Iragarkia

19. ALDIZKARIA - 2008ko otsailaren 11

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

24/2008 EBAZPENA, urtarrilaren 17koa, Arriskuen Prebentziorako eta Lanaren zuzendari nagusiak emana, Mutiloabeitiko "Adacen" enpresaren lan hitzarmen kolektiboa erregistratzea, gordetzea eta Nafarroako ALDIZKARI OFIZIALean argitaratzea erabakitzen duena (espediente zenbakia: 1/2008).

Departamentu honetan 2008ko urtarrilaren 14an sartu zen "Adacen" enpresaren lan hitzarmen kolektiboaren testua, 41 artikuluz, 2 xedapen gehigarriz, 2 azken xedapenez eta eranskin batez (2007rako lansarien taula) osatua, enpresaren ordezkariek eta langileen delegatuek (CCOO) 2007ko abenduaren 21ean sinatu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratzeko, gordetzeko eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Lan hitzarmen kolektiboen erregistro eta gordailuei buruzko abenduaren 18ko 1040/1981 Errege Dekretuan ezarritakoa.

Horrenbestez, Berrikuntza, Enpresa eta Enplegu kontseilariak irailaren 27an emandako 285/2007 Foru Aginduarekin bat, horren bidez izendatu baitziren Berrikuntza, Enpresa eta Enplegu Departamentuko zuzendari nagusien eta idazkari nagusi teknikoaren aldi baterako ordezkoak, organo horretako titularra kanpoan dagoenez,

EBATZI DUT:

1. Mutiloabeitiko "Adacen" enpresaren lan hitzarmen kolektiboa (kodea: 3108002) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko urtarrilaren 17an.-Lan Zerbitzuko zuzendaria, Arriskuen Prebentziorako eta Lanaren zuzendari nagusiaren ordezkoa, sinadura ulertezina.

ADACEN ENPRESAREN IV. LAN HITZARMEN KOLEKTIBOA 07-08

I. TITULUA

Aplikazio esparrua

1. art. Iraunaldia. Lan hitzarmen kolektibo hau 2007ko urtarrilaren 1etik 2008ko abenduaren 31 bitarterako da, salbu eta berariaz beste iraunaldi baterako hitzartzen diren auzietarako.

Lan hitzarmenaren mugaeguna iritsita, amaiera iragarritzat joko da. Aldeek Nafarroan ezintasunak dituztenei laguntzeko zentroen (Nafarroako Gobernuarekin itunduak) sektorearen II. lan hitzarmena negoziatuko dute. Beste lan hitzarmen bat egin arte, lan hitzarmen honen arauek indarrean segituko dute.

2. art. Langileria. Lan hitzarmen kolektibo honek eragina izanen du Garuneko Gaitzaren Nafarroako Elkartean ("Adacen") Langileen estatutuak eta gainerako legeek ezarri dituzten kontratu modalitateetako edozeinetan oinarrituta lan egiten duten langile guztiengan, baina ez zaie aplikatuko boluntariotza sozialean dihardutenei edo Adacen elkarteak zerbitzuen errentamenduak kontratatu dituen enpresetako plantilletan dauden langileei.

II. TITULUA

Langileen sailkapena

3. art. Langileen sailkapena

-1. taldea. Teknikariak eta bulegariak: dagokien titulazioa eskatuko zaie, sektorearen itun edo arauetan kasu bakoitzerako ezarritakoa kontuan hartuta.

-2. taldea. Zuzeneko arretako langile espezializatugabeak.

-3. taldea. Zerbitzu orokorretako langileak.

Kategoriak, lanpostuak eta eginkizunak I. eranskinean zehazten dira.

Artikulu honetan aipatzen den langileen sailkapena adibide gisara eman da. Horrek ez du lanpostu guztiak betetzera behartzen. Adibide bat baino ez dira, halaber, I. eranskinean esleitutako eginkizunak. Langile guztiak euren nagusiek agintzen dizkieten lan eta operazioak egitera behartuak daude, nor bere eskumen eta lanbide kategoriaren barnean eta duintasunaren eta lanbide kategoriaren kalterako izan gabe.

Dena dela, zentro bakoitzeko zuzendaritzak langileen legezko ordezkariei esparru orokorreko kategoria funtzionalen berri emanen die (kategoria zehatz baterako, inoiz ez banakakoetarako); kategoria horiek borondatez ezarriko ditu, zerbitzuaren antolaketa hobea izateko.

III. TITULUA

Kontratazioak

4. art. Kontratazioak. Lan zentroan langile berriak hartzeko eta edozein motatako kontratazioak egiteko langile berriaren eta enpresako zuzendaritzaren arteko kontratu librea beharko da egin.

Behin-behineko kontratu bat mugaegunik gabeko kontratu bihurtzen bada, inolako etenaldirik gabe edo 20 lanegunetik gorako tarterik gabe, enpresa behartua egonen da aurreko behin-behineko kontratuak zuen antzinatasun data mantentzera.

5. art. Praktikaldiko kontratua. Modalitate horretan kontratatzen diren langileek kategoria horretako soldataren %90 kobratuko dute. Nolanahi ere, jaieguneko osagarriak oso-osorik kobratuko dira.

6. art. Errelebo kontratua. Enpresak erraztasunak emanen dizkie erretiro partziala hartu nahi duten langileei, eta beharrezkoa den kasuetan errelebo kontratuak egiteko konpromisoa hartu du, murrizten den lanaldia gutxienez %50ekoa baldin bada eta langileak espresuki onartzen baditu enpresak ezarritako prestazioaldiak eta lanaldi murriztuaren antolaketa. Kasu horretan, langileak lanaldiaren portzentajea aukeratuko du, adierazitako gutxieneko horretatik abiatuta.

7. art. Lana uztea. Enpresatik borondatez alde egin nahi duen langileak gutxienez hamabost egun lehenagotik abisatu beharko du. Epe hori betetzen ez badu, hamabost egun bete arte falta diren egunei dagokiena kenduko zaio likidaziotik.

Enpresak ohartarazpen hori epearen barrenean eta behar bezala jasotzen badu, beharrezkoa den likidazioa lan harremana bukatzean egin beharko du. Betebehar hori betetzen ez badu, langileak kalte-ordain bat jasotzeko eskubidea izanen du, hain zuzen, egun bateko soldata likidazioa atzeratzen den egun bakoitzeko. Ohartarazpena zenbat egun aurretik egin den, horixe izanen da kalte-ordainetarako muga. Kalte-ordainak bere kontratuaren bukaeran jaso behar duenaz apartekoa izanen da, kontratuak, berez, hala ezartzen badu.

8. art. Probaldia. Langile sartu berri orok probaldi bat pasatu beharko du nahitaez, 5. artikuluan kategoria bakoitzarentzat ezarritako denbora gainditu ezin izanen duena, zerrenda honetan adierazten den bezala:

-1. taldea.

.Goi mailako tituludunak: 6 hilabete

.Erdi mailako tituludunak: 4 hilabete

.Gainerakoak: 2 hilabete

-2. taldea. 2 hilabete

-3. taldea. hilabete 1

Probaldi horiek kontuan hartuko dira antzinatasunerako, probaldiak iragan eta gainditu ondoren. Aldi baterako ezintasun egoerak ez du horren konputua etenen.

IV. TITULUA

Lan baldintzak

9. art. Lanaldia. Urteko benetako lanordu kopurua, ondorengo laukian azaltzen da:

TXAND. LANALDIAK GAINONTZEKO

2007. urtea 1.603 1.603 1.665

2008. urtea 1.530 1.603 1.665

Aurrekoak lanaldi osoak dira, aipatzen diren taldeen baldintzei jarraikiz ezarri direnak. Zaintzaileen eta goizez, arratsaldez eta gauez aritzen diren langileen lanaldi murriztea lanaldi osoka eginen da.

10. art. Prestakuntza eta birziklatze profesionala. Urteko orduetatik parte bat nahitaezko prestakuntzarako izanen da, eta horrelakotzat joko dira enpresak antolatu eta/edo baimentzen dituen prestakuntza ekintzak, ohiko orduetan zein ordutik kanpo ematen direnak. Bertaratzea nahitaezkoa izateko, enpresak kurtsoa hasi baino gutxienez 15 egun lehenago jakinarazi beharko du.

