko elkarlana.

2.17. Esteka interesgarriak COVID-19ari buruz.

2.1. Aireztapen neurriak.

Ikastetxea aireztatzea: ebidentzia berrienen arabera, SARS-CoV-2a aerosolen bidez transmititzen da. Horregatik, komeni da azpimarratzea oso garrantzitsua dela aireztapena eta harekin lotutako zenbait gomendio indartzea.

–Ahal dela, modu naturalean aireztatu behar da. Aireztapen gurutzatua gomendatzen da, ahal bada modu iraunkorrean, kontrako ateak eta/edo leihoak irekiz edo, gutxienez, aretoaren alde desberdinetakoak, airearen zirkulazioa errazteko eta eremu osoa modu eraginkorrean aireztatzen dela bermatzeko. Puntu bakar bateko ateak eta leihoak ireki ordez, hobe da hainbat irekiera puntu edukitzea, banatuta. Ikastetxeko instalazioak maiz aireztatu behar dira, eta, ahal dela, modu iraunkorrean, eta gutxienez 15 minutuz lanaldiaren hasieran eta amaieran, jolas-orduan eta, ahal den guztietan, korridoreetan aireztapen ona bermatuz; gainera, istripuak prebenitzeko beharrezko neurriak hartu beharko dira. Aipatutako 15 minutuko aireztapen-denbora orientagarria da, eta ikasgela bakoitzaren baldintzetara eta ezaugarrietara egokitu behar da.

SARS-CoV-2ren transmisio komunitario altuko egoeretan, aireztapen naturala lehenestea komeni den aztertu beharko da, transmisioaren prebentzioan duen eraginkortasunagatik, konfort termikorako beharrezkoak diren tenperatura- eta hezetasun-baldintzen edo eraginkortasun energetikoaren eskakizunen gainetik.

–Aireztapen naturala nahikoa ez bada, aireztapen artifiziala (mekanikoa) erabil daiteke; horretarako, aire-hornidura handitu eta birzirkulatutako aire-frakzioa ahalik eta gehien murriztu behar da, airea behar bezala berritzeko. Sistema horiek klimatizaziorako erabiltzen diren sistema berberak dira, eta kanpoko airearekin barruko airea berritzen laguntzen dute.

Aireztapen artifizialeko ekipamenduak modu egokian instalatu behar dira, eta behar bezala zainduko direla bermatu behar da.

–Aireztapen naturalaren edo mekanikoaren bidez aireztapen egokia lortu ezin bada soilik erabil daitezke iragazki edo aire-garbigailuak (HEPA iragazkiak dituztenak). Bestela, beste toki batzuk erabiltzea komeni den aztertzen ahal da (ikastetxeko ikasgelak edo aretoak edo udalarenak). Aire-iragazkiak erabiltzea ezinbestekoa bada, gomendatutako aire-emaria bermatzen duen eraginkortasuna izan behar dute iragazki horiek, eta aholkularitza teknikoa jaso behar da horiek kokatzeko eta mantentzeko.

–Ez da beharrezkoa CO2 neurgailuak erostea eta paratzea uneoro. Aireztapenaren eraginkortasunari buruzko arrazoizko zalantzak daudenean edo aireztapen ona bermatu ezin duten egoera klimatologikoetan, ekipo horiek erabil daitezke neurketa puntualak edo aldian behingoak eginez, airea behar bezala berritzea bermatzen duten aireztapen-praktikei buruzko ezagutza eta esperientzia sortzen laguntzeko.

Neurgailuek behar bezala kalibratuta eta egiaztatuta egon behar dute, bat etorriz SARS-CoV-2 birusa aerosolen bidez transmititzeko arriskuaren ebaluazioari buruzko agiri teknikoan jasotakoarekin. Prebentzio neurriak eta gomendioak.

–Profesional batek arreta ematen badie espazio berean ikasle desberdinei, elkarren segidan (arreta goiztiarreko langileak, NHBBZkoak, beste batzuk...), erabilitako gainazalak desinfektatu beharko dira, eta ikasgela aireztatu saio bakoitzaren ostean 5 minutuz, gutxienez, edo beste maiztasun batekin, betiere bat etorriz aireztapen egokia bermatzen duten parametroekin.

2.2. Prebentzio neurri pertsonalak.

Hartu beharreko prebentzio neurri pertsonal nagusiak dira:

–Eskuak garbitu, maiz eta tentu handiz, gutxienez 40 segundoz urarekin eta xaboiarekin, eta, ezin bada, 20 segundoz gel hidroalkoholikoarekin. Eskuetako higienea areagotzea gomendatzen da, honako une hauek ziurtatuz: ikastetxera iristean, doministiku egin edo zintz egin ondoren, tokiz edo jardueraz aldatzean, bazkaldu aurretik eta ondoren, komunera joan ondoren eta zikinkeria agerikoa den orotan.

–Ez ukitu sudurra, begiak eta ahoa, erraza da-eta eskuen bidez birusa transmititzea.

–Eztul edo doministiku egitean, estali ahoa eta sudurra ukondo tolestuarekin.

–Erabilera bakarreko zapiak erabili arnas-jariatzeak garbitzeko; ondoren, bota.

–Ez da gomendagarria gel hidroalkoholikoa erabiltzea haurrekin, maiz sartzen dituzte-eta eskuak ahoan. Arretaz ibili behar da ikuskapenik gabe eskura ez uzteko.

