Iragarkia

96. ALDIZKARIA - 2026ko maiatzaren 19a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

63/2026 EBAZPENA, martxoaren 23koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Smurfit Westrock Navarra SA enpresaren Zangozako lantegiko hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Smurfit Westrock Navarra SA enpresak (Zangozako lantegia; lehen SMURFIT KAPPA NAVARRA SA) aurkeztutako hitzarmen kolektiboa (kode zenbakia: 31005501011981), erregistro honetan sartu baitzen 2026ko otsailaren 16an, 2026ko otsailaren 12an enpresaren eta sindikatuen ordezkariek sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Smurfit Westrock Navarra SA enpresak (Zangozako lantegia; lehen SMURFIT KAPPA NAVARRA SA) aurkeztutako hitzarmen kolektiboa (kode zenbakia: 31005501011981).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko martxoaren 23an.–Ekonomia Sozialeko eta Laneko zuzendari nagusia, Iñaki Mendióroz Casallo.

SMURFIT WESTROCK NAVARRA SA ENPRESAREN HITZARMEN KOLEKTIBOA

ZANGOZAKO LANTEGIA

2025-2028

KONTZEPTU EKONOMIKOEN TAULA

I. KAPITULUA.–ARAU OROKORRAK

Alderdiak zehaztea

SMURFIT KAPPA NAVARRA SA enpresan du eragina lan hitzarmen kolektibo honek, eta bi alderdiek hitzartua da, aho batez: alde batetik, Enpresa Zuzendaritza, eta bestetik, Enpresa Batzordea, ELA, UGT, LAB eta CCOO atal sindikalek ordezkatuta.

1. artikulua. Eremu pertsonala.

Hitzarmen kolektibo honek SMURFIT WESTROCK NAVARRA SA enpresan du eragina (Zangozako lantegia) eta langile guztiei aplikatuko zaie, hala gaur egunekoei nola etorkizunekoei, goi-zuzendaritzako eta oihan ustiapenetako langileak salbuetsita.

Ordainsariei dagokienez, hitzarmenetik kanpora geldituko dira teknikarien eta administrarien VIII. eta IX. mailetako langileak, enpresarekin bakarkako kontratua euren borondatez adosten badute edo adostu badute.

2. artikulua. Hitzarmenaren indarraldia eta hitzarmena salatzea.

Hitzarmenak 2025eko urtarrilaren 1ean hartuko du indarra, eta 2028ko abenduaren 31ra bitarte iraunen du. Langileen Estatutuaren 86. artikuluan ezarritako ondorioetarako, hitzarmen hau salatutzat joko da 2028ko irailaren 30ean, eta negoziazio-mahaia 2029ko maiatzaren 31 baino lehen eratu beharko da; era mugagabean egonen da indarrean hitzarmena, harik eta beste batek ordeztu arte.

Arrazoi ekonomikoak, teknikoak, antolamendukoak edo produkziokoak direla-eta enpresak hitzarmen honetan jasotako baldintzetako edozein aldatu nahi badu, nahitaezkoa izanen da aldez aurretik negoziatzea, bai batzorde parekidearen bidez, bai bi ordezkaritzen bidez, eta, hala badagokio, aldaketaren xede diren baldintzak berriz formulatuko dira, eta, ez da onartuko nahitaezko arbitrajea gatazka konpontzeko formula gisa. Beharrezkoa izanen da bi ordezkaritzen arteko adostasuna, aplikatzeari buruzko desadostasuna autonomia-erkidegoetan sor litekeen Hitzarmen Kolektiboetarako Aholku Batzorde Nazionalaren edo hiru alderdiko organoaren esku uzteko.

3. artikulua. Baldintza hobeak.

Hitzarmen honen akordio ekonomikoak eta beste era guztietakoak, oro har hartuta, gutxieneko mailakotzat hartzen dira; beraz, aurretik zeuden egoera guztiak hitzarmenaren barnean bilduak daude, eta, orokorrean, orain itundutakoak baino egoera hobeak zituzten langileei errespetatu eginen zaizkie lehengoak.

4. artikulua. Konpentsazioa.

Ordainsarien kontzeptu guztietan edo batzuetan aldaketa ekonomikoak eragiten dituzten legezko aldaketek hitzarmen honetan itundutakoak irentsiko dituzte. Eragin praktikoa izanen dute baldin eta urteko kalkuluen arabera orokorrean hitzarmen honen maila osotara hartuta gainditzen badute eta orduan bakarrik.

5. artikulua. Batzorde parekidea.

Batzorde parekide horren eskumena izanen da legean ezarritako gaietan eta esleitzen zaion beste batzuetan esku izatea eta, bereziki, honako hauetan:

1. Hitzarmen kolektiboaren interpretazioa.

2. Itundutakoa betetzen den zaintzea.

3. Elkarren arteko adostasunez alderdiek ematen dizkioten gaiak.

Batzorde parekideak, alderdi bakoitzeko, atal sindikaleko ordezkari bat eta batzordeburua adina kide izanen ditu. Ez badago, Idazkaritzak beteko du bere postua. Halakorik ezean, postu hori bete gabe geratuko da, eta enpresaren alderdiak orekatuko du desoreka.

Jarduteko prozedura: Alderdi bakoitzak aurreko paragrafoan aipatutako gaiei buruz sortzen diren galderak eginen dizkie bere ordezkariei. Beste alderdiari galdera horien berri emanen zaio, eta alderdiak ados jarri beharko dira 15 eguneko gehieneko epean, azken jakinarazpenetik aurrera zenbatuta, Batzorde Parekidearen bilera egiteko eguna eta ordua finkatzeko. 15 eguneko gehieneko epean, Batzordeak akta eginen du hartu dituen erabakiekin eta hitzartu diren salbuespenekin, alderdiek ituntzen dituzten salbuespenak izan ezik. Erabakiak aho batez hartu behar dira, eta interesdunei bilerako akta batekin jakinaraziko zaizkie.

Bilera arruntak: Hiru hilean behin Batzorde parekideak bilera arrunta eginen du, eta epe horretan zehar sortzen ahal diren gaiak metatzen ahaleginduko da. Bi alderdiak ados jarrita finkatuko dira egunak.

6. artikulua. Aplikatu beharreko xedapenak.

Hitzarmen honetan aurreikusi ez den orotan, Langileen Estatutuan, Barne Araubideko Erregelamenduan eta indarra duten xedapenetan zehaztutakoari jarraituko zaio.

II. KAPITULUA.–ORDAINSARIAK

7. artikulua. Ordainsariak.

2025: Atzerapenak kalkulatzeko, ordainsarien osagaiei %2 aplikatuko zaie.

2026. urterako, ordainsariak izanen dira 2024. eta 2025. urteetako Nafarroako Foru Komunitateko KPI errealaren metatuari 2024ko abenduaren 31n zeuden soldaten taulak gehitzearen ondoriozkoak (ikus kontzeptu ekonomikoen taula). Igoera horrekin osatu dira 8a., 8b., 8c., 8f., 8h., 8i., 8j., 8ki., 8kii., 8m., 17., 19., 20. eta 24. artikuluetan jasotzen diren taulak eta kopuruak.

2027an: Soldaten taulak eguneratuko dira Nafarroako Foru Komunitateko 2026ko KPI errealaren arabera.

2028an: Soldaten taulak Nafarroako Foru Komunitateko 2027ko KPI errealaren arabera eguneratuko dira.

Hitzarmen hau indarrean dagoen bitartean KPI negatiboa bada, soldaten berrikuspenean %0 aplikatuko da.

8. artikulua. Ordainsarien osagaiak.

Ikus 2026rako balioak kontzeptu ekonomikoen taulan.

a) Lansariak mailaz maila.

Ikus Hitzarmenaren diru kopurua apartatua kontzeptu ekonomikoen taulan.

b) Antzinatasuna.

Antzinatasuna kalkulatzeko, Barne Araubideko Erregelamenduan hirurtekoen eta bosturtekoen balioa adierazteko ezarritakoa beteko da. Ikus kontzeptu ekonomikoen taula.

c) Balioaniztasun plusa.

Balioaniztasunen bat benetan egiten duten langileek osagarri lineala jasoko dute benetan lan egindako egun bakoitzeko, eta, beraz, ez dute kategoriagatiko alderik jasoko. 2026an, plusa hitzarmenaren hasierako kontzeptu ekonomikoen taulan adierazitakoa izanen da, egun bakoitzeko. Plusa egindako lanaren kategoriaren diferentzia baino txikiagoa bada, azken hori ordainduko da plusa ordaindu beharrean.

Balioaniztasuna da lanpostutik kanpo egiten den lan oro, edozein dela ere haren maila edo produkzio-lerroa. Benetan lan egindako eguntzat 8 orduko txanda osoa hartuko da, eta dagokion zati proportzionala ordainduko da txanda hori osatzen ez bada edo hori gainditzen bada.

Apartatu hau ez zaie aplikatuko bajak betetzeko lanpostuei lotutako langileei, ezta udako errefortzuko langile hasiberriei ere.

Balioaniztasunak lanbide-talde berean eginen dira. Balioaniztasunik egin behar bada taldeen artean, kategoriagatiko aldea jasoko da.

d) Aparteko haborokinak. Uztaileko eta Eguberrietako haborokinak, bakoitza hogeita hamar eguneko baliokoa, honela ordainduko dira:

–Enplegatuak: Mailari dagozkion lansariak (8a artikulua), merezimenduen balorazioa, hitzarmenaren osagarriak eta antzinatasunagatiko igoerak

–Beharginak: Mailari dagozkion lansariak (8a artikulua), plus finkoa eta antzinatasunagatiko igoerak.

e) Oporrak. Opor egunak honela ordainduko dira:

–Enplegatuak: Mailari dagozkion lansariak (8a artikulua), merezimenduen balorazioa, hitzarmenaren osagarriak eta antzinatasunagatiko igoerak.

–Beharginak: Mailari dagozkion lansariak (8a artikulua), plus finkoa eta antzinatasunagatiko igoerak

Oporretan egonik eritu diren edo lanetik kanpoko istripua izan duten langileei oporraldia eten eginen zaie, eta, eta hitzarmenaren 14. artikuluan ezarritako araubide orokorraren menpe geldituko dira.

Hartu gabe zenbat opor egun gelditu diren kalkulatzeko, oporraldian eri egondako egun naturalei 42/56 proportzioa aplikatuko zaie, baldin eta opor zikloetan 4 talde/hiru txanda erregimenean lan egin bada, 5 talde/hiru txandako kasuan; eta 40/56 proportzioa gainerako guztietan.

Oporrak eta, kasua bada, bakarka hartzen diren egunak ez dira diruz konpentsatzen ahal eta urte naturalaren barnean hartu beharko dira, salbu eta urtean zehar egutegia aldatu eta horren ondorioz hartzeko diren opor egunak ere aldatu beharra edo antzeko ondorioak gertatzen badira, edo bajak ordezkatu behar izanez gero.

Oporretako plusa. 5 lantalde/3 txanda, 3 lantalde/2 txanda eta 2 lantalde/2 txanda egutegietan dauden langileek plus bat jasoko dute maiatzetik azarora bitartean, urteko oporrei dagozkien gaueko lanaren, jaiegunen eta lanaldi jarraituko osagarriaren (LJO) aldagaiak konpentsatzeko (21. artikulua). Plusa opor egunen arabera kalkulatzen da, egutegi bakoitzean urtero aplika daitezkeen gauak, jaiegunak eta LJO erreferentziatzat hartuta, eta zenbateko hori 7 hilabetetan banatuta ordaintzen da (maiatzetik azarora).

f) Aparteko orduak.

Langile guztiek dute asteko atseden egunak hartzeko eskubidea. Hori dela eta, egun horietan zerbitzua soilik ematen ahal da salbuespenezko eta alderdien borondatearekin zerikusirik ez duten arrazoiengatik. Aparteko orduak hitzarmen honen kontzeptu ekonomikoen taularen arabera ordainduko dira.

Hiru multzotan banatzen dira aparteko orduak, zer dela-eta egin behar diren: ezinbesteko kasuak, egiturazkoak eta ohikoak:

–Ezinbesteko aparteko orduak izanen dira ohiz kanpoko ezustekoei edo hondamendiei aurrea hartu edo halakoak konpontzeko egiten direnak (suteak, uholdeak eta abar) eta, orobat, lehengaiak edo produktu bukatuak galtzeko arriskua dagoenean egiten direnak, bi alderdien nahiaren aurka bada ere. Ordu horiek egitea derrigorrezkoa izanen da.

