1. NAFARROAKO FORU KOMUNITATEA
1.7. BESTELAKOAK
168/2024 EBAZPENA, maiatzaren 9koa, Hezkuntzako zuzendari nagusiak emana, 2024-2025 ikasturteko eskola egutegia eta ordutegia prestatzeko jarraibideak onesten dituena, hain zuzen, Nafarroako Foru Komunitatean, Helduen Oinarrizko Hezkuntzako ikastetxe publikoetan eta ikasgeletan emanen diren irakaskuntzetarako eta ikastetxe publiko baimenduetan emanen diren Helduentzako Bigarren Hezkuntzako irakaskuntzetarako eta erdi mailako eta goi mailako zikloetara sartzeko ikastaroetarako.
Ikusirik Antolamendu, Prestakuntza eta Kalitate Zerbitzuko zuzendariak 2024-2025 ikasturteko eskola egutegia prestatzeko jarraibideak onestearen aldeko txostena eman duela, hain zuzen, Nafarroako Foru Komunitatean, Helduen Oinarrizko Hezkuntzako ikastetxe publikoetan eta ikasgeletan emanen diren irakaskuntzetarako eta ikastetxe publiko baimenduetan emanen diren Helduentzako Bigarren Hezkuntzako irakaskuntzetarako eta erdi mailako eta goi mailako zikloetara sartzeko ikastaroetarako.
Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuak emandako ahalmenak erabiliz,
EBAZTEN DUT:
1. Onestea 2024-2025 ikasturteko egutegia eta ordutegia prestatzeko jarraibideak, hain zuzen, Helduen Oinarrizko Hezkuntzako ikastetxe publikoetan eta ikasgeletan emanen diren irakaskuntzetarako eta ikastetxe publiko baimenduetan emanen diren Helduentzako Bigarren Hezkuntzako irakaskuntzetarako eta erdi mailako eta goi mailako zikloetara sartzeko ikastaroetarako; eranskin hauetan zehazten dira jarraibide horiek:
–I. eranskina: jarraibideak, Helduen Oinarrizko Hezkuntzako ikastetxe publikoetan eta ikasgeletan emanen diren irakaskuntzetarako.
–II. eranskina: jarraibideak, ikastetxe publiko baimenduetan emanen diren Helduentzako Bigarren Hezkuntzako irakaskuntzetarako.
–III. eranskina: jarraibideak, ikastetxe publiko baimenduetan emanen diren erdi mailako eta goi mailako zikloetara sartzeko ikastaroetarako.
2. Ebazpen honen eta eranskinen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
3. Ebazpen hau eta eranskinak Nafarroako Aldizkari Ofizialean argitaratzea.
4. Ebazpen hau eta eranskinak igortzea Langileriaren eta Azpiegituren Zuzendaritza Nagusira, Lanbide Heziketako, Digitalizazioko eta Hezkuntza Zerbitzuetako Zuzendaritza Nagusira, Antolamendu, Prestakuntza eta Kalitate Zerbitzura, Hezkuntzako Ikuskapen Zerbitzura eta Ikastetxeetako Informazioa Kudeatzeko Zerbitzura, behar diren ondorioak izan ditzaten.
Iruñean, 2024ko maiatzaren 9an.–Hezkuntzako zuzendari nagusia, Gil Sevillano González.
I. ERANSKINA.–2024-2025 IKASTURTEKO ESKOLA EGUTEGIA ETA ORDUTEGIA PRESTATZEKO JARRAIBIDEAK, HELDUEN OINARRIZKO HEZKUNTZAKO NAFARROAKO FORU KOMUNITATEKO IKASTETXE PUBLIKOETAN ETA IKASGELETAN EMANEN DIREN IRAKASKUNTZETARAKO
1.–Egutegia.