–Garrantzitsua da haur txikiak, neskatoak eta mutikoak kontsolatzea negar egiten dutenean edo triste edo urduri daudenean. Haur bat besoetan hartzean, garbitzean edo elikatzean, ahal den neurrian babesa handitzea gomendatzen da: eskuak maiz garbitzea; haur baten gorputz-likidoekin kontaktuan egon diren zatiak garbitzea; begiak ez ukitzea; ahal den guztietan gorputz-likidoekin zikindutako arropa aldatzea; eskuak garbitzea elikagaiak manipulatu aurretik eta ondoren, edo jaten lagundu aurretik eta ondoren.

–Ilea bilduta eramatea gomendatzen da, eta eraztunak, eskumuturrekoak eta zintzilikarioak ez erabiltzea.

–Ahal den neurrian, egunero tenperatura altuan garbitu laneko arropa.

–Laneko Arriskuen Prebentziorako Zerbitzuak ebaluatuko du jarduera jakin batzuen esposizio arriskua SARS-CoV-2 birusarekiko, dokumentu honetan adierazitakoetatik harago.

2.3. Maskaren erabilera.

Pandemia-egoeran maskara erabiltzea neurri osagarri bat da, eta ez da ezartzen diren gainerako prebentzio neurrien ordezkoa; neurri nagusiak beti errespetatu beharko dira, hala nola urruntze soziala, eskuen higiene zorrotza, aurpegia, ahoa, sudurra eta begiak ez ukitzea, eta eztul eta doministiku egitean aho-sudurrak estaltzea.

Maskararen erabilera ez da gomendagarria desgaitasuna edo menpekotasuna duten pertsonentzat, egoera horrek eragozten badie maskara kentzeko autonomoak izatea, edo beren portaeraren alterazioengatik, maskara era egokian erabiltzea ezinezkoa duten pertsonentzat.

Ez da gomendagarria ikastetxeetan 3 urtetik beherakoek maskara erabiltzea (kontraindikatuta dago 2 urtetik beherakoetan, itotzeko arriskuagatik).

Ikastetxeak maskara higienikoak izanen ditu langileentzat.

Nafarroako Gobernuko Osasuneko kontseilariaren foru agindu baten bidez arautuko da maskaren erabilera.

–Maskara jartzeko eta kentzeko jarraibideak:

Gomendatzen da maskara larruazalaren gainean jartzea zuzenean (hau da, erabiltzailearen azala ukitzen duen ilerik egon gabe tartean, eta, zenbaitentzat, azal soilduan), eta neurri hauek betetzea:

Eskuak garbitzeko ura eta xaboia erabiltzea edo soluzio hidroalkoholikoarekin igurztea, maskara manipulatu aurretik.
Identifikatzea zein den maskararen goialdea.

Maskara nola jarri:

1. Jarri maskara aurpegian eta sudur-pintza egokitu sudurrera.

2. Maskarari kanpoaldetik heldu eta buruko uhala atzera pasatu, edo atzean lotu, belarrien bi aldeetan, elkar gurutzatu gabe.

3. Eraman maskararen behealdea kokotsera. Egiaztatu maskarak kokotsa estaltzen duela.

4. Sudur-pintza bi eskuekin estutu sudurrera, ongi egokitzeko.

5. Egiaztatu maskara ongi jarri dela. Horretarako, beharrezkoa da egiaztatzea zigilatuta gelditu dela eta arnasa ongi hartzen dela.

6. Behin doitu ondoren, ez ukitu maskara eskuekin. Erabiltzaileak maskara ukitu behar badu, aurretik eskuak garbitu behar ditu urarekin eta xaboiarekin, edo soluzio hidroalkoholikoarekin igurtzi.

Maskara nola kendu:

1. Kokotsa gora eraman eta maskarari gometatik heldu.

2. Maskara erditik tolestu, kanpoaldea ukitu gabe.

3. Gomendatzen da maskara paperezko edo kartoizko poltsa batean sartzea.

4. Berriz erabiltzeko, maskarari gometatik heldu, poltsa barnetik ukitu gabe.

Maskara erabiltzean eta/edo kentzean kutsapenik ez izateko, arau hauek bete behar dira:

1. Eskuak garbitu urez eta xaboiez edo soluzio hidroalkoholikoarekin, maskara jarri aurretik eta ondoren.

2. Behin jarri ondoren, ez ukitu maskara eskuekin.

3. Maskara kendu maskararen aurrealdea ukitu gabe.

4. Botatzekoa den maskara hondakinetarako ontzian jarri.

5. Eskuak garbitu urez eta xaboiez edo soluzio hidroalkoholikoarekin.

2.4. Ikasleen sarrera-irteeren kudeaketa.

Aplikatu beharreko neurriak funtsezko irizpide hauen araberakoak izanen dira:

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Behar hainbat sarbide kontrolatu ezarriko dira.

2. Lagun-egitearen ardura duten pertsonek maskara eramanen dute.

3. Sarbide guztietan soluzio hidroalkoholikoa izanen da ikastetxera lagun egitera joaten diren guztiek eskuak desinfektatzeko. Soluzio hidroalkoholikoa beti haurrek ez hartzeko moduan egonen da.