–Egiturazko aparteko orduak dira ezusteko eskaerak, produkzio behar handiko uneak, ustekabeko absentziak, txanda aldaketak eta jardueraren izaerari lotutako egiturazko arrazoiak direla-eta egin beharrekoak. Halaber, horrelakotzat hartuko dira ekoizpen prozesu normalean sortzen ahal diren kalteak saihesteko egiten direnak. Aparteko ordu horiek mantendu eginen dira, baldin eta legean edo hitzarmen honetan ezarritako aldi baterako edo zatikako kontratazio modalitateak erabiltzerik ez badago.

–Ohiko aparteko orduak izanen dira hitzarmen honetan itundutako lan ordutegiaren gainetik egiten direnak, lehen aipatutakoaren arabera ezinbesteko edo egiturazko aparteko ordutzat hartzeko egoerak tartean ez badira.

–Ohiko aparteko orduak kentzen dira, oro har. Enpresa Batzordeak eta Zuzendaritzak aldian-aldian aztertuko dute ea konpromiso hori betetzen ote den.

Alderdi sinatzaileek uste dute aparteko orduak behar-beharrezkoa denean bakarrik egiteko politika sozial solidarioak ondorio positiboak izan ditzakeela.

Aparteko orduak atsedenaldi baliokide baterako konpentsatzeko aukera dago (egun bakoitzeko egun bat), eta, horretarako, nagusiarekin ados jarri behar da oporrak hartzeko egun zehatzerako. Oporraldi hori opor-zikloetarako ezarritako denboraldian egiten ahalko da, larunbatak, igandeak eta egutegi ofizialeko jaiegunak izan ezik, eta norberaren gozamen-egunak erabiltzeko arauak aplikatuko dira. Hamabina ordu lan egin eta lan txanda oso bat (bi erdi) osatzen duten langileek, nahi izanez gero, kontzeptu horregatik kobratu beharrean, egun bakoitzeko egun bat sortzeko eskubidea izanen dute, beste langilearen erabakia edozein dela ere.

Hori ikusita, arduradunek bi formulak erabiliko dituzte, ukitutako langileek nahi dutenaren arabera, eta, beraz, ez da bereizketarik eginen adierazitako aukeretan. Konpentsaziozko atsedenaldiaren kasuan, lan egindako aparteko ordu adina atseden-ordu hartuko dira, eta, gainera, Kontzeptu Ekonomikoen Taularen (Konpentsaziozko Atseden-orduak) orduko prezioan ordainduko da egindako ordu kopuruaren %75.

Hurrengo urteko urtarrilaren 31n konpentsaziozko atseden-orduak edo -egunak hartu gabe geratzen badira, likidatu eginen dira, langileak hala nahi badu, eta hitzarmen honen kontzeptu ekonomikoen taularen arabera ordainduko dira, baldin eta konpentsaziozko atseden-ordu edo -egun horiek ez badute gainditzen Langileen Estatutuan edo indarrean dagoen araudian ezarritako aparteko orduen gehienezkoa, atsedenaldian konpentsatu gabe geratu direnak, Langileen Estatutuan edo indarreko araudian ezarritakoaren arabera.

Bi alderdiek hitzeman dute aparteko orduak murrizteko lan eginen dutela Enplegu Batzordean, eta, ez dute baztertu bajak betetzeko beste lanpostu batzuk sortzeko aukera.

g) Lanera ez bertaratzeagatiko deskontuak.

Bidezko arrazoirik gabeko absentziak, baimen ez ordainduak eta arazo pertsonalengatik lanorduetan alde egiteak, deskontatu eginen dira. Horrezaz aparte, bidezko arrazoirik gabeko absentzietan hutsegiteen eta zehapenen kapitulua aplikatuko da ondorengo formularen arabera (oporren, haborokinen, irabazien, jaiegunen eta igandeen zati proportzionalak barne).

Enplegatuak: ST x 2,00

Beharginak: ST x 2,02

ST = Eguneko lansariak, hitzarmenaren osagarria, merezimenduen balorazioak eta antzinatasuna langileentzat; eta lansariak, plus finkoa eta antzinatasuna, beharginentzat.

Enpresa batzordeak proposatzen ahalko du ongi arrazoituriko absentzia partikular batzuen deskontua egiteko arreta berezia izan dadila, eta zuzendaritzak hartuko du behar den erabakia.

h) Lanaldi jarraituagatiko konpentsazioa (LJK).

1. Egunean hiru txandatan lanaldi jarraitua duten langileei kontzeptu ekonomikoen taulan adierazitako konpentsazioa ordainduko zaie lan egiten duten egun bakoitzeko, arauzko atsedenaldia ez hartzeagatik.

2. Bi txandatan ari diren langileek ogitartekoaren atsedena 9:00etatik 9:15era arte izanen dute goizeko txandan, eta 18:00etatik 18:15era arte arratsaldeko txandan.

Langile horiek ogitartekoaren atseden-ordua aldatuko dute nagusiaren iritziz lanak hala eskatzen duenean, eta larrialdietan beharrezkoa izan daiteke atsedena ez hartzea ere.

Horrelako egoeretan, langile horiei eguneroko 3 txandakoei dagokien taula aplikatuko zaie.

i) Lanerako deiak eta joan-etorrietako gastuen konpentsazioa.

1. Lan beharrak direla-eta, langileei hala eskatzen zaienean eta zerbitzuak ohiko ordutegitik edo lan ziklotik kanpo ematen direnean, betiere langile horiek lantegira joan behar badute, hitzarmenaren hasierako kontzeptu ekonomikoen taulan adierazitako hobaria emanen zaie "joan-etorrien gastuengatik" edo "deiagatik", ordutegi arruntetik edo lan ziklotik kanpo kanpora lan egiten duten lehenbiziko egunean.

2. Hobari bera emanen da, lehenbiziko egunean oraingo honetan ere, lan beharrengatik langileari bere ordutegi edo ziklo normala alda dezala eskatzen zaionean, eta hala egin ondoren. Hobari horixe emanen da txanda bikoizten denean ere.

3. Hobari hori aplikatuko da asteko atseden egunean lan egin behar baldin bada.

4. Aurreko apartatuetan ezarritako zenbatekoaren likidazioa egiteko, kasu guztietan giza baliabideen departamentuaren oniritzia beharko da.

5. Ahal dela, lanorduetan jarriko da harremanetan langilearekin. Enpresatik kanpoko komunikazioa telefono bidez egin behar da, enpresatik bertatik eta enpresako telefono batetik langileak emandako telefono zenbakira bakarrik.

j) Gaueko lanaren plusa eta jaiegunetako lanaren plusa.

Gaueko 22:00etatik goizeko 6:00etarako txandetan jarraian edo aldian-aldian lan egiten dutenek gaueko lanaren plusa kobratuko dute lan egindako gau bakoitzeko.

Hitzarmen honen indarraldian, plus hau 7. artikuluan adierazten den igoeraren arabera eguneratuko da. Hitzarmenaren hasierako kontzeptu ekonomikoen taulan ageri da lan egindako gau bakoitzeko zenbatekoen taula, 2026rako itundutako gehikuntza aplikatu ondoren.

Langile batek gaueko txandan lanaldi osoa egiten ez badu, gauez lan egindako orduen arabera ordainduko zaio gaueko lanaren plusa.

Halaber, jaietako egutegi ofizialeko igande eta jaiegunetan lan egiteagatik osagarria ematen da. Osagarri hori lan egindako igande edo jaiegun bakoitzagatik kobratuko da soilik.

Hitzarmena indarrean dagoen bitartean, osagarri hori 7. artikuluan ezarritako igoeraren arabera eguneratuko da, eta, gainera, 2026., 2027. eta 2028. urteetako zenbatekoak handitu eginen dira, eta jatorrizko aldea pixkanaka murriztuko da gaueko lanaren plusarekin: %30 2026an eta beste %30 2027an, harik eta 2028an berdindu arte.

Jaiegunen egutegi ofizialean lan egindako igande eta jaiegunetarako zenbatekoak hitzarmen honen kontzeptu ekonomikoen taulan jaso dira, 2026rako hitzartutako igoera aplikatu ondoren.

k) Ordainsari osagarriak:

Ordainsari osagarri hauek daude:

–I., II. eta III. taldeentzat, merezimenduen balorazio sistema bat eta hitzarmenaren osagarria.

–IV. taldeentzat, plus finkoko sistema bat.

Beharginak:

i. Plus finkoa.

Plus horien balioak kontzeptu ekonomikoen taulan adierazi dira.

Plusak egun naturaleko sorrarazten dira, hilero kobratuko dira, dagokion hileko soldaten likidazioko azken egunean.

Lizentzia hartzen denean, 12. artikuluan ezarritakoari jarraituko zaio.

Bidezko arrazoirik gabeko absentziak, baimen ez ordainduak eta arazo pertsonalengatik lanorduetan alde egiteak gertatuz gero, 8g artikuluan xedatutakoari jarraituko zaio.

Laneko istripuen eta eritasun arrunten kasuan, 14. eta 16. artikuluetan egoera horietarako espresuki ezarritakoari jarraituko zaio.

Plus finkoaren zenbatekoa hitzarmen honen kontzeptu ekonomikoen taulan jasota dago, aparteko orduen balioen koadroan.

Enplegatuak:

ii. Hitzarmenaren osagarria.

Hitzarmenaren osagarriaren balioak kontzeptu ekonomikoen taulan adierazi dira.

Lizentzia hartzen denean, 12. artikuluan ezarritakoari jarraituko zaio.

Bidezko arrazoirik gabeko absentziak, baimen ez ordainduak eta arazo pertsonalengatik lanorduetan alde egiteak gertatuz gero, 8g artikuluan xedatutakoari jarraituko zaio.

Laneko istripuen eta eritasun arrunten edo lanez kanpoko istripuen kasuan, 14. eta 16. artikuluetan egoera horietarako espresuki ezarritakoari jarraituko zaio.

iii. Merezimenduen balorazioa.

Merezimenduaren balorazioak kontuan hartzen du langileak agindutako eginkizunean duen jarduera indibiduala. Merezimenduen balorazioan hainbat alderdi aztertzen dira:

Buruen eta enplegatuen alderdi komunak:

• Zintzotasuna eta diziplina.
• Gaitasuna, leialtasuna eta lankidetza.
• Lanean jarritako zuhurtasuna.

Buruen kasuan:

• Agintzeko dohainak.
• Erantzukizunerako sena.
• Segurtasuna eta higienea.

Enplegatuen kasuan:

• Lanaren kalitatea.
• Lan kopurua.
• Besteenganako jarrera.

Balorazioa gaineko nagusi hurrenek, zuzendariek eta giza baliabideen zuzendaritzak eginen dute. Merezimenduak urtean behin berrikusiko dira, beharrezkoa bada.

Merezimenduen kontzeptuan kobratzen diren diru kopuruak urtero igoko dira hitzarmen honen 7. artikuluan xedatutakoaren arabera.

l) Martxoko eta iraileko pagak.

Enpresako Barne Araubideko Erregelamenduaren 53. artikulua indargabetu eta haren ordez artikulu honetan xedatutakoak aginduko du:

Paga, sorrarazi eta hurrengo urteko martxoan ordainduko dena, aparteko paga gisa kalkulatuko da, azpitaldearen, plantillan emandako denboraren eta aurreko urtean batez beste izandako antzinatasunaren arabera.

Iraileko ordainsaria, bigarren xedapen gehigarrian (Zangozako jaietako lana) erabakitakoaren arabera egutegiaren eta opor egunen aldaketa konpentsatzen duena, urtean bertan sortzen da, eta aparteko ordainsari gisa ere kalkulatuko da, azpitaldearen, plantillan emandako denboraren eta urte horretako batez besteko antzinatasunaren arabera.

Martxoko eta iraileko ordainsariak, bakoitza bere sortzapen aldiarekin, eguberrietako eta uztaileko aparteko haborokinak bezala kalkulatuko dira (8d artikulua), eta bakoitza 30 egunekoa izanen da. Honela ordainduko da:

–Enplegatuak: dagokion lansaria, merezimenduen balorazioa, hitzarmenaren osagarria eta antzinatasunagatiko igoerak.

–Beharginak: dagokion lansaria, plus finkoa eta antzinatasunagatiko igoerak.

m) Lan jarraituaren plusa (LJP).

