Iragarkia

26. ALDIZKARIA - 2011ko otsailaren 8a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

1931/2010 EBAZPENA, abenduaren 23koa, Nafarroako Unibertsitate Publikoko errektoreak emana, Nafarroako Unibertsitate Publikoko Zerbitzuetako Kudeaketaria OL, Nekazaritza Arkitekto Teknikoa, izateko lanpostu huts bat oposizio-lehiaketaren bidez betetzeko deialdia onesten duena.

Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuan eta hura garatu eta betearazteko emandako Sarbide erregelamenduan ezarritakoari jarraikiz, bidezko da Nafarroako Unibertsitate Publikoko Zerbitzuetako Kudeaketaria OL, Nekazaritza Arkitekto Teknikoa, izateko lanpostu huts bat betetzeko hautaprobetarako dei egitea.

Ikusirik Langileen Kudeaketa Ataleko buruaren txostena, Giza Baliabideen Zerbitzuko Zuzendariak ontzat emana, zeinean baieztatzen baita ezen, 2010eko abuztuaren 20ko Nafarroako Aldizkari Ofizialean argitaratutako Nafarroako Unibertsitate Publikoaren 2010. urteko Lan Eskaintza Publikoaren arabera, badagoela B taldeko lanpostu huts bat, Zerbitzuetako Kudeaketaria O.L., Nekazaritza Ingeniari Teknikoa, aurrekontuan kontu-saila badaukana eta plantilla organikoan 323 zenbakia duena.

Kudeatzaileak proposatuta.

Lege indardunek eman dizkidaten eskumenak erabiliz,

EBATZI DUT:

Lehena.-Nafarroako Unibertsitate Publikoko Zerbitzuetako Kudeaketaria OLren, Nekazaritza Ingeniari Teknikoaren lanpostu huts bat betetzeko hautaprobetarako dei egitea.

Bigarrena.-Deialdia arautuko duten oinarriak, Ebazpen honekin batera doazenak, onestea.

Hirugarrena.-Gastua 2011ko Gastuen Aurrekontuan horretarako eratuko den kontu-sailari egotziko zaio.

Laugarrena.-Ebazpen hau eta deialdiaren oinarriak Nafarroako Aldizkari Ofizialean argitaratzeko agintzea.

Bosgarrena.-Ebazpen honek administrazio bidea agortzen du, Unibertsitateei buruzko Lege Organikoaren 6.4 artikuluan xedatzen denari jarraikiz, eta, aukeran, berraztertzeko errekurtsoa aurkez daiteke errektorearen aurrean, edo, bestela, zuzenean administrazioarekiko auzi-errekurtsoa Nafarroako Administrazioarekiko Auzietako Epaitegietan, hilabeteko epean lehenengo kasuan, eta bi hilabeteko epean bigarrenean, biak ere ebazpena jakinarazi eta biharamunetik kontatzen hasita.

Iruñean, 2010eko abenduaren 23ean.-Errektorea, Julio Lafuente López.

DEIALDIA, NAFARROAKO UNIBERTSITATE PUBLIKOAREN
ZERBITZUKO ZERBITZUETAKO KUDEAKETARIAREN,
OL, NEKAZARITZA INGENIARI TEKNIKOAREN, LANPOSTU BAT
OPOSIZIO-LEHIAKETAREN BIDEZ BETETZEKO

Oinarriak

1.-Arau Orokorrak.

1.1. Deialdi honen xedea da Nafarroako Unibertsitate Publikoko Zerbitzuetako Kudeaketaria O.L., Nekazaritza Ingeniari Teknikoa izateko lanpostu huts bat, plantilla organikoan 323 zenbakia duena, oposizio-lehiaketaren bidez betetzea.

1.2. Deialdi hau ondoko hauetan xedatutakoak arautuko du: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretua, hura garatu eta betearazteko emandako Sarbide erregelamendua, Nafarroako Unibertsitate Publikoko Gobernuak 1996ko apirilaren 2an hartutako erabakia, Nafarroako Unibertsitate Publikoan lanpostuak bete eta haietara sartzeko prozeduretan aplikatu beharreko merezimenduen baremoak arautzen dituena, deialdi honen oinarriak, eta aplikatu beharreko gainerako arauak.

1.3. Halaber, deialdi honen xedea da aldi baterako kontrataziorako izangaien zerrenda bat sortzea, sartzeko hautapen prozeduran lanpostua eskuratzen ez duten izangaiekin, deialdi honen 10. oinarrian xedatutakoari jarraikiz.

2.-Izangaiek bete beharrekoak.

2.1. Hautaprobetara onartuak izateko, izangaiek eskaerak aurkezteko epea bukatzen den egunean, ondoko baldintzak bete beharko dituzte:

a) Espainiako herritarra izatea edo Europar Batasuneko estaturen batekoa izatea edo, Europar Batasunak izenpetu eta Espainiar Estatuak berretsitako nazioarteko itunen arabera, langileen joan-etorri askea aplikatzekoa zaion estaturen batekoa.

Halaber, Espainiako, Europar Batasuneko estatuetako eta aipatu nazioarteko itunak aplikatzen diren eremuko estatuetako herritartasuna dutenen ezkontideek parte hartu ahalko dute, betiere zuzenbidearen arabera bananduta ez badaude; herritartasuna duenaren ondorengoek eta haren ezkontidearen ondorengoek ere parte hartu ahal izango dute, legearen araberako banaketarik ez dagoenean, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.

b) Hamasei urte beteta izatea, eta nahitaezko erretirorako gehieneko adina beteta ez edukitzea.

c) Nekazaritza Ingeniari Teknikoaren titulua edo haren baliokidea edukitzea, edo, bestela, eskabideak aurkezteko epea bukatzen den egunean, titulua erdiesteko moduan egotea.

Atzerrian erdietsitako titulazioak badira, aipatutako egunean izangaiak eskuan izan beharko du homologazioaren egiaztagiria.

d) Dagozkion eginkizunak betetzeko gaitasun fisikoak eta psikikoak edukitzea.

e) Eginkizun publikoetarako desgaitua edo gabetua ez egotea eta administrazio publiko baten zerbitzutik bereizia ez izatea.

Espainiakoa ez beste nazionalitatea dutenek ere, diziplina-zehapen edo zigor kondenaren bidez beren estatuetako funtzio publikoetan aritzeko gabetuta ez egotearen zinpeko aitorpena aurkeztu beharko dute.

2.2. Izendapenerako proposatutako izangaiak aurreko baldintzak egiaztatu beharko ditu deialdiaren 8. oinarrian ezarritako epean eta moduan, salbu eta eskabidea aurkeztearekin batera egiaztatu behar direnak.