4. Eremu/talde egonkor bakoitzaren sarrera eta irteera bideak seinaleztatuko dira eraikinetan. Familiek zein langileek jakin beharko dute nondik sartu behar duten ikasgelan eta ikastetxetik nondik atera behar duten.

5. Pertsonen arteko tartea gordetzen dela bermatuko da, bitarteko guztiak erabiliz; batez ere, lurrean markak jarrita eta informazio-paneletan adierazita sartzeko eta ateratzeko ateak.

6. Bermatu behar da sarrera-irteerak era mailakatuan egiten direla. Horretarako, familiei jakinarazi behar zaizkie ordutegiak eta sarrera-irteera guneak zein diren, ateetan pilaketak izatea saihestearren.

7. Ahalik eta gehien murriztuko zaie sarbidea ikastetxekoak ez diren pertsonei. Haurrekin batera doazen helduek erantzukizun- eta higiene neurriak zorrotz beteko dituzte sarreratik ikasgelarainoko bidean.

8. Ikastetxeak erabakiko du aulkitxoak eskolan utz daitezkeen edo ez. Eskolan gelditzen badira, haiek uzteko eremu espezifiko bat izanen da.

9. Antolatu behar da haurrek eskuak garbitzea, ikasgeletara sartu aurretik, ura eta xaboia erabiliz, ahal bada.

10. Ikastetxe bakoitzak erabakiko du haurrek eskolan izan ditzaketen eskolarako soilik erabiltzeko moduko oinetakoak.

2.5. Ikasgelen kudeaketa.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

Ikasgelak aireztatzea:

1. Agiri honen 2.1 fitxan adierazitako jarraibideak beteko dira:

–Aireztapena transmisioa minimizatzeko neurri eraginkorrenetako bat denez, eta maiz aireztatzea gomendatzen denez, arreta berezia jarriko da talde horietan, istripuak saihesteko.

–Korridoreak eta eremu komunak behar bezala aireztatuta daudela bermatuko da.

–Egunero, berokuntza behar bezain goiz pizten saiatu beharra dago, ikasgeletan tenperatura egokia egon dadin eskolak hasterakoan.

–Kanpoko tenperatura dela eta, kanpoko leihoak gehiago irekitzen ahal badira, leihoak maizago ireki ahal izanen dira, baldin eta horrek sortzen ez badu ikasgelako erabiltzaileen osasuna arriskuan jartzeko moduko aire-korronte handirik eta ziurtatzerik bada barneko tenperatura erosoa dela. Eragotzi behar ditugu COVID-19arekin zerikusirik ez duten arnasbideetako gaixotasunak.

2. Altzarien banaketak ez du aukerarik eman behar ikasleak aurrez aurre jartzeko.

3. Mahaiak ikasgelako atetik urruntzen saiatuko da.

4. Erabiliko ez diren materialak eta altzariak kenduko dira. Ahal den neurrian, materialak eta altzariak murriztuko dira, garbitzeko eta desinfektatzeko lanak errazteko, eta, orobat, jolaserako toki aski uzten dela bermatuko da.

5. Ikasgela espezifikoak ahal den gutxien erabiliko dira, eraikinaren barneko mugimenduak ahal den gehien mugatzeko. Ikasgelaren bat erabiltzen bada eskolaldiaren hasieran edo bukaeran talde egonkor bateko eta besteko haurrekin, garbitu eta desinfektatu beharko da berriz erabili baino lehenago.

6. Haurrek ezin dute etxetik ekarritako jostailurik edo bestelako gauzarik eraman zentrora, harrera-aldian izan ezik. Familien ardura izanen da material horren gaineko higiene neurriak zorrotz betetzea.

7. Txupeteetarako esterilizagailua erabiliko da egunero eta behar den guztietan. Txupete bakoitza horretarako bakarrik erabiliko den ontzian gordeko da.

2.6. Barneko joan-etorrien kudeaketa.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Korridoreak, komunak eta eremu komunak behar bezala aireztatuta daudela bermatuko da, eta agiri honen 2.1 fitxan jasotako jarraibideak beteko dira.

2. Seinale sistema ulerterraza erabiliko da.

3. Oinarrizko segurtasun-tartea gordeko da beti korridoreetan, komunetan eta eremu komunetan.

4. Korridoreetan eta eskaileretan, hala behar denean, joan-etorrien noranzkoa adieraziko da. Joan-etorriak norabide bakarrean egiten saiatu behar da, ahal bada. Beharrezkoa bada, norabide desberdinak erabiliko dira sartzeko, ateratzeko eta beste joan-etorrietan.

2.7. Jolastokiaren eta jolasaldiaren kudeaketa.

Aplikatu beharreko neurriak funtsezko irizpide hauen araberakoak izanen dira:

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Talde egonkor berekoak ez diren haurrak elkarrekin gurutzatzea saihestuko da. Horretarako:

–Talde egonkorren sarrera-irteerak mailakatuko dira.

–Ikasgelatik ateratzean eta hara itzultzean talde egonkorren arteko segurtasun-tartea gordetzen dela bermatuko da.

–Talde egonkorrak jolastokian banatuko dira haien arteko segurtasun-tartea gordez.

–Talde bakoitzak jolastokian egon beharreko denbora egokitu edo murriztuko da, ikastetxearen antolaketaren arabera.