Prestakuntza hori lanordutik kanpo edo lanegunak ez direnetan egin behar denean, egoera horretan ematen diren orduak eta egunak ezin izanen dira ezarritako gehieneko kopurua baino gehiago izan. Kasu horretan, horien errekuperazioa lanaldi osotan eginen da, ordu hondarrak salbuetsita. Nahitaez eman beharreko orduak, gehienez, hauek izanen dira:

NAHITAEZKO

Teknikariak eta bulegariak 30 15

Asteburuko edo jaiegunetako langileak 20 5

Asteburu edo jaiegunetan Ast. kanpo bald. bada

Guztira 20 ordu diren

horietatik 6 ordu* 3

Gainerako langileak 20 5

(*) Asteburutik kanpoko orduak enpresarako eta bere jardueretarako nahitaez bete beharreko prestakuntzarako aplikatuko dira bakarrik, eta betiere ezinezkoa bada asteburuetan egitea.

Langileen legezko ordezkariei kontsulta egin ondoren, enpresak prestakuntza plana prestatuko du.

11. art. Atsedenaldiak. Lanaldi jarraituetarako, benetan lan egindako denboratzat hartuko den atsedenaldia ezarri da oro har:

-5-6 orduko lanaldiak: 10 minutu

-6 orduko edo gehiagoko lanaldiak: 20 minutu

Eragozpenik ez badago, atsedenaldia lantokian bertan hartu beharko da. Atsedenaldiak zentroko zuzendaritzak finkatzen ahal ditu, eta horren kariaz zerbitzu egokia emateari ez zaio inola ere kalterik eginen.

Ohiko lanaldiaren barnean atsedenik ez hartzeak ez du, inola ere, enpresari konpentsazioa eskatzeko eskubiderik sortuko.

12. art. Lan egutegia. Enpresak urtero prestatuko du lan egutegia. Bertan, zentroaren oporraldiak eta txanda orokorrak agertuko dira, eta lantokiko ageriko tokiren batean paratuko da. Aldez aurretik, zentroko zuzendaritzak langileen ordezkariekin hitz eginen du.

13. art. Oporrak. Langileek urtean 30 egun naturaleko oporrak izateko eskubidea izanen dute.

Gutxienez 6 hilabeteko antzinatasuna duten langileek euren aferetarako zenbait egun solte hartzen ahalko dituzte urtero. Horregatik ez da ezarritako benetako urteko lanaldia murriztuko.

-Lanaldi osoa: 3 egun

-Gaueko txanda eta %50eko edo gehiagoko lanaldiak: 2 egun

-%50etik beherako lanaldiak: egun 1.

Horretarako, lanaldiaren portzentajeak ohiko lanaldiaren araberako lanaldi kopuruari jarraikiz kalkulatuko dira, alde batera utzita lanaldi bakoitzean lan egiten den ordu kopurua.

Horiek gutxienez 5 egun lehenago eskatuko dira, ezinbesteko kasuetan izan ezik, eta emanen dira zerbitzuaren beharrek eragozten ez badute (erreferentziako plantillak).

Zentroa eta enpresa ados jarriko dira oporrak antolatzeko prozedura egiteko.

6 hilabetetik gorako kontratuetan, oporrak nahitaez hartu beharko dira, eta ezin izanen dira ez ordaindu ez konpentsatu.

Oporren behin betiko egutegia zehaztu ondoren, zehaztapen kolektibokotzat hartuko dira, eta horregatik, aldi baterako ezintasun prozesuak direla-eta, ezin izanen da egunez aldatzeko eskaera egin, non ez den 7 egun edo gehiagoko baja dakarren lan istripua, amatasun baja edo haurdunaldiko arriskua edo ospitalizazioa suertatzen oporraldia hasi baino lehen. Kasu horietan, gertakizun horietako batekin batera gertatzen diren opor egunak bakarrik aldatuko dira egutegiko beste data batera. Elkarrekin ados jarrita aldatuko dira opor egunak beste egun batzuetara. Adostasunik ez izatera, enpresak erabakiko du opor egun horiek zein egunetara aldatu.

Oro har, oporrak urteko abenduaren 31n bukatuko dira.

Enpresaren opor egunen egutegiaren arabera finkatutako oporraldiak bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasun egoera batekin, edo amatasun baimenarekin, langile horrek oporrak hartzen ahalko ditu, baita urte naturala igarota ere.

14. art. Baimen ordainduak. Langileek, aurrez jakinarazi eta ondoren justifikatuta, zilegi dute lantokitik ateratzea, soldata kobratzeko eskubidearekin, Langileen Estatutuaren 37.3 artikuluan aurreikusitako denborarako, b) atalean xedatutako kasuan izan ezik, ondoko honetan dioenak ordezten baitu:

-Seme edo alaba baten jaiotza: 5 egun natural

-Gurasoen, anaia edo arreben zein seme edo alaben ezkontza: egun 1.

-Heriotza:

.Ezkontidea eta seme edo alabak: 6 egun natural

.Gurasoak: 3 egun natural

.Anaia edo arrebak: 2 egun natural

.-Aiton edo amonak, bilobak, aitaginarreba edo amaginarrebak (*), koinata edo koinatuak (*): egun natural bat.

Lantokitik hileta egiten den herrira 300 km baino gehiago baldin badaude, aurreko baimen egunei beste bat erantsiko zaie.

-Egun bat baino gehiagoko ospitalizazioa:

.Ezkontidea eta seme edo alabak: 5 egun natural

.Gurasoak: 3 egun natural

.Anaia edo arrebak, aitaginarreba edo amaginarrebak (*): 2 egun natural

.Aiton edo amonak eta ilobak: egun natural bat.

(*) Izatezko bikotekideen gurasoak eta anai-arrebak aita-amaginarrebekin eta koinata-koinatuekin parekatuko dira.

Ezkontidea zein seme edo alabak ospitaleratzen badira, eta langileak lantokitik 100 km baino urrunago dauden herri batera joan-etorria egin behar badu, aurreko baimen egunei beste bat erantsiko zaie.

Espresuki ezarri da baimena ezin dela ospitalizazioa baino luzeagoa izan.

Ospitalizazioak daudenean, egoerak irauten duen denbora guztian izanen da baimena hartzeko aukera. Ezein kasutan ezin izanen dira hartu, gozamen gerokotuaren sistema honen bidez, gertaera eragilearen ondo-ondotik hartu izan balitu zegozkiokeenak baino lan egun gehiago.

-Odol bereko edo ezkontza bidezko ahaideen ebakuntza, ospitaleratu beharrik izan gabe, baina etxean atseden hartzea agintzen bada: 2 egun natural, gehienez ere.

Honako hau da ospitalizaziorik gabeko ebakuntza: gorputz atal bateko anestesia edo anestesia orokorra beharrezkoa den konplexutasun ertaineko prozedura diagnostiko edo kirurgikoa, zeinean pazienteak, denbora tarte zehaztugabe baten ondoren, operazioko egun berean etxera itzultzen baitira eta familiaren laguntza behar baitute. Inguruabar hori medikuaren txosten bidez egiaztatu beharko da baimena eman aurretik edo ondoren.

-Gizarte Segurantzako medikuntza orokorreko medikuen eta mediku espezialisten kontsultara joateko: kontsultara joateko behar-beharrezkoa den denbora.

-Azterketetara joateko: ikastetxe publikoetako eta unibertsitateetako azterketa ofizialetara joateko. Azterketetara lanorduetatik kanpo joaterik ez badute, lehenengo 10 orduak baino ez zaizkie ordainduko, urte natural bakoitzeko. Ez dira zenbatuko azterketa bakoitza egiteko bidean ematen dituen orduak (gehienez 2 ordu), betiere azterketak lantokia duen herritik kanpo badira. Gainerakoak urte naturalaren barruan sartu beharko dira.