Eranskin honetan aipatzen diren irakaskuntzen eskola egutegiak baldintza hauek bete beharko ditu:
1. Helduen Oinarrizko Hezkuntzako ikastetxe publikoetan eta ikasgeletan, 2024-2025 ikasturtea 2024ko irailaren 2an hasiko da eta 2025eko ekainaren 30ean amaituko da.
2. Ikasturtea lau hileko bi kurtsotan banatuko da. Irakaslan guztiak lauhilekoaren araberako antolaketa horri egokituko zaizkio.
3. Helduen Oinarrizko Hezkuntzako ikastetxe publikoek eta ikasgelek egutegirako proposamen espezifiko bat egin beharko dute, honako baldintza hauei jarraikiz:
a) Lauhileko bakoitzeko eskola egunen kopurua: 80, gutxienez ere.
b) Lehen lauhilekoa: klaseak ez dira irailaren 17a baino lehen hasiko, eta ez dira otsailaren 4a baino geroago bukatuko.
c) Bigarren lauhilekoa: klaseak ez dira otsailaren 11 baino lehen hasiko, eta ez dira ekainaren 20a baino geroago bukatuko.
d) Eguberrietako oporrak: abenduaren 21etik urtarrilaren 7ra arte, biak barne.
e) Aste Santuko oporrak: apirilaren 17tik 27ra arte, biak barne.
f) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a eta maiatzaren 1a. Antolamendu, Prestakuntza eta Kalitate Zerbitzuak beharrezko jarraibideak emanen ditu erabakitzen bada beste jaiegunen bat ezartzea eta, horrenbestez, eskola egutegia aldatzea.
g) Hezkuntza mailako zaindariaren jaieguna: azaroaren 27a. Ikastetxeek zilegi izanen dute egun hori aldatzea.
h) Herriko festa eguna, Nafarroako Foru Komunitateko herrietako festa egunak zehazten dituen arauaren arabera. Data hori eskola eguna ez den egun batean egokitzen denean, ikastetxeak beste egun bat hautatzen ahalko du.
i) Ikastetxeak erabakitako eskola egunez gainerako egunak, aurreko ataletan jaiegun gisa finkatu ez direnak, eskolarik gabeko lanegunak izanen dira, gehienez ere 5 egun, eskolak hasten direnetik amaitzen diren arte.
j) Ezin izanen dira erabili g), h) eta i) atalek aipatzen dituzten egunak Eguberrietako eta Aste Santuko oporraldiak luzatzeko.
4. Abenduaren 20a eta apirilaren 16a eskola egunak izanen dira, baina goizez bakarrik.
5. Irailaren 2tik eskolak hasi bitarteko egunetan ikaskuntzen hasierako balorazioaren (IHB) plangintza, programazio lanak, mailako lantaldeen bilerak, klaustroak eta ikasturtearen antolaketarekin zerikusia duten bestelako jarduerak eginen dituzte irakasleek.
6. Lehenengo lauhilekoaren bukaeratik bigarrena hasi bitarteko egunak lan hauetarako erabiliko dira: kurtsoak berrikusi eta ebaluatzea, ikasleak ebaluatzeko agiriak betetzea (lehenengo lauhilekokoak), sartu berri diren ikasleen ikaskuntzen hasierako balorazioa (IHB) egitea eta bigarren lauhilekoan eginen diren prestakuntza ekintzak planifikatzea. Egun horietan, irakasleek ikastetxera edo ikasgelara joan beharra izanen dute, lan horiek egiteko.
7. Eskolak bukatu eta ekainaren 30era arte, kurtsoaren berrikusketa eta ebaluazio lanak, memoria didaktikoak, ikasturte bukaerako memoria eta beharrezkoak diren administrazio egintza guztiak eginen dira.
8. Ebaluazio edo klaustro saioak ezin izanen dira eskola orduetan egin.
2.–Ordutegia.
Eranskin honetan aipatzen diren irakaskuntzen eskola ordutegiak baldintza hauek bete beharko ditu:
1. Helduen Oinarrizko Hezkuntzako ikastetxe eta ikasgelek aste osoan zehar banatuko dituzte prestakuntza ekintzak, astelehenetik ostiralera.