2. Jolasaldia antolatzea gomendatzen da, halako moduan non behar bezala zainduz gero posible izanen baita bizikidetza talde egonkor bateko kideentzat kontaktu- eta baloi-jokoetan aritzea edo objektu-trukeak egitea.

3. Bankuak, altzaria, jokoak, etab. markatzeko sistema bat aurreikusiko da, osasun agintariek agintzen badute, horiek erabileratik kanpo uzteko.

4. Eguraldiak kanpoko jolastokia erabiltzeko aukerarik ematen ez badu eta ikastetxeak ez badu bestelako eremurik, haurrak beren ikasgelan geldituko dira. Hala gertatuz gero, ahaleginak eginen dira ikasgela aireztatua izan dadin.

2.8. Komunen erabileraren kudeaketa.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Korridoreak, komunak eta eremu komunak behar bezala aireztatuta daudela bermatuko da, eta agiri honen 2.1 fitxan jasotako jarraibideak beteko dira.

2. Bizikidetza talde egonkor bakoitzeko edo biko komun bat esleituko da, ahal izanez gero. Ezin bada, haien garbiketa eta desinfekzioa sakonduko da.

3. Komunak talde egonkor batek baino gehiagok erabiltzen badituzte, taldeak batera sar ez daitezen ahaleginduko da. Hori hala izanik ere, adin horretako haurrek dituzten beharrak zein diren ikusirik, talde egonkor bateko baino gehiagoko haurrak batera sartzen badira, beti errespetatuko dira higiene eta segurtasun neurriak.

4. Komun barnean dauden haurren kopurua murriztuko da, ahal den neurrian.

5. Komunak garbitzean higiene neurriak zorroztuko dira, bereziki komun horiek bizikidetza talde egonkor batek baino gehiagok erabiltzen badituzte.

6. Xaboi likidoaren eta eskuak lehortzeko paperaren hornidura egokia ziurtatuko da.

7. Eskuak paperarekin xukatuko dira, ahal dela. Ez da toallarik erabiliko.

8. Hezitzaileak eskuak desinfektatuko ditu pixoihala jarri aurretik eta ondoren, eta horretarako erabilera bakarreko eskularruak erabiliko ditu. Pixoihala aldatzen den aldi oro desinfektatuko da aldagailua. Haur bakoitzak aldagailuaren oinarriko toalla indibiduala izanen du, erabilera esklusibokoa.

9. Bermatuko da egunean hirutan garbituko direla komunak eta desinfektatze lanak maiz eginen direla, baita paperontziak hustuko direla ere. Gomendatzen da paperontziek pedalaz irekitzeko tapakia izatea, ukipenak saihesteko.

10. Komunak maiz aireztatuko dira.

11. Ikastetxekoak ez diren pertsonei mugatu eginen zaie komunen erabilera.

2.9. Garbiketa eta desinfekzioa.

Ikastetxe bakoitzak bere garbiketa eta desinfekzio protokoloa izanen du, bere ezaugarriekin bat datorrena. Protokoloak ohar hauek jasoko ditu:

–Aireztapena:

Garbiketa egin bitartean, lokalak behar bezala aireztatuta egon behar du, eta agiri honen 2.1 fitxan adierazitako jarraibideak beteko dira.

–Ohiko garbiketa:

1. Garbiketak germen, zikinkeria eta zaborrak kentzen ditu, eta desinfekzioak, berriz, germenak hiltzen ditu gainazal eta gauza horietan. Horregatik, oso garrantzitsua da ongi garbitzea desinfektatu baino lehen.

2. Garbiketa-lanetan, arreta berezia jarriko da erabilera komuneko eremuetan eta gehien ukitzen diren azalerak garbitzean, hala nola ateetako eskulekuak, mahaiak, aulkiak, altzariak, eskudelak, lurzoruak, jostailuak eta antzeko ezaugarriak dituzten elementuak.

3. Erraz garbitu edo desinfektatzeko moduko gauzak eta jostailuak erabiliko dira. Peluxeak edo oihalezko jostailuak erabiltzen badira, tenperatura altuan garbitzeko modukoak izanen dira. Haurrek erabilitako material pedagogikoak garbitzeko, erabilera bakarreko paper-zapi desinfektatzaileak erabiltzen ahalko dira.

4. Talde egonkor batek baino gehiagok erabilitako material pedagogikoak erabili aurretik eta ondoren desinfektatu direla kontrolatuko da.

5. Garbiketa eta desinfekzio neurriak aplikatuko dira, orobat, langileen gune pribatuetan, hala nola atsedenguneak, aldagelak, armairuak, komunak eta sukaldeak (baxera, mahai-tresnak eta beirateria garbituko dira plater-garbigailuan, erabili ez arren ikasleek beharbada ukitu dituztenak barne).

–Garbitzeko eta desinfektatzeko produktuak erabiltzeko irizpideak:

1. Ez da egin behar desinfektatzeko lanik ikastetxeko ikasleak edo langileak bertan daudelarik.

2. Garbitasunaren eta espazioen erabileraren artean utzi beharreko denbora-tarteak errespetatu behar dira.

3. Ez ahaztu lixiba eta amoniakoa ez direla nahastu behar.

–Maiztasuna:

1. Ikastetxeak egunean behin, gutxienez, garbitu eta desinfektatuko dira, eta maizago eginen da, behar izanez gero, erabilera handiko espazioetan, adibidez, komunetan, zeinak 2 edo 3 alditan garbituko baitira ohiko erabileraren eta erabiltzaile kopuruaren arabera.