"Ezkontidea" aipatzen denean, balio bera du ofizialki eratu eta erregistratutako izatezko bikoteentzat.

15. art. Amatasuna, aitatasuna, adopzioa eta bularra ematea.

-Amatasun baimena: langileak etenik gabeko 16 asteko baimena hartzeko eskubidea izanen du; 2 gehiago, erditze multiplean izandako haur bakoitzarengatik. Interesdunak nahi bezala banatuko du baimena (erditu baino lehen edo ondoren), betiere sei aste haurra jaio ondoren hartzen baditu.

Baimen hori, amaren nahitaezko atsedenaldia igarota, bai aitak bai amak eskatzen ahalko dute, eta lanaldi osoan edo partzialean banatu, baldin eta baimenaren gehieneko iraupena gainditzen ez bada.

Garaia baino lehen erdituz gero edo edozein konturengatik jaioberriak erditzearen ondoren ospitalean egon behar izanez gero, amak edo, ezin badu, beste gurasoak eskaturik, ospitalean senda-agiria hartzen denetik aurrera kontatzen ahalko da etenaldia. Kontaketa horretatik salbuesten dira erditu ondoko lehenbiziko 6 asteak: epe horretan amak eten beharko du kontratua nahitaez.

Aski pisu ez izateagatik garaia baino lehen erditzen bada, edo jaioberriak, baldintza klinikoak direla eta, erditu ondoren ospitaleratzea eskatzen badu, zazpi egunez baino gehiago, etenaldia luzatu eginen da, jaioberria ospitaleratua egoten den egunetan. Hamairu astez luzatuko da gehienez, betiere arauekin bat.

Amatasuneko legezko denbora bi aste gehiago luzatuko da, soldataren %100 ordainduta, baldin eta emakumezko langileak amatasuneko hemezortzi aste horietatik lau bederen haurra jaio baino lehen hartzen baditu eta, eskaera egiteko momentuan, aldi baterako ezintasun egoeran ez badago. Emakumezko langileak aukera hori hartzen badu, 18 aste horiek oso-osorik hartuko ditu, erditze eguna edozein dela ere. Horretarako, medikuaren ziurtagiria aurkeztu beharko du, aurreikusitako erditze eguna adierazten duena.

-Adopzioa edo harrera: sei urteko edo gutxiagoko haurrak adoptatu edo hartzen badira, etenik gabeko 16 asteko baimena hartzen ahalko da; 2 gehiago, adingabeak ezgaitasunen bat badu. Baimena lanaldi osoan edo partzialean banatzen ahalko da.

Nazioarteko adopzioetan, gurasoek haurraren jatorriko herrialdera joan behar badute, baimena ebazpen judiziala baino gehienez ere 4 aste lehenago hasten ahalko da.

-Aitatasuna: seme edo alaba bat izan edo adoptatzeagatik, aitak etenik gabeko 13 eguneko baimena hartzeko eskubidea izanen du; 2 egun gehiago, erditze, adopzio edo harrera multiplea bada. Baimen hori seme edo alaba bat izan edo adoptatzeagatik 14. artikuluan ezartzen den baimenaren ondoren hartzen ahalko da, amatasun baimenaren bitartean edo ondoren. Etenaldia lanaldi osoan edo partzialean banatzen ahalko da.

-Baimena, garaia baino lehen erditzeagatik: seme edo alaba bere garaia baino lehen jaio delako edo jaio ondoren beste edozein arrazoirengatik ospitalizaturik egon behar badu, aitak edo amak eskubidea izanen dute lantokitik ordubetez lekutzeko. Orobat, lanaldia gehienez 2 ordutan murrizten ahalko dute, eta lansaria ere proportzionalki murriztuko zaie.

-Haurrari bularra emateko baimena: bederatzi hilabetetik beherako haurrari bularra ematen dioten emakumezko langileek eskubidea izanen dute lanetik ordubetez lekutzeko. Denbora hori bi zatitan bana dezakete. Baimena amak nahiz aitak hartzen ahal dute, beren nahierara, biak lanean ari badira. Biek, hala nahi badute, eskubide hori lanaldiaren ordu erdiko murrizketarekin ordezka dezakete, helburu berbererako, edo lanaldi osotan pilatzen ahal dute, amatasun edo aitatasun baimena amaitzen denerako.

16. art. Ordaindu gabeko baimenak.

Enpresan urtebeteko antzinatasuna duen langile orok, hamabost egunetik hiru hilabetera arteko ordaindu gabeko baimena hartzen ahalko du urtero, gutxienez 15 egun lehenago eskatuta. Baimen hori zentro bakoitzeko oporraldietan lortzeko, enpresaren aldez aurreko baimen idatzia beharko da. Oporraldi edo inguruabar horietatik kanpo, baimena automatikoa izanen da, betiere erreferentziako plantillak betetzen badira.

Baimena emateak ez du inolako eraginik izanen langileen oporretan.

Legezko ondorio guztietarako, baimen horiek eszedentzia gisa tramitatuko dira, enpresara itzultzea salbuetsita; izan ere, baimena bukatu eta besterik gabe itzuliko baita langilea. Baimena hartzeak ez du antzinatasunaren konputua etenen.

17. art. Borondatezko eszedentzia.

Enpresan urtebeteko antzinatasuna duen langile orok 4 hilabetetik 5 urte arteko borondatezko eszedentzia hartzen ahalko du, eta lanpostua gordeko zaio lehendabiziko urtean.

Bigarren urtetik aurrera, eszedentzian dagoen langileak ez du beste eskubiderik enpresan hutsik dauden eta bere kategoriakoak edo antzekoak diren lanpostuetan sartu ahal izateko lehentasuna izatea baizik.

Enpresan gutxienez bi urteko antzinatasuna duten II. lanbide taldeko langileei eszedentzia automatikoki emanen zaie.

Gainerako langileei borondatezko eszedentzia emanen zaie, baina betiere erreferentziako plantillak osatzen badira.

Beste eszedentzia bat hartu ahal izateko, langilea lanpostura itzultzen denetik gutxienez bi urte igaro beharko dira. Eszedentziarako eskaria 20 egun lehenago egin beharko da, idatziz, eta, orobat itzultzeko eskaria ere.

18. art. Seme-alabak eta familiakoak zaintzeko eszedentzia:

Langileek eskubidea izanen dute gehienez ere hiru urteko eszedentzia hartzeko, lanpostua gordetzeko eskubidearekin, seme-alaba bakoitza zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera-fasean. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.

Gehienez ere hiru urteko eszedentziarako eskubidea izanen dute, halaber, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen familiartekoren bat, odol bereko edo ezkontza bidezko bigarren mailara arteko ahaidea, zaindu behar duten langileek.

Eszedentzia hori aldi laburragoetan banatu ahal izanen da, subjektu eragile berarentzat, gehieneko aldia osatu arte. Beste subjektu eragile batek eszedentzialdi berri bat sortzen duenean, hori hastearekin bukatuko da ordura artekoa, halakorik izanez gero.

Atal honetan ezartzen den eszedentzia langile bakoitzaren eskubidea da, gizonezkoa izan edo emakumezkoa izan. Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.

Langileak artikulu honetan ezarritakoaren arabera eszendentzian ematen duen lehenengo urtea antzinatasunerako kontuan hartuko da, eta eskubidea izango du lanbide prestakuntzako ikastaroetara joateko, enpresaburuak deituta, batez ere lanera itzuli behar duenean.

19. art. Semea edo alaba eta beste ahaideren bat zaintzeko lanaldi-murrizketa.

Legepeko zaintza dela-eta, langileren batek adingabekoren bat edo ordaindutako lanik egiten ez duen urritu fisiko edo psikikoren bat bere kargu izanez gero, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta. Lanaldia murrizteko eskubideak haurrak 8 urte bete bitarte iraunen du, eta luzatu ere luzatzen ahalko da, semeak edo alabak urteak betetzen ditueneko urteko ikasturtea amaitu bitartean (ekaina).

