Iragarkia

96. ALDIZKARIA - 2026ko maiatzaren 19a

1. NAFARROAKO FORU KOMUNITATEA

1.7. BESTELAKOAK

146E/2026 EBAZPENA, apirilaren 15ekoa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez onartzen baita Orkoiengo udal mugartean aluminio-aleaziozko hagunak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Manufacturas del Aluminio Pamplona Sector Automoción da.

Instalazio horrek ingurumen baimen integratua du, Ingurumen, Lurraldearen Antolamendu eta Etxebizitzako kontseilariaren abuztuaren 8ko 0422/2007 Foru Aginduaren bidez emana, gero Ingurumenaren eta Uraren zuzendari nagusiaren uztailaren 2ko 282E/2014 Ebazpenaren bidez eguneratua, eta ebazpen hauen bidez aldatua: Ekonomia Zirkularraren eta Uraren Zerbitzuko zuzendariaren irailaren 25eko 336E/2018 Ebazpena eta Ekonomia Zirkularraren eta Klima Aldaketaren Zerbitzuko zuzendariaren martxoaren 2ko 58E/2022 Ebazpena.

2025eko abenduaren 23an, titularrak bere ingurumen baimen integratuan jasotako baldintzak aldatzea eskatu zuen; zehazki, eskatu zuen hondakin berri bat sartzea ingurumen baimen integratuaren III. eranskinean, instalazioan sortutako hondakinen zerrendan, 150101 EHZ kodea duena hain zuzen, paperezko eta kartoizko ontziei dagokiena, eta 200101 EHZ kodea duen hondakina kentzea, hondakin hori udal hondakina edo antzekoa baino ez baita.

Ekonomia Zirkularraren eta Berrikuntzaren Zerbitzuak, aurkeztutako eskaera aztertuta, ondorioztatu du onargarria dela; izan ere, eskatzen dena bat dator instalazioak ingurumen aldetik eduki beharreko funtzionamendu egokiarekin eta teknika erabilgarri onenen aplikazioarekin.

Bestalde, ingurumen baimen integratuaren III. eranskinean, instalazioan sortzen diren hondakinen zerrendan, 150102 EHZ kodea duen hondakina sartuko da, eta, aldi berean, 200139 EHZ kodea duena kenduko da, hobeki egokitzen zaiolako Batzordearen 2014ko abenduaren 18ko Erabakiko hondakinen zerrendako kapituluari. Izan ere, 20. kapituluan etxeko hondakinak baino ez daude, zeinak kasuan kasuko toki entitatearen bidez kudeatu behar baitira (Iruñerriko Mankomunitatearen bidez, kasu honetan), eta, ondorioz, ez lirateke zerrenda honetan agertu beharko.

Arrazoi beragatik, 200135* eta 200140 EHZ kodeak dituzten hondakinak kendu dira instalazioan sortutako hondakinen zerrendatik; izan ere, 160213* eta 170405 hondakinak, dagoeneko baimenduta daudenak, hobeki egokitzen zaizkio Batzordearen erabaki horri.

Azkenik, 200199 EHZ kodea duen hondakina kenduko da ingurumen baimen bateratuaren III. eranskinetik, hots, instalazioan sortutako hondakinen zerrendatik, 20. kapituluko hondakina baita, eta kapitulu hori etxeko hondakinei buruzkoa baino ez baita.

Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.

Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.

Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,

EBAZTEN DUT:

Lehenbizikoa.–Onartzea Orkoiengo udal mugartean aluminio-aleaziozko hagunak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Manufacturas del Aluminio Pamplona Sector Automoción da.

Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.

Hirugarrena.–Ebazpen hau Nafarroako Aldizkari Ofizialean argitaratzea.

Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Bosgarrena.–Ebazpen hau Manufacturas del Aluminio Pamplona Sector Automocióni eta Orkoiengo Udalari igortzea, behar diren ondorioak izan ditzan.

Iruñean, 2026ko apirilaren 15ean.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2605824