2. Helduen Oinarrizko Hezkuntzako ikastetxe publikoak eta ikasgelak ordu-malgutasunaren printzipioari jarraikiz antolatuko dira, kasuan kasuko eskualdeko helduen prestakuntza eskaerari ahalik eta hobekien erantzuteko eta egokitzeko. Hala, behar izanez gero, jarduerak goizeko, arratsaldeko eta gaueko txandetan antolatzen ahalko dira.
3. Egutegia eta ordutegia onetsi ondoren, Helduen Oinarrizko Hezkuntzako ikastetxe publiko eta ikasgela guztietan nahitaez bete beharko dira, eta ikastetxeko zuzendariaren eta ikasgelako irakasle taldeko buruaren erantzukizuna izanen da haiek betearaztea; Hezkuntzako Ikuskapen Zerbitzuari dagokio horien aplikazioa gainbegiratu eta kontrolatzea. Irakasleek nahitaez bete behar dute haien oinarrizko ikastetxerako onetsitako ordutegia; hau da, zerbitzuak ematen dituzten udalerriren batean jaieguna baldin bada, egun hori laneguntzat hartuko da, eta irakasleek oinarrizko ikastetxera joan beharko dute zuzendariak edo taldeko buruak bidezkotzat jotzen dituen lanak egitera.
4. Helduen Oinarrizko hezkuntzako ikastetxe publiko eta ikasgela bakoitzaren egutegia bertako iragarki-taulan ikusgai jarriko da, eta ezin izanen da aldatu Hezkuntzako Ikuskapen Zerbitzuak baimendu gabe.
3.–Tramitazioa.
Tramitazioa egiteko, honela jokatuko da:
1. Ikastetxeetako zuzendariek eta ikasgeletako irakasle taldeko buruek egutegirako eta ordutegirako proposamenak igorriko dituzte Hezkuntzako Ikuskapen Zerbitzura, "EDUCA" kudeaketa programaren bidez, Eskola Kontseiluaren onespena jaso ondoren. Horretarako azkeneko eguna 2024ko ekainaren 14a izanen da.
2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. Ikuskapen Zerbitzuaren komunikazio hori, orobat, "EDUCA" kudeaketa programaren euskarri informatikoaren bidez eginen zaie ikastetxeei. 2024ko ekainaren 24rako inolako jakinarazpenik jasotzen ez duten ikastetxeen egutegiak eta ordutegiak onetsitzat joko dira.
Ikastetxeren edo ikasgelako irakasle talderen batek bere egutegiaren proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskin honen 1. atalean (Egutegia) ezarritako baldintzak betetzen dituen egutegi bat.
4.–Salbuespenak.
Ebazpen honetan xedatutakoaren edozein salbuespen behar bezala arrazoituta eskatu beharko zaio Hezkuntzako Ikuskapen Zerbitzuari, hark aztertu eta, egokitzat joz gero, onar dezan.
II. ERANSKINA.–2024-2025 IKASTURTEKO ESKOLA EGUTEGIA ETA ORDUTEGIA PRESTATZEKO JARRAIBIDEAK, NAFARROAKO FORU KOMUNITATEKO IKASTETXE PUBLIKO BAIMENDUETAN EMANEN DIREN HELDUENTZAKO BIGARREN HEZKUNTZAKO IRAKASKUNTZETARAKO
1.–Egutegia.
Eranskin honetan aipatzen diren irakaskuntzen eskola egutegiak baldintza hauek bete beharko ditu:
1. Ikastetxeetan, 2024-2025 ikasturtea 2024ko irailaren 2an hasiko da, eta 2025eko ekainaren 30ean bukatuko.
2. Ikasturtea lau hileko bi kurtsotan banatuko da. Irakaslan guztiak lauhilekoaren araberako antolaketa horri egokituko zaizkio.