20. art. Lanaldi murrizketa adinagatik. II. eta III. lanbide taldeko langileek, 55 urte betetzen dituztenean, eskubidea izanen dute ohiko lanaldia %50 murrizteko, soldata ere hein berean murriztuta. Elkarrekin adostuko da lanaldiaren banaketa. Adostasunik ez izatera, enpresak ezarriko du ordutegia eta/edo lan txandak.

21. art. Lanaldi-murrizketa edo lan denboraren berrantolaketa, genero indarkeria dagoenean.

Genero indarkeriaren biktima izan den emakumezko langileak, egiaz babestua izan dadin eta gizarte laguntza integrala izan dezan, eskubidea izanen du lanaldia murrizteko, soldata hein berean murriztuta edo bere lan denbora berrantolatzeko, ordutegia egokituz, ordutegi malguaz baliatuz edo enpresak lan denbora antolatzeko dituen beste bide batzuk erabiliz.

Kasu konkretu horietan eskubide horiek erabiltzen ahal dira lan hitzarmen kolektiboetan edo enpresaren eta langileen ordezkarien arteko akordioetan ezartzen diren moduan, edo empresaren eta ukitutako emakumezko langilearen artean ados jarrita. Horrelakorik ezean, eskubide horiek emakumezko langileak berak gauzatuko ditu, aurreko atalean ezarritako arauak aplikatuz, desadostasunak ebazteari dagozkionak barne.

22. art. Zerbitzuaren bermeak.

Erreferentziako plantilla: zuzeneko arretako langile espezializatugabeak, plantillaren %50, bederen, egonkorrak izanen dira.

Plantilla egonkorra dela ulertuko da 6 hilabeteko antzinatasuna, gutxienez, duen langileria (edo 130 lanaldi metatuak dituena, osotara 18 hilabeteko aldian), egin diren zerbitzuak antzekoak izan badira, betiere.

Gainerako langileentzat enpresak zehaztuko du erreferentziako plantilla.

23. art. Lanaldia malgutzea, familiakoei laguntzeko. Laneko eta familako eginkizunak batera eramateko, lanaldia malgutzeko aukera izanen dute langileek. Bakoitzak urtero 8 orduko poltsa izanen du, harekin bizi diren familiakoei medikuarenera laguntzeko edota norberaren zein familiakoen bestelako betebehar atzeraezinetarako.

Poltsa osoa erabiltzen bada, lanaldi hori langilearen opor egunetatik deskontatuko da. Urte naturala amaitzean poltsaren zati bat baino ez bada erabili, lanaldi osora iritsi gabe, edo oporraldia agortuta badago, urteko azkeneko nominatik ordu horiei dagokien kopurua deskontatuko da.

V. TITULUA

2007ko baldintza ekonomikoak

24. art. Oinarrizko ordainsariak:

Oinarrizko soldata: kategoria bakoitzerako ezarritakoa da eta lan hitzarmen honen III. eranskinean ageri da.

Antzinatasuneko osagarri pertsonala: 2006ko abenduaren 31 arte eskuratutako antzinatasunaren ondoriozko eskubide ekonomikoak ad personam eskubide bilakatuko dira, eta 2007ko urtarrilaren 1etik aurrera "trebakuntza osagarria" izeneko soldata kontzeptua jasotzeko zenbaketa hemen ezarri bezala eginen da edo, bestela, hurrengo negoziazioetan Nafarroan ezintasunak dituztenei laguntzeko zentroen sektorearen lan hitzarmenean ezarritakoari jarraikiz.

Hauxe izanen da prozedura:

Langile bakoitzak lortu duen antzinatasuna 2006ko abenduaren 31n finkatuko da. Egun horretan, hirurtekoa jasotzeari utziko zaio, aurreko lan hitzarmenaren baldintzetan, eta trebakuntza jasotzeko zenbaketari ekinen zaio.

Egun horretan nominan finkatutako antzinatasun zenbatekoa "antzinatasuneko osagarri pertsonala" bilakatuko da. Osagarri hori urtero errebalorizatzen ahalko da, 2007ko urtarrilaren 1etik aurrera, eta ezin izanen da irentsi.

Azkeneko hirurteko mugaeguneratutik aurrerako hilabetetako antzinatasuna, nominan finkatu gabe dagoena hirurteko bat osatzen ez duelako, finkatu eginen da eta ondorioak izanen ditu ordainsarian: 2006ko hirurtekoaren araberako balio proportzionala gehituko zaio 2008ko urtarrilaren 1eko osagarri pertsonalari.

2008ko urtarrilean, 2007an horregatik jaso ez ziren atzerapenen paga jasoko da, formula honi jarraikiz: 2006ko abenduaren 31ra bitarteko antzinatasun hilabeteen kopurua, data horretan nominan finkatutako azken hirurtekotik aurrerakoa eta hirurtekoak 2006ko tauletan duen balioaren araberakoa, zati 36 x 14 paga. Zenbateko hori errebalorizatuko da, 2007 eta 2008rako hitzartutako soldaten igoeraren arabera.

25. art. Eginkizunen araberako kategorien osagarriak. Ordainsari osagarriak dira langileek euren erantzukizunarengatik, dedikazio bereziarengatik eta enpresak irizten dituen beste arrazoi batzuengatik kobratzen dituztenak.

Talde horren barnean ordainsari osagarri gisa sartzen dira koordinazio plusa eta erantzukizun plusa. Horietako bakoitzaren zenbatekoak I. eranskinean adierazten dira. Osagarri horiek jasoko dituzte aipatutako eginkizunetan ari direnean.

26. art. Aparteko pagak. Langileek urtean aparteko bi paga izateko eskubidea izanen dute, bata ekainean eta bestea abenduan. Aparteko pagak honela osatuko dira: oinarrizko soldata, antzinatasuneko osagarri pertsonala eta eginkizunen araberako kategorien osagarriak.

Enpresan sartu berri diren langileek eskubidea izanen dute aparteko eskersarietatik dagokien zati proportzionala jasotzeko.

26.1.-Dedikazio osagarria. Langile batek zaintzaile kategoriarako ezarritako urteko lanaldia gainditzen badu, dedikazio osagarria jasoko du benetan lan egindako aparteko ordu bakoitzarengatik: haren kategoriako lansarien taulan ezarritako orduko zenbatekoa. Osagarri hori urtarrilean emanen den paga baten bidez ordainduko da.

27. art. Igandeko eta jaiegunetako lana. Igandez edo jaiegunez lan egiten duen langileak lan egindako ordu bakoitzarengatik osagarria kobratuko du, I. eranskinean ageri dena, baina artikulu honetatik kanpo geldituko dira aisiako jarduerak eta lana igandez edo jaiegunez egiteko propio kontratatutakoak.

27.1.-Gaueko lana. Gaueko lantzat hartuko da 22:00etan hasi eta biharamuneko 6:00en artekoa. Ordu horiek ordu arruntaren prezioari %25 gehituta kobratuko dira.

28. art. Dietak eta kilometrajea. Lan hitzarmen hau sinatzen denetik aurrera, dieta erdiaren zenbatekoa 15 euro izanen da, eta dieta osoarena 39 euro. Lana dela-eta, langile batek gaua etxetik kanpora eman behar izanez gero, elkarteak bere gain hartuko ditu ostatuko gastuak.

Enpresaren beharrak direla-eta, langileak bere ibilgailua erabili beharra duenean, enpresak 0,24 euro ordainduko dizkio kilometroko.

29. art. Aparteko orduak. Lanaldi arruntez gainera egiten direnak hartuko dira aparteko ordutzat, salbu eta txangoetan, kanpalekuetan, bidaietan eta horrelakoetan parte hartzean egiten direnak, zeinen konpentsazioa ondorengo atal batean adostuko baita.

Aparteko orduen artean honako hauek daude:

-"Ezinbestean sartu beharreko aparteko orduak: hainbat arrazoi direla medio, erabiltzaileei laguntza eman beharrez euren lanpostuan jardun behar duten langileek egin beharrekoak. Oro har, lanean segitu behar duten zaintzaileak, txandako langilea agertu ez delako enpresa behartua dagoenean langileen ordezkoak jartzera (laneko bajak, aurretik abisatu ezin izan diren baimen ordainduak edo enpresaren garraioaren atzerapenak).