Igande eta jaiegunetan lan egiten duten araubide jarraituko langileek, baldintza horietan lan egiteagatik, lan jarraituaren plusa (LJP) jasoko dute. Plus horren zenbatekoa hitzarmen honen kontzeptu ekonomikoen taulan jasota dago.

Plus honek ez ditu aparteko haborokinak handitzen, ezta bestelako kontzeptuak ere; beraz, LJP gisa urtean 2.677,98 euro jasoko dira gehienez.

Lan jarraituaren plusa kobratzen duten langileak, gaur egun igande eta jaiegunez txandatan lan egiten ez badute, behartuak daude baldintza horietan lan egitera lan antolakuntzak hala eskatzen duen momentuan.

Lan jarraituaren plusa oso-osorik kobratuko da eritasunaren ondoriozko lanerako ezintasun iragankorreko kasuetan, edozein dela ere absentismoaren indizea, baina 14. artikuluan ezarritako baldintzak betetzen badira, betiere.

n) Plus ez-finkagarria:

2026., 2027. eta 2028. urteetan, 3 lantalde/2 txanda edo 5 lantalde/3 txanda araubideetara atxikita ez dauden langileei %0,25eko ordainsari ez-finkagarria egokituko zaie, kontzeptu hauen kasuan: Hitzarmenaren diru kopurua, Hitzarmenaren osagarria / Plus finkoa eta Antzinatasuna. Kalkulua plantillan emandako denboraren arabera eginen da, eta hurrengo urteko otsaileko nominan ordainduko da, urtea bukatutakoan.

III. KAPITULUA.–LANBIDE SAILKAPENA ETA MAILAK

9. artikulua. Lan taldeak eta azpitaldeak.

Enpresako langileak talde hauetan daude sailkatuak:

I. Teknikariak.

II. Administrariak.

III. Menpekoak.

IV. Beharginak.

IV. taldean, beharginei dagokien horretan, azpitalde hauek biltzen dira:

–1. E mailako ofizialak.

–1. A mailako ofizialak.

–1. B mailako ofizialak.

–1. C mailako ofizialak.

–2. mailako ofizialak.

–3. A mailako ofizialak.

–3. B mailako ofizialak.

–1. mailako espezialistak.

–3. mailako espezialistak.

Laborategia.

Teknikarien taldean 2. mailako analista azpitaldea Barne Araubideko Erregelamenduan Laborategiko ofizialentzat ezarritako eginkizunekin lotzen da.

1. mailako analistak izanen dira 2. mailako analisten eginkizunetan ari direnak baina halako eraginkortasun graduan ezen arreta bereziko lanak egiteko eta laborategi bati dagozkion analisi eta entsegu guztiak menderatzeko gaitasuna baitute. Maila hori emateko lantegiko gerentziak onetsi beharko du aurretik.

10. artikulua. Zereginak baloratzeko sistema.

Lan jardueraren ordainsarien egitura ahal den neurrian zuzena eta suspergarria izan dadin, langileak mailaz maila daude sailkatuta, egiten ari diren lanen arabera eta zeregin bakoitzari datxezkion faktoreak, tasunak eta erantzukizunak kontuan hartuta.

Ikusirik egin daitezkeen aldaketak eta har daitezkeen lan sistema berriak, enpresak berrikusiko ditu baloratutako zereginetan gertatzen diren aldaeren arabera eginiko balorazioak.

Enpresa Batzordeak txostena egiten ahalko du, enpresak ezartzen ahal diren aldaketak eta lan sistema berriak gauzatu aurretik.

Era berean, geroan sor daitezkeen lanpostuak ere baloratuko dira. Berrikuspen edo balorazio berri hori enpresak eginen du.

Enpresa batzordeak txostena egiten ahalko du enpresak lanpostuak baloratu aurretik.

Lanpostu bakoitzari esleitutako mailek ez dute loturarik laneko azpitaldeekin, eta horiek ez dituzte mailak zehazten, baina horiek laneko azpitalde parekatu bat zehazten dute.

Mailak esleitutako lanaren arabera zehazten dira.

Bi alderdiek konpromisoa hartzen dute Berdintasun Plana eguneratzeko legez behar den irismeneko lanpostuen balorazioa egiteko.

11. artikulua. Lan mailak eta azpitaldeak.

a) I., II. eta III. taldeetako langileak (teknikariak, administrariak eta menpekoak).

Langile orok du zein mailatan dagoen jakiteko eskubidea.

b) IV taldeko langileak (beharginak).

c) Lana antolatzean ahaleginak eginen dira langile orok autoerrealizazioa, ekimena eta gogobetetasuna izateko modua izan dezan, baita lana aberatsagoa, aldakorragoa eta taldean egina izan dadin.

Enpresako zuzendaritzak, lanaren antolaketa dela-eta, goragoko nahiz beheragoko azpitalde edo mailako lanak esleitu ahalko ditu, edo azpitalde edo maila berean baina beste lanpostu batzuetan, gainetik duen nagusi hurrenaren aburuz langileak prestakuntza egokia baldin badu, baina betiere atal berean eta Langileen Estatutuan ezarritako mugen barnean.

Beste lanpostu bateko lanak egiten direnean, lehen zehaztutako balioaniztasunaren plusa aplikatuko da, egindako lanaren kategoriarekiko aldea baino txikiagoa denean izan ezik. Kasu horretan, norberaren azpitaldearen eta ordezten denaren artean dagoen orduen eta lanaren aldea (urteko ordainsari gordina zati urteko lan orduak) jasoko da.

Langileak gaitzeko, Zuzendaritzak ahalegina eginen du onartzen duten langileek aukera izan dezaten ohiko lanpostua ez den beste batean gaitzeko, kontuan hartuta langilearen ahalmenak eta ezagutzak (beste atal batzuetan eta lan araubide beraren barruan). Era horretako proposamenak bere eginen ditu langileriak, gehienez ere hiru hilabeteko aldian.

Artikulu honen ondorioetarako, hauek dira Atalak:

–Paper-orea.

–Berreskuratzea eta Energia.

–Papera.

–Mantentze-lanak.

–Laborategia.

–Bulegoak.

d) IV. taldeko (beharginak) lanpostu hutsak.

Smurfit Westrock-en lantokiko langile guztiek dute aukera IV. taldeko (beharginak) lanpostu hutsak betetzeko.

Erretiroagatik edo beste arrazoiren batengatik langileak alde egin baino lehen konpontzen saiatuko dira lanpostu hutsak. Horretarako, beharrezkoa izanen da lanpostua uzten duen langileak 9 hilabete lehenago aurreabisua egitea. Lanpostuak argitaratu eginen dira bajak behin betikoak direnean edo erretiro partzialaren akordioa sinatzen denean, betiere lanpostu hutsa amortizatzen ez bada.

120 eguneko epea ezartzen da lanpostu hutsa argitaratzen denetik aukeratutako hautagaia nor izanen den jakinarazi arte.

Lanpostu hutsak betetzeko deia eginen da.

Eskatzaileek proba psikoteknikoak egin beharko dituzte, baita lanpostu hutsaren ezagupen teoriko eta praktikoei buruzkoak ere.

Honela baloratuko dira proba horiek:

–Psikoteknikoak: 0-10 puntu.

–Teorikoak: 0-15 puntu.

–Laneko segurtasuna eta osasuna: 0-20 puntu.

–Praktikoak: 0-25 puntu.

–Esperientzia lanpostu hutsean: 0-20 puntu.

Esperientzia 20 puntukoa izanen da lanpostu jakin batean 6 hilabetez baino gehiagoz (jarraian edo etenekin) eta dagokion arloko buruaren iritziz eraginkortasun osoz aritu diren langileentzat. Gainerako kasuetan, arloko buruak baloratuko du esperientzia, 0 eta 20 puntu bitarte.

2027tik aurrera, hutsik dagoen postuko esperientzia honako ekuazio honen arabera zehaztuko da:

P = 0,002x² - 0,0246x - 0,6

P lortutako puntuak dira eta x eskainitako lanpostuan benetan egindako lanegunen kopurua.

Hurrengo taula hau dugu adibide gisa:

–Prestakuntza: 0-10 puntu.

10 puntu horiek enpresak banatuko ditu, honako irizpide hauek kontuan hartuta: 5 puntu segurtasunari buruzko prestakuntzan, 3 puntu lanpostuaren berariazko prestakuntzan, 2 puntu prestakuntza orokorrean.

Proben emaitzetan berdinketarik gertatuz gero antzinatasunari emanen zaio lehentasuna.

Proba horiek gainditzeko, gutxienez puntuen %60 atera beharko da, eta lanpostua puntuazio handiena lortu duen eskatzaileari adjudikatuko zaio.

Lanpostua finko bihurtzeko, probaldia ere gainditu beharko da, hilabetekoa aurreneko lau mailetakoentzat eta hiru hilabetekoa gainerakoentzat. Bakoitzaren gaineko txostena atalburuak eginen du.

Egindako probak eta ateratako emaitzak baloratuko dituen epaimahaia lau kidek osatuko dute, horietako bi enpresako zuzendaritzak izendatuak eta beste biak enpresa batzordeak bere kideen artetik hautatuak, bete beharreko lanpostu hutsen lanbide-taldearen azpitalde berekoak edo goragokoak.

Batzordeko bi kide bederen ez badaude lanbide-taldearen azpitalde berekoak edo goragokoak, batzordeak plantillako beste kideen artetik hautatuko ditu. Epaimahaiburua enpresak izendatutako bi kideetako bat izanen da eta, behar izanez gero, bere kalitateko botoa erabiliko du.

Barne Araubideko Erregelamenduaren 33. artikulutik 37.era arteko artikuluak indargabetzen dira, biak barne.

e) I., II. eta III. taldeko langileen igoerak (teknikariak, administrariak eta mendekoak). II-VII mailak barne.

I., II. eta III. taldeetan lanpostu hutsen bat egonez gero, enpresako langileek horiek eskuratzeko aukera izanen dute.

Enpresak aukeratuko ditu hautatzeko irizpideak eta sistema, honako puntu hauek kontuan hartuta:

–Lanpostu hutsak betetzeko deia eginen da.

–Lanpostuan aritzeko behar den gutxieneko prestakuntza eta titulua enpresak finkatuko ditu.

–Lanpostuan aritzeko gaitasunetan berdinduta egonez gero, lehentasuna antzinatasunari emanen zaio.

–Bi izangaien gaitasunak eta prestakuntza berdina baldin badira, enpresako langileek izanen dute lehentasuna lanpostu hutsak betetzeko.

Lanpostua finkatzeko, probaldi bat gainditu beharko da:

–Lehenbiziko hiru mailetan (II., III. eta IV. mailak), hilabetekoa.

–Gainerako mailetan (V., VI. eta VII. mailak), hiru hilabetekoa.

Ataleko buruak emanen du dagokion txostena.

f) IV. taldeko kontratazio berriak (beharginak):

Sartu berri diren langile guztiek IV. taldeko III. mailan ezarritako soldata jasoko dute lan egiten duten lehenbiziko hilabetean.

Soldata maila hori langile sartu berrientzat eta prestakuntzan ari direnentzat da soilik, okupatzen ahal duten lanpostu bakoitzeko, eta, hortaz, halakorik ez zaie langileei aplikatuko lanpostu batean lehenago aritu ondoren geroago lanpostu horretarako kontratatzen badira. Epe horretan, horretarako ezarritako prestakuntza plana bete behar du langileak.

Ez dute lanposturik beteko, ezinbesteko kasuetan izan ezik.

Hilabete igarotakoan IV. mailakotzat sailkatuko da, eta horretan jarraituko du aldi baterako kontratatzen den bitartean. Goragoko mailako postuak okupatuz gero, kategoriagatiko aldea kobratuko da.

g) Bajak betetzen dituztenak:

–Maila-kategoria:

• Beharginen taldeko X B maila, Makina eta Paper-orearen bajak betetzen dituzten postuetarako.
• Energiako bajak betetzen dituzten langileen kasuan, XI B maila aplikatuko da.

Hasierako prestakuntza-aldiaren ondoren eta langilea bajak betetzeko postuan dagoen bitartean aplikatuko da maila (ikus mailak kontzeptu ekonomikoen taulan).

–Plusak:

• Lanaldi Jarraituko Osagarria (LJO): benetako lanaldiagatik.
• Gainerako plusak: hitzarmenaren arabera aplikatzekoak.