3. Ikastetxeek berariazko egutegi proposamen bat prestatu beharko dute, honako baldintza hauek betez:
a) Lauhileko bakoitzeko eskola egunen kopurua: 80, gutxienez ere.
b) Lehen lauhilekoa: klaseak ez dira irailaren 12a baino lehen hasiko, eta ez dira urtarrilaren 31 baino geroago bukatuko.
c) Bigarren lauhilekoa: klaseak ez dira otsailaren 10a baino lehen hasiko, eta ez dira ekainaren 20a baino geroago bukatuko.
d) Eguberrietako oporrak: abenduaren 21etik urtarrilaren 7ra arte, biak barne.
e) Aste Santuko oporrak: apirilaren 17tik 27ra arte, biak barne.
f) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a eta maiatzaren 1a. Antolamendu, Prestakuntza eta Kalitate Zerbitzuak beharrezko jarraibideak emanen ditu erabakitzen bada beste jaiegunen bat ezartzea eta, horrenbestez, eskola egutegia aldatzea.
g) Hezkuntza mailako zaindariaren jaieguna: urtarrilaren 28a. Ikastetxeek zilegi izanen dute egun hori aldatzea.
h) Herriko festa eguna, Nafarroako Foru Komunitateko herrietako festa egunak zehazten dituen arauaren arabera. Data hori eskola eguna ez den egun batean egokitzen denean, ikastetxeak beste egun bat hautatzen ahalko du.
i) Ikastetxeak erabakitako eskola egunez gainerako egunak, aurreko ataletan jaiegun gisa finkatu ez direnak, eskolarik gabeko lanegunak izanen dira, gehienez ere 5 egun, eskolak hasten direnetik amaitzen diren arte.
j) Ezin izanen dira erabili g), h) eta i) atalek aipatzen dituzten egunak Eguberrietako eta Aste Santuko oporraldiak luzatzeko.
4. Abenduaren 20a eta apirilaren 16a eskola egunak izanen dira, baina goizez bakarrik.
5. Irailaren 2tik eskolak hasi bitarteko egunetan, ikasturtearen antolaketarekin zerikusia duten jarduerak eginen dituzte irakasleek.
6. Lauhilekoen arteko eskola gabeko egunetan berariazko lan hauek eginen dira: ikasturtea berrikusi eta ebaluatzea, ikasleei arreta ematea eta erreklamazioak erantzutea, ikasleen ebaluazio agiriak betetzea (lehenengo lauhilekokoak) eta behar diren gainerako administrazio egintzak.
7. Eskolak bukatu eta ekainaren 30a arte, honako jarduera hauek eginen dira: kurtsoa berrikusi eta ebaluatzeko berariazko lanak, irakasgai bakoitzaren memoria didaktikoak, koordinazio didaktikorako departamentuen memoriak, bukaerako memoria, erreklamazioak, ikasleei arreta ematea eta behar diren administrazio egintza guztiak.
8. Ebaluazio edo klaustro saioak ezin izanen dira eskola orduetan egin.
2.–Ordutegia.
Eranskin honetan aipatzen diren irakaskuntzen eskola ordutegiak baldintza hauek bete beharko ditu:
1. Helduen Bigarren Hezkuntzako asteko eskola ordutegia 15 ordukoa izanen da bertaratzeko modalitatean, 16 ordukoa D edo A hizkuntza-ereduen kasuan, eta 10 ordukoa gehienez urrutiko modalitatean.
2. 129/2009 Foru Aginduaren 7.4 oinarriak adierazi bezala, ikastetxeen ordutegia ordubetetik beherako eskola saioetan antolatzen bada (inoiz ez 45 minutu baino gutxiagokoak), aurreko paragrafoan adierazitako asteko eskola karga betetzeko adina saio eman beharko dira.
3. Helduen Bigarren Hezkuntzako aurrez aurreko kurtsoetan, asteko ordutegia, oro har, modu homogeneoan banatuko da astelehenetik ostiralera.
4. Egutegia, onetsi ondoren, nahitaez bete beharko dute ikastetxe publiko guztiek; ikastetxeko zuzendariaren erantzukizuna izanen da hura betearaztea, eta Hezkuntzako Ikuskapen Zerbitzuari dagokio haren aplikazioa gainbegiratu eta kontrolatzea.
5. Ikastetxe bakoitzaren egutegia bertako iragarki-taulan ikusgai jarriko da, eta ezin izanen da aldatu Hezkuntzako Ikuskapen Zerbitzuak baimendu gabe.
3.–Tramitazioa.
Tramitazioa egiteko, honela jokatuko da:
1. Ikastetxeetako zuzendariek egutegi eta ordutegi proposamenak bidaliko dituzte Hezkuntzako Ikuskapen Zerbitzura, "EDUCA" kudeaketa programaren bidez, eskola kontseiluak onetsi ondoren. Horretarako azkeneko eguna 2024ko ekainaren 14a izanen da.
2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. Ikuskapen Zerbitzuaren komunikazio hori, orobat, "EDUCA" kudeaketa programaren euskarri informatikoaren bidez eginen zaie ikastetxeei. 2024ko ekainaren 24rako inolako jakinarazpenik jasotzen ez duten ikastetxeen egutegiak eta ordutegiak onetsitzat joko dira.
Ikastetxeren batek bere egutegi proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskinaren 1. atalean (Egutegia) ezarritako baldintzak betetzen dituen egutegi bat.
4.–Salbuespenak.
Eranskin honetan xedatutakoaren edozein salbuespen egiteko, ikastetxeak eskatu beharko dio, arrazoituta eta eskola kontseiluak onetsi ondoren, Hezkuntzako Ikuskaritza Zerbitzuari, azter dezan eta, hala badagokio, onar dezan.
III. ERANSKINA.–2024-2025 IKASTURTEKO ESKOLA EGUTEGIA ETA ORDUTEGIA PRESTATZEKO JARRAIBIDEAK, NAFARROAKO FORU KOMUNITATEKO IKASTETXE PUBLIKO BAIMENDUETAN EMANEN DIREN ERDI MAILAKO ETA GOI MAILAKO ZIKLOETARA SARTZEKO IKASTAROETARAKO
1.–Egutegia.
Eranskin honetan aipatzen diren irakaskuntzen eskola egutegiak baldintza hauek bete beharko ditu:
1. Ikastetxeetan, 2024-2025 ikasturtea 2024ko irailaren 2an hasiko da, eta 2025eko ekainaren 30ean bukatuko.
2. Ikastetxeek berariazko egutegi proposamen bat prestatu beharko dute, honako baldintza hauek betez:
a) Eskolen hasiera: irailaren 13an.
b) Eskolen bukaera: ekainaren 13an. Azken bost eskola egunetan 2024-2025 ikasturteko deialdi bereziko azterketak eginen dira.
c) Eguberrietako oporrak: abenduaren 21etik urtarrilaren 7ra arte, biak barne.
d) Aste Santuko oporrak: apirilaren 17tik 27ra arte, biak barne.
e) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a eta maiatzaren 1a. Antolamendu, Prestakuntza eta Kalitate Zerbitzuak beharrezko jarraibideak emanen ditu erabakitzen bada beste jaiegunen bat ezartzea eta, horrenbestez, eskola egutegia aldatzea.
f) Hezkuntza mailako zaindariaren jaieguna: urtarrilaren 28a. Ikastetxeek zilegi izanen dute egun hori aldatzea.
g) Herriko festa eguna, Nafarroako Foru Komunitateko herrietako festa egunak zehazten dituen arauaren arabera. Data hori eskola eguna ez den egun batean egokitzen denean, ikastetxeak beste egun bat hautatzen ahalko du.
h) Ikastetxeak erabakitako eskola egunez gainerako egunak, aurreko ataletan jaiegun gisa finkatu ez direnak, eskolarik gabeko lanegunak izanen dira, gehienez ere 5 egun, eskolak hasten direnetik amaitzen diren arte.
i) Ezin izanen dira erabili f), g) eta h) ataletan aipatzen diren egunak Eguberrietako eta Aste Santuko oporraldiak luzatzeko.