Enpresa langilearen ordezkoa jartzera behartua ez dagoen egoeretan, txandako langilearen zain emandako denbora ez da aparteko ordutzat hartuko. Egoera horiek ondoko hauek dira: baimen ordainduetan edo aldi baterako ezintasunean aurreikusirik ez dauden arrazoiengatiko atzerapenak, hala nola garraio pertsonala eragiten duten gorabeherek edo beste edozein ustekabek sortutakoak.

Lehenengo kasuetan, konpentsazioa ordu eta erdiko atsedena izanen da, egindako aparteko ordu bakoitzeko.

Bigarren kasuetan, ukitutako langileak beste txandako langilearekin adostu beharko du haren ordez egindako lan denbora.

-Bestelako aparteko orduak: langileak bere eginkizunei dagozkion lanetan egindako orduak bere lanordutik kanpora (ahaideei laguntzea, lanak edo proiektuak bukatzea, bilerak, etab.). Ordu horien konpentsazioa ordu batekoa izanen da lan egindako ordu bakoitzeko, betiere enpresak baimenduta egin badira."

29.1.-Konpentsazioa, oporretako txandetara joateagatik. Oporretako txandetara joaten diren langileek konpentsazio hau izanen dute:

-"Lan egindako egunak honela kontatuko dira urteko lanorduak kalkulatzeko: egun bat, jarduerak irauten duen egun bakoitzeko.

-Gainera, konpentsazio opor egunak hartzen ahalko dira, egun erdia jardueran egoten den lanegun bakoitzeko (astelehenetik ostiralera, edozein hilabetetan), eta egun bat, larunbat, igande edo jaiegun bakoitzeko.

Aste Santuan eta Eguberrietan oporretako txandetara joaten diren begiraleek konpentsaziozko atseden egunak txanda bakoitza bukatu eta gehienez ere bi hilabeteko epean finkatu beharko dituzte.

V. BIS TITULUA

2008ko baldintza ekonomikoak

24. bis art. Ordainsariak. Lan hitzarmen honen eraginpeko langileen ordainsariak 2008an Nafarroan ezintasunak dituztenei laguntzeko zentroen sektorearen I. lan hitzarmena ezarritako ordainsariekin homologatuko dira eta oinarrizko soldataz eta osagarriez osatuko dira. Zenbatekoak eta banaketa dagokien lansarien taulan adieraziko dira. Lansarien taula batzorde paritarioan onetsiko da 2008ko urtarrilean, 2007ko NKPIa aditzera eman eta gero.

Ordainsari kontzeptuen zenbatekoak lanaldi osoari eta itundutako urteko ordu kopuruari dagozkio. Lanaldi partzialen ordainsaria lan egindako orduen proportziozkoa izanen da. Ordainsariok hilabetea bukatutakoan ordainduko dira, hurrengo hilabeteko lehenbiziko 5 egunetan eta lanaldiaren barnean, salbu eta hilabetetik beherako kontratua duten langileak badira.

24.1.-Oinarrizko soldata: lanbide kategoria bakoitzerako 2008ko soldata taulen eranskinean ageri da eta lanaldi osoari eta itundutako urteko ordu kopuruari dagokie.

24.2-Lan hitzarmenaren osagarria: lanbide kategoria bakoitzerako 2008ko soldata taulen eranskinean ageri dena da, lan egindako orduen araberakoa. Langileak ez du beste inolako osagarririk kobratuko lan motagatik, ez eta oraingo jardueraren inguruabarrengatik edo lan hitzarmen honen aplikazioaren ondorioz egokitzen ahal zaionagatik ere. Hori dela-eta, osagarri hori etorkizunean lan hitzarmen honetan ageri ez den bestelako ordainsariak irensten eta konpentsatzen ahalko du. 14 pagatan ordainduko da, aparteko bi pagak barne.

24.3.-Jaieguneko osagarria: igandez edo jaiegunez benetan egindako lana ordainduko da. Benetan lan egindako ordu osoen proportzioan ordainduko da eta ondorio guztietarako produktibitatearen kontsiderazioa izanen du. Aparteko pagetarako ez da kontuan hartuko eta oporren ordainsaritik espresuki baztertzen da.

24.4.-Erantzukizun/lanpostu osagarria: lanpostuaren erantzukizuna edo eginkizun berariazkoa ordainduko zaie enpresak postu horretarako edo eginkizun horretan aritzeko izendatu dituen langileei. Hilero sorraraziko da edo egunez eguneko hainbanaketa baliokidea eginen da. 14 pagatan ordainduko da, aparteko bi pagak barne.

24.5.-Jarduera/produktibitate osagarria: lana handitzea edo lanaren kalitatea ordainduko du. Hilero sorraraziko da edo egunez eguneko hainbanaketa baliokidea eginen da. Enpresak zehaztuko du zeinek kobratuko duen, eta kasu bakoitzeko epeak eta zenbatekoak. Bakarrik ordainduko da jarduera egiaz burutzen bada eta ez da kontuan hartuko aparteko pagetarako, ez eta aldi baterako ezintasunaren osagarriak kalkulatzeko ere.

24.6.-Dedikazio osagarria: langile batek zaintzaile kategoriarako ezarritako urteko lanaldia (zaintzaile kategoriarako ezarritako handiena) gainditzen badu, dedikazio osagarria jasoko du benetan lan egindako aparteko ordu bakoitzarengatik: haren kategoriako lansarien taulan ezarritako orduko zenbatekoa. Osagarri hori urtarrilean emanen den paga baten bidez ordainduko da.

24.7.-Trebakuntza osagarria: osagarri honen bitartez saritzen dira norberaren lanpostuan lortutako esperientziaren bidez jardueraren ezagutza handiagoa eta zerbitzuari irtenbideak eta kalitatea emateko gaitasun handiagoa duten langileak.

Zenbatekoa lansarien tauletako eranskinean adierazten dena da, edo lan egindako orduen zati proportzionala. 14 pagatan ordainduko da, aparteko bi pagak barne.

-I. mailako trebakuntza: zentroan gutxienez 4 urteko antzinatasuna duten langileek jasoko dute, betiere denbora tarte horretan haien lanpostuari dagozkion benetan lan egindako lanaldien eta enpresak eskainitako nahitaezko prestakuntzako orduen %50, gutxienez, egin badituzte.

-II. mailako trebakuntza: zentroan gutxienez 8 urteko antzinatasuna duten langileek jasoko dute, betiere lehen mailako trebakuntza lortu zutenetik haien lanpostuari dagozkion benetan lan egindako lanaldien eta enpresak eskainitako nahitaezko prestakuntzako orduen %50, gutxienez, egin badituzte.

Trebakuntzaldiaren zenbaketa 2007ko urtarrilaren 1ean hasten da langile guztientzat, hortaz, 2011ko urtarrilaren 1a arte ez da trebakuntza osagarririk jasoko. Egun horretan, langile bakoitzak ezarrita dituen baldintzen araberako zenbatekoa jasoko du.

Dena dela, beharrezko trebakuntza lanaldiak kalkulatzeko, langileak enpresan lan egin duen denbora osoa kontuan hartuko da, betiere 18 hilabete baino gehiago eman ez baditu enpresan alta eman gabe.

24.8.-Antzinatasuneko osagarri pertsonala: 2006ko abenduaren 31 arteko antzinatasunaren edo antzekoen zenbatekoa jasoko da, eta "ad personam" eskubidetzat joko, lehenengo xedapen iragankorrean adierazi bezala. Osagarri hori gainerako osagarriekin bat eguneratuko da.

24.9.-Osagarri pertsonala: osagarri pertsonala jasoko dute lan hitzarmen hau aplikatzearen ondorioz jaso beharko luketen urteko ordainsari globala baino ordainsari global handiagoa jasotzen duten langileek. Osagarri hori kalkulatzeko, lan hitzarmen bakoitzaren ordainsariak aintzat hartuko dira, eta kanpo geratuko dira erantzukizun edo produktibitate plusak zein jaso litezkeen eta lan hitzarmen kolektiboan aitortzen ez diren bestelakoak. Osagarri hori gainerako osagarriekin bat errebalorizatuko da.