Ikasgeletan, jantokian edo beste espazio batzuetan txandak ezarriz gero, ikasleek alde egiten dutenean horiek garbitu, desinfektatu eta aireztatuko dira txanda batetik bestera.

–Kontrola:

Ikastetxe bakoitzeko zuzendaritzak egiaztatu beharko du badagoela instalazioak egunero garbitzeko plan bat eta garbiketaz arduratzen diren profesionalek egunero betetzen dutela. Zerbitzuan anomaliak antzemanez gero, horiek eraikinaren titularrari jakinarazi behar zaizkio.

2.10. Jantokia.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Jantokiaren antolaketan bermatu eginen da talde egonkorren arteko urruntze eta higiene neurriak betetzen direla. Ukipen fisikoa ahalik eta gehien saihesteko, eremua antolatuko da ikastetxean antolatu diren ikastaldeen arabera.

2. Ikastaldeen arteko segurtasun tartea errespetatzeko, txanda bat baino gehiago ezartzeko aukera baztertu gabe, bitarteko fisikoak (itxiturak, seinaleak, balizak, etab.) erabiliko dira.

3. Sartzeko eta ateratzeko ordutegiak zehaztuko dira, ibilbideak seinalez markatuko dira eta behar den lekuan hesi fisikoak jarriko dira.

4. Bazkari txanda bakoitzean garbitu eta desinfektatuko da jantokia, baita ukipen-elementuak ere.

5. Enpresak zehaztuko du erabili beharreko produktua, zeina izanen baita birusari aurre egiteko eraginkorrak diren birizida baimendu eta erregistratuetako bat, Osasun Ministerioaren irizpideen arabera, edo lixiba disoluzio bat (1:50).

6. Jantokia aireztatu behar da, txanden artean eta zerbitzua eman ondoren, beste talde egonkorra iritsi baino 10 minutu lehenago, gutxienez.

7. Horretarako ezarritako eremuan otordu zerbitzua ematerik ez bada edo hori egitea desegokitzat jotzen bada, zerbitzu hori ikasgelan eman daiteke, baina behar bezala aireztatuta egonen dela bermatuta.

8. Otorduaren aurretik eta ondoren eskuak garbitzea antolatu behar da.

9. Haur bakoitzak erabilera esklusiboko lerde-zapia izanen du.

10. Otorduetan erabilitako tresnak erabilera esklusibokoak izanen dira eta, behin erabili ondoren, ontzi-garbigailuan desinfektatuko dira.

11. Material kolektiboaren erabilera (mahai-tresnak, txarroak, etab.) testuingurura egokitu behar da, ukipena ahalik eta gehien mugatzeko.

12. Janariaren eta uraren banaketa behar bezala diseinatu beharko da, kontaktuak saihesteko.

13. Ahal den neurrian, ezin dira erabili mikrouhin kolektiboak, dieta eta inguruabar berezietarako ez bada, eta betiere zerbitzuaren ardura duen pertsona bakar batek erabilita. Biberoiak prestatzeko, ahal dela irakingailuak erabiliko dira.

2.11. Siesta.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

1. Siestarako, gomendatzen da koltxonetak bi metroko tartea utziz jartzea, eta ikasleen jarrera tartekatzea (burua eta oinak alde batera batek, eta bestera hurrengoak). Ume bakoitzak bere maindireak eta/edo burukoak erabiliko ditu, eta, gutxienez astero berritu beharko ditu, eta beti, zikinduta badaude.

2. Ahal den neurrian, koltxoneten artean 2 metroko tartea lortu ahal izateko, ikasgela erabil daiteke lo egiteko eremu modura, siesta egiteko erabili ohi den gelaz gainera.

2.12. Ikastetxeko langileen kudeaketa.

Aplikatu beharreko neurriak funtsezko irizpide hauen araberakoak izanen dira:

–Aireztapen egokia bermatzea.

–Pertsonen arteko tartea gordetzea.

–Hesi-babeserako neurriak aplikatzea.

–Haurren arteko interakzio fisikoak mugatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

Ikastetxeko langiletzat hartuko dira hezkuntzako langileak eta garbiketako eta jantokiko langileak.

Ikasgeletan maskarak nahitaez erabili beharko dituzte irakasle guztiek eta laguntzako langileek. Nafarroako Osasun Publikoaren eta Lan Osasunaren Institutuak eta laneko arriskuen prebentziorako zerbitzu teknikoek hezkuntza maila bakoitzerako gomendatzen duten maskara mota erabili beharko da.

Ikastetxeko langileek une oro beteko dituzte COVID-19aren aurrean ezarritako prebentzio neurriak, ikastetxearen entitate titularrak edo enpresak eman dizkionak, alegia.

Ez dira ikastetxera joanen infekzio-sintomak (sukarra, eztula, ongieza...) dituzten haurrak, ez hezitzaileak, ez bestelako profesionalak, ez eta COVID-19aren diagnostikoagatik isolamenduan dauden pertsonak ere, eta etxeko berrogeialdian daudenak, COVID-19aren sintomak dituzten edo eritasuna diagnostikatu zaien pertsonekin harreman estua izan dutelako.