2.3. Aurreko arauetan ezarritako baldintzak eskaerak aurkezteko epea bukatzen denean bete beharko dira, eta, halaber, hautapen prozedurak eta, kasua bada, kontratazioak dirauten bitartean.

3.-Eskabideak.

3.1. Eskaerak deialdi honen eranskinean (I. eranskina) dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabide eredua Interneten bidez lortu ahal da www.unavarra.es webgunean, "Concursos y contratos/Personal/Personal de Administración y Servicios" izeneko helbidean.

3.2. Eskabideak Nafarroako Unibertsitate Publikoko Erregistro Orokorrean aurkeztu behar dira (Soforak eraikina; Arrosadiko Campusa; 31006 Iruñea), edo, bestela, Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan ezarritako prozeduraren bidez, eta Nafarroako Unibertsitate Publikoko errektoreari zuzendu behar zaizkio. Eskaerak aurkezteko epea bukatuko da hogeita hamar egun natural igaro ondoren, deialdi honen iragarkia "Estatuko Aldizkari Ofizial"ean argitaratzen den egunaren biharamunetik kontatzen hasita. Deialdia Nafarroako Aldizkari Ofizialean argitaratuko da.

Eskaera posta bulego batean aurkeztuz gero, gutun-azal irekian egingo da, posta zerbitzuko langileak, ziurtatu aurretik, data eta zigilua jar ditzan, eta ondoren egiaztatu eta bidali Nafarroako Unibertsitate Publikoaren Erregistrora (Arrosadiko campusa, z/g, 31006 Iruñea).

3.3. Behar bezala betetako eskabideari, ondoko agiri hauek erantsiko zaizkio:

a) Izangaiaren Nortasun Agiri Nazionalaren edo izangaiaren nazionalitatea eta nortasuna ziurtatzeko agiriaren fotokopia.

b) Deialdian eskatutako tituluaren kopia edo eskuratzeko eskubideak ordaindu izanaren ordezkagiria.

c) Azterketa egiteko eskubideak ordaindu direla erakusten duen bankuaren agiria, 4. oinarrian ezarritakoari jarraikiz.

3.4. Ezgaitasun aitortua duten izangaiek ariketak egiteko denboren eta baliabideen egokitzapenak eskatu ahalko dituzte, beharrezkoak direnean. Kasu horietan, hala adierazi beharko dute eskabidean, eta aparteko orri batean (I. Bis eranskina) adierazi beharko dute nolako ezgaitasuna duten eta zein egokitzapen eskatzen duten, eta, gainera, legez ezgaitua izatearen akreditazioa erantsi beharko dute, ondotik datozen agirietako baten jatorrizkoaren edo fotokopia kautotuaren bidez.

-Imsersok edo autonomia erkidegoan eskumena duen organoak emandako ziurtagiria.

-Gizarte Segurantzako Institutu Nazionalaren ebazpena, ezgaitasun iraunkor osoa, ezgaitasun iraunkor absolutua edo baliaezintasun handia izateagatik prestazio bat jasotzeko eskubidea onartzen diona.

3.5. Euskararen jakite mailari buruzko borondatezko proba, lehiaketa-aldikoa, egin nahi duten izangaiek eskabidean adieraziko dute esaldi honekin: "Euskarazko proba borondatezkoa. Lehiaketa aldia". Hautaprobetara onartua izateko eskaeran jasota ez badago, ez da onartuko eskaerarik borondatezko proba hori egiteko. Hautaproba hori 7.3 oinarrian ezarritakoari jarraikiz egingo da.

3.6. Eskabideak aurkezteko epea ezin izango da luzatu.

4.-Tasak.

4.1. Azterketa-eskubideak 40 eurokoak izango dira. Azterketa-eskubideen tasa ordaintzen ez duen izangaia hautaprobetatik baztertua izango da.

Tasari dagokiona eskudirutan ordainduko da, edo bestela, transferentzia egingo da, Nafarroako Kutxaren 2054.0000.44.1100110959 zenbakiko kontu korrontera. Ordainagirian izangaiaren datuak eta "Hautaprobak - Zerbitzuetako Kudeaketaria OL, Nekazaritza Ingeniari Teknikoa" adierazpena agertu beharko dira.

Tasak ordaintzetik salbuetsita egongo dira:

a) % 33ko edo gehiagoko ezgaitasun aitortua duten pertsonak.

b) Hautaproben deialdia egin aurretik hilabetez edo luzaroago lan-eskatzaile gisa inskribaturik egon direnak. Salbuetsita egoteko baldintza izango da kasuko epean eskainitako inolako lan egokiri uko egin ez izana, eta lanbide sustapen, prestakuntza edo eraberritze ekintzetan parte hartzeko uko egin ez izana, justifikaturiko arrazoirik ez badago, eta, halaber, hilabetean lanbide arteko gutxieneko lansaritik goragoko errentarik ez izatea.

Lan-eskatzaile gisa inskribaturik egotea, dagokion Enplegu Bulegoak emandako ziurtagiriaren bidez egiaztatuko da. Bertan adieraziko da interesduna noiz inskribatu zen lan-eskatzaile gisa, eta espresuki aipatuko da inskribatuta egon den bitartean ez diola lan egokiri uko egin, eta lanbide sustapen, prestakuntza edo eraberritze ekintzetan parte hartzeari ez diola uko egin, justifikaturiko arrazoirik egon gabe.

Hilabeteko zenbaketa eginez gero, lanbide arteko gutxieneko lansaritik goragoko errentarik ez izatea, interesdunaren aitorpenaren bidez egiaztatuko da.

4.2. Azterketako eskubideak ordaintzeak ez du inola ere ordezkatuko hautapen-prozesuan parte hartzeko eskaera, epearen barruan eta forma egokian.

5.-Izangaien onarpena eta erreklamazioak.

5.1. Eskaerak aurkezteko epea bukatu eta gero, Nafarroako Unibertsitate Publikoko errektoreak ebazpena emango du, "Nafarroako Aldizkari Ofizialean" argitaratuko dena. Horretan onartuen eta baztertuen behin-behineko zerrenda onetsitzat emango da, bigarren kasuan baztertzearen zergatia azalduko delarik.

5.2. Baztertutako izangaiek, behin-behineko zerrenda Nafarroako Aldizkari Ofizialean argitaratu eta hurrengo hamar egun balioduneko epean, erreklamazioak aurkeztu ahal izango dituzte eta, akatsen bat badago, akatsak zuzendu.

5.3. Erreklamazioetarako epea iragan eta haiek ebatzi ondoren, Nafarroako Unibertsitate Publikoko errektoreak ebazpena emango du, "Nafarroako Aldizkari Ofizialean" argitaratuko dena. Horretan onartuen eta baztertuen behin betiko zerrenda onetsitzat emango da.

5.4. Ez da bidezkoa izango azterketa-eskubideak itzultzea, baztertzeko arrazoia izangaiei egotzi ahal zaien kasua denean.

6.-Epaimahaia.

6.1. Epaimahaia honako kide hauek osatuko dute:

-Epaimahaiburua: J. Bernardo Royo Díaz, unibertsitateko irakasle titularra Nafarroako Unibertsitate Publikoan.

Ordezkoa: Carlos Miranda Jiménez, Nafarroako Unibertsitate Publikoko Unibertsitateko irakasle titularra.

-Epaimahaikidea: Carmen Jarén Ceballos, Unibertsitateko irakasle titularra Nafarroako Unibertsitate Publikoan.

Ordezkoa: Silvia Arazuri Garín, Nafarroako Unibertsitate Publikoko Unibertsitateko irakasle titularra.

-Epaimahaikidea: Javier Mendizábal Múgica, Nafarroako Gobernuko Ekonomia eta Ogasun Departamentuko Lurralde Aberastasunaren Ataleko burua.

Ordezkoa: Santiago Alemán Carrica, Nafarroako Foru Administrazioko Nekazaritza Ingeniari Teknikoa.

-Epaimahaikidea: Nafarroako Unibertsitate Publikoko administrazio eta zerbitzuetako langile bat, Administrazio eta Zerbitzuetako Langileen Batzordeak izendatua.

Ordezkoa: Nafarroako Unibertsitate Publikoko administrazio eta zerbitzuetako langile bat, Administrazio eta Zerbitzuetako Langileen Batzordeak izendatua.

-Idazkaria: Nafarroako Unibertsitate Publikoko administrazio eta zerbitzuetako langile bat, Giza Baliabideen Zerbitzuko zuzendariak izendatua epaimahaian parte hartzeko interesa erakutsi dutenen artetik.

-Epaimahaikidea: Nafarroako Unibertsitate Publikoko administrazio eta zerbitzuetako langile bat, Giza Baliabideen Zerbitzuko zuzendariak izendatua epaimahaian parte hartzeko interesa erakutsi dutenen artetik.

Epaimahaiaren behin betiko osaera aditzera emango da onartutako eta baztertutako izangaien behin-behineko zerrenda onesten duen ebazpenarekin batera.

Epaimahaia hautaprobak hasi baino lehen eratu beharko da.

6.2. Epaimahai kalifikatzailearen eraketak eta jardunak balio izan dezaten, gutxienez kide guztien gehiengo osoa beharko da.

Epaimahaiaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

6.3. Epaimahaiko kideek ez dute parte hartuko, eta organo dei egileari jakinaraziko diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

6.4. Deialdi honetako arauak interpretatzeak eta aplikatzeak sorraraz ditzaketen zalantzak Epaimahaiaren gehiengoak ebatziko ditu, eta hautaprobak aurrera egin ahala deialdian aurreikusten ez diren eta sor litezkeen auziak ebazteko neurriak hartuko.

6.5. Epaimahai kalifikatzaileak aholkulari adituak sartu ahalko ditu hautaproba guztietarako zein batzuetarako. Aholkulari horiek beren espezialitate teknikoen esparrura mugatuko dute lankidetza.

6.6. Epaimahai kalifikatzaileak neurri egokiak hartuko ditu hau beharrezkoa den kasuetan, ezgaitasunak dituzten izangaiek gainontzeko izangaien baldintza berberak eduki ditzaten probak egiteko orduan, 3.4 oinarrian ezarritakoari jarraikiz.

6.7. Epaimahaiburuak egoki jotzen dituen neurriak hartuko ditu oposizio aldian idatziz egingo diren eta Epaimahaiaren aurrean irakurri behar ez diren ariketen erantzunak zuzentzeko, betiere, izangaiak nor diren jakin gabe.

6.8. Jakinarazpenak emateko eta bestelako gorabeheretarako, Epaimahaiaren egoitza Nafarroako Unibertsitate Publikoko Administrazio eta Kudeaketa eraikina izango da.

6.9. Hautaketa prozesua bukatu ondoren, Epaimahaiak zerrenda bat egingo du; bertan hautaprobaren bat gainditu eta lanposturik atera ez duten izangaiak zerrendatuko dira, proba bakoitzean erdietsitako puntuazioekin. Giza Baliabideen Zerbitzuari bidaliko dio, kontratatzeko zerrendak prestatzeko, Kontratazioa eta izendapen-zerrendak prestatzeko eta kudeatzeko prozedura arautzen duen erabakian ezarritakoa aplikatzeko.

7.-Oposizio-lehiaketaren garapena.

7.1. Oposizio aldiko lehen ariketa 2011ko maiatzetik aurrera egingo da. Onartutako eta baztertutako izangaien behin betiko zerrenda onesten duen ebazpen berean, hautaprobak hasteko lekua, eguna eta ordua ezarriko dira. Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

7.2. Hautatzeko prozesuak honako aldi hauek edukiko ditu:

7.2.1. Oposizio aldia:

A) Lehenengo ariketa: Teorikoa, test motako galdetegi bat, idatziz erantzun beharrekoa, deialdian datorren gai zerrendari buruz. Galdera bakoitzarentzat aukerako erantzun batzuk izango dira, eta horietatik bakar bat izango da zuzena. Akatsak zehatuko dira. Epaimahai kalifikatzaileak zehaztuko du, ariketa hasten denean, zenbat denbora duten lehiatzaileek hura egiteko.

B) Bigarren ariketa: Teorikoa; idatziz garatu beharko dira eranskinaren bigarren zatiko hiru gai. Horretarako, epaimahai kalifikatzaileak zozketaz lau gai hautatuko ditu, eta izangaiek horietako hiru bakarrik aukeratu eta garatuko beharko dituzte. Horretarako 3 ordu izango dituzte, gehienez ere.

C) Hirugarren ariketa: Praktikoa, epaimahai kalifikatzaileak ezarritako alderdiei buruzko kasu praktiko bat edo gehiago ebatzi beharko dituzte izangaiek, gai-zerrendan agertzen diren edukiekin loturikoak, baita deitu den lanpostuari datxezkion eginbeharrekin loturik ere. Ariketa batzuk egiteko, beharrezkoa izan daiteke ondoko programa informatikoak erabiltzea: Word, Excel edo AutoCad. Behar izanez gero, lehiatzaile bakoitzari PC ordenagailu bat utziko zaio, dagokion softwarearekin.

Proba honetan balioetsiko dira analisiaren zorroztasuna, sistematika eta ideien argitasuna, erantzun arrazoitu bat prestatzeari begira.

Ariketa egiteko, gehienez ere 6 ordu izango dira.

Oposizio aldiko ariketen balioespena 70 puntukoa izango da gehienez ere, eta puntuak honela banatuko dira:

Lehenengo ariketa: 10 puntu gehienez ere.

-Bigarren ariketa: 20 puntu gehienez ere.

-Hirugarren ariketa: 40 puntu gehienez ere.

Oposizioko ariketak baztertzaileak izango dira. Ariketa bakoitzari dagokion gehieneko puntuazioaren erdia, gutxienez ere, lortzen ez duten izangaiak baztertu egingo dira. Halaber, baztertu egingo dira bigarren ariketako edozein gaitan edo hirugarren ariketako edozein proba praktikotan zero (0) kalifikazioa lortzen duten izangaiak.

Oposizioko ariketak egiteko pliken sistema erabiliko da.

Ariketa bakoitzaren kalifikazioa bukatu ondoren, Epaimahaiak Interneten bidez Nafarroako Unibertsitate Publikoaren webgunean www.unavarra.es "Concursos y contratos/Personal/Personal de Administración y Servicios" izenburupeko helbidean, gainditu duten izangaien zerrenda argitaratuko du, haien nortasun agiri zenbakiarekin eta lortutako kalifikazioekin batera, eta, halaber, oposizio aldiko hurrengo ariketa non eta zer egun eta ordutan izango den adieraziko du, gutxienez 48 ordu lehenago.

Ariketa bakoitzerako deialdia bakarra izango da, hau da, deitutako izangaiek epaimahai kalifikatzaileak probak egiten hasteko adierazitako lekuan eta egunean egon beharko dute, epaimahai berak esandako orduan, eta deialdi horretara bertaratzen ez direnak oposiziotik baztertuak izango dira, probak ekitaldi batzuetan banaturik gelditu arren.

Izangaiek NANa, pasaportea, gidatzeko baimena edo Epaimahaiak ontzat eman dezakeen bestelako agiri bat erakutsi beharko dute nortasuna egiaztatzeko, eta azaltzen ez direnak edo adierazi bezala nortasuna egiaztatzen ez dutenak, baztertuak izango dira.

Ezgaitasun aitortua izanik, hala eskatu duten izangaientzat, ariketak egiteko behar diren denbora eta baliabideetan izan litezkeen egokitzapenak ezarriko dira hautaprobak garatzeko.

7.2.2. Lehiaketa aldia:

Epaimahaiak balioetsi egingo ditu oposizio-aldia gainditu duten izangaiek azaldutako merezimenduak, jarraian zehazten den baremoaren arabera.

Oposizio aldia gainditu duten izangai guztiek agirien bidez frogatu beharko dituzte alegatutako merezimendu guztiak, oposizio aldiko emaitzak jakinarazi eta hamar egun naturalen epean, dela jatorrizko agiriaren bidez, dela administratiboki egiaztaturiko kopien bidez, deialdi honetan ezartzen den baremoaren arabera. Emandako zerbitzuen agiria, zerbitzuak zein erakundetan eman diren, erakunde horretako langileen bulegoak luzatu beharko du.

Lehiaketa aldiko atal bakoitzari dagozkion merezimenduak batu, eta erdietsitako puntuazioa inoiz ere ez da izango 30 puntu baino gehiagokoa. Horretan erdietsitako puntuazioa oposizio aldia bukatutakoan jakinaraziko da, eta bi aldietako puntuazioen batura izango den behin betiko puntuazioa argitara eman aurretik.

Merezimenduak balioesteko kontuan hartuko dira, bakarrik, eskaerak aurkezteko epera arte lortu direnak, eta baliogabeak izango dira egun hori eta gero lortutakoak.

A) Lan esperientzia: Jarraian zehazten diren merezimenduak balioetsiko dira; atal honetako gehieneko puntuazioa 16,5 puntu da eta balioetsi daitekeen gehieneko denbora 4 urte:

a) Eskaerak aurkezteko epea bukatzean unibertsitate publikoetan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,35 puntu.

b) Eskaerak aurkezteko epea bukatzean unibertsitate publikoa ez den edozein administrazio, erakunde edo erakunde publikotan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,15 puntu.

B) Euskarari eta beste hainbat hizkuntzari buruzko jakite-maila: honako merezimendu hauek balioetsiko dira, eta atal honetako gehieneko puntuazioa 9 puntukoa izango da.

-Euskara:

a) Euskara Gaitasun Agiria (EGA) edo titulazio ofizial baliokidea edukitzeagatik, 6,75 puntu.

b) Euskarazko oinarrizko zikloko ziurtagiri ofiziala edo titulazio ofizial baliokidea edukitzeagatik, 4,5 puntu. Bateraezina izango da balioespen hau eta aurreko atalak aipatzen duen merezimenduarena.

c) Nahi izanez gero, a) eta b) atalek aipatzen dituzten titulazioak egiaztatzeko moduan ez dauden izangaiek, daukaten euskara maila balioesteko proba egin ahalko dute. Proba hori borondatezkoa eta merezimenduzkoa izango da, eta 0tik 2,7ra bitarteko puntuazioa izango du. Proba hau 7,3 onarrian ezarritakoari jarraikiz egingo da.

-Beste hizkuntza batzuk:

a) Europar Batasuneko edozein hizkuntza ofizialen Gaitasun Agiria, Hizkuntza Eskola Ofizialek ematen dutena, edukitzeagatik edo, bestela, titulazio baliokidea, 4,95 puntu hizkuntza bakoitzagatik.

b) Europar Batasuneko edozein hizkuntza ofizialen Oinarrizko Zikloaren Ziurtagiri Ofiziala, Hizkuntza Eskola Ofizialek ematen dutena, edukitzeagatik edo, bestela, titulazio baliokidea, 3,15 puntu hizkuntza bakoitzagatik.

Atzerrian erdietsitako hizkuntzen titulazioak edo atzerriko erakundeek luzatutakoak badira, izangaiak eskuan izan beharko du homologazioaren egiaztagiria eskaerak aurkezteko epea bukatzen den egunean.

Hizkuntza titulazioen baliokidetzak balioesteko, Epaimahaiak kontuan hartuko du ondoko honetan ezarritakoa: 210/2010 Ebazpena, irailaren 13koa, Nafarroako Administrazio Publikoaren Institutuko zuzendari kudeatzailearena, euskararen eta Europar Batasuneko hizkuntzen jakite-maila egiaztatzen duten tituluen eta ziurtagirien arteko baliokidetzak ezartzen dituena, Hizkuntzen Erreferentziako Europako Esparru Bateratuak ezartzen duenaren arabera.

C) Beste merezimendu batzuk: gehienez ere 4,5 puntu emango zaie.

-Titulazioak edukitzeagatik, betiere, izangaiek ez badituzte alegatu 2.1.c) oinarrian eskatutakoa betetzeko, gehienez ere, 2 puntu emango zaie, honela:

Nekazaritza Ingeniari titulua edukitzeagatik, 2 puntu.

a) Diplomadun, ingeniari tekniko edo arkitekto tekniko titulu bat edo batzuk, edo baliokideak edukitzeagatik, gehienez ere puntu 1.

b) Lizentziadun, ingeniari edo arkitekto titulu bat edo batzuk edukitzeagatik, 1,5 puntu.

c) Nekazaritza Ingeniari titulua edukitzeagatik, 2 puntu.

Erakunde eta instituzio publikoek antolatutako ikastaroak egin dituztenean, izangaiei 0,1 puntu emango zaizkie 10 prestakuntza ordu-tarte bakoitzeko, eta balioetsiko zaien gehienezko puntuazioa puntu batekoa izango da egindako ikastaro bakoitzeko; atal honetako gehienezko puntuazioa ez da 2,5 puntu baino gehiagokoa izango. Ez dira balioetsiko irakaskuntza-tituluak, graduondokoak edo/eta masterrak erdiesteko diren ikastaro, irakasgai, mintegi edo kidekorik.

Deialdiaren xedea den lanpostuaren eginkizunekin loturiko gaiekin zerikusirik duten ikastaroak balioetsiko dira bakarrik, epaimahaiaren irizpidearen arabera.

7.3. Euskararen jakite-maila neurtzeko proba saio bakar batean egingo da, oposizio aldia bukatu eta gero.

Eguna eta ordua ezartzen duen deialdia, Administrazio eta Kudeaketa eraikineko (Soforak eraikina) iragarki oholean argitaratuko da, eta Interneten bidez ere bai, Nafarroako Unibertsitate Publikoaren webgunean www.unavarra.es "Concursos y contratos/Personal/Personal de Administración y Servicios" izenburupeko helbidean.

Proba osoa euskaraz egingo da, eta atal hauek izango ditu:

a) Idatzizko gaitasuna, gramatika edukiak eta adierazpen idatzia balioetsiko dituena.

b) Ahozko gaitasuna, ulermena eta mintzamena neurtuko dituena.

8.-Gaindituen zerrenda, izendapen proposamena eta agiriak aurkeztea.

8.1. Oposizio aldia bukatu ondoren, Epaimahaiak Administrazio eta Kudeaketa eraikineko (Soforak eraikina) iragarki oholean eta Interneten bidez Nafarroako Unibertsitate Publikoko www.unavarra.es webgunean "Concursos y contratos/Personal/Personal de Administración y Servicios" izenburupeko helbidean, aditzera emango ditu oposizio aldiko probak gainditu dituzten izangaiek lortutako emaitzen batuketa, eskuratutako puntuazioaren ordenari jarraikiz. Argitalpen horretan hamar egun naturaleko epea emango da oposizio aldia gainditu duten izangaiek alegatzen dituzten merezimenduak jatorrizko agirien bidez edo fotokopia kautotuen bidez froga ditzaten.

8.2. Lehiaketa aldia bukatu eta gero, epaimahaiak aditzera emango du, aurreko oinarrian esandako tokian, merezimenduen balioespenaren emaitza, izangai bakoitzak lortu duen puntuazioa adieraziz.

8.3. Epaimahaiak gainditu dutenen zerrenda argitaratuko du, lortutako behin betiko emaitzaren arabera sailkaturik, oposizio aldian eta lehiaketa aldian lortutako puntuazioak batuz, eta puntuazio handienarekin gainditu duen izangaiaren aldeko izendapen proposamena bidaliko dio errektoreari. Proposamen hori Nafarroako Aldizkari Ofizialean argitaratuko da.

Hautaproben azken emaitzan gertatzen diren berdinketak ebazteko, oposizio aldian puntuaziorik altuena lortu duenaren alde egingo da; berdinketak segitzen badu, probak egin diren hurrenkeraren alderantzizko hurrenkeran ateratako puntuazioen arabera ebatziko dira eta, hala ere berdinketak irauten badu, izangai zaharrenaren alde ebatziko da.

8.4. Izendapen proposamena Nafarroako Aldizkari Ofizialean argitaratu eta hogeita hamar egun naturaleko epean, proposameneko izangaiek Unibertsitateko Erregistro Orokorrean ondoko agiri hauek aurkeztu beharko ditu:

a) 2.1.1 c) oinarrian eskatutako tituluaren jatorrizkoa edo fotokopia kautotua, edo hura eskuratzeko eskubideak ordaindu izanaren ordezkagiriarena.

b) Aitorpena, zeinetan adierazten baita, diziplina espediente baten ondorioz, lehiatzailea ez dagoela bereizita inongo administrazio edo kargu publikotik, eta ez dagoela zigor baten bidez desgaitua eginkizun publikoak betetzeko. Izangaiak ez badu Espainiako nazionalitatea, diziplina-zehapen edo zigor kondenaren bidez bere estatuko funtzio publikoetan aritzeko gabetuta ez egotearen zinpeko aitorpena aurkeztu beharko du.

c) Ziurtagiri medikoa, eskaintzen den lanpostuaren eginkizunetan aritzeko gaitasun psikikoa eta fisikoa edukitzea egiaztatzen duena. Horretarako, azterketa Nafarroako Unibertsitate Publikoaren Aurrezaintza Zerbitzuaren mediku zerbitzuek egingo dute.

Proposatutako izangaiak ezgaitasuna alegatu badu, ekarri beharko du, halaber, organo eskudunen ziurtagiria, deialdiaren xede den lanpostuaren eginkizunak eta lanak egiteko moduan dagoela dioena.

d) Nafarroako Foru Eraentza errespetatzeko, Konstituzioari eta legeei men egiteko eta karguaren eginkizunak zintzo betetzeko zina edo agindua.

8.5. Behar bezala justifikatutako ezinbesteko kasuak alde batera utzita, ezarri den epearen barruan agiriak aurkezten ez dituen, edo agiriak aztertzearen ondorioz, deialdian eskatzen diren betebeharretakoren bat betetzen ez duen izangaia, ezin izendatuko da funtzionario, eta bere jardun guztiak deuseztatu egingo dira, hasierako eskaeran faltsukeriatan ibiltzeagatik eduki lezakeen erantzukizunaren kaltetan gabe.

8.6. Aurreko atalean aurreikusten den kasuan, eta oinarri hau aipatzen dutenetan, Nafarroako Unibertsitate Publikoko errektoreak hutsunea beteko du 8.3 atalean aipatzen den gainditu dutenen zerrendan ondoren dagoenarekin, deialdiaren oinarrietan ezartzen diren baldintzak betetzen baditu, eta horrekin aurreko ataletan aipatu den moduan jokatuko da.

9.-Funtzionario izendatzea.

9.1. Nafarroako Unibertsitate Publikoko errektoreak, karrerako funtzionario izendatuko du aurreko oinarrietan ezarritakoa betetzen duen izangaia, Nafarroako Aldizkari Ofizialean argitaratuko den ebazpenaren bidez. Izendapena jakinarazten denetik hilabete bateko epean hartu beharko du jabetza.

9.2. Aipatutako epean eta ezinbesteko kasuetan izan ezik, lanpostuaren jabe egiten ez bada, Nafarroako Unibertsitate Publikoaren funtzionario izateko eskubide guztiak galduko ditu. Kasu horretan, 8.6 oinarrian ezarritakoari jarraituko zaio.

9.3. Izangaia funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean izaera finkoarekin ari delako, kasuko lanpostu hutsa ere deialdiaren 8.6 oinarriak agintzen duen moduan beteko da.

10.-Izendapenetarako edo kontratazioetarako zerrenda prestatzea.

10.1. Kontratazioa eta izendapen-zerrendak prestatzeko eta kudeatzeko prozedura arautzen duen erabakian ezarritakoari jarraikiz, hautaketa prozesua bukatu ondoren, Unibertsitateak zerrenda bat prestatuko du, izendapenetarako edo kontratazioetarako, hautaketa prozesuko proba bat, gutxienez ere, gainditu duten izangaiek osatua.

10.2. Zerrenda osatzen dutenak ordenatzeko ondoko irizpide hauek erabiliko dira:

a) lehenbizi, hautaketa prozeduran oposizio aldi osoa gainditu baina lanpostua lortu ez duten izangaiak. Ezarriko zaien puntuazioa izango da oposizio aldiaren eta lehiaketa aldiaren batura.

b) bigarrenik, hautaketa prozedura osoa ez, baina proba bat, gutxienez ere, gainditu duten izangaiak. Ezarriko zaien puntuazioa izango da gainditu dituzten probena eta lanbide-esperientziarena, 10.4 oinarrian ezarritakoaren arabera, batzeak ematen duena.

10.3. b) atalean aipatzen diren izangaiek, lanbide-esperientzia egiaztatzen duten agiriak aurkeztu beharko dituzte, dagokien eskabidearekin batera, oposizio aldiko bigarren probaren emaitzak argitaratzen denetik eta dagokion hautaketa prozeduraren behin betiko emaitzak argitaratu ondoren hamar egun iragan arte.

Lanbide esperientzia egiaztatzeko aurkeztu beharko da egiaztagiriaren jatorrizkoa edo kopia kautotua, zer administrazio publikotan eman ziren zerbitzuak, horretako langileen unitateak egina. Agirian dagokion titulazio taldea agertu beharko da.

10.4. Lanbide esperientzia honela balioetsiko da:

-0,43 puntu azken hamar urtean Nafarroako Unibertsitate Publikoan deialdian aipatutako lanpostuan zerbitzu ematen egindako hiruhileko bakoitzeko. Gehienez ere, 8 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren zatikiak.

-0,43 puntu azken hamar urtean unibertsitate publiko batean deialdian aipatutako lanpostuan zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren zatikiak.

-0,17 puntu azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko, edo azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren zatikiak.

11.-Izaera pertsonaleko datuen erabilera.

11.1. Interesdunek emandako datuak fitxategi automatizatu batean gorde ahalko dira. Fitxategi hori langileen datu-basea edo lan-poltsaren datu-basea da, Norberaren Datuak Babesteko abenduaren 13ko 15/1999 Lege Organikoari jarraikiz.

11.2. Fitxategia Kudeatzailetzaren ardurapean geldituko da (Arrosadiko Campusa, Soforak eraikina).

11.3. Lortutako informazioa langileen kudeaketarako prozesatuko da, ez bestetarako.

11.4. Datu pertsonalak tratatzeko babes maila ezarrita dago lege indardunetan, bertan ezartzen baitira datu pertsonalak dituzten fitxategi automatizatuen segurtasun neurriak. Behar diren neurriak hartuko dira, segurtasunaren aldetik, informazioaren konfidentzialtasuna eta osotasuna bermatzeko.

11.5. Interesdunek sarbidea izateko, zuzentzeko, deuseztatzeko eta aurka egiteko eskubidea erabili ahalko dute, Datuak Babesteko Lege Organikoak ezartzen duena betetzeko. Eskabideak Nafarroako Unibertsitate Publikoko kudeatzaileari zuzenduko zaizkio (Arrosadiko campusa, z.g., Soforak eraikina, 31006, Iruñea).

12.-Errekurtsoak.

Deialdi honen aurka, haren oinarrien aurka eta errektoreak harturiko izendapen erabakiaren aurka ondoko errekurtsoetako bat jarri ahalko da, lege indardunekin bat etorriz:

a) Aukerako berraztertze-errekurtsoa errektorearen aurrean, hilabete bateko epean, ekitaldia edo erabakia jakinarazten edo iragartzen den egunaren biharamunetik kontatzen hasita.

b) Administrazioarekiko auzi-errekurtsoa Nafarroako Justizia Auzitegi Gorenaren Administrazioarekiko Auzietako Salan, bi hilabeteko epean, erabakia jakinarazten den egunaren biharamunetik kontatzen hasita.

Epaimahai kalifikatzaileak ematen dituen egintza eta ebazpenen kontra gora jotzeko errekurtsoa jarri ahalko da, errektoreari zuzendua, errekurtsoaren xede den egintza argitaratu edo jakinarazi, eta biharamunetik aurrera, hilabeteko epean. Gorako errekurtso ebazlearen aurka administrazioarekiko auzi-errekurtsoa jarri ahalko da Nafarroako Justizia Auzitegi Nagusiaren aurrean.

I. ERANSKINA

Hautaprobetan onartua izateko eskabidea

I BIS ERANSKINA

Hautaprobak egiteko denbora tarteak eta/edo bitartekoak egokitzeko eskaera - Ezgaitasuna duten pertsonak

II ERANSKINA

Gai zerrenda

Lehen zatia.

1. Espainiako 1978ko Konstituzioa: Egitura eta edukia. Funtsezko betebeharrak eta eskubideak. Koroa. Gorte Nagusiak. Estatuko Gobernua eta Administrazioa. Botere judiziala. Estatuaren lurralde-antolamendua. Auzitegi Konstituzionala.

2. Nafarroako Foru Eraentza Berrezarri eta Hobetzeari buruzko Lege Organikoa: Xedapen orokorrak. Nafarroako Foru Erakundeak.

3. Administrazio Publikoen Eraentza Juridikoari eta Guztientzako Administrazio Prozedurari buruzko Legea: Administrazio prozedura erkidea: kontzeptua eta izaera. Hasiera, antolamendua, instrukzioa eta bukaera. Administrazio baliabideak: printzipio orokorrak eta motak.

4. Nafarroako administrazio publikoen zerbitzuko langileen estatutua (I). Langile motak. Funtzionario publikoak hautatzeko modua. Funtzionario izaera lortzea eta galtzea.

5. Nafarroako administrazio publikoen zerbitzuko langileen estatutua (II). Karrera administratiboa. Administrazio egoerak. Lanpostuak betetzea. Eskubideak eta betebeharrak.

6. Abenduaren 21eko Unibertsitateei buruzko 6/2001 Lege Organikoa.

7. Nafarroako Unibertsitate Publikoaren Estatutuak.

8. 6/2006 Foru Legea, ekainaren 9koa, Kontratu publikoei buruzkoa (I): aplikatzeko eremua. 6/2006 Foru legearen mendeko kontratuen definizioa. Administrazio Publikoetako Kontratuen sailkapena. Araubide juridikoa. Xedapen orokorrak kontratuen esleipenari, burutzeari, betetzeari, gauzatzeari, aldatzeari, iraungitzeari eta baliogabetzeari buruz.

9. 6/2006 Foru Legea, ekainaren 9koa, Kontratu Publikoei buruzkoa (II): Obra-kontratua. Proiektua. Kontratua burutzea. Iraungitzea. Lan publikoaren emakida kontratua: aldez aurretiko jarduketak, burutzea, aldeen eskubideak eta betebeharrak. Esleipenaren iraungitzea.

10. 6/2006 Foru Legea, ekainaren 9koa, Kontratu Publikoei buruzkoa (III). Laguntza kontratua. Obren proiektua prestatzea eta haien zuzendaritza fakultatiboa. Proiektuen lehiaketa. Laguntzaren emakida kontratua.

11. 31/1995 Legea, Lan arriskuen aurreikuspenari buruzkoa. Xedea eta eremua. Enpresen eta langileen eskubideak eta betebeharrak. Aurreneurrien sistemak.

12. 15/1999 Lege Organikoa, abenduaren 13koa, Datu Pertsonalak Babesteari buruzkoa.

13. 11/2005 Foru Legea, azaroaren 9koa, Diru-laguntzei buruzkoa. Xedapen komunak. Emakidaren prozedura. Justifikazioa, egiaztapena, ordainketa, jarraipena eta kontrola.

14. Nafarroako Unibertsitate Publikoaren finantza-erregimena eta erregimen ekonomikoa. Exekuzio-oinarriak.

15. 4/2005 Foru Legea, martxoaren 22koa, Ingurumena babesteko esku-hartzeari buruzkoa (I). Xedea eta helburuak, Nafarroako Foru Erkidegoko Administrazioaren ingurumen baimena behar duten jarduketak. Nafarroako Erkidegoko Administrazioaren txostena edo ebaluazioa behar duten jarduketak.

16. 4/2005 Foru Legea, martxoaren 22koa, Ingurumena babesteko esku-hartzeari buruzkoa (II). Udalaren baimena behar duten jarduera sailkatuak. Ingurumen esku-hartzea behar duten jarduketen ikuskatzea. Ingurumen legezkotasuna lehengoratzea Arau-hausteak eta zehapenak.

17. 11/2007 Foru Legea, apirilaren 4koa, Nafarroako Foru Komunitateko administrazioan administrazio elektronikoa ezartzekoa.

18. 1945/1983 Errege Dekretua, ekainaren 22koa, kontsumitzaileen babesaren eta nekazaritzako elikagaien ekoizpenaren arloko arau-hausteak eta zehapenak arautzen dituena.

Zati espezifikoa.

19. Tenperatura. Tenperaturaren eragina landareetan. Konpentsazio gunea. Termoperiodoa. Integral termikoa. Hotzaren eragina landareetan. Lozorroak etetea. Bernalizazioa.

20. Tenperatura desegokien ondorioa. Tenperatura beroak. Bero erasoa. Tenperatura hotzak. Izozteak: izozte-motak, sintomak eta ekartzen dituzten kalteak. Prebentziorako eta aurka egiteko metodoak.

21. Argi erradiazioa eta horren eragina landareetan. Argiaren intentsitatea. Argi erradiazioaren izaera. Neurtzeko moduak. Fotoperiodoa. Argiaren, uraren eta tenperaturen arteko elkarrekintza.

22. Landaketak haizearen aurka babestea. Haizearen eragina baratzeko eta zurezko laborantzetan. Haize-babesak: motak, diseinua, instalazioa.

23. Faktore klimatikoen egintza konbinatua. Nekazaritzako klima. Indize termoplubiometrikoak. Klimaren, bioklimaren eta agroekologiaren sailkapena. Estazio agroklimatologikoak.

24. Lurreko ura. Hezetasunaren neurketa. Profil hidrikoak. Landaketen ur beharra. Ureztatzeko behar den ura zehaztea. Ureztaketaren iraupena eta maiztasuna. Ureztaketaren modulua. Ureztatzeko lur motak. Ureztatzeko metodoen sailkapena eta ezaugarri orokorrak.

25. Ihinztadura bidezko ureztaketa. Instalazioaren osagaiak. Iragazki ekipoak. Ureztapen ongarridunerako ekipoak. Kontrolerako eta automatizaziorako tresnak. Diseinu eta erabilera agronomikoak.

26. Ureztaketa lokalizatua. Instalazioaren osagaiak. Iragazki ekipoak. Ureztapen ongarridunerako ekipoak. Kontrolerako eta automatizaziorako tresnak. Diseinu eta erabilera agronomikoak.

27. Ureztapen ponpak. Motak eta ezaugarriak. Lan-kurbak. Uraren presio-igogailuak, hornidura beharren arabera.

28. Balbulak ureztapenean, motak, eginkizunak. Elektrobalbulak eta hidrobalbulak. Funtzionamendu printzipioak.

29. Nekazaritza lanak. Helburuak. Lan motak. Lurra lantzeko egoera onenean noiz dagoen zehaztea. Nekazaritzan maiztasun handieneko lanak zein diren azaltzea eta haiek egiteko metodologia.

30. Drainatzeak nekazaritzako lurzoruetan. Ura husteko beharraren ebaluazioa. Drainatze motak. Drainatze mota aukeratzeko eragiten duten faktoreak. Diseinua eta kalkulatzeko metodoak.

31. Landa bideak. Diseinatzeko irizpideak. Landa bide baten geometriaren elementuak. Zelaitzeak. Zoladurak. Fabrikako obrak.

32. Lurraren medeatzeak. Karezko medeagarriak. Beharren zehaztapena. Kareztatzeko teknikak. Medeatze organikoak. Beharren zehaztapena. Medeatze organiko motak eta haien ezaugarriak. Aplikatzeko teknikak.

33. Ongarritzea. Ongarri mineralak, organomineralak, gabeziak zuzentzen dituztenak eta hazkundea sustatzen dutenak. Definizioak, motak, formulak eta orekak. Ongarri likidoen, solidoen eta gaseosoen sailkapena.

34. Hondakin organikoak ongarri gisa erabiltzea. Simaurrak, araztegiko lohiak eta konposta: ezaugarriak eta ongarri gisa duten balioa. Horiek erabiltzean sortzen ahal diren ingurumen eta osasun arriskuak.

35. Neguko eta udaberriko zerealak. Nekazaritza- eta merkataritza-ezaugarriak espezie nagusietan. Ekoizteko teknikak.

36. Lekadunak. Nekazaritza- eta merkataritza-ezaugarriak espezie nagusietan. Ekoizteko teknikak.

37. Fruta-arbola hezurdunak. Landatzeko sistemak. Landatzeko diseinua eta teknikak. Elementu osagarriak. Eitea emateko inausketa eta mantenimendua.

38. Fruta-arbola hazidunak. Landatzeko sistemak. Landatzeko diseinua eta teknikak. Elementu osagarriak. Eitea emateko inausketa eta mantenimendua.

39. Mahatsondoa. Landatzeko sistemak. Landatzeko diseinua eta teknikak. Elementu osagarriak. Eitea emateko inausketa eta mantenimendua.

40. Zuhaitz apaingarriak. Landaketa. Inausketa eta mantentze lanak.

41. Zuhaixka apaingarriak. Landaketa. Inausketa eta mantentze lanak.

42. Heskaiak eta landaresiak. Motak. Espezie eta barietate nagusiak. Landare-tarteak.

43. Soropila. Ezartzea. Espezie eta barietate nagusien ezaugarriak. Mantentze lana, ureztaketa eta ongarritzea. Ereite hidraulikoa-

44. Izurrite eta eritasunen kontrola eta horien kontrako borroka. Zuzeneko metodoak. Borroka kimikoa: Produktu fitosanitarioen sailkapena. Toxizitatea, fitotoxizitatea eta hondarreko egintza. Aplikazio sistemak. Erregistro fitosanitarioa. Borroka biologikoa: Kontzeptua. Nekazaritzan aplika daitezkeen metodoak.

45. Ekoizpen integratua eta ekologikoa. Kontzeptua. Ekoizpenerako arauak, erabilera eta merkaturatzea.

46. Nekazaritzan erabiltzen diren material plastikoak. Erabiltzen diren plastiko motak. Nekazaritzan dituzten aplikazioak. Plastiko erabilienen propietate eta ezaugarri optikoak. Normalkuntza.

47. Hazitegiak: Motak, diseinua, horiek eraikitzeko erabiltzen diren materialak. Hazitegien erabilera belarkiak eta zurezko landareak ekoizteko. Lurraren desinfekzioa eta esterilizazioa.

48. Laborantzako tunelak: motak, diseinua, horiek eraikitzeko erabiltzen diren materialak. Tunelen instalazioa. Aireztapena. Tunel behartu mota desberdinak kokatu eta erabiltzeko arau orokorrak.

49. Berotegiak: Motak, diseinua. Horien estalkietarako erabiltzen diren materialak. Ezaugarri teknikoak. Neurriak ezartzea.

50. Berotegien ingurumen kudeaketa. Ingurumen kontrolerako sistema nagusien deskribapena eta ezaugarriak. Hautatzeko irizpideak.

51. Behe tentsioko sareak (BT): eroaleak, isolamendua eta babes-hodiak. Banaketa eta maniobra-koadroak: zirkuitulabur fusibleak, etengailu automatikoak, izar-triangelu arrankatzaileak. Larrialdi multzo elektrogenoak: ezaugarriak, maniobra-motak, multzoaren funtzionamenduaren parametro kritikoak. Mantentzerako irizpide orokorrak.

52. Arrisku orokorrak aurreikustea nekazaritza arloan.

53. Nekazaritzako makineriaren arrisku arrunt eta orokorrak aurreikustea.

54. Lurra lantzeko makineria. Goldeak: motak, horien osagaiak, ezaugarriak, beharrezko potentzia, segurtagailuak, erregulazioak, mantentze-lana. Fresatzeko makinak: goldeen kasuan bezala. Lurra lantzeko makinak: gradak, areak, alperrak, ildarteak egiteko tresnak eta desegitekoak. Ekipo konbinatuak.

55. Lurra lantzeko tresnak I. Ongarritzeko makinak: motak, horien osagaiak, ezaugarriak, beharrezko potentzia, segurtagailuak, erregulazioak, mantentze-lana. Simaurra emateko ekipoak. Ongarritzeko makinen kasuan bezala.

56. Lurra lantzeko tresnak II. Ereiteko makinak: motak, horien osagaiak, ezaugarriak, beharrezko potentzia, segurtagailuak, erregulazioak, mantentze-lana. Landatzeko eta birlandatzeko makinak: Ongarritzeko makinen kasuan bezala.

57. Lurra lantzeko tresnak III. Landareak babesteko makinak: motak, horien osagaiak, ezaugarriak, beharrezko potentzia, segurtagailuak, erregulazioak, mantentze-lana.

58. Estazio agrometereologikoak. Motak. Osagai nagusien azalpena. Mantentze-lana.

Oharra: Deialdi hau argitaratzen den egunean indarrean diren arauekin bat etortzea eskatuko da gai guztietan.

Iragarkiaren kodea: F1101134