25. bis artikulua. Aparteko pagak. Langileek aparteko 2 paga izateko eskubidea izanen dute, bata uztailean eta bestea Eguberrietan. Hauek osatuko dute aparteko paga: oinarrizko soldata, lan hitzarmenaren osagarria, trebakuntza osagarria, erantzukizun/lanpostu osagarria, osagarri pertsonala eta antzinatasuneko osagarri pertsonala.

26. bis artikulua. Aparteko orduak. Aparteko ordutzat joko dira lan hitzarmen honetan ezarritako urteko lanaldiaren gainetik egiten direnak.

Orduen zenbaketa urte bukaeran eginen da, eta enpresak baimendutako orduak, norberaren kategoriarako ezarritako urteko lanalditik gainekoak, ordu arruntaren %150ean ordainduko dira.

Ezinbestean eguneko ohiko lanalditik gaineko orduak egiten badira, sartutako orduen %150eko atsedenaldi bidez konpentsatuko dira, edo zenbateko berberaren bidez ordaindu. Ordu horiek enpresak eta langileak adostu bezala edo aparteko orduak sartu eta hurrengo 2 hilabeteetan hartuko dira.

26. bis. 1.-Konpentsazioa, oporretako txandetara joateagatik. Oporretako txandetara joaten diren langileek konpentsazio hau izanen dute:

-"Lan egindako egunak honela kontatuko dira urteko lanorduak kalkulatzeko: egun bat, jarduerak irauten duen egun bakoitzeko.

-Gainera, konpentsazio opor egunak hartzen ahalko dira: egun erdia, jardueran egoten den lanegun bakoitzeko (astelehenetik ostiralera, edozein hilabetetan), eta egun bat, larunbat, igande edo jaiegun bakoitzeko. "

Aste Santuan eta Eguberrietan oporretako txandetara joaten diren begiraleek konpentsaziozko atseden egunak txanda bakoitza bukatu eta gehienez ere bi hilabeteko epean finkatu beharko dituzte.

27. bis artikulua. Dietak eta kilometrajea. Enpresaren beharrengatik nork bere ibilgailua erabiltzen duten langileek kalte-ordaina kobratuko dute kilometroko edo, bestela, erregaiaren, autobideen eta bestelako gastuak ordainduko zaizkie, faktura aurkeztuta. Kilometrajeagatik eta joan-etorrietarako dietengatik ordainduko den zenbatekoa lansarien taulan ezarriko da.

VI. TITULUA

Hobekuntza sozialak

30. art. Erantzukizun zibileko asegurua. Enpresak, erantzukizun zibileko poliza baten bidez, aseguru bat eginen die langile guztiei, lanaren ondorioz gerta litezkeen erantzukizunak estaltzeko.

31. art. Bizi eta istripu asegurua. Enpresak aseguru poliza bat itunduko du, laneko istripurako edo eritasun profesionalerako, heriotzako eta erabateko baliaezintasun iraunkorreko arriskuak estaltzen dituena. Estaldura 30.000 eurokoa izanen da.

32. art. Laneko segurtasuna eta osasuna. Laneko arriskuen prebentzioari buruzko azaroaren 8ko 31/1995 Legean xedatutakoari jarraituko zaio. Enpresek hitz eman dute legearen aginduak eta hura garatzen duten erregelamenduak aplikatuko dituztela.

-Plangintza prebentiboa. Arriskuen prebentziorako ekintza integratu bat enpresan ezartzeko, arriskuen prebentziorako plan bat ezarri beharko da, besteak beste honako hauek biltzen dituena: antolaketaren egitura, eginkizunen definizioa, praktikak, prozedurak, prozesuak eta aipatu ekintza aurrera eramateko behar diren baliabideak.

-Norbera babesteko ekipamendua. Norbera babesteko ekipamendua (NBE) erabili beharko da langileen segurtasun eta osasunerako arriskurik dagoenean eta ezin izan denean saihestu edo behar adina mugatu babes kolektiboko baliabide teknikoekin edo lan antolaketako neurri, metodo edo prozeduren bidez.

NBE horiek babes eraginkorra emanen dute, horrelakoak erabiltzeko arrazoi diren arriskuen aurrean, eta horiek erabiltzeak berak ez du berez inolako arrisku gehigarririk sorraraziko.

NBEak banatzen direnean, banatzearen ardura duen pertsonak horri buruzko informazioa eman beharko du, nola erabili eta zaindu behar den jakiteko.

-Amatasunaren babesa. Enpresek konpromisoa hartu dute ahalik lasterrena egiteko eta emateko haurdunaldiko arriskua dela-eta behar diren agiri eta tramite guztiak.

-Istripuen eta gertakarien ikerketa. Laneko istripuen eta gertakarien ikerketa-protokolo bat sortuko da, lan zentroko benetako beharrak kontuan hartuko dituena, langileen osasunari kalte zerk egin dion detektatzeko.

Istripuen ikerketaren helburu nagusia istripua zerk sortu duen jakitea da, gertatutakoak ezagutu ondoren. Helburua lorturik, ondorengo helburua izanen da ikasitakoari etekina ateratzea, neurri zuzentzaileak diseinatzeko eta ezartzeko, istripu berdinak edo antzekoak sortzen dituen arrazoia ezabatu eta enpresan prebentzioa hobetzearren.

-Prestakuntza. Enpresan sartu berri diren langileei "hasierako prestakuntza" emanen zaie, laneko arriskuen prebentzioaren arloan bakoitzaren lanpostuaren ezaugarri hauei buruzko informazioaz osatua:

.Lantokiaren deskripzio fisikoa

.Jokabide moldakaitzei buruzko berariazko jarduketak

.Lanposturako neurri prebentiboak

-Osasuna zaintzea. Neurri gehigarri gisa, osasun arrazoiengatik edo eszedentzia hartu dutelako luzaz lanera joan gabe egon eta berriz itzultzen diren langileei osasun azterketa bat eginen zaie.

33. art. Jantziak eta oinetakoak. Enpresak jantziak eta oinetakoak banatuko dizkie kategoria edo lanpostu hauetakoei: osasun langileak, II. eta III. taldeetako langileak. Enpresak oinetakorik ematen ez duenean, urtero 30 euro ordainduko ditu kontzeptu horretarako.

Uniformeak eskuratzen dituzten langileak behartuta daude zentro bakoitzeko baldintza estandarren arabera janztera.

Uniformea norberaren erabilerarako izanen da eta langileak berak zainduko du eta haren ardura izanen du, kontrakorik ituntzen ez bada behintzat. Zentro bakoitzak, langileen legezko ordezkariei kontsultatu eta gero, bere uniforme mota eta banatuko dituen jantzien kopurua ezarriko ditu, neguko eta udako beharrak kontuan hartuta.

34. art. Aldi baterako ezintasuna. Enpresan 6 hilabeteko antzinatasuna duten langileek, lanerako aldi baterako ezintasunean daudenean, eskubidea izanen dute gizarte segurantzako prestazioen gainean osagarri hauek bederen kobratzeko:

KASUA MOTA IRAUPENA PRESTAZIOA

1 Eritasun arrunta 15. eguna arte %75

15. eg.tik 30. eg. arte %90

2 Lan istripuak, "in itinere"

edo lanbide eritasuna barne Leh.egunetik aurrera %10

3 Haurdunaldiko eta 9 hilabetetik beheitiko

ume bati bularra emateko arriskuak

Leh. egunetik aurrera %100

Prestazioa kalkulatzeko oinarria osatuko dute bajaren aurreko hilabeteko kontzeptu finkoek (oinarrizko soldata, lan hitzarmenaren osagarria, trebakuntza osagarria, osagarri pertsonala eta antzinatasuneko osagarri pertsonala) eta aparteko pagen zati proportzionalak.