12 urtetik beherako haurrak ere ez dira joanean baldin haien bizikide bat esperoan badago PCRa egiteko edo proba horren emaitza jasotzeko edo beste proba diagnostiko molekular bat egiteko, COVID-19arekin bateragarria den klinika izateagatik.

Neurri osagarri moduan, ikastetxeko langileek jarraibide hauek ere bete beharko dituzte:

1. Osasun agintariek ezarriko dute maskarak nola erabili.

2. Hesi-babeserako neurriak aplikatuko dira.

3. Eskularruak erabiltzea saihestu behar da, ohiko baldintzetan erabiltzen direnean izan ezik (garbiketa).

4. Eskuak zuzen eta maiz garbitzen direla ziurtatzea.

5. Ikastetxe bakoitzeko jarraibideak aintzat hartzea.

6. Lan eremu partekatuetan (bilera gela, aldagelak...) beti toki bera okupatzen ahaleginduko da.

7. Materiala partekatzea saihestea (ordenagailuak, bulegoko materiala, etab.), eta, hala eginez gero, erabili aurretik eta ondoren desinfektatu beharko da.

8. Barneko joan-etorriak saihestea, ezinbestekoak ez badira.

9. Eremu komunetan egon beharreko ordutegiak mailakatzea bertan dauden pertsonen kopurua mugatzeko eta, orobat, segurtasun tartea bermatzeko. Eremuek ere modu egokian aireztatuta egon behar dute.

10. Bilera geletan pertsona bakoitzari toki bat esleituko zaio. Egun berean espazio bera partekatu behar badute pertsona batek baino gehiagok, garbitu behar da, espazio horretatik ateratzean.

Ikasturtea hasi baino lehenago, langile guztiek izan behar dute jarduera presentziala hasi orduko hartuko diren neurriei buruzko informazioa. Gai hau landuko da haurren harrera-aldia egin baino lehenagoko bileran.

Langileentzako bulegoak eta denek erabiltzeko eremuak.

1. Maiz aireztatu bulegoak eta erabilera komuneko eremuak.

2. Aulkiak gutxienez 1,5 metroko tarteak utzita jarriko dira, eta ahaleginak eginen dira aurrez aurre ez esertzeko, segurtasun-tartea gorde gabe.

3. Maskara kendu behar bada jateko, hamaiketakoa egiteko, kafea edateko... ahal dela, ez da kendu behar gaizki aireztatutako eremu komun itxietan edo 1,5 metroko gutxieneko tartea gorde ezin den tokietan.

4. Erabilera komuneko edozein elementu (inprimagailuak, argazki-kamerak, bideo-kamerak, urrutiko kontrolak, errotulagailuak...) desinfektatu beharko da erabili aurretik eta ondotik.

5. Gel hidroalkoholikoko dosifikatzaileak eskura izan behar dira bilera-mahaietan, dokumentazioa edo bestelako objektuak trukatu ondoren erabiltzeko.

6. Apalategietatik kendu behar dira apaingarri guztiak, eguneroko garbiketa-lanak errazteko.

2.13. Ikastetxekoak ez diren langileen kudeaketa.

Aplikatu beharreko neurriak funtsezko irizpide hauen araberakoak izanen dira:

–Pertsonen arteko tartea gordetzea.

–Hesi-babeserako neurriak aplikatzea.

–Lokalen eta materialen garbitasuna ziurtatzea.

–Irakatsi, informatu eta komunikatzea.

–Jarraibide orokorrak:

Ikastetxekoak ez diren langileen presentzia ahalik eta gehien mugatuko da. Hartara, Ikastetxeko langiletzat hartuko dira hezkuntzako langileak, haurrak eta garbiketako eta jantokiko langileak.

Halaber, ikastetxean sar daitezke hezkuntza arretan parte hartzen duten beste profesional batzuk eta, azaldutako baldintzetan, haurrei lagun egiten dieten pertsonak.

Ezin izanen dira ikastetxera sartu COVID-19arekin bateragarriak diren sintomak dituzten pertsonak, ezta eritasuna diagnostikatu zaien pertsonak ere, agindutako bakartze aldia bukatu ez badute, edo etxeko berrogeialdian dauden pertsonak, COVID-19aren sintomak edo diagnostikoa izan duen pertsonaren batekin kontaktu estua izan dutelako.

Transmisioaren prebentziorako neurri nagusiak, ikastetxera sartzen diren pertsona guztientzat:

1. Eskuak garbitzea maiz eta tentu handiz, gutxienez 40 segundoz. Gomendatzen da eskuak urarekin eta xaboiarekin maiz garbitzea.

2. Sudur-ahoak estaltzea zapi batez eztul edo doministiku egitean, eta ondoren zapia zaborrontzira botatzea, tapakia eta pedala dituen batera, ahal bada. Zapirik ezean, ukondoaren barneko aldea erabiliko dugu ahoa estaltzeko, eskuak ez kutsatzeko.

3. Begiak, sudurra eta ahoa ez ukitzea.

4. Pertsonen artean 1,5 metroko tartea gordetzen ahalegintzea, bai haien artean, bai ikastetxeko langileengandik ere.

5. Ikastetxera sartzen diren pertsona guztiek, barnean diren bitartean, maskara erabiliko dute, osasun agintariek eman eta indarra duten gomendioei jarraikiz.