3. Abenduaren 20a eta apirilaren 16a eskola egunak izanen dira, baina goizez bakarrik.
4. Irailaren 2tik eskolak hasi bitarteko egunetan, ikasturtearen antolaketarekin zerikusia duten jarduerak eginen dituzte irakasleek.
5. Eskolak bukatu eta ekainaren 30a arte, honako jarduera hauek eginen dira: kurtsoa berrikusi eta ebaluatzeko berariazko lanak, irakasgai bakoitzaren memoria didaktikoak, koordinazio didaktikorako departamentuen memoriak, bukaerako memoria, erreklamazioak, ikasleei arreta ematea eta behar diren administrazio egintza guztiak.
6. Ebaluazio edo klaustro saioak ezin izanen dira eskola orduetan egin.
2.–Ordutegia.
Eranskin honetan aipatzen diren irakaskuntzen eskola ordutegiak baldintza hauek bete beharko ditu:
1. Erdi mailako heziketa zikloetara sartzeko ikastaroen asteko eskola ordutegia 16 ordukoa izanen da modalitate presentzialean, eta, oro har, astelehenetik ostiralera banatuko dira ordu horiek, modu homogeneoan.
2. Goi mailako heziketa zikloetara sartzeko ikastaroen asteko eskola ordutegia 16 ordukoa izanen da modalitate presentzialean, eta, oro har, astelehenetik ostiralera banatuko dira ordu horiek, modu homogeneoan.
3. Urruneko modalitatean, erdi mailako eta goi mailako heziketa zikloetara sartzeko ikastaroen irakasgaietako bakoitzak gutxienez tutoretza kolektiboko eta banakako tutoretzako saio bana izanen du.
4. Egutegia, onetsi ondoren, nahitaez bete beharko dute ikastetxe publiko guztiek; ikastetxeko zuzendariaren erantzukizuna izanen da hura betearaztea, eta Hezkuntzako Ikuskapen Zerbitzuari dagokio haren aplikazioa gainbegiratu eta kontrolatzea.
5. Ikastetxe bakoitzaren egutegia bertako iragarki-taulan ikusgai jarriko da, eta ezin izanen da aldatu Hezkuntzako Ikuskapen Zerbitzuak baimendu gabe.
3.–Tramitazioa.
Tramitazioa egiteko, honela jokatuko da:
1. Zuzendariek egutegi eta ordutegi proposamenak bidaliko dituzte Hezkuntzako Ikuskapen Zerbitzura, "EDUCA" kudeaketa programaren bidez, eskola kontseiluak onetsi ondoren. Horretarako azkeneko eguna 2024ko ekainaren 14a izanen da.
2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. "EDUCA" kudeaketa programak ematen duen informatikako euskarriaren bidez iritsiko zaie ikastetxeei Hezkuntzako Ikuskapen Zerbitzuaren jakinarazpena. 2024ko ekainaren 24rako inolako jakinarazpenik jasotzen ez duten ikastetxeen egutegiak eta ordutegiak onetsitzat joko dira.
Ikastetxeren batek bere egutegi proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskinaren 1. atalean (Egutegia) ezarritako baldintzak betetzen dituen egutegi bat.
4.–Salbuespenak.
Eranskin honetan xedatutakoaren edozein salbuespen egiteko, ikastetxeak eskatu beharko dio, arrazoituta eta eskola kontseiluak onetsi ondoren, Hezkuntzako Ikuskaritza Zerbitzuari, azter dezan eta, hala badagokio, onar dezan.
Iragarkiaren kodea: F2407699