–Lan egutegia.

• Egutegi lehenetsia: Inolako lanposturik bete behar ez denean, astelehenetik ostiralera (lanegunetan) goizeko txandan eginen da.
• Asteburu (larunbat eta igandeak) eta jaiegunak: Hiru hilean behin asteburu eta jaiegunen %40 gutxienez hartuko dela bermatzen da; eta hilean gutxienez asteburu bat (1) (larunbata eta igandea) izanen dela bermatzen da.
• Oporrak: Ondoz ondoko hamabost (15) opor egun behintzat izanen dira. Bi alderdiek adostu beharko dituzte egun horiek. Edozein aldaketa 60 egun lehenago jakinarazi beharko da.

–Lanaldia eta atsedenaldia:

• Gehienez ere zazpi (7) egun jarraian lan egiten ahalko da, eta, egun horien ondoren, gutxienez bi (2) atseden egun hartu beharko dira, alderdiek besterik adosten ez badute.
• Absentzia bat betetzean, lanpostuaren egutegia bere gain hartuko dute, beren txandara itzuli arte edo bete beharreko beste lanpostu bat esleitu arte.
• Gutxienez 12 ordu lehenago jakinarazi behar da deia.
• Lanaldien arteko gutxieneko atsedenaldia 12 ordukoa izanen da. Txanda aldaketaren bat egiten denean, atsedenaldi hori murrizten ahalko da langilearen adostasunarekin, betiere 8 orduko atsedenaldia bermatuta eta aldea hurrengo atsedenaldian konpentsatuta. Akordiorik ez dagoenean, hurrengo txanda hasiko da (8 ordukoa) 12 orduko atsedenaldiaren ondoren, gaueko txandaren irteeran izan ezik, horrek hurrengo egunean lehenetsitako txandara (goizean) itzultzea baitakar.

–Lan denboren erregularizazioa:

• Hiru hilean behin, lan egindako orduen kalkulua eginen da (aparteko ordutzat hartutakoak izan ezik), eta esleitutako egutegiaren ordu teorikoekin erkatuko dira.
• Aldeak hurrengo hiruhilekoan erregularizatuko dira, ordu bakoitzeko ordu bateko atsedenaldi edo errekuperazioaren bidez, betiere arloarekin edo departamentuarekin adostuta.

–Bajak betetzea:

Arloak edo departamentuak bete beharreko lanpostuak esleituko dizkie uneoro bajak betetzen dituzten langileei, zehaztutako lehentasunen arabera eta aukera hauen barruan:

• Baimen ordainduak.
• Hilabete (1) arteko iraupena duten bajak edo lizentziak. Kasu berezietan, epe hori luzatu eginen da, enpresa batzordeari jakinarazi ondoren.
• Egun bat egun bakoitzeko; txanda aldatu behar bada, 15 egun lehenago jakinarazi beharko da.
• Konpentsaziozko atsedenaldiak, lan egutegiaren barruan, txandaz aldatzea ez dakartenak.
• Oporralditik kanpoko oporrak; salbuespen gisa, besteen oporrak oporraldian betetzen ahalko dira, betiere langileek hala erabakitzen badute.
• Lanaldi zatituko zereginak (urteko lanegunen %25era mugatuta).

–Prestakuntza eta hautaketa:

• Lanpostuak gutxieneko LH2/Goi Mailako prestakuntza eskatzen du. Salbuespen gisa, enpresak baloratzen ahalko ditu lanpostuan aritzeko balio eta baldintza egokiak erakutsi dituzten izangaiak.
• Lanpostuaren berezitasunengatik eta langileen taldeko lanpostuei aplikatu beharreko arauaren salbuespen gisa, bajak betetzen dituztenen lanpostu hutsak kudeatuko dira Hitzarmenean (11.e) Teknikari, Administrari eta Mendekoen lanpostuetarako (I, II eta III. taldeak) zehaztutako prozeduraren arabera.

–Lanpostu hutsak eta mailaz igotzea:

• Gaitasuna duen beharginen taldeko lanposturen batean oposizio-lehiaketan parte hartzen badu, puntuazio gehigarri hau izanen du, bajak betetzen duen antzinatasunaren arabera: 4 urte: 8 puntu; eta 5 urte baino gehiago: 12 puntu
• Lanpostua lortuz gero, langilea postu horretarako zehaztutako lan baldintzen mende egonen da, dagokion lanbide kategoriaren soldata maila barne.

IV. KAPITULUA.–LIZENTZIAK ETA ESZEDENTZIAK

12. artikulua. Ordaindutako lizentziak.

Lizentzia horiek gertaera eragilearen ondorengo lehenbiziko lanegunetik aplikatuko dira (egun hori barne ohiko lanaldiaren %50 bete ez bada), berariaz besterik adierazten ez den kasuetan izan ezik.

a) Honako egoera hauetan, langileek baimena izanen dute denbora batez lanera ez agertzeko, ordainsaria jasotzeko eskubidea galdu gabe, betiere aldez aurretik abisatu eta justifikatzen badute:

1. 15 egun natural, dagokion erregistro publikoan inskribatutako ezkontzaren, izatezko bikotearen edo legezko baliokidearen kasuan, gehienez ere 4 atseden egun izanik. Ezarritako 15 egunetan 4 atseden egun baino gehiago badaude, egun horietatik gora luzatu eginen dira.

2. 5 lanegun, honako kasu hauetan: gaixotasun larria; istripuak eragindako lesio larriak; ebakuntza kirurgiko larria eta ospitaleratzea; etxeko atsedena behar duen ospitaleratzerik gabeko ebakuntza kirurgikoa, ezkontidearen, aitaren, amaren, seme-alaben, aitona-amonen, biloben edo anai-arreben kasuan, eta langilearen seme-alaben eta anai-arreben ezkontideen kasuan, baita langilearekin etxe berean bizi den eta hura benetan zaindu behar duen beste edozein pertsonaren kasuan ere. Baimena ospitaleratzeagatik ematen bada eta ez bada beharrezkoa etxean atsedenik hartzea, ez da, inola ere, ospitaleratzeak dirauena baino luzeagoa izanen. Baimen honi lotutako gaietan, alderdiak Auzitegi Gorenaren behin betiko jurisprudentziako interpretazioaren mende egonen dira, Langileen Estatutuaren 37 3b artikuluari erreparatuta.

3. Odol edo ezkontza bidezko bigarren mailarainoko ahaideen heriotzagatik, 2 egun. Ezkontidea edo seme-alaba hiltzen bada, baimena 8 egun naturalera luzatuko da. Arrazoi horrengatik langileak bidaia egin behar badu, epea bi egunez luzatuko da.

4. 2 egun seme-alabaren jaiotza, adopzio edo familia-harrera iraunkorragatik. Lizentzia hau ezin da beste baimen batzuekin metatu.

5. Egun bat (1) seme-alaben, gurasoen, anai-arreben eta ezkonanai-arreben ezkontza dela-eta, baldin eta langilearen egutegiko laneguna bada.

6. Egun bat (1) langilearen osaba-izebaren edo haren ezkontidearen heriotzagatik, langilearen egutegian laneguna bada.

7. Egun bat (1) aldi baterako familia-harreragatik.

8. Egun bat (1) ohiko bizilekuz aldatzeagatik (Langileen Estatutuaren 37.3.c artikulua).

9. Hezkuntza Plan Orokorrean biltzen diren titulu akademiko edo profesionalen bat eskuratzeko, ikasketak egiten dituen langileak eskubidea izanen du behar dituen baimenak hartzeko azterketak egitera joateko. Absentziaren berri aldez aurretik eman behar da eta ondoren justifikatu eginen da, azterketetan parte hartu izanaren ziurtagiriaren bidez.

10. Nahitaezko eginbehar publikoa edo pribatua betetzeko behar-beharrezkoa den denbora, Langileen Estatutuaren 37. artikuluaren 3d apartatuan ezarritako baldintza eta muga beretan.

11. Eginkizun sindikaletan edo langileen ordezkaritza lanetan aritzeko, legez ezarritakoa (Langileen Estatutuaren 37.3.e artikulua).

12. Mediku espezialistaren eta familiako medikuaren kontsulta egiteko behar-beharrezkoa den denbora, osasun sistema publikokoa izan edo ez. Osasun sistema publikoko osasun langile elkargokideen kontsulta ere sartuko da, medikuaren aginduarekin.

13. Gehienez ere 12 ordu urtean, langilearen mende dauden 14 urtetik beherako seme-alaben, desgaitasunen bat duten pertsonen edo lehen mailako odol- edo ezkontza-ahaidetasuneko ahaideen gaixotasunagatik, baldin eta senitartekoaren egoerak eragozten badu kontsultara laguntzailerik gabe joatea, adina, istripua, gaixotasuna edo bisita mota direla eta. Baimena emateko, kontsultarako orduak bat etorri behar du langilearen lanaldiarekin. Ondorio horietarako, gertaera eragileak dirauen bitartean indarrean egonen den edozein frogagiri publikoren bidez frogatzen ahalko da mendekotasuna.

14. Egun bat (1) txandaka ari den langilearen seme-alabaren lehen jaunartzeagatik, bere egutegiaren lanegun batekin bat datorrenean.

15. Jaio aurreko azterketetara eta erditzea prestatzeko tekniketara joateko behar-beharrezkoa den denbora, eta, adopzio edo harrera kasuetan, nahitaezko informazio eta prestakuntza saioetara joateko eta egokitasun deklarazioaren aurreko nahitaezko txosten psikologiko eta sozialak egiteko, baldin eta lanaldiaren barruan egin behar badira (Langileen Estatutuaren 37.3.f artikulua), bi gurasoentzat.

16. Ikastetxe ofizialetan matrikula pertsonalak egiteko behar-beharrezkoa den denbora, langilearen txandarekin bat egiten badu eta ezin bada txanda edo matrikula egiteko ordua aldatu.

17. Langileek eskubidea izanen dute ordu batez lanpostutik kanpo egoteko seme edo alaba bat garaia baino lehen jaiotzen bada edo, arrazoia edozein dela ere, jaio ondoan ospitalean egon behar badu. Orobat, lanaldia gehienez 2 ordu murrizten ahalko dute, eta soldata ere proportzioan murriztuko zaie (Langileen Estatutuaren 37.5 artikulua).

18. Langileak eskubidea izanen du lanetik alde egiteko ezinbesteko kasuetan, beharrezkoa denean familiakoekin edo bizikideekin lotutako premiazko arrazoiengatik, gaixotasuna edo istripua dela-eta ezinbestekoa baldin bada langilea berehala haren ondoan egotea. Langileak eskubidea izanen du apartatu honetan jasotako arrazoiengatik urtean lau eguneko absentziak ordainduak izateko, hitzarmen kolektiboan ezarritakoaren arabera, eta, hala badagokio, langileak absentziaren arrazoiaren ziurtagiria entregatuko du (Langileen Estatutuaren 37.9 artikulua).

19. Lau (4) egun, gehienez, ezinezkoa baldin bada lantokira iristea, edo ezinezkoa bada hara ailegatzeko behar diren zirkulazio-bideetatik pasatzea, agintaritza eskudunek joan-etorrietarako ezarritako gomendioengatik, mugengatik edo debekuengatik, edo arrisku larriko eta berehalako egoera bat gertatzen bada, barnean direla hondamendi edo fenomeno meteorologiko kaltegarri baten ondoriozkoak. Lau egunak igaro ondoren, baimena luzatuko da hura ekarri zuten inguruabarrak desagertu arte, ezertan galarazi gabe enpresak lan kontratua eteteko edo lanaldia murrizteko aukera, ezinbesteko kasuetan, 47.6 artikuluan ezarritako baldintzetan. Lanaren izaera bateragarria baldin bada urrutiko lanarekin, eta komunikazio-sareen egoerak horretarako bidea ematen badu, enpresak martxan jartzen ahalko du, eta begiratuko du betetzen direla uztailaren 9ko 10/2021 Legean jasotako gainerako betebehar formal eta materialak (Urrutiko Lanari buruzko Legea), eta, bereziki, honako hau: bitarteko, ekipamendu eta tresna egokien hornidura (Langileen Estatutuaren 37.3.g artikulua).

20. Organoak edo ehunak emateko prestaketa lanak egiteko behar-beharrezkoa den denbora, betiere lanaldiaren barnean egin behar badira (Langileen Estatutuaren 37.3.g.sic. artikulua).