6. Hesi-babeserako neurriak aplikatzea.

7. Modu ikusgarrian erakutsiko dira pertsona horientzako jarraibideak: ibiltzeko diren espazioak eta norabideak, erabili behar dituzten komunak, igogailuak erabiltzeko debekua (salbuespenak salbu), babes neurriak eta abar.

8. Saihestu behar da ikastetxekoak ez diren langileek materiala partekatzea (ordenagailuak, bulegoko materiala, etab.) haien artean edo ikastetxeko pertsonekin; hala eginez gero, kontuan izan behar da erabili aurretik eta ondoren desinfektatu behar dela.

Guraso edo legezko erantzuleen arreta:

1. Familiekin ikasturte hasieran eginen diren bileretan kontuan izanen dira ezarritako higiene eta segurtasun neurriak.

2. Ahal den guztietan, familien arreta leku irekian eginen da, edo ongi aireztatutako lekuetan, betiere segurtasun-tartea gordeaz. Aldez aurretik hitzordua eskatu beharko da.

3. Eremu komunetan egoteko ordutegiak mailakatzea, bertan elkartzen direnen kopurua mugatzeko eta urruntze fisikoko neurriak errespetatzea errazteko.

4. Gel hidroalkoholikoko dosifikatzaileak eskura izatea.

5. Ahal dela, telefonoz edo bide telematikotik eginen dira bilerak familiekin.

Banatzaileak:

1. Produktua ikastetxean entregatu behar denean ziurtatu behar da banatzaileek aldez aurretik ikastetxera abisatuko dutela, eta paketea atearen aurrean utziko dutela, ezarritako urruntze eta osasun neurriak aplikatuz.

2. Higiene pertsonaleko neurriak zorrotz zainduko dira paketeak erabiltzean. Paketeak jaso ondoren beti eskuak garbituko dira. Neurri horien osagarria izan daiteke eskularruen erabilera, etiketan ezaugarri hauek dituztela zainduta (EN ISO 3745:2016 VIRUS). Eskularruak jartzea, kentzea eta botatzea segurtasunez eginen da, Osasun Ministerioaren jarraibideak betez.

2.14. Zer egin COVID-19aren aurrean kalteberak diren langileen kasuan.

Langileak COVID-19aren aurrean kalteberak izatea eragiten duten egoerak edo patologiak hauek dira: eritasun kardiobaskularrak izatea, edo hipertentsioa, biriketako eritasun kronikoa, diabetesa, giltzurrunetako gutxiegitasun kronikoa, immunodepresioa, minbizia tratamendu aktiboko fasean, gibeleko eritasun kroniko larria edo obesitate morbidoa (IMC>40), haurdun egotea, edo 60 urtetik goitikoa izatea.

Langile horiek lanera itzultzen ahalko dira, beren egoera klinikoa kontrolatuta badago eta aukera ematen badu, eta babes neurriak zorrotz betez.

Zalantzarik izanez gero, langilea harremanetan jarri beharko da Laneko Arriskuen Prebentziorako Zerbitzuarekin.

LAPZko osasun-langileek ebaluatu behar dute SARS-CoV-2 koronabirusaren infekzioaren aurrean bereziki sentiberak diren langileen presentzia, sentiberatasun berezi horren izaera ezarri eta txostena eman, prebentzioko, egokitzapeneko eta babeseko neurriak zehazteko. Horretarako, kontuan izanen dute ea baden, hala ez, baldintzarik, langile horiek lan egin dezaten, beraien osasunari dagokion arriskua handitu gabe.

Zerbitzu horrek jakinaraziko dizkie langileari eta ikastetxeko ardura duen pertsonari langile hori bere lanpostura itzultzeko edo bertan jarraitzeko hartu beharreko neurriak. Laneko Arriskuen Prebentziorako Zerbitzuak ikastetxeetako arduradunekin elkarlanean arituko dira prebentzio neurriak ezartzeko.

2.15. COVID-19 kasuen kudeaketa ikastetxeetan.

COVID-19 kasuak osasun agintariek ezartzen duten prozeduraren arabera kudeatuko dira ikastetxeetan. Prozedura hori https://www.educacion.navarra.es/eu/web/dpto/inicio web orrian argitaratuko da.

–Ohar orokorrak:

Une oro segurtasun-tarteak gorde behar dira eta, ezinezkoa bada, norbera babesteko ekipamenduak erabili behar dira, osasun agintaritzaren irizpideei jarraikiz.
Tenperatura hartzea ez da neurri orokorra izanen COVID-19ari aurrea hartzeko. Tenperatura soilik hartuko zaie lanaldiaren barnean COVID-19arekin bateragarriak diren sintomak agertzen dituztenei.
Ikusten bada sintomekin hasi den pertsona egoera larrian dagoela, edo arnasteko zailtasuna duela, 112ra deitu behar da.
Gogoratu behar da pertsona bakoitzari dagokion osasun etxea bizitokiaren araberakoa dela, eta, beharbada, ez dela ikastetxeari dagokion zentro bera.

–Jarraibide orokorrak:

Langileak ezin dira ikastetxera itzuli norberari dagokion medikuak alta eman arte. Era berean, ez da ikastetxera etorri behar infekzio-sintomarik izanez gero: sukarra, eztula, ongieza, eta kasu baten kontaktu estua izan eta berrogeialdia egin behar bada.
Haurra ezin da ikastetxera etorri infekzio-sintomarik izanez gero: sukarra, eztula, ongieza, eta kasu baten kontaktu estua izan eta berrogeialdia egin behar bada.