Gutxienez 30 jaiegun edo 210 jai-ordu egiten dituen langile batek lan istripua duenean, aurreko paragrafoan adierazitako kalkulu oinarriari dagokion hilabeteko jaiegunen batez bestekoaren balioa gehituko zaio. Jaiegun kopurua ezartzeko, langile bakoitzari dagokion jaiegun teorikoen batez bestekoa hartuko da aintzat (urte horretako eta iazko egutegiak kontuan hartuta).

Barne igoeran edo bestelako mugikortasun egoeretan, langileak goragoko kargu bat hartzen duenean, aldi baterako ezintasunean sartzen bada, goian adierazitako prestazioen osagarria aplikatuko zaio, goragoko kargu hori bete duen denboraren araberakoa izanen dena. Une horretatik aurrera jasoko dituen prestazioak ez dira gizarte segurantzak ezarritakoak baino handiagoak izanen, salbu eta hasiera batean jasotzen zituenak baino txikiagoak badira. Halakoetan, bere jatorrizko lanpostuan jasotzen zituen prestazioak berdinduko lirateke.

VII. TITULUA

Hutsegiteak eta zehapenak

35. art. Hutsegite arinak

a) Hogeita hamar egunean lanera hiru aldiz berandu iristea.

b) Lanera bertaratu ez eta hurrengo hogeita lau orduetan hutsegitearen arrazoiak ez jakinaraztea.

c) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta, hutsegite larri edo oso larritzat hartzerik ez badago.

d) Zabarkeriaz jokatzea arauei edo jasotako aginduei dagokienez.

e) Lantokiko materiala ez zaintzea.

f) Jendea behar den adeitasunez eta arretaz ez atenditzea.

g) Lankideekin eztabaidak izatea lanorduetan.

h) Prebentzio planean ezartzen diren babeserako eta segurtasunerako ezinbesteko jantziak eta gainerako elementuak ez erabiltzea.

36. artikulua. Hutsegite larriak

a) Hogeita hamar egunean lanera hiru aldiz baino gehiagotan eta hamar baino gutxiagotan berandu iristea.

b) Hogeita hamar egunean behin lanera ez joatea justifikatu gabe.

c) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo erabiltzaileen kalterako.

d) Jasotako aginduak edo ezarritako arauak ez betetzea. Batez ere laneko segurtasun eta higieneko neurriei dagozkienak.

e) Hirurogei egunean hutsegite arin bera behin baino gehiagotan egitea.

f) Beste langile baten presentzia lanean simulatzea, haren ordez sinatuz edo fitxatuz.

g) Lanean zuhurtziarik gabe jokatzea. Langileari berari, lankideei edo zentroko erabiltzaileei istripuren bat izateko arriskua ekartzen badie, edo instalazioak matxuratzeko arriskua, oso larritzat jo daiteke. Nolanahi ere, nahitaezkoak diren segurtasuneko jantzi eta tresnak behin baino gehiagotan ez erabiltzea ere zuhurtziarik gabe jokatzea izanen da.

h) Behar den baimena izan gabe, norberarentzako lanak egitea lanaldian zehar.

37. artikulua. Hutsegite oso larriak

a) Urtebeteko epean lanera 20 aldiz baino gehiagotan berandu iristea.

b) Hilabete batean, bidezko arrazoirik izan gabe, hirutan lanera ez joatea.

c) Eritasuna edo istripua simulatzea.

d) Hitzezko eta egitezko tratu txarrak ematea, erabiltzaileei, goragokoei edo lankideei.

e) Lanetik alde egitea edo zabarkeria larriz aritzea, enpresari kalte larriak eginez gero edo erabiltzaileari egin ahal izanez gero.

f) Agindutako kudeaketetan iruzurra, leialtasunik eza edo konfiantza-abusua erakustea, eta enpresari nahiz hirugarrenei lapurtzea, ebastea edo jokabide horren konplize gisa aritzea, enpresan berean zerbitzua ematerakoan.

g) Agintekeria.

h) Aginduak era nabarmenean ez obeditzea.

i) Hiruhileko batean hutsegite larriak behin baino gehiagotan egitea.

j) Enpresaren korrespondentziaren edo isilpeko dokumentuen sekretua haustea edo enpresakoa ez den bati isilpean eduki beharreko datuak ezagutaraztea.

k) Lan errendimendua arrazoirik gabe gutxitzea.

Aurreko artikuluetako hutsegiteen zerrenda adibide gisara eman da.

38. art. Zehapenak. Enpresak zehapenak jartzeko ahalmena du. Zehapenak idatziz jakinaraziko zaizkio langileari; gertakariak, hutsegitearen gradua eta ezarritako zehapena adieraziko dira.

Hutsegite larrien edo oso larrien eta, orobat, zehapenen berri langileen legezko ordezkariei emanen zaie, halakorik baldin bada, jakinaren gainean egon daitezen.

Enpresek, egindako hutsegiteen larritasuna eta inguruabarrak kontuan hartuta, gehienez zehapen hauek jartzen ahal dituzte:

a) Hutsegite arinak: hitzezko kargu-hartzea. Behin eta berriz gertatzen baldin bada, kargu-hartze idatzia.

b) Hutsegite larriak: idatzizko kargu-hartzea. Enplegu-soldaten etenaldia hamabost egun bitarte.

c) Hutsegite oso larriak: kaleratze ohartarazpena. Enplegu-soldaten etenaldia hirurogei egun bitarte. Kaleratzea.

39. art. Huts-egiteen preskripzioa. Langileek egindako hutsegite arinak hamar egunen buruan preskribatuko dira, larriak hamabost egunen buruan eta oso larriak berrogeita hamarren buruan, enpresa hutsegiteaz jakitun egindako egunetik aurrera.

40. art. Batzorde Paritarioa. Lan hitzarmen hau sinatzean, lan hitzarmenaren segimendurako, aplikaziorako eta interpretaziorako batzorde paritario bat eratuko da, alderdi sinatzaileek osatua. Batzorde paritario horrek alderdietako edozeinek eskatuta eginen du bilera. Eskaera formala egiten denetik bilera egunera bitarte ez dira inoiz hamabost egun baino gehiago pasako. Eskaera formala izateko, hitzarmena sinatu duten alderdietako baten (enpresa nahiz sindikatu) kide guztien sinadurak bildu beharko dira.

Lan hitzarmenaren sinatzaileek konpromisoa hartzen dute lan hitzarmenaren aplikazioan edo interpretazioan sortzen ahal diren arazoak, Nafarroako Lan Gatazkak Konpontzeko Auzitegiari edo Lan arloko Jurisdikzioari igorri aurretik, batzorde paritarioari jakinarazteko, salbu eta haien ebazpena legeak ezarritako epeen menpe badago (kaleratzeak, gatazka kolektiboak, lan baldintzen funtsezko aldaketak, etab.).

41. art. Kanpo gelditzeko klausula. NGOIak bere gain hartzen ez baditu lan hitzarmen honen aplikazioaren ondoriozko langileen gastuak, entitateek zilegi izanen dute lan hitzarmen honen baldintza ekonomikoak ez aplikatzea.

XEDAPENAK

Lehen xedapen gehigarria

Txanda bereziak: itundutako lanaldia eta soldatak ezartzeko, kontuan hartu dira gaueko langileen eta/edo goizez, arratsaldez eta gauez aritzen direnen inguruabarrak. Lan hitzarmen honek lanaldi espezifikoak eta bereziak ezartzen ditu gaueko langileentzat eta/edo goizez, arratsaldez eta gauez aritzen direnentzat, lan erregimen berezi horiek konpentsatzeko.

Horregatik, espresuki ezartzen da talde horietako langileek ez dutela jasoko lan hitzarmen honetan inguruabar horietarako itundutako konpentsazio ekonomiko osagarririk 2008an (gaueko lanaren plusa, txandako lanaren plusa, etab.), espresuki konpentsatzen baitira ezarritako lanaldi bereziarekin.

Lanaldia murriztea: 2008ko urtarrilaren 1ean lan hitzarmen honen 9. artikuluko "gainerako langileak" izeneko taldearen urteko lanaldia 1.665 ordukoa izanen da.

Gainerako taldeentzat, ordu poltsa bat eginen da: talde horietako langile bakoitzari urtean lanaldi bat murriztuko zaio, eta lanaldi horiek batuta lortuko da poltsa (gaueko txanda, 10 ordu; goizez, arratsaldez eta gauez aritzen diren langileak, zaintzaileak eta ostalaritzako langileak, 7 ordu).

Poltsa horren banaketa eta erabilera zentro bakoitzeko langileen legezko ordezkariekin negoziatuko dira. Adostasunik lortzen ez bada, lanaldi bat emanen zaio langile bakoitzari.

Azken xedapenetan lehena.

Lege subsidiarioak: lan hitzarmen kolektibo honetan ezarri ez diren gaietarako, Langileen Estatutuan eta lan arloko legedi orokorrean xedatutakoa aplikatuko da.

Azken xedapenetan bigarrena.

Nafarroako Lan Gatazkak Konpontzeko Auzitegiaren menpe jartzea: alderdiek erabaki dutenez, lan hitzarmen honen interpretazioan eta aplikazioan sor daitezkeen banakako eta taldeko gatazkak Nafarroako Lan Auzitegiak konponduko ditu, adiskidetze eta bitartekotza faseetan.

Lehen xedapen iragankorra.

Soldaten egitura: lan hitzarmen honekin desagertu eginen da Adacengo soldatek duten egitura eta, horren ordez, ezarri diren baldintza berrien araberako egitura berria izanen da 2008an.

Soldaten egitura berria ezartzearen ondorioz, kasu batzuetan soldata kontzeptu batzuk desagertuko dira, beste batzuk sartuko eta, beste batzuetan, kontzeptu berberak manten daitezke, baina zenbatekoak murriztuta edo gehituta edo izaera finkoa izaera aldakor bihurtuta edo alderantziz, betiere langileak lan mota beragatik urtean jasotzen duen ordainsari orokor gordina, lan hitzarmen hau aplikatuta dagokiona, aplikatu aurretik jasotzen zuen berbera edo handiagoa bada.

Bigarren xedapen iragankorra.

Lan hitzarmen kolektibo honek indarra hartzean, eszedentzian dauden langileek, lanaldi murriztua edo soldatarik gabeko baimena dutenek, etab. egoera horretan jarraitzen ahalko dute, hitzartutako epea bukatu arte, haien enpresaren edo lantokiaren lan hitzarmen kolektiboan ezarritakoarekin bat.

I. ERANSKINA

Kategoriak eta funtzioak

1. taldea. Teknikariak eta bulegariak

1.1. Goi mailako tituluduna: zuzendaria, medikua, psikologoa

1.2. Erdi mailako tituluduna: lan terapeuta, gizarte langilea, OLT/EDU, fisioterapeuta, logopeda, kontularia (erdi mailako tituluduna)

1.3. Hezitzailea.

1.4. Administrazioko langileak:

-Administrari-ofiziala

-Administrari-harreragile laguntzailea

2. taldea. Zuzeneko arretako langile espezializatugabeak

2.1. Erizaintzako zaintzailea/laguntzailea

2.2. Prestakuntzaldiko zaintzailea

2.3. Begiralea

3. taldea. Zerbitzu orokorretako langileak

3.1. Zerbitzu anitzetako langileak:

-Mantentze-lanetako eta zerbitzu anitzetako ofiziala

-Zerbitzu anitzetako laguntzailea

Kategoria horiek Adacenek lan hitzarmena sinatzean zituenak dira, eta berraztertuko dira zentroa sektoreko hitzarmenaren esparruan sartzen denean.

-Prestakuntzaldiko zaintzailea.

Kategoria horretan daude errendimendu egokia lortzeko gaitasun aski izan gabe ere, kategoria horri dagozkion lanetan dihardutenak. Kategoria berean egonen dira gaikuntzaldian 150 jardunaldi edo 900 ordu (gehieneko epea).

Benetan lan egindako lanaldiak baizik ez dira kontatuko, ez ordea aldi baterako ezintasunaldiak, oporrak edo baimenak, etab., eta egindako lanari dagokion ordainsariaren %90 kobratuko dute, jaiegun plusa eta gaueko lanaren plusa, halakorik balego, izan ezik; jaiegun plusa %100 kobratuko lukete. Aurrez ezarritako lanaldiak bete ondoren, besterik gabe zaintzaile kategoriara pasatuko dira.

Prestakuntzaldia benetan lan egindako lanalditan neurtuko da eta ez da kontratuaren indarraldia kontuan hartuko, eta berdin benetan lan egindako lanaldiei dagokienez.

Prestakuntzaldiak ez dira elkarrekin batzen ahal horien artean 18 hilabete baino gehiagoko tartea badago, kontratu batetik bestera.

-Eginkizunak.

Eginkizunen deskribapena adibide gisara eman da. Langile guztiak euren nagusiek agintzen dizkieten lan eta operazioak egitera behartuak daude, nor bere eskumen eta lanbide kategoriaren barnean eta duintasunaren eta lanbide prestakuntzaren kalterako izan gabe.

Orain arte kategoria eta postu guztietan zentroan egin izan diren lan guztiak eginen dira gutxienez.

.1. taldea. Teknikariak eta bulegariak.

Haien lanbide kategoriaren eginkizunak beteko dituzte, eta planifikazioa, kontrola eta jarraipena egiteaz eta esleitutako jarduera egiteko beharrezko baliabideak eta pertsonak kudeatzeaz arduratuko dira; arreta berezia jarriko zaio esleitutako lanak ahalik eta hoberen egiten saiatzeari.

.2. taldea. Zuzeneko arreta espezializatugabea.

Zaintzailea: balio anitzeko gaitasunak eta eginkizunak ditu eta erabiltzailearen eguneroko bizitzako jardueretan laguntzeko zerbitzuak egiten ditu, ohiturak hartzeko eta jarrera aldatzeko programetan parte hartzen du, eta erabiltzaile talde batez arduratzen ahal da, hauetan lagunduz: norbere garbitasunerako jarduerak, logelak, zainketa higienikoak, elikadura, aisialdia eta denbora librea, tailerrak, txangoak, ibilaldiak eta esleitzen zaizkion gainerako laguntza eta intregrazio eginkizunak.

Edonola ere, ez ditu eginen osasun tituludunek baizik egin behar ez dituzten eginkizunak. Arlo horretan, osasun agintariek ofizialki eta modu iraunkorrean zehazten dutenari jarraituko zaio (ebazpenak, zirkularrak, arauak, legeak, etab.).

.3. taldea. Zerbitzu orokorretako langileak.

Haien lanbide kategoriaren edo ogibide klasikoen eginkizunak beteko dituzte, enpresaren beraren espezialitateak kontuan hartuta, eta zuzenketa edo eragimen nahikoarekin eta lanpostuari dagokion autonomia eta erantzukizun mailarekin, eta, behar izatera, zerbitzu eta/edo langile baten edo batzuen agintari eta/edo erantzule izaten ahalko dira.

II. ERANSKINA

Adacengo 2007ko soldaten taula (14 paga)

OINARRIZKO

SOLDATA

I. TALDEA.-TEKNIKARIAK

-1. taldea. Teknikariak eta bulegariak

1.1. Goi mailako tituluduna 1.629,19

1.2 Erdi mailako tituluduna 1.378,54

1.3 Administrazioko langileak

Administrari-harreragile laguntzailea 1.127,89

1.4 Hezitzailea 1.253,22

-2. taldea. Zuzeneko arretako langileak

Erizaintzako zaintzailea/laguntzailea 1.127,89

Begiralea 1.127,89

3. taldea. Zerbitzuetako langileak

Mantentze-lanetako eta zerbitzu anitzetako ofiziala 1.127,89

Gidaria 1.127,89

OSAGARRIAK

Antzinatasuneko osagarri pertsonala Aldakorra

Taldearen koordinazio plusa 292,42

Erantzukizun plusa 125,32

Kilometrajea 0,24

Jaieguna orduak 3,5

Iragarkiaren kodea: F0801137