Baldintzatzaileak:

–Gaueko txandan dagoen langileak gertaera eragilearen aurreko edo ondorengo gauean hartzen ahalko du baimen ordaindua.

–Ezkontzagatiko edo izatezko bikotekide/bikotekide egonkorragatiko lizentzian, 15 eguneko epea gertaera eragilearen egunetik zenbatzen hasiko da. Langileak aldez aurretik eskatuta, baimen hori osorik edo zati batean hartzen ahalko da (aldia zatikatu gabe) ezkontza eguna baino lehen, baldin eta laneko eta atsedeneko egunen kopurua eta aldiko jaiegunen kopurua gertaera eragilearen ondoren izandako berberak badira.

–Lizentzia horien oinarria eta xedea da lizentzien arrazoi izandako zergatiei edo ondorioei erantzutea. Eszedentzia hartzeko eskubidea izanen da gertaera eragilearen ondorengo lehenbiziko lanegunetik hasita (ohiko lanaldiaren %50 bete ez bada, egun hori barne), salbu eta espresuki beste zerbait adierazten den kasuetan, hauetan izan ezik: gaixotasun larria, ebakuntza kirurgiko larria eta ospitaleratzea. Kasu horietan, ospitaleratzeak edo, hala badagokio, etxeko atsedenak irauten duten egunetan banatzen ahalko da lizentzia, langileak nahi duenean.

–2. apartatuan aipatzen diren ahaideen egoera larria frogatu beharko da medikuak luzatutako txostenaren edo inprimakiaren bidez, eta bertan agerraraziko da eriari edo istripua izan duenari asistentzia emandako data, edo ebakuntza kirurgikoa egindako eguna, pazientearen izena eta deiturak eta eritasunaren, lesioaren edo ebakuntza kirurgikoaren larritasunaren egiaztapena. Ebakuntza kirurgikoa larria dela ulertuko da anestesia orokorra ematen den bakoitzean.

b) Lizentzia ordainduak ordainduko dira sailkapen mailaren (8a artikulua) eta antzinatasunaren arabera. Beharginek ere plus finkoa jasoko dute. Enplegatuek hitzarmenaren osagarria eta merezimenduena kobratuko dituzte, halakorik balego.

c) Izatezko bikotea edo legezko baliokidea osatzen dutela legez egiaztatzen duten langileek ezkonduek bezalako lizentziak izanen dituzte.

d) Idatziz eskatzen diren baimen ordaindu guztiei modu berean erantzun beharko zaie.

Medikuarenera joatea: Langileek behar den denbora izanen dute espezialista eta familia medikuaren kontsultara joateko, Osasun Sistema Publikokoa izan edo ez, betiere beren lanaldiaren barruan egiten bada; bisita edo kontsulta lanorduetatik kanpo egiten bada, dagokion txandara joanen dira ohi bezala, edo ahalik eta lasterren hori dela-eta ez bada posible txandaren hasieran iristea. Bisita gaueko txanda burutu eta berehala egiten bada, eta ezin bada txanda aldatu, ezta hitzordua ere, langileak dagokion departamentura edo langileen departamentura joko du ohi bezala joatea ahalbidetuko dion irtenbide bat bilatzeko.

13. artikulua. Eszedentziak.

a) Borondatezko eszedentziak: Barne Araubideko Erregelamenduaren 73. artikuluan ezarritakoak baino laburragoak diren eszedentzietarako eskaeren kasuak banan-banan aztertuko dira eta interesdunei idatziz emanen zaie erantzuna.

b) Astebeteko borondatezko eszedentzia (lan-zikloa): Baldintza hauek bete beharko dira:

–Urtean gehienez ere 6 emanen dira, eta gutxienez 3 urteko antzinatasuna duten langileek eskatzen ahalko dituzte.

–Ez dira eskatzen ahalko oporretarako (ekaina-iraila) eta Eguberrietarako.

–Ez dira aldi berean erabiltzen ahalko atal/arlo berean (Egur Parkea, Zelulosa, Energia, Ebakinak eta Finketak, Makinak, Logistika, Kalitatea, Mantentze-lanak, Bulegoak).

–Lan-ziklo bateko iraunpena izanen du.

–Dagokion arloko zuzendaritzaren onespena beharko dute atalaren eraginkortasuna ziurtatzeko eta estaldura modu eraginkorrean gauzatu ahal izateko prestatutako pertsona edukitzeko.

–Eskaerak ordenaren arabera emanen dira, eta lehenago hartu ez duten langileek izanen dute lehentasuna.

–Urtarrilaren 31 baino lehen eskatu behar dira hurrengo 12 hilabeteetarako, eta gutxienez hasierako eguna baino 3 hilabete lehenago.

–Gutxienez 2 urte igaro behar dira langile berak eszedentzia bat hartzen duenetik hurrengoa hartu arte.

–Eszedentzia horiek ez dute eraginik izanen Barne Araubideko 82. artikuluan.

–Enpresa batzordeak eskaeren berri izanen du.

V. KAPITULUA.–GIZARTE LAGUNTZAK

14. artikulua. Eritasun arruntaren edo lanetik kanpoko istripuaren ondoriozko bajak.

a) Eritasun bakoitzeko lehenengo hiru egunetan enpresak langile bakoitzaren kontzeptu hauen %100 ordainduko du:

a.1) Beharginak: dagokion lansaria, antzinatasuna, plus finkoa, lanaldi jarraituaren konpentsazioa, gaueko lanaren eta igande eta jaiegunetako lanaren plusa.

a.2) Enplegatuak: dagokion lansaria, antzinatasuna, merezimenduak, hitzarmenaren osagarria, lanaldi jarraituaren konpentsazioa, gaueko lanaren plusa eta igande eta jaiegunetako lanaren plusa.

b) Eritasun bakoitzeko 4. egunetik 15.era, biak barne, legeak halaxe aginduta, enpresak aldi baterako ezintasunaren aurreko hilean kontingentzia arruntengatik kotizatutakoaren %60 ordainduko du bajako egun bakoitzeko.

Eritasun bajako 16. egunetik 20.era, biak barne, enpresak Gizarte Segurantzaren prestazioak osatuko ditu langile bakoitzaren aipatu ordainsari kontzeptuen %85era arte. 21. egunetik aitzina, enpresak %100era arte osatuko ditu kontzeptu horiek.

Eritasun bakoitzeko laugarren egunetik 20. egunera arte, biak barne, enpresak arestian aipatutako prestazioak osatuko ditu a) apartatuan agertzen diren ordainsari kontzeptuen %100era arte, baldin eta I., II., III. eta IV. taldeetan (teknikariak, administrariak, mendekoak eta beharginak) eritasunaren ondoriozko absentismo indizea, aurreko hamabi hilabeteetan metatutako portzentajea hartuta, %3,75 baino handiagoa ez bada. Indizea kalkulatzeko, laneko ordu teorikoen parekotzat hartuko da 21. artikuluan ezarritako urteko lanaldia.

c) Aurreko apartatuan adierazten den absentismoen indizearen mendeko enpresa-osagarriak honela aplikatuko dira: hilabete bakoitzean kalkulatuko da hilabete horretan gehi aurreko hamaika hilabeteetan metatutako absentismoaren portzentajea, beharginak eta enplegatuak denak batera hartuta.

Ehunekoa ez bada ezarritako muga baino handiagoa, ondorengo hilabetean gertatzen diren eritasun bajetan enpresa osagarria aplikatuko da. Baina portzentaje muga hori gainditzen bada, ez da absentismo indizearen menpeko enpresa-osagarririk aplikatuko. Era berean jokatuko da ondorengo hilabeteetan.

Urte osoan metatutako indizeak osotasunerako aurreikusitako helburua betetzen badu, indizea gainditu eta hurrengo hilabetean baja emateagatik bere garaian jaso ez dituzten langileei emanen zaizkie enpresa-osagarriak.

Artikulu honetan araututako osagarrien gehienezko iraupena eta Gizarte Segurantzako Araubide Orokorrean lanerako ezintasun iragankorreko egoera edo kontingentziarako une bakoitzean ezarritakoa berdinak izanen dira.

Artikulu honetan jasotako Gizarte Segurantzako prestazioen gainean enpresa-osagarriak jasotzeko eskubidea izateko, langileak Arloari jakinarazi behar dizkio baja eta alta medikoa. Ezin bada, Giza Baliabideei jakinaraziko zaie, eta, bien ordutegitik kanpo, kontramaisu-maistrari. Horretarako, jarduteko prozedura eginen da.

d) Gizarte Segurantzak murriztuko balu aldi baterako ezintasunen prestazioen zenbatekoa, langilearen hartzeko guztiak (Gizarte Segurantzaren prestazioa eta enpresa-osagarriak) neurri berean murriztuko lirateke.

e) Lanean hastea baja luzearen ondoren (90 egun baino gehiago): Baja luze baten ondoren, Zerbitzu Medikoak eta/edo arloko arduradunak kasu bakoitzean beharrezkotzat jotzen duen denboran emanen diote laguntza, lanpostuetan gerta daitezkeen aldaketetarako. Segurtasun eta osasuneko batzordeari kasuaren berri eman eta kontsultatuko zaio.

15. artikulua Amatasuna.

Enpresak Gizarte Segurantzaren prestazioak osatuko ditu emakume langileen ordainsari kontzeptuen %100ean, amatasunagatiko atsedenaldiaren lehenbiziko 56 egunetan.

16. artikulua. Laneko istripuen ondoriozko bajak.

Laneko istripuaren kasuan, enpresak Gizarte Segurantzaren prestazioak osatuko ditu langile bakoitzaren kontzeptu hauen %100era arte: dagokion lansaria, antzinatasuna, hitzarmenaren osagarria, merezimenduak, plus finkoa, lan jarraituaren plusa, lanaldi jarraituaren konpentsazioa, gaueko lanaren eta igande eta jaiegunetako lanaren plusak.

Osagarri hori bajako lehenengo egunetik sortuko da.

Adierazitako osagarriaren gehienezko iraupena eta Gizarte Segurantzako Araubide Orokorrean lanerako ezintasun iragankorreko egoera edo kontingentziarako une bakoitzean ezarritakoa berdinak izanen dira.

Laneko istripuetarako ezarritako prestazio osagarriak jasotzeko eskubidea izateko, interesdunak enpresako zerbitzu medikora joan behar du, sendatze prozesua jarraitu ahal izan dezan. Horretarako, zerbitzu medikoak zita emanen die eragindako pertsonei. Bere egoera fisikoa dela-eta osasun zerbitzura joaterik ez badu, langileen departamentuari jakinaraziko dio. Betebehar hori betetzen dela frogatzeko, enpresaren zerbitzu medikoak bisitaldi bakoitzaren frogagiria egin eta langileen departamentuari eta interesdunari emanen die.

Lanean hastea baja luzearen ondoren (90 egun baino gehiago): Baja luze baten ondoren, zerbitzu medikoak eta/edo arloko arduradunak kasu bakoitzean beharrezkotzat jotzen duen denboran emanen diote laguntza, lanpostuetan gerta daitezkeen aldaketetarako. Segurtasun eta osasuneko batzordeari kasuaren berri eman eta kontsultatuko zaio.

17. artikulua. Ezkontza eta jaiotza.

Ezkontza eta jaiotza sariak ezartzen dira gertaera eragilearen unean enpresan urtebete jarraian daramaten langileentzat. Aplikatu beharreko zenbatekoak hitzarmen honen kontzeptu ekonomikoen taulan ageri dira.

Ondorio horietarako, izatezko bikoteen legezko formalizazioak eta bikote horietan gertatzen diren jaiotzek goian aipatu sariak hartzeko eskubidea sortuko dute.

18. artikulua. Bizi asegurua.

Enpresak kontratatua duen bizi-aseguru kolektiboak indarrean jarraitzen du eta kontigentzia eta berme berberak aseguratzen ditu, hauexek:

1. Berez gertatutako heriotza: 27.045,54 euro.

2. Istripuaren ondoriozko heriotza (lanekoa edo lanetik kanpokoa): 40.568,32 euro.

3. Istripuaren ondoriozko baliaezintasun erabatekoa eta iraunkorra (lanekoa edo lanetik kanpokoa): 40.568,32 euro.

4. Eritasunaren ondoriozko baliaezintasun erabatekoa eta iraunkorra: 27.045,54 euro.

Edozein arrazoiren ondoriozko heriotzaren kalte-ordaintzat 27.045,54 euroko asegurua baino ez dute izanen 65 urtetik goitiko langileek, zeren, polizako baldintzetan ezarritakoaren arabera, adin horretan bukatzen baitira berme osagarriak.

Aseguru-primari enpresak eta langileek egin beharreko ekarpena %70ekoa eta %30ekoa izanen da, hurrenez hurren.

Urteko prima bakoitzaren kostuaren gutxi gorabeherako kalkulua eginen da. Zenbatetsitako kostuaren %30a zati 14 eta zati aseguratutako langileen kopurua egin ondoko emaitza izanen da langileek asegururako pagatu beharreko kuota. Diru hori hilero deskontatuko da nominen ordainagirietatik, aparteko pagak barne direla. Urteko kostu zenbatetsiaren eta ekitaldian konpainiari benetan ordaindutako primaren artean alderik izanez gero, behar den zuzenketa eginen da hurrengo urterako kostua kalkulatzerakoan.

Aseguru kolektiboan lantokiko langile guztiak sartzen dira, enpresan sartzen diren lehenbiziko egunetik. Bizi aseguruan mantenduko dira amatasun, aitatasun eta eszedentziengatik kontratua etenda duten langileak, lanpostua gordeta badute.

19. artikulua. Beste prestazio batzuk.

Enpresek Konpentsazio Kutxari egin beharreko ekarpena hitzarmen honen kontzeptu ekonomikoen taulan adierazi da.

Era berean, aipatutako taulan Erregeen Kabalgatarako ekarpena adierazten da, urte bakoitzeko urtarrilean ordainduko dena. Ekarpen hori antolakuntza eta ekarpen gastuetan banatzen da, fabrikako langile finkoen eta aldi baterakoen urtebetetik gorako eta 9 urtetik beherako seme-alaba bakoitzeko, baita fabrikako langile finkoen eta aldi baterakoen umezurtz bakoitzeko ere.

Lan nekagarriengatiko konpentsazio ekonomikoa hitzarmen honen kontzeptu ekonomikoen taulan adierazten da.

20. artikulua. Erretiro aurreratua eta erretiro partziala.

a) Erretiro aurreratua.

Erretiratzeko adin ofizialarekin bat datorren eguna baino lehen erretiratzen diren langileei kalte-ordaina ematen zaie lana uzteagatik, egindako aurrerapenaren arabera. Hitzarmen honen kontzeptu ekonomikoen taulan agertzen da 2026rako kalte-ordainaren balioa, aurreratutako urteen arabera.

Ezarritako balioei hitzarmen honen 7. artikuluan hitzarmenaren indarraldiko urte bakoitzerako ezarritako igoera portzentajeak gehituko zaizkie.

b) Erretiro partziala.

Enpresak 2026., 2027. eta 2028. urteetan onartuko ditu urte horietan erretiro partziala eskuratzeko legez ezarritako baldintzak betetzen dituzten langileen erretiro partzialerako eskaerak.

Aipatutako baldintzak betetzen dituzten langileek erretiro partziala hartzeko eskubidea izanen dute. Enpresak lanaldi osoko eta mugagabeko errelebo-kontratua sinatu beharko du, eta ordezten den pertsonaren lanaldia murrizten ahalko da, legez ezarritako gehieneko kopuruaren arabera.

Urte hasieran enplegu batzordearekin berrikusiko dira hurrengo urtean erretiroagatik aurreikus daitezkeen lanpostu hutsak, eskatutako egunerako erreleboak bideratzeko.

Hurrengo hitzarmenean enpresaren konpromisoa luzatzea erabakitzen bada, erretiro partziala atzeratuta duten langileei, behar den aurrerapenaz eskatuta, egin beharreko prestazio alditik deskontatuko zaie atzerapen horri dagokion prestazio aldia.

Erretiro partziala eraginkorra izanen da legez ezarritako baldintzak betetzen direnetik hilabeteko epean, betiere 9 hilabeteko aurrerapenarekin eskatu bada. Enpresari egotz dakiokeen atzerapena gertatzen bada, hilabete hori gainditzen duen lan denbora oro prestazioko denboratzat hartuko da.

2025erako egindako eskaerak 2026ko apirila hondarrera baino lehen ebatziko dira; 2026ko prestazio aldia egintzat joko da, eta 2027, 2028 eta 2029ko prestazio aldiak betetzeke geratuko dira.

Langileak lan prestazioa beteko du enpresak urtero eta, gutxienez, 3 hilabete lehenago adieraziko dizkion aldietan, eta ondorengo aldietako lan denbora metatzea ahalbidetuko da, enpresak hala erabakitzen badu eta Taldeak aldez aurretik onartzen badu.

Txandakako erretiro partziala benetakoa denean, hitzarmen honen 7. artikuluan adierazitako eguneratzeak aplikatzeari utziko zaio.

Erretiro partziala hartuz gero, ez dira aplikatuko erretiro aurreratuagatik ezarritako kalte-ordainak.

VI. KAPITULUA.–LANALDIA, LAN EGUTEGIA ETA OPORRAK

21. artikulua.

a) 2025eko urteko lanaldia 1694 ordukoa izanen da, eta 1692 ordukoa hurrengo urteetan.

Urteko lanaldia ordu gutxiagokoa ezartzekotan, paper-ore, paper eta kartoiaren Estatuko hitzarmenean xedatutakoari jarraituko zaio.

b) Lantegian etengabe lan eginen da urte osoan, 365 egunetan, alegia, Eguberri eta Urte Berritan izan ezik, egun horietan lanari utziko baitzaio abenduaren 24ko 14:00etatik abenduaren 26ko 6:00ak arte, eta abenduaren 31ko 14:00etatik urtarrilaren 2ko 6:00ak arte, eta herriko festetako geldialdian, hau da, irailaren 11ko goizeko 6:00etatik irailaren 19ko goizeko 6:00ak arte.

Apartatu honekin lotuta, lehenbiziko eta bigarren xedapen gehigarrietan ezarritakoa bete beharko da.

c) 5 lantalde/3 txanda gisako langileentzat oporrak 15 eguneko ziklotan finkatu dira, ekainaren 16tik irailaren 15era arte. Hala ere, ziklo aldaketak egiten ahalko dira lanpostu bereko langileen artean adostuz gero, ataleko buruari jakinarazi ondoren; bestelako aldaketak egiten ahalko dira ataleko buruaren onespenarekin.

Gainerako 16 opor egunak honela banatuko dira:

• 8 egun maiatzean eta ekainean, 2025-2028rako prestatutako egutegiaren arabera.
• 8 egun irailaren 20tik azaroaren 20ra.

Aldatzen diren opor zikloetan barrena, langile ukituak beste lantalde eta ordutegi batera aldatuko dira, eta euren artean konponbideren bat bilatuko dute hartutako eta lan egindako lanaldien arteko desfaseak konpentsatzeko.

Opor zikloetan gerta daitezkeen altak eta bajak direla-eta, ez da oporraldiaren iraupena aldatuko, eta hartu ez diren opor egunak azken zikloaren ondorengo hilabeteetan hartuko dira.

d) 3 lantalde/2 txandako langileen kasuan, ziklo bakoitzean oporrak hartu behar dituzten lanpostuak esleituko dira, baina zikloari atxikitzea borondatezkoa da. Aurreikusitakoak baino eskaera gehiago izan eta adostasunik ez badago, zozketa bidez ebatziko da.

3 lantalde/2 txandako langileek eta lanaldi zatitukoek euren oporrak esleitu zaien zikloan hartzen badituzte, hobe, baina ziklotik kanpora ere hartzen ahal dituzte opor egunak zerbitzuak aukera ematen badu eta pool egunak errespetatuz 3 lantalde/2 txandakoen kasuan, lan beharrek eskatzen badute.

Nolanahi ere, opor zikloen ondoren gehienez ere lau egun uzten ahal dira hartu gabe.

e) Langileak maiatzaren 15erako atxikiko dira behin betikoz opor zikloetan. Hori dela-eta, langile guztiek jakitera emanen dituzte, apirilaren 30a baino lehen, ziklo aldaketari edo atxikipen borondatezkoari buruz lankideen artean hartutako erabakiak, lanaldi zatituko edo 3 lantalde/2 txandako langileen kasuan.

f) Konpentsazio atsedenaldia hartzeko egunez baliatzeko arauak.

1. Zelulosako eta papera egiteko makinetako 5 lantalde/3 txandako langileak:

a) Egun horietaz baliatuko dira arduradunaren iritziz lanaren antolakuntzak bide ematen duen egunetan, bide hauetako bat hautatuz:

–Pool egunetan, edo

–Goizeko, arratsaldeko eta gaueko txandako egunetan, baldin eta absentzia betetzeko Pool-ean beste pertsona bat badago. Salbuesten dira larunbat, igande eta jaiegunetako arratsaldeak eta larunbatak.

–Beste edozein txandatan, ados jartzen bada Pool-ean egonik inolako absentziarik bete beharrik ez duen beste lankide batekin.

b) 5 lantalde/3 txandako saiakuntza fisikoetako, manutentzioko edo mantentze-lanetako langileak: a) apartatuko arau bera.

c) Gainerako langileak: a) apartatuko arau bera.

2. Egun baterako bi eskaera suertatuz gero (Pool-ean dagoenak eta txandakoak eginak) eta bietako bati baizik ematerik ez badago, lehentasuna izanen du Pool-ean dagoen pertsonak.

3. Galarazita dago aparteko orduak egitea konpentsaziozko atseden egunak hartzeko, arduradunak egokitzat jotzen dituen kasu berezietan izan ezik.

4. Urrian aztertuko da zenbat konpentsaziozko atseden egun gelditzen diren plantillako langileek hartu gabe utziak eta ahaleginak eginen dira, behar izanez gero, egun horiek lanaren antolaketarako modurik egokienean banatu eta har daitezen.

5. Urte bakoitzeko abenduaren 31rako langile guztiek hartuak izan beharko dituzte konpentsaziozko atsedena hartzeko egun guztiak.

g) Urte bakoitzeko lan egutegiak prestatzerakoan kontuan hartuko dira agintaritza eskudunak finkatutako festa nazionalak eta herrikoak, eta behar diren egokitzapenak eginen dira egutegietan artikulu honen a) apartatuan urte bakoitzerako ezarritako lanorduak betetzeko.

h) Merkatuan lehiatzeko gaitasuna suspertzeko edo enpleguaren egonkortasunari eta eskariari hobeki erantzuteko, ondoko neurri hauek hartuko dira barneko malgutasuna bultzatzeari dagokionez:

–Malgutasunaren portzentajeak ez dira modu irregularrean aplikatuko, non eta ez den beharrezkoa lantegiko instalazioak erabat edo zati batean geldiaraztea bukatutako produktuen stock-ak handitu direlako, dela salmentak jaisteagatik dela lehengaien faltagatik, baldin eta hura enpresaren erabaki batek eragin ez badu.

–Aurreko kasuren batengatik barneko malgutasuna aplikatu behar denean, enpresa batzordearekin negoziatu beharko dira eten horren baldintzak, baita sortutako egunak bueltatzeko ondorioak edo haien balizko konpentsazioa ere.

i) Telelana. Departamentuko arduradunaren onespenarekin, modalitate horretan lan egin dezaketen langileek telelana urtean gehienez ere 22 egunez erabiltzeko aukera adostu da.

VII. KAPITULUA.–ENPRESA BATZORDEA ETA EKINTZA SINDIKALA

22. artikulua.

Enpresa batzordearen eta ekintza sindikalaren arloan Paper-ore, Paper eta Kartoiaren Estatuko Hitzarmen Kolektiboa aplikatuko da.

Enpresa batzordeko kideen ordu ordainduei dagokienez, konpentsazio indibiduala onartua dago, bi hiletik behin eginen dena, baina oporretako hilabetea konpentsazio horretatik kanpo gelditzen da.

VIII. KAPITULUA.–BESTE XEDAPEN BATZUK

23. artikulua. Kontratazioa.

Enpresak berak kontratatuko ditu zuzenean, oro har, behin-behineko langileak; horiek beren azpitalde parekatuari dagokion zenbatekoa jasoko dute, Barne Araubidearen Erregelamenduaren 14. artikulua indarrik gabe geratuta. Horretarako, lan poltsa bat sortuko da, interesdun orok parte hartzeko modukoa, eta langile horiek beteko dituzte lanpostuak egiturazko betebehar bat zehazten denean. Hautatutako behin-behineko langilea finko bihurtuko da enpresan urtebeteko epean edo lehenago ere, agintedunek hala erabakitzen badute.

Zuzendaritzari dagokio kasu bakoitzean hartu beharreko irtenbidea zein den erabakitzea, zenbat langile behar diren eta kontratuak zenbat iraunen duen.

Enpresa batzordeari jakinaraziko zaio, batzordeko idazkariaren bitartez.

Langile berriak hitzarmen kolektibo honetan zehaztutako lanpostuetan hasiko dira. Eskainitako lanposturik ez badago, dagokion azpitaldean eratu eta kokatuko da batzorde parekidearen bidez.

Aurreko neurriei eutsiko zaie, baldin eta legezko araudiak aurrez hitzartutakoa aplikatzea ahalbidetzen badu.

a) Lan-poltsa:

Lan poltsa bat sortuko da eta giza baliabideen bidez enpresa batzordeari helaraziko zaio haren oinarrizko informazioa. Honela osatuko da lan poltsa:

1. Enpresan esperientzia duten langileak:

a. Jardunean dauden behin-behineko langileak eta aldi baterako kontratuak burutzean enpresa utzi duten behin-behineko langileak.

b. Jarraitutasuna erabakitzeko balorazio-irizpideak honako hauek izanen dira, adierazitako hurrenkeraren arabera: (1) jarduera, (2) trebakuntza/gaikuntza, (3) berdintasun plana, (4) antzinatasuna enpresan (lan egindako egun kopurua).

c. Antzinatasuna kalkulatzeko, edozein kontratazio modalitatetan enpresan lan egindako denboraldi guztien batura hartuko da halakotzat, betiere urte bateko edo gehiagoko etenaldirik ez badago.

2. Enpresan esperientziarik ez duten langileak:

Interesdunek giza baliabideen departamentuak gaitutako berariazko helbide elektronikora (swsanguesa.rrhh@smurfitwestrock.es) bidaltzen ahalko dute beren CVa, datu hauekin:

a. Prestakuntza.

b. Laneko esperientzia.

c. Informazio interesgarria.

Curriculum vitaeak jaso ahala, izangaiei hitzordua emanen zaie, lehenengo elkarrizketa bat izateko. Elkarrizketa horretan, profilak eta horien aukerak identifikatuko dira.

Justifikaziorik gabe kontratu bati uko egiten dioten pertsonak (justifikatutzat joko da une horretan lanean aritzea edo erdi edo goi mailako ikasketak egiten aritzea) Lan Poltsatik kanpo utziko dira.

Enpresak pasako diren pertsonei eta haien legezko ordezkariei jakinaraziko die bihurketa noiztik aurrera eginen den eta plantillan noiz izanen diren mugagabeak.

b) Enplegu batzordea:

Enplegu batzorde bat sortuko da kontratazio akordio honi jarraipena emateko.

Enplegu batzordea enpresa batzordean ordezkaritza duen atal sindikal bakoitzeko kide batek eta enpresaren beste hainbeste ordezkarik osatuko dute.

Enpresa batzordearen kide guztiek eskubidea izanen dute aldez aurretik jakiteko zein diren gai zerrenda, hautapen proben datak eta kontratazio berrietan eskatzen ahal diren baldintzak.

c) Genero-ekitatea:

Emakumeak Zangozako Smurfit Kappan sar daitezen sustatzeko, aldi baterako nahiz mugagabeko plazak betetzeko kontratazio guztiak berdin egin daitezen sustatuko da, hau da, %50 gizonak eta %50 emakumeak, betiere horretarako aukera badago.

d) Behin-behinekotasuna mugatzea:

Hitzarmen honek indarra hartzen duenetik aurrera, behin-behineko kontratua duten langileak, erretiro partzialean dauden langileak, bitarteko kontratuak eta oporraldia betetzeko kontratatutako langileak kontuan hartu gabe, ez dira inoiz izanen langile guztien %15 baino gehiago.

Giza baliabideen departamentuak hilero emanen dio Enpresa Batzordeari behin-behinekotasunaren bilakaeraren berri. Ehuneko hori handiagoa bada, enpresak hilabeteko epea izanen du behin-behinekotasuna ezarritako portzentajera murrizteko behar diren kontratu mugagabeak egiteko, betiere A puntuan ezarritako lehentasuna errespetatzen bada.

e) Prestakuntza kontratuak edo praktikaldikoak:

Inoiz praktikaldiko, prestakuntzako eta ikaskuntzako kontratuaren modalitatea erabili behar bada, gehieneko iraupena 12 hilabetekoa izanen da eta gutxieneko soldata bere eginkizunak betetzen dituen hitzarmenaren lanbide-taldearen %100.

f) LGTBI pertsonen berdintasuna eta diskriminaziorik eza: Neurriak (1026/2024 ED):

a. Hitzarmen hau sinatzen duten alderdiek konpromisoa hartzen dute berdintasunaren eta diskriminaziorik ezaren printzipioekin, eta, beraz, printzipio horiek urratzen dituen edozein egoerari aurrea hartzeko, arreta emateko eta egoera horiei aurre egiteko. Izan ere, lan harremanen esparruak diskriminaziorik ezan eta aniztasunarekiko errespetuan, sexu-orientazio eta -identitatean eta genero-adierazpenean edo sexu-ezaugarrietan oinarrituta egon behar du, eta LGTBI pertsonekiko diskriminazio oro desagerrarazi behar du enpresaren esparruan.

b. Indarrean dagoen legeriaren bat etorriz, zehazki, otsailaren 28ko 4/2023 Legea, trans pertsonen benetako berdintasun eraginkorrerako eta LGTBI pertsonen eskubideak bermatzekoa, eta urriaren 8ko 1026/2024 Errege Dekretua, enpresetan LGTBI pertsonen berdintasunerako eta diskriminaziorik ez egiteko neurrien multzo planifikatua garatzen duena, honako neurri planifikatu hauek ezartzen dira:

–Enplegua lortzea eta mailaz igotzea:

• Hautaketarako eta mailaz igotzeko prozeduren bidez, hautagai egokiak identifikatu eta ebaluatzen ahalko dira, kualifikazio, gaitasun eta jarduera irizpideen arabera: ezagutzak, esperientzia, gaitasunak, jarrerak, trebetasunak eta/edo eskatzen diren gaitasunak.
• Hautaketarako eta mailaz igotzeko prozesuetan, adierazitako egokitasun irizpideak aplikatuko direla bermatuko da, bai barne mailan egiten badira, bai aholkularitza enpresekin egiten badira, LGTBI pertsonentzat diskriminazio zuzena edo zeharkakoa ez eragitea bermatzeko, eta haien ibilbide profesionala baldintza berdinetan garatzea bermatzeko.
• Aukera-berdintasunari buruzko prestakuntza emanen zaie hautaketa prozesuetan parte hartzen duten langile guztiei.

–Prestakuntza, sentsibilizazioa eta hizkuntza:

Hitzarmena indarrean dagoen bitartean, enpresak LGTBI pertsonek lan eremuan dituzten eskubideei buruzko prestakuntza eta sentsibilizazio ekintzak sartuko ditu bere prestakuntza planetan, arreta berezia jarrita tratu eta aukera berdintasunean eta diskriminazio ezan. Prestakuntza langile guztiei zuzenduta egonen da, eta eduki hauek izanen ditu:

• Hitzarmen kolektiboan jasotako LGTBI neurri planifikatuen ezagutza orokorra eta hedapena.
• Otsailaren 28ko 4/2023 Legean (trans pertsonen berdintasun egiazko eta eragingarrirako eta LGTBI pertsonen eskubideak bermatzekoa) sexu, familia eta genero aniztasunari buruz jasotako oinarrizko definizioak eta kontzeptuak ezagutzea.
• "Laneko barne-indarkeriako egoeretan jarduteko protokoloa" ezagutzea eta zabaltzea, sexu-orientazio eta -identitateagatik, genero-adierazpenagatik eta ezaugarri sexualengatik gertatzen den jazarpen diskriminatzailea edo indarkeria prebenitzeko, detektatzeko eta hari aurre egiteko.

Aniztasuna errespetatzen duen hizkuntza erabiltzen dela bermatzeko neurriak sustatuko dira.

Askotariko lan ingurune seguru eta inklusiboak.

Enpresak askotariko lan ingurune inklusiboak eta seguruak sustatzen dituzten ekimenak abiaraziko ditu (Everyone programa, adibidez). Jokabide LGTBIfobikoen, sexu-askatasunaren eta/edo sexu-aniztasunaren aurka egindako ekintzekiko babesa bermatuko da lan eremuan, bereziki sexu-jazarpena, sexuan oinarritutako jazarpena eta beste edozein jokabide diskriminatzaile prebenitzeko eta tratatzeko prozeduraren bidez.

–Baimenak eta onura sozialak:

Baimenak, gizarte onurak eta eskubideak berdintasunez eskuratzeko aukera bermatuko zaie langile guztiei, sexu-orientazio, -identitate eta genero-adierazpenagatiko diskriminaziorik gabe, eta arreta berezia eskainiko zaie pertsona transei.

–Diziplina araubidea:

Enpresak ez du onartzen, bere antolakuntzaren esparruan, langileen sexu-askatasunaren, sexu-orientazio eta -identitatearen eta genero-adierazpenaren aurkako inolako jarduera diskriminatzailerik edo jokabiderik. Izaera horretako edozein jokabide edo praktikaren kudeaketa "Laneko barne indarkeriako egoeren aurrean jarduteko protokoloa" delakoan ezarritakoaren arabera egiten da, eta protokoloan bertan eta aplikatu beharreko araudi erregulatzailean aipatutakoari lotzen zaio bere diziplina kalifikazioa.

24. artikulua. Prestakuntza.

a) Lanorduetatik kanpo egindako ordu bakoitzeko konpentsazioa hitzarmen honen kontzeptu ekonomikoen taulan ageri da. Online prestakuntzaren orduak zuzeneko prestakuntzaren orduak bezala konpentsatuko dira.

b) Enpresa batzordeak, urte bakoitzeko irailean, zuzendaritzari hurrengo urterako prestakuntza ikastaroen proposamena egin diezaioke, zuzendaritzak aztertu eta, behar bada, aurrekontuan sar ditzan. Enplegu batzordearekin kontsultatuko da prestakuntzako eskaintza horren urteko programazioa.

c) Lan egutegiaren arabera, urteko lanaldia bete arte geratzen diren benetako lanetik kanpoko orduak beste prestakuntza ordu ezarriko dira. Prestakuntza orduak honela banatuko dira:

• 2025 - 14 ordu, enpresak bere gain hartzen dituenak. 5 lantalde/3 txanda araubideari lotuta ez dauden langileek ordu horiek hartzen ahalko dituzte, beren arduradunarekin koordinatuta, hitzarmen honek irauten duen bitartean.
• 2026 - Adostasunez berrikusten ahalko den hurrengo banaketa adostu da: 6 orduko bi saio.
• 2027 - Adostasunez berrikusten ahalko den hurrengo banaketa adostu da: 6 orduko bi saio.
• 2028 - Bisurtea da eta 8 orduko pool efektiboa dago; adostasunez berrikusten ahalko den hurrengo banaketa adostu da: 4 orduko saioa.

Jardunaldi horiek lan egutegiaren barnean eginen direnez, gutxienez hilabete bat lehenago egin beharko da abisua. Ezin dira udako hilabeteetan finkatu, non ez den salbuespeneko arrazoiren bat, batzordearekin hitzartu beharko dena.

Bisurteetan pool egun bat sartuko da dagokien langileen egutegian.

Egutegian ezarritako prestakuntza orduei dagokienez, enpresak lanbide heziketako borondatezko ekimenak baloratzeko konpromisoa hartzen du, betiere prestakuntza edo informazio eduki komunak bermatzen badira.

d) Enpresak ebaluatuko du bideragarria den lan poltsara atxikitako langileek enpresak antolatzen dituen prestakuntza jardueretan parte hartzea, geroko kontratazioetarako interesgarriak badira.

25. artikulua. Ohikoa baino lanaldi luzeagoak (Pool).

a) Pool egunen xedea da absentismo guztiak betetzea (eritasun edo istripuaren ondoriozko lanerako ezintasun iragankorra, lizentziak, baimenak, enpresa batzordeko nahiz segurtasun eta higienearen batzordeko kideen absentziak), bai eta zegokien opor zikloan lanerako ezintasun iragankorrean egotearen ondorioz plantillako langileek ziklotik kanpora hartutako opor egunak ere.

Era berean, pool egunekin beteko dira prestakuntzaldian dauden langileengatik sor daitezkeen premiak. Horrelakoetan ordezkapena goizeko txandan eginen da.

Bakarka hartzeko egunak edo konpentsazioko atseden egunak ere ordezkatuko dituzte, larunbat, igande eta jaiegunetan egiten diren arratsaldeko eta gaueko txandak izan ezik.

Apartatu honetan adierazitako guztia atal berean gertatzen diren absentziez ulertzen da; beraz, atalez atal gertatzen direnak:

–Paper-orea.

–Berreskuratzea eta Energia.

–Papera.

–Mantentze-lanak.

–Laborategia.

–Bulegoak.

b) Igandeko eta jaiegunetako pool egunak asteko beste egun batzuetara aldatzen ahalko dira, arduradunaren iritziz zerbitzuko beharrek horretarako bide ematen badute.

Pool eguna aste barreneko beste egun batera, aurreko batera zein ondokora, aldatuz gero, eta langileak egutegian esleitutako igande edo jaiegun batean lanera joan beharra badu, fabrikara joan beharko du bere zerbitzuak beharrezkoak diren txandan. Lehenbiziko kasuan (aurreko egunera aldatzea), gehitu den lanegunaren truke egun bateko konpentsazioa besterik ez du izanen, bakarka hartzeko egunak erabiltzeko ezarritako araudi berarekin.

c) Absentzia bete behar duen langilea aukeratzeko, honakoak aztertuko dira: lanpostu hutsa, ohiko taldeko gainerako langileen gaitasun profesionala eta gainetik dagoen taldeko langileen gaitasun profesionala. Arduradunek hartuko dituzte, kasuz kasu, erabaki komenigarrienak.

d) Ordezkapen bat gaueko txandan eginez gero eta biharamunean ez bada arratsaldez edo gauez ordezkapenik egin beharrik, eta ordezkapena egin beharra gaueko txandan lan egin ondoren ezagutu edo sortua ez bada, egun horretan ez da zerbitzu emanen.

26. artikulua. Bulegoetako ordutegia.

Bulegoetako ordutegiaren barruan, bazkaltzeko etenaldia 45 minutu eta ordu eta erdi artekoa izaten ahal da. Era berean, ordu erdirainoko sartzeko eta irteteko tartea ezartzen ahalko da, eta sartzeko tartea 7:30etik 8:30era bitartekoa izanen da. Malgutasuna departamentuko buruarekin koordinaturik erabiliko da, zerbitzuaren beharrei erantzuten zaiela ziurtatzeko. Malgutasuna egunero egokitu behar da, ezarritako lanaldia osatuz, betiere.

Lanaren antolaketagatik ezinezkoa den zerbitzuetan ez da malgutasuna erabiltzen ahal.

Bulegoetako langileek urteko ostiral guztietan 8:00etatik 15:00era arte eginen dute lan, ekainetik irailera artekoak kenduta. Erretenen sistema bat ezarriko da, kontabilitate itxiera egiteko aurreikusitako datak beteko direla bermatzeko. Horren zehaztapena eta neurria kasu bakoitzean finkatuko dira lantegiko zuzendaritzaren iritzira.

IX. KAPITULUA.–PUNTUALTASUNA ETA KONTROLEKO ERLOJUA

27. artikulua.

Lanera berandu iristea, bidezko arrazoirik gabe, edo kontroleko erlojuan ez fitxatzea falta arin, astun edo oso astuna izan daiteke eta horren arabera zehatuko da, Barne Araubidearen Erregelamenduaren 88. artikuluari jarraikiz.

Falta arinak.: Bidezko arrazoirik gabe hogeita hamar egun jarraituko epean hiru alditik zazpira bitarte berandu iristea, edo bi aldiz, atzerapena ordu bat baino gehiagokoa denean eta, orobat, epe horretan kontroleko erlojuan bi aldiz ez fitxatzea.

Falta astunak: Bidezko arrazoirik gabe hogeita hamar egun jarraituko epean zortzi alditik hamarrera bitarte berandu iristea, edo hirutik zazpira bitarte, atzerapena ordu bat baino gehiagokoa denean eta, orobat, epe horretan kontroleko erlojuan hiru alditik bostera ez fitxatzea, eta hiru hilabeteko epean hutsegite arina berriro egitea.

Falta oso astunak: Bidezko arrazoirik gabe hogeita hamar egun jarraituko epean hamar aldiz baino gehiagotan berandu iristea, edo bost aldiz baino gehiagotan, atzerapen bakoitza ordu bat baino gehiagokoa denean eta, orobat, epe horretan bost aldiz baino gehiagotan ez fitxatzea, eta sei hilabeteko epean hutsegite larria berriro egitea.

Aurreko guztia ulertzen da lan egin gabeko denborari dagokion deskontua galarazi gabe, zeina kalkulatzeko hitzarmen honen 8q artikuluan ezarritako koefizientea aplikatuko baita.

X. KAPITULUA.–ORDAINSARI ALDAKORRAK

28. artikulua. Ordainsari aldakorra.

a) Paper makinaren efizientzia:

1.–Aplikazio eremua:

Soldata kontuetan hitzarmen kolektiboaren eraginpeko langile guztiak.

2.–Banatzeko irizpideak:

Hiru hilean behin kobratzen den ordainsaria, hiruhilekoa bukatutakoan, atxikitako taularekin bat, 8a, 8b, 8h, 8i, 8j, 8ki, 8kii, 8m eta 24. artikuluetan bildutako soldata kontzeptuen baturaren gainean, bakoitzaren lanbide-azpitalde edo mailaren arabera.

3.–Kalkulatzeko irizpideak:

Hiru makinen efizientziaren batez besteko aritmetikoa, ehunekotan neurtua.

"Efizientzia ehunekotan" deitzen zaio makina bat lanean ari den denborari, hau da, makina erabilgarri den denbora osotik (24 ordu eguneko) geldiune guztiak kenduta.

Multzo horretan ez dira sartuko eskaerarik ezagatik makina geldirik dagoen denbora edo inbertsio lanak egiteko denbora, edo geldialdi programatuetan ezarritakoa gainditzen duten denborak, instalazio batzuk geldi egon beharrez papera egiteko makinak ere gelditu beharra baldin badago. Kasu horietan, efizientzia kalkulatzerakoan ez dira kontuan hartuko geldiune horiek, edo makina horietako batek geldi egon behar badu hilabetea baino denbora gehiago, hori ez da efizientziaren kalkuluan sartuko.

4.–Ordainsarien taula:

b) Segurtasuna:

1.–Aplikazio eremua:

Soldata kontuetan hitzarmen kolektiboaren eraginpeko langile guztiak.

2.–Banatzeko irizpideak:

Hiruhileko batean maiztasun indizea "zero" denean (MI=0), %1,14 ordainduko da, 8a, 8b, 8h, 8i, 8j, 8ki, 8kii, 8m eta 24. artikuluetan bildutako soldata kontzeptuen baturaren gainean, bakoitzaren lanbide-azpitalde edo mailaren arabera.

Urte bukaeran maiztasun indize metatua "zero" baldin bada, pizgarri erantsi gisa %0,57 kobratuko da.

c) Absentismoa:

1.–Aplikazio eremua:

Soldata kontuetan hitzarmen kolektiboaren eraginpeko langile guztiak.

2.–Banatzeko irizpideak:

Hilabete batean absentismoaren indizea (gaixotasunak, baimenak eta ordaindutako zein ordaindu gabeko absentziak, medikuarenera joatea eta justifikatu gabeko faltak) %4,0tik beherakoa bada, atxikitako taularen araberako ordainsaria emanen da, 8a, 8b, 8h, 8i, 8j, 8ki, 8kii, 8m eta 24. artikuluetan bildutako soldata kontzeptuen baturaren gainean, bakoitzaren lanbide-azpitalde edo mailaren arabera. Absentismoaren indizea kalkulatzeko, ez dira kontuan hartuko 90etik gorako egunak iraupen luzeko gaixotasunetan.

Urte bukaeran absentismo indize metatua %4,0 edo txikiagoa baldin bada, ordaindu gabeko hilabeteei dagokien zatia kobratuko da.

3.–Ordainsarien taula:

Hilabetero, enpresak aldagaiei buruzko informazioa emanen dio batzordeari, haien jarraipena eta eboluzioa egiteko.

Lehenengo xedapen gehigarria.

a) Hitzarmen honen indarraldian, lantegian normaltasunez eginen da lan, lan egin beharreko edozein jaiegunetan bezala, abenduaren 24ko 14:00etatik abenduaren 26ko 6:00ak arte eta abenduaren 31ko 14:00etatik urtarrilaren 2ko 6:00ak arte. Multzo horretan sartuko dira, halaber, 2029ko urtarrilaren 1a eta 2a (goizeko 6:00ak arte).

Enpresak prestatuko ditu aurreko paragrafoan zehaztutako egunetan lan egitea borondatez onartzen dutela adierazi duten langileen zerrenda eta egutegiak.

Egun horietan beharrezko lanpostuak beteta egonen direla bermatzeko formulak ezartzeko asmoz, ondokoa hitzartu da:

1. Hitzarmenaren indarraldian egun horietan lan egiteko konpromisoa hartu duen boluntarioen bitartez beteko dira lanpostuak.

2. Enpresa batzordearen eta enpresaren arteko batzorde bat eratuko da boluntarioen bidez betetzen ez diren lanpostuen arazoak konpontzeko.

3. Atalak aztertuko ditu beste neurri osagarri batzuk atal bakoitzean lana bermatzeko.

b) Aurreko apartatuan adierazitako egun eta txandetan lan egiten duten langileek zenbateko hauek jasoko dituzte 2026ko eguberrietako eta urte hondarreko txandetan, lanaren konpentsazio oso eta orokor gisa:

Balore horiei hitzarmen honen 7. artikuluan 2027 eta 2028rako ezarritako igoera portzentajeak erantsiko zaizkie.

c) Gainera, abenduaren 24an eta abenduaren 31n gaueko txandako langileek pool-eko egun bat gutxiago izanen dute lan egindako gau bakoitzeko. Egun hori hartua edo konpentsatua izan daiteke.

d) Konpentsazio horiek kobratuko dira aipatu egunetako lanaldia hitzarmen honetan ezarritako urteko lanaldiaren gainetik dagoelako.

e) Prestatzen diren zerrendekin posible bada beharrezko lanpostu guztiak betetzea plantaren funtzionamendu arrunterako, enpresak konpromisoa hartzen du ezen, merkatuaren arrazoiak direla-eta lanpostu horietakoren bat egun horietan beharrezkoa ez bada, bertaratu behar ez dutenek hitzartutako zenbatekoen %25 jasoko dutela (baina ez C apartatuan ezarritako egunak).

Bigarren xedapen gehigarria.–Lana Zangozako festetan: Fabrikan etenik gabe lan egin eta horrela produkzio prozesua ahal den hobea izatea bermatu beharra dagoenez, beste egutegi bat aztertu eta hitzartu zen behar horri erantzuteko. Hartara, aldatu dira Zangozako festetan ezarritako oporrak.

Bi alderdiek hitzartuta, egutegi berri hori 2016an sartu zen indarrean. Langileen balioaniztasunen bidez bermatzen du urte osoko lana, Eguberrietan izan ezik, orain arte bezala funtzionatzen jarraituko baitute.

Opor egunen aldaketa honela konpentsatuko da:

a) Iraileko paga bat, hitzarmen kolektibo honen 8l artikuluan ezarri bezala.

b) 2026tik aurrera herriko festetan lan egindako egun bakoitzeko 74,15 euroko plus lineala, hitzarmenaren esparru ekonomikoan sartutako langile bakoitzarentzat, egutegiaren arabera Zangozako festetako egun espezifikoetan lan egin behar badute eta benetan lan egiten badute. Kanpo geldituko dira paragrafo honetan espresuki aipatzen ez diren langileak.

c) Egutegi hori aldatu behar bada, enpresa batzordearekin hitzartuko da.

Balore horiei hitzarmen honen 7. artikuluan 2027 eta 2028rako ezarritako igoera portzentajeak erantsiko zaizkie.

Iragarkiaren kodea: F2604608