–Kasuen kudeaketa:

Ikastetxean, eta gaur egungo testuinguruan, kasuen detekzio goiztiarra eta haien bakartzea, bai eta kontaktu estuena ere, segurtasun-inguruneari eusteko eta hezkuntza- eta pedagogia-helburuak lortzeko neurririk garrantzitsuenetakoa da.

–Ikastetxeko langileen kasuen kudeaketa:

Sintomak ikastetxean sumatzen dituzten langileek espazio bereizi batera erretiratu behar dute, eta harremanetan jarri beren oinarrizko osasun-laguntzako medikuarekin. Larritasun-kasuetan, larrialdiko arreta duen osasun-zentro batera joan beharko dute.

Hau da Nafarroako Foru Komunitateko erreferentziako telefonoa koronabiruserako: 948 290 290.

Ikastetxeak positibo eman duen langile baten berri duenean, lehenbailehen jarriko da harremanetan langile horren enpresaren Laneko Arriskuen Prebentziorako Zerbitzuarekin. Zerbitzu horrek lagunduko dio kasuen kontaktu estuak identifikatzen eta gerta litezkeen agerraldiak ikertzen; hori guztia, egoera modu egokian kudeatzen dela bermatzearren.

Hala, bada, ikastetxeetan langileak dauzkaten enpresek beren Laneko Arriskuen Prebentziorako Zerbitzua zein den eta harekin harremanetan nola jarri jakin behar dute.

2.16. Toki entitate titularraren eta ikastetxeko zuzendaritzaren arteko elkarlana.

Kontingentzia plana prestatzeko, entitate titularra eta ikastetxeko zuzendaritza honela arituko dira elkarlanean:

1. Ikastetxeko kontingentzia plana idatziko dute Hezkuntza Departamentuak emandako protokolo orokorraren oinarrien arabera.

2. Gai hauen inguruko kontrol lanak:

–Ikastetxeko eremu guztiak modu egokian aireztatzeko neurriak ziurtatzea.

–Higiene eta garbitasun neurrien ezarpena eta jarraipena ziurtatzea.

–Eskuak maiz garbitzea:

Eskuen garbiketari buruzko infografiaren presentzia ziurtatzea.
Xaboi likidoaren dosifikatzaileak eta eskuak lehortzeko papera badirela ziurtatzea.
Gel hidroalkoholikoa badela ziurtatzea.

–Kontingentzia planean definitutako eremu arriskutsuetan zabor-poltsez estalitako paperontziak badirela ziurtatzea.

–Bereizteko hesi fisikoak ongi jarri direla egiaztatzea: leihatilak, metakrilatozko manparak, gortinak, etab.

–Urruntzearen mugapena betetzen dela ziurtatzea harrera-mahaietan, arreta-leihatiletan eta abarretan.

–Langileen babes-ekipoen hornidura ziurtatzea.

–Pertsonen joan-etorrien antolaketari eta seinalez markatzeari dagozkien neurriak betetzen direla egiaztatzea (instalazioen sarbideak, joan-etorriak, eta irteerak).

–Egiaztatzea badela espazio itxi bat, komun batetik hurbil, pertsonen isolamendurako aldi baterako erabiliko dena.

3. Informazioa zabaltzea gai hauen inguruan:

–Birusaren hedapena mugatzeko prebentzio neurriei buruzko informazioa zabaltzea:

Kontingentzia plana eguneratzea eta bertako informazioa zabaltzea, unean uneko egoeraren arabera.
Ikastetxekoak ez diren langileei dagozkien segurtasun neurriei buruzko informazioaren zabalpena ziurtatzea.
Informazio eguneratua ikastetxeko langileei eta familiei iristen zaiela erraztea.
Ikasgela eta eremu estrategiko guztietan koronabirusaren prebentzioari buruzko infografia ikusgai dagoela bermatzea.

Ikastetxeko kontingentzia plana egin, aplikatu eta gainbegiratzeko prestakuntzarako 35 ordu aitortuko zaizkio haur eskolako zuzendariari edo, hala badagokio, hark eskuordetutako pertsonari.

2.17. Esteka interesgarriak COVID-19ari buruz.

COVID-19aren gainean herritarrendako prestatu den informazio eguneratua esteka hauetan kontsulta daiteke:

-Osasun Ministerioa:

https://www.mscbs.gob.es/eu/profesionales/saludPublica/ccayes/alertasActual/nCov/ciudadania.htm

https://www.mscbs.gob.es/profesionales/saludPublica/ccayes/alertasActual/nCov/documentos/COVID19_Aerosoles.pdf

–Nafarroako Osasuna:

https://www.navarra.es/home_eu/Temas/Portal+de+la+Salud/Ciudadania/Me+cuido/Nueva+Normalidad/?NRMODE=Published

–Aireztatzeko gidaliburuak:

https://digital.csic.es/bitstream/10261/221538/14/guia_ventilacion_aulas_CSIC-Mesura_v4.pdf

http://www.isna.info/wp-content/uploads/2020/12/Guia-Practica-Ventilacion.pdf

–Interes bereziko zenbait